1, 2. 1) ¿Tlake neskayotl kinextia tijnekij ma techyolchikauakaj uan ma tijmatikaj kenijkatsa tikinyolchikauasej sekinok? 2) ¿Tlake kinpano sekij konemej?

NOCHI tijnekij ma techyolchikauakaj uan tiuelij tikinyolchikauaj sekinok pampa toTeotsij kiampa techchijchijki. Ma tikitakaj se neskayotl: kema se okichpil uetsi uan motlankuauatania pampa mauiltiyaya, nimantsi chokatia kampa itstok inana o itata. Maske inijuantij amo uelij kichikauaj, kena uelij kikajkaualtiaj. Kitlajtlaniaj tlake kipanok, kiixayopojpouaj, kinajnauaj uan kikamanaljuiaj ika tlaiknelili, uan uelis kitsejtselouaj uan kipajtiliaj kampa mokokok. Nopa okichpil nimantsi mokajkaualtia uan uelis sampa yaui mauiltia. Kej panotias tonali, kaxanis kampa mokokok.

² Uan sekij konemej kinpano tlamantli tlen tlauel kinyolkokoua. Sekij kinitskiaj o kinchiuiliaj tlen tlauel amo kuali, uelis miak xiuitl kiampa kichiuiliaj o san sempatsi kinpano. Nopa tlamantli tlen kinpano kichiua tlauel ma moyolkokokaj. Sekij maseualmej katli kiampa kinchiuiliaj konemej kinpantiaj uan kintlatsakuiltiaj uan sekinok amo. Uan maske katli kichiua nopa tlamantli nima kitlatsakuiltiaj, katli kinitskiaj kema elij konemej nojua tlaijiyouiaj o moyolkokouaj kema motlamij o ya elij uejueyij.

3. 1) Kej kiijtoua 2 Corintios 1:3, 4, ¿tlake kineki Jehová? 2) ¿Tlake tlajtlanili tijnankilisej?

³ ¿Tlake uelis kipaleuis se toikni katli nojua tlauel moyolkokoua pampa kema okichpil o siuapil se akajya kiitskik? (Xijpoua 2 Corintios 1:3, 4, NHWBI). Jehová kineki ma kinyolchikauakaj itekipanojkauaj uan ma kimatikaj tlauel kinikneliaj. Yeka, ma tikitakaj kenijkatsa monankilia ni tlajtlanili: ¿Kenke moneki ma kinyolchikauakaj katli kinitskijkej kema eliyayaj konemej?  ¿Ajkia inijuantij uelis kinyolchikauas? ¿Uan tlake uelis tijchiuasej tlaj tijnekij tikinyolchikauasej?

4, 5. 1) ¿Kenke moneki tikilnamiktosej konemej amo elij sanse kej katli ya uejueyij? 2) ¿Tlake pano ika se konetl kema se akajya kiitskia?

⁴ Sekij maseualmej katli kinitskijkej kema eliyayaj konemej nojua moneki ma kinyolchikauakaj maske ya panotok miak xiuitl. Tlaj tijnekij tijkuamachilisej kenke, achtoui moneki tikilnamikisej konemej amo elij sanse kej katli ya uejueyij uan amo nochi sanse kiyolmatij kema kinchiuiliaj tlamantli tlen tlauel amo kuali. Ma tikitakaj kenke.

⁵ Konemej moneki kuali mouikasej ininuaya katli kiniskaltiaj uan kinmokuitlauiaj uan motemachisej ipan inijuantij. Kema kiampa kichiuaj, inijuantij amo majmauij uan motemachiaj ipan maseualmej katli kinikneliaj (Sal. 22:9). Maske amo kinamiki kiampa panos, ipan ininchaj kinchiuiliaj tlen amo kuali, uelis kinitskia se tlen ichampoyouaj o iteixmatkauaj, o se akajya katli kuali mouika ininuaya ininuampoyouaj. ¿Tlake pano kema se akajya katli ipan motemachia kichiuilia tlen tlauel amo kuali? Ayokmo motemachia ipan yon se maseuali, maske uelis ya panotok miak xiuitl.

6. ¿Kenke tlauel amo kuali kema kiitskiaj se konetl?

⁶ Konemej amo uelij momanauiaj. Kema se akajya kinitskia, tlauel kintlaijiyouiltia pampa kinchiuilia tlen tlauel amo kuali. Konemej tlauel tlaijiyouiaj kema se akajya kinchiualtia ma motekakaj iuaya, pampa ayamo kipiaj xiuitl uan ayamo kikuamachiliaj tlake kiijtosneki kema katli mosenkajtokej motekaj sansejko. Kema se akajya kiitskia se konetl, nopa konetl ayokmo kiita kej kinamiki kema se akajya moteka iuaya seyok. Nojkia, kichiua ma moiljui ya amo tleno ipati uan ayokmo motemachia ipan yon se maseuali katli kinechkauia.

7. 1) ¿Kenke se akajya amo ouij kikajkayaua se konetl, uan kenijkatsa kinkajkayauaj? 2) ¿Tlake pano pampa kinkajkayauaj?

⁷ Konemej ayamo kuali tlalnamikij yon moiljuiaj tlaj kinpanos tlen amo kuali, yeka amo mouejkatlaliaj (1 Cor. 13:11). Katli kineki kiitskis se konetl, nima kikajkayaua. Kiiljuia miak tlamantli tlen teipa kichiuas tlauel ma moyolkoko, kej kema kiiljuia ya kipia tlajtlakoli uan yeka moteka iuaya, kema kiiljuia amo ma teiljui tlen kichiuilia, amo aka kitlakakilis yon kineltokas tlen kiijtos, uan kema kiiljuia moteka iuaya o kiijitskia pampa tlauel kiiknelia. Maske pano miak xiuitl, se konetl amo kikuamachilia san kikajkayajkej ika nochi ni tlamantli. Uelis kema moskaltijtias, nopa konetl moiljuis itstok kejuak sokiyo, amo tleno ipati uan amo kinamiki ma kiiknelikaj.

8. ¿Kenke temachtli tijmatij Jehová uelis kinyolchikauas katli kinchiuilijtokej tlen amo kuali?

⁸ Ika nochi tlen tikitstokej, nama tijkuamachiliaj kenke se akajya katli kiitskiaj kema nojua eli okichpil o siuapil tlauel miak xiuitl moyolkokoua. Nelia eli se ueyi tlajtlakoli. Miakej kichiuaj nopa tlamantli tlen tlauel amo kuali, uan yeka tijmatij tiitstokej ipan itlamia tonali, pampa maseualmej amo teikneliaj, uan “axkuajkualmej” katli “tlakajkayauaj” nojua kichiuasej tlen amo kuali (2 Tim. 3:1-5, 13). Tlen Satanás kichiua nelia tlauel amo kuali, uan tlauel techyolkokoua kema maseualmej kichiuaj tlen ya kipaktia. Maske kiampa kichiuaj, san Jehová tlauel kipia miak chikaualistli, uan kuali kimati tlake mosentlalia kichiuas Satanás. Yeka, uelis timotemachisej Jehová kikuamachilia tlake tijyolmatij uan uelis techyolchikauas. Tlauel tiyolpakij tijtekipanosej toTeko Jehová, “katli techtlasojtla uan tlatoktsitsij techyoltlalia. Yaya techyoltlalia ipan nochi nopa tlaouijkayotl katli techpanotiuala uan kej nopa kichiua para tojuantij nojkia tiuelisej tikinyoltlalisej sekinok katli itstokej ipan  tlaouijkayotl sanse kej toTeko techyoltlalijtok” (2 Cor. 1:3, 4, NHWBI). Uan, ¿ajkia kintekiuia Jehová kema techyolchikaua?

9. Kej kiijkuilok David ipan Salmo 27:10, ¿kenijkatsa Jehová kinpaleuis katli inintatauaj amo kinmokuitlauiaj kej kinamiki?

⁹ Uelis tlauel moneki ma kinyolchikauakaj katli inintatauaj amo kinmanauijkej kema eliyayaj konemej o katli se tlen ininchampoyouaj kinchiuilik tlen amo kuali. Tlanauatijketl David kimajtoya san Jehová ueliskia techyolchikauas (xijpoua Salmo 27:10). Ya motemachiyaya Jehová kinmokuitlauia katli ininchampoyouaj kinchiuilijtokej tlen amo kuali. ¿Kenijkatsa kichiua? Ika sekinok itekipanojkauaj. Toikniuaj tlen tlanechikoli elij kejuak tochampoyouaj. Se tonali, Jesús kiijtok katli kiueyichiuayayaj toTeotsij iuaya, kejuak eliyayaj itlakaikniuaj, isiuaikniuaj uan inanauaj (Mat. 12:48-50).

10. ¿Tlake kiijtok Pablo kichiuayaya kema eliyaya ueuejtlakatl?

¹⁰ Ma tikitakaj kenijkatsa pano ni ipan tlanechikoli. Apóstol Pablo eliyaya se ueuejtlakatl katli kuali tlaneltokayaya uan chikauak tlatekipanouayaya. Ya tlauel kinpaleuik sekinok ika tlen kichijki, uan toTeotsij kiyakanki kema kiniljuik sekinok nojkia ma kichiuakaj kej ya, pampa ya kichiuayaya sanse kej Cristo (1 Cor. 11:1). Se tonali, kiijtok tlake kichiuayaya kej ueuejtlakatl: “Kema tiitstoyaj inmouaya, tiinmechkamauijkej ika yamanik tlajtoli. Tiinmechchiuilijkej keja se tenaj tlen kiniskaltia ikoneuaj ika miak teiknelili” (1 Tes. 2:7). Ipan ni tonali, ueuejtlakamej nojkia kamanaltij ika yamanik tlajtoli uan ika miak tlaiknelili kema kitekiuiaj Biblia uan kiampa kinyolchikauaj katli tlaijiyouiaj.

11. ¿Kenijkatsa tijmatij amo san ueuejtlakamej uelis teyolchikauasej?

¹¹ ¿San ueuejtlakamej kinamiki kinyolchikauasej katli kinpanok tlen amo kuali kema eliyayaj konemej? Amo, pampa nochi kinamiki tijchiuasej tlen techtlajtolmaka 1 Tesalonicenses 4:18: “Ximoyolchikauakaj se ika seyok”. Tosiuaikniuaj katli tlalnamiktokej uan kuali tlaneltokaj uelis kinyolchikauasej sekinok tosiuaikniuaj.  Jehová kiijtoua yaya kichiua kej se tenaj katli kiyoltlalia ikone (Is. 66:13). Uan Biblia kiijtoua miakej siuamej kinpaleuijkej sekinok katli tlaijiyouiyayaj o motekipachojtoyaj (Job 42:11). Jehová tlauel yolpaki kema tosiuaikniuaj kinpaleuiaj sekinok tosiuaikniuaj katli tlauel mokuesouaj. Kemantika, ueuejtlakamej uelis kiiljuisej se tosiuaikni katli kuali tlalnamiktok ma kipaleui se tosiuaikni katli mokuesoua. *

12. ¿Tlake amo kinamiki tijchiuasej kema tijpaleuisej se toikni?

¹² Kema tijpaleuisej se toikni, amo kinamiki tijtlajtlanisej se keski tlamantli tlen ya amo kineki kiijtos (1 Tes. 4:11). Uajka, ¿kenijkatsa uelis tijpaleuisej se akajya katli moneki ma tijyolchikauakaj uan kineki ma tijpaleuikaj? Ma tikitakaj makuili tlamantli tlen mokixtijtok ipan Biblia.

13. 1) Kej kiijtoua 1 Reyes 19:5-8, ¿kenijkatsa Jehová kipaleuik Elías? 2) ¿Kenijkatsa uelis tijchiuasej kej nopa iluikaejketl?

¹³ Kuali ma tijpaleuikaj. Kema tlajtolpanextijketl Elías mochololtik pampa kinekiyayaj kimiktisej, tlauel mokuesok uan kinekiyaya mikis. Yeka, Jehová kititlanki se iluikaejketl ma kiyolchikauati. Nopa iluikaejketl nojkia kitlamakak (xijpoua 1 Reyes 19:5-8). Ni techmachtia se tlamantli tlen tlauel ipati: kemantika, tlauel kipaleuis katli moyolkokoua kema tijchiuasej se tlamantli maske amo tlauel ueyi. Tlaj tijtlaneuisej ma tlakuati tochaj, tijmakasej o tikijkuiljuilisej se tlenijki, nopa toikni kiitas tikikneliaj ika nochi toyolo uan techtekipachoua tlen kipano. Uelis tijchiuasej ni tlamantli tlaj amo kuali tijyolmatij tikamanaltisej iuaya tlen se keski tlamantli tlen kiyolkokoua o san tlen ya kimajtok.

14. ¿Tlake seyok tlamantli techmachtia tlen kipanok Elías?

¹⁴ Ma tikinpaleuikaj amo ma majmauikaj uan kuali ma kiyolmatikaj. Sampa ma tikitakaj tlen kipanok Elías. Jehová kimakak chikaualistli uan yeka tlauel uejka motlalok uan asito ipan tepetl Horeb, kampa uejkajkia Jehová kichijtoya nopa tlajtolsenkauali ika ialtepe. Nopaya, Elías amo majmajki pampa kimajtoya amo tleno kipanoskia uan amo kipantiskiaj katli kinekiyayaj kimiktisej. ¿Tlake seyok tlamantli tijyekouaj? Tlaj tijnekij tikinpaleuisej katli kinitskijkej kema eliyayaj konemej, achtoui moneki tikinpaleuisej amo ma majmauikaj uan ma kimajtokaj ayokmo aka kinchiuilis tlen amo kuali. Ueuejtlakamej moneki kimajtosej amo nochi sanse elij. Se tosiuaikni uelis kinekis ma yakaj ichaj, kampa uelis kafenitosej, uan nopaya kamanaltisej. Uan seyok uelis kinekis kamanaltis kema itstokej ipan kali kampa timosentiliaj.

15, 16. ¿Tlake kiijtosneki kuali titetlakakilisej?

¹⁵ Kuali ma tijtlakakilikaj. Biblia techtlajtolmaka ni: “Nimantsi xijtlakakilikaj kuali kema seyok [inmechkamanaljuia]” (Sant. 1:19). ¿Timomajtokej kuali titetlakakiliaj? Uelis timoiljuiaj kuali titlakakij san pampa amo timoliniaj, tikixtlachiliaj katli technojnotstok uan pampa amo tleno tijchijtokej. Kuali titlakakisej amo san ya nopa kiijtosneki. Ma tikitakaj tlake kichijki Jehová. Kema Elías kiiljuik nochi tlen kiyolmatiyaya uan tlen kitekipachouayaya, toTeotsij kuali kitlakakilik. Kiitak nopa tlajtolpanextijketl majmauiyaya, kiyolmatiyaya iselti itstok uan kiitak moiljuiyaya san tlapik nochi tlen kichijtoya. Ika miak tlaiknelili, Jehová kipaleuik ika sejse tlamantli tlen kikuesouayaya. Kiampa kinextik kuali kitlakakilijtoya (1 Rey. 19:9-11, 15-18).

¹⁶ Kema tijtlakakiliaj se akajya katli kichiuilijkej tlen amo kuali kema eliyaya konetsi,  ¿kenijkatsa uelis tijnextisej tikikneliaj uan tijtlasojtlaj? Kemantika, tlaj tikiljuisej se tlenijki ika miak tlaiknelili, ya kiitas tlake tijyolmatij. Ueliskia tikiljuisej ni: “Tlauel nechyolkokoua tlen mitspanok. Amo aka kinamiki kiampa kichiuilis se okichpil o se siuapil”. Uan tlaj tijnekij kuali tijkuamachilisej tlen kiijtoua, ueliskia tijtlajtlanisej se keski tlamantli: “¿Ueliskia sampa tinechiljuis? Nijneki kuali nijkuamachilis tlen tikijtoua”, o “Kema tikijtok nopa, na nijkuamachilik..., ¿kena ya nopa tijnejki tikijtos?”. Tlaj tijchiuasej ni, kiitas nelia kuali tijtlakakiliaj uan tijchiuaj kampeka tijkuamachilisej tlen kiyolmati (1 Cor. 13:4, 7).

17. ¿Kenke moneki tijpiasej toyolo uan amo nimantsi tikamanaltisej?

¹⁷ Nojkia moneki amo nimantsi tikamanaltisej. Amo ma tijtlajtolmakakaj o ma tijtlalnamiktikaj kema kamanaltitos. Uan ma tijpiakaj toyolo. Kema Elías kamanaltik iuaya Jehová, xitlauak kiiljuik nochi tlen kikuesouayaya. Uan teipa, kema Jehová ya kiyolchikajtoya, Elías sampa kiiljuik nochi tlen achtoui kiiljuijtoya (1 Rey. 19:9, 10, 13, 14). Ni techmachtia kema se akajya tlauel mokuesoua, uelis miakpa kiijtos tlen kiyolmati. Kema kiampa panos, moneki tijpiasej toyolo uan kuali tijtlakakilisej, sanse kej Jehová kichijki. Amo ma tikiljuijtiuetsikaj tlake kinamiki kichiuas, kualtiaskia tijnextisej tijtlasojtlaj uan tikikneliaj (1 Ped. 3:8).

18. ¿Kenijkatsa uelis tijyolchikauasej katli mokuesoua kema timomaijtosej, uan kenke tlauel kinpaleuia?

¹⁸ Ma timomaijtokaj ika nochi toyolo ininuaya katli mokuesouaj. Katli tlauel mokuesoua uelis ouij kimati momaijtos. Uelis moiljuia amo tleno ipati uan yeka amo kinamiki kinojnotsas Jehová. Tlaj tijnekij tijpaleuisej, ma timomaijtokaj iuaya uan ma tikijtokaj itoka. Ma tikiljuikaj Jehová kenijkatsa tojuantij uan toikniuaj tlen tlanechikoli tlauel tikikneliaj nopa toikni. Uan ma tikiljuikaj ma kipaleui ayokmo ma moyolkoko. Tlaj kiampa tijchiuasej, nelia tlauel tijyolchikauasej toikni (Sant. 5:16).

19. ¿Tlake techpaleuis ma tijmatikaj kenijkatsa titeyolchikauasej?

 ¹⁹ Ma tikijtokaj tlen teyolchikauas uan teyoltlalis. Tlaj tijnekij tikijtosej se tlenijki, achtoui kuali ma timoiljuikaj tlake tikijtosej. Kema amo tijchiuaj nopa, san titeyolkokouaj ika tlen tikijtouaj, uan kema tikamanaltij ika miak tlaiknelili, kinpaleuia katli techtlakakiliaj (Prov. 12:18). Yeka, ma tikiljuikaj Jehová ma techpaleui tijmatisej tlake tikiljuisej se akajya katli moyolkokoua uan kiampa tijyolchikauasej uan tijyoltlalisej. Ma tikilnamikikaj tlauel kipaleuis tlen uala ipan Biblia, pampa eli toTeotsij iTlajtol (Heb. 4:12).

20. ¿Tlake moiljuiaj sekij pampa kinchiuilijtokej tlen amo kuali, uan tlake tijnekij tikinilnamikilisej?

²⁰ Pampa kinchiuilijkej tlen amo kuali kema eliyaya konemej, uelis sekij moiljuiaj amo tleno ininpati uan kejuak sokiyojkej, uan amo aka kiniknelia. Uelis moiljuiaj amo kinamiki ma kiniknelikaj. ¡Nopa amo nelia! Yeka, ika Biblia ma tikinilnamikilikaj kenijkatsa Jehová tlauel kiniknelia (xikita nopa recuadro “ Textos tlen teyolchikaua”). Ma tikitakaj tlake panok kema tlajtolpanextijketl Daniel mokuesok uan motekipachok. ToTeotsij kititlanki se iluikaejketl ma kiyolchikauati Daniel, pampa kinekiyaya ma kimati kenijkatsa ya tlauel kipatiitayaya uan kiikneliyaya (Dan. 10:2, 11, 19). Nojkia, Jehová tlauel kinpatiita nochi toikniuaj katli mokuesouaj.

21. 1) ¿Tlake kinpanos katli kichijtokej tlen amo kuali uan amo moyolkuepaj? 2) ¿Tlake nojua moneki tijchijtosej?

²¹ Kema tikinyolchikauaj sekinok, tikinilnamikiliaj Jehová tlauel teiknelia. Uan nojkia moneki tikilnamikisej ya kipaktia tlen xitlauak. Toteotsij amo tleno uelis kitlatilisej, pampa ya kiita nochi tlen amo kuali katli kichiuaj maseualmej, uan kema kinamikis, kintlatsakuiltis nochi katli amo moyolkuepaj (Núm. 14:18). Uan tojuantij moneki nojua tijchijtosej kampeka tikinnextilisej katli kinchiuilijtokej tlen amo kuali kenijkatsa tlauel tikinikneliaj. Tlauel techyolchikaua tijmatisej se tonali Jehová kichiuas ayokmo tleno ma kinyolkoko nochi tlen Satanás uan maseualmej kinchiuilijtokej. Nechka asis nopa tonali kema ayokmo kema kiilnamikisej tlen kinpanok (Is. 65:17).