1, 2. 1) ¿Toni neskayot kinextia ke tinochin moneki maj techyolseuikan uan no ke tiuelij tikinyolseuiaj oksekin? 2) ¿Toni tein amo kuali kinchiuilianij seki konemej?

TINOCHIN moneki maj techyolseuikan uan no tiuelij tikinyolseuiaj oksekin. Kemej neskayot, keman se konet uetsi uan motankuaxitoma keman mauiltijtok, niman kitemoua ipopaj oso imomaj. Yejuan amo uelij kipajtiaj, sayoj ke uelij kiyolseuiaj. Kitajtaniaj toni kipanok, kiuachiliaj iixayo, kinauaj uan kinojnotsaj ika netasojtalis uan xa kichipauiliaj uan kipikiliaj kampa mokokoj. Ompa, konet amo chokaok uan xa hasta oksepa mauiltiti. Ijkon kemej panouaj tonalmej pajti kampa mokokojka.

² Sayoj ke, onkakej konemej akin kinpanoua se taman tein okachi kintajyouiltia. Sekin xa sepa oso miak xiujmej ininka mauiltiaj. Nochi nejon kichiua maj konet semi yoltajyoui. Sekin akin ininka mauiltiaj konemej kintatsakuiltiaj, sayoj ke oksekin uelij kitatiaj tein kichiuaj. Sayoj ke maski niman kintatsakuiltiskej, akin ika mauiltijkej kisentoka ika tajyouia hasta keman ueyiya.

3. 1) Kemej kijtoua 2 Corintios 1:3, 4, ¿toni kineki Jiova? 2) ¿Katiyejua netajtanilmej tiknankilitij?

³ ¿Toni uelis kipaleuis se tokniuj akin ika mauiltijkej keman katka konet uan kisentoka yoltajyouia? (Xikonixtajtolti 2 Corintios 1:3, 4). Jiova kineki maj iichkauan kinnextilikan netasojtalis uan maj kinyolseuikan. Yejua ika tiknankilitij eyi netajtanilmej: ¿Keyej moneki maj kinyolseuikan akin ininka mauiltianij? ¿Akoni uelis kinyolseuis? Uan ¿toni uelis tikchiuaskej tein ika tikinyolseuiskej?

4, 5. 1) ¿Keyej moneki maj tikelnamikikan ke se konet amo kemej aksa akin ueyiya? 2) ¿Keyej konet akin ika mauiltiaj kichiua maj amo takuaujtamatiok iniuan oksekin?

⁴ Sekin akin ininka mauiltijkej keman katkaj konemej moneki maj kisentokakan kinyolseuikan maski uejueykejya. Tikajsikamatiskej keyej komo yekinika tikelnamikij ke se konet amo kemej aksa akin ueyiya, yejua ika taman kemej uelis kijtakos keman ika mauiltiaj. Maj tikitakan seki taman keyej.

⁵ Konemej takuaujtamatij iniuan akin kiniskaltiaj uan kinyekpiaj. Yejua ika kuali momachiliaj uan kimatij ke akin kintasojtaj amo kinchiuiliskej tein amo kuali (Sal. 22:9). Tetayokoltij tikijtoskej ke miakej konemej ininka mauiltiaj ininkalijtik uan kichiuaj ininchankauan oso akin iniuan kuali mouikaj ininkalyetouanij. Keman aksa akin konet iuan takuaujtamati ika mauiltia, uelis kichiuas maj kiouijmaka takuaujtamatis iniuan oksekin maski panoskej miak xiujmej.

6. ¿Keyej tel amo kuali maj ininka mauiltikan konemej?

⁶ Konemej amo uelij mopaleuiaj. Konemej semi kintajyouiltia maj akin uejueykej kinchikaujkauikan maj iniuan motekakan. Keman ininka mauiltiaj kichiua maj amo kiitakan kemej kinamiki keman se siuat uan se takat mosentekaj, maj kimachilikan ke amo teyi chiuanimej uan maj amo takuaujtamatikan iniuan oksekin.

7. 1) ¿Keyej ueli ijsiujka kinkajkayauaj konemej uan keniuj kichiuaj? 2) ¿Toni kinemilia konet ika nejon tein kikajkayauaj?

⁷ Konemej ayamo tanemiliaj kemej se akin ueyiya uan amo kimatij keniuj mopaleuiskej (1 Cor. 13:11). Yejua ika, aksa ueli ijsiujka kikajkayaua se konet. Kikajkayaua keman kiluia ke yejua itajtakol maj ika mauilti, maj amo akin kilui, ke amo akin kineltokilis komo kijtoua tein panok oso ke ijkon kinextilia ke yekmelauj kitasojta. Miak xiujmej, akin ika mauiltijkej amo kiajsikamatis ke ika nejon kikajkayaujtoyaj. Ijkon kemej konet moskaltijtiyas uelis momachilis ke amo teyi chiujkej, ke amo kinamiki maj aksa kitasojta uan maj ika motekipacho.

8. ¿Keyej tikmatij ke Jiova ueli kinyolseuia akin ininka mauiltianij?

⁸ Ika nejin tikajsikamatij keyej akin ika mauiltiaj kisentoka tajyouia miak xiujmej. Se taman tein tel amo kuali. Maj miakej ininka mauiltikan konemej kinextia ke tinemij itech itamian tonalmej keman miakej “amo kipiaj ok tetasojtalis” uan no keman “ten amo yolkualime” okachi kichiuaj tein amo kuali (2 Tim. 3:1-5, 13). Amokuali kitemoua techtajyouiltis uan tetayokoltij maj taltikpakneminij kichiuakan tein yejua kiuelita. Sayoj ke Jiova okachi chikauak ke Satanás uan taltikpakneminij akin kichiuaj tein kineki Amokuali. Uan no, Dios kimati keniuj tekiti Satanás. Yejua ika tikmatij ke yejuatsin kiita totayokol uan ke ueli techyolseuia. Semi techyolpaktia tiktekitiliskej Dios akin “nachipa techyolpoxautinemi [oso techyolseuijtinemi] mientras tejuan titajyouijtinemij [...] para ke ma tejuan no tikinyolpoxautinemikan ne oksekin taneltokani ten yoltajyouijtinemij ika miak tataman toneukayot [...] ika mismo yolpoxauilis tenika Totajtsin Dios techyolseuijtinemi” (2 Cor. 1:3, 4). Sayoj ke, ¿itechkopa akoni techyolseuia Jiova?

9. Keman tetatmej amo kinmatampauiskej ininkoneuan, ¿toni kichiuas Jiova kemej kijtoj tekiuaj David itech Salmo 27:10?

⁹ Xa okachi moneki maj se kinyolseui akin inintatuan amo kitemouayaj kinpaleuiskej maj amo ininka mauiltianij oso ininka mauiltij se akin kuali kiixmatiaj. Tekiuaj David kimatia ke sayoj Jiova uelis okachi techyolseuis (xikonixtajtolti Salmo 27:10). Takuaujtamatia ke Dios kinpaleuia akin ininchankauan kinixtopeuaj uan amo kintasojtaj. ¿Keniuj kichiua? Itechkopa itekitikauan. Tokniuan itech nechikol kemej yeskia tokalyetouanij. Kemej neskayot, Jesús kijtoj ke akin iuan kiueyichiuayaj Dios katkaj iikniuan uan itatuan (Mat. 12:48-50).

10. ¿Keniuj kijtoj Pablo ke tamatia tekit tein kichiuaya kemej tayekankej?

¹⁰ Maj tikitakan se neskayot tein kinextia ke tokniuan kemej yeskiaj tokalyetouanij. Tatitanil Pablo katka se tayekankej tekitikej uan tatakamatkej akin kitemakak se kuali neskayot. Dios hasta kichiuak maj kiniluiani okseki tokniuan maj kitojtokanij ineskayo ijkon kemej yejua kitojtokaya ineskayo Cristo (1 Cor. 11:1). Se tonal, kijtoj tein kichiuaya kemej tayekankej: “Timochiuke tiyolyemanke namouan ijkon keme se tenan ten kinyektasojpia ipiluan” (1 Tes. 2:7). Axkan tayekananij no kinnojnotsaj ika netasojtalis keman kinyolseuiaj ika Biblia akin tajyouiaj.

11. ¿Toni kinextia ke amo sayoj tayekananij uelis kiyolseuiskej aksa?

¹¹ Amo sayoj tayekananij uelis kinyolseuiskej akin ininka mauiltianij. Tinochin moneki tikchiuaskej nejin: “Ximosepanyolchikauakan se uan okse” (1 Tes. 4:18). Tokniuan siuamej akin yekyolmajsitokej uelis okachi kinpaleuiskej okseki tokniuan siuamej akin moneki maj kinyolseuikan. Hasta Jiova kijtoua ke yejua kemej yeskia se temomaj akin kiyolseuia ikonetsin (Is. 66:13). Biblia ininka tajtoua siuamej akin kinpaleuijkej akin  semi tajyouijtoyaj (Job 42:11). Jiova kiyolpaktia kinitas tokniuan siuamej maj kinpaleuikan oksekin siuamej keman yoltajyouijtokej. Kemansa, tayekananij uelis kitajtaniskej se tokniuj siuat akin yekyolmajsitok ox uelis kipaleuis okse tokniuj siuat akin tajyouijtok. *

12. ¿Toni amo moneki tikchiuaskej keman tikpaleuiskej se tokniuj?

¹² Keman tikpaleuiskej se tokniuj, maj amo tiktajtanikan seki taman tein amo kineki ika tajtos (1 Tes. 4:11). Sayoj ke, ¿keniuj uelis tikinpaleuiskej akin moneki maj se kinyolseui? Maj tikitakan makuil taman tein Biblia techiluia kemej uelis tikchiuaskej.

13. 1) Kemej kijtoua 1 Reyes 19:5-8, ¿keniuj iángel Jiova kipaleuij Elías? 2) ¿Keniuj uelis no ijkon tikchiuaskej?

¹³ Maj tikchiuakan tein kipaleuis. Keman tanauatijkej Elías monekik cholos porin kinekiaj kimiktiskej, kinekia mosenkauas uan hasta mikis. Ijkuak, Jiova kititanik se ángel maj kiyolchikauati. Ángel kimakak takual totonik uan kiluij maj takua (xikonixtajtolti 1 Reyes 19:5-8). Nejon techmachtia se taman tein motelneki: keman tikchiuaskej se taman maski amo ueyi uelis kipaleuis se tokniuj akin tajyouijtok. Tikyoleuaskej maj touan takua, tikmakaskej se netetayokolil oso tikijkuilouiliskej teisa, kinextilis ke tiktasojtaj uan ika timotekipachouaj. Uelis tikchiuaskej nejon taman komo amo kuali timomachiliaj iuan titajtoskej ika tein kipanok uan tein kitajyouiltia.

14. ¿Toni okse taman techmachtia tein kipanok Elías?

¹⁴ Maj tikinpaleuikan akin ininka mauiltianij maj kuali momachilikan. Maj oksepa ika titajtokan tein kipanok Elías. Jiova kimakak chikaualis uan ijkon ueliskia ojtokas hasta tepet Horeb tein moajsia tel uejka, kampa miak xiujmej achto Jiova kichiujka se netenkaualis iuan ixolal. Ompa, Elías xa kimachilij ke amo teyi kichiuiliskiajok akin kinekiaj kimiktiskej porin uejka moajsia. ¿Toni techmachtia nejon? Komo tiknekij tikinpaleuiskej akin ininka mauiltianij, achto moneki tikchiuaskej maj kuali momachilikan. Kemej neskayot, tayekananij moneki kielnamikiskej ke tataman kemej sejse tokniuj tanankilia. Se tokniuj siuat xa okachi kuali momachilis tajtos iniuan tayekananij ompa ichan uan tayitos café uan okse xa okachi kuali momachilis komo iniuan tajtoua itech Kali kampa tiMosentiliaj.

15, 16. ¿Toni kijtosneki se kikakis aksa?

¹⁵ Maj tikakikan tein techiluiaj. Biblia techyolmajxitia: “Sejse de namejuan ximoijsiuilikan para xikakikan” uan no kijtoua: “Xiyolikachiakan para xitajtokan” (Sant. 1:19). ¿Tikchiuaj nejon? Uelis tiknemiliskej ke ijkon tikchiuaj komo tikixitaj, tikakij uan amo teyi tikijtouaj keman aksa techiluijtos tein kipanoua. Sayoj ke tikakiskej kijtosneki okse taman. Maj tikitakan tein kichiuak Jiova keman Elías kitapouij nochi tein kitekipachouaya. Dios kikakik ika miak nejmachkayot uan kiitak ke nejin tanauatijkej mouia, momachiliaya iselti uan kinemiliaya ke nenkaj nochi tein kichiujka. Ika netasojtalis Jiova kipaleuij itech sejse taman tein kitekipachouaya. Ijkon kinextij ke kuali  kikakik tein Elías kiluij (1 Rey. 19:9-11, 15-18).

¹⁶ Keman tikakij akin ika mauiltianij, ¿keniuj uelis tiknextiliskej ke tiktasojtaj uan tikikneliaj? Kemansa, komo tikiluiaj teisa tein kuali tiknemilijkej, kiitas tein tikmachiliaj. Ueliskia tikiluiskej: “Semi nechyolkokoua tein mitspanok. Nion se konetsin moneki maj ijkon kichiuilikan”. Xa ueliskia tikchiuiliskej seki netajtanilmej tein techpaleuis maj tikyekitakan ox tikajsikamatij tein techiluijtok. Ueliskia tikiluiskej: “Keman tikijtoj nejin, nikajsikamatik ke..., ¿yejua tein tiknekia tikijtos?”. Nejin tein tikiluiskej kinextilis ke tikaktokej ika nejmachkayot uan ke tikikneliaj uan timochikauaj tikajsikamatiskej (1 Cor. 13:4, 7).

17. ¿Keyej moneki maj amo tiyolijsiuikan uan maj amo niman titajtokan?

¹⁷ Sayoj ke, maj amo niman titajtokan. Maj amo tiktajtolkotonakan porin tiknekij tikyolmajxitiskej oso tikiluiskej ke amo kuali yetok tein kijtoua. Maj amo tiyolijsiuikan. Keman Elías iuan tajtoj Jiova, kitapouij nochi tein kitekipachouaya. Uan satepan ke Jiova kiyolchikauak, Elías oksepa kiluij tein achto kiluijkaya (1 Rey. 19:9, 10, 13, 14). Nejon techmachtia ke sekin akin semi yoltajyouijtokej moneki miakpa tetapouiskej tein kimachiliaj. Keman ijkon panos, moneki tikinkakiskej ika nejmachkayot kemej Jiova kichiua. Maj amo tikiluikan toni moneki kichiuas, ta maj tiknextilikan ke tiktasojtaj uan tikikneliaj (1 Ped. 3:8).

18. ¿Keniuj tikpaleuiaj akin tajyouijtok komo iuan timotataujtiaj?

¹⁸ Maj iniuan timotataujtikan akin tajyouiaj. Akin tayokoxtok xa amo uelis motataujtis. Xa kimachilia ke amo kinamiki iuan tajtos Jiova. Komo tiknekij tikpaleuiskej, maj iuan timotataujtikan uan maj tiktokaytikan. Maj tikiluikan Jiova ke tokniuan uan tejuan tiktasojtaj. Maj tikiluikan maj kiyolseui iichkatsin  tein semi kipatiuita. Komo ijkon timotataujtiaj uelis semi kiyolseuis (Sant. 5:16).

19. ¿Toni techpaleuis maj tikyolseuikan aksa?

¹⁹ Maj tikixpejpenakan tajtolmej tein teyolseuiskej. Maj achto tiknemilikan tein tikijtoskej porin tajtolmej uelis teyolkokoskej oso teyolseuiskej (Prov. 12:18). Yejua ika maj tikiluikan Jiova maj techpaleui maj tikajsikan tajtolmej tein ika tikyolseuiskej akin tajyouijtok. Maj tikelnamikikan ke tein okachi teyolchikaua yejua tein Biblia kijtoua porin ualeujtok itech Jiova (Heb. 4:12).

20. Kemej kipanouanij tein amo kuali, ¿toni kinemiliaj miakej uan toni tiknekij maj kielnamikikan?

²⁰ Sekin akin ininka mauiltianij, xa uelis kimachiliskej ke amo teyi chiuanimej uan ke amo akin kintasojta. Xa hasta kineltokaj ke amo kinnamiki maj aksa kintasojta. Nejon se ueyi takajkayaualis. Yejua ika, maj tikinelnamiktikan ika Biblia ke Jiova semi kinpatiuita (xikonita recuadro “Textos itech Biblia tein teyolseuiaj”). Maj tikelnamikikan ke keman tanauatijkej Daniel tayokoxtoya uan amo kipiaya chikaualis, Dios kititanik se ángel maj kiyolchikauati porin kinekia kimatiltis ke semi kipatiuitaya uan kitasojtaya (Dan. 10:2, 11, 19). No ijkon, Jiova kinpatiuita tokniuan akin semi tajyouijtokej.

21. 1) ¿Toni kinpanos akin ininka mauiltiaj konemej uan amo moyolnonotsaj? 2) ¿Toni moneki tikixtaliskej tikchiuaskej?

²¹ Keman tikinyolseuiaj oksekin, tikinelnamiktiaj ke Jiova se Dios akin tetasojta. Uan no moneki amo tikelkauaskej ke Dios nochipa kichiua tein melauak. Amo akin ueli kitatilia tein kichiua. Yejuatsin kiita nochi uan kintatsakuiltis akin ininka mauiltianij konemej uan amo moyolnonotsaj (Núm. 14:18). Axkan maj tikchiuakan nochi tein tiueliskej tein ika tikinnextiliskej ke tikintasojtaj akin ininka mauiltianij. Semi techyolseuia tikmatiskej ke Jiova kichiuas maj amo kinyolkokook nochi tein Satanás uan akin kipaleuiaj kinchiuilianij. Amo uejkaua, amo kielnamikiskejok tein kipanouanij uan tein kintajyouiltiani (Is. 65:17).