1-2. (a) Ke’ng seo se bontšhago gore batho ka tlhago ba hloka go kgothatšwa le gore ba na le bokgoni bja go kgothatša ba bangwe? Nea mohlala. (b) Bana ba bangwe ba gobatšwa ka tsela efe?

KA TLHAGO batho ba nyaka go kgothatšwa e bile ba na le bokgoni bja go kgothatša ba bangwe. Ka mohlala, ge ngwana a ka re a raloka a wa ke moka a gobala khurung, a ka kitimela go mmagwe goba go tatagwe a lla. Batswadi ba gagwe ba ka se kgone go mo fodiša eupša ba ka kgona go mo homotša. Ba ka mmotšiša gore o gobaditšwe ke eng, ba mo phumola megokgo, ba mo homotša e bile mohlomongwe ba ka mmofa ka lešelana goba ba mo tlotša ka sehlare se itšego gore a fole. E se kgale ngwana yoo o tla be a šetše a homotše e bile a bapala gape. Ge nako e dutše e eya, khuru ya gagwe e tlo fola.

² Ka manyami, ka dinako tše dingwe bana ba gobala ka tsela e nngwe e sehlogo kudu. Ba bangwe ba tlaišwa ka tša thobalano. Motho yoo a tlaišago ngwana ka tša thobalano a ka tlaiša ngwana yoo gatee goba a ka fetša mengwaga e mentši a mo tlaiša. Go sa šetšwe gore ngwana o tlaišitšwe gakae, seo se ka mo kweša bohloko kudu ka nako e telele. Ka dinako tše dingwe motho yo a tlaišitšego ngwana yoo o a hwetšwa gomme a otlwa. Eupša ka dinako tše dingwe go ka bonagala eka motho yoo ga a hwetše kotlo e mo swanetšego. Le ge motho yo a ka otlwa ka pelapela, bohloko bjo a bo bakilego bo ka tlaiša ngwana le ge a šetše a godile.

3. Go ya ka Bakorinthe ba Bobedi 1:3, 4 Jehofa o nyaka gore bahlanka ba gagwe ba swarwe bjang, gona re tlo araba dipotšišo dife sehlogong se?

³ Ge e ba ngwanabo rena goba kgaetšedi a sa dutše a ekwa bohloko maikwelong ka ge a kile a tlaišwa ka tša thobalano e sa le ngwana, a ka thušwa bjang? (Bala 2 Bakorinthe 1:3, 4.) Jehofa o nyaka gore bahlanka ba gagwe bao a ba ratago kudu ba bontšhwe lerato e  bile ba kgothatšwe. Ka gona sehlogong se re tlo araba dipotšišo tše di latelago tše tharo: Ke ka baka la’ng bao ba kilego ba tlaišwa ka tša thobalano e sa le bana ba hloka go kgothatšwa? Ke mang a ka ba kgothatšago? Re ka dira’ng go kgothatša bao ba kilego ba tlaišwa ka tša thobalano?

4-5. (a) Ke ka baka la’ng go le bohlokwa go kwešiša gore bana ga ba kgomege go swana le batho ba bagolo ge ba tlaišwa? (b) Ge ngwana a tlaišwa ka tša thobalano, seo se ka mo ama bjang tabeng ya go tshepa ba bangwe?

⁴ Batho ba bangwe bao ba kilego ba tlaišwa ka tša thobalano e sa le bana, ba ka hloka go kgothatšwa le ge go šetše go fetile mengwaga e mentši ba tlaišitšwe. Ka baka la’ng? E le gore re kwešiše taba ye gabotse, re swanetše go gopola gore bana ga ba swane le batho ba bagolo. Tsela yeo bana ba kgomegago ka yona ge ba tlaišwa, ga e swana le yeo batho ba bagolo ba kgomegago ka yona. Re ra go re’ng? Ela hloko mehlala e latelago.

⁵ Bana ba gwerana le batho bao ba ba hlokomelago le bao ba ba tshepago. Segwera seo se dira gore bana ba ikwe ba šireletšegile e bile ba ithuta go tshepa batho bao ba ba ratago. (Ps. 22:9) Ka manyami, gantši bana ba tlaišwa ka tša thobalano ke batho ba ka lapeng, ba leloko goba motho yo a tlwaelanego le ba lapa la gabo ngwana yoo. Ge ngwana a tlaišwa ka tša thobalano ke motho yo a mo tshepago, seo se ka dira gore ge a godile a se ke a tshepa motho.

6. Ke ka baka la’ng go tlaiša bana ka tša thobalano e le selo se sehlogo kudu?

⁶ Bana ga ba kgone go itšhireletša e bile go ba tlaiša ka tša thobalano ke selo se sehlogo kudu. Go tlaiša bana ka tša thobalano go ka ba gobatša kudu. Ge motho a tlaiša ngwana ka thobalano, seo se ka dira gore ngwana yoo a nagane gore thobalano ke selo se sebe kudu. Le gona se ka dira gore ngwana yoo a ikwe a se na mohola, e bile a se sa tshepa motho.

7. (a) Ke ka baka la’ng go le bonolo gore motho yo a nyakago go tlaiša ngwana ka tša thobalano a mo fore, gona ke maaka afe ao a ka a botšago ngwana yoo? (b) Maaka ao a ka kgoma ngwana bjang?

⁷ Bana ga ba kgone go lemoga dilo ka pela le go dira diphetho, goba go bona kotsi e sa tla gomme ba e phema. (1 Bakor. 13:11) Ka gona, go bonolo kudu gore motho a fore ngwana ke moka a thome go mo tlaiša ka tša thobalano. Ka mohlala, batho bao ba tlaišago bana ka tša thobalano ba ba botša maaka a matala a go swana le gore molato ke wa ngwana ge a tlaišwa, gore ga se ba swanela go botša motho ka taba yeo, gore ga go na motho yo a tlago go tshepa gore taba yeo ba e bolelago ke nnete, goba gore batho ba bagolo ba ba le thobalano le bana e le gore ba ba bontšhe gore ba a ba rata. Ngwana a ka tšea mengwaga e mentši kudu pele a ka lemoga gore motho yoo o be a mmotša maaka. Ngwana yoo a ka gola a nagana gore o šilafetše kudu moo a ka se sa kgonago go gwerana le motho, gaešita le go gwerana le Modimo. E bile a ka ikwa a sa swanelwe ke go ratwa le go kgothatšwa ke motho.

8. Ke ka baka la’ng re kgodišegile gore Jehofa o tla homotša bao ba tlaišitšwego ka tša thobalano?

⁸ Dilo tšeo re ithutilego tšona dirapeng tše di fetilego di re thuša go kwešiša gore ke ka baka la eng motho a ka tšea nako e telele a ekwa bohloko ka baka la ge a kile a tlaišwa ka tša thobalano. Ruri go tlaiša bana ka thobalano ke selo se sehlogo kudu! Ka manyami, bana ba bantši lefaseng ka moka ba a tlaišwa. Se se re bontšha gabotse gore re phela mehleng ya bofelo, e lego nako yeo batho ba bantši ba “se nago lerato la tlhago” e bile “batho ba kgopo le baikgakanyi [ba fetelelago] ka bobe.” (2 Tim. 3:1-5, 13) Sathane o re gobatša ka ditsela tše sehlogo kudu. Le gona, go kweša bohloko kudu ge batho ba bantši ba dira seo Sathane a se nyakago. Eupša sa go thabiša ke gore Jehofa o na le matla go feta Sathane le bao ba dirago seo Sathane a se nyakago. Jehofa o tseba dilo ka moka tšeo Sathane a di dirago. Le gona o tseba gabotse bohloko bjo re bo kwago e bile o  tla re kgothatša le go re homotša. Re thaba kudu gore re hlankela “Modimo wa khomotšo yohle, yo a re homotšago ditlaišegong tša rena tšohle, e le gore re kgone go homotša ba bangwe ditlaišegong tša mohuta le ge e le ofe ka khomotšo yeo re e hwetšago go Modimo.” (2 Bakor. 1:3, 4) Eupša Jehofa o diriša bomang go re homotša le go re kgothatša?

9. Go ya ka mantšu a Kgoši Dafida ao a lego go Psalme 27:10, Jehofa o tla dira’ng ge motho a lahlilwe ke ba gabo?

⁹ Bana bao batswadi ba bona ba sa kago ba ba šireletša ge ba be ba tlaišwa gotee le bao ba tlaišitšwego ka tša thobalano ke batho bao ba ba tsebago le go ba tshepa, ba hloka go kgothatšwa. Mopsalme Dafida o be a kgodišegile gore Jehofa o tla dula a re kgothatša. (Bala Psalme 27:10.) Dafida o be a kgodišegile gore Jehofa o tla amogela batho bao ba lahlilwego ke ba gabo bona. Jehofa o dira seo bjang? O diriša bahlanka ba gagwe bao ba botegago. Bana babo rena le dikgaetšedi ba ka phuthegong ba bjalo ka batho ba gabo rena. Ka mohlala, Jesu o kile a re mang le mang yo a dirago thato ya tatagwe ke ngwanabo le kgaetšedi ya gagwe le mmagwe.—Mat. 12:48-50.

10. Moapostola Paulo o ile a hlalosa bjang mošomo wa gagwe bjalo ka mogolo?

¹⁰ Serapeng se le seo se latelago, re tlo bona kamoo Bakristegotee le rena ba bago bjalo ka batho ba gabo rena. Moapostola Paulo e be e le mogolo yo a botegago e bile a šoma ka thata ka phuthegong. E be e le mohlala o mobotse kudu, e bile lengwalong leo a ilego a le ngwalela Bakorinthe o ile a ba botša gore ba mo ekiše go etša ge yena a ekiša Kriste. (1 Bakor. 11:1) Ela hloko kamoo Paulo a ilego a hlalosa mošomo wa gagwe bjalo ka mogolo. O itše: “Re bile bonolo gare ga lena, go etša ge mma yo a amušago a babalela bana ba gagwe.” (1 Bathes. 2:7) Bagolo lehono ba ka ekiša Paulo ka go diriša mantšu a bonolo goba a kgothatšago ge ba diriša Beibele go kgothatša bao ba hlokago thušo.

11. Na ke bagolo feela bao ba swanetšego go kgothatša ba bangwe? Hlalosa.

¹¹ Na ke bagolo feela bao ba swanetšego go kgothatša bao ba kilego ba tlaišwa ka tša thobalano?  Aowa. Ka moka ga rena re na le boikarabelo bja go “[tšwela] pele [re] homotšana.” (1 Bathes. 4:18) Dikgaetšedi tšeo di godilego moyeng di ka thuša kudu tabeng ya go kgothatša dikgaetšedi tšeo di kwelego bohloko. Ga go makatše ge Jehofa Modimo a ile a itshwantšha le mma yo a homotšago morwa wa gagwe. (Jes. 66:13) Beibele e re botša ka basadi bao ba kilego ba bea mohlala tabeng ya go homotša ba bangwe. (Jobo 42:11) Jehofa o thaba kudu ge a bona basadi ba Bakriste ba homotša le go kgothatša dikgaetšedi tše dingwe tšeo di kwelego bohloko kudu maikwelong. Ka dinako tše dingwe, mogolo goba bagolo ba babedi ba ka kgopela kgaetšedi yo a godilego moyeng go kgothatša kgaetšedi yo a hlokago thušo. *

12. Re swanetše go phema’ng ge re kgothatša ba bangwe?

¹² Ge re leka go thuša Mokristegotee le rena re swanetše go phema go mmotšiša dilo tšeo a sa nyakego go bolela ka tšona. (1 Bathes. 4:11) Ka gona, re ka dira’ng go kgothatša ba bangwe? A re boleleng ka dilo tše hlano tšeo re ithutago tšona ka Beibeleng tšeo di ka kgothatšago bao ba kilego ba tlaišwa ka tša thobalano.

13. Go ya ka Dikgoši tša Pele 19:5-8, morongwa o ile a thuša Eliya bjang, gona re ka ekiša morongwa yoo bjang?

¹³ Dira se sengwe go thuša motho yo a tlaišitšwego. Ge moporofeta Eliya a be a tšhabela batho bao ba bego ba nyaka go mmolaya, o ile a gateletšega kudu moo a ilego a duma eka a ka no hwa. Jehofa o ile a romela morongwa gore a yo kgothatša Eliya. Morongwa yoo o ile a nea Eliya seo a bego a se hloka ka nako yeo. O ile a mo nea dijo gomme a mo kgothaletša gore a je. (Bala 1 Dikgoši 19:5-8.) Pego ye e re ruta thuto ye e bohlokwa: Go direla motho selo se itšego, le ge e ka ba se senyenyane, go ka mo thuša kudu. Re ka bontšha gore re rata Mokristegotee le rena yo a kwelego bohloko ka go mo thuša, mohlomongwe re ka mo apeela, ra mo nea mphonyana, ra mo founela goba ra mo ngwalela molaetša wo o kgothatšago. Ge e ba re thatafalelwa ke go boledišana le motho ka maikwelo a gagwe, gona re ka mo kgothatša ka go mo direla tše dingwe tša dilo tšeo re boletšego ka tšona ka mo godimo tšeo di ka mo holago.

14. Re ithuta’ng pegong ya Eliya?

¹⁴ Dira gore bao ba kwelego bohloko ba ikwe ba šireletšegile e bile ba lokologile. Re ka ithuta se sengwe gape go tšwa pegong ya Eliya. Ka mohlolo, Jehofa o ile a nea Eliya matla a gore a kgone go sepela leeto le letelele go ya Thabeng ya Horebe. Go ka direga gore Eliya o ile a ikwa a šireletšegile kudu ge a be a le lefelong le, leo mengwageng e mentši e fetilego Modimo a ilego a dira kgwerano le setšhaba sa gagwe go lona. A ka ba a ile a ikwa eka o kgole le batho bao ba bego ba nyaka go mmolaya. Re ithuta’ng go se? Pele re kgothatša batho bao ba kilego ba tlaišwa ka tša thobalano, re swanetše go thoma ka go dira gore ba ikwe ba šireletšegile. Ka mohlala, bagolo ba swanetše go gopola gore kgaetšedi yo a tlaišitšwego ka tša thobalano a ka ikwa a šireletšegile le go lokologa kudu go boledišana le bagolo ge a le ka gae go e na le ge a le Holong ya Mmušo. Eupša yo mongwe yena a ka ikwa a lokologile ge a boledišana le bagolo a le Holong ya Mmušo.

15-16. Go ba motheetši yo botse go bolela’ng?

¹⁵ Eba motheetši yo botse. Beibele e re eletša ka gore: “Motho yo mongwe le yo mongwe a akgofele go kwa, a diege go bolela.” (Jak. 1:19) Na o motheetši yo botse? Batho ba bangwe ba nagana gore go ba motheetši yo botse e no ba taba ya go lebelela motho ka mahlong ge a bolela gomme wa se bolele selo. Eupša e le gore motho e be motheetši yo botse, o swanetše go dira go feta moo. Ka mohlala, Eliya o ile a botša Jehofa kamoo a bego a ikwa ka gona, gomme Jehofa o ile a mo theetša ka kelohloko. Jehofa o ile a kwešiša gore  Eliya o be a tšhogile, a ikwa a lahlilwe e bile a ipotša gore mošomo ka moka wo a o dirilego o be o se na mohola. Jehofa o ile a mo thuša go fenya maikwelo ao. O ile a bontšha gore ka nnete o be a tloga a theeditše Eliya.—1 Dikg. 19:9-11, 15-18.

¹⁶ Ge motho a re ntšhetša sa mafahleng, re ka mmontšha kwelobohloko bjang? Ka dinako tše dingwe, mantšu a sego kae ao a kgothatšago a ka mmontšha gore re lla le yena. Ka mohlala, o ka re: “Ke manyami gore o diragaletšwe ke selo sa mohuta wo. Ga go na ngwana yo a swanetšego go tlaišwa ka tsela yeo!” Goba mohlomongwe o ka mmotšiša potšišo e tee goba tše pedi gore o kgonthišetše gore o kwešiša seo a go botšago sona. O ka mmotšiša gore: “Ke kgopela o ntlhalosetše gore o ra go re’ng?” goba “Ge o be o bolela seo, nna ke naganne gore o ra gore . . . Na ke go kwešišitše gabotse?” Mantšu a bjalo a kgonthišetša motho gore ka nnete o mo theeditše, le gore o kwešiša seo a se bolelago.—1 Bakor. 13:4, 7.

17. Ke ka baka la’ng re swanetše go se fele pelo le go ‘diega go bolela’?

¹⁷ O swanetše go ‘diega go bolela.’ O se ke wa tsena motho ganong o kitimetše go mo nea keletšo goba go phošolla tsela yeo a naganago ka yona. Le gona o se ke wa fela pelo. Ge Eliya a be a ntšhetša Jehofa sa mafahleng, o be a gateletšegile kudu e bile a bolela mantšu a nyamišago. Ka morago ga gore Jehofa a matlafatše Eliya, nengneng Eliya o ile a mo ntšhetša sa mafahleng gape. O ile a bušeletša mantšu a nyamišago ao a bego a a dirišitše lekgeng la pele. (1 Dikg. 19:9, 10, 13, 14) Re ithuta’ng go se? Ka dinako tše dingwe batho bao ba kwelego bohloko ba nyaka go bolela kamoo ba ikwago ka gona gantšintši. Re swanetše go ekiša Jehofa ka go ba theetša re sa ba felele pelo. Go e na le go ba botša kamoo ba ka lokišago mathata a bona, re swanetše go ba bontšha kwelobohloko le lešoko.—1 Pet. 3:8.

18. Ke ka baka la’ng go rapela le motho yo a kwelego bohloko go ka mo kgothatša kudu?

¹⁸ Rapela le motho yo a kwelego bohloko. Batho bao ba kwelego bohloko kudu ba ka ikwa ba palelwa ke go rapela. Ba ka ikwa ba sa swanelege go bolela le Jehofa. Ka gona ge re nyaka go kgothatša motho yoo, re ka rapela le yena ra mmitša ka  leina thapelong. Thapelong yeo re ka botša Jehofa kamoo rena le bana babo rena le dikgaetšedi re ratago motho yo. Re ka kgopela Jehofa gore a thuše motho yoo le go mo kgothatša. Dithapelo tše bjalo di ka kgothatša motho yo a kwelego bohloko.—Jak. 5:16.

19. Ke’ng seo se ka re thušago go kgothatša motho yo a itšego?

¹⁹ Kgetha mantšu a kgothatšago le ao a homotšago. Nagana pele o bolela. Mantšu a go hlaba a kweša bohloko kudu. Eupša mantšu a botho a a homotša. (Die. 12:18) Ka gona, rapela Jehofa gore a go thuše go bolela mantšu a botho, a homotšago le ao a kgothatšago. O se ke wa lebala gore ga go na mantšu ao a kgothatšago go feta mantšu a Jehofa ao a lego ka Beibeleng.—Baheb. 4:12.

20. Ba bangwe bao ba kilego ba tlaišwa ka tša thobalano ba ka nagana’ng, gona re swanetše go ba gopotša’ng?

²⁰ Bana babo rena ba bangwe le dikgaetšedi bao ba kilego ba tlaišwa ka tša thobalano ba ka nagana gore ba šilafetše, ga ba na mohola e bile ga go na motho yo a ka ba ratago. Seo ga se nnete! Ka gona, diriša Mangwalo go ba gopotša gore Jehofa o ba rata kudu. (Bona lepokisi leo le rego “ Mangwalo ao a Kgothatšago.”) Gopola kamoo morongwa a ilego a matlafatša moporofeta Daniele ka gona ge a be a nyamile e bile a feletšwe ke matla. Jehofa o be a nyaka gore Daniele a dule a tseba gore o mo rata kudu. (Dan. 10:2, 11, 19) Ka mo go swanago, bana babo rena le dikgaetšedi bao ba kilego ba tlaišwa ka tša thobalano, ba bohlokwa kudu go Jehofa.

21. Go tlo direga’ng ka badiradibe bao ba sa itsholego, eupša rena re swanetše go leka go dira’ng gona bjale?

²¹ Ge re kgothatša ba bangwe, re ba thuša go dula ba gopola gore Jehofa o a ba rata. E bile re swanetše go dula re gopola gore Jehofa ke Modimo wa toka. Jehofa o tseba motho le ge e le ofe yo a kilego a tlaišwa, le ge go se na motho yo mongwe yo a tsebago seo. Jehofa o tseba dilo tšohle, e bile nakong e tlago o tla otla badiradibe ka moka bao ba sa itsholege. (Num. 14:18) Ge re sa letetše seo, a re direng sohle seo re ka se kgonago go bontšha bao ba kilego ba tlaišwa ka tša thobalano gore re a ba rata. Sa bohlokwa kudu re homotšwa ke go tseba gore Jehofa o tlo fodišetša sa ruri batho ka moka bao ba kwešitšwego bohloko ke lefase le la Sathane. Kgauswinyane, re tla be re lebetše dilo tše ka moka tšeo di kwešago bohloko.—Jes. 65:17.