1, 2. а) Бафедар кӕнун алкедӕр ке фӕгъгъӕуй, удта нӕхе бон дӕр иннети федар кӕнун ке ӕй, е цӕхуӕн цӕветтонӕй зиннуй? б) Еуӕй-еу сувӕллӕнттӕбӕл цӕхуӕн хабар ӕрцӕуй?

БАФЕДАР кӕнун алкедӕр фӕгъгъӕуй, удта нӕхе бон дӕр ӕй иннети федар кӕнун. Зӕгъӕн, сувӕллон ку рахауй ӕма ӕ уӕраги сӕр ку ниццӕвуй, уӕд ӕ мадӕмӕ кенӕ ӕ фидӕмӕ кӕугӕй баледзуй. Ниййергутӕ ин ӕ цӕф уайтагъд не ’сдзӕбӕх кӕнунцӕ, фал ӕй рафӕрсунцӕ, ци кодта, уобӕл, ӕ цӕстисугтӕ ин ниссӕрфунцӕ, ра ин хъури кӕнунцӕ ӕма ин фӕлмӕн дзубандитӕ ракӕнунцӕ. Ку гъӕуа, уӕдта ин ӕ цӕф дӕр естӕмай райсӕрдунцӕ ӕма ин ӕй рабӕттунцӕ. Уоййадӕбӕл сувӕллон ӕ кӕун феронх уй ӕма нӕуӕгӕй гъазун райдайуй. Фӕстӕдӕр ба ӕ къах дӕр радзӕбӕх уй.

² Фал, гъигагӕн, сувӕллӕнттӕ арӕх дзӕвгарӕ фуддӕр рист бавзарунцӕ. Кӕмӕндӕрти си тухмиуӕ бакӕнунцӕ. Еуетӕбӕл уӕхӕн хабар еунӕг хатт ӕрцӕуй, иннетӕ ба уӕхӕн гъезӕмӕрттӕ ӕнзгӕйттӕ февзарунцӕ. Кудфӕнди ма уа, уӕддӕр тухмиуӕ кӕмӕн бакодтонцӕ, уонӕн е сӕ царди хъӕбӕр лӕгъуз фӕд ниууадзуй. Хатгай уӕхӕн хабӕрттӕй кӕцидӕртӕ рагъӕр унцӕ ӕма тухмиуӕгӕнӕг ӕфхуӕрд баййафуй, иннӕ хӕттити ба ӕнӕфхуӕрдӕй дӕр байзайуй. Кудфӕнди ма рауайа, уӕддӕр еци хабари фӕстеугутӕ ма сувӕллони цардбӕл берӕ ӕнзти дӕргъи бӕрӕг кӕндзӕнцӕ.

3. 2 Коринфӕгтӕмӕ 1:3, 4 куд финст ӕй, уомӕ гӕсгӕ Йегови ци фӕндуй? Цӕхуӕн фарстатӕмӕ ӕркӕсдзиан?

³ Сувӕллонӕй тухмиуӕ кӕмӕн бакодтонцӕ ӕма нурмӕ дӕр уой туххӕй ка гъезӕмарӕ кӕнуй, еци киристӕнттӕн ци банхус кӕндзӕй? (Бакӕсӕ 2 Коринфӕгтӕмӕ 1:3, 4.) Йеговӕн ӕ лӕггадгӕнгутӕ хъӕбӕр хъазар ӕнцӕ, ӕма ’й фӕндуй,  цӕмӕй уарзт ӕма рӕвдудӕй цох ма уонцӕ. Мадта ӕркӕсӕн ӕртӕ фарстайемӕ: 1) Сувӕллонӕй тухмиуӕ кӕмӕн бакодтонцӕ, уони бафедар кӕнун цӕмӕн фӕгъгъӕуй? 2) Ке бон сӕ ӕй бафедар кӕнун? 3) Куд сӕ ӕнгъезуй бафедар кӕнун?

4, 5. а) Сувӕллон устур адӕймагӕй цӕмӕй хецӕн кӕнуй, уой лӕдӕрун ӕхсидзгӕ цӕмӕн ӕй? б) Тухмиуӕ сувӕллони цардбӕл куд рабӕрӕг уй?

⁴ Сувӕллонӕй тухмиуӕ кӕмӕн бакодтонцӕ, уонӕй беретӕ ку исустур унцӕ, уӕд дӕр ма сӕ фӕгъгъӕуй бафедар кӕнун. Гъӕуама нӕ гъудий дарӕн, сувӕллон устур адӕймаги хузӕн ке нӕ сагъӕс кӕнуй. Тухмиуӕ сувӕллонӕн ку бакӕнунцӕ, уӕд ин е ци зиан ӕрхӕссуй, е хецӕн кӕнуй, устур адӕймагӕн ци зиан ӕрхастайдӕ, уомӕй. Ӕркӕсӕн, уотӕ цӕмӕн ӕй, уомӕ.

⁵ Сувӕллонӕн хъӕбӕр ӕхсидзгӕ ’й, ка ’й гъомбӕл кӕнуй, е ӕй ке уарзуй ӕма ибӕл ӕ бон ӕууӕндун ке ӕй, уой лӕдӕрун. Уой фӕрци ’й сувӕллон фӕззонуй, тӕссаг ин ке нецӕмӕй ӕй, уой ӕма ахур кӕнуй, ка ’й уарзуй, уонӕбӕл ӕууӕндун. Гъигагӕн, арӕхдӕр сувӕллонӕн тухмиуӕ ӕхе хӕдзари бакӕнунцӕ, ӕма тухмиуӕгӕнӕг хеуӕнттӕй кенӕ хӕстӕг ӕмбӕлттӕй еске разиннуй. Ӕма уой фӕсте сувӕллонӕн хъӕбӕр зин фӕууй ескӕбӕл ӕууӕндун.

6. Тухмиуӕ цӕхуӕн зиан ӕрхӕссуй?

⁶ Сувӕллӕнттӕ ӕнцон сайӕн фӕуунцӕ ӕма син тухмиуӕ бакӕнун ӕй, устур зиан син ка ӕрхӕссуй, уӕхӕн фудракӕнд. Нӕлгоймаг ӕма силгоймаги астӕу ци фӕууй, уомӕ сувӕллонӕн нӕдӕр ӕ зунд, нӕдӕр ӕ бауӕр цӕттӕ нӕма фӕууй. Ӕма ин тухмиуӕ ку бакӕнунцӕ, уӕд ин уомӕй хъӕбӕр устур зиан ӕрхӕссунцӕ. Уой туххӕй, сувӕллон ку исустур уй, уӕд сексмӕ раст цӕстӕй кӕсун нӕбал фӕззонуй, удта ӕхемӕ нецӕййаг фӕккӕсуй.

7. а) Тухмиуӕгӕнӕгӕн сувӕллони расайун ӕнцон цӕмӕн ӕй ӕма ’й куд расайуй? б) Еци сайдӕн цӕхуӕн фӕстеугутӕ фӕууй?

⁷ Сувӕллӕнттӕ уойбӕрцӕ нӕма фӕллӕдӕрунцӕ, цӕмӕй раст унаффитӕ хӕссонцӕ ӕма сӕхе тӕссаг уавӕртӕй гъӕуай кӕнонцӕ (1 Кор. 13:11). Уомӕ гӕсгӕ тухмиуӕгӕнӕгӕн хъӕбӕр ӕнцон фӕууй сувӕллони расайун. Зӕгъӕн, сувӕллонӕн зӕгъдзӕй, гъӕйдӕ ’й макӕмӕн радзорӕн, зӕгъгӕ, кенӕ ба ин ӕхе фудгин кӕнун райдайдзӕй. Уотӕ дӕр ӕй расайуй, ку ’й радзорай, уӕддӕр дӕбӕл неке баууӕнддзӕй ӕма дин неке банхус кӕндзӕй, зӕгъгӕ. Кенӕ ба ин ӕ сӕри уӕхӕн гъуди бауадзуй, цума хестӕртӕ ӕма сувӕллӕнттӕ уӕхӕн миутӕ ку фӕккӕнунцӕ, уӕд е, кӕрӕдзей ке уарзунцӕ, уобӕл дзорӕг ке ӕй. Уӕхӕн хабар кӕбӕл ӕрцудӕй, еци сувӕллон уӕхӕн гъудий хӕццӕ исустур уй, цума нецӕййаг ӕма цъумур ӕй ӕма цума уарзти аккаг дӕр нӕй.

8. Цӕмӕн ес зӕгъӕн, ӕма гъезӕмарӕ ка кӕнуй, уонӕн Йегови бон ӕй уодӕнцойнӕ раттун?

⁸ Мадта дессаг нӕй, тухмиуӕ кӕмӕн бакодтонцӕ, уӕхӕн сувӕллон ма берӕ ӕнзти дӕргъи дӕр ӕхе кеми ке не ’рцӕуй. Уӕхӕн фудгъуддӕгтӕ ӕгас дуйнебӕл дӕр хъӕбӕр арӕх иссӕнцӕ. Уомӕй бӕрӕг ӕй, «фӕстаг бӕнтти» ке цӕрӕн, е. Библий финст ӕй, «бийнонти астӕу уарзондзийнадӕ [ке] нӕбал уодзӕй», удта «лӕгъуз ӕма мӕнгард адӕн» ба фуддӕрӕй-фуддӕр ке кӕндзӕнцӕ (2 Тим. 3:1–5, 13). Сайтани фӕндтӕ хъӕбӕр лӕгъуз ӕнцӕ, ӕма ин, гъигагӕн, адӕнӕй беретӕ ӕ къох аразунцӕ. Фал Йеговӕ Сайтанӕй ӕма ӕ фӕдбӕлдзӕугутӕй берӕ хъаурӕгиндӕр ӕй ӕма син се ’гас гъуддӕгтӕ дӕр уинуй. Ӕма нӕ бон ӕй федарӕй ӕууӕндун, куд гъезӕмарӕ кӕнӕн, уой Йеговӕ ке лӕдӕруй ӕма нин ӕ бон ке ӕй уодӕнцойнӕ раттун. Махӕн ӕхцӕуӕн ӕй «уодӕнцойнӕдӕттӕг Хуцауӕн» лӕггадӕ кӕнун. «Е нин уодӕнцойнӕ дӕттуй не ’гас зиндзийнӕдти дӕр, цӕмӕй... махӕн дӕр нӕ бон уа  иннетӕн цийфӕнди зиндзийнади дӕр уодӕнцойнӕ дӕттун» (2 Кор. 1:3, 4). Цума Йеговӕ уодӕнцойнӕ куд дӕттуй?

9. Псалом 27:10 куд финст ӕй, уомӕ гӕсгӕ Йеговӕ куд батухсуй, ӕ ниййергутӕ тухмиуӕй ке нӕ багъӕуай кодтонцӕ, уонӕбӕл?

⁹ Уодӕнцойнӕ гъӕуагӕ фӕуунцӕ, сувӕллонӕй сӕ ниййергутӕ тухмиуӕй ке нӕ багъӕуай кодтонцӕ кенӕ, хеуӕнттӕй еске тухмиуӕ кӕмӕн бакодта, етӕ. Псаломзаргӕнӕг Давид ӕй зудта, Йегови бон алкӕддӕр ке ӕй уодӕнцойнӕ раттун. (Бакӕсӕ Псалом 27:10.) Давид федарӕй ӕууӕндтӕй, ӕ бийнонтӕй ӕфхуӕрд ка баййафта, уонӕн Йеговӕ сӕ Фидӕ ке исуодзӕй. Цума син Йеговӕ куд банхус кӕнуй? Ӕ еузӕрдон лӕггадгӕнгути фӕрци. Ӕмбурди хуӕртӕ ӕма ӕнсувӕртӕ нин ӕнцӕ бийнонти хузӕн. Еухатт Йесо уотӕ загъта: «Мӕ уӕларвон Фиди фӕндон ка ӕнхӕст кӕнуй, е ӕй мӕнӕн ме ’нсувӕр дӕр, мӕ хуӕрӕ дӕр ӕма мӕ мадӕ дӕр» (Матф. 12:48–50).

10. Апостол Павел хестӕр нӕлгоймагӕй куд лӕггадӕ кодта, уой туххӕй ци загъта?

¹⁰ Ӕркӕсӕн, киристон ӕмбурд бийнонти хузӕн цӕмӕй ӕй, уомӕ. Апостол Павел адтӕй Хуцауи еузӕрдон лӕггадгӕнӕг ӕма хестӕр нӕлгоймаг. Хуцауи разамундӕй ма уотӕ дӕр ниффинста: «Мӕн фӕнзетӕ, ӕз Киристей куд фӕнзун, уотӕ» (1 Кор. 11:1). Дӕ гъос ӕрдарай, апостол Павел хестӕр нӕлгоймагӕй куд лӕггадӕ кодта, уой туххӕй ци загъта: «Фал уӕ мах рӕвдудтан, реударӕг мадӕ ӕ бӕдоли куд фӕррӕвдауй, уотӕ» (1 Фес. 2:7). Абони дӕр хестӕр нӕлгоймӕгтӕ архайунцӕ, цӕмӕй Библий фӕрци ӕнхус кӕнонцӕ, уодӕнцойнӕ гъӕуагӕ ка ӕй, уонӕн.

11. Тухмиуӕ кӕмӕн бакодтонцӕ, уонӕн банхус кӕнун айдагъ хестӕр нӕлгоймӕгти ихӕс ке нӕй, уой кӕцӕй зонӕн?

¹¹ Тухмиуӕ кӕмӕн бакодтонцӕ, уони федар кӕнун айдагъ хестӕр нӕлгоймӕгти бон нӕй. Кӕрӕдзей федар кӕнуни ихӕс ни алкӕбӕлдӕр ес (1 Фес. 4:18). Фӕлтӕрдгун хуӕрти бон ӕй ӕнхус кӕнун, уодӕнцойнӕ гъӕуагӕ ка ӕй, уӕхӕн хуӕртӕн. Йеговӕ дӕр  ӕхе рабарста, ӕ бӕдоли ка сабур кӕнуй, уӕхӕн мади хӕццӕ (Ис. 66:13). Библий финст ес, иннети ка федар кодта, уӕхӕн силгоймӕгти туххӕй (Тӕрх. 11:37–40). Расагъӕс кӕнӕ, Йеговӕн куд ӕхцӕуӕн фӕууй, зӕрдӕрист хуӕрти иннӕ фӕлтӕрдгун хуӕртӕ ку бафедар кӕнунцӕ, уӕд. Еуӕй-еухатт хестӕр нӕлгоймӕгтӕ фӕлтӕрдгун хуӕртӕй ескӕмӕн баихӕс кӕнунцӕ, цӕмӕй уодӕнцойнӕ гъӕуагӕ ка ӕй, уони бафедар кӕнонцӕ *.

12. Лӕдӕргӕ цӕмӕн гъӕуама уӕн?

¹² Гъӕуама лӕдӕргӕ уӕн, ӕма адӕймаги дзорун цӕбӕл нӕ фӕндуй, уобӕл ӕй ма фӕрсӕн (1 Фес. 4:11). Мадта уӕд нӕ бон куд ӕй адӕймаги бафедар кӕнун? Ӕркӕсӕн, Библибӕл арӕзт ка ӕй, фондз уӕхӕн унаффемӕ.

13. 1 Паддзӕхти 19:5–8 куд финст ӕй, уомӕ гӕсгӕ изӕд Илийайӕн куд банхус кодта ӕма мах бон куд ӕй уотӕ архайун?

¹³ Гъуддагӕй банхус кӕнӕ. Пахампар Илийа, марунмӕ ’й ка агурдта, уонӕй ку лигъдӕй, уӕд уотӕ нифссаст адтӕй, ӕма ма ӕхе дӕр рамӕлун фӕндадтӕй. Йеговӕ имӕ хъаурӕгин изӕди рарвиста, цӕмӕй имӕ фӕккастайдӕ. Изӕд ин тӕвдӕ къӕбӕр ӕ рази ӕрӕвардта ӕма ин фӕлмӕнӕй загъта, ракомидзаг кӕнӕ, зӕгъгӕ. (Бакӕсӕ 1 Паддзӕхти 19:5–8.) Аци хабарӕй ахур кӕнӕн еу ӕхсидзгӕ гъуддагбӕл: хатгай адӕймагӕн банхус кӕнунмӕ берӕ нӕ фӕгъгъӕуй. Зӕгъӕн, нӕ бон ин ӕй хуӕруйнаг искӕнун, минкъий ести балӕвар кӕнун кенӕ открыткӕ ниффинсун. Еци минкъий гъуддӕгтӕй дӕр зӕрдӕсаст хуӕрӕ кенӕ ӕнсувӕр балӕдӕрдзӕй, ке ӕй уарзӕн ӕма ибӕл ке тухсӕн, уой. Кӕд нин ӕнкъарӕнтӕбӕл дзорун ӕнцон нӕй, уӕддӕр гъуддагӕй банхус кӕнун ба нӕ бон ӕй.

14. Илийай хабарӕй цӕбӕл ахур кӕнӕн?

¹⁴ Банхус син кӕнтӕ, цӕмӕй ма тӕрсонцӕ. Илийай хабарӕй ма еу цӕбӕлдӕр ахур кӕнӕн. Йеговӕ ин дессаги хузи банхус кодта Хориви хонхмӕ бахъӕртунмӕ. Е хъӕбӕр идард над адтӕй. Еци хонхи рази Йеговӕ цалдӕр сӕдӕ анзи раздӕр ӕ адӕни хӕццӕ бадзурд искодта, ӕма Илийа уордӕмӕ ку бахъӕрдтӕй, уӕд е знӕгтӕй нӕбал тарстӕй, уомӕн ӕма си хъӕбӕр идард адтӕнцӕ. Аци хабарӕй цӕбӕл ахур кӕнӕн? Тухмиуӕ кӕмӕн бакодтонцӕ, уӕхӕн адӕймагӕн банхус кӕнун нӕ ку фӕндӕуа, уӕд бал гъӕуама байархайӕн, цӕмӕй ӕй адӕймаг лӕдӕра, тӕссаг ин ке нецӕмӕй ӕй, уой. Зӕгъӕн, хестӕр нӕлгоймӕгтӕ гъӕуама сӕ зӕрдӕбӕл даронцӕ, кӕмӕндӕр Зали радзорун ӕнцондӕр ке ӕй, кӕмӕндӕр ба – хӕдзари.

15, 16. Лӕмбунӕг игъосунмӕ ци хауй?

¹⁵ Лӕмбунӕг игъосӕ. Библий финст ӕй: «Алли адӕймаг дӕр гъӕуама рӕвдзӕ уа байгъосунмӕ, дзорунмӕ... ба хӕлӕф ма кӕна» (Иак. 1:19). Ду ба игъосун зонис? Ка ’й зонуй дӕмӕ е уотӕ зин нӕ кӕсуй: адӕймаги рази исбадӕ, кӕсӕ имӕ ӕма маци дзорӕ. Фал уомӕ фулдӕр цидӕр хауй. Зӕгъӕн, Илийа Йеговӕн ӕ тухститӕ ку дзурдта, уӕд имӕ Йеговӕ лӕмбунӕг байгъуста. Лӕдӕрдтӕй ӕй, Илийа тӕрсгӕ ке кӕнуй, удта имӕ уотӕ ке кӕсуй, ӕма еунӕгӕй байзадӕй, ӕма ӕ лӕггадӕ дзӕгъӕли ке ӕй. Йеговӕ ин бавдиста, ке ӕй лӕдӕруй, ӕма ин банхус кодта, цӕмӕй мабал тухстайдӕ (1 Пад. 19:9–11, 15–18).

¹⁶ Нӕ хуӕртӕ ӕма не ’нсувӕртӕй нин еске ӕ тухститӕ ку дзора, уӕд нӕ бон куд ӕй бавдесун, нӕ зӕрдӕ ибӕл ке ресуй? Еуӕй-еухатт уой туххӕй еу цалдӕр фӕлмӕн дзурди зӕгъун дӕр фагӕ фӕууй. Зӕгъӕн: «Мӕ зӕрдӕ дӕбӕл хъӕбӕр ресуй. Хъӕбӕр зин мин фӕууй, уӕхӕн хабӕрттӕ ку фегъосун, уӕд!» Цӕмӕй ӕй хуӕздӕр балӕдӕрай, уой туххӕй имӕ, ка ’й зонуй, еу кенӕ дууӕ  фарстай раттун дӕр багъӕудзӕй. Дӕ бон ӕй зӕгъун: «Кӕд дин зин нӕй, уӕд мин ӕй балӕдӕрун кӕнай, ци зӕгъуйнаг дӕ, уой». Кенӕ ба: «Раст дӕ балӕдӕрдтӕн, ӕма...?» Уӕхӕн дзурдтӕ адӕймагӕн уобӕл дзорӕг уодзӕнцӕ, ӕма имӕ лӕмбунӕг игъосис ӕма дӕ ӕ уавӕр балӕдӕрун фӕндуй (1 Кор. 13:4, 7).

17. Адӕймагмӕ фӕразонӕй цӕмӕн гъӕуама игъосӕн ӕма дзорунмӕ тагъд цӕмӕн гъӕуама ма кӕнӕн?

¹⁷ Адӕймаги дзурд ӕрдӕгбӕл ма ӕркъуӕрисӕ, цӕмӕй ӕй бараст кӕнай кенӕ ин ести унаффӕ раттай. Фӕразонӕй игъосӕ! Илийа ӕ тухститӕ Йеговӕн ку дзурдта, уӕд хъӕбӕр зӕрдӕрист адтӕй ӕма хъӕбӕр маст кодта. Фӕстӕдӕр ӕй Йеговӕ ку бафедар кодта, уӕд бабӕй ин Илийа нӕуӕгӕй дзорун райдӕдта, уой размӕ ци радзурдта, уой (1 Пад. 19:9, 10, 13, 14). Е цӕбӕл дзорӕг ӕй? Адӕймаг еу хаттӕй иннӕ хатмӕ еци еу хабӕрттӕ ку кӕна, уӕд имӕ гъӕуама Йегови хузӕн фӕразонӕй байгъосӕн. Унаффитӕ дӕттуни бӕсти архайдзиан, цӕмӕй ин ӕ уавӕр ӕма ӕ рист балӕдӕрӕн (1 Пет. 3:8).

18. Нӕ кувдтитӕ ристзӕрдӕ адӕймагӕн куд банхус кӕндзӕнцӕ?

¹⁸ Сӕ хӕццӕ еумӕ коветӕ. Ристзӕрдӕ адӕймагӕн ковун дӕр зин фӕууй. Гӕнӕн ес, ӕма имӕ уотӕ дӕр кӕса, цума Йеговӕмӕ ковуни аккаг дӕр нӕй. Цӕмӕй уӕхӕн адӕймагӕн банхус кӕнӕн, уой туххӕй нӕ бон ӕй ӕ хӕццӕ еумӕ раковун. Хуарз уайдӕ кувди рӕстӕг ӕ ном дзорун. Нӕ бон ӕй Йеговӕн зӕгъун, еци адӕймаги куд уарзӕн ӕма ’й ӕгас ӕмбурд дӕр куд уарзунцӕ, уой. Уомӕй уӕлдай ма нӕ бон ӕй Йеговӕй ракорун, цӕмӕй ӕ хъазар лӕггадгӕнӕгӕн уодӕнцойнӕ ратта. Уӕхӕн кувдтити фӕрци ӕ рист фӕссабурдӕр уодзӕй (Иак. 5:16).

19. Адӕймагӕн уодӕнцойнӕ ка ӕрхӕсдзӕй, уӕхӕн дзурдтӕ иссерун нӕ бон куд ӕй?

¹⁹ Уодӕнцойнӕ ка ӕрхӕсдзӕй, уӕхӕн дзурдтӕ ерӕ. Ести зӕгъуни размӕ бал расагъӕс кӕнисӕ. Ӕнӕргъуди дзурдтӕй адӕймаги зӕрдӕ никки хъӕбӕрдӕр фӕрресун  кӕндзӕнӕ, фӕлмӕн дзурдтӕй ба ин ӕ рист фӕссабурдӕр кӕндзӕнӕ (Ӕмб. 12:18). Уой туххӕй ба Йеговӕмӕ ковӕ, цӕмӕй дин, адӕймаги ка бафедар кӕндзӕй, уӕхӕн дзурдтӕ иссерунмӕ банхус кӕна. Дӕ гъудий дарӕ тӕккӕ фулдӕр хъаурӕ Йегови дзурдти ке ес, ӕма финст ӕнцӕ Библий (Дзиуит. 4:12).

20. Тухмиуӕ кӕмӕн бакодтонцӕ, уонӕй беретӕ сӕхемӕ цӕхуӕн цӕстӕй фӕккӕсунцӕ ӕма син нӕ бон куд ӕй банхус кӕнун?

²⁰ Тухмиуӕ кӕмӕн бакодтонцӕ, етӕ арӕх сӕхе иннети уарзти аккагбӕл нӕ фӕннимайунцӕ, удта сӕхемӕ цъумур ӕма нецӕййаг фӕккӕсунцӕ. Фал хъӕбӕр рӕдуйунцӕ! Библий фӕрци син бавдесӕ, Йеговӕ сӕ куд уарзуй, уой. (Кӕсӕ рамкӕ « Уодӕнцойнӕ Финстадӕй».) Дӕ зӕрдӕбӕл ӕрлӕуун кӕнӕ, Хуцауи изӕд пахампар Данели куд бафедар кодта, ӕнӕхъаурӕ ӕма нифссаст ку адтӕй, уӕд. Йегови фӕндадтӕй, цӕмӕй ӕй Данел зудтайдӕ, куд хъазар ин ӕй, уой (Дан. 10:2, 11, 19). Маст ка бавзурста, еци хуӕртӕ ӕма ӕнсувӕртӕ дӕр Йеговӕн гъе уотӕ хъазар ӕнцӕ!

21. Ӕ фудгъуддӕгтӕбӕл ка нӕ фӕсмон кӕнуй, уонӕмӕ ци ӕнгъӕлмӕ кӕсуй? Нур ба бал ци гъӕуама кӕнӕн?

²¹ Хуӕртӕ ӕма ӕнсувӕртӕн сӕ зӕрдӕбӕл ку лӕуун кӕнӕн, Йеговӕ се ке уарзуй, уой, уӕд син е уодӕнцойнӕ хӕсдзӕй. Удта гъӕуама макӕд иронх кӕнӕн, Йеговӕ раст Хуцау ке ӕй. Е ӕгас фудгъуддӕгтӕ дӕр уинуй, ӕма ӕ фудмиутӕбӕл ка нӕ фӕсмон кӕнуй, уонӕй еуей дӕр ӕнӕфхуӕрдӕй неци хузи ниууадздзӕй (Ним. 14:18). Нур ба бал нӕ идарддӕр дӕр гъӕуй федар кӕнун, рист ка бавзурста, уони. Сайтанӕй ӕма ӕ дуйнейӕй ӕфхуӕрд ка баййафта, уони риститӕ Йеговӕ ке исдзӕбӕх кӕндзӕй, уой зонун устур уодӕнцойнӕ ӕй! Тагъд рӕстӕги, аци дуйней ци зинтӕ бавзурстан, етӕ нӕ зӕрди дӕр нӕбал ӕрӕфтуйдзӕнцӕ (Ис. 65:17).