1-2. (a) Gifezegeselo gitshi gidi mumonesa egi athu akhala nu funu ya guhana athu ako gikhesa nu ana gukhala nji nu funu ya gikhesa? (b) Matangua guvula gutshi ana ako ana guvua gikenene?

ATHU agasue ana guvalewa nu khadilo dia guhana athu ako ukuateshi, nu ana gukhala nji nu funu ya ukuateshi. Ha gufezegesa, gula mona udi mukena wabua, wadinamenesa ha bongo, wana guya muphushi nu gudila gudi sh’enji nga gin’enji. Mvuaji jiajiyilego gumusaga phuta, uvi ajiya gumukuatesa nu guzumba guagasue. Ajiya gumuhula ha gujiya ndaga yabui, gumukukumuna masoji, gumuzonza, ajiya nji gumumba gihemba ha phuta, nga gumukanga bandaji hene. Gungima, mona wajiya gubemba gudila nu wajiya nji gusendesa luko gukena. Masugu azonda gungima, phuta yenji yajiya guhua.

² Matangua ako, ana azonda ana gukalegewa ndaga mu luholo luabola. Ako mukatshi diawo, ana guzangelewa. Mona wajiya guzangelewa hugo dimoshi nga ndo mahugo avula mu ivo. Luko, guzangela mona guana gumuhana gikenene giavula mu matangi. Muthu wana guzangela mona, wana gukuatewa nu wana guhanewa ndola. Uvi ako, ana gulenga gawo. Ikhale muthu muene wakuatewa mu tangua diene, mona wazangelewa wana gulandula guvua gikenene uu nu mu umbuta wenji.

3. Ha gutadila 2 Kolinto 1:3, 4, gutshigina gua Yehowa gudi itshi, nu mihu itshi tuza muzuelela?

³ Ukuateshi utshi wajiya guhanewa Muklisto udi mulandula guvua gikenene luholo amuzangelele mu ulenge? (Tanga 2 Kolinto 1:3, 4.) Yadiago, Yehowa wana gutshigina egi akombeledi enji amonesewe guzumba nu ahanewe gikhesa. Tuzuelele mihu eyi thathu: (1) Mukunda natshi athu azangelewe mu ulenge adi naye guhanewa ukuateshi? (2) Akuatshi adi naye guahana ukuateshi wene? (3) Luholo lutshi tuajiya guhana ukuateshi wene?

4-5. (a) Mukunda natshi idi nu ndando ha gujiya egi ana azonda akhala a gudisha nu mambuta? (b) Luholo lutshi guzangela ana guana gubolesa khadilo diawo dia gushila athu ako mutshima?

⁴ Mambuta anyi azangelewe mu ulenge, ajiya gukhala nu funu ya gikhesa ngatshima ivo yavula yabalega gale. Mukunda natshi? Ha gukotelesa, tudi naye thomo gujiya egi ana azonda ana gukhala agudisha diago nu mambuta. Gula atshitshila mona wazonda nu mbuta gubola, luholo mona wana guvua gikenene luakhala lua gudisha nu mbuta. Tutadilenu ifezegeselo eyi yalandula.

⁵ Ana azonda ana gutshigina gukuata ufuta nu athu ana guasansa, nu ana gushila athu ene mutshima. Ufuta wene wana guakuatesa ha gudivua mu ubambi, nu wana guatuma ha gushila athu ana guazumba mutshima. (Ngi. 22:9) Uvi, mahugo avula athu ana guzangela ana azonda adi athu ana gujinga nawo inzo imoshi, enya fami yawo nga mafuta awo. Gula mona wazangelewa gudi muthu gana gushila muene mutshima, yajiya gukhala lamba egi ashile athu ako mutshima nga ivo yavula yabalega.

6. Mukunda natshi guzangela mona gudi diago ndaga ya khuta nu ndaga ya lamba?

⁶ Ana ajiyilego gudibamba ene hakhawo, nu guazangela gudi diago ndaga ya khuta. Guzangela ana azonda ivo yavula gutuama egi akule, angine mu ulo nu akotelese ndaga yatadila gubungisa muila, idi diago ndaga yabola. Mona wazangelewe mu ulenge wajiya gubolesa luholo luenji lua gutadila gubungisa muila; wajiya gudivua gifua gashigo nu ndando, nga gutuna gushila athu ako mutshima.

7. (a) Mukunda natshi yajiyilego gukhala lamba gudi muthu ha gudimba mona nu ha gumuzangela? (b) Mambo ene ajiya gutuma mona ha gutshita itshi?

⁷ Ana azonda anago gukotelesa ndaga, anago gukhala nu ndunge jia gudizudila badesizio, luko anago gulenga ingonza. (1 Kol. 13:11) Hene, yanago gukhala lamba gudi mbuta ha guadimba nu guazangela. Ha gufezegesa, muthu wana guzangela mona wana gumuhuiga egi gula wamuzangela idi mukunda nu foti yenji, luko ndaga yene mbayishigo mujiyiwa; muthu muene wana guzuela luko egi ngatshima mona muene wafunda, athu mbaashigo mutshigina egi amuzangela. Wana gumuhuiga nji egi gumuzangela gudi luholo lua gumumonesela guzumba. Ndaga jiene jiajiya guzula ivo yavula hagula mona muene akotelese egi akhalele gumuhuiga. Jiajiya nji gumutuma ha gutangiza egi gashigo nu ndando, luko, athu ako ajiyilego gumuzumba.

8. Mukunda natshi tuajiya gusha mutshima egi Yehowa wana gukuatesa athu adi nu gikenene?

⁸ Ndaga eji jiana gutukuatesa ha gukotelesa mukunda natshi athu azangelewe ana gumona lamba ivo yavula. Guzangela ana gudi ndaga yabola diago! Luholo ndaga yene idi mukalegewa muavula ha mavu a mudidi, idi mumonesa diago egi tudi mujinga mu masugu a gisugishilo, masugu ene athu avula ‘mbashigo mukhala nu guzumba’ mu tangua diene “athu abola nu enya mambo gubola guawo mbagudivudisa.” (2 Tim. 3:1-5, 13) Bametode a Satana akhala diago abola, luko idi ndaga ya gikenene ha gumona athu mukalagala ndaga jidi musuanguluisa Diabulu. Uvi, Yehowa udi nu ngolo jiavula gubalega Satana nu athu enji. Wana gumona tangua diagasue ndaga Satana wana gutshita. Tuajiya gusha mutshima egi Yehowa wana gumona malamba etu, nu wajiya gutuhana gikhesa tudi nagio funu. Tudi diago nu gusuanguluga luholo tuana gukombelela ‘Nzambi wa uwalaganyi wagasue, wana gutuwalagana mu malamba etu agasue hagula esue tuwalagane athu ako adi mumona malamba a maluholo agasue, nu uwalaganyi utuawalagenewe nawo gudi Nzambi.’ (2 Kol. 1:3, 4) Akuatshi Yehowa wana gukalegela ha guhana ukuateshi?

9. Ha gutadila mbimbi jia Fumu Davidi jidi mu Ngimbo 27:10, itshi Yehowa mbawutshita mukunda nu athu anyi atunyiwe gudi fami jiawo?

⁹ Athu atunyiwe gudi mvuaji jiawo nga anyi azangelewe gudi athu akhalele ene mujiya, akhala diago nu funu ya ukuateshi. Muyimbi wa ngimbo Davidi wajiyile egi, Yehowa udi watagana ha gutukuatesa. (Tanga Ngimbo 27:10.) Davidi wakhalele nu gutshigina egi Yehowa mbawukhala Tata wa athu ana gutunyiwa gudi enya fami jiawo. Luholo lutshi Yehowa wana guyikalagala? Wana gukalegela akombeledi enji a gujinginyina. Aphangi etu a Aklisto adi fami yetu ya mu nyuma. Ha gufezegesa, Yesu wazuelele egi athu anyi akhalele mukombelela nenji Yehowa, akhalele aphangi enji a mala nu a akhetu, nu gin’enji.—Mat. 12:48-50.

10. Itshi mupostolo Phaula wazuelele mukunda nu mudimo wenji wa mukulu?

¹⁰ Ha gufezegesa, hungu dia Uklisto didi gifua fami ya aphangi. Mupostolo Phaula wakhalele mutshita mudimo wakola, wakhalele nji mukulu wa gujinginyina. Wabembele gifezegeselo giabonga, mu njila ya nyuma ya Nzambi, wawambelele athu ako ha gulandula gifezegeselo gienji gifua luholo muene walandudile gia Klisto. (1 Kol. 11:1) Tala ndaga yazuelele Phaula yatadila mudimo wenji wa mukulu: ‘Tuakhalele ahuiminyina mukatshi dienu gifua mudi mama musansa an’enji.’ (1 Tes. 2:7) Mangino nji akulu a gujinginyina ana gumonesa gisemo, nu ana guzuela mbimbi jiabonga tangua ana guhana ukuateshi gudi aphangi adi mu lamba.

11. Itshi idi mumonesa egi ishigo phamba akulu adi naye guhana ukuateshi?

¹¹ Phamba akulu adi naye guhana ukuateshi gudi athu azangelewe ba? Ndo sha. Mukut’etu agasue tudi nu ginemo gia ‘gudiwalagana.’ (1 Tes. 4:18) Aphangi a akhetu a gukula mu nyuma ajiya guhana gikhesa gudi aphangi a akhetu adi nu funu ya ukuateshi. Yehowa Nzambi wadifuanesele nu mama udi muwalagana an’enji. (Yesh. 66:13) Mu Biblia, mudi nu ifezegeselo ya akhetu akuatesele athu akhalele mu lamba. (Yobo 42:11) Yehowa wana gusuanguluga mangino ha gumona luholo aphangi a akhetu  adi muhana ukuateshi gudi aphangi a akhetu n’ako adi mulua nu gikenene! Mukulu mumoshi nga muyadi ajiya gutoga mu gisuegi phangi mumoshi wa mukhetu wa gukula mu nyuma, ha guhana ukuateshi gudi phangi wa mukhetu udi mumona lamba. *

12. Ndaga itshi tushigo naye gutshita?

¹² Yadiago, tangua tudi mukuatesa phangi, tuajiyilego gumutoga ha gutuwambela ndaga jiajiya gumuhana musonyi. (1 Tes. 4:11) Itshi tudi naye giwa gutshita mukunda nu athu adi nu funu ya ukuateshi? Tuzuelele maluholo thano Biblia idi muzuelela tuajiya gukalegela ha guhana ukuateshi.

13. Ha gutadila 1 Mafumu 19:5-8, itshi muanjelo wa Yehowa watshitshile mukunda nu Eliya, nu luholo lutshi tuajiya gulandula khadilo diene?

¹³ Kalagala ndaga yajiya gukuatesa muthu udi nu gikenene. Tangua profete Eliya wakhalele mulenga ha guhuluisa monyo wenji, walebele muila nu watogele egi afue genji. Yehowa watumile muanjelo wa ngolo ha gumukuatesa. Muanjelo wahanele Eliya ima yakhalele naye muene funu. Wamuhanele ima ya gudia nu wamutogele nu gisemo giagasue ha gudia. (Tanga 1 Mafumu 19:5-8.) Lumene elu ludi diago gutuhana malongo a ndando: Matangua ako gukalegela muthu nga ndaga yazonda guajiya gumukuatesa diago. Yajiya gukhala ima ya gudia, kado gazonda nga gumusonegela mukanda nu mbimbi jiabonga ha gumumonesa egi tuana gumuzumba. Gula tuamona gifua guzuela nu phangi muene guajiya gumuhana musonyi, tuajiya gutshita ndaga yajiya gumukuatesa.

14. Longo ditshi tuajiya guzula mu lumene lua Eliya?

¹⁴ Tukuatese muthu udi mu gikenene ha gudivua muabonga nu mu guhuima. Tuajiya guzula longo diko mu lumene lua profete Eliya. Yehowa wamuhanele ima yakhalele naye muene funu mu luholo lua gushimana, ha guya uu nu gu Mulundu wa Horeb. Yajiya gukhala egi Eliya wadivile mu ubambi hakhalele muene gualeha, fundo Yehowa wakotele gikotelo nu athu enji mu tangua dikulu. Yajiya gukhala egi wadivile ngenyi handaga wakhalele gualeha nu athu akhalele mukamba gumushiya. Longo ditshi tuajiya guzula mu ndaga eyi? Gula tudi mutshigina gukuatesa athu anyi azangelewe, tudi naye thomo guakalegela ndaga hagula adivue mu ubambi. Ha gufezegesa, akulu adi naye gujiya egi phangi wa mukhetu udi nu gikenene wajiya gudivua muabonga, gula aya muta nenji maga gumbo dienji, ha fundo dia guzuela nenji gu Inzo ya Ufumu. Uvi phangi muko wajiya gutshigina guyizuelela gu Inzo ya Ufumu.

15-16. Gutegelela muabonga guakotelesa itshi?

¹⁵ Khala mutegelela muabonga. Biblia idi gutuwambela egi: ‘Muthu wagasue udi naye gukhala hehi ha gutegelela, uvi guzuela magemage.’ (Yak. 1:19) Tuana gutegelela muabonga ba? Tuajiya gumona gifua gutegelela muabonga tangua muthu udi muzuela guakotelesa egi, gumutala hadi muene muzuela uvi gubagula ndo. Uvi, gutegelela muabonga guana gutoga ndaga jiavula. Ha gufezegesa, tangua Eliya wawambelele Yehowa luholo luakhalele muene gudivua, Yehowa wamutegelele muabonga. Wakotelesele egi Eliya wakhalele muvua woma, wakhalele gudivua hakhenji nu watangijile nji egi mudimo wagasue watshitshile muene wakhalele wa githuhu. Yehowa wamukuatesele nu guzumba guagasue ha gubinga woma wene. Wamonesele egi wategelele diago Eliya muabonga.—1 Maf. 19:9-11, 15-18.

¹⁶ Hatudi mutegelela phangi mumoshi, luholo lutshi tuajiya gumonesa nu guzumba  guagasue egi tudi gudisha ha fundo dienji? Luholo luetu lua guzuela nu mbimbi tudi mukalegela jiajiya gumonesa luholo tudi gudivua. Wajiya guzuela egi: “Ndaga udi mutagana najio jianguhana gikenene! Ajiyilego gukalegela mona wazonda ndaga jia luholo elu!” Wajiya guhula phangi udi nu gikenene muhu umoshi nga iyadi hagula ukotelese muabonga ndaga jidi muene muzuela. Wajiya gumuhula egi: “Wajiya gungukuatesa ha gukotelesa ndaga watshigina guzuela?” nga ndo “Luholo wazuela ngegi, watshigina guzuela egi . . . Idi ngenyi ba?” Mbimbi eji jiabonga jiajiya gukuatesa diago muthu ha gujiya egi udi gumutegelela, jiajiya nji gugukuatesa ha gumukotelesa muabonga.—1 Kol. 13:4, 7.

17. Mukunda natshi tudi naye guhuiminyina nu “guzuela magemage”?

¹⁷ Monesa gutema hagula “uzuele magemage.” Hadi muthu muzuela umubatulago mbimbi ha guhana matangi aye, nga ha gulondega luholo luenji lua gutangiza. Khala nji nu guhuiminyina! Tangua Eliya walezele Yehowa luholo gakhalele gudivua, wazuelele mbimbi jiakola jiamonesele gikenene giavula. Gungima, ikhale tangua Yehowa wakolesele gutshigina guenji, Eliya wavutugidile luko mbimbi jia luholo lumoshi. (1 Maf. 19:9, 10, 13, 14) Longo ditshi tuajiya guzula? Matangua ako, athu ana gukhala nu gikenene, ana gutshigina guzuela luholo adi gudivua mahugo avula. Tudi naye guategelela nu guhuiminyina guagasue gifua Yehowa. Ha fundo dia guawambela ndaga ya gutshita, tudi naye gudisha ha fundo diawo.—1 Phet. 3:8.

18. Luholo lutshi isambu yetu yajiya gukuatesa athu adi nu gikenene?

¹⁸ Kombelela nu mutshima umoshi nu phangi udi nu gikenene. Yajiya gukhala lamba gudi athu adi nu gikenene ha gutshita gisambu. Wajiya gudivua gifua gashigo nu ndando ha gusuena hehi nu Yehowa. Gula tuatshigina gumukuatesa, tudi naye gutshita nenji gisambu, nu gutanga jina dienji mu gisambu. Tuajiya guwambela Yehowa mu gisambu egi phangi udi gikenene, udi nu ndando  gu meso etu nu gumeso a aphangi mu hungu. Tuajiya gutoga Yehowa ha gukuatesa mukombeledi wenji ha gukhala muabonga nu mu guhuima. Gisambu gia luholo elu giajiya gumukuatesa diago.—Yak. 5:16.

19. Itshi yajiya gutukuatesa ha gudilondega mukunda nu gukuatesa muthu udi nu gikenene?

¹⁹ Tomba mbimbi jiajiya gusaga nu gukuatesa muthu. Tangiza thomo gutuama egi uzuele. Guzuela mbimbi gutangiza ndo guana guhana lamba. Uvi mbimbi jia gisemo jiana gusaga. (Ish. 12:18) Hene toga Yehowa a gukuatese hagula uhete mbimbi jia gisemo jiajiya gukuatesa muthu. Jiya egi gushigo nu mbimbi jiabalega mbimbi jia Yehowa jidi mu Biblia ngolo.—Heb. 4:12.

20. Itshi aphangi avula ana gutangiza luholo azangelewe mu ulenge? Itshi tudi naye guawunguluisa?

²⁰ Aphangi anyi azangelewe mu ulenge ana gudimona gifua adi nu usala nu ashigo nu ndando, nga ndo ashigo atagana hagula athu a azumbe. Uvi ishigo ngenyi nga hazonda! Hene, kalegela Biblia ha guamonesa egi Yehowa wana guazumba muavula. (Tala galuanda “ Ukuateshi Biblia Yana Guhana.”) Unguluga luholo muanjelo wakuatesele profete Danyele hakhalele muene yaguleba nu muvua gikenene. Yehowa wakhalele mutshigina egi profete Danyele, ajiye egi udi nu ndando gu meso enji. (Dan. 10:2, 11, 19) Luholo lumoshi nji an’etu a mala nu a akhetu adi nu gikenene adi nu ndando gu meso enji!

21. Mu masugu adi muza, itshi mbayibuila athu agasue abola anago gubalumuna mutshima, uvi luenyelu itshi tudi naye gutshita mukut’etu agasue?

²¹ Tangua tuana gukuatesa athu ako, tuana guawunguluisa egi Yehowa wana guazumba. Luko, tushigo naye gujimbila egi Yehowa udi nji Nzambi wa nduedi. Yehowa wana gujiya muthu wagasue wazangelewe ngatshima muthu muko gajiyilego guyijiya. Yehowa wana gumona ndaga jiagasue, mbawuhana ndola gudi athu agasue ana guzangela athu ako gula abalumuinego mutshima. (Lutang. 14:18) Uvi lunyelu, tutshite yagasue tuajiya gutshita ha gumonesa guzumba gudi aphangi azangelewe. Luko, tuana gusuanguluga diago ha gujiya egi Yehowa mbawusaga athu agasue azangelewe gudi Satana nu mavu enji! Gualeha ndo, athu mbaashigo luko mutangiza ndaga eji jia lamba nga hazonda.—Yesh. 65:17.