1-2. (a) Karasepe dahieu me kasalehda me aramas koaros kin anahne meteikan en kansenamwahwih irail oh re pil ahneki koahiek en kansenamwahwih meteikan? (b) Ia duwen ekei seri ar kin medekla?

ARAMAS koaros kin anahne meteikan en kansenamwahwih irail oh re pil ahneki koahiek kaselel ehu en kansenamwahwih meteikan. Karasepe, ni seri men eh mwadmwadong ahpw pwupwudi oh kamedekihala pwukieo, ele e kin sengiseng tangala rehn eh Nohno de Pahpa. Pahpa de nohno sohte kak kamwahwihala ohlao, ahpw re kak kansenamwahwih serio. Ele re kin idek dahme wiawi, limwihasang pilen meseo, kadeke, oh ele kihong wini de bandaid ni eh ohlao. Mwurin mwo, serio pahn uhdi sengiseng oh ele pwurala mwadong. Kedekedeo, eh ohlao pahn mwahula.

² Ahpw ekei pak, seri kan kin medekla ni ahl kan me inenen suwed. Mie me kin tiahk suwedih ekei irail. Ele serio lelohng tiahk lemei wet pak ehute, de met kin wiewiawi erein sounpar tohto. Sohte lipilipil mehnia, tiahk lemeio kak uhdahn kamedekihala irail oh re kin pousehlahte ahneki pepehm wet. Nan ekei irair, aramaso me tiahk suwedih serio kin selidi oh ale kalokepe. Nan irair teikan, me wia tiahk suwedo ele sohte ale kalokepe. Ahpw, mehnda ma me wia tiahk suwedo mwadang ale kalokepe, serio me lelohng met ele kin lokolongki dahme wiawio lao e laudla.

3. Nin duwen me 2 Korint 1:3, 4 kasalehda, dahme Siohwa ketin kupwurki, oh peidek dah kan me kitail pahn tehkpene?

³ Ma Kristian men me lelohng tiahk lemei ni eh tikitiko kin ahnekihte pepehm en medek ni eh laudlahr, dahme kak sewese ih? (Wadek 2 Korint 1:3, 4.) E sansal me Siohwa ketin kupwurki sapwellime sihpw kan en ale limpoak oh kamweit me re anahne. Eri kitail pahn tehkpene peidek siluh: (1) Dahme kahrehda irail kan me emen tiahk suwedih irail anahne meteikan en kansenamwahwih  irail? (2) Ihs me kak kansenamwahwihala irail kan me lelohng tiahk lemei? (3) Ia duwen atail kak kansenamwahwihala irail?

4-5. (a) Dahme kahrehda e kesempwal en pohnese me seri kan weksang aramas laud kan? (b) Ia duwen tiahk suwedih seri eh kak kahrehiong serio en sohla likih meteikan?

⁴ Ekei irail me kin lokolongkihte ahn emen tiahk suwedih irail ni arail tikitiko kin anahnehte meteikan en kansenamwahwih irail mendahki sounpar tohto douwehr powe. Dahme kahrehda? Pwehn wehwehki met, kitail keieu anahne pohnese me seri kan uhdahn weksang irail me laud kan. Ahn seri men kin mwekidki ahn meteikan ar wiakauwe ih kin weksang ahn emen me laud eh kin mwekidki met. Tehk ekei karasaras kan.

⁵ Seri kan anahne karanih oh pil likih irail kan me apwalihada irail. Met kin kahrehiong seri kan en pehm me re sohte mi nan keper oh padahkihong irail en likih irail kan me poakepoake irail. (Mel. 22:9) Ahpw e kansensuwed me tiahk suwedih seri kin keieu kalapw wiawi nan imwen serio, oh tohn eh peneineio oh kompoakepahn eh peneineio iei irail kan me kin kalapw wia met. Ni emen me serio likih tiahk suwedih ih, met kak kahrehda serio en apwalki likih meteikan, pil lella sounpar tohto mwuri.

6. Dahme kahrehda tiahk suwedih seri wia tiahk lemei oh keper ehu?

⁶ Seri kan sohte kak pein doare irail, oh tiahk suwedih seri wia tiahk lemei oh keper ehu. En iding seri kan en wia nsenen pwopwoud mwohn paliwararail de arail madamadau lel sounpar en wia nsenen pwopwoud ni arail pwopwoudida kak uhdahn kahrehda kahpwal laud ong serio. Tiahk suwedih seri kan kak kahrehiong serio en ahneki madamadau sapwung ong nsenen pwopwoud. E kak kahrehiong serio en sohte likih meteikan oh pehm me sohte katepen eh mour.

7. (a) Dahme kahrehda aramas mwersuwed men ele kin mengeiki pitih seri men, oh ia duwen eh kak wia met? (b) Ia imwilahn likamw pwukat?

⁷ Seri kan saikinte uhdahn koahiekla en medewe soahng kan, wiahda pilipil kan, de pohnese oh soikala soahng keper kan. (1 Kor. 13:11) Eri e kin uhdahn mengei ong aramas mwersuwed men en pitihdi oh tiahk suwedih seri kan. Aramas mwersuwed kan kin ndaiong seri kan lokaia likamw, duwehte me serio me pwukoahki dahme wiawio, me dahme wiawio wia mehkot rir, oh sohte me pahn rong de katapanki ma serio ndahda, de wia nsenen pwopwoud nanpwungen emen me laud oh seri men uhdahn wia kasalepen limpoak mehlel. Soangen likamw pwukat kak kahrehiong serio en medewe erein sounpar tohto me lokaia likamw pwukat uhdahn mehlel. Serio ele pahn tikida medewe me e wia aramas samin oh sohte katepe men, oh me e sohte warohng ale limpoak de kamweit sang meteikan.

8. Dahme kahrehda kitail kak kamehlele me Siohwa kak ketikihda kamweit ong irail kan me medekla?

⁸ Eri e sohte kapwuriamwei me tiahk suwedih seri kan kak kahrehiong irail en lokolongki sounpar tohto. Wiewia mwersuwed wet uhdahn lemei! Reklahn tiahk lemei wet wia mehn kadehde sansal me kitail momour ni imwin rahn akan, ni ahnsou ehu me me tohto kin “sempoak” oh “aramas me suwed oh mwersuwed kan pahn doulahte sang ni me suwed ong ni me suwedsang.” (2 Tim. 3:1-5, 13) Ahn Sehdan mwekid kan uhdahn suwed, oh e kansensuwed ni aramas akan ar kin mwekid ni ahl ehu me kaperenda Tepilo. Ahpw, Siohwa uhdahn ketin kehlailsang Sehdan de irail kan me kin wia dahme Sehdan mwahuki. Siohwa kin ahnsou koaros ketin mwahngih ahn Sehdan wiewia kan. Kitail kak uhdahn kamehlele me Siohwa uhdahn ketin mwahngih medek me kitail ahneki, oh e kak ketikihda kamweit me kitail anahne. Kitail ahneki pai kaselel en papah “Koht en kansenamwahu koaros, me ketin kansenamwahwih kitail nan atail kahpwal koaros pwe kitail  en kak kansenamwahwihki meteikan me mi nan soangsoangen kahpwal kan nsenamwahu me kitail alehdihsang rehn Koht.” (2 Kor. 1:3, 4) Ihs me Siohwa ketin doadoahngki pwehn kansenamwahwih kitail?

9. Me pid dahme Nanmwarki Depit nda nan Melkahka 27:10, dahme Siohwa pahn ketin wiahiong irail kan me pein arail peneinei keseirailla?

⁹ Irail kan me arail pahpa nohno keseirailla de emen me re karanih tiahk suwedih irail ele uhdahn anahne meteikan en kansenamwahwihala irail. Sounmelkahkao Depit ese me Siohwa iei me kitail kak keieu likih pwehn kansenamwahwih kitail. (Wadek Melkahka 27:10.) Depit uhdahn kamehlele me Siohwa pahn ketin apwalihala irail kan me lelohng tiahk lemei sang arail peneinei. Ia duwen Siohwa eh ketin wia met? E kin ketin doadoahngki sapwellime ladu lelepek kan. Riatail Kristian kan nan mwomwohdiso kin duwehte uhdahn atail peneinei. Karasepe, Sises mahsanih me irail kan me iang ih kaudokiong Siohwa kin duwehte rie pwutak oh serepein oh pil ine.​—Mad. 12:48-50.

10. Ia duwen wahnpoaron Pohl eh kawehwehda eh doadoahk nin duwen elder men?

¹⁰ Kitail pahn kilang ia duwen mwomwohdiso eh kak duwehte peneinei ehu. Wahnpoaron Pohl wia elder men me lelepek oh kin doadoahk laud. E wia mehn kahlemeng mwahu, oh e pil mwekidki sapwellimen Koht manaman en padahkihong meteikan en kahlemengih ih duwehte eh kin kahlemengih Krais. (1 Kor. 11:1) Tehk ia duwen Pohl eh kawehwehda eh doadoahk nin duwen elder men ni eh nda: “Se kin kadek ni at mi rehmwail, duwehte nohno men eh kin kadihdi oh apwalih mwahu pein nah seri kan.” (1 Des. 2:7) Elder loalopwoat kan rahnwet kak pil doadoahngki lokaia kansenamwahu kan ni arail doadoahngki Paipel pwehn kansenamwahwih irail kan me anahne.

11. Dahme kasalehda me kaidehn elder kan kelehpw me kak kansenamwahwihala meteikan?

¹¹ Ia duwe, elder kan kelehpw me kak kansenamwahwih irail kan me lelohng tiahk lemei? Soh. Kitail koaros ahneki pwukoa en ‘kansenamwahwih emenemen.’ (1 Des. 4:18) Sister koahiek kan kak uhdahn sewese sister kan me anahne sawas. Eri e pwung me Siohwa Koht ketin kapahrekihong  ih duwehte nohno men me kin kansenamwahwih nah pwutako. (Ais. 66:13) Paipel kasalehda duwen lih akan me kin kansenamwahwih irail kan me kin lokolok. (Sohp 42:11) Ia uwen Siohwa eh kin kupwurperenki eh mahsanih sister kan rahnwet ar kin kansenamwahwih riarail sister kan me kin lokolok! Nan ekei irair, elder emen de riemen ele pahn peki rehn sister koahiek men ma e kak sewese emen sister me kin lokolok. *

12. Dahme kitail kin kanahieng en dehr wia?

¹² Ei mehlel, kitail kin kanahieng en dehr nantihong esehda irair kan me riatail Kristian men sohte men koasoia duwe. (1 Des. 4:11) Dahme kitail kak wia ong irail kan me anahne oh men kitail en sewese oh kansenamwahwih irail? Kitail pahn koasoiapene ahl limau sang nan Paipel me kitail kak sewesehki meteikan.

13. Nin duwen me 1 Nanmwarki 19:5-8 kasalehda, dahme sapwellimen Siohwa tohnlengo wia ong Elaisa, oh ia duwen atail kak alasang tohnlengo?

¹³ Wia mehkot me pahn sewese aramaso me lokolok. Ni ahnsou me soukohp Elaisa wie tangatangasang irail kan me men kemehla ih, e uhdahn mworusala me kahrehda e men mehla. Siohwa ketin poaronehdo tohnleng kehlail men reh. Tohnlengo sewesehki Elaisa dahme e anahne ni ahnsowo. E kihong Elaisa mwenge oh kangoange en mwenge. (Wadek 1 Nanmwarki 19:5-8.) Dahme wiawio kasalehda duwen ire mehlel ehu: Ekei pak wiewia kadek ehu, mehnda ma tikitik, kak uhdahn sewese emen. Kitail kak kasalehiong riatail Kristian men me lokolok me kitail poakohng ih sang ni atail wia mehkot ong ih, duwehte kukihada kene mwenge, kihong ih kisin kisakis ehu, de ntingihada lokaia kangoang kan nan kisinlikou ong ih. Ma e sohte mengei ong kitail en koasoiaiong emen duwen eh pepehm kan, kitail kak kasalehda me kitail nsenohki ih sang ni atail kihda sawas pwukat.

14. Mehn kasukuhl dahieu me kitail kak sukuhlkihsang dahme wiawihong Elaisa?

¹⁴ Sewese irail kan me nsensuwed laud ren nsenamwahu oh pehm me re sohte mi nan keper. Kitail kak sukuhlki pil ehu soahng tohrohr sang dahme wiawihong Elaisa. Ni ahl kapwuriamwei ehu, Siohwa ketikihong soukohpo sawas me e anahne pwehn kohdahla Nahna Orep me mi wasa doh. Ele wasa doh wet, wasa me Siohwa ketin wiahda sapwellime inou lap ong sapwellime aramas akan sounpar tohto mwowe, Elaisa pehm me e sohte mi nan keper. Ele e pehm me met e inenen dohsang irail kan me men kemehla ih. Mehn kasukuhl dah me kitail kak sukuhlkihsang met? Ma kitail men kansenamwahwih irail kan me lelohng tiahk lemei, ele keieu kitail anahne sewese ren pehm me re sohte mi nan keper. Karasepe, elder kan anahne taman me sister men me nsensuwed laud ele pahn nsenamwahu oh pehm me e sohte mi nan keper ma re koasoiong ih nan imweo niminim tea sang ar pahn koasoiong ih nan ehu perehn tuhpene nan Wasahn Kaudok. Ong emen tohrohr, ele eh pepehm pahn weksang met.

15-16. Ia wehwehn en wia emen me kin rong mwahu?

¹⁵ Wia emen me kin rong mwahu. Paipel kihda kaweid sansal wet: “Aramas koaros anahne mwadang rong, pwand en lokaia.” (Seims 1:19) Kitail kin rong mwahu? Ele kitail kin medewe me en wia emen me kin rong mwahu kitail anahne ihte nennenla, kilikilang aramaso, oh sohte nda mehkot. Ahpw en rong mwahu kin pidada laudsang met. Karasepe, Elaisa patohwanohng Siohwa ia uwen eh nsensuwedla, oh Siohwa ketin karonge mwahu. Siohwa ketin mwahngih me Elaisa masepwehkada, pehm me e kelehpw, oh medewe me sohte katepen eh doadoahk koaros. Ni limpoak, Siohwa ketin sewese ih en powehdi pepehm pwukat. E ketin kasalehda me e ketin karonge mwahu Elaisa.​—1 Nan. 19:9-11, 15-18.

 ¹⁶ Ni atail kin rong emen, ia duwen atail kak kasalehda atail poakehla ih? Ekei pak atail kin kadek lokaia kak kasalehda atail pepehm. Ele ke kak nda: “I uhdahn nsensuwedkihla me met wiawihong uhk! Seri kan sohte anahne lelohng soahng wet!” Ele ke kak idek peidek ehu de riau pwehn uhdahn wehwehki dahme kompoakepahmw me nsensuwedo wie koasoakoasoia. Ele ke kak idek, “Ke kak menlau sewese ie wehwehki dahme ke koasoakoasoiahn?” de “Ni omw ndahla men, I medewe . . . E pwung dahme I medemedeweo?” Koasoi limpoak pwukat ele kin kamehlelehiong aramaso me ke uhdahn wie rongorong oh songosong en uhdahn wehwehki.​—1 Kor. 13:4, 7.

17. Dahme kahrehda kitail anahne kanengamah oh “pwand en lokaia”?

¹⁷ Ahpw ken kanahieng oh “pwand en lokaia.” Dehr sopuk aramaso pwehn kihong ih kaweid de kapwungala eh madamadau. Kasalehda kanengamah! Ni ahnsou me Elaisa patohwanohng Siohwa eh pepehm kan koaros, e uhdahn mworusala oh kasalehda eh nsensuwed laud. Mwurin Siohwa eh ketin kakehlakahda ahn Elaisa pwoson, Elaisa pil pwurehng patohwanohng Siohwa eh pepehm kan, doadoahngki lokaia kohte. (1 Nan. 19:9, 10, 13, 14) Dahme met padahkihong kitail? Ekei pak, irail kan me nsensuwed laud kin anahne koasoia duwen arail pepehm kan tohtohsang pak ehu. Duwehte Siohwa, kitail men kanengamah oh rong mwahu. Kitail en dehr song en ndaiong irail ia duwen arail en kamwahwihala kahpwalo, ahpw kitail en kasalehiong irail me kitail poakehla irail.​—1 Pit. 3:8.

18. Ia duwen atail kapakap kan ar kak kansenamwahwihala irail kan me kin nsensuwed laud?

¹⁸ Iang me nsensuwed laudo kapakap ni ngidingid. Irail kan me uhdahn mworusala ele pehm me re sohte kak kapakap. Ele re pehm me re sohte warohng en kapakapohng Siohwa. Ehu ahl me kitail kak kansenamwahwihala irail iei en iang irail kapakap oh doadoahngki adarail. Nan kapakapo, kitail kak patohwanohng Siohwa ia uwen me mworusalao eh kesempwal ong kitail oh pil mwomwohdiso. Kitail kak peki rehn Siohwa en ketin kansenamwahwihala sapwellime  sihpw kesempwal menet. Soangen kapakap wet kak uhdahn kansenamwahwihala aramaso.​—Seims 5:16.

19. Dahme kak sewese kitail en onopada pwehn kansenamwahwih emen?

¹⁹ Pilada lepin lokaia kan me kak kamwahwihala oh kansenamwahwihala emen. Medewehla dahme ke pahn nda mwohn omw ndahla. Lokaia ni soh madamadau kak kamedekihala emen. Lokaia kadek kak kamwahwihala emen. (Lep. Pad. 12:18) Eri kapakap peki rehn Siohwa en ketin seweseiuk en doadoahngki lokaia kadek oh kansenamwahu. Tamataman me sohte lepin lokaia me manaman sang pein sapwellimen Siohwa mahsen kan me mi nan Paipel.—Ipru 4:12.

20. Dahme ekei riatail Kristian kan ele kin medewehki pein irail pwehki tiahk lemei me re lelohng, oh dahme kitail men katamankihong irail?

²⁰ Ekei me mahso mie me tiahk suwedih irail ele kin pehm me re samin, sohte kateparail, de sohte me poakohng de kak poakohng irail. Met sohte mehlel! Eri doadoahngki Paipel pwehn katamankihong irail me re uhdahn kesempwal mwohn silangin Siohwa. (Menlau kilang koakon me oaralape “ Kamweit Sang nan Paipel.”) Taman ia duwen tohnleng men eh ni kadek kakehlakahda soukohp Daniel ni ahnsou me e pehm me e luwet oh mworusala. Siohwa kupwurki ohl mwahu menet en ese me e uhdahn kesempwal. (Dan. 10:2, 11, 19) Pil duwehte met, riatail Kristian kan uhdahn kesempwal ong Siohwa!

21. Dahme pahn wiawihong irail koaros me kin wia soahng suwed kan oh sohte koluhkihla, ahpw dahme kitail en koasoanehdi teng en wia ong irail kan me lelohng tiahk lemei?

²¹ Ni ahnsou me kitail kin kansenamwahwih meteikan, kitail kin katamankihong irail duwen sapwellimen Siohwa limpoak. Oh kitail en dehr manokehla me Siohwa pil wia Koht en pwung pahrek. Siohwa ketin mwahngih duwen irail koaros me lelohng tiahk lemei, mehnda ma sohte me pil ese duwen met. Siohwa kin ketin mahsanihada soahng koaros, oh e uhdahn pahn ketin kaloke irail kan me sohte koluhkihla arail sapwung kan. (Nemp. 14:18) Erein atail awih met en wiawi, kitail wia uwen atail kak koaros en kasalehda limpoak ong irail kan me lelohng tiahk lemei. Laudsang met, ia uwen eh kansenamwahu en ese me Siohwa pahn ketin kansenamwahwihala irail koaros me Sehdan oh eh sampah tiahk suwedih! Ni ahnsou keren, kitail solahr douluhl pahn pwurehng medewe duwen soahng kamedek pwukat.​—Ais. 65:17.