1, 2. a) ¿Ima munaihuanda gentecunaca naciripashcanchi? b) Huaquin huahuacunaca ¿ima llaquitata charishca?

GENTECUNACA llaquilla sintirijpi ali sintichina yuyaihuanmi nacirishcanchi. Shinallata shuj gentecunata ayudana munaitapashmi charipanchi. Por ejemplo, shuj huahua pugllajushpa cungurihuan urmashpa chugrishpaca paipa taitapaman o mamapamanmi huacai huacai villagrin. Chaimi paipa taitacunaca imata pasarca nishpa huahuataca tapun. Shina tapushca jipami ama huacaichu nin. Chai jipaca jambita na ushashpapash, imagutapash nishpami huahuataca ali sintichin. Shinallata huahuata marcashpa, chugrishcata limpiashpa imaguhuanbash huatachin. Chaimi huaquinbica huahuaca ñana huacashpa cutin pugllangapapash rin. Punllacuna yalijpica huahuapa chugrishcaca ña alimi tucun.

² Huaquin huahuacunacarin chai chugrishcatapash yalimi ninanda sufrishca. Huaquin huahuacunaca shuj viajeta o tauca huatacunatami violai tucushpa causashca. Chaimi huahuacunaca nali sintirishpa llaqui llaqui causan. Huaquin violadorcunataca carcelpi vichashcami. Cutin huaquin violadorcunaca nunca na japi tucunashnami purin. Masqui violadorta carcelpi churajpipash violai tucushca huahuaca ña jatun cashpapashmi sufrishpa catin.

3. a) 2 Corintios 1:3, 4​pi nishca shinaca Jehová Diosca ¿imata rurachunda munan? b) ¿Ima tapuicunatata yachajupashun?

³ Huahua cajpi violai tucushca huauqui o pani ama yapata llaquilla sintirichunga ¿imata ayudaita ushan? (2 Corintios 1:3, 4, liingui). Shina llaqui apashca Jehovata sirvijcuna ama llaquilla cachunmi Jehová Diosca ayudangapaj munan. Jehová Dios imashina ayudajta yachangapaca cai quimsa tapuicunamanda yachajupashunchi: Huahua cai horas violai tucushcacunaca ¿imashpata ayudachun minishtin? ¿Pita ayudaita ushan? Violai tucushcacunataca ¿imashinata ayudai ushapanchi?

4, 5. a) Mayor gentecunahuan ricujpica huahuacunaca ¿imashinata can? b) Violai tucushca huahuacunahuanga ¿imata pasan?

⁴ Huahua cajpi violai tucushcacunaca huatacuna yalijpipash ninanda sufrishpami causan. Chaimandami paicunaca ayudachun minishtin. Chaita ali intindingapaca caipi pensaripashunchi. Huahuacunaca mayorcunashnaca na pensanllu. Chaimi violai tucushca huahuacunaca ninanda sufrin. Chaipaca cai yuyaicunata ricupashunchi.

⁵ Huahuacunaca paicunata cuidajcunapi, pihuan viñashpapash chai cuidajcunapimi confianzata charin. Huahuacunata cuidajcuna juyaihuan cuidajpimi huahuacunaca seguro sintirin. Shinallata paicunapipash confiashpami viñan. Huahuata violadorcunaca huaquinbica huasi ucupuramandallatami can. Shinallata familiapa amigocunallatami huaquinbicarin can. Huahuacuna picunapi confianzata charijcuna shina llaquichijpica huahuacunahuanga ¿imata pasan? Huatacuna yalijpipash huahuacunaca ñana gentecunapi fácil confiaita ushanllu.

6. Violanaca ¿imashpata nalipacha can?

⁶ Huahuacunaca paicunallata cuidaritaca na ushanllu. Huahuacunata violanaca jatun llaqui, nalipachami can. Huahua cashpa violai tucushcacunaca manllaihuan, llaquilla, ninanda sufrishpami causan. Violadorcunaca huahuacunata munai na munai pacta puñuchun, paipa cuerpota tacarichun obligashcamandami violai tucushca huahuacunaca cazarangapaj edadta charishpapash cusahuarmi pacta puñunataca nalicachishpa ricun. Shinallata nimapa na sirvij cuendami sintirin. Ashtahuangarin manllaimandami pipash paipa ladoman quimirichunbash na munan.

7. a) Violadorcunapaca ¿imashpata huahuacunata umachinaca fácil can? b) Violadorcunaca ¿imata nishpata huahuacunataca crichin?

⁷ Huahuacunaca ima ali o nali cajtaca na ali yachanllu. Shinallata ima llaquichi ushashcatapash na yachanllu (1 Cor. 13:11). Chaimandami violadorcunapaca huahuacunata violanaca fácil can. Violadorcunaca llullacunata nishpami huahuacunataca cashna crichin, canllatami culpata charingui, ama pimanbash villanguichu, violahuarcami nijpica candaca pipash na cringachu, candaca pipash na uyangapaj munangachu. Shinallata violadorca huahuataca crichinmi juyaimandami shina rurarcani nishpa. Shina nijpimi violai tucushca huahuacunaca tauca huatacuna yalijpipash chaicuna llulla cajtaca na ali intindin. Violai tucushca huahuacunaca cashnami pensarin, pipash ñucataca na juyahuanllu, nimapa na sirvinichu nishca yuyaihuanmi viñan.

8. Llaquilla sintirijcunata Jehová Dios ayudajtaca ¿imamandata seguro capanchi?

⁸ Tauca huatacuna yalijpipash violanaca ninan nalipacha cashcatami cuenta japipashcanchi. Violanaca jatun juchami can. Chaicunata ricushpami tucurimui punllacunapi causanajushcata ricupanchi. Shinallata Bibliapica ninmi: gentecunaca “pitapash na juyajcuna”, nalita rurajcunami ashtahuan mirashpa catinga nishpa (2 Tim. 3:1-5, 13). Diabloca ashtaca trampacunata churanataca alimi yachan. Chai trampacunapi urmajcunaca Diablopa munaita rurashpami causanajun. Shinapash Jehová Diosca Diablotapash, nalita ruraj gentecunatapash yalimi Jehová Diosca poderta charin. Diablopa ruraicunatapash Jehová Diosca alimi yachan. Chaimi ñucanchicuna llaquilla cajta Jehová Dios yachajtaca seguro capanchi. Chaita yachanami llaquilla sintirijpipash cushilla sintirichun ayudan. Jehová Diosta sirvijuimandaca ninandami cushijupanchi. Bibliapica ninmi: “Ñucanchita ninanda llaquij, tucuipi cushichij Taita Dios. Ñucanchita jatun llaquicuna japijpipash, Diosmi cushichin. Shujcunata jatun llaquicuna japijpipash, Taita Dios ñucanchita imashna cushichinshnallata, ñucanchipash cushichi ushachunmi, chashna cushichijun” nishpa (2 Cor. 1:3, 4). Shina cashpaca llaquilla sintirijcunata ayudangapaca ¿picunatata Jehová Diosca utilizan?

9. Taitamamacuna paicunapa huahuacunata jichujpipash Salmo 27:10​pi nishcashnaca rey Davidca ¿imatata Jehovamandaca nirca?

⁹ Huaquin huahuacunaca taitamama illa o taitamamacuna na cuidajpimi violai tucushca. Cutin shuj huahuacunataca familia ucupuramanda o familiapa rijsishcacunamandallatami violashca. Shina violai tucushca huahuacunami ashtahuanbachaca paicunata ayudachun minishtin. Llaquilla sintirijcunataca Jehová Diosllami alipacha ayudai ushashcata rey Davidca yacharca (Salmo 27:10, liingui). Shinallata taitamamacuna o familiacunallata huahuacunata llaquichijpipash Jehová Dios cuidanataca rey Davidca tucui shunguhuanmi crirca. Shina llaqui apashca huahuacunataca Jehová Diosca ¿imashinata cuidan? Congregacionbi huauquipanicunahuanmi cuidan. Paicunami ñucanchi familiacuna can. Jesusca nircami, Jehovata sirvijcunaca ñuca huauquicuna, ñuca panicuna, ñuca mamacunami can nishpa (Mat. 12:48-50).

10. Apóstol Pabloca ¿imashinata pai ali anciano cashcata nirca?

¹⁰ Congregación ucumanda shuj alipacha ejemplota ricupashunchi. Apóstol Pabloca shuj alipacha anciano huauqui, tucui shunguhuan Jehovata sirvijmi carca. Chaimi paica shuj alipacha ejemplo can. Ashtahuangarin Jehovami apóstol Pablotaca tucui huauquipanicunaman cashna nichun mandarca, imashinami ñuca Jesuspa chaquita catini, shinallata cangunapash ñuca chaquita catina canguichi nishpa (1 Cor. 11:1). Shinallata apóstol Pablo ali anciano cashcata ricuchishpami paimandallata parlashpa cashna nirca: “Mama paipaj uchilla huahuacunata juyashpa viñachinshnami, cangunataca charircanchi” nishpa (1 Tes. 2:7). Cunan tiempopipashmi tucui shunguhuan Jehovata ali sirvij ancianocunaca, llaquilla caj huauquipanicuna ama yapata llaquilla sintirichun juyaihuan ali shimicunahuan parlashpa paicunataca Bibliapa nishcacunahuan cushichin.

11. ¿Ancianocunallachu llaquilla cajcunataca cushichina can?

¹¹ Violai tucushcacunataca ancianocunallaca cushichitaca na ushanllu. Ashtahuangarin tucui huauquipanicunapashmi Bibliapi nishcashna “caishuj chaishuj cushichirina canguichi” nishcata cazuna capanchi (1 Tes. 4:18). Espiritualmente  shinlli caj panicunaca, llaquilla caj panicunataca cushichishpami ayudaita ushan. Jehová Diosca shuj mama paipa huahuata cuidaj cuendami can (Is. 66:13). Bibliapica punda tiempopi tauca huarmigucuna llaquilla sintirijcunata ayudashcatami parlan (Job 42:11). Llaqui llaqui caj panicunata, espiritualmente ali caj panicuna ayudajta ricushpaca Jehová Diosca ninandami cushijun. Huaquinbica shuj ancianoca espiritualmente shinlli caj panitami tapuita ushan, llaquilla o imamandapash sufrijuj panita ayudaita ushapanguichu nishpa. Ancianocuna shina tapushpapash na tucuicunapa ñaupajpi tapunllu. *

12. Violai tucushca huauquita o panita ayudajushpaca ¿imatata na rurana capanchi?

¹² Violai tucushca huauquita o panita imapacha pasashcata na parlangapaj munajpica na tapuchijunallachu capanchi (1 Tes. 4:11). Shina cashpaca llaqui apashca huauqui o pani ayudachun munajpica ¿imatata rurai ushapanchi? Cutin ayudachun minishtijujpica ¿imatata rurana capanchi? Chaipaca Bibliapa yachachishcacunata 5 yuyaicunata yachajupashunchi.

13. a) 1 Reyes 19:5-8​pi nishca shinaca Eliasmandaca Jehová Diosca ¿imatata rurarca? b) Jehovapa angelmandaca ¿imatata yachajupanchi?

¹³ Imagutapash rurashpa ayudapashunchi. Cunanga profeta Eliasmanda yachajupashunchi. Paipa causai peligropi cajpimi pacajungapaj rirca. Chaimi paica ninan llaqui cashcamanda huañungapapash munarca. Jehová Dios chaita ricushpami shuj angelta cachashpa Eliasta animarca. Chai angelmi micunata carashpa micui nishpa curca (1 Reyes 19:5-8, liingui). Ángel shina rurashcamandaca ¿imatata yachajupanchi? Ñucanchi huauquipanicuna sufrijujta yachashpaca imagutapash rurashpami paicunata juyashcata ricuchi ushapanchi. Shinallata llaqui apashca huauquihuan o panihuan ima pasashcamanda na parlaita ushashpapash paicunaman micunaguta carashpa, shuj regalota carashpa, shuj cartaguta escribishpami paicunata juyashcata, paicunata na cungashcata ricuchi ushapanchi.

14. Eliasmandaca ¿imatata yachajupanchi?

¹⁴ Violai tucushcacuna ali sintirichun, seguro sintirichun ayudapashunchi. Cutin Eliasmanda yaripashunchi. Horeb nishca urcuman rinaca caru carumi carca. Shina caru caruta richunmi Jehová Diosca Eliasta ayudarca. Punda tiempopica chai urcupimi Jehová Diosca paipa llactahuan shuj pactota rurashca carca. Chai urcupi Elías cashpaca seguromi sintirirca. Chaipi cashpaca ñuca contracuna na huañuchihuangachu nishpami seguro sintirishcanga. Caimandaca ¿imatata yachajupanchi? Shinaca violai tucushcacunata ayudangapaca paicunallata seguro sintirichunmi ayudana capanchi. Por ejemplo ancianocunaca cada uno diferente cashcatami yaipi charina can. Huaquin panigucunaca paicunapa propio huasipillata o congregacionbillatami parlangapaj munanga.

15, 16. Uyana nishpaca ¿imatata ningapaj munan?

¹⁵ Ali uyajcuna cashunchi. Bibliapica cai consejotami cun: “Imaguta cashpapash tucuicunallatami aliguta uyajcuna, aliguta yarishpara rimajcuna” cana canguichi nishpa (Sant. 1:19). Uyana nishpaca ¿imatata ningapaj munan? Tal vez nimata na nishpa, ali ali paicunata ricushpa uyanallaca na canllu. Chaipaca Jehová Dios Eliasmanda imata rurashcata ricupashunchi. Elías pai llaqui llaqui sintirishcata parlajujpica Jehová Diosca ali alimi uyajurca. Shina ali ali uyashpami Elías manllaihuan, llaquilla, pai imata rurashcapash nimapa na sirvij cashcatashna sintirijujta Jehová Diosca cuenta japirca. Shina uyashpami Jehová Diosca Elías imamandalla preocuparishcata juyaihuan ayudangapaj cashcata ricuchirca (1 Rey. 19:9-11, 15-18).

¹⁶ Violai tucushca huauqui o pani ima pasashcata ñucanchiman villajujpica ¿imashinata  paicunata llaquishcata, juyashcata ricuchi ushapanchi? Ali ali uyashpa, ali pensarishpami imagutapash nina capanchi. Tal vez cashna nita ushapanchi: “Shina pasashcamandaca ninandami llaquirini. Huahuacunataca nipipash na shina llaquichinachu can” nishpa. Paicuna ima pasashcata na ali intindijushpaca tal vez cutinmi alichu intindijuni nishpa cutin tapunalla capanchi. Quiquin cashna pasashcata villajpica: “Ñucaca cashnami intindircani ¿alichu intindishcani?” nishpa. Shina parlashpami, paicuna villajujpi ali ali uyashpa, paicunata juyashpa imashina sintirishcatapash intindishcata ricuchi ushapanchi (1 Cor. 13:4, 7).

17. Llaqui apashcata parlajujpica ¿imashpata na culirashpa uyana capanchi?

¹⁷ Shina llaqui apashcacuna parlajujpica alimi uyana capanchi. Parlajujpica imatapash nishpaca na satirijunachu capanchi. Na culirashpami ali uyana capanchi. Cutin Eliasmanda yaripashunchi. Paica imashinapacha sintirishcatami Jehová Diosmanga tucui tucuita villarca. Jehová Diosca paipi ashtahuan crichunmi Eliastaca ayudarca. Shina ayudashca jipallami cutin llaquilla sintirishcata Jehová Diosman Eliasca villarca (1 Rey. 19:9, 10, 13, 14). Eliasmandaca ¿imatata yachajupanchi? Pipash llaqui llaqui sintirijuimandami cutin cutin chaitallata parlanata minishtin. Shinaca paicunata intindingapaj esforzaripashunchi. Na culirashpa Jehová Dios cuenda paicuna imata nijta uyana capanchi. Llaqui pasashcata parlajujpica imata ruranataca na ninachu capanchi. Ashtahuangarin paicunata juyashcata, intindishcatami ricuchina capanchi (1 Ped. 3:8).

18. Llaquilla sintirijcunahuanga ¿imashinata Jehovata mañaita ushapanchi?

¹⁸ Llaquilla sintirijcunahuan Jehovata tucui shunguhuan mañapashunchi. Llaqui llaqui sintirijcunaca tal vez Jehovata mañaitapash na ushanllu. Shina llaqui apashcamandami Jehovata mañanatapash ninanda pinganayachin. Shina cashpaca paicunahuan Jehovata mañajushpaca chai sufrijuj huauquipa o panipa shutita nishpami mañana capanchi. Shina mañajushpaca ñucanchicuna paita juyajta, congregacionmanda  huauquipanicunapash paita juyajta nipashunchi. Shinallata ama yapa llaquilla sintirichun ayudapai nishpami llaqui apashca huauquimanda o panimanda mañana capanchi. Shina Jehovata mañajpimi paicunaca ñana yapata llaquiringa (Sant. 5:16).

19. Llaqui apashca huauquicunata o panicunata ayudangapaca ¿imatata rurana capanchi?

¹⁹ Llaqui apashca huauquita o panitaca ali shimicunata nishpa cushichipashunchi. Imaguta parlagrijushpapash ali pensarishpara parlapashunchi. Ali parlocunaca alimi sintichin. Cutin yangata parlajcunapa parlashcacunaca ninandami llaquichin (Prov. 12:18). Shina llaqui sintirijcunata ali shimicunata ningapaj, juyaihuan tratangapaj ayudahuai nishpa Jehovata mañana capanchi. Shinami llaqui apashca huauqui o pani ali, tranquilo sintirichun ayudaita ushapanchi. Shinapash ñucanchi nishcacuna paicunata ayudaita ushashpapash, Bibliapi nishca shimicunami ashtahuanbachaca paicunataca ayudaita ushan (Heb. 4:12).

20. a) Llaqui apashcacunaca ¿imatata pensan? b) Shina llaqui apashca huauquita o panitaca ¿imata nishpata ayudaita ushapanchi?

²⁰ Huahua cajpi violai tucushcacunaca nimapa na sirvinichu, ñucataca pipash na juyahuanllu nishpapashmi pensarin. Shinapash Bibliapi paicunata Jehová Diosca ninanda juyaj cashcata Bibliahuan ricuchipashunchi (“ violai tucushcacunata ayudaj textocuna” nishca recuadrota ricupangui). Profeta Daniel llaquilla sintirimanda fuerzapash illaj, llaqui llaqui cashcata yaripashunchi. Shina llaquilla sintirijujpimi Jehová Diosca shuj angelta cashna nichun cacharca. Daniel canga Jehovapaca ninan valishcami cangui. Candaca ninandami Jehová Diosca juyan nishpami angelca villarca. Shinami Jehová Diosca Danielta shinllichirca (Dan. 10:2, 11, 19). Cunanbipash llaqui apashca huauquipanicunataca Jehová Diosca ninan valishca cashcatami ricun.

21. a) Violadorcuna na arripintirijpica ¿imata paicunahuanga pasanga? b) Shinaca ¿imatata rurashpa catina capanchi?

²¹ Shina llaqui apashca huauquita o panita ayudashpaca Jehová Dios juyaj cashcatami yarichipanchi. Shinallata Jehová Dios imatapash ali ruraj cashcataca nunca na cunganachu capanchi. Shinaca pipash llaquichijtaca Jehová Diosca tucuitami ricujun. Jehová Diospaca nima na pacashcachu can. Shinallata violadorcuna na arripintirijpica Jehová Diosca paicunataca llaquichisha ninmi (Núm. 14:18). Shinaca violai tucushcacunataca juyaihuan ayudashpa catipashunchi. Cai mundopi nalita ruraj gentecunapa ruraicunata, Diablopa ruraicunatapash Jehová Dios tucuchinata yachashpaca ninandami cushijupanchi. Cai jatun llaquicunata tucuchijpica, ñucanchicunaca chai llaqui apashcacunataca nunca na yaripashunllu (Is. 65:17).