1, 2. a) Xú káʼnii xkri̱da rí nasngájma dí xa̱bu̱ numbaaʼ ndayúlú rí maʼni̱i̱ a̱jkiu̱lú ga̱jma̱a̱ rí ma̱ndoo muʼni̱i̱ a̱jkiu̱ún eʼwíínʼ rá. b) Ndiéjunʼ rí naguáʼníí tikhun e̱ji̱n rá.

IKHÁANʼ bi̱ ni̱ndxu̱lú xa̱bu̱ numbaaʼ ndayulúʼ rí eʼwíínʼ muni rí maʼni̱i̱ a̱jkiu̱lú ga̱jma̱a̱ rí ma̱ndoo mumbáñún eʼwíínʼ maʼni̱i̱ a̱jkiu̱ún. Mbá xkri̱da, índo̱ mbáa ada̱ xtáa raʼtsíin, ikhú naxpátri̱ga̱a̱ ga̱jma̱a̱ asndu nagi̱jtu̱ʼ ragómiuu, ikhú nagixi̱i̱ nambiyaʼ ga̱jma̱a̱ nagáyúu najkha̱a̱ gaʼyoo anu̱u̱ o ru̱dúu̱. Ikhiin xándoo muni rí magui̱ji̱i̱ rí na̱ʼkhu̱, mu ma̱ndoo muni rí maʼni̱i̱ a̱jkiu̱u̱n. Muraxi̱i̱ dí nigíʼnuu, muthán rí ní xámbiyaʼ, mbuyaraʼaa ga̱jma̱a̱ muthán ajngáa rí maʼni̱i̱ a̱jkiu̱u̱n ga̱jma̱a̱ muni thanáá náa nigawúunʼ. Ikhú ada̱ naʼnii a̱jkiu̱u̱n ga̱jma̱a̱ najkha̱a̱ gáʼtsíin mbu̱júu̱ʼ. Índo̱ nanújngoo mba̱yu̱u̱ʼ mbiʼi naʼni̱i̱ náa nigawúunʼ.

² Mú, kúwi̱i̱n e̱ji̱n bi̱ naguáʼníí itháán dí ra̱májánʼ. Tikhuun rí ikhiin ni̱ndxu̱ún bi̱ nitsijmiin, maski ajndu káaʼ mbá miʼtsu o mbayuuʼ tsiguʼ. Asndu xkáʼníí má, bi̱ naguáʼníí rígi̱ nagawúnʼ wéñuʼ. Tikhun xa̱bu̱ bi̱ nini rígi̱ naxtugui̱i̱n ga̱jma̱a̱ nagún guʼwá e̱jua̱nʼ, mú tikhuun na̱nguá. Maski má bi̱ niʼni nakhánáá castigo, mú bi̱ nimínuuʼ nagawúunʼ má xúʼko̱ asndu índo̱ nakhi̱i̱.

3. a) Xó má naʼthí náa 2 Corintios 1:3, 4, ndiéjunʼ rí nandoo Jeobá rá. b) Xú káʼnii graxe̱ guriʼña̱a̱ rá.

³ Ndiéjunʼ gámbáyúu mbáa xa̱bi̱i̱ Jeobá bi̱ nitsijmaa nákha chíʼgíiʼ ga̱jma̱a̱ rí nagawúunʼ má xúʼko̱ xá. (Atraxnuu 2 Corintios 1:3, 4.) * Jeobá nandoo rí mugiu̱u̱ mbuyangajui̱i̱n  ga̱jma̱a̱ muni̱i̱ a̱jkiu̱ún. Ma̱ngaa mbuʼyáá xóo extiʼña̱a̱ ajtsú graxe̱ rígi̱: Ndíjkha rí ndayóoʼ muʼni̱i̱ a̱jkiu̱ún bi̱ nitsijmiin nákha majkhinʼ rá. Tsáa gándoo maʼni̱i̱ a̱jkiu̱ún xá. Ga̱jma̱a̱ ndiéjunʼ gándoo muʼni mu maʼni̱i̱ a̱jkiu̱ún xá.

4, 5. a) Náá numuu rí gíʼmaa mbuʼyáá rí e̱ji̱n ni̱ndxu̱ún mixtiʼkuiin ki xóo xabuanii rá. b) Ndiéjunʼ eguáʼníí e̱ji̱n índo̱ mbáa natsijmiin rá.

⁴ Tikhun xa̱bu̱ bi̱ nitsijmiin nákha majkhinʼ ndañúunʼ má xúʼko̱ rí maʼni̱i̱ a̱jkiu̱ún maski ajndu ninújngoo má mbayuuʼ tsiguʼ. Mu mbuʼyáá náá numuu, ginii gíʼmaa marmáʼáan a̱jkiu̱lú rí e̱ji̱n ni̱ndxu̱ún mixtiʼkuiin ki xóo xa̱bu̱ guanii, ikha jngó rí nutsijmiin mixtiʼkhu xóo gawúnʼ. Guʼyáá tikhu numuu.

⁵ E̱ji̱n ndañúunʼ rí mambaxúun májánʼ gajmiún bi̱ nuni mbáji̱i̱n ga̱jma̱a̱ bi̱ nuñewu̱u̱n. Ga̱jma̱a̱ numuu rúʼko̱ naʼni rí makuwíin májánʼ ma̱ngaa rí makumún kuñún bi̱ kúwi̱i̱n gajmiún (Sal. 22:9). Mú, dí phú ra̱májánʼ nindxu̱u̱ dí nurugui̱i̱n ga̱jma̱a̱ tsiakii narígá náa guʼwún ga̱jma̱a̱ bi̱ nutsijmin ni̱ndxu̱ún bi̱ kuñún o bi̱ nambáxu̱u̱n gajmiún. Xóo eku̱mu̱u̱ ada̱ índo̱ nagíʼnuu rígi̱ rá. Rígi̱ naʼni rí ada̱ maʼniuu mingíjyúuʼ maku̱mu̱u̱ kaʼñúún eʼwíínʼ nda̱wa̱á.

6. Náá numuu rí naguma gíníi wéñuʼ e̱ji̱n índo̱ nutsijmiin xá.

⁶ E̱ji̱n ni̱ndxu̱ún wabiinʼ. Ga̱jma̱a̱ rí nutsijmiin naʼni gawúnʼ wéñuʼ. E̱ji̱n nagawúnʼ wéñuʼ índo̱ nuniu̱u̱n tsiakii mubúúnʼ gajmiún nákha ikhiin xóo tséwáxi̱i̱n rí munujúnʼ ga̱jma̱a̱ rí mubúúnʼ gajmiún mbáa. Índo̱ nutsijmiin naxtiʼkhuu mbá kayuuʼ xóo nundxa̱ʼwa̱míjna̱ ga̱jma̱a̱ numuu rí mubúúnʼ gajmiún mbáa, rí nundxa̱ʼwa̱míjna̱ ga̱jma̱a̱ numún ikhiin, ga̱jma̱a̱ numún eʼwíínʼ.

7. a) Ndíjkha rí tséʼniuu gakhi̱i̱ bi̱ natsijmiin e̱ji̱n maʼninduwiinʼ ga̱jma̱a̱ xú káʼnii ma̱ndoo maʼni xá. b) Ndiéjunʼ gándoo gárígá ga̱jma̱a̱ numuu nduwaʼ rúʼko̱ rá.

⁷ E̱ji̱n xóó tséwáxi̱i̱n mu majmiin mundxaʼwamíjna̱ májánʼ ga̱jma̱a̱ mbuyáá ndiéjunʼ rí maʼni mumíniiʼ (1 Cor. 13:11). Ikhaa numuu rúʼko̱ rí bi̱ natsíjmaa ada̱ tséjyúuʼ naʼni nduwaaʼ. Naʼthúu̱n minduwaʼ rí naʼni magawúunʼ, rí ikhaa gíʼdoo aʼkhúun, rí nimbáa xáʼthúu̱n dí nigíʼnuu ga̱jma̱a̱ rí nimbáa xáʼnimbo̱o̱ á mu naʼthí rí nigíʼnuu o rí májánʼ má nindxu̱u̱ dí mbáa xa̱bu̱ nikhi̱i̱ mabóoʼ ga̱jma̱a̱ mbáa ada̱ numuu rí xúʼko̱ nasngájmuu rí nandoo kaʼyoo. Ga̱jma̱a̱ bi̱ nagíʼnuu rígi̱ mbayuuʼ tsíguʼ xákro̱ʼo̱o̱ rí xúgíʼ rígi̱ nindxu̱u̱ minduwaʼ. Rígi̱ maʼni rí ada̱ maku̱mu̱u̱ rí tsagaa ga̱jma̱a̱ dí ragíʼdoo numuu nditháan ma̱ngaa rí nánguá kaʼyoo maʼndún kuyáá.

8. Náá numuu nduʼyáá gajkhun rí Jeobá ma̱ndoo maʼni̱i̱ a̱jkiu̱ún bi̱ nimíniiʼ rá.

⁸ Ga̱jma̱a̱ numuu xúgíʼ rígi̱, tséʼniulú tsiánguá rí nutsijmiin e̱ji̱nʼ naʼni magawúúnʼ mbayuuʼ tsiguʼ. Rígi̱ nindxu̱u̱ mbá rí naʼni mumíniiʼ wéñuʼ. Rí mbiʼi xúgi̱ kúwi̱i̱n wéñuʼ xa̱bu̱ bi̱ nutsijmiin e̱ji̱n, rúʼko̱ nasngájma rí kuwáanʼ náa iwáá mbiʼi, náa rí xa̱bu̱ “xáʼndun kuñún a̱ngiu̱ún” ga̱jma̱a̱ “xa̱bu̱ bi̱ ra̱míjínʼ wéñuʼ ga̱jma̱a̱ bi̱ nuni nduwaʼ” nuni má xúʼko̱ dí ra̱májánʼ (2 Tim. 3:1-5, 13). Xúgíʼ rí naʼni Gixa̱a̱ nindxu̱u̱ xkawiʼ kayuuʼ, ga̱jma̱a̱ phú gíná rí xa̱bu̱ nuni rí naniguuʼ ikhaa. Mú Jeobá gíʼdoo itháan tsiakii ki xóo Gixa̱a̱ ga̱jma̱a̱ xa̱bu̱ bi̱ nuni rí nandoo ikhaa. Ma̱ngaa, Dios naninuuʼ májánʼ xú káʼnii eʼni Gixa̱a̱. Ikha jngó, nandoo nduʼyáá gajkhun rí ikhaa nakro̱ʼo̱o̱ rí xóo gawúnlú ga̱jma̱a̱ rí ikhaa ma̱ndoo maʼni rí maʼni̱i̱ a̱jkiu̱lú. Phú nadxulú rí kuwáanʼ ru̱ʼni̱ ñajuunʼ “Dios bi̱ naʼni̱i̱ a̱jkiu̱lú náa xúgíʼ gamiéjunʼ rí kuaʼdáá, mu ikháanʼ ma̱ndoo muʼni̱i̱ a̱jkiu̱ún bi̱ numíniʼ xó má Dios niʼni  maʼni̱i̱ a̱jkiu̱lú” (2 Cor. 1:3, 4). Mú, tsíin lá ejmiuu Jeobá mu muni̱i̱ a̱jkiu̱lú rá.

9. Xó má niʼnirámáʼ rey David náa Salmo 27:10, ndiéjunʼ gáʼni Jeobá ga̱jma̱a̱ numún bi̱ nuniñu̱u̱ʼ bi̱ kuwa náa guʼwún rá.

⁹ Gajkhun rí ndayóoʼ mixtambáñuun itháan bi̱ anu̱ún túñewu̱u̱n índo̱ nitsijmiin o bi̱ nitsijmiin nindxu̱u̱ mbáa bi̱ kuyáá. Rey David ndiʼyoo májánʼ rí i̱ndó Jeobá nindxu̱u̱ bi̱ maʼngo̱o̱ maʼni̱i̱ a̱jkiu̱lú mbájkhu (atraxnuu Salmo 27:10). * Ikhaa ndiʼyoo májánʼ rí Dios mañewu̱u̱n bi̱ niniñu̱u̱nʼ bi̱ kuwa náa guʼwún. Xú káʼnii eʼni xá. Najmiuu xa̱bi̱i̱ bi̱ guájun jmbu. Bi̱ kuwa náa congregación ni̱ndxu̱ún xóo familia ndrígúlú. Mbá xkri̱da, Jesús niʼthí rí bi̱ naʼni ñajuunʼ Dios nindxu̱u̱ xóo ndxájuu ga̱jma̱a̱ ru̱dúu̱ (Mat. 12:48-50).

10. Xú káʼnii niʼthí Pablo ga̱jma̱a̱ numuu ñajunʼ ndrígóo xóo bi̱ kayá edxu̱u̱ rá.

¹⁰ Guʼyáá mbá xkri̱da dí narígá náa congregación. Apóstol Pablo ninindxu̱u̱ bi̱ kayá edxu̱u̱ bi̱ niñejunʼ wéñuʼ ga̱jma̱a̱ niniñuuʼ mbá májánʼ xkri̱da. Dios niʼni rí maʼthúún cristianos rí mbuyaridáá ikhaa xó má ikhaa ndiʼyáridoo Cristo (1 Cor. 11:1). Mbá miʼtsu ikhaa niʼnirámáʼ xígi̱ kaʼnii ga̱jma̱a̱ numuu ñajunʼ ndrígóo xóo bi̱ kayá edxu̱u̱: “Rí phú ninixu, nini̱ndxu̱xu̱ʼ májánʼ a̱jkiu̱xuʼ náa ikháanʼla, xóo mbáa a̱ʼgu̱ bi̱ nañewu̱u̱n májánʼ e̱ji̱i̱n” (1 Tes. 2:7). Xúʼko̱ má eni bi̱ kuya̱ edxu̱u̱ rí mbiʼi xúgi̱, nuthúún ga̱jma̱a̱ ngajua ma̱ngaa najmún Biblia mu muni̱i̱ a̱jkiu̱ún bi̱ numíniiʼ.

11. Ndiéjunʼ esngájma dí raʼkháa i̱ndó bi̱ kuya̱ edxu̱u̱ ma̱ndoo muni̱i̱ a̱jkiu̱u̱n mbáa rá.

¹¹ Raʼkháa i̱ndó bi̱ kuya̱ edxu̱u̱ ma̱ndoo muni̱i̱ a̱jkiu̱ún bi̱ nitsijmiin. Xúgiáánʼ ndayóoʼ rí muʼnimbulúʼ xtángoo rígi̱: “Guni rí maʼni̱i̱ a̱jkia̱la” (1 Tes. 4:18). A̱ngiu̱lú gu̱ʼu̱ bi̱ guanii ma̱ndoo mumbañún eʼwíínʼ a̱ngiu̱lú bi̱ ndañúunʼ maʼni̱i̱ a̱jkiu̱ún. Ma̱ngaa Jeobá nambríguii ga̱jma̱a̱ xóo mbáa a̱ʼgu̱ bi̱ naʼni maʼni̱i̱ a̱jkiu̱u̱n a̱ʼdióo (Is. 66:13). Náa Biblia na̱ʼkha̱ mbaʼa xkri̱da ndrígu̱ún  gu̱ʼu̱ bi̱ nimbañúún bi̱ nikuwa gíná (Job 42:11). Jeobá nadxuu índo̱ ndaʼyoo rí a̱ngiu̱lú gu̱ʼu̱ numbañún bi̱ kuwa rumíniiʼ. Bi̱ kuya̱ edxu̱u̱ ma̱ndoo muthún guʼwáá a̱ngiu̱lú gu̱ʼu̱ bi̱ nugíʼ májánʼ xkri̱da mu mumbañún bi̱ kuwa rumíniiʼ. *

12. Ndíjkha rí gíʼmaa muʼni tsumáá índo̱ numbáyíí mbáa ndxájulú rá.

¹² Gajkhun má, rí índo̱ numbayíí mbáa ndxájulú, tsumáá gúʼni, mu xúraxi̱i̱ ga̱jma̱a̱ mbá numuu rí ikhaa tsíyoo maʼthí (1 Tes. 4:11). Mú, dí gándoo muʼni mu mumbaʼñún bi̱ ndañúunʼ maʼni̱i̱ a̱jkiu̱ún rá. Guʼyáá witsu enii rí nigájnuu náa Biblia.

13. a) Xó má naʼthí náa 1 Reyes 19:5-8, ndiéjunʼ niʼni ángel ndrígóo Jeobá ga̱jma̱a̱ numuu Elías rá. b) Xú káʼnii gándoo mbuʼyaridáá xkri̱da ndrígóo ángel bugi̱ rá.

¹³ Gumbáʼñúún bi̱ ndañúunʼ. Índo̱ gaʼyee Elías ndiyóoʼ magajnúu numuu rí nindúún muxiyáa, nixtáa gíná wéñuʼ rí asndu nindoo makhañúu. Ikhú, Jeobá nikuʼmaa ángel ndrígóo mu maxnúu tsiakii. Ángel bugi̱ nixnúu ganitsu ga̱jma̱a̱ niʼthúu̱n rí makuiʼtsu (atraxnuu 1 Reyes 19:5-8). * Relato rígi̱ naʼsngúlú mbá ikha rí gíʼdoo numuu: Rí maski ajndu mbá chíʼgíiʼ rí gátani ma̱ndoo mambáyúu wéñuʼ mbáa ndxájulú bi̱ xtáa ramínuuʼ. Xóo maraxna̱a̱ rí mikhu, mbá iya taun o mataniraʼmáʼ náa maratha̱a̱n rí naxmiéjuanʼ xtayáá. Ma̱ndoo muʼni rígi̱ á mu tséʼngo̱o̱ a̱jkiu̱lú muʼtháán mbájmbu.

14. Ndiéjunʼ imbo̱ʼ eʼsngúlúʼ rí nigíʼnuu Elías rá.

¹⁴ Guʼni rí bi̱ nimíniiʼ makuwá májánʼ. Guʼthá mbu̱júu̱ ga̱jma̱a̱ numuu Elías. Jeobá nixnúu tsiakii mu maʼngo̱o̱ maʼga asndu náa kúbá Horeb, náa nimbánuu ga̱jma̱a̱ xuajñu tsiguʼ kidíiʼ. Náa mbaaʼ mitsinguánʼ rúʼko̱, mbáa Elías nikumuu dí nikríyaaʼ, numuu rí xtáa mitsínguánʼ náa xa̱bu̱ bi̱ nandún muxi̱yáa. Ndiéjunʼ i̱mba̱ ikha ejmañuluʼ rá. Rí, á mu nandulú mumbaʼyíí mbáa bi̱ nitsijmaa, giʼnii ndayóoʼ muʼni rí maxtáa májánʼ. Mbá xkri̱da, bi̱ kuya̱ edxu̱u̱ gíʼmaa mbuyáá rí a̱ngiu̱lú mixtiʼkhu xóo ekumún. Mbáa ndxájulú a̱ʼgu̱, mbáa naxtáa itháan majan índo̱ naʼga̱a̱n mbá té o índo̱ naʼni i̱ʼwáʼ ñajunʼ náa goʼwóo, mú eʼwíínʼ nanigu̱nʼ muthi índo̱ naguwaʼ náa guʼwá nagimbáanʼ.

15, 16. Dí eyoo gáʼthúu̱n rí majmañulúʼ muʼdxawíín rá.

¹⁵ Guxnatiʼñamijná muʼdxawíín. Náa Biblia naxnúlú xtágabu rígi̱: “Xúgínʼ xa̱bu̱ gíʼmaa makuwa xawii mu mudxuun, mañúú gíʼmaa muthi” (Sant. 1:19). Lá nuxnatiʼñamijná muʼdxawíín ráʼ. Mbáa nakumulú rí muʼdxawíín i̱ndó ndayóoʼ mutriʼgánʼ wíí ga̱jma̱a̱ mbuʼyáá bi̱ naʼthúlúʼ. Mú, rí majmañulúʼ mudxawíín nandoo gáʼthúu̱n itháan. Guʼyáá rí niʼni Jeobá ga̱jma̱a̱ Elías. Índo̱ ikhaa niʼthí xúgíʼ rí naʼni maxmiéjuunʼ, Dios nidxawun májánʼ xúgíʼ rí niʼthí. Ndiʼyoo rí gaʼyee ndrígióo namiñuu, naku̱mu̱u̱ rí xtáa mbáwíi ga̱jma̱a̱ nandxaʼwamínaʼ rí xúgíʼ rí niʼni na̱nguá nigiʼdoo numuu. Ga̱jma̱a̱ májánʼ, Jeobá nimbáyúu náa mámbá rí nixmiéjuunʼ. Xúʼko̱ nisngájma  rí nigíʼ edxu̱u̱ maʼdxun náa xúgíʼ rí niʼthí (1 Rey. 19:9-11, 15-18).

¹⁶ Índo̱ guʼdxawíín rí naʼthí mbáa bi̱ nitsijmaa, gundxaʼwamíjna̱ xú kaʼnii gándoo gumbayíí ga̱jma̱a̱ gusngajmáá rí nagáwíinʼ a̱jkiu̱lú kuʼyáá. Nguáná, nañambáá rí muʼthá káaʼ nguéjma̱ ajngáa mu xúʼko̱ mbaʼyoo rí naxmiéjunlú kuʼyáá. Ma̱ndoo muʼtháán: “Phú gíná nitagiʼníí. Ndíjkha rí xúʼko̱ niña̱a̱ʼ”. Mu musngajmá rí nandulúʼ makru̱ʼu̱lú májánʼ rí xtáa raʼthí, ma̱ndoo muʼtháán: “Índo̱ nirathúnʼ rígi̱, nikroʼoʼ..., lá xúʼko̱ nindxu̱u̱ ráʼ.” Índo̱ nuʼtháán xúgi̱ kaʼnii, nusngajma rí kuwáanʼ ruʼdxawíín májánʼ rí naʼthí ga̱jma̱a̱ nuʼni míjna makru̱ʼu̱lú kuʼyáá (1 Cor. 13:4, 7).

17. Náá numuu rí gíʼmaa maʼngo̱o̱ a̱jkiu̱lú ga̱jma̱a̱ muñewa̱a̱n rí muʼthá rá.

¹⁷ Mú gíʼmaa muñewa̱a̱n wéñuʼ rí muʼthá. Xúʼtáán mbá nacha̱ xa̱bu̱ índo̱ xtáa raʼthí. Guniʼñááʼ rí maʼthí xúgíʼ. Índo̱ Elías niʼthúu̱n Jeobá rí naʼni maxmiéjuunʼ, niʼthúu̱n xúgíʼ kayuuʼ rí gíwanʼ náa a̱jkiu̱u̱n. Ga̱jma̱a̱ nda̱wa̱á rí Jeobá nixnúu tsiakii, Elías nitanga̱a̱ niʼthí mbu̱júu̱ʼ ikháá má xóo rí niʼthí nákha ginii (1 Rey. 19:9, 10, 13, 14). Rígi̱ najmañulúʼ rí tikhun xa̱bu̱ bi̱ kuwa gíná o nagawúnʼ nandún muthi kikáá rí naʼni maxmiéjúúnʼ. Á mu xúʼko̱ narígá, gíʼmaa maʼngo̱o̱ a̱jkiu̱lú muʼdxawíín, xó má Jeobá. Xúʼyáʼ muʼnimbánii ikháanʼ, i̱ndó gusngajmá rí nagáwiinʼ a̱jkiu̱lú ga̱jma̱a̱ rí nandulú kuʼñúún (1 Ped. 3:8).

18. Ndiéjunʼ gándoo muʼni gajmiúlú bi̱ numíniiʼ índo̱ muʼtájkáan rá.

¹⁸ Guʼtájkáan gajmiúlú bi̱ numíniiʼ. Xa̱bu̱ bi̱ xtaa ramínuuʼ mbáa asndu nánguá eʼngo̱o̱ a̱jkiu̱u̱n maʼtájkáan. Mbáa naku̱mu̱u̱ rí nánguá kaʼyoo maʼtákáñuu Jeobá. Á mu nandulú mumbaʼyíí, guʼtájkáan gajmiúlú ga̱jma̱a̱ gajmulú mbiʼyuu. Guʼtháán Jeobá rí nagáwi̱i̱n a̱jkiu̱lú rí nigíʼnuu ndxájulú ma̱ngaa bi̱ kuwa náa congregación. Ga̱jma̱a̱ guʼtháán rí maxnúu tsiakii mu maʼni̱i̱ a̱jkiu̱u̱n. Rí muʼtájkáan xúgi̱ kaʼnii nayambáá wéñuʼ (Sant. 5:16).

19. Dí gambáyulú mu makuwáanʼ xawii mu mumbaʼyíí maʼni̱i̱ a̱jkiu̱u̱n mbáa rá.

 ¹⁹ Guʼtháán ajngáa rí maʼni̱i̱ a̱jkiu̱u̱n. Gundxa̱ʼwa̱míjna̱ nákha xóó tséʼthá. Rí xúñewaan rí muʼthá ma̱ndoo maʼni magawúunʼ itháan, mú rí majmulú ajngáa rí májánʼ naʼni maʼni̱i̱ a̱jkiu̱ún (Prov. 12:18). Ikha jngó, gunda̱ʼa̱a̱ Jeobá rí mambáyulúʼ muxkamaa ajngáa rí májánʼ mu muʼtháán mu xúʼko̱ mambáyúu ga̱jma̱a̱ rí maʼni̱i̱ a̱jkiu̱ún bi̱ nagawúunʼ. Garmáʼáan a̱jkiu̱lú rí ajngáa rí itháan nayambáá nindxu̱u̱ rí na̱ʼkha̱ náa Biblia numuu dí ajngáa rúʼko̱ na̱ʼkha̱ náa Jeobá (Heb. 4:12).

20. Maski má gíná niguáʼníí, ndiéjunʼ gíʼmaa mbuyáá májánʼ bi̱ niguáʼníí dí raʼkhí ga̱jma̱a̱ ndiéjunʼ rí eyulú dí marmáʼáan a̱jkiu̱ún xá.

²⁰ Bi̱ nitsijmiin nákha majkhiinʼ, tikhun nakumu̱ún rí nánguá guáʼdáá numún ga̱jma̱a̱ rí mitsagiin, ma̱ngaa rí nimbáa tsíyoo gáʼñún o nundxaʼwamíjná rí nánguá kaʼñún rí eʼwíínʼ maʼndún kuñún. Mú ragájkhun rígi̱. Ikha jngó, gajmulú Biblia mu mbuyáá rí guaʼdáá numún náa Jeobá (atayáá kúguamáʼáan “Textos rí naʼni̱i̱ a̱jkiu̱lú”). Guʼyáá dí nigíʼnuu gaʼyee Daniel, ikhaa nikumuu rí nánguá gíʼdoo tsiakii ga̱jma̱a̱ nixtáa gíná, Dios nikuʼmaa ángel ndrígióo mu maxnúu tsiakii ma̱ngaa maʼthúu̱n rí gíʼdoo numuu ga̱jma̱a̱ nandún kuyáá (Dan. 10:2, 11, 19). Xúʼko̱ má xúgi̱ ma̱ngaa, Jeobá ndaʼyoo rí guáʼdáá numún a̱ngiu̱lú bi̱ kuwa gíná.

21. a) Ndiéjunʼ gaguáʼníí bi̱ nutsijmiin e̱ji̱n á mu tsítanga̱a̱ a̱jkiu̱ún rá. b) Ga̱jma̱a̱ ndiéjunʼ gíʼmaa muʼni ikháanʼ rá.

²¹ Índo̱ gúʼni̱i̱ a̱jkiu̱u̱n mbáa, guʼtháán rí Jeobá nindxu̱u̱ mbáa Dios bi̱ nandoo kaʼyulú. Ga̱jma̱a̱ rí ikhaa nindxu̱u̱ mbáa Dios bi̱ naʼni rí jmbu. Nimbá dí ra̱májánʼ nda̱a̱ go̱ʼo̱o̱ náa ikhaa. Ikhaa ndaʼyoo xúgíʼ dí narígá, ma̱ngaa magudíin xa̱bu̱ bi̱ nutsijmiin e̱ji̱n á mu tsítanga̱a̱ a̱jkiu̱ún. (Núm. 14:18). Mú, gúʼni xó má eʼngo̱o̱ mu musngajmá rí nandulú kuʼñúún bi̱ nitsijmiin. Naʼni̱i̱ a̱jkiu̱lú índo̱ nduʼyáá rí Jeobá maʼni̱i̱ a̱jkiu̱ún bi̱ niguma gíníi niʼni Gixa̱a̱ ga̱jma̱a̱ numbaaʼ ndrígóo. Nánguá má mbayuuʼ guanúu rí ní xarmáʼáan a̱jkiu̱lú gáʼni xúgíʼ rígi̱ (Is. 65:17).