1, 2. 1) ¿Tuku li’akxilhtit limasiya pi putum latamanin lakaskinaw takgoxamixit chu na tlan nakamakgoxamixiyaw amakgapitsin? 2) ¿Tuku nitlan kaʼakgspula makgapitsi laktsu kamanan?

PUTUM latamanin lakaskinaw takgoxamixit chu na tlan nakamakgoxamixiyaw amakgapitsin. Akgtum li’akxilhtit, akxni chatum aktsu kgawasa tamakgwasa chu tatsokgosxili akxni kgamanama, lakapala lakgan xtlat o xtse. Xlakan nila mapaksakgo, pero tlan makgoxamixikgo. Kgalhskinkgo tuku lanilh, xakanikgo xlakgaxtajat, akgpixtiyakgo chu liwana xakgatlikgo chu max wi tuku litlawanikgo niku takgawilh. Aktsu kgawasa nialh tasa chu max asta na’ampara kgamanan. Kaj ni makgas, niku takgawilh napaksa.

² Pero wilakgolh makgapitsi laktsu kamanan tiku tlakg takgawikgonit o katlawanikanit tuku nitlan. Makgapitsi kalikgamanankanit, makgtum o akglhuwa kata chuna katlawaka. Maski chuna, lhuwa kata nitlan limakgkatsikgo chu lu lilipuwankgo. Makgapitsi tiku kalikgamanankgo laktsu kamanan kamalakgsiyakan chu kamalakgaxokgekan chu makgapitsi tasiya pi nitu katlawanikan. Pero maski tiku likgamanalh aktsu kgawasa o tsumat tunkun namalakgaxokgekan, tiku tlawanika tuku nitlan chuntiya lipatinan maski akxni lankata.

3. 1) Chuna la wan 2 Corintios 1:3, 4, ¿tuku lakaskin Jehová? 2) ¿Tuku takgalhskinin nakgalhtiyaw?

³ ¿Tuku namakgtaya chatum kstalanina Cristo tiku likgamananka akxni aktsujku xwanit chu chuntiya nitlan makgkatsi? (Kalikgalhtawakga 2 Corintios 1:3, 4). Xlikana pi Jehová lakaskin pi xlakskujnin nakalimasiyanikan tapaxkit chu takgoxamixit. Wa xlakata, kaʼakxilhwi xatakgalhtin umakgolh akgtutu takgalhskinin: ¿Tuku xlakata lakaskinkgo takgoxamixit tiku  kalikgamananka akxni aktsujku xwankgonit? ¿Tiku tlan nakamakgtaya? Chu ¿tuku tlan natlawayaw xlakata nakamakgoxamixiyaw?

4, 5. 1) ¿Tuku xlakata talakaskin nalakapastakaw pi laktsu kamanan ni xtalakxtum tiku tlakg lankata? 2) ¿Tuku nakitaxtu komo aktsu kgawasa nalikgamanankan?

⁴ Makgapitsi latamanin tiku kalikgamanankan akxni laktsujku xwankgonit, chuntiya lakaskinkgo nakamakgoxamixikan maski lhuwata kata la titaxtunit. Xlakata na’akgatekgsaw tuku xlakata, pulana talakaskin nalakapastakaw pi laktsu kamanan ni xtalakxtumkan tiku laklankata chu wa xlakata tanu tanu la lipatinankgo. Kaʼakxilhwi makgapitsi tuku xlakata.

⁵ Laktsu kamanan lakaskinkgo pi lakatsu nakatawilanikgo tiku kakuentajtlawakgo xlakata nakalipawankgo. Komo chuna, nitu lipekuankgo chu kalipawankgo latamanin tiku kapaxkikgo (Sal. 22:9). Lu nitlan, pero lhuwa laktsu kamanan kalikgamanankan anta kxchikkan chu tiku chuna kalikgamanankgo wa tiku xtalilakgapasnikan o tiku xʼamigoskan xnatlatni. Akxni chatum aktsu kgawasa o tsumat likgamanankan chu wa likgamanan tiku xla xlipawan, max lu tuwa namakgkatsi nakalipawan amakgapitsin, maski titaxtunita lhuwa kata.

6. ¿Tuku xlakata lu nitlan kitaxtu kalikgamanankan laktsu kamanan?

⁶ Laktsu kamanan nila xʼakstukan kakuentajtlawakan. Akxni kalikgamanankan laktsu kamanan lu nitlan kakitaxtuni. Xlakata fuerza kamatlawikan talakgxtumit, akxni xmaknikan nina makgkatsi chu xtalakapastaknikan nina lakpuwan pi natamakgaxtokgkgo chu nakgalhikgo talakgxtumit. Tiku kalikgamanankan nialh liʼakxilhkgo talakgxtumit chuna la xlilat, namakgkatsi pi nialhtu litaxtu chu nakapekuani tiku nalakgtalakatsuwi.

7. 1) ¿Tuku xlakata tiku kalikgamanan laktsu kamanan ni tuwa makgkatsi nakaʼakgskgawi, chu la tlawa? 2) ¿Tuku nakitaxtu xlakata uma taʼakgsanin?

⁷ Laktsu kamanan nina liwana lakapastaknankgo, ni katsikgo akxni katlawaniputunkan tuku nitlan chu ni katsikgo tuku natlawakgo (1 Cor. 13:11). Wa xlakata tiku kalikgamanan laktsu kamanan ni tuwa makgkatsi nakaʼakgskgawi. Wani taʼakgsanin nema lu nitlan namamakgkatsini, pi wa lin kuenta xlakata likgamananka, pi niti nawani tuku lalh, niti katikgaxmatnilh chu ni katikanajlanika komo nalichuwinan tuku lama, pi akxni chatum tiku lankata natatalakgxtumi akstu kgawasa limasiyani pi lu paxki. Wa xlakata aktsu kgawasa tiku likgamananka ni katikatsilh komo kaj takgsanin tuku wanimaka. Max aktsu kgawasa nalistaka talakapastakni pi nitu litaxtu chu pi ni lakgchan nalimasiyanikan tapaxkit.

8. ¿Tuku xlakata liwana katsiyaw pi Jehová tlan nakamakgoxamixi tiku katlawanikanit tuku nitlan?

⁸ Chuna la akxilhnitaw, ni kaks kinkamalakawaniyan pi lhuwa kata lipatinan tiku likgamanankan. Akgtum lanka talakgalhin. Xlakata la uku anan lhuwa tiku kalikgamanankan litasiya pi lamaw kxaʼawatiya kilhtamaku, litasiya pi la uku latamanin «ni katilapaxkikgolh kfamilia» chu anan «lakchixkuwin tiku lixkajni likatsikgo chu akgskgawinankgo» (2 Tim. 3:1-5, 13). Tuku liʼakgskgawinan Satanás lu nitlan chu lu nitlan pi lakchixkuwin tlawakgo tuku xla makgapaxuwa. Pero Jehová tlakg tliwakga nixawa Satanás chu nixawa latamanin tiku tlawakgo tuku lakaskin kintalatlawanakan. Nachuna, Dios liwana katsi tuku tlawa Akgskgawini. Wa xlakata, liwana katsiyaw pi xla akxilha tuku patimaw chu pi xla tlan nakinkamakgoxamixiyan. Lu lipaxuwayaw skujnaniyaw «Dios tiku tlan kamamakgkatsini latamanin xliputum tuku titaxtukgo, tiku tlan kinkamamakgkatsiniyan xliputum taʼakglhuwit nema titaxtuyaw, xlakata akinin na tlan  nakamamakgkatsiniyaw tiku titaxtumakgolh tanu tanu taʼakglhuwit chu nalimaklakaskinaw tuku Dios tlan kinkalimamakgkatsiniyan» (2 Cor. 1:3, 4). ¿Tiku kalimaklakaskin Jehová xlakata nakinkamakgoxamixiyan?

9. Chuna la tsokgwililh mapakgsina David anta kSalmo 27:10, ¿tuku natlawa Jehová xpalakatakan tiku kalakgmakgankgonit xfamiliajkan?

⁹ Tiku tlakg lakaskinkgo pi nakamakgoxamixikan wa latamanin tiku xnatlatnikan ni kuenta katlawakgolh chu kalikgamananka. Mapakgsina David xkatsi pi wa Jehová tiku tlakg tlan kinkamakgoxamixiyan (kalikgalhtawakga Salmo 27:10). Xkanajla pi Dios kakuentajtlawa tiku kalakgmakgankgonit xfamiliajkan. ¿La tlawa? Kalimaklakaskin xlakskujnin. Tiku xalak congregación wa kifamiliajkan. Akgtum liʼakxilhtit, Jesús lichuwinalh pi tiku kakninanikgo Dios chuna la xla, xnatalan chu xtse xlitaxtukgolh (Mat. 12:48-50).

10. ¿La lichuwinalh Pablo pi xtlawa xtaskujut?

¹⁰ Kaʼakxilhwi akgtum liʼakxilhtit xlakata uma anta kcongregación. Apóstol Pablo xwili akgtum lu tlan liʼakxilhtit anta kcongregación xlakata lhuwa kskuja chu ni xmakgxtakga Dios. Asta Dios malakpuwanilh nalhkawili pi amakgapitsin kstalanikgolh xliʼakxilhtit chuna la xla kstalani xliʼakxilhtit Cristo (1 Cor. 11:1). Akgtum kilhtamaku, wa pi xtaskujut la kgolotsin chuna xwanit: «Tlan kkalikatsinin xtachuna la chatum tse mawi chu paxki kskgata» (1 Tes. 2:7). Lakgkgolotsin xala uku na limaklakaskinkgo lakwan tachuwin akxni kinkatachuwinankgoyan chu liwana maklakaskinkgo Biblia xlakata nakamakgoxamixikgo tiku lipuwamakgo.

11. ¿Tuku masiya pi lakgkgolotsin ni kajwatiya tlan namastakgo takgoxamixit?

¹¹ Ni kajwatiya lakgkgolotsin tlan nakamakgoxamixikgo tiku kalikgamanankanit. Kimputumkan kgalhiyaw talakgatay nakgalhakgaxmataw uma tastakyaw: «Chatunu chatunu chuntiya tlan kalalimamakgkatsinitit umakgolh tachuwin» (1 Tes. 4:18). Natalan lakpuskatin tiku tliwakga kgalhikgo xtakanajlakan tlan nakamakgtayakgo amakgapitsin natalan tiku maklakaskinkgo takgoxamixit. Jehová  tatalakxtumi la chatum tse tiku makgoxamixi xkgawasa (Is. 66:13). Biblia lichuwinan lhuwa liʼakxilhtit xla lakpuskatin nema kamakgtayakgolh tiku lu xlipuwamakgolh (Job 42:11). Jehová lu lipaxuwa akxni kaʼakxilha natalan lakpuskatin pi makgtayakgo tiku wi tuku lilipuwamakgolh. Lakgachunin max lakgkgolotsin tsekg nakgalhskinkgo chatum tala puskat tiku tliwakga wi xtakanajla komo tlan namakgtaya atanu tala tiku wi tuku lipatinama. *

12. ¿Tuku kuenta natlawayaw akxni namakgtayayaw chatum tala?

¹² Xlikana pi akxni makgtayayaw chatum tala, kuenta natlawayaw xlakata ni nakgalhskinaw tuku xla ni lichuwinamputun (1 Tes. 4:11). Wa xlakata, ¿tuku natlawayaw xpalakata tiku maklakaskin chu makglhtinamputun takgoxamixit? Kaʼakxilhwi pulakkitsis tuku lichuwinan Biblia.

13. 1) Chuna la wan 1 Reyes 19:5-8, ¿tuku tlawalh xʼángel Jehová xpalakata Elías? 2) ¿La tlan nastalaniyaw xliʼakxilhtit ángel?

¹³ Wi tuku katlawaw nema namakgtaya tiku patinama. Akxni palakachuwina Elías tsalalh xlakata wi tuku xtlawaniputunkan, lu taxlajwanilh chu asta xniputun. Wa xlakata, Jehová malakgachalh chatum ángel xlakata namakgpuwantini. Chu maxkilh xachichi liwat chu wanilh pi xwayalh (kalikgalhtawakga 1 Reyes 19:5-8). Uma liʼakxilhtit wi tuku lu xlakaskinka kinkamasiyaniyan: lakgachunin maski kaj aktsu tuku natlawayaw xpalakata tiku patinama lu namakgtaya. Tlan nalimasiyaniyaw pi paxkiyaw tiku patinama akxni wi tuku tlawayaw xpalakata la komo natlawaniyaw liwat, namaxkiyaw akgtum tamaskiwin o wi tuku natsokgniyaw. Tlan chuna natlawayaw komo makgkatsiyaw pi nila litachuwinanaw tuku titaxtuma.

14. ¿Tuku atanu katsiniyaw xliʼakxilhtit Elías?

¹⁴ Wi tuku katlawaw xpalakata tiku nitlan tuku katlawanikanit xlakata tlan namakgkatsikgo chu nitu nalipekuankgo. Kaʼakxilhparaw xliʼakxilhtit Elías. Jehová maxkilh litliwakga nema xmaklakaskin xlakata tlan xchalh ksipi Horeb, niku makgasata xkatatlawanit akgtum talakkaxlan xkachikin. Max Elías makgkatsilh pi xlakgtaxtunit xlakata makgat niku alh chu makgat xkawilanilh tiku xmakgniputunkgo. ¿Tuku atanu katsiniyaw? Komo kamakgtayaputunaw tiku kalikgamanankanit, pulana talakaskin wi tuku natlawayaw xlakata ni napekuankgo. Akgtum liʼakxilhtit, lakgkgolotsin kuenta xlitlawatkan pi latamanin tanu tanu la makgkatsikgo. Max chatum tala tlan namakgkatsi chu nitu nalipekuan komo kajwatiya nawa té o atanu tuku nawa kxchik niku tlan namakgkatsi, chu max atanu tlakg tlan namakgkatsi nakgalhchuwinan anta kPukgalhtawakga.

15, 16. ¿Tuku kilhchanima liwana kgaxmatkan?

¹⁵ Kakatsiniw la nakgaxmataw. Biblia kinkamaxkiyan uma tastakyaw: «Chatum lataman pulana liwana kakgaxmatli, ni lu lakapala kachuwinalh, ni lu lakapala kasitsilh» (Sant. 1:19). ¿Katsiniyaw kgaxmataw? Max nalakpuwanaw pi xlakata tlan nakgaxmataw kaj xman wa talakaskin kaks natawilayaw chu nalakaʼakxilhaw tiku chuwinama chu nitu nawaniyaw. Pero liwana kgaxmatkan atanu tuku kilhchanima. Kaʼakxilhwi tuku tlawalh Jehová xpalakata Elías. Akxni wanilh putum tuku xmakgkatsi, Dios liwana kgaxmatnilh. Akxilhli pi xpalakachuwina xpekuama, xʼakstu xmakgkatsikan chu xlakpuwan pi putum tuku xtlawanit nitu xlitaxtu. Jehová limasiyanilh tapaxkit, chu makgtayalh tuku xlilakgaputsama. Chuna limasiyalh pi liwana xkgaxmatninit (1 Rey. 19:9-11, 15-18).

¹⁶ Akxni kgaxmatniyaw tiku likgamananka,  ¿la nalimasiyaniyaw tapaxkit chu talakgalhaman? Min kilhtamaku tlan nawaniyaw tachuwin nema nalimasiya pi nitlan limakgkatsiyaw tuku akgspulalh. Max tlan nawaniyaw: «Lu nitlan klimakgkatsi tuku akgspulan. Niti chuna xlitlawanit chatum aktsu kgawasa». Chu xlakata nakatsiyaw pi liwana akgatekgsmaw tuku kinkawaniman, max tlan nawaniyaw pi kakinkamakgtayan liwana naʼakgatekgsaw tuku kinkawaniman o tlan nawaniyaw: «Akxni lichuwinanti uma, kʼakgatekgsli pi..., ¿chuna lalh?». Komo chuna nawaniyaw nalimasiyaniyaw pi liwana kgaxmatnimaw chu pi akgatekgsnimaw tuku kinkawaniman (1 Cor. 13:4, 7).

17. ¿Tuku xlakata talakaskin nalimasiyayaw takgalhkgalhin chu ni lakapala nachuwinanaw?

¹⁷ Kuenta natlawayaw akxni kgaxmataw tuku kinkawanimakan. Ni namalaktlawiyaw tiku chuwinama wata liwana kakgaxmatwi. Chu kalimasiyaw takgalhkgalhin. Elías lu xlakgaputsama, wa xlakata wanilh Jehová putum tuku xmakgkatsi. Chu alistalh akxni Jehová matliwakglhnilh xtakanajla, Elías amakgtum wanipa la xmakgkatsi chu watiya tachuwin maklakaskimpa (1 Rey. 19:9, 10, 13, 14). Uma kinkamasiyaniyan pi min kilhtamaku makgapitsi latamanin tiku lipuwankgo makglhuwa lichuwinankgo tuku makgkatsikgo. Akxni chuna la, talakaskin nakalimasiyaniyaw takgalhkgalhin akxni kakgaxmatniyaw chuna la tlawa Jehová. Ni kakawaniw tuku natlawakgo, wata kakalimasiyaniw tapaxkit chu talakgalhaman (1 Ped. 3:8).

18. ¿La tlan nakamakgtaya kiʼoracioneskan tiku patinamakgolh?

¹⁸ Xliputum kinakujkan kakatatlawaw oración tiku patinamakgolh. Tiku lu lipuwama max makgkatsi pi nila tlawa oración. Asta max nalakpuwan pi ni lakgchan natalakatsuwini Jehová. Komo makgtayaputunaw, katlawaw oración xpalakata chu kamapakuwiw xtukuwani. Kawaniw Jehová pi akinin chu congregación lu paxkiyaw tiku patinama. Chu katasaskiniw pi kamakgoxamixilh xlakskujni. Uma oración max tlan namatliwakglha (Sant. 5:16).

19. ¿Tuku nakinkamakgtayayan xlakata tlan namakgoxamixiyaw tiku patinama?

 ¹⁹ Kamaklakaskiw tachuwin nema tlan nakamakgoxamixi tiku patinamakgolh. Pulana kalilakpuwaw tuku nawanaw. Tachuwin nema ni lilakpuwankan nitlan mamakgkatsininan, pero xatlan tachuwin mapaksanan (Prov. 12:18). Wa xlakata, kaskiniw Jehová pi kakinkamakgtayan natekgsaw xalakwan tachuwin nema nalimakgoxamixiyaw tiku patinama. Kalakapastakwi pi xalakwan tachuwin nema tlan nakawaniyaw, anta natekgsaw kBiblia xlakata wa xtachuwin Jehová (Heb. 4:12).

20. Xlakata tuku nitlan titaxtukgonit, ¿tuku liwana xlikatsitkan tiku patinankgonit chu tuku kamalakapastakaputunaw?

²⁰ Tiku kalikgamanankanit makgasata, max lakpuwankgo pi nitu litaxtukgo, niti kapaxki chu xaxkajwan makgkatsikgo. Nachuna, max lakpuwankgo pi ni kalakgchan wi tiku nakapaxki. Pero uma nixlikana. Wa xlakata, kamaklakaskiw Biblia xlakata nakamalakapastakayaw pi Jehová lanka xtapalh kaʼakxilha (kaʼakxilhti recuadro « Textos xalak Biblia nema makgoxamixinan»). Kalakapastakwi pi akxni palakachuwina Daniel makgkatsilh pi nialh xkgalhi litliwakga chu lu taxlajwanilh, Dios malakgachalh chatum ángel xlakata namatliwakglha chu xkatsilh pi lu xpaxki (Dan. 10:2, 11, 19). Nachuna, Jehová na lanka xtapalh kaʼakxilha tiku taxlajwanikgonit.

21. 1) ¿Tuku nakatlawanikan tiku kalikgamanankgonit laktsu kamanan chu ni makgxtakgkgo tuku tlawamakgolh? 2) ¿Pero tuku talakaskin natlawayaw akinin la uku?

²¹ Akxni kamakgoxamixiyaw amakgapitsi latamanin, kamalakapastakayaw pi Jehová chatum Dios xapaxkina. Chu nachuna ankgalhin nalakapastakaw pi xla chatum Dios tiku xaʼakgstitum. Xla katsi akxni wi tiku kalikgamanankanit. Xla putum akxilha, chu nakamalakgaxokge tiku kalikgamananit laktsu kamanan chu ni makgxtakgkgo tuku tlawamakgolh (Núm. 14:18). Pero la uku, kakamakgtayaw tiku katlawanikanit tuku nitlan chu kakalimasiyaniw tapaxkit. Lu tlan limakgkatsiyaw pi Jehová nakamapaksa tiku kamakgapatinankgonit Satanás chu xkakilhtamaku. Nialh makgas, uma takatsanajwat nialh katimakgkatsiw chu nialh katilakapastakwi (Is. 65:17).