1-2. (a) Mang reb e ban’en ni be dag ni ka ban’en ni bay ko girdi’ nib t’uf ni ngan fal’eg lanin’rad maku rayog rorad ni ngar fal’eged laniyan’ yugu boch e girdi’? (b) Uw rogon ni yima gafgownag boch e bitir?

KA BAN’EN ni bay ko girdi’ nib t’uf ni ngan fal’eg lanin’rad maku rayog rorad ni ngar fal’eged laniyan’ yugu boch e girdi’. Bod ni, faanra dol’ reb e bitir nge madurdur mitibugun u nap’an ni be fafel, ma sana ra mil i yan ko chitiningin ara chitamangin ni be yor. Fa gallabthir e dabiyog ni ngar golnagew fagi maad’ad, machane rayog ni ngar fal’egew laniyan’ fare tir. Sana yow ra fith ko mang e ke buch, min faley e lu’ u owchen, min fel’fel’ ngak, min tay e falay ko fagi maad’ad rok ara ni m’ag ban’en ngay. Dabi n’uw nap’an me tal fare tir ko meyor, ma aram me sul ngki fafel bayay. Ma fagi maad’ad e ra munmun me gol.

² Machane, ku bay ba mit e gafgow ni ma yan e bitir u fithik’ ni kab gel e kireb riy. Bay boch i yad ni yima kol u gelngiy. Rayog ni kemus ni taab yay e ke buch rok, fa reb e rayog ni nge buch rok u lan boor e duw. Demtrug rogon, ma rayog ni nge par e re n’ey u laniyan’ fare tir ni bod fathan ban’en ndabi chuw. Bay yu ngiyal’ ni yima pirieg ko mini’ e ke kol fare tir ma aram min gechignag. Ma yu ngiyal’ e danir nang ko mini’ e be rin’ e biney e ngongol, ma aram me aw ndabin gechignag facha’. Mus ni faanra kan gechignag e en ni ke rin’ e biney e ngongol ni ka ngiyal’ nem, machane ra gafgow fare tir nge mada’ ko ngiyal’ ni ke piilal.

3. Mang e ba m’agan’ Jehovah ngay nrogon ni bay ko 2 Korinth 1:3, 4? Mang deer e gad ra weliy e fulweg riy?

³ Faanra bay reb e Kristiano ni un kol u gelngiy u nap’an ni kab bitir ma ka be gafgow laniyan’, ma mang e rayog ni nge ayuweg? (Mu beeg e 2 Korinth 1:3, 4. *) Ba tamilang nib m’agan’ Jehovah ngay ni  ngan t’ufeg e pi saf rok min fal’eg lanin’rad ko ngiyal’ ni ke t’uf rorad. Ere chiney e ngad weliyed e fulweg u dalip e deer: (1) Mang fan nib t’uf ni ngan fal’eg laniyan’ e piin ni un kolrad u gelngiy u nap’an ni ka yad bbitir? (2) Mini’ e rayog ni nge fal’eg lanin’rad? (3) Uw rogon nrayog ni ngad fal’eged lanin’rad?

4-5. (a) Mang nib ga’ fan ni ngad nanged ni bitir e ba thil ko piilal? (b) Faan yira kol reb e bitir u gelngiy, ma uw rogon nra magawonnag rogon ni ma pagan’ ko girdi’?

⁴ Bay boch e girdi’ ni un kolrad u gelngiy u nap’an ni ka yad bbitir ni kab t’uf ni ngan fal’eg lanin’rad ni yugu aram rogon ni ke yoor e duw ni ke yan. Mang fan? Ra ngad nanged fan e re n’ey, ma som’on e thingar da nanged ni bitir e ba thil ko piilal. Yira kol reb e bitir u gelngiy mab thil rogon e gafgow nra tay riy ko rogon e gafgow nra tay be’ nib piilal ni kan kol u gelngiy. Pi thin ni baaray e be weliy fan nrib gel e gafgow ni ma tay e bitir ko re n’ey.

⁵ Bitir e ba t’uf ni nge chugur e tha’ u thilrad e piin ni be chuguliyrad me pagan’rad ngorad. Re n’ey e ma ayuweg e bitir ni ngar pared nib pagan’rad ndabi buch ban’en rorad, miki fil ngorad rogon ni ngki pagan’rad ko piin ni yad ba t’uf rorad. (Ps. 22:9) Machane, ba gel e kireban’ riy ni bochan e ba ga’ nu lan e tabinaw e ir e ma buch e biney e ngongol riy, mab ga’ ni girdi’ u lan e tabinaw nge pi fager ko girdien fare tabinaw e ir e yad ma kol fapi bitir u gelngirad. Faanra chel be’ nib pagan’ fare tir ngak nge kol fare tir, ma ra mo’maw’ ko fare tir ni nge pagan’ ngak be’ ni yugu aram rogon ni boor e duw ni ke yan.

6. Mang fan ni mokol bitir u gelngiy e aram reb e ngongol ndariy e runguy riy maku ma gafgownag e bitir?

⁶ Bitir e dabiyog ni ngar ayuweged yad, ma mokol bitir u gelngiy e aram reb e ngongol ndariy e runguy riy maku ma gafgownag e bitir. Yira towasariy e bitir ni ngar uned ko par ko pumoon nge ppin u m’on ndawori taw nga yanggarrad ni ngar rin’ed e re n’ey, ma rayog ni nge gafgownagrad. Mokol bitir u gelngiy e rayog ni nge kirebnag rogon ni ma lemnag e bitir e par ko pumoon nge ppin, maku rayog ni nge k’aringrad ni ngar lemnaged ndariy farad, ma dabki pagan’rad ngak be’.

7. (a) Mang fan nib mom ni nge bannag be’ reb e bitir me kol u gelngin? Uw rogon nrayog ni nge rin’ be’ e re n’ey? (b) Mang wenegan e mit ney e ban?

⁷ Piin bitir e dawor ra nanged rogon ni ngar fal’eged i lemnag ban’en, mar dugliyed e n’en ni ngar rin’ed ngay, mar siyeged e riya’. (1 Kor. 13:11) Ere ba mom ko piin yad ma kol e bitir u gelngirad ni ngar sabanbannaged e piin bitir. Pi girdi’ ney e yad ma fil boch e ban nrib gel e kireb riy ko piin bitir. Bod ni yad ma yog ko fapi bitir ni yad e kireb rorad ma kan kolrad u gelngiy, ara re n’em e thingar ni tay nib mith, fa reb e faan yad ra yog ma dariy be’ nra mich u wan’ ara ayuwegrad, fa reb e rogned ngorad ni boor e piilal ni yad ma par e bitir ni bochan e nge m’ug ni yad be t’ufeged yad. Mit ney e ban e rayog ni nge kirebnag rogon e lem ni ma tay reb e bitir, maku boor e duw nra yan mfini tamilang u wan’ fare tir ni pi n’ey e goo bogi ban. Reb e bitir ni aray rogon e ra ilal ni be lemnag ndakuriy ban’en nib fel’ ngay, ma dariy rogon ni ngan dag e t’ufeg ngak ara ni fal’eg laniyan’.

8. Mang fan nrayog ni nge pagan’dad nrayog rok Jehovah ni nge fal’eg laniyan’ e piin ni kan gafgownagrad?

⁸ Pi thin ney e be ayuwegdad ni ngad nanged fan ni piin ni un kolrad u gelngiy e rayog ni nge par wenegan rorad nib n’uw nap’an. Rib gel e kireb ko biney e ngongol ni yima rin’ nib togopuluw ko motochiyel! Re ngongol ney ni ke garer u gubin yang e ireray reb e ban’en ni be micheg ni gad be par ko tin tomuren e rran u ba ngiyal’ ni ke yoor e girdi’ ‘ndakurur runguyed e girdi’,’ ma ‘girdi’ nib kireb nge piin ni yad be dake girdien Kristus e ke gel farad kireb.’ (2 Tim. 3:1-5, 13) Riyul’ nrib kireb e pi ban rok Satan, ma kub gel e kireban’ riy u nap’an nra ngongol e girdi’ u reb e kanawo’ nib m’agan’ Moonyan’ ngay. Machane, kab gel gelngin Jehovah ngak Satan nge piin yad ma rin’ e n’en nib m’agan’ ngay. Manang Jehovah e pi ban rok Satan. Rayog ni nge pagan’dad ni manang Jehovah gelngin e gafgow ni gad be tay, ma rayog ni nge fal’eg lanin’dad. Gad ba tow’ath ni gad be pigpig ko “fare Got ni ma  fal’eg lanin’uy, ni ir e ma fal’eg lanin’dad u urngin e gafgow nge kireban’ ni ma yib ngodad ya nge yag nda fal’eged laniyan’ yugu boch e girdi’ ko gafgow nge kireban’ ni ke yib ngorad ni gad be maruwel nga rogon ni ke fal’eg Got lanin’dad.” (2 Kor. 1:3, 4) Ere, mini’ e ma fanay Jehovah ni nge fal’eg laniyan’ e piin kan kolrad u gelngiy?

9. Faanra dabi ayuweg e piin gallabthir pi fakrad u rogon nsusun e ngar rin’ed, ma mang e ra rin’ Jehovah nrogon ni yog David ni Pilung ko Psalm 27:10?

⁹ Piin nde ayuwegrad e gallabthir rorad rok e piin ma mokol bitir u gelngin nge piin ke kolrad be’ nib chugur ngorad e aram e piin nrib t’uf ni ngan fal’eg lanin’rad. David ni ir e yoloy e Psalm e manang ni Jehovah e ir e en nrayog ni ngan taga’ ngak ni nge fal’eg lanin’uy. (Mu beeg e Psalm 27:10.) Ba mich u wan’ David nra ayuweg Jehovah e piin be gafgownagrad chon e tabinaw rorad. Uw rogon ni ma rin’ Jehovah e re n’ey? Ma fanay e pi tapigpig rok ni yad ba yul’yul’. Pi walagdad u lan e ulung e yad bod e tabinaw ngodad. Bod ni, yog Jesus ni piin ni kar uned ngak yad be pigpig ngak Jehovah u taabang e aram e piin ni kar manged walagen ni pumoon, nge ppin, nge chitiningin.​—Matt. 12:48-50.

10. Uw rogon ni weliy apostal Paul murung’agen e maruwel rok ni ir reb e piilal?

¹⁰ Am lemnag reb e kanawo’ nrayog ni nge par e ulung ni Kristiano ni bod e tabinaw ngodad. Apostal Paul e ir reb e piilal u lan e ulung nib yul’yul’ mab gel e maruwel ni ma tay. Ke dag e kanawo’ nib fel’ ni ngan folwok riy, mu kun thagthagnag nga laniyan’ ni nge yog ngak boch e girdi’ ni ngar folwokgad rok ni bod rogon ni be folwok rok Kristus. (1 Kor. 11:1) Am lemnag rogon ni weliy murung’agen e maruwel rok ni ir reb e piilal. I gaar: “[Kug] pired romed ni gamad mmunguy ni bod feni munguy ba matin ngak pi fak ni be ayuwegrad.” (1 Thess. 2:7) Piin piilal ni yad ba yul’yul’ e ngiyal’ ney e ku rayog ni nga rogned e thin nib sumunguy u nap’an ni yad be fanay e Bible ni ngar fal’eged laniyan’ e piin nib t’uf e ayuw rorad.

11. Mang e be dag ni gathi goo piin piilal e rayog ni ngar fal’eged lanin’uy?

¹¹ Gur, goo piin piilal e rayog ni ngar fal’eged laniyan’ e piin ni un kolrad u gelngiy? Danga’. Gad gubin nib milfan ngodad ni ‘nguud pied e athamgil nga lanin’dad [“nge bagadad me fal’eg laniyan’ bagadad,”  NW].’ (1 Thess. 4:18) Pi walag nib pin ni kar ilalgad ko tirok Got ban’en e rayog ni ngar ayuweged e pi walag nib pin nib t’uf ni ngan fal’eg lanin’rad. Ere ba puluw ni ke taarebrogonnag Jehovah Got ir ngab matin ni be fal’eg laniyan’ fak. (Isa. 66:13) Ku be weliy e Bible murung’agen boch e ppin ni ur fal’eged laniyan’ e piin ni kar gafgowgad. (Job 42:11) Ere ri ma felfelan’ Jehovah ni ma guy e pi walag nib pin e ngiyal’ ney ni yad be fal’eg laniyan’ boch e walag nib pin ni ke gafgow lanin’rad! Ku bay yu ngiyal’ nrayog ni nge yog reb ara l’agruw e piilal ngak reb e walag nib pin ni goo yad ni nge ayuweg reb e walag nib pin ni ke gafgow laniyan’. *

12. Mang e ngad kol ayuwgad riy?

¹² Ngad kol ayuwgad ndab da fithfithed murung’agen boch ban’en ndabun reb e walag ni nge weliy. (1 Thess. 4:11) Ere, mang e rayog ni ngad rin’ed ni fan ngak e piin nib t’uf maku yad baadag ni ngan ayuwegrad min fal’eg lanin’rad? Ngad weliyed lal e kanawo’ nib puluw ko Bible nrayog ni ngad fal’eged laniyan’ e pi girdi’ ney riy.

13. Mang e rin’ reb e engel rok Jehovah ni fan ngak Elijah nrogon ni bay ko 1 Kings 19:5-8? Uw rogon nrayog ni ngad folwokgad ko re engel nem?

¹³ Mu rin’ ban’en ni fan ngak faen ke gafgow. Nap’an ni mil Elijah ni profet ni be milnag e pogofan rok, ma aram mi ri mulan’ nge finey ni manga yigi yim’. Ere l’og Jehovah e engel rok ni nge pi’ e athamgil nga laniyan’. I pi’ fare engel e tin nib t’uf rok Elijah e ngiyal’ nem. I pi’ e ggan ni nge kay me pi’ e athamgil nga laniyan’ ni nge abich. (Mu beeg e 1 Kings 19:5-8.) Re thin nu Bible ney e be tamilangnag ban’en nib riyul’: Yu ngiyal’ e gad ra rin’ bochi ban’en nib achig ni fan ngak be’, mab ga’ angin nra yib. Sana rayog ni ngad pied boch e ggan ngak, ara da pied bochi tow’ath ngak, ara da yoloyed boch yang i babyor ngad pied ngak ni bay e thin riy nra pi’ e athamgil nga laniyan’. Faanra ba mo’maw’ ngodad ni ngad weliyed be’ boch ban’en nib mo’maw’ ni ngan weliy, ma sana rayog ni ngad rin’ed boch e pi n’ey ni nge m’ug riy ni gad be lemnag facha’.

14. Mang e rayog ni ngad filed ko n’en ni buch rok Elijah?

¹⁴ Mu ayuwegrad ni nge pagan’rad ndab ki buch ban’en rorad. Ku bay ban’en nrayog ni ngad filed ko n’en ni buch rok Elijah. I ngongliy Jehovah e maang’ang me pi’ e n’en nib t’uf ko re profet ney ya nge yag ni yan u but’ nge taw ko Burey nu Horeb. Sana rayog nnap’an ni taw Elijah ngaram me pagan’ ndab ki buch ban’en rok, ya dariy be’ ko gin’em maku aram e gin ni fal’eg Jehovah e m’ag u thilrad e girdi’ rok riy boch e chibog ni ke yan. Sana rayog ni lemnag ni ke palog rok e piin ni yad baadag ni ngar thanged e fan rok. Ere mang e rayog ni ngad filed ko re n’ey? Faanra gad baadag ni ngad fal’eged laniyan’ e piin ni un kolrad u gelngiy, ma sana som’on e ba t’uf ni ngad ayuweged yad ni nge pagan’rad ndab ki buch ban’en rorad. Bod ni, piin piilal e susun e dab ra paged talin nreb e walag nib pin ni ke gafgow laniyan’ e rayog ni nge pagan’ me pufpuf ni nge weliy salpen ni faanra yibe non ngak u tabinaw rok ko bin ni ngan non ngak u Tagil’ e Liyor. Ma be’ e ba thil rogon e lem rok.

15-16. Mang e be yip’ fan ni ngad motoyilgad nib fel’ rogon?

¹⁵ Mmotoyil nib fel’ rogon. Ba tamilang e fonow ni be pi’ e Bible ni gaar: “Gubin e girdi’ ma thingar ra gurgad ko motoyil, machane dab ra gurgad ngar welthingad.” (Jas. 1:19) Ba fel’ rogon e motoyil ni gad ma tay, fa? Sana rayog ni ngad lemnaged ni faanra ngad motoyilgad nib fel’ rogon, ma aram e be yip’ fan ni kemus ni ngad yaliyed facha’ ni be non ndab dogned ban’en. Machane, faanra ngad motoyilgad nib fel’ rogon maku bay ban’en nib t’uf ni ngad rin’ed. Bod ni, yan i tomur ma aram me weliy Elijah gubin ban’en ni bay u laniyan’ ngak Jehovah, mi ri motoyil Jehovah ngak. I guy Jehovah ni ke rus Elijah, ma be lemnag ni goo ir, ma ke m’ay fan urngin e maruwel ni ke rin’. I dag Jehovah e t’ufeg ngak Elijah me ayuweg ni nge gel nga urngin e pi lem ney ni i tay. I dag ni kari motoyil ngak Elijah nib fel’ rogon.​—1 Ki. 19:9-11, 15-18.

¹⁶ Uw rogon ni ngad daged nriyul’ ni be kireban’dad ngak fare walag mab t’uf rodad u nap’an ni gad  be motoyil ngak? Yu ngiyal’ e faanra kemus ni in bug e thin e gad ra yog u fithik’ e gonop, ma rayog ni nge nang facha’ rogon lanin’dad. Sana rayog ni nge lungum: “Kari kireban’ug ni ke buch e re n’ey rom! Susun ndariy reb e bitir ni ngan rin’ e binir e ngongol ngak!” Sana ku rayog ni ngam fith reb ara l’agruw e deer ngak facha’ ya nge yag nim nang fan e n’en ni be yog. Sana rayog ni ngam fith ni nge lungum, “Wenig ngom, rayog ni ngam tamilangnag ngog e n’en ni ga be yog?” ara “Rogon ni kug nang fan e . . . Aram e n’en ni ga be yog?” Ga ra yog boch e thin ni aray rogon u fithik’ e t’ufeg, ma aram e rayog ni nge nang facha’ nriyul’ ni ga be motoyil ngak, ma ga be guy rogon ni ngam nang fan rogon laniyan’.​—1 Kor. 13:4, 7.

17. Mang fan nsusun e ngad gum’an’naged gadad ma yugu dab da ‘gurgad ngad welthingad’?

¹⁷ Machane, mu kol ayuw ni yugu dab mu ‘gur ngam welthin.’ Dab mu th’ab e thin rok facha’ ni bochan e nga mog ngak e n’en nib fel’ ni nge rin’, ara ngam yal’uweg rogon e lem rok. Mu kum gum’an’nagem! Nap’an ni be weliy Elijah urngin ban’en ni bay u laniyan’ ngak Jehovah, ma kari kireban’. Ere non u fithik’ e kireban’. Boch nga tomuren u nap’an ni gelnag Jehovah e michan’ rok, ma aram miki sul bayay u daken fapi thin ni yog ngak Jehovah. (1 Ki. 19:9, 10, 13, 14) Ere mang e gad be fil riy? Piin ni ke gafgow lanin’rad e bay yu ngiyal’ nib t’uf ni ngar weliyed lanin’rad ni boor yay. Ere ba t’uf ni ngad folwokgad rok Jehovah ngad gum’an’naged gadad ngad motoyilgad ngorad. Ngad daged ni ke kireban’dad ngorad ma gad be runguyrad ko bin ni ngad guyed rogon ni ngad pithiged e magawon rorad.​—Kol. 3:12.

18. Mang fan ni faan gad ra meybil be’ u taabang ni ke gafgow laniyan’ ma rayog ni nge fal’eg e re n’ey laniyan’?

¹⁸ Mmeybilgow u taabang. Piin ni kari kireban’rad e rayog ni nge mo’maw’ ngorad ni ngar meybilgad. Sana rayog ni ngar lemnaged ndariy rogorad ni ngar nonad ngak Jehovah. Faanra gad baadag ni ngad fal’eged laniyan’ facha’, ma rayog ni ngad meybilgad u taabang, ma gad uneg fithingan u lan e meybil rodad. Rayog ni nga dogned ngak Jehovah gelngin nrib t’uf facha’ rodad nge pi walag u lan e ulung. Ku rayog ni ngad weniggad ngak Jehovah ni nge pi’ e gapas nga laniyan’ e re saf rok nem miki fal’eg laniyan’. Meybil ni aray rogon e rayog ni ngari fal’eg laniyan’ e pi girdi’ ney.​—Jas. 5:16.

19. Mang e rayog ni nge ayuwegdad ni ngad fal’eged rogodad ni ngad fal’eged laniyan’ be’?

 ¹⁹ Mmel’eg e thin ni nga mog nra golnag me fal’eg laniyan’. Mu lem u m’on ni ngam non. Thin ni yugu yibe yog ndanir lem u m’on riy e rayog ni nge kirebnag laniyan’ be’, ma thin nib sumunguy e rayog ni nge golnag. (Prov. 12:18) Ere mmeybil ngak Jehovah ni nge ayuwegem ngam nang rogon e thin nrayog ni nga mog nib sumunguy, ma ra golnag me fal’eg lanin’uy. Ku dab mu pagtalin ni bin th’abi fel’ e kanawo’ nrayog ni ngan fal’eg laniyan’ be’ riy e u daken e thin nu Bible.​—Heb. 4:12.

20. Mang e rayog ni nge lemnag boch e walag ni un kolrad u gelngiy u rarogorad? Mang e gad baadag ni ngad pugeduran ngorad?

²⁰ Bay boch e walag ni un kolrad u gelngiy nrayog ni ngar lemnaged ndakuriy ban’en ni yad ba fel’ ngay, ara dakuriy farad, ara dariy rogon ni ngan t’ufegrad. Rib gel e kireb ko biney e ban! Ere mu fanay e Bible ni ngam puguran ngorad nib ga’ farad u wan’ Jehovah. (Mu guy fare kahol ni kenggin e “ Thin nu Bible Nra Fal’eg Lanin’uy.”) Dab mu pagtalin rogon ni fal’eg reb e engel laniyan’ Daniel ni profet u nap’an ni ke kireban’ ma ke mulan’. Baadag Jehovah ni nge nang Daniel nrib ga’ fan u wan’. (Dan. 10:2, 11, 19) Ku arrogon pi walagdad ni ke gafgow lanin’rad nib ga’ farad u wan’ Jehovah!

21. Mang e ra buch ko piin yad ma rin’ e kireb ndarur kalgadngan’rad? Mang e susun ni ngad dugliyed u wan’dad ni ngad rin’ed ni fan ngak e piin ni kan rin’ boch ban’en nde mat’aw ngorad?

²¹ Nap’an ni gad ra fal’eg laniyan’ be’, ma aram e gad be puguran ngak nib t’uf rok Jehovah. Ku thingar dab da paged talin ni Jehovah e ir e Got ko tin nib mat’aw. Manang Jehovah urngin e piin yad ma mokol bitir u gelngirad ni yugu aram rogon nde nang be’. Gubin ban’en ni ma guy Jehovah, ma dabi pag e piin yad ma rin’ e kireb ndarur kalgadngan’rad riy ndabi gechignagrad. (Num. 14:18) Chiney ni gad be sonnag e ngiyal’ ni yira gechignag e pi girdi’ ney e ngad athamgilgad u rogon nrayog rodad ngad daged e t’ufeg ngak e piin kan kolrad u gelngiy. Maku reb e, gad ba felfelan’ ni kad nanged ni urngin e piin ni be gafgownagrad Satan nge re fayleng rok ney e goo ra golnag Jehovah lanin’rad! Dabki n’uw nap’an ma bay ra paged talin urngin ban’en ni i buch rorad nib gel e gafgow ni kar ted riy.​—Isa. 65:17.