1. Ighẹn iyạl araraạr kụ edị yira okuphom owol?

AZIHOVA ENAẠN apomoghiạn ni buẹn rooseeny ghan bọ nyodị. Oomo phọ amem mọ odị rapomoghiạn ghan ni bidị, kụ kapomoghiạn ni bidị akiọm ghisigh. Odị apomoghiạn kẹn elhiom ooruẹn. (Ps. 33:5) Esi iduọn phọ, yira kotue ni okuphom owol iyạl araraạr: (1) Repin ghan ni olhoghi aZihova agey mem dị ozoọm rebenẹ odị eten dị i/kpeanaạn. (2) Odị kamiịn ni mọ osophonaan ni bidị elhiom ooruẹn. Siphẹ eḅẹl emhuoghaạph asikoọl araghaạph phọ iphẹn phọ, * yira umhiịn mọ Olhogh phọ Enaạn angọ bọ we phọ Izrạl dị eego esi aMozis uphighiom ephomoghiạn. Iphophe elhiom ooruẹn—oomo awe umoọgh ghan elhiom ooruẹn, ghalamọ ighiil awe kẹn. (Deut. 10:18) Olhogh phọ agananami ogbolomaam dị aZihova amhoọgh aghị esi abuphẹ rooseeny ghan bọ nyodị.

2. Ighẹn asipuru kụ edị yira kopanyanaạn?

² Olhogh phọ aMozis asi eekuna lhạ phọ 33 C.E. mem mọ ophighi bọ ookpomoghan aKristẹn phọ. Iduọn phọ pọ roḅẹm ghan mọ aKristẹn ko/moọgh mun olhogh dị ophighiom ephomoghiạn r’elhiom ooruẹn dị kaaḅakị ghan bidị ḍughụm? Eeye! AKristẹn omoọgh omhoom olhogh. Siẹn emhuoghaạph phọ ephẹn, yira kopụr ooḅeghiọn iyaạr phọ omhoom olhogh phọ aru bọ. Kụ yira opanyanaạn sipuru phọ iphẹn: Utụ eeghe kụ koḅẹm bọ mọ ephomoghiạn kụ ephighiom omhoom olhogh phọ? Utụ eeghe kụ koḅẹm bọ mọ omhoom olhogh phọ rapophe ghan elhiom ooruẹn? Odaphạn omhoom olhogh phọ, ikạ kụ idị abuphẹ omhoọgh bọ eepoogh ophogh abuerị phọ kozoọm ghan bunhọn?

3. Idiphọ oghaạph bọ oghol siphẹ Galetia 6:2, “olhogh phọ aKraist” aḅaramaạm eeghe?

³ Bạl Galetia 6:2. AKristẹn odi eeḍiạn “olhogh phọ aKraist.” AZizọs o/gẹ ḍikoọl iilhogh o/ngọ bumatuạn phọ odị, kuolọ angọ ghụn bidị iromoghiom, itọ, r’asinị iilhogh dị keeḅaakị bidị. “Olhogh phọ aKraist” eḅaramaạm oomo phọ ipẹ aZizọs atughemị bọ. Okuamị onaghanạn olhogh phọ, pọ ooḅeghiọn siikpịgh phọ edaphạn bọ siẹn.

4-5. Ighẹn areten kụ edị aZizọs atughemị ghan bọ, kụ apụr amem?

⁴ Ighẹn areten kụ idị aZizọs atughemị ghan bọ? Eḅẹl phọ, odị atughemị ghan esi ikpo onhụ. Ikpo onhụ phọ odị imhoọgh iikpọ agey loor esi dị odị aghaạph ghan igey phọ ilọ Enaạn, odị atughemị ghan iyaạr phọ otụ bọ kụ olhẹm oye, kụ amạ ghan mọ Omhạr k’Enaạn bịn kụ katue asiemi eekuna oomo iminimiịn phọ omhạr awe. (Luk 24:19) AZizọs atughemiọm ghan kẹn esi oḍighi oḍeenhaan. Dị eego esi adọl aghuḍum mọ odị, odị aḍeenhaan ni bumatuạn phọ odị idị ekpẹ orọl.—Jọn 13:15.

⁵ Pụr amem kụ edị aZizọs atughemị ghan bọ? Odị atughemị ghan mem mọ odị arọl bọ siẹn ade phọ. (Mat 4:23) Odị aḅilhẹ kẹn atughemị bumatuạn phọ odị, oọny ekula amem mọ oḅeton bọ nyodị. Esi omaạm, odị amitenaan ni egu abumatuạn—dị eeni ropel li 500—kụ angọ bidị itọ mọ ‘oḍighi we bumatuạn’ onọ. (Mat. 28:19, 20; 1 Kọr. 15:6) Idiphọ oḍiemiom ookpomoghan phọ, aZizọs akiọm ni ghisigh ratomoghiom bumatuạn phọ odị ghalamọ r’iduọn odị m’agheel bọ ni k’akẹ. Esi omaạm, igbo asiạ phọ 96 C.E., aKraist aaḅaakị ni otelhedom mọ Jọn oghi okparamị ḅilhẹ r’oroma aKristẹn phọ abuphẹ osagharạn bọ uwaloor phọ.—Kọl. 1:18; Ogan. 1:1.

6-7. (a) Iḍighen esi kụ edị ogẹ bọ itughemị phọ aZizọs? (b) Ika kụ idị yira kotue odaphạn olhogh phọ aKraist?

⁶ Iḍighen kụ edị ogẹ bọ itughemị phọ aZizọs? Inya arinyạ aGospẹl phọ epamanạm ibadị araraạr dị aZizọs aghaạph aḅilhẹ aḍighi mem mọ odị arọl bọ siẹn ade phọ. Iphediphọ igẹ iigbia aGrik phọ—iphẹn awe dị uwaloor iigbia phọ ephum ḅilhẹ oḅọph “iitughiạn r’aKraist” kụ ogẹ bọ—eḅilhẹ kẹn ni ilhoghonhaạn iyira ḍighaạgh onaghanhạn aḍiitughiạn phọ aKraist ilọ araraạr.—1 Kọr. 2:16.

⁷ Araraạr Ituughạ phọ: Itughemị phọ aZizọs ketue ni iloghonaạn iyira ḍighaạgh siphẹ oomo adọl aghuḍum mọ ayira. Kụ iḍighi kụ, olhogh phọ aKraist raaḅakị ghan ipẹ yira roḍighi ghan bọ ilhoghi aruutu, ruutu iiḍighi obobọ ruutu askul, ḅilhẹ r’isiphẹ ookpomoghan phọ. Yira kotue olegheri  olhogh phọ ophọn phọ esi aạl ghan Igẹ Iigbia AGrik phọ kụ ogbirima ghan. Yira rodaphạn ghan olhogh phọ mem dị adọl aghuḍum mọ ayira eeghironaan iromoghiom mọ, itọ phọ, ḅilhẹ r’asinị iilhogh phọ edi bọ siphẹ igẹ iigbia phọ. Yira odaphạn olhogh phọ aKraist, pọ yira ronaghanạn ghan Enaạn ephomoghiạn phọ ayira, Zihova, opọ aḍighi bọ zin oomo itughemị phọ aKraist.—Jọn 8:28.

8. Eeghe kụ ephighiom olhogh phọ aKraist?

⁸ Otu dị ophighi okparamị raḍighi ghan idị awe phọ orugh bọ rologhoma ghan oghoph. Eniin phọ eten phọ, olhogh dị ephighiom mọ emhaạr ekpạr reḍighi ghan idị awe phọ rodạph bọ rologhoma ghan oghoph. Okpasị Olhogh phọ aKraist esi ephighiom dị enighẹ epeleghiom—ephomoghiạn. Yira utụ eeghe kụ oḅẹm bọ iduọn phọ?

9-10. Ighẹn areḍeenhaan kụ iḍeenhaan mọ ephomoghiạn kụ inyu ghan Zizọs oḍighi iyaạr omiteom, ḅilhẹ ika kụ idị yira kotue otuughaạny aani nyodị?

⁹ Eḅẹl phọ, ephomoghiạn kụ inyu ghan Zizọs oḍighi oomo ipẹ dị aḍighiyogh bọ. Igbiririph, obobọ aghusạn, eḍighi eḍeenhaan ephomoghiạn. Odọ igbiririph phọ iphẹn phọ kụ inyu Zizọs otughemị aḍita phọ, ookonom abuphẹ u/moonogh bọ, ongọ eḍien budị okoọny rasiph, ḅilhẹ r’oḅerion abudị omhuughu. (Mat. 14:14; 15:32-38; Mạk 6:34; Luk 7:11-15) Ghalamọ r’iduọn oḍighi araraạr phọ iphẹn phọ esighẹ ghan bọ ni muboom amem r’inyaạm odị, aZizọs asighẹ ghan ipẹ abuerị phọ kụ aḍighi eḅẹl. Dị epeleghiom, odị aḍighi aḍeenhaan ephomoghiạn esi omughanaan omhạr awe.—Jọn 15:13.

¹⁰ Araraạr Ituughạ phọ: Yira kotuughaạny Zizọs esi osighẹ ghan ilọ abuerị phọ kụ oḍighi eḅẹl. Yira oḅilhẹ kẹn rotuughaạny ghan nyodị esi oḍeenhaan ghan aghusạn we ekool phọ ayira. Mem dị odọ aghusạn phọ ophọn kụ unyu iyira oghị ogbeelom r’otughemị iiḅi iinaghạn phọ, pọ yira rodaphạn ghan olhogh phọ aKraist.

11-12. (a) Eeghe kụ iḍeenhaan bọ mọ aZihova akạr amoọgh ogbolomaam atu esi ayira? (b) Ika kụ idị yira kotuughaạny aani ephomoghiạn phọ aZihova?

¹¹ Edị emuneniom iyạl, aZizọs agananami ni ephomoghiạn Odẹ phọ odị. Mem arukumuan phọ odị siẹn ade phọ, aZizọs aḍeenhaan odọ idị aZihova akạr amhoọgh ogbolomaam aghị esi abuphẹ rooseeny ghan bọ nyodị. Iniin esi ibadị araraạr phọ aZizọs atughemhị bọ pọ: Torobọ onyọ ayira amạn ni maạr esi aZihova Odẹ k’akẹ phọ ayira. (Mat. 10:31) AZihova aakolhobian ni oḅilhẹ osighẹ oyool lọ aphe kụ akiton esi ikarạph phọ odị aḅilhẹ aḅula siẹn ookpomoghan phọ. (Luk 15:7, 10) AZihova aḍeenhaan ephomoghiạn phọ odị, esi ongọ oọny phọ odị idiphọ etegharạn.—Jọn 3:16.

¹² Araraạr Ituughạ phọ: Ika kụ idị yira kotue otuughaạny aani ephomoghiạn phọ aZihova? (Efẹ. 5:1, 2) Osighẹ ghan mọ torobọ onyọ umor obobọ umarani amạn ni maạr aḅilhẹ amoọgh maạr oḍighinhom, ḅilẹ kẹn, oghuraam ghan r’oḅaạl olhoghi torobọ “oyool lọ aphe” kụ aḅilhẹ aḅula esi aZihova. (Ps. 119:176) Yira koḍeenhaan mọ yira opomoghiạn ni bumor r’abumarani phọ ayira esi omiteom ghan aloor, r’inyaạm ayira olhoghonhaạn ghan abidị ḍighaạgh mem lọ ewạ. (1 Jọn 3:17) Mem dị yira oḍeenhaan ghan ephomoghiạn bunhọn, pọ yira rooko ghan olhogh phọ aKraist.

13-14. (a) Odaphạn Jọn 13:34, 35, aZizọs atọ aḅenị bumatuạn phọ odị moḍeenhaan ghan eeghe, kụ eeghe kụ iḍighi kụ olhogh phọ ophọn aḍighi bọ omhoom? (b) Ika kụ idị yira kooko bọ omhoom olhogh phọ?

¹³ Edị emuneniom iraạr, aZizọs atọ aḅenị bumatuạn phọ odị mọ oḍeenhaan ghan ephomoghiạn osighe aloor ophighironọm ekiạ. (Bạl Jọn 13:34, 35.) Itọ phọ aZizọs imhoom ni loor esi dị ewạ mọ oḍeenhaan ephomoghiạn eten dị epelhom nyepẹ aMozis: Pomoghiạn bumor r’abumarani phọ eten phọ epẹ aZizọs aphomoghiạn bọ nyinạ. Oḍighi iduọn phọ pọ ewạ ephomoghiạn osighẹ aloor ophighironọm ekiạ. * Yira kopomoghiạn bumor r’abumarani phọ ayira opuemi siloor phọ ayira. Yira kopomoghiạn bidị osiemi esi dị yira komeeraam ni omughanaan abidị idiphọ aZizọs.

 ¹⁴ Araraạr Ituughạ phọ: Ika kụ idị yira kooko bọ omhoom olhogh phọ? Oghaạph onyen, esi ophinyonaạn ghan arikiạ bumor r’abumarani phọ. Ko/phighorọn egbogh ekiạ bịn—idiphọ ongọ aghuḍum ayira —kuolọ ghalamọ r’ibạm kẹn ni. Esi omaạm, mem dị yira olhọgh ikuph oghị osaạny onyọ umọr obobọ umarani dị m’akpọ orumom ituughạ, obobọ yira owilẹ oḍighi araraạr dị iḅeraạn iyira kụ oḍighi idị keḅeraạn onyọ ephomoghiạn ayira, obobọ olhọm eepoogh otu oḍighi ayira oghị olhoghonhaạn aḍighaạgh bulọ ekperenhom iiḅaghamhị emitenhaan, pọ yira rooko ghan olhogh phọ aKraist. Pọ yira rologhonaạn ghan kẹn ḍighaạgh oḍighi idị ookpomoghan phọ ayira kaḍighi esi oghoph angọ torobọ oye.

15-17. (a) Ezọ phọ aZizọs egananami ika ipẹ odị aloghoma bo ilo elhiom ooruẹn? (b) Ika kụ idị yira kotue otuughaạny Zizọs?

¹⁵ Ekpo onhụ phọ “elhiom ooruẹn,” siphẹ aBaibul phọ, remạ ghan oḍighi ipẹ Enaạn eḅẹm bọ mọ enighẹ phọ, eten dị i/ḅarạm olhọgh abuniin iiseẹny. Yira utụ eeghe kụ koḅẹm bọ mọ olhogh phọ aKraist rapophe ghan elhiom ooruẹn?

¹⁶ Eḅẹl phọ, miịn idị eten phọ epẹ aZizọs azọ ghan bọ eḍeenhaan elhiom ooruẹn. Mem mọ aZizọs, abuḍiemiom ekụ iiḅereghị aZu phọ ulhọgh ḍien ruuruen phọ, ophogh ghan osooromi ighiil awe phọ, ḅilhẹ u/lhọgh ghan eghuan nmariịr. Kuolọ, oomo amem aZizọs azoọm ghan torobọ oye eten dị ekpeanaạn ḅilhẹ o/lhọgh ghan buniin iiseẹny. Odị alhoghomaạm ni ruuruen phọ abuphẹ omheeraam bọ nyodị. (Mat. 8:5-10, 13) Odị aghaạph ghan iiḅi iinaghạn phọ aḅenị oomo awe dị oye u/pogh usooromi, mọ arukulhom obobọ araalạ. (Mat. 11:5; Luk 19:2, 9) Odị o/mhooghaam ghan obobọ oo/folomi ghan nmariịr. Ḍierị phọ aḍighaạgh phọ, odị alhọgh ghan ni eegu aḅilhẹ azoọm ghan eyoghoyoghọ eten nmariịr, ghalamọ r’abudị awe osighẹ mọ u/moọgh maạr oḍighinom.—Luk 7:37-39, 44-50.

¹⁷ Araraạr Ituughạ phọ: Otuughaạny aZizọs, pọ ewạ mọ ku/lọgh ghan we iiseẹny, ḅilhẹ oghaạph ghan iiḅi iinaghạn phọ oḅenị oomo abulọ rowạ onaghạn—mughumọ arukulom, m’igbogh awe obobọ etigheri ekụ iiḅereghị ph’abidị. AKristẹn otuughaạny aani eḍeenaan phọ odị esi olhọgh ghan eegu anmariịr. Mem lọ yira oḍighi iphẹn phọ, pọ yira rooko ghan olhogh phọ aKraist.

18-19. AZizọs atughemị eeghe ilọ elhiom ooruẹn, kụ itughemị phọ odị itughemị ayira eeghe?

¹⁸ Omuneniom iyạl, Tuutughiạn iyaạr dị aZizọs atughemị ilọ elhiom ooruẹn. Odị atughemị sinị ilhogh dị keloghonaạn ḍighaạgh bumatuạn phọ odị ozoọm ghan abunhọn eten dị ekpeanaạn. Esi omaạm, tuutughiạn Olhogh Aghuḍuul phọ. (Mat. 7:12) Oomo ayira rowạ ghan ni dị kuzoọm ghan iyira eten dị ekpeanaạn. Kụ iḍighi kụ, ozoọm aani ghan bunhọn eten dị ekpeanaạn. Yira oḍighi ghan iduọn phọ, etue ni enyu bidị ozoọm aani ayira eten dị ekpeanaạn. Kokaạph ika, eḍighi maạr lọ uzoọm iyira eten dị i/kpeanaạn? AZizọs atughemị kẹn bumatuạn phọ odị mọ oḍuom olhoghi mọ aZihova kasoph ni ‘iiruẹn akeelemi [buphẹ] rolọm bọ nyodị ḍughul r’ootaany.’ (Luk 18:6, 7) Oghaạph phọ opọ phọ aḍighi oguanaan dị aḍeenhaan mọ: Enaạn phọ ayira okpẹ ra/gbạ ghan bọ alegheri ni iminimiịn phọ yira osoman bọ siẹn asiḍio aruukuna phọ, kụ odị kasoph ni ooruẹn ugheelemi iyira mem lọ ekasiạn.—2 Tẹs. 1:6.

¹⁹ Araraạr Ituughạ phọ: Mem dị yira odaphạn sinị iilhogh phọ aZizọs atughemị bọ, yira kozoọm ghan bunhọn eten dị ekpeanaạn. Eḍighi maạr lọ nạ masoman ghan ekeeny ooruẹn siẹn aḅirini phọ aSetan, keḍighi ni iidereghị olhegheri mọ aZihova kaḍighi ni idị nạ kamoọgh akeel.

20-21. (a) Ika kụ idị abupoghom kozoọm ghan buerị phọ? (b) Ika kụ idị olom kaḍeenhaan ghan ephomoghiạn osighẹ aloor ophighironọn ekiạ, ḅilẹ ika kụ edị odẹ kazoọm ghan ibạm anmụny phọ odị?

²⁰ Odaphạn olhogh phọ aKraist, ika kụ idị abupoghom kozoọm ghan buerị phọ? Eḍighi bọ edị  ephomoghiạn kụ eḍighi bọ ephighiom olhogh phọ, abupoghom mọ omoọgh oghueni oḅilẹ ophomoghiạn abuphẹ bidị ropogh bọ. Bidị omoọgh ootughiạn ghan mọ eten phọ aKraist eḍighi elọ ephomoghiạn.

²¹ Siphẹ eghun otu phọ. Olom mọ aphomoghiạn ghan anhịr phọ odị ‘idiphọ aKraist aphomoghiạn bọ ookpomoghan’ phọ. (Efẹ. 5:25, 28, 29) Olom mọ amoọgh otuughaạny ephomoghiạn phọ aKraist esi osighẹ ghan ilọ asuọ anhịr phọ kụ oḍighi eḅẹl. Etue ni ekparanhaạn bunhiin aburulom oḍeenaan odọ ephomoghiạn phọ ephẹn phọ, loor esi dị eeni i/ḍighi eḍighinom iyaạr ekpisi phọ ookonom bọ bidị. Esi iduọn phọ, kekparanaạn ni bidị oolemi eegharạ phọ abidị, kuolọ bidị omoọgh oḍighi iduọn phọ orue odaphạn olhogh phọ aKraist. Olom dị raḍeenaan ghan ephomoghiạn osighẹ aloor ophighironọm ekiạ, raḍigh ghan ni eghuan esi anhịr phọ. Odẹ dị akạr aphomoghiạn nmụny odị ka/ḍighi ghan obobọ akaaphọgh ghan raraạr dị kepin ilhoghi abidị. (Efẹ. 4:31) Kparipẹ ghụn, raḍeenaan ghan ephomoghiạn phọ odị reten dị ibạm anmụny phọ kologhoma oghoph. Ibạm anmụny phọ ropomoghiạn ghan koḅilhẹ oḍuomolhoghi odẹ dị arọl idiphọ.

22. Odaphạn 1 Pita 5:1-3, anhiạn kụ amhoọgh “iyool” phọ, kụ kozoọm ghan ika bidị?

²² Siẹn ookpomoghan phọ. Ikumor awe ookpomoghan phọ ootughiạn ghan mọ “iyool” phọ ki/lọ abidị. (Jọn 10:16; bạl 1 Pita 5:1-3.) Ikpo onhụ phọ “iyool igạ phọ Enaạn,” ḅilẹ “buphẹ oḅọgh bọ olọgh ḍighaạgh phọ anyina” eetughianhạm ikumor awe phọ mọ aZihova kụ amhoọgh iyool phọ. Odị rawạ mọ ozoọm iyool phọ eten ephomoghiạn ḅilẹ r’eyoghoyoghọ eten. (1 Tẹs. 2:7, 8) Ikumor awe dị osighẹ eten ephomoghiạn kụ oḍighinhom iiḍighi phọ abidị, komoọgh ni kuuḅi aghisigh aZihova. Abumor r’abumarani phọ ropomoghiạn ghan koḅilhẹ olhọgh eegu ikumor awe dị orọl idiphọ.

23-24. (a) Eeghe kụ oḍighi ikumor awe phọ mem dị oye aḍighi igbogh ikarạph siphẹ ookpomoghan phọ? (b) Ikumor awe phọ okiririom ghan ophogh eeghe mem dị bidị ophạm raghaạph oye dị aḍighi igbogh ikarạph?

 ²³ Eeghe kụ oḍighi ikumor awe ookpomoghan phọ mem dị bidị ophạm raghaạph oye dị aḍighi igbogh ikarạph? Oḍighi phọ abidị agbatanaạn ni r’opọ abuugboom iiruẹn phọ r’ikumor phọ orọl bọ eeḍiạn olhogh phọ aMozis. Eeḍiạn olhogh phọ opọ phọ, ikumor awe phọ r’abuugboom iiruẹn phọ u/pạm ghan raghaạph dị egbolhomaam iiḅereghị phọ aZihova bịn, kuolọ uḅarạm ghan kẹn raghaạph osoroghu iilhogh eelhe phọ. Kuolọ siẹn eeḍiạn olhogh phọ aKraist, oḍighi ikumor phọ pọ ophạm ghan araghaạph oye dị aḍighi ikarạph siẹn ookpomoghan phọ bịn. Ikumor awe phọ olọgh elhegh mọ aZihova angọ oḍighi buọ iikpọ itooghị phọ ophogh awe dị osoroghu iilhogh eelhe phọ. Kụ ipẹ phọ eḅaramaạm ni iikpọ osoph ooruẹn amalhiọm idiphọ olhọgh ikoli obobọ ofanị.—Rom. 13:1-4.

²⁴ Eghẹn eten kụ idị ikumor awe phọ ropạm ghan raghaạph awe lọ oḍighi igbogh ikarạph? Bidị rosighẹ ghan Baibul phọ kụ oḍighinhom. Bidị rootughiạn ghan ni mọ ephomoghiạn kụ ephighiom olhogh phọ aKraist. Ephomoghiạn renyu ghan ikumor awe phọ ooḅeghiọn asipuru phọ iphẹn: Ewạ mọ oḍighi eeghe, olhoghonaạn aḍighaạgh oye dị aḍighi ikarạph siphẹ ookpomoghan phọ? Idị egbolomaam oḍighinom ikarạph phọ, ephomoghiạn r’enyu ghan ikumor awe phọ ooḅeghiọn asipuru phọ iphẹn: Odị makạr ri akiton? Kotue ni ologhonhaạn nyodị ḍighaạgh oḅilhẹ oolemi asiya phọ odị r’aZihova ḍughụm?

25. Yira kooḅeghiọn eeghe siphẹ ephediphọ emhuoghaạph phọ?

²⁵ P’eeghe idị yira rosereghiạn orọl eeḍiạn olhogh phọ aKraist! Mem dị oomo ayira olhọgh inyaạm odaphạn olhogh phọ aKraist, pọ yira roḍighi ghan idị torobọ oye siphẹ ookpomoghan phọ kaloghoma mọ opomoghiạn ni oḅilhẹ omaghamhị nyodị maạr, ḅilhẹ mọ eḍighi esi oghoph. Toroboiperolbọ, yira odi aḅirinhi dị “abuḍighinom ikarạph” m’olhegheri bịn ‘ologhorị.’ (2 Tim. 3:13) Kụ iḍighi kụ kuu/weleghiạn siloor. Ika kụ edị ookpomoghan aKristẹn phọ kotuughaạny elhiom ooruẹn phọ Enaạn mem dị ophạm raghaạph oye dị abiighi obumoọny? Ephediphọ emhuoghaạph phọ kụ kepagharanhaạn ḍipuru phọ aḍiphẹ phọ.