1. O manan ko papakasoˈlinen ita tosaay a demak hani?

TANGONGOLAY ko olah ni Yihofa to finawlan Ningra, wa tahadaˈoc ko hatiniay a olah. Maolahayho Cingra to masadafdafay. (ˈOlic 33:5) Mihaenay i, pakasoˈlinay kita to: (1) Maˈaraw ni Yihofa ko malifaay no sikawdan Ningra to cowa ka sadafdaf a demak i, adadaay ko falocoˈ Ningra. (2) Ci Yihofa wa misaysay to cowa ka sadafdaf a demak. Mikitini saka 1 * no madadoedoay lalakaw, mananamay ita, o pafelian no Kawas to Israil a sarikec, tano olah ko taˈeneran, misaˈicelay ko Rikec ni Mosi to tano masadafdafay a micada to tao, mikiriwiˈay toya awaay ko pakayraan midipot to niyah a tamdaw. (Limoˈot 10:18) Paihkalayho ko Rikec ni Mosi, ci Yihofa ciharatengay toya midokoay Cingranan a tamdaw.

2. Oni lalakaw wa milengo kita to maanan salicay?

² Tomireng ko kasakopang no Krisciyang i saka 33 miheca i, cowato ko mamidofdof ko Krisciyang to ciolahay ato masadafdafay a Rikec ni Mosi, ano hatiraay wa awato ko sadipot hokira? Cowa ka mahaen, samanen iraayto ko faelohay a rikec no Krisciyang. Toniya lalakaw, wa milengo kita o maanan koniya faelohay a rikec, ato o faelohay rikec hano o olah ko taˈeneran? Oniya rikec samanay misaˈicel to kalimlaan ko masadafdafay? Tooren koniya rikec, cifadangalay a tamdaw sasamaan micada to tao?

3. Itini Kalatiya 6:2 malengoay ko Rikec ni Kristo, oniya rikec mahawpay ko manan?

³ ˈOsien ko Kalatiya 6:2. O mamidofdof ko Krisciyang to Rikec ni Kristo. Soˈlin cowa tiliden ni Yis ko rikec to dadofdofen no nisawawaan, kawra pakaynian ningra i limoˈot ato safalod a mikayat ko nisawawaan. O Rikec ni Kristo mahawpay ko kihcod a sapasifanaˈ ni Yis a kimad. Dotoc tongalen ita ko kafanaˈ toniya rikec.

4-5. (1) Samanay ci Yis pasifanaˈ to tamdaw hani? (2) Ihacowaay ci Yis pasifanaˈ to tamdaw hani?

⁴ Samanay ci Yis pasifanaˈ to tamdaw hani? Salakat, pakaynian ningra i sasowalen a pasifanaˈ to tamdaw. Ciˈicelay ko sowal ningra, samanen somowalay to soˈlinay Kimad no Kawas ato araaw no tamdaw a maˈorip, somowalayho to edengan o Hongti Kitakit no Kawas ko mamisaysay to pasangaray no tamdaw. (Luka 24:19) Roma i, patirengay to ngaˈayay taˈarawan ci Yis, mahapinang no nisawawaan to sasamaan ko waywayan a maˈorip.​—Yohani 13:15.

⁵ Ihacowaay ci Yis pasifanaˈ to tamdaw hani? Mitosil cingra i fafekang no sera a pasifanaˈ to tamdaw. (Matay 4:23) Ikor no patikol cingra maˈorip pasifanaˈay to nisawawaan. Kinacecayay itini ˈaˈayaw no 500 a nisawawaan, palimoˈot cangranan padama to tamdaw ‘malo nisawawaan ningra.’ (Matay 28:19, 20; 1 Korinto 15:6) O ˈaˈideman no kasakopang ci Yis, patikol i kakarayan padadotocay a pasifanaˈ to nisawawaan. O cecay tinakoan i, maedeng saka 96 miheca, mikayatan ni Yis ko tarokos ci Yohani, papipakalalok ato palimoˈot to mapasimalay a Krisciyang.​—Kolosay 1:18; Paˈarawan 1:1.

6. Wa icowa kita minanam to sapasifanaˈ ni Yis a kimad hani?

⁶ Wa icowa kita minanam to sapasifanaˈ ni Yis a kimad hani? Itini sepat a ratoh a cudad maˈoningay ko nano sowal ato demak ni Yis i sera, itini Krisiya Cudad wa ngaˈay padama kitanan cipinang to harateng ningra, samanen oniya mitiliday iraay ko ‘harateng ni Kristo’, mapatemeray no fangcalay saocor a mitilid.​—Loma 15:5.

7. Samaan ko demak ita, o midofdofay toniya rikec hani?

⁷ Mananamay ita ko maanan? O sapasifanaˈ ni Yis mahawpay ko polong no kaˈorip. Ano itinito i lomaˈ, katayalan, picudadan anca kasakopang,  wa ngaˈay padama ko Rikec ni Kristo kitanan. Miˈosi kita to Krisiya cudad ato midotim to lalomaˈay lalakaw, wa ngaˈay mananam ko Rikec ni Kristo. Samaan ko demak ita midofdof toniya rikec hani? Itini kihcod no kaˈorip ita tooren ko limoˈot ato safalod no Krisiya cudad. O sapasifanaˈ ni Yis a kimad mikitiniay i sidaˈitay a Kawas, ano midofdof kita to Rikec ni Kristo malecaday o midofdofay to Kawas.​—Yohani 5:19.

8. O Rikec ni Kristo o maanan ko taˈeneran hani?

⁸ Itini fafekang no tanoktokay a taˈeneran patireng to lomaˈ rihadayay ko mikilomaˈay tamdaw. Malecaday, o tanoktokay ko taˈeneran a rikec, parihadayay to tamdaw. O Rikec ni Kristo mapatirengay i fafekang no olah, o sangaˈayay a taˈeneran konini. O Rikec ni Kristo hano mikitiniay i olah ko araaw hani?

9. Misamaanay o midemakan ni Yis sahtoay o mikitiniay i olah?

⁹ Saka cecay, o midemakan ni Yis sahto mikitiniay i olah. Ano iraay ko olah no tamdaw wa siniˈada to tao. Iraay ko siniˈadaay a falocoˈ ni Yis, mansa pasifanaˈ cingra to tamdaw, miadah to adadaay, pafecol to macahiway, patikol paˈorip to mapatayay. (Matay 14:14; 15:32-38; Marko 6:34; Luka 7:11-15) Midemak ci Yis toniya demak malowanay ko toki ato ˈicel ningra, kawra makalimay cingra isalakat miharateng to saali no tao. O sakakaay ciolahay a demak ni Yis, o kinafalah to ˈorip saki tamdamdaw.​—Yohani 15:13.

10. Sasamaan kita mitodong cingranan hani?

¹⁰ Mananamay ita ko maanan? Ngaˈayay todongen ita ci Yis, ikaka ko pisaareteng to saali no tao to niyah, palahaden ko siniˈada to mitosilan a tamdaw. Ano siniˈada kita a pasifanaˈ to mitosilan a tamdaw, o midofdofay to Rikec ni Kristo.

11. Samaan kita mafanaˈ to tada ciharatengay ci Yihofa to finawlan Ningra hani?

¹¹ Saka tosa, o sowal ato waywayan ni Yis paihkalay to olah no Wama. Mitosil ci Yis i sera i, pahapinangay to tamdaw tada ciharatengay ci Yihofa to finawlan Ningra. Pasifanaˈay ci Yis to cecay kalimlaan a demak, o kahacecay tamdaw sahtoay o kalimlaan sanay ko pinengneng no Wama. (Matay 10:31) Ano pasasiyor ko “masidayay a siri” patatikol i tihi ni Yihofa, mahemekay Cingra micada. (Luka 15:7, 10) Mafanaˈay kita to maolahay ci Yihofa kitanan, pakayni sapilidongaw kitanan patafangan Ningra ko ˈorip no wawa.​–Yohani 3:16.

12. Wa samaan kita mitodong to olah ni Yihofa hani?

¹² Mananamay ita ko maanan? Wa samaan kita mitodong to olah ni Yihofa hani? (Ifiso 5:1, 2) O cecay pakayraan, salimlaen ko salikaka. Roma i, ano patatikol i likakawa no Kawas ko “masidayay a siri” i, patadoen cingra a mahemek soˈlin ko falocoˈ a micada cingranan. (ˈOlic 119:176) Sasamaanho kita paihkal to olah i salikaka hani? Kinafalah to niyah, ano misaali cangra tangsol a padama. (1 Yohani 3:17) Maolah kita to tamdaw, o midofdofayto to Rikec ni Kristo.

13. Pakayni Yohani 13:34, 35, palimoˈotay ci Yis to mihakelongay cingranan a tamdaw misamaan to demak? Hano o faelohay a limoˈot konini?

¹³ Saka tolo, palimoˈotay ci Yis to mihakelongay cingranan a tamdaw pairaen ko kinafalahay to niyah a olah. (ˈOsien ko Yohani 13:34, 35.) O faelohay a limoˈot misaaliay to olah, o hatiniay a olah cowa ko misaˈosian no Rikec ni Mosi. Tatodong ni Yis wa malecad kita cingranan a maolah to salikaka. Mansa misaaliay kita to kinafalahay to niyah a olah *, maolah to salikaka ikaka to kaolah to niyah. O kaolah ita  to salikaka wa makahi a kinafalah to ˈorip, malecad o kinafalah ni Yis to ˈorip.

14. Samaanen ita midofdof koniya faelohay limoˈot hani?

¹⁴ Mananamay ita ko maanan? Samaanen ita midofdof koniya faelohay limoˈot hani? Kantangen ko sowal i, o mamakahi kita a kinafalah midemak saki salikaka, kinafalah to ˈorip, ato sakangaˈay no niyah. Tinakoen, mararid kita micada to matoˈasay salikaka mirienang to saˈopo, pakayni sakangaˈay no salikaka makahi misawad to kaolahan no niyah, anca sawad hanho ko tayal a padama to tahapadesay. Mihaen ko demak ita o midofdofay to Rikec ni Kristo, o parihadayay ko kasakopang wa saan ko harateng no salikaka.

15-16. Hano mafanaˈ kita to o moecelay a tamdaw ci Yis?

¹⁵ Itini Fangcalay Cudad, tatodong no “masadafdafay” i, midemak to kahemekan no Kawas a demak, caka pisakakinih a midemak. Hano mafanaˈ kita o Rikec ni Kristo micowatay to masadafdafay hani?

¹⁶ Saka cecay, o waywayan ni Yis paihkalay to moecelay a tamdaw cingra. Itini i sera ci Yis i, ˈintehay ko ˈaˈideman no Yutaya to ˈalafang a tamdaw, misakahmaway to kalo a tamdaw, cowa ka ngodo to fafahiyan. Cowa ka lecad ci Yis, masadafdafay ko pinengneng ningra to tamdaw. Micadaan ni Yis ko pakasoˈlinay cingranan a ˈalafang tamdaw. (Matay 8:5-10, 13) Cowa pisakakinih ci Yis to tamdaw, o mitosilan ningra mahawpay ko manikaway ato cihafayay. (Matay 11:5; Luka 19:2, 9) Cowa pikariˈang to fafahiyan, tano mangodoay a siniˈada cangranan, mahawpay ko misakahmawan no tao a fafahiyan.—Luka 7:37-39, 44-50.

17. Sasamaan kita mitodong to taˈarawan ni Yis hani?

¹⁷ Mananamay ita ko maanan? Ngaˈayay todongen ita ci Yis, caka pisakakinih to tamdaw, ano samaanto ko saaroˈan, pihakelongan no tamdaw, ano makahi mitengil o tatosilen ita cangra. O faˈinayan a Krisciyang, wa minanam ci Yisan mikangodo to fafahiyan. Mihaen ko demak ita, o midofdofayto to Rikec ni Kristo.

18. Pakayni masadafdafay, mansanay ci Yis hani?

¹⁸ Saka tosa, pasifanaˈay ci Yis to o maanan ko masadafdafay. Pasowalan ni Yis ko nisawawaan to pina safalod, padama cangranan masadafdaf ko picada to tao, o cecay tinakoan itini Matay 7:12. Tooren koniya safalod, ano makalimay kita masadafdaf ko macadaay, wa masadafdaf ko picada to tao, mihaen to demak, wa masadafdaf ko picada no tao kitaanan alatek. Ano padadotoc eca ka sadafdaf ko macadaay ita samaanto? Sowal ni Yis to nisawawaan, ‘to romiˈad to dadaya ano milongoc ko tamdaw ci Yihofaan, papatado Cingra a misawkit to moecelay.’ (Luka 18:6, 7) Pasoˈlinen ita koniya sinael: O masiˈayaway ita a kihcod pasangaray toniya salikoray ˈawaled, mafanaˈay ko Kawas, itini misaˈosian Ningra a toki papatado a misawkit to moecelay.​—2 Tisalonika 1:6.

19. Pakayni masadafdafay, mananamay ita ko maanan?

¹⁹ Mananamay ita ko maanan? Tooren ita ko sapasifanaˈ ni Yis a safalod, masadafdaf ko picada to tamdaw. Tahacada kita to cowa ka sadafdaf a demak i hekal ni Satan, kawra mafanaˈay kita wa patado ci Yihofa kitanan a misawkit, hato cowa ko mamalahdaw ko hatokel no mita.

20. Cifadangalay a tamdaw sasamaan micada to tao hani?

²⁰ Itini Rikec ni Kristo, cifadangalay a tamdaw sasamaan micada to tao hani? Ano o olah  ko taˈeneran no rikec i, cifadangalay a tamdaw wa tano mangodoay, sidaˈitay a pakayraan ko sapicada to midimokosan nangra a tamdaw. Haharatengen nangra, misaaliay ci Yis cangranan tano olah a micada to tao.

21. O faˈinayan sasamaan paihkal to kinafalahay to niyah a olah i fafahi hani? O wama sasamaan ko picada to wawa hani?

²¹ Itini paro no lomaˈ. Wa maolah ko faˈinay to fafahi, ‘malecad o kaolah ni Kristo to kasakopang.’ (Ifiso 5:25, 28, 29) Nanamen no faˈinay ko kinafalahay a harateng ni Kristo, paikakaen ko saali ato sakangaˈay no fafahi to niyah. O roma faˈinayan pasangaray maolah to tao, pakayniay i serangawan nangra alatek, o picada no kalo a tamdaw cowa ka sadafdaf, awaay ko sidaˈit, tada pasangaray a mifalic, kawra ano sapitooraw cangra to Rikec ni Kristo a maˈorip i, kalimlaan ko noka pifalic. O faˈinay ano ira ko kinafalahay to niyah a olah i, wa kangodoen no fafahi cingra. Roma i, ano maolah ko wama to wawa i, cowa ko tatano sowal ato waywayan a midokaˈ to wawa. (Ifiso 4:31) Wa paihkal cingra to olah, ato pihayda, parihaday to wawa, mihaenay wa matongal ko olah ato pakasoˈlin no wawa to wama.

22. Mikitini 1 Pitiro 5:1-3, o “kasafelaw no siri” ono nima hani? Sasamanen ko picada to “kasafelaw no siri” hani?

²² Itini kasakopang. Haharatengen no malohemay malitengay, o “kasafelaw no siri” cowa kono nangra. (Yohani 10:16; ˈosien ko 1 Pitiro 5:1-3.) Masowalay no Fangcalay Cudad ko ‘kasafelaw a siri no Kawas’ ato ‘malo hafayay no Kawas a tamdaw,’ patalipaˈelalay to malohemay malitengay oni Yihofa ko “masafelaway a siri”. Tokel no Kawas kaolahen ato damsayen a micada ko siri Ningra. (1 Tisalonika 2:7, 8) Ano misarocod a dademak ko malohemay malitengay, sidaˈit a midimokos to kasafelaw no siri, o mamihayda ci Yihofa cangranan, wa maolah ato mikangodo ko salikaka cangranan.

23. Ano ira ko pakidemay a raraw i kasakopang, o malohemay malitengay iraay ko maanan a ˈinorong hani?

 ²³ Ano ira ko pakidemay a raraw i kasakopang i, o malohemay malitengay iraay ko maanan a ˈinorong hani? O ˈinorong nangra cowa ka lecad to ˈinorong no i Rikecay ni Mosi a malohemay malitengay. Tooren ko Rikec ni Mosi, o manilnilay a faˈinayan cowa ko pisaysay aca to kalalaˈed no ˈalomanay ato Kawas, wa misaysayho to kalacongis no tamdaw ato mararaway a demak. Kawra, o Rikec ni Kristo, o pipadama aca to kalalaˈed no salikaka ato Kawas ko hademak no malohemay malitengay. Samanen, mafanaˈay cangra pafelian no Kawas ko mirikecay no hekal ko ˈinorong misaysay tono hekalan a demak, mahawpay ko patefocen ato mipalitay a demak.​—Loma 13:1-4.

24. Ano misaysay toniya demak i, haharatengen no malohemay malitengay ko maanan hani?

²⁴ Ano ira ko pakidemay a raraw i kasakopang, sasamaan ko pisaysay no malohemay malitengay hani? O tatooren nangra ko safalod no Fangcalay Cudad a mihapinang ato misawkit, wa misinanot, o olah ko taˈeneran no Rikec ni Kristo. Maolahay ko malohemay malitengay to makariˈangay a salikaka, wa miharateng to sasamaan a padama cangranan. Pakayni i mararaway a Krisciyang, sasinanoten no malohemay malitengay: “Pasasiyoray cingra han? Sasamaanen padama cingranan patikol a malakangaˈay ci Yihofaan hani?”

25. Dotoc a lalakaw milengo kita to manan?

²⁵ Ira ko Rikec ni Kristo tada matomesay ko piakoˈiday ita. Ano misaˈicel a midofdof ko kahacecay no kasakopang toniya rikec, wa ngaˈayto malo karihadayan no salikaka ko kasakopang, o mikaolahan ato misakaretengan saan ko harateng no ˈalomanay. Kawra, o tatiihay tamdaw ‘matongalay ko tatiih’, cowa ko mamisakahmaw kita. (2 Timoti 3:13) Ano hatiraay i, wa samaan ko kasakopang a mitodong ci Yihofaan, tano masadafdafay a pakayraan misaysay to miˈodangay to kaemangay a demak hani? Dotoc a lalakaw wa pacaˈof toniya salicay.