1. Ni 2 biten nou pé sèten. Kilès la ?

JÉOVA enmé sèwvitè a-y. I toujou té enmé-yo é i ké toujou enmé-yo. I enmé lajistis osi (Sòm 33:5). Donk, ni 2 biten nou pé sèten : 1) Sa ka fè Jéova lapenn lè yo ka aji èvè sèwvitè a-y on mannyè ki pa jis. 2) I pwomèt kè onlè yo ké arété fè pèp a-y soufè é kè i ké pini séla ki ka maltrété-yo la. Adan prèmyé awtik * a séri-lasa, nou vwè kè Lwa-la Bondyé té ba Moyiz la pou nasyon a Izrayèl té bazé asi lanmou. Lwa-la té ka ankourajé-moun a montré-yo jis èvè toutmoun, menm èvè sa ki pa té annéta défann-yo (Dét. 10:18). Lwa-lasa ka montré kè Jéova ka sousyé-y toubònman dè sèwvitè a-y.

2. A ki kèsyon nou kay réponn ?

² Lwa a Moyiz té bazé asi lanmou é i té ka ankourajé a aji èvè jistis. An 33 a épòk an nou, lè lasanblé krétyèn la vwè jou, sèwvitè a Bondyé pa té oblijé suiv lwa-lasa ankò. Ès sa té vlé di kè sé krétyen-la pa té’é ni pon lwa kon sila pou pwotéjé-yo ankò ? Non, a pa sa ditou ! Sé krétyen-la risivwè on nouvo lwa. Adan awtik-lasa, nou ké vwè ka lwa-lasa yé. Aprésa nou ké réponn a sé twa kèsyon-lasa : Poukwa nou pé di kè lwa-lasa bazé asi lanmou ? Poukwa nou pé di kè i ka ankourajé a aji èvè jistis ? Sèlon lwa-lasa, kijan moun ki ni on otorité dwèt aji èvè lézòt ?

3. Galat 6:2 ka palé dè « lwa a Kris ». Ka ki ni adan lwa-lasa ?

³ (Li Galat 6:2.) Sé krétyen-la ka rèspèkté « lwa a Kris ». Jézi pa maké on séri lwa ba disip a-y, men i ba-yo  enstriksyon, komandman, é prensip pou gidé-yo. Adan « lwa a Kris », ni tousa Jézi anségné. Pou nou konnèt lwa-lasa plibyen, an-nou gadé rèstan a awtik-la.

4-5. Kijan Jézi té ka anségné é a ki moman i fè-y ?

⁴ Kijan Jézi té ka anségné ? On prèmyé métòd, sé kè i té ka anségné moun èvè sa i té ka di. Pawòl a-y té puisan, pas i té ka di lavérité asi Bondyé, i té ka èspliké pou ki rézon vréman nou asi latè é i té ka préché kè sé wayòm a Bondyé ki ké woté tousa ki ka fè moun soufè asi latè (Lik 24:19). Jézi té ka anségné èvè ègzanp-la i té ka bay la osi. Jan-la i té ka viv la té ka montré disip a-y kijan pou yomenm a yo té viv (Jan 13:15).

⁵ Kilè Jézi anségné ? I anségné pannan ministè a-y lè i té asi latè (Mat. 4:23). I anségné disip a-y lè i té toufré résisité. Pa ègzanp, i parèt douvan on bon enpé adan yo (dwèt té ni pliski 500 moun la) é i ba-yo lòd dè ‘fè disip’ (Mat. 28:19, 20 ; 1 Kor. 15:6). Antankè chèf a lasanblé-la, i kontinyé ba disip a-y enstriksyon menm apré i rètouné an syèl-la. Pa ègzanp, koté 96 a épòk an nou, Jézikri mandé lapòt Jan ankourajé sé krétyen wen la é ba-yo konsèy (Kol. 1:18 ; Rév. 1:1).

6-7. a) Ola nou pé touvé ansègnman a Jézi ? b) Ka fò-nou fè pou nou suiv lwa a Kris ?

⁶ Ola nou pé touvé ansègnman a Jézi ? Adan sé 4 Évanjil-la, ou ka touvé onlo biten kè i di é kè i fè lè i té asi latè. Anplisdisa, sélézòt liv a sé Ékriti grèk la, sé dé nonm ki risivwè lèsprisen a Bondyé ki maké-yo. É yo té ni « mantalité a Kris » osi. Sé pousa sé liv-lasa ka édé-nou konprann kijan Jézi té ka pansé (1 Kor. 2:16).

⁷ Sa nou ka aprann : Ansègnman a Jézi ka édé-nou adan tout domenn a vi an nou. Sé konsa, lwa a Kris ka gidé-nou adan tousa nou ka fè ki nou akaz an nou, an travay an nou, lè nou lékòl é lè nou an lasanblé an nou. Nou ka aprann konnèt lwa-lasa lè nou ka li Lézékriti grèk é lè nou ka pran tan réfléchi asi yo. Nou ka suiv lwa-lasa, lè, adan vi an nou, nou ka rèspèkté enstriksyon, komandman é prensip ki adan sé liv-lasa. Lè nou ka  suiv lwa a Kris, sé Jéova, Dyé an nou ki enmé-nou, nou ka obéyi, pas tousa Jézi anségné ka vin dè Jéova (Jan 8:28).

8. Asi ki biten lwa a Kris bazé ?

⁸ Lè nou ka rété adan on kaz yo konstwi asi fondasyon ki solid, nou ka santi-nou ansékirité. Menmjan-la, lè nou ka suiv on lwa ki bon ban nou é ki ni fondasyon ki solid, nou ka santi-nou ansékirité. Lwa a Kris ni méyè fondasyon ki tini : lanmou. Poukwa nou pé di sa ?

9-10. a) Ka i ka montré kè sé lanmou ki té ka pousé Jézi aji ? b) Kijan nou pé imité Jézi ?

⁹ Mi on prèmyé rézon ki ka fè-nou di sa : tousa Jézi té ka fè, sé lanmou ki té ka pousé-y a fè-y. Lè on moun ni pityé, oben lè i ni konpasyon ki plen tandrès pou lézòt, i ka montré i ni lanmou. Si Jézi anségné tousa moun, si i géri moun-malad, si i ba moun ki té fen manjé é si i résisité moun-mò, sé pas i té ni pityé pou sé moun-la (Mat. 14:14 ; 15:32-38 ; Mawk 6:34 ; Lik 7:11-15). Menmsi sa té ka pran-y onlo tan é onlo énèrji, Jézi té kontan fè entéré a lézòt pasé avan ta-y. É pli bèl jès i fè pou montré lanmou a-y, sé lè i bay vi a-y pou lézimen (Jan 15:13).

¹⁰ Sa nou ka aprann : Nou pé imité Jézi lè nou ka fè entéré a lézòt pasé avan tan nou. Nou pé imité-y osi lè nou ka kiltivé on konpasyon ki plen tandrès pou moun an téritwa an nou. Si sé èvè konpasyon nou ka préché é nou ka anségné bon nouvèl-la, nou ka suiv lwa a Kris.

11-12. a) Ka ki ka montré kè Jéova ka sousyé-y dè nou onlo ? b) Kijan nou pé enmé menmjan ki Jéova ?

¹¹ On dézyèm rézon sé kè Jézi fè moun sav kè Papa-y enmé-nou. Pannan ministè a-y, i montré kijan Jéova ka sousyé-y onlo dè sèwvitè a-y. Pa ègzanp, i anségné kè nouchak ni valè pou Pap’an nou ki an syèl-la (Mat. 10:31). I anségné kè lèwvwè on mouton ki pèd chimen ka rèpanti-y é ka wouvin adan lasanblé-la, Jéova kontan akéyi-y toubònman (Lik 15:7, 10). I anségné osi kè Jéova ban-nou laprèv kè i enmé-nou lè i bay vi a Gason a-y an ranson pou nou (Jan 3:16).

¹² Sa nou ka aprann : Kijan nou pé enmé menmjan ki Jéova ? (Éféz. 5:1, 2). Nou ka imité lanmou a-y lè nou ka konsidéré kè tout frè é sè an nou ni onlo valè, é lè nou ka akéyi èvè onlo jwa on « mouton ki té pèd » é ki ka wouvin owa Jéova (Sòm 119:176). Nou ka montré kè nou ni lanmou pou frè é sè an nou lè nou ka ba-yo tan an nou é énèrji an nou, siwtou lè yo bizwen èd (1 Jan 3:17). Lè nou ka aji èvè lézòt épi lanmou, nou ka suiv lwa a Kris.

13-14. a) Sèlon Jan 13:34, 35, ki lòd Jézi ba disip a-y, é poukwa sété on nouvo komandman ? b) Kijan pou nou suiv nouvo komandman-lasa ?

¹³ On twazyèm rézon sé kè, Jézi ba disip a-y on lòd : i mandé-yo aji èvè on lanmou ki paré a fè sakrifis (li Jan 13:34, 35). Komandman-lasa té nouvo, pas Lwa a Moyiz pa té ka mandé on moun aji èvè on lanmou kon sila. Fò-nou enmé frè an nou kon Jézi té enmé-yo *. Sa sé on lanmou ki paré a fè sakrifis. Fò-nou enmé frè é sè an nou menm plis ki noumenm. Fò lanmou-la nou ni pou yo la pousé-nou a bay vi an nou pou yo, kon Jézi fè-y pou nou.

 ¹⁴ Sa nou ka aprann : Kijan pou nou suiv nouvo komandman-lasa ? Tou senplèman, lè nou ka fè sakrifis pou frè é sè an nou. Nou paré a bay vi an nou pou yo, men nou paré a fè ti sakrifis osi. Pa ègzanp, nou ka suiv lwa a Kris lè nou ka fè éfò chak simenn pou ay chèché on frè oben on sè ki ni on laj pou menné-y réinyon. Nou ka suiv lwa a Kris osi, lè nou ka fè préférans an nou pasé apré, pou nou fè on frè plézi, oben lè nou ka pran dé jou-konjé pou nou édé lè ni on sèkou ki òwganizé. Anplisdisa, nou ka fè ansòt pou chakmoun adan lasanblé an nou santi-y ansékirité.

15-17. a) Sa Jézi té ka fè ka aprann-nou on biten asi jan i té ka vwè lajistis. Ki biten ésa ? b) Kijan nou pé imité Jézi ?

¹⁵ Adan Labib, lè on moun ka « aji èvè jistis », i ka fè sa ki byen sèlon Bondyé, é i ka fè-y san i fè préférans. Poukwa nou pé di kè lwa a Kris ka ankourajé-nou a aji èvè jistis ?

¹⁶ Prèmyèwman, réfléchi asi jan Jézi té ka aji. Sa ka aprann-nou kijan i té ka vwè lajistis. A épòk a-y, moun ki té antèt a rèlijyon juif la té hay moun ki pa té juif. Anplisdisa, yo té ka méprizé pèp-la é yo pa té ni pon rèspé pou sé madanm-la. Li Jézi, té ka aji èvè jistis épi toutmoun é i pa té ka fè préférans. Menmsi on moun pa té juif, dépi i té ni fwa adan-y, Jézi té dakò pou i vin disip a-y (Mat. 8:5-10, 13). I pa té ni pon mové lidé asi moun é i té ka préché ba toutmoun, ki ba moun-rich ki ba maléré (Mat. 11:5 ; Lik 19:2, 9). I pa jen té ka aji èvè sé madanm-la on mannyè ki rèd é i pa té ka fè-yo wont nonplis. Byen okontrè, i té ka rèspèkté-yo é i té janti èvè yo, menm lè sété dé madanm yo té ka méprizé (Lik 7:37-39, 44-50).

¹⁷ Sa nou ka aprann : Pou imité Jézi nou ka aji èvè lézòt san fè préférans é nou ka préché ba toutmoun ki vlé kouté-nou, kèlkèswa nivo sosyal a yo oben rèlijyon a yo. On misyé ki krétyen ka suiv ègzanp a Jézi lè i ka aji èvè sé madanm-la èvè onlo rèspé. Lè nou ka aji konsa, nou ka suiv lwa a Kris.

18-19. a) Ka Jézi anségné asi lajistis ? b) Ki lèson sa Jézi anségné asi lajistis ka aprann-nou ?

¹⁸ Dézyèmman, réfléchi asi sa Jézi anségné anrapò èvè lajistis. I ba disip a-y dé prensip ki té’é édé-yo aji èvè lézòt on mannyè ki jis. Pa ègzanp, réfléchi asi on Règ enpòwtan i té ba-yo (Mat. 7:12). Noutout vlé kè yo aji èvè nou on mannyè ki jis. Kifè, sé konsa pou nou aji èvè lézòt. Pétèt sa ké ba-yo anvi aji menmjan-la èvè nou. Men, ka fò-nou fè si yo ka aji èvè nou on mannyè ki pa jis ? Jézi anségné disip a-y osi kè fò-yo ni konfyans kè Jéova ké fè ansòt pou pèp a-y pa soufè ankò. I ké fè sa ki fo pou pini séla ki ka maltrété-yo la (Lik 18:6, 7). An réyalité, ansègnman-lasa sé on pwomès : Dyé an nou ki plen jistis konnèt byen pa ki éprèv nou ka pasé pannan dènyé jou a sistèm-lasa, é i ké réglé kont a moun ki ka fè-nou soufè a moman-la ki fo la (2 Tés. 1:6).

¹⁹ Sa nou ka aprann : Si nou ka mèt an pratik sé prensip-la Jézi ban-nou la, nou ké aji èvè jistis épi lézòt. É si nou ka soufè padavwa yo ka fè-nou sibi enjistis adan mond a Satan, on lidé ki pé konsolé-nou sé kè, asiré pa pétèt, Jéova ké mèt on milyé adan sa.

20-21. a) Lè on moun ni on sèwten otorité, kijan pou i aji èvè lézòt ? b) Kijan on mari pé montré i ni on lanmou ki paré a fè sakrifis, é kijan on papa dwètèt aji èvè timoun a-y ?

²⁰ Sèlon sa lwa a Kris ka di, lè on moun ni on sèwten otorité, kijan pou i aji èvè lézòt ? Konm fondasyon a lwa-lasa sé lanmou, fò i aji èvè sa ki anba rèsponsabilité a-y èvè onlo rèspé é onlo bonté. Fò i sonjé kè Kris vlé kè nou aji èvè lanmou adan tousa nou ka fè.

²¹ Adan fanmi-la. On mari dwètèt enmé madanm a-y ‘kon Jézi enmé lasanblé-la’ (Éféz. 5:25, 28, 29). Fò i imité Kris ki té ni on lanmou ki té paré a fè sakrifis. Fò i fè entéré a madanm a-y pasé avan ta-y é fò i fè sa madanm-ay bizwen pasé avan osi. Sa pé rèd ba désèrten nonm dè aji konsa, pas pétèt adan kilti a yo oben adan fanmi a yo, yo pa aprann-yo aji èvè lézòt èvè jistis é èvè lanmou. Sa pé rèd ba yo dè mèt vyé mès a yo dè koté, men pou suiv lwa a Kris, yo dwètèt fè sé chanjman-lasa. Lè on mari enmé madanm a-y é ka fè sakrifis pou-y, madanm a-y ka rèspèkté-y. On papa ki vréman enmé timoun a-y pa jen ka fè ayen ni di ayen pou maltrété-yo (Éféz. 4:31). Byen okontrè, i ka montré-yo kè i enmé-yo é kè i kontan-yo pou yo santi-yo ansékirité. Lè on papa konsa, timoun a-y enmé-y é yo ka fè-y konfyans.

22. Kon 1 Pyè 5:1-3 ka montré, sé « mouton »-la sé ta kimoun ? É kijan pou sé ansyen-la aji èvè yo ?

²² Adan lasanblé-la. Fò sé ansyen-la sonjé kè sé « mouton »-la pa ta yo (Jan 10:16 ; li 1 Pyè 5:1-3). Sé èsprésyon-la : « twoupo a Bondyé », « douvan Bondyé » é « éritaj a Bondyé », ka fè sé ansyen-la sonjé kè sé mouton-la sé ta Jéova. É Jéova vlé kè yo aji èvè mouton a-y épi  onlo lanmou é èvè onlo tandrès (1 Tés. 2:7, 8). Sé ansyen-la ki ka pran swen a twoupo-la èvè onlo lanmou ka fè Jéova plézi. Frè é sè a yo enmé-yo é ka rèspèkté-yo osi.

23-24. a) Lè on moun adan lasanblé-la ka fè on péché grav, ki rèsponsabilité sé ansyen-la ni ? b) Lè sé ansyen-la ka okipé-yo dè on péché grav, ka pou yo pa jen oubliyé ?

²³ Ki rèsponsabilité a sé ansyen-la lè on moun adan lasanblé-la ka fè on péché grav ? Yo pa ni menm wòl ki sé ansyen-la ki té la pou jijé Izrayèl an tan lontan. Lwa a Moyiz té ka prévwa kè sé nonm-lasa jijé pèp-la lè i pa té ka adoré Jéova konm i fo, men anplisdisa, lèwvwè té ni on litij, oben lè on krim té fèt, sé yo ki té ka jijé osi. Jòdila, lè on moun ka fè on péché grav, sé ansyen-la, ki anba lwa a Kris ka okipé-yo yenki dè pati èspirityèl a afè-lasa. Yo ka rèkonnèt kè Bondyé ba sé gouvènman-la on rèsponsabilité. Sé yo ki andwa jijé lè ni on litij oben lè ni on krim ki fèt. Pa ègzanp, sé gouvènman-la pé kondanné on moun a péyé on amand oben yo pé mété-y lajòl (Wom. 13:1-4).

²⁴ Lè on moun ka fè on péché grav, kijan sé ansyen-la ka okipé dè pati èspirityèl a afè-lasa ? Yo ka itilizé Labib pou analizé sitiyasyon-la é pou sav ka yo ka désidé. Yo pa jen ka oubliyé kè fondasyon a lwa a Kris sé lanmou. Lanmou ka pousé sé ansyen-la a mandé-yo : « Adan sitiyasyon-lasa, ka pou nou fè pou édé sé frè é sè a lasanblé-la ki inosan é ki ka soufè adan sa ? » É moun-la ki péché la aprézan ? Lanmou ka pousé sé ansyen-la a mandé-yo : « Ès i rèpanti-y ? Ès nou pé édé-y rètouvé on bèl lanmityé èvè Jéova ? »

25. Ka nou kay vwè adan awtik-la ki ka vin la ?

²⁵ A pa ti kontan nou kontan nou ni lwa a Kris pou gidé-nou ! Lè noutout ka travay rèd pou suiv lwa a Kris, nou ka fè pa an nou pou chakmoun adan lasanblé an nou santi kè nou enmé-y, kè i ni valè, é pou i santi-y ansékirité. Malérèzman, adan mond-la nou ka viv adan-y la, « sé méchan-la » ka vin pi an pi mové (2 Tim. 3:13). Fò-nou rété véyatif. Lè on moun ka fè malpwòpté èvè on timoun, kijan lasanblé krétyèn la pé imité jistis a Bondyé ? Awtik-la ki ka vin la ké réponn a kèsyon-lasa.