1. Dahaka mai anina bada gaudia rua ita diba be namo?

IEHOVA DIRAVA be hanaihanai ia idia tomadiho henia taudia ia lalokau henia. Danu ia be hahemaoro goeva ia ura henia. (Sal. 33:5) Unai dainai mai anina bada gaudia rua ita dibaia be namo: (1) Iehova be ia lalohisihisi bema ia itaia ma haida be iena hesiai taudia idia dagedage henidia. (2) Ia gwauhamata iena taunimanima be hisihisi do idia abia lasi, bona iena taunimanima idia dagedage henia taudia edia dika davana do ia henia. Stadi atikol 9 ena Kahana 1 * ai ita dibaia gauna be, Dirava ese Mose amo Israela taudia dekenai ia henia Taravatu ena badina badana be lalokau. Unai taravatu ese hahemaoro goeva karana ia hahedinaraia. Danu ogogami bona manoka taudia ia gimaia. (Deu. 10:18) Unai Taravatu ese ia hahedinaraia Iehova be ia idia tomadiho henia taudia ia laloa bada.

2. Edena henanadai toi do ita haerelaidia?

² Mose ena Taravatu be lagani 33 C.E. ai ia ore, unai negai Keristani kongrigeisen ia matamaia. Keristani taudia be lalokau bona hahemaoro maorona ia hahedinaraia taravatuna ese idia do ia gimaia, a? Oibe. Keristani taudia be taravatu matamata idia badinaia. Inai atikol ai ita ese inai taravatu do ita herevalaia. Bena inai henanadai do ita haerelaidia. Dahaka dainai ita gwau diba taravatu ena badina be lalokau? Dahaka dainai taravatu be hahemaoro goeva karana ia hahedinaraia? Taravatu idia henia taudia be edena dala ai taravatu idia badinaia?

3. Galatia 6:2 ena hereva bamona, “Keriso ena taravatu” be dahaka ia herevalaia?

³ Galatia 6:2 duahia. Keristani taudia be “Keriso ena taravatu”  idia badinaia. Iesu be ia murinai idia raka taudia totona taravatu ena lista ta ia torea lasi, to idia dekenai hadibaia herevadia, hahegani bona hakaua herevadia ia henia. Iesu ese ia hadibaia gaudia ibounai be “Keriso ena taravatu” lalonai idia noho. Unai taravatu ita lalopararalaia namonamo daladia mani ita herevalaia.

4-5. Iesu be edena dala idauidau ai ena hahediba gaukara ia karaia, bona edena negai?

⁴ Ginigunana be, iena hereva amo taunimanima ia hadibaia. Ia gwauraia gaudia ibounai ese taunimanima ia durua bada, badina ia ese Dirava ena hereva momokani ia gwauraia, mauri ena anina ia herevalaia bona Dirava ena Basileia ese taunimanima edia hisihisi ibounai do ia haorea dalana ia gwauraia. (Luka 24:19) Iesu be ena haheitalai amo taunimanima ia hadibaia danu. Ena mauri bona kara amo ia hahedinaraia ia ura ia murinai idia raka taudia ese iena haheitalai idia tohotohoa.​—Ioa. 13:15.

⁵ Tanobada ai haroro gaukara ia karaia neganai taunimanima ia hadibaia. (Mat. 4:23) Danu, ia toreisi lou murinai iena murinai idia raka taudia ia hadibaia. Hegeregere, iena hahediba taudia haida dekenai ia hedinarai​—⁠reana idia ibounai be 500 mai kahana bamona​—bona idia ia hagania “hahediba taudia” halaoa gaukarana idia karaia totona. (Mat. 28:19, 20; 1 Kor. 15:6) Iesu be kongrigeisen ena kwarana dainai guba dekenai ia giroa lou negana amo ema bona hari iena hahediba taudia ia hadibaia noho. Hegeregere, lagani 96 C.E. ai, Keriso ese aposetolo Ioane ia gaukaralaia unai amo ia ese horoa Keristani taudia do ia hagoadaia bona idia dekenai sisiba do ia henia.​—⁠Kol. 1:18; Apok. 1:1.

6-7. (a) Iesu ena hahediba herevadia be edeseniai ita davaria diba? (b) Edena dala ai Keriso ena taravatu ita badinaia diba?

⁶ Iesu ena hahediba herevadia be edeseniai ita davaria diba? Evanelia buka foa lalonai Iesu ese tanobada ai ia gwauraia bona ia karaia gaudia ita duahia diba. To, Keristani Grik Revarevadia ma haida idia torea taudia be lauma helaga ena hakaua henunai bona “Keriso ena lalohadai” idia abia dainai unai revareva ibounai idia torea, unai amo ita ese Iesu ena laloa dalana ita lalopararalaia diba.​—1 Kor. 2:16.

⁷ Ita dibaia gaudia: Iesu ese ia hadibaia gaudia be mauri ai ita idia durua diba gaudia ia herevalaia. Bema ita be ruma ai, gaukara gabuna, sikuli gabuna bona kongrigeisen ai ita noho, Keriso ena taravatu ese ita ia hakaua be namo. Keristani Grik Revarevadia duahia bona laloa dobu karana amo unai taravatu do ita dibaia. Unai taravatu do ita  badinaia bema iseda mauri lalonai unai hadibaia herevadia, hahegani bona hakaua herevadia ita badinaia. Keriso ena taravatu ita badinaia neganai, ita ese iseda lalokau Diravana, Iehova​—Iesu ese ita dekenai ia hadibaia gaudia ibounai ena Badina​—ita badinaia.​—Ioa. 8:28.

8. Keriso ena taravatu ena badina be dahaka?

⁸ Idia karaia namonamo rumana be badina goadana latanai idia haginia be namo, unai amo ia lalonai idia noho taudia be mai gari lasi ida idia noho namonamo. Unai hegeregerena, taravatu namona ena badina be ia goada dainai unai taravatu idia badinaia taudia be idia noho namonamo bona idia gari lasi. Keriso ena taravatu ena badina goadana be​—lalokau. Dahaka dainai unai bamona ita gwau?

9-10. Dahaka gaudia ese idia hahedinaraia Iesu be taunimanima ia lalokau henia, bona edena dala ai ia ita tohotohoa diba?

⁹ Gau ginigunana be, Iesu ia karaia gaudia ibounai lalonai lalokau ia hahedinaraia. Hebogahisi be lalokau karana. Iesu be unai hebogahisi karana dainai, taunimanima ia haroro henia, gorere taudia ia hanamoa, hitolo taudia ia ubua bona mase taudia ia hatorea isi lou. (Mat. 14:14; 15:32-38; Mar. 6:34; Luka 7:11-15) Herevana ia karaia gaudia ese ena nega bona goada ia haorea, to Iesu be mai ura bada ida ma haida edia namo ia atoa guna. Ia karaia gauna badana be, taunimanima ia lalokau henia bada dainai ia sibona ena mauri ia henia.​—Ioa. 15:13.

¹⁰ Ita dibaia gaudia: Ita sibona iseda namo ita laloa lasi to ma haida edia namo ita laloa bada karana amo Iesu ena haheitalai ita tohotohoa. Danu, iseda teritori ai idia noho taudia dekenai hebogahisi ita hahedinaraia karana amo Iesu ena haheitalai ita tohotohoa. Taunimanima ita hebogahisi henia dainai sivarai namona ita harorolaia bona hadibaia neganai, ita be Keriso ena taravatu ita badinaia.

11-12. (a) Dahaka ese ia hahedinaraia Iehova ese ita ia laloa bada? (b) Edena dala ai Iehova ena lalokau karana ita tohotohoa diba?

¹¹ Gau iharuana be, Iesu be ena Tamana ena lalokau ia hahedinaraia. Iesu be ena haroro gaukara lalonai, ia hahedinaraia Iehova be ia idia tomadiho henia taudia ia laloa bada. Iesu ese ia hadibaia gaudia ma haida be inai: Iseda guba Tamana vairanai ita ta ta be dava bada gaudia bamona. (Mat. 10:31) Kongrigeisen idia rakatania taudia be idia helalo-kerehai bona kongrigeisen dekenai idia giroa lou neganai Iehova be mai ena ura ida idia ia abia dae. (Luka 15:7, 10) Iehova be ena lalokau ia hahedinaraia dalana be, ita totona ena Natuna ia henia boubou gauna bamona.​—⁠Ioa. 3:16.

¹² Ita dibaia gaudia: Edena dala ai Iehova ena lalokau karana ita tohotohoa diba? (Efe. 5:1, 2) Iseda tadikaka taihu be dava bada gaudia bamona ita laloa. Bona “ia boio vadaeni mamoe bamona” tadikaka o taihu ta be Iehova dekenai ia giroa lou neganai mai moale ida ia ita welkam henia. (Sal. 119:176) Namona be ita hahedinaraia iseda tadikaka taihu ita lalokau henia bona hekwakwanai idia davaria neganai, iseda nega bona goada ita henia idia ita durua totona. (1 Ioa. 3:17) Bema mai lalokau ida ma haida ita kara henia ita be Keriso ena taravatu ita badinaia unai.

13-14. (a) Ioane 13:34, 35 ena hereva bamona, Iesu ese iena murinai idia raka taudia ia hagania dahaka idia karaia totona, bona dahaka dainai unai be taravatu matamatana? (b) Edena dala ai unai taravatu matamatana ita badinaia diba?

¹³ Gau ihatoina be, Iesu be iena murinai idia raka taudia ia hadibaia lalokau idia hahedinaraia totona. (Ioane 13:34, 35 duahia.) Iesu ese ia henia taravatu be taravatu matamatana, badina ia lalonai iseda tadikaka taihu lalokau henia dalana ia hahedinaraia, to Dirava ese Israela taudia dekenai ia henia Taravatu henunai unai ia noho lasi: Iesu ese ita ia lalokau henia hegeregerena, iseda tadikaka taihu ita lalokau henia. * Unai ita karaia  totona, lalokau be mai anina bada. Anina be, iseda tadikaka taihu totona iseda mauri ita henia, Iesu be ita totona ena mauri ia henia hegeregerena.

¹⁴ Ita dibaia gaudia: Edena dala ai taravatu matamatana ita badinaia? Iseda tadikaka taihu durua totona ita sibona eda ura gaudia ita dadaraia. Idia ita lalokau henia dala badana be idia totona iseda mauri ita henia diba. To ma dala idauidau ai idia ita durua diba. Keriso ena taravatu ita badinaia daladia haida be inai, hegeregere: Iseda motuka amo tadikaka o taihu burukana ta be hebou totona ita abia lao, eiava ita sibona hamoalea karana ta ita dadaraia bona mai eda ura ida ta ita hamoalea o durua, eiava iseda moni gaukara amo holidei ita abia bona disasta idia davaria gabudia ai heduru ita henia. Unai ita karaia neganai iseda kongrigeisen ai idia noho tadikaka bona taihu ita durua unai amo mai moale ida do idia noho namonamo.

15-17. (a) Edena dala ai Iesu ese ena kara amo ia hahedinaraia ia be hahemaoro maoro karana ia hahedinaraia? (b) Edena dala ai Iesu ita tohotohoa diba?

¹⁵ Inai hereva “hahemaoro” be Baibel ai ia noho, ena anina be Dirava ena kota lalonai ia karaia gaudia ibounai be maoro bona ta ena toana ia laloa lasi. Dahaka dainai ita gwau diba Keriso ena taravatu ese hahemaoro maoro ia hahedinaraia?

¹⁶ Iesu ese ena kara amo hahemaoro maoro ia hahedinaraia dalana mani ita laloa guna. Iesu ena negai, Iuda tomadiho gunalaia taudia ese Iuda lasi taudia bona diba bada lasi Iuda taudia idia inai henia bona hahine idia matauraia lasi. To Iesu be taunimanima edia toana ia laloa lasi bona idia ibounai ia kara namo henia. Mai abidadama ida ia idia badinaia Iuda lasi taudia ia abia dae. (Mat. 8:5-10, 13) Taga taudia bona ogogami taudia ia haroro henidia. (Mat. 11:5; Luka 19:2, 9) Iesu be hahine ibounai ia kara auka henidia lasi eiava idia ia hereva dika henia lasi. Bona ia be hahine ibounai bona ma haida ese idia gwauraia dika hahine ibounai danu ia matauraia bona ia hebogahisi henia.​—Luka 7:37-39, 44-50.

¹⁷ Ita dibaia gaudia: Iesu ita tohotohoa diba, anina be taunimanima edia toana ita laloa lasi bona sivarai namona idia ura kamonai taudia ita haroro henia​—herevana taga eiava ogogami taudia eiava edia tomadiho be idauidau. Keristani tatau be hahine ibounai idia matauraia karana amo Iesu ena haheitalai idia tohotohoa. Bema unai ita karaia ita be Keriso ena taravatu ita badinaia.

18-19. Iesu ese edena dala ai ma haida ia kara henia, bona unai amo dahaka ita dibaia?

¹⁸ Hari do ita herevalaia gauna be, Iesu ese hahemaoro karaia dalana ia hadibaia. Ia ese hakaua herevadia amo ia murinai idia raka taudia ia hadibaia unai amo idia ese ma haida do idia kara namo henidia. Hegeregere, Baibel ese ita dekenai ma haida kara henia dalana ia hadibaia. (Mat. 7:12) Ita ura ma haida ese ita idia kara namo henia. Unai dainai ma haida ita kara namo henia danu be namo. To bema haida ese ita idia kara auka henia dahaka ita laloatao be namo? Iesu ese iena murinai idia raka taudia ia hadibaia namona be idia abia dae Iehova ese ena “abia hidi taudia, dina bona hanuaboi ai ia idia taitai henia taudia totona, kota maorona do ia karaia.” (Luka 18:6, 7) Unai be gwauhamata herevana: Iseda hahemaoro do ia karaia Diravana ia diba ita be inai dina gabediai hisihisi ita davaria noho bona ia ese ita totona nega korikori ai hahemaoro maorona do ia karaia.​—⁠2 Tes. 1:6.

¹⁹ Ita dibaia gaudia: Bema Iesu ena hakaua herevadia ita badinaia, ita ese ma haida do ita kara namo henia. Bona bema Satani ena tanobada ai taunimanima ese ita idia kara auka henia, namona be ita diba momokani Iehova ese ita totona idia do ia hahemaoro henia.

20-21. (a) Maduna idia abia taudia ese edena dala ai ma haida idia kara henia be namo? (b) Ruma bese ai tau ese edena dala ai ena adavana bona ena natudia ia lalokau henia bona ia kara henia?

²⁰ Keriso ena taravatu henunai maduna idia  abia taudia ese edena dala ai ma haida idia kara henia be namo? Lalokau be unai taravatu ena badina dainai, namona be maduna idia abia taudia ese edia ruma bese bona kongrigeisen taudia idia matauraia bona lalokau henia. Namona be idia laloatao, Keriso ia ura ita karaia gaudia ibounai lalonai lalokau ita hahedinaraia.

²¹ Ruma bese ai. “Keriso ese kongrigeisen dekenai ia karaia bamona” tau ese ena hahine ia lalokau henia be namo. (Efe. 5:25, 28, 29) Namona be tau ese Keriso ena lalokau karana ia tohotohoa, anina be iena adavana ena ura bona ia laloa bada gaudia ia atoa guna. Tatau haida dekenai unai be ia auka edia adavana dekenai inai kara idia hahedinaraia totona, badina reana idia tubu daekau neganai, ma haida kara namo henia bona lalokau henia dalana idia manadalaia lasi. Eiava ia auka edia kara gunadia idia rakatania totona, to namona be idia hekwarahi edia mauri lalonai senisi idia karaia unai amo Keriso ena taravatu idia badinaia diba. Tau ese ena adavana ia lalokau henia neganai, ena hahine ese ia do ia matauraia. Tama ta be ena natudia ia lalokau henia dainai ena kara bona hereva amo idia do ia dagedage henia lasi. (Efe. 4:31) To, ena natudia dekenai ia hahedinaraia idia ia lalokau henia bona lalonamo henia, unai amo ena natudia be do idia gari lasi bona do idia noho namonamo. Unai bamona ia karaia tama be ena natudia ese do idia lalokau henia bona matauraia bada.

22. Petero Ginigunana 5:1-3 ena hereva bamona, “mamoe” be daika ena, bona edena dala ai elda taudia ese idia kara henia be namo?

²² Kongrigeisen ai. Namona be elda taudia idia laloatao, “mamoe” idia biagua lasi. (Ioa. 10:16; 1 Petero 5:1-3 duahia.) Baibel ai inai hereva rua “Dirava ena mamoe oreana,” bona “Dirava ese umui dekenai ia henia taudia” ese ia hahedinaraia kongrigeisen ai idia noho tadikaka taihu be Dirava ena mamoe. Ia ura elda taudia ese mai lalokau bona hebogahisi ida ena mamoe idia kara henia. (1 Tes. 2:7, 8) Unai bamona idia karaia elda taudia be Iehova ena lalonamo idia abia. Danu edia tadikaka taihu ese idia lalokau henidia bona matauraia bada.

23-24. (a) Bema ta be Iehova tomadiho henia karana lalonai taravatu ia utua, elda taudia be dahaka do idia karaia? (b) Elda taudia be hahemaoro idia karaia neganai dahaka idia laloatao be namo?

 ²³ Bema kongrigeisen ai ta be Dirava ena taravatu utua karana ta ia karaia, elda taudia be dahaka do idia karaia? Edia gaukara be ia idau, Dirava ese Israela taudia edia negai Taravatu henunai idia noho hahemaoro taudia bona gunalaia taudia edia gaukara amo. Anina be idia ese taravatu henunai, Dirava ena taravatu utua karadia ena hahemaoro sibona idia karaia lasi, to bema Dirava ena hesiai tauna ta be ia noholaia tanona ena taravatu ia utua bona raskol karadia lalonai ia vareai, unai tauna idia hahemaoro henia danu. Bema ta be Iehova tomadiho henia karana lalonai taravatu ia utua, Keriso ena taravatu hegeregerena, elda taudia ese ia idia hahemaoro henia. To idia diba Dirava ese gavamani taudia, hegeregere, pulisi taudia dekenai unai gaukara ia henia, idia ese tano ena taravatu ia utua bona raskol karadia lalonai ia vareai tauna idia hahemaoro henia totona. Danu, idia be mai edia maoro kerere idia karaia taudia idia panisia o dibura ruma dekenai idia atoa.​—⁠Roma 13:1-4.

²⁴ Bema ta be Iehova tomadiho henia karana lalonai taravatu ia utua, elda taudia be dahaka do idia karaia? Idia ese Baibel idia gaukaralaia Dirava ena taravatu ia utua tauna ena kara dika idia tahua namonamo bona abia hidi idia karaia. Danu idia laloatao, Keriso ena taravatu ena badina be lalokau. Lalokau dainai elda taudia be inai gaudia idia laloa: Dahaka do idia karaia unai amo kara dika dainai hisihisi idia abia taudia idia durua totona? Elda taudia ese kara dika ia karaia tauna idia hahemaoro henia totona, inai henanadai do idia lalohadailaia: Ia helalo-kerehai momokani, a? Ia ai durua diba iena hetura karana Iehova ida ia hanamoa lou totona, a?

25. Stadi atikol 19 ese edena henanadai do ia haerelaia?

²⁵ Keriso ena taravatu ita badinaia neganai do ita moale! Bema ita ibounai ita gaukara goada unai taravatu ita badinaia, kongrigeisen ai idia noho tadikaka taihu huanai lalokau do ia noho, do idia mamia idia ita laloa bada bona do idia noho namonamo. To, hari ita noholaia nega lalonai “kara dika taudia” be “edia kara dika do idia habadaia momokani.” (2 Tim. 3:13) Namona be ita naria namonamo. To bema ta be child sexual abuse eiava sex karana amo natu maragina ta ia hadikaia, edena dala ai Keristani kongrigeisen taudia ese Dirava ena hahemaoro maoro karana idia hahedinaraia? Stadi atikol 19 ese unai henanadai do ia haerelaia.