1. Ovikwaye 2 mbi matu yenene okutjiwa?

JEHOVA MUKURU wa suvera ovakarere ve. Eye we ve suvera nu me ve suvere nga aruhe. Eye wina wa suvera ousemba. (Eps. 33:5) Kunao matu yenene okutjiwa oviṋa 2 mbi: (1) Jehova u hihamwa omutima indu ovakarere ve tji mave tjindwa navi. (2) Eye ma tjiti kutja pe kare ousemba. Morupa orutenga rongongorasaneno ndji, * twe rihonga kutja Omatwako Mukuru nga yandja kOvaisrael okupitira mu Moses ya zikamenene korusuvero. Oyo aaye tunduuza ovandu okutjinda ovandu avehe nousemba, nandarire imba ovingundi. (Deut. 10:18) Omatwako ngo ya raisa kutja Jehova tjiri u rikendera kovakarere ve.

2. Omapuriro yeṋe ngu matu kazira?

² Omatwako wa Moses yaanda mombura ndji 33 O.Z. indu ombongo yOvakriste tji ya zikamisiwa. Hapo ihi matji hee kutja Ovakriste kava ri netwako nda zikamena korusuvero nu ndaa ri tunduuza ousemba? Kako katjiperi! Ovakriste va ri netwako epe. Morupa ndwi, matu kakonḓonona kutja etwako epe ndo ra ri riṋe. Nu matu kazira omapuriro nga: Ongwaye tji matu tja etwako ndo ra zikamena korusuvero? Nu ongwaye tji matu tja ri tunduuza okutjita ousemba? Kehi yetwako ndi, imba mbe ri mouvara mave sokutjinda vi varwe?

3. Otja kOvagalate 6:2, “etwako ra Kristus” ri kamburira mo ye?

³ Lesa Ovagalate 6:2. Ovakriste ve ri kehi ‘yetwako ra Kristus.’ Jesus kena pa tjanga ondeto yozoveta kovemukongorere,  posi yokutja we ve pa omirari nomatwako okuvehongorera po. “Etwako ra Kristus” ri kamburira mo oviṋa avihe Jesus mbyaa hongo. Kutja tu zuve etwako ndi nawa, ngatu tare koviṋa mbi mavi kongorere mba.

4-5. Omomiano viṋe Jesus maa hongo, nu oruṋe tjaa hongo?

⁴ Omomiano viṋe Jesus maa hongo? Otjitenga, eye aa hongo ovandu moviṋa mbyaa hungire. Omambo we ya ri nomasa mena rokutja aa hungire ouatjiri ohunga na Mukuru, ouatjiri ohunga nondando yokuhupa, nokutja Ouhona wa Mukuru ombu mau kaisapo omauzeu aehe wovandu. (Luk. 24:19) Jesus wina wa raisa otjihorera otjiwa. Ongaro ye yehupo aai raisire ovemukongorere kutja mave sokuhupa vi.​—Joh. 13:15.

⁵ Jesus aa hongo ruṋe? Eye aa hongo motjiungura tje tjokuzuvarisa indu tja ri kombanda yehi. (Mat. 4:23) Eye wina wa honga ovemukongorere ve ousupi tja za nokupendurwa. Otjotjihorera, eye we rimuinikisa kovahongewa ve votjivarero tjokombanda ape 500, nu we ve pa erakiza rokutja ngave “kaise po ovandu ovahongewa.” (Mat. 28:19, 20; 1 Kor. 15:6) Otjotjiuru tjombongo, Jesus wa kayenda komurungu okuhonga ovahongewa ve tja za nokuyaruka keyuru. Otjotjihorera, ape mombura ndji 96 O.Z., Kristus wa hinga omuapostele Johanes okutunduuza nokuyandja omaronga kOvakriste ovatwirisiwa.​—Kol. 1:18; Omavan. 1:1.

6-7. (a) Oviṋa Jesus mbyaa hongo vya tjangwa pi? (b) Omomiano viṋe mu matu ṱakamisa etwako ra Kristus?

⁶ Oviṋa Jesus mbyaa hongo vya tjangwa pi? MOmaevangeli 4 mwa tjangwa oviṋa ovingi Jesus mbya hungira nokutjita tja ri kombanda yehi. Omatjangwa aehe mEtestamente Epe, ye tu vatera kutja tu zuve nawa omeripura wa Jesus mozongaro pekepeke, mena rokutja imba mba tjanga va hingwa i yombepo ondjapuke nu va ri “nOmbepo ya Kristus,” poo ouripura we.​—1 Kor. 2:16.

⁷ Matu rihongo tjike: Omahongero wa Jesus ye ṱuna kozongaro azehe mehupo retu. Kunao etwako ra Kristus ri ṱuna koviṋa avihe mbi tu tjita ponganda, poviungura poo poskole, na mombongo. Eṱe tu rihonga etwako ndi mokulesa Omatjangwa wEtestamente Epe nokuripurira ko oukoto. Tu ṱakamisa etwako ndi mokuhupa otja  komarakiza nomirari mbi ri mOmbeibela. Indu tji matu ṱakamisa etwako ra Kristus, tu kara nonḓuviro ku Mukuru Jehova, ngu ri ombwiro ya imbi avihe Jesus mbyaa hongo.​—Joh. 8:28.

8. Etwako ra Kristus ra zikamena ku ye?

⁸ Ondjuwo ndja tungwa nawa nu ndji nomazikameno womasa i tjita kutja imba mbe kara muyo ve kare mondjeverero. Momuano otjingewo, etwako ndi nomazikameno omawa ri vatera imba mbe ri ṱakamisa okukara mondjeverero. Etwako ra Kristus ra zikamena korusuvero. Ongwaye tji matu tja nao?

9-10. Ovihorera viṋe mbi mavi raisa kutja Jesus aa hingwa i yorusuvero, nu matu horere vi ku ye?

⁹ Otjitenga, Jesus aa hingwa i yorusuvero okutjita oviṋa avihe mbyaa tjiti. Okuṱondjenda poo otjari, omuano wokuraisa orusuvero. Mena rokutja aa ṱondjenda novandu, Jesus wa honga otjimbumba tjovandu, wa verukisa ovavere, wa yandja ovikurya ku imba mba ri nondjara, nokupendura ovaṱi. (Mat. 14:14; 15:32-38; Mar. 6:34; Luk. 7:11-15) Nandarire kutja okutjita oviṋa mbi aa ku kambura oruveze rwe oruingi nomasa we, eye aa twapo ozonḓero za varwe poruveze orutenga. Kombanda yoviṋa avihe mbi, Jesus we tu raisira orusuvero orunenenene mokuyandja omuinyo we mena ra varwe.—Joh. 15:13.

¹⁰ Matu rihongo tjike: Eṱe matu yenene okuhorera ku Jesus mokutwapo ozonḓero za varwe poruveze orutenga. Wina matu yenene okuhorera ku ye mokuraisa otjari kovandu motjiungura tjokuzuvarisa. Otjari otja iho tji tu hinga okuzuvarisa nokuhonga ombuze ombwa, momuano mbwi tu ṱakamisa etwako ra Kristus.

11-12. (a) Ovikwaye mbi raisa kutja Jehova tjiri u rikendera kweṱe? (b) Matu horere vi korusuvero rwa Jehova?

¹¹ Otjitjavari, Jesus wa raisa orusuvero rwa Ihe. Motjiungura tje tjokuzuvarisa, Jesus wa raisa omuano Jehova tjiri me rikendera kovakarere ve. Eye wina wa honga kutja, auhe wetu omunanḓengu ku Tate wetu womeyuru. (Mat. 10:31) Jehova u nonḓero yokuyakura onḓu ndja pandjara nu ndje ritanaura komauvi wayo nai kotoka kombongo. (Luk. 15:7, 10) Jehova we tu raisira orusuvero mokuyandja Omuna we otjotjisuta tjonguturiro mena retu.​—Joh. 3:16.

¹² Matu rihongo tjike: Matu horere vi korusuvero rwa Jehova? (Ef. 5:1, 2) Eṱe tu vara ovakambure ovakwetu otja ovananḓengu, nu tu yakura “onḓu ndja pandjara” nondjoroka ndja kotoka ku Jehova. (Eps. 119:176) Tu raisa kutja twa suvera ovakambure ovakwetu mokuungurisa oruveze nomasa wetu okuvevatera, tjinenenene indu tji ve ri mouhepe. (1 Joh. 3:17) Indu tji matu raisa orusuvero ku varwe, tu ṱakamisa etwako ra Kristus.

13-14. (a) Otja ku Johanes 13:34, 35, Jesus wa rakiza ovemukongorere okuraisa tjike, nu ongwaye etwako ndo tji riri epe? (b) Omomuano uṋe mu matu ṱakamisa etwako epe ndi?

¹³ Otjitjatatu, Jesus wa rakiza ovemukongorere okusuvera ovakwetu otja tje ve suvera. (Lesa Johanes 13:34, 35.) Etwako ra Jesus ndo epe, mena rokutja tu hepa okuraisa orusuvero momuano Jesus ma suverere ovemukongorere, indi Etwako Mukuru nde hina waandjere kOvaisrael. Etwako ndo ri kamburira mo okusuvera varwe tjimuna Jesus. * Eṱe twa sokusuvera ovakambure ovakwetu nandarire okukapita eṱe oveni. Twa sokuvesuvera tjinene nga pondondo yokutja matu yenene okuyandja omuinyo wetu mena rawo, tjimuna Jesus tje tu tjitira.

¹⁴ Matu rihongo tjike: Omomuano uṋe mu matu ṱakamisa etwako epe ndi? Omokutjita ozongondjero okuvatera ovakambure ovakwetu. Eṱe katu vatere moviṋa ovinene uriri, tjimuna okuyandja omuinyo wetu mena rawo, nungwari wina tu ve vatera moviṋa oviṱiṱi. Otjotjihorera,  indu tji matu tjiti ozongondjero aruhe okutwara omukambure omukurundu kozombongarero zombongo, poo tji twa isa oviṋa mbi twa suvera okutjita kutja tu yorokise varwe, nokuungurisa omayuva wetu womasuviro okuvatera imba mba wirwa i oumba, okutjita oviṋa otja imbi ku raisa kutja tu ṱakamisa etwako ra Kristus. Wina tu vatera kutja ombongo i rire oruveze omundu auhe mu ma munu kutja u ri mondjeverero.

15-17. (a) Omomiano viṋe ovitjitwa vya Jesus mu vya raisa oumune we ohunga nousemba? (b) Matu horere vi ku Jesus?

¹⁵ Embo ndi “ousemba,” otja tji ra ungurisiwa mOmbeibela ri heya okutjita oviṋa Mukuru mbye vara kutja ovisemba nokuhinondoorora. Ongwaye tji matu tja etwako ra Kristus ri tunduuza ousemba?

¹⁶ Otjitenga, ripura kutja ovitjitwa Jesus mbyaa tjiti vya raisa vi oumune we ohunga nousemba. Indu tja ri kombanda yehi, ovahonge vOvajuda va tondere imba avehe mbe ha ri Ovajuda. Nu owo wina va tondere ovajuda ovasyona, nu kava ri nondengero kovakazendu. Nungwari Jesus aa tjindi ovandu avehe nokuhinombangu. Eye aa yakura ovandu mba ri nongamburiro mu ye nandarire kutja kava ri Ovajuda. (Mat. 8:5-10, 13) Eye aa zuvarisa nokuhinombangu kovandu avehe, ovatumbe poo ovasyona. (Mat. 11:5; Luk. 19:2, 9) Eye kena pa tjinda ovakazendu momuano omuvi. Nungwari ee ve tjindi nondengero na momuano omuwa, nandarire imba mbaave varwe pondondo yokehi.​—Luk. 7:37-39, 44-50.

¹⁷ Matu rihongo tjike: Matu yenene okuhorera ku Jesus mokutjinda varwe nokuhinombangu nokuzuvarisa kovandu avehe mbe nonḓero yokupuratena, nandarire kutja ovatumbe poo ovasyona, poo ve ri mozongamburiro zarwe. Ovarumendu Ovakriste ve horera kotjihorera tja Jesus mokutjinda ovakazendu nondengero. Eṱe tji matu tjiti oviṋa otja imbyo, tu ṱakamisa etwako ra Kristus.

18-19. Jesus wa honga tjike ohunga nousemba, nu matu rihongere ko tjike okuza komahongero we?

¹⁸ Otjitjavari, ripura kutja Jesus aa hongo tjike ohunga nousemba. Eye wa honga ovemukongorere omirari mbi mavi ve vatere okutjinda varwe nokuhinombangu. Otjotjihorera, ripura nerakiza rokutja atjihe tji mo vanga kutja tji tjitwe kove nga rire tji wa tjiti ku varwe. (Mat. 7:12) Atuhe tu vanga okutjindwa nawa. Kunao, tu sokutjinda varwe nawa wina. Tji twa tjiti nao, owo mape ya ave tu tjindi nawa wina. Nu hapo tjike tji twa tjindwa navi? Jesus wina wa honga ovemukongorere okukara nongamburiro kutja Jehova ma ‘tjitire ovatoororua ve ousemba mbu mave ku ku Ye omutenya nouṱuku.’ (Luk. 18:6, 7, EEP) Omambo ngo tjiri omakwizikiro wokutja Mukuru wetu wousemba u muna omauzeu ngu tu muna momayuva omasenina nga, nu ma yeta ousemba moruveze ndu ri ro.​—2 Tes. 1:6.

¹⁹ Matu rihongo tjike: Indu tji matu ṱakamisa omirari Jesus mbya honga matu yenene okutjinda varwe nokuhinombangu. Indu tji twa tjindwa momuano omuhasemba mouye wa Satan mbwi, matu yenene okumuna omahuhumiṋino mokutjiwa kutja Jehova ma katjita kutja pe kare ousemba.

20-21. (a) Imba mbe ri mouvara mave sokutjinda vi varwe? (b) Omurumendu u raisa vi orusuvero tjimuna Jesus, nu eye u sokutjinda vi ovanatje ve?

²⁰ Kehi yetwako ra Kristus, imba mbe ri mouvara mave sokutjinda vi varwe? Mena rokutja orusuvero ondu ri omazikameno wetwako ndi, imba mbe ri mouvara mave sokutjinda imba mbe ri kehi yawo nondengero na momuano worusuvero. Owo mave sokuzemburuka kutja Kristus u vanga kutja tu raise orusuvero moviṋa avihe mbi matu tjiti.

 ²¹ Meṱunḓu. Omurumendu ma sokusuvera omukazendu we “otja Kristus punga a suverere ombongo.” (Ef. 5:25, 28, 29) Omurumendu ngwa suvera omukazendu we momuano mbo, u sokutwapo ozonḓero zomukazendu we poruveze orutenga. Kovarumendu tjiva mape ya ai rire ouzeu okuraisa orusuvero otja indo, ngahino mena rokutja ve kurisiwa mombazu yovandu mu ve ha tjindasana nousemba nu norusuvero. Mape ya ai rire ouzeu ku wo okurundurura ongaro ndjo, posi yokutja mave sokutjita omarundurukiro ngo kokutja ve ṱakamise etwako ra Kristus. Omurumendu ngu raisa orusuvero rwomeriyandjerero u muna ondengero okuza komukazendu we. Ihe ngwa suvera ovanatje ve tjiri kamaa roro okuvehihamisa nomambo omavi poo moviṋa mbi ma tjiti. (Ef. 4:31) Moruveze rwanao, eye u raisira ovanatje ve momiano pekepeke kutja we ve suvera, imbi vi tjita kutja owo ve mune kutja ve ri mondjeverero ombwa. Ihe otja ingo u muna orusuvero nondengero okuza kovanatje ve.

22. Otja ku 1 Petrus 5:1-3, ‘ozonḓu’ oza uṋe, nu ze sokutjindwa momuano uṋe?

²² Mombongo. Ovanene vombongo mave sokuzemburuka kutja ‘ozonḓu’ ka zawo. (Joh. 10:16; lesa 1 Petrus 5:1-3.) Omambo nga ‘orupanda rwa Ndjambi,’ na inga “imba mbu mwa pewa okuṱakamisa” i Mukuru, ye zemburukisa ovanene vombongo kutja ozonḓu oza Jehova. Eye u vanga kutja ozonḓu ze, ze tjindwe norusuvero nomutima omutarazu. (1 Tes. 2:7, 8) Ovanene vombongo mbe ṱakamisa omerizirira wawo otjovarise vombongo ve yakurwa i Jehova. Ovanene vombongo otja imbo wina ve muna orusuvero nondengero okuza kovakambure ovakwao.

23-24. (a) Omerizirira waye ovanene vombongo ngu ve na wo indu omundu mombongo tja tjiti ouvi ounene? (b) Ovanene vombongo mave sokuzemburuka ye indu tji mave ṱunu oviṋa otja imbyo?

²³ Ovanene vombongo mave sokutjita vi indu omukambure tja tjiti ouvi ounene? Otjiungura tjovanene vombongo tja panguka ku ihi tjovapangure  novanene mba ri kehi yOmatwako Mukuru nga yandjere kOvaisrael. Kehi yOmatwako ngo, ovarumendu mba toororerwe kaave kara norupa moviṋa mbi mavi tjama nomerikotameneno ku Jehova uriri, nungwari wina aave kara norupa moviṋa mbi hi notjiṋa nomerikotameneno ku Jehova. Posi yokutja kehi yetwako ra Kristus, ovanene vombongo mave sokukara norupa moviṋa mbi mavi tjama nomerikotameneno ku Jehova uriri. Owo ve tjiwa kutja ovahonapare va pewa ouyara okuza ku Mukuru okukara nomerizirira wokupangura oviposa nozondjito zoutwe. Imbi vi kamburira mo ouyara wokuyandja omberero yotjimariva poo okupatera omutjite wouvi monḓorongo.​—Rom. 13:1-4.

²⁴ Omerizirira waye ovanene vombongo ngu ve na wo indu omundu mombongo tja tjiti ouvi ounene? Owo ve ungurisa Omatjangwa okukonḓonona oviṋa mbi nokutoorera ko omikambo. Nu ve zemburuka kutja etwako ra Kristus ra zikamenena korusuvero. Orusuvero ru hinga ovanene vombongo okutara komapu nga: Ovikwaye mbi mavi heperwa po okutjitwa okuvatera omundu auhe mombongo ngwa tatumisiwa? Ohunga nomutjite wouvi, orusuvero ru hinga ovanene vombongo okutara komapu nga: Hapo eye we ritanaura? Matu yenene okumuvatera okuṱuna oupanga we kuna Jehova?

25. Orupa ndu ma ru kongorere ko ma ru ka hungirira ku tjike?

²⁵ Tjiri tu nondangi kutja tu ri kehi yetwako ra Kristus! Indu auhe wetu tja kondjo oukukutu okuṱakamisa etwako ndo, matu vatera kutja ombongo i rire oruveze omundu auhe mu ma munu kutja wa suverwa, omunanḓengu nu u ri mondjeverero. Nandarire kutja tu hupa mouye “ovandu ovarunde” mu ve ‘ryamena ko mouvi.’ (2 Tim. 3:13) Kunao, matu sokukara katumba. Omomuano uṋe ombongo yOvakriste mu mai yenene okuraisa ousemba wa Mukuru indu tji mave ṱunu omatjerero wovanatje? Orupa ndu ma ru kongorere ko ma ru ziri epuriro ndi.