1. Ohatu dulu okukala noushili woinima ivali ilipi?

JEHOVA KALUNGA oku hole ovo have mu longele. Okwa kala e va hole, nota kala e va hole fiyo alushe. Oku hole yo ouyuki. (Eps. 33:5) Onghee ohatu dulu okukala noushili woinima ivali: (1) Ohashi yahameke Jehova ngeenge ovapiya vaye tava ungaungiwa navo shihe li pauyuki. (2) Ota ka shilipaleka kutya aveshe otava ka ungaungiwa navo pauyuki. Moshitukulwa shotete shomoitukulwa ei, * otwe lihonga kutya Omhango oyo Kalunga a li a pa Ovaisrael okupitila muMoses oya li ya kanghamena kohole. Oya li ya ladipika ovanhu va ungaunge navakwao pauyuki nokuli naavo va li ihava dulu okuliamena. (Deut. 10:18) Omhango oya li ya ulika kutya Jehova oku na ko nasha unene naavo have mu longele.

2. Omapulo elipi hatu ka nyamukula?

² Omhango yaMoses oya li ya xula po mo 33 O.P. eshi eongalo lopaKriste la totwa po. Mbela omhango oyo ya kanghamena kohole notai xumifa komesho ouyuki, otai ka kala ngoo inai amena Ovakriste? Ahowe. Ovakriste ova li va pewa omhango ipe, omhango yaKristus. Moshitukulwa eshi, ohatu ka kundafana kutya omhango ipe oilipi po. Opo nee hatu ka nyamukula omapulo aa: Omolwashike hatu tile kutya omhango oyo oya kanghamena kohole? Omolwashike hatu tile kutya otai xumifa komesho ouyuki? She likolelela komhango oyo, ovo ve na eenghonopangelo ove na okuungaunga ngahelipi novanhu?

3. “Omhango yaKristus,” oyo ya tumbulwa mOvagalati 6:2, oya kwatela mo shike?

³ Lesha Ovagalati 6:2. Ovakriste ove li koshi ‘yomhango yaKristus.’ Jesus ka li a shangela ovashikuli vaye omusholondodo weemhango, ashike okwa li e va pa omalombwelo, oipango nosho yo omafinamhango oo tae va wilike. “Omhango yaKristus” oya kwatela mo ashishe osho Jesus a honga. Moutendo tava shikula ko, ohatu ke lihonga shihapu shi na sha nomhango oyo.

4-5. Omeenghedi dilipi Jesus a li a honga ovanhu, nonaini e shi ninga?

⁴ Omeenghedi dilipi Jesus a li a honga ovanhu? Yotete, okwa li a honga ovanhu okupitila meendjovo daye. Eendjovo daye odi na eenghono molwaashi oda popya oshili kombinga yaKalunga, elalakano lashili li na sha nonghalamwenyo, nosho yo kutya Ouhamba waKalunga oo ashike tau ka xulifa po okumona oixuna kwovanhu. (Luk. 24:19) Jesus okwa honga yo okupitila moshihopaenenwa shaye. Okwa li a ulikila ovashikuli vaye nghee ve na okulihumbata okupitila melihumbato laye. — Joh. 13:15.

⁵ Jesus okwa honga naini? Okwa honga pefimbo loukalele waye kombada yedu. (Mat. 4:23) Okwa honga yo ovashikuli vaye diva konima eshi a nyumuka. Pashihopaenenwa, okwa li e lihololela ongudu yovahongwa vaye, ovo tashi dulika va li ve dulife 500, nokwa li e va pa oshipango shoku ka ‘ninga ovanhu ovahongwa.’ (Mat. 28:19, 20; 1 Kor. 15:6) E li omutwe weongalo, okwa twikila okuwilika ovahongwa vaye konima eshi a shuna meulu. Pashihopaenenwa, lwomo 96 O.P., Kristus okwa li a wilika omuyapostoli Johannes a ka twe omukumo nokuyandja omayele kOvakriste ovavaekwa. — Kol. 1:18; Eh. 1:1.

6-7. (a) Omahongo aJesus okwa shangwa peni? (b) Ohatu dulika ngahelipi komhango yaKristus?

⁶ Omahongo aJesus okwa shangwa peni? Momavangeli ane omu na oinima ihapu oyo Jesus a popya nokwa ninga kombada yedu. Omishangwa dopaKriste dOshigreka dikwao otadi tu kwafele tu mone nghee Jesus ha tale ko oinima, molwaashi ovo ve di shanga ova li va nwefwa mo komhepo iyapuki nova li ve na ‘omadiladilo aKristus.’ — 1 Kor. 2:16.

⁷ Oilihongomwa: Omahongo aJesus otae tu  kwafele monghalamwenyo yetu aishe. Onghee omhango yaKristus ohai kumu keshe osho hatu ningi meumbo, koilonga ile kofikola nosho yo meongalo. Ohatu lihongo omhango oyo mokulesha Omishangwa dopaKriste dOshigreka nokudilonga kudo. Ohatu dulika komhango oyo mokukala metwokumwe nomalombwelo, oipango nosho yo omafinamhango oo e li momishangwa odo. Ngeenge hatu dulika komhango yaKristus ohatu dulika kuKalunga ketu omunahole, Jehova, oo e li Odjo yoinima aishe oyo Jesus a honga. — Joh. 8:28.

8. Omhango yaKristus oya kanghamena koshike?

⁸ Eumbo olo la tungilwa kekanghameno la kola, ohali ningifa ovo ve li mo va kale ve udite va amenwa. Sha faafana, omhango oyo ya tungilwa kekanghameno la kola, ohai kwafele ovo hava dulika kuyo va kale ve udite va amenwa. Omhango yaKristus oya tungilwa kekanghameno la denga mbada, ohole. Omolwashike hatu tile ngaho?

9-10. Oihopaenenwa ilipi tai ulike kutya Jesus okwa li e linyengifwa kohole, nongahelipi hatu dulu oku mu hopaenena?

⁹ Shotete, Jesus okwa li e linyengifwa kohole mukeshe osho a ninga. Onghenda ile olukeno oi li euliko lohole. Molwaashi Jesus okwa li e linyengifwa konghenda ya tya ngaho, okwa li a honga ongudu yovanhu, a velula ovanaudu, a kutifa ovo va fya ondjala, nokwa nyumuna ovafi. (Mat. 14:14; 15:32-38; Mark. 6:34; Luk. 7:11-15) Nonande okuninga oinima ya tya ngaho osha li hashi pula efimbo neenghono daye, okwa li a pitifa komesho eemhumbwe davamwe. Komesho yaaishe, okwa ulika ohole inene eshi a yandja omwenyo waye ponhele yetu. — Joh. 15:13.

¹⁰ Oilihongomwa: Ohatu dulu okuhopaenena Jesus mokupitifa komesho eemhumbwe davamwe. Ohatu dulu yo oku mu hopaenena mokuulikila olukeno ovanhu vomoshitukulwa shetu. Eshi hatu linyengifwa kolukeno tu udife nokuhonga onghundana iwa, ohatu dulika komhango yaKristus.

11-12. (a) Oshike tashi ulike kutya Jehova oku na ko nasha nafye unene? (b) Ongahelipi hatu dulu okuhopaenena ohole yaJehova?

¹¹ Oshitivali, Jesus okwa li a ulika ohole ya fa yaXe. Pefimbo loukalele waye, okwa li a ulika kutya Jehova oku na ko nasha naavo have mu longele. Shikwao vali, okwa honga a ti: Keshe umwe womufye okwa fimana noku na ondilo kuTate yetu womeulu. (Mat. 10:31) Jehova okwa halelela okutambula ko odi oyo ye lidilulula noya alukila keongalo. (Luk. 15:7, 10) Jehova okwe tu ulikila ohole yaye eshi a yandja omona waye e li ekulilo ponhele yetu. — Joh. 3:16.

¹² Oilihongomwa: Ongahelipi hatu dulu okuhopaenena ohole yaJehova? (Ef. 5:1, 2) Otwa tala ko ovamwatate novamwameme va fimana nove na ondilo, nohatu tambula ko ‘odi oyo ya li ya kana’ noya alukila kuJehova. (Eps. 119:176) Ohatu ulike kutya otu hole ovamwatate novamwameme mokulongifa efimbo neenghono detu tu va kwafele unene tuu ngeenge ve li momhumbwe. (Joh. 3:17) Ohatu dulika komhango yaKristus eshi hatu ungaunga navamwe pahole.

13-14. (a) Ngaashi sha popiwa muJohannes 13:34, 35, oshike osho Jesus a lombwela ovashikuli vaye va ulike, nomolwashike shi li oshipango shipe? (b) Ohatu dulika ngahelipi koshipango shipe?

¹³ Oshititatu, Jesus okwa li a lombwela ovashikuli vaye va ulike ohole yokuheliholamwene. (Lesha Johannes 13:34, 35.) Oshipango shaJesus oshipe molwaashi otashi tu pula tu ulike ohole monghedi omo ya li inai ulikwa koshi yOmhango oyo Kalunga a li apa Ovaisrael: Okuhola ovaitaveli vakwetu ngaashi Jesus e tu hole. Osho otashi pula ohole yokuheliholamwene. *  Otwa pumbwa okukala tu hole ovamwatate novamwameme shi dulife nokuli eshi tu lihole fye vene. Natu kale tu va hole fiyo oposhitwa opo hatu dulu oku va yandjela omwenyo wetu, ngaashi Jesus e tu ningila.

¹⁴ Oilihongomwa: Ohatu dulika ngahelipi koshipango shipe? Oku shi popya paunafangwa, omokuningila ovamwatate novamwameme omaliyambo. Ihatu ningi ashike omaliyambo manene, ngaashi okuyandja omwenyo wetu, ndele ohatu ningi yo manini. Pashihopaenenwa, ngeenge ohatu ka tala omumwatate ile omumwameme omunamido pandjikilile e uye kokwoongala, ile twa efa po oshinima shimwe osho tu hole opo tu hafife umwe oo tu hole, ile hatu tula mo efudo koilonga opo tu ka kwafele opo pa holoka oiponga yopaushitwe, ohatu dulika komhango yaKristus. Ohatu kwafele yo mokuninga eongalo letu li kale onhele omo keshe umwe ta dulu okukala e udite a amenwa.

15-17. (a) Eenghatu daJesus oda ulika ngahelipi kutya omuyuki? (b) Ongahelipi hatu dulu okuhopaenena Jesus?

¹⁵ Oshitya “ouyuki” osho sha longifwa mOmbiibeli, osha hala okutya okuninga osho shi li mondjila kuKalunga nopehe na onhondo. Omolwashike hatu tile kutya omhango yaKristus otai xumifa komesho ouyuki?

¹⁶ Shotete, diladila kunghee eenghatu daJesus da ulika kutya omuyuki. Pefimbo laye, ovawiliki vomalongelokalunga Ovajuda ova li ve tonde ovo vehe fi Ovajuda, ve lishii ve dule Ovajuda ovo inava longwa noinava fimaneka ovakainhu. Ashike Jesus okwa li ha ungaunga nakeshe umwe pauyuki noka li e na onhondo. Okwa li ha efa ovo vehe fi Ovajuda ovo ve na eitavelo muye ve mu shikule. (Mat. 8:5-10, 13) Okwa udifila aveshe nopehe na onhondo, ovayamba neehepele. (Mat. 11:5; Luk. 19:2, 9) Ka li e na onyanya ile ha ungaunga nai novakainhu. Mepingafano naasho, okwa li a fimaneka noha ungaunga nombili novakainhu, mwa kwatelwa ovo va li va talika ko vehe na oshilonga. — Luk. 7:37-39, 44-50.

¹⁷ Oilihongomwa: Ohatu dulu okuhopaenena Jesus mokuungaunga navamwe nopehe na onhondo nokuudifila aveshe ovo va hala okupwilikina, kashi na nee mbudi kutya oipuna ile eehepele nonokutya ova dja melongelokalunga lilipi. Ovalumenhu Ovakriste ohava shikula oshihopaenenwa shaye mokuungaunga novakainhu nefimaneko. Ngeenge hatu ningi ngaho, ohatu dulika komhango yaKristus.

18-19. Jesus okwa honga shike kombinga youyuki, noilihongomwa ilipi hatu lihongo mehongo laye?

¹⁸ Oshitivali, diladila osho Jesus a li a honga kombinga youyuki. Okwa honga omafinamhango oo taa kwafele ovashikuli vaye va ungaunge navamwe pauyuki. Pashihopaenenwa, diladila kombinga yefinamhango li na sha nokuungaunga navamwe. (Mat. 7:12) Atushe otwa hala okuungaungiwa nafye pauyuki. Onghee natu ungaunge navamwe pauyuki. Ngeenge otwa ningi ngaho, otashi dulika navo va ungaunge nafye pauyuki. Ndele ongahelipi ngeenge otwa ungaungiwa nafye shihe li pauyuki? Jesus okwa honga yo ovashikuli vaye va kale ve na elineekelo kutya Jehova ota ‘yukifile ovahoololwa vaye oshinima shavo ava have mu ifana pombada omutenya noufiku.’ (Luk. 18:6, 7) Eendjovo odo oda udaneka kutya: Kalunga ketu omuyuki oku shii omayeleko oo hatu shakeneke momafiku a xuuninwa, nota ka ningifa ouyuki u longwe pefimbo laye la wapala. — 2 Tes. 1:6.

¹⁹ Oilihongomwa: Ngeenge otwa shikula omafinamhango oo Jesus a honga, ohatu ka ungaunga navamwe pauyuki. Ngeenge otwa ungaungiwa nafye shihe li pauyuki mounyuni ou waSatana, ohatu dulu okuhekelekwa eshi tu shii kutya Jehova ota ka ningifa tu ungaungiwe nafye pauyuki.

20-21. (a) Ovo ve na eenghonopangelo ove na okuungaunga ngahelipi navamwe? (b) Omushamane oku na okuulika ngahelipi ohole yokuheliholamwene, naxe omudali oku na okuungaunga ngahelipi novana?

²⁰ Koshi yomhango yaKristus, ovo ve na eenghonopangelo ove na okuungaunga ngahelipi navamwe? Molwaashi ohole oi li ekanghameno lomhango oyo, ovo ve na eenghonopangelo ove na okufimaneka ovo tava file oshisho nokuungaunga navo pahole. Nava dimbuluke kutya Kristus okwa hala tu ulike ohole mukeshe shimwe.

²¹ Moukwaneumbo. Omushamane oku na okuhola omukulukadi waye “ngaashi Kristus ha tekula eongalo laye.” (Ef. 5:25, 28, 29) Omushamane na hopaenene ohole yaJesus yokuheliholamwene mokupitifa komesho eemhumbwe nosho yo omauwa omukulukadi waye. Ovalumenhu vamwe otashi dulika va mone shidjuu okuulika ohole ya tya ngaho, molwaashi tashi dulika va kulila momudingonoko omo ovanhu ihava ungaungiwa navo pauyuki nopahole. Otashi dulika shi kale shidjuu kuvo okweefa po onghedindjikilile ya tya ngaho, ashike ove na okuninga omalunduluko opo va dulike komhango yaKristus. Omushamane oo ha ulike ohole yokuheliholamwene oha kala a fimanekwa komukulukadi waye. Xe omudali oo e hole shili ovana vaye ite ke va udifa nai mwaasho ta popi ile ta ningi. (Ef. 4:31) Ponhele yaasho, oha ulikile ovana vaye kutya oku va hole monghedi oyo tai va ningifa va kale ve udite va amenwa. Xe a tya ngaho oha kala e holike nokwa fimanekwa kovana.

22. Ngaashi sha popiwa mu 1 Petrus 5:1-3, “eedi” oda lyelye, nodi na okuungaungiwa nado ngahelipi?

²² Meongalo. Ovakulunhuongalo ove na okudimbuluka kutya “eedi” kadi fi davo. (Joh. 10:16; lesha 1 Petrus 5:1-3.) Outumbulilo “oufita waKalunga,” “koshipala shaKalunga” nosho yo “efyuululo laKalunga” otau dimbulukifa ovakulunhuongalo kutya eedi odaJehova. Okwa hala  eedi daye di ungaungiwe nado pahole nonombili. (1 Tes. 2:7, 8) Ovakulunhuongalo ovo hava ulike ohole ngeenge tava wanifa po oshinakuwanifwa shavo ve li ovafita ohava kala va hokiwa kuJehova. Ovakulunhuongalo va tya ngaho ohava kala yo ve holike nova fimanekwa kovamwatate novamwameme.

23-24. (a) Ovakulunhuongalo otava dana onghandangala ilipi mokuungaunga nomanyono a kwata moiti? (b) Ngeenge ovakulunhuongalo tava ungaunga noinima ya tya ngaho, omapulo elipi ve na okulipula?

²³ Ovakulunhuongalo otava dana onghandangala ilipi mokuungaunga nomanyono a kwata moiti? Onghandangala yavo oya yooloka ko kwaayo yovatokoli noyovakulunhuongalo ovo va li ko pefimbo lOmhango oyo Kalunga a li a pa Ovaisrael. Koshi yOmhango oyo, ovalumenhu ovo va li va nangekwa po kava li ashike hava ungaunga noinima oyo ya pamba eongalo, ndele oinima yo oyo ya li inai pamba eongalo. Ashike koshi yomhango yaKristus, onghandangala yovakulunhuongalo oyo okuungaunga ashike noinima oyo ya pamba eongalo. Ove shii kutya omapangelo opanhu okwa pewa oshinakuwanifwa kuKalunga shokuungaunga nomanyono oo inaa kwatela mo oinima yeongalo. Omapangelo oo okwa teelelwa a yandje ehandukilo ngaashi okufutifa ile okutula modolongo ovanyoni. — Rom. 13:1-4.

²⁴ Ovakulunhuongalo ohava ungaunga ngahelipi naumwe meongalo ngeenge a nyona enyono la kwata moiti? Ohava longifa Omishangwa opo va konakone oshinima nokuninga omatokolo. Ohava kaleke momadiladilo kutya ohole oi li ekanghameno lomhango yaKristus. Ohole ohai linyengifa ovakulunhuongalo ve lipule kutya: Oshike ve na okuninga opo va kwafele oshilyo keshe sheongalo osho sha nyona? Ohole ohai linyengifa ovakulunhuongalo ve lipule kutya: Mbela omunyoni okwe livela ombedi? Mbela ohatu dulu oku mu kwafela a kale vali e na ekwatafano liwa naJehova?

25. Oshike hatu ka kundafana moshitukulwa tashi shikula ko?

²⁵ Inatu pandula tuu eshi tu li koshi yomhango yaKristus! Ngeenge atushe otwa longo noudiinini tu dulike kuyo, ohatu ka kwafela eongalo letu li kale onhele omo keshe umwe ta ka kala e udite e holike, a lengwa nokwaamenwa. Natango otu li mounyuni omo “ovanhu vai” va xuma “komesho mowii.” (2 Tim. 3:13) Natu kale oupafi. Ongahelipi eongalo lopaKriste tali dulu okuhopaenena ouyuki waKalunga ngeenge tali ungaunga nokuhepekwa kwounona pamilele? Oshitukulwa tashi shikula ko otashi ka nyamukula epulo olo.