1. Aˬ htoꞈ ma ve 2 lawn htaꞈ ngaˬ hui yonˍ gʼa ve le?

 Yaˬhoˉvaˬ htaꞈ oˉ kʼoˍ pui ve chaw yawˇ haꞈ ve yoˬ. Yawˇ yawˇ hui htaꞈ co co taiˍ taiˍ haꞈ tuˬ yoˬ. Yawˇ hteˇ ve cawˇ ve htaꞈ kaꞈ haꞈ ve yoˬ. (Chiˇ mvuh ve 33:5) Hkʼe te leh 2 lawn htaꞈ ngaˬ hui yonˍ gʼa ve yoˬ. (1) Yaˬhoˉvaˬ yawˇ ve chaw maˇ hteˇ maˇ cawˇ ve gʼa hpuˇ htaˇ yawˇ nyi ma luˬ jaˇ. (2) Yawˇ ve chaw maˇ hteˇ maˇ cawˇ ve co co taiˍ taiˍ maˇ gʼa hpuˇ, leh keunˍ daꞈ ve hkʼaw ciˍ yanˍ piˇ tuˬ yoˬ tehꞈ yawˇ ka tiꞈ te taˍ ve yoˬ. Laiˉ tawn cawˬ ve awˉ lawˉ teˇ lawn hkʼaw, * Moˉseˍ ve awˬ liˇ tawˇ hkawˇ haꞈ pehnˇ ve geh laˬ ve tehꞈ ngaˬ hui gʼa henˇ ve yoˬ. Awˬ liˇ tawˇ hkawˇ chi teˇ gʼaˇ le le leh awˬ gʼaˇ nuˇ ve awˬ pon kaꞈ yoˬ. (Bon maˍ ve 10:18) Yaˬhoˉvaˬ htaꞈ oˉ kʼoˍ pui ve chaw htaꞈ yawˇ hkʼaˬ hkʼe taw haꞈ ve awˬ liˇ tawˇ hkawˇ chi maˍ laˇ ve yoˬ.

2. Ngaˬ hui aˬ htoꞈ ma ve na hkawˇ htaꞈ chaˬ nyi tuˬ le?

² Hkriꞈ yaˇ awˬ moˍ 33 hkʼawꞈ tanˬ cawˬ la htaˇ Moˉseˍ ve awˬ liˇ tawˇ hkawˇ maˇ kʼawꞈ yehˇ˗o. Chi haꞈ pehnˇ ve leh hteˇ ve cawˇ ve geh laˬ ve awˬ liˇ tawˇ hkawˇ Hkriꞈ yaˇ maˇ gʼa˗o ve tehꞈ kʼoˆ gaˇ ve laˇ? Maˇ heˆ! Hkriꞈ yaˇ awˬ liˇ tawˇ hkawˇ awˬ suhˉ kʼawꞈ gʼa ve yoˬ. Chi aˬ htoꞈ ma le, awˬ lawn chi ve hkʼaw teˇ geh henˇ tuˬ yoˬ. Peuˬ leh na hkawˇ chi htaꞈ hkʼawꞈ tuˬ yoˬ. Aˬ htoꞈ ma te awˬ liˇ tawˇ hkawˇ chi haꞈ pehnˇ ve geh laˬ ve tehꞈ ngaˬ hui kʼoˆ gʼa ve le? Aˬ htoꞈ ma te awˬ liˇ tawˇ hkawˇ chi hteˇ ve cawˇ ve tehꞈ ngaˬ hui kʼoˆ gʼa ve le? Awˬ liˇ tawˇ hkawˇ chi ve awˬ hawˉ lo chehˇ ve kanˇ paˆ cawˬ ve, shu htaꞈ hkʼaˬ hkʼe te piˇ cawˇ ve le?

3. Gaˍlaˍtiˆ liꞈ 6:2 hkʼaw kʼoˆ taˍ ve hkʼe, “Hkriꞈ ve awˬ liˇ tawˇ hkawˇ” hkʼaw aˬ htoꞈ ma cawˬ ve le?

³ Gaˍlaˍtiˆ liꞈ 6:2 gʼaw sheˍ. Hkriꞈ yaˇ lehˬ “Hkriꞈ ve awˬ liˇ tawˇ  hkawˇ” awˬ hawˉ lo chehˇ ve yoˬ. Yeˍsuˆ awˬ laꞈ gʼawˇ htaꞈ awˬ liˇ tawˇ hkawˇ maˇ gʼa bvuhꞈ piˇ. Yaꞈ hkʼaˇ yawˇ beˆ maˍ piˇ ve, tawˇ piˇ ve, leh yawˇ hui a shaꞈ teꞈ kuiˬ hkʼaw gʼaꞈ te tuˬ awˬ liˇ awˬ hkʼaˇ piˇ ve yoˬ. “Hkriꞈ ve awˬ liˇ tawˇ hkawˇ” lehˬ yawˇ maˍ ve teˇ ceuˬ le le htaꞈ kʼoˆ gaˇ ve yoˬ. Chi htaꞈ hkʼa dehꞈ na gʼa tuˬ teˇ geh chaˬ nyi sheˍ.

4-5. Yeˍsuˆ hkʼaˬ hkʼe maˍ ve le? Yawˇ maˍ ve hkʼaˬ htaˆ le?

⁴ Yeˍsuˆ chaw yaˇ htaꞈ hkʼaˬ hkʼe maˍ ve le? Awˉ lawˉ teˇ ceuˬ lehˬ, kʼoˆ maˍ piˇ ve yoˬ. Yeˍsuˆ ve tawˇ hkawˇ kanˇ paˆ cawˬ jaˇ. Yawˇ ve tawˇ Gʼuiˬ sha htaꞈ caˉ daꞈ ve awˬ tehˬ ve hpehꞈ ve pa taw, a shaꞈ htaꞈ caˉ daꞈ ve leh Gʼuiˬ sha ve mvuhˇ miˬ teˇ ceuˬ ceh tiˉ chaw yaˇ tuꞈ ve hkanˍ ve htaꞈ gu laˇ gʼa ve tehꞈ maˍ ve yoˬ. (Luˉkaꞈ 24:19) Yeˍsuˆ tawˇ pa haˉ kaꞈ tehˆ maˍ ve yoˬ. Yawˇ a shaꞈ teꞈ hkʼaˇ hkʼe awˬ laꞈ gʼawˇ kaꞈ te tuˬ maˍ piˇ ve yoˬ.—Yoˇhanˬ 13:15.

⁵ Yeˍsuˆ hkʼaˬ htaˆ maˍ ve le? Miˬ guiˬ hkʼoˆ Gʼuiˬ sha ve kanˉ te htaˇ maˍ ve yoˬ. (Maꞈhtehˍ 4:23) Yawˇ teꞈ tu la peuˬ hkʼawꞈ nawˉ maˇ maw awˬ laꞈ gʼawˇ htaꞈ kaꞈ maˍ piˇ ve yoˬ. Tawˇ pa haˉ te kʼo, awˬ laꞈ gʼawˇ aˬ laˬ hkʼe 500 gʼaˇ htaꞈ yawˇ awˬ to maw piˇ leh “chaw ceuˬ hkʼa peu˗eˬ ngaˬ ve awˬ laꞈ gʼawˇ hpehꞈ la tuˬ ca te˗o” tehꞈ kʼoˆ piˇ ve yoˬ. (Maꞈhtehˍ 28:19, 20; 1 Kawˇrenˍhtuˆ 15:6) Yeˍsuˆ lehˬ Hkriꞈ yaˇ awˬ moˍ ve oˉ kʼoˍ hpehꞈ leh, yawˇ mvuhˇ naw ma hkʼoˆ kʼawꞈ˗e peuˬ hkʼawꞈ nawˉ kaꞈ awˬ laꞈ gʼawˇ htaꞈ beˆ maˍ chehˇ sheˍ ve yoˬ. Tawˇ pa haˉ te kʼo, aˬ laˬ hkʼe 96 hkʼawꞈ htaˇ ka tiꞈ yeˬ ve Hkriꞈ yaˇ htaꞈ awˬ gʼaˇ piˇ leh beˆ maˍ piˇ sheˍ tehꞈ tcuh yaˇ Yoˇhanˬ htaꞈ Yeˍsuˆ kʼoˆ piˇ ve yoˬ.—Kawˇlawˇsehˇ 1:18; Hpeuꞈ maˍ ve 1:1.

6-7. (a) Yeˍsuˆ maˍ ve tawˇ hkawˇ hkʼaˬ kaˬ lo bvuhꞈ taˍ ve le? (b) Ngaˬ hui Hkriꞈ ve awˬ liˇ tawˇ hkawˇ htaꞈ hkʼaˬ hkʼe na yuˬ gʼa tuˬ le?

⁶ Yeˍsuˆ maˍ ve awˬ ceuˬ hkʼaˬ kaˬ lo bvuhꞈ taˍ ve le? Maꞈhtehˍ, Maˍkuˆ, Luˉkaꞈ, leh Yoˇhanˬ chi ve 4 daw Yeˍsuˆ miˬ guiˬ hkʼoˆ chehˇ htaˇ ve awˬ lawn bvuhꞈ taˍ ve yoˬ. Heˍlaˍsaˆ ve Liꞈ hpu awˬ tawn hkʼaw Gʼuiˬ sha ve awˬ ha hpu dawˇ pawnˍ piˇ leh bvuhꞈ taˍ ve chaw hui lehˬ, Yeˍsuˆ dawˇ ve awˬ lawn teˇ hpaˍ ngaˬ hui na gʼa tuˬ yawˇ hui “Hkriꞈ ve nyi ma cawˬ” ve tehꞈ hpeuꞈ maˍ laˇ ve yoˬ.—1 Kawˇrenˍhtuˆ 2:16.

⁷ Henˇ tuˬ ve: Yeˍsuˆ maˍ ve teˇ ceuˬ le le hpawˇ caˉ daꞈ ve yoˬ. Chi htaꞈ pa taw ngaˬ hui aˉ hkʼaw chehˇ htaˇ, kanˉ te chehˇ htaˇ, liꞈ henˇ chehˇ htaˇ, leh Hkriꞈ yaˇ awˬ moˍ hkʼaw chehˇ htaˇ Hkriꞈ ve awˬ liˇ tawˇ hkawˇ htaꞈ caˉ daꞈ ve yoˬ. Ngaˬ hui awˬ liˇ tawˇ hkawˇ chi htaꞈ henˇ tuˬ Heˍlaˍsaˆ ve Liꞈ hpu awˬ tawn htaꞈ  gʼaw leh dawˇ nyi cawˇ ve yoˬ. Ngaˬ hui awˬ liˇ tawˇ hkawˇ chi htaꞈ na yuˬ ve lehˬ beˆ maˍ laˇ ve, tawˇ peꞈ laˇ ve, leh Liꞈ hpu hkʼaw cawˬ ve awˬ liˇ awˬ hkʼaˇ htaꞈ gʼaꞈ te ve yoˬ. Ngaˬ hui Hkriꞈ ve awˬ liˇ tawˇ hkawˇ htaꞈ na yuˬ ve kʼo, Yaˬhoˉvaˬ Gʼuiˬ sha haꞈ pehnˇ uiˍ jaˇ ve hkawˇ na yuˬ chehˇ ve yoˬ. Yeˍsuˆ maˍ ve teˇ ceuˬ le le Gʼuiˬ sha geh laˬ ve yoˬ.—Yoˇhanˬ 8:28.

8. Hkriꞈ ve awˬ liˇ tawˇ hkawˇ aˬ htoꞈ ma ve geh laˬ ve le?

⁸ Yehˬ yeˬ chaweh te taˍ ve lehˬ yehˬ chi ve hkʼaw chehˇ ve chaw kawˆ tuˬ maˇ cawˬ tehꞈ dawˇ ve yoˬ. Chi ve kaꞈ hkʼa shuˍ awˬ liˇ tawˇ hkawˇ yeˬ chaweh teh taˍ leh chi htaꞈ gʼaꞈ te ve chaw kawˆ tuˬ maˇ cawˬ tehꞈ dawˇ ve yoˬ. Hkriꞈ ve awˬ liˇ tawˇ hkawˇ daꞈ jaˇ ve lehˬ haꞈ pehnˇ ve geh laˬ ve yoˬ. Aˬ htoꞈ ma te ngaˬ hui chi hkʼe kʼoˆ gʼa ve le?

9-10. Haꞈ pehnˇ ve htaꞈ caˉ daꞈ ve Yeˍsuˆ aˬ htoꞈ ma te maˍ laˇ ve le? Ngaˬ hui hkʼaˬ hkʼe te yawˇ htaꞈ henˇ yuˬ gʼa tuˬ le?

⁹ Awˉ lawˉ teˇ ceuˬ, Yeˍsuˆ te ve hkʼa peu˗eˬ haꞈ pehnˇ ve geh laˬ ve yoˬ. Ha kʼaˉ ve lehˬ haꞈ pehnˇ ve hkʼaw te tawˆ la ve teˇ ceuˬ hpehꞈ ve yoˬ. Yeˍsuˆ yawˇ hui htaꞈ ha kʼaˉ ve pa taw, maˍ piˇ ve, naˬ ve chaw htaꞈ gu na˗e piˇ ve, meuꞈ ve kaˆ ve chaw htaꞈ caˍ piˇ ve, leh suh peuˬ ve chaw htaꞈ kʼawꞈ teꞈ tu la piˇ ve yoˬ. (Maꞈhtehˍ 14:14; 15:32-38; Maˍkuˆ 6:34; Luˉkaꞈ 7:11-15) Chi hkʼe te ve lehˬ yawˇ awˬ gʼaˇ leh awˬ yanˇ gʼa yehˇ maˇ jaˇ ve htawˇ, Yeˍsuˆ yawˇ loˍ ve aꞈ kehˉ shu loˍ ve htaꞈ awˉ lawˉ dawˇ nyi ve yoˬ. A yeˇ uiˍ jaˇ ve lehˬ shu awˬ pon yawˇ ve a shaꞈ tanˇ piˇ ve yoˬ.—Yoˇhanˬ 15:13.

¹⁰ Henˇ tuˬ ve: Ngaˬ hui loˍ ve aꞈ kehˉ shu loˍ ve htaꞈ awˉ lawˉ dawˇ nyi ve kʼo, ngaˬ hui kaꞈ Yeˍsuˆ htaꞈ henˇ yuˬ chehˇ ve yoˬ. Chi hkʼoˆ kaꞈ ngaˬ hui yawˇ htaꞈ henˇ yuˬ leh hto toˇ kuiˬ lo ve chaw hui haꞈ pehnˇ ve cawˬ tuˬ maˍ piˇ gʼa ve yoˬ. Ngaˬ hui yawˇ hui htaꞈ haꞈ ve kʼo, hto toˇ leh maˍ piˇ tuˬ yoˬ. Ngaˬ hui chi hkʼe te ve kʼo, Hkriꞈ ve awˬ liˇ tawˇ hkawˇ htaꞈ na yuˬ chehˇ ve yoˬ.

11-12. (a) Yaˬhoˉvaˬ ngaˬ hui htaꞈ dawˇ haˍ ve tehꞈ aˬ htoꞈ ma hpeuꞈ maw laˇ ve le? (b) Yaˬhoˉvaˬ haꞈ pehnˇ ve htaꞈ ngaˬ hui hkʼaˬ hkʼe te henˇ yuˬ gʼa tuˬ le?

¹¹ Nyiˇ ceuˬ teˇ ceuˬ lehˬ, Yeˍsuˆ yawˇ Awˬ pa ve haꞈ pehnˇ ve hpeuꞈ maw laˇ ve yoˬ. Yawˇ Gʼuiˬ sha ve kanˉ te htaˇ, Yaˬhoˉvaˬ htaꞈ oˉ kʼoˍ pui ve chaw htaꞈ hkʼaˬ hkʼe taw dawˇ haˍ ve Yeˍsuˆ hpeuꞈ maw laˇ ve yoˬ. Yawˇ awˬ kaˍ awˬ nu ve leh awˬ hkʼaˇ chi ve kaꞈ maˍ ve yoˬ. Ngaˬ hui teˇ gʼaˇ leh teˇ gʼaˇ mvuhˇ naw ma hkʼoˆ ve Awˬ pa Yaˬhoˉvaˬ mehˆ gʼuˇ suhˍ awˬ hpfuhˇ hkʼaˆ jaˇ. (Maꞈhtehˍ 10:31) Yaˬhoˉvaˬ Hkriꞈ yaˇ awˬ moˍ hkʼaw mehˉ kʼai taˍ ve yawˬ htaꞈ venˇ baˆ dawˇ hpfuhˆ leh kʼawꞈ la tcuh gaˇ ve yoˬ. (Luˉkaꞈ 15:7, 10) Yaˬhoˉvaˬ ngaˬ hui htaꞈ hkʼaˬ hkʼe taw haꞈ ve yawˇ ve Yaˇ paˍ htaiˍ hkʼawꞈ laˇ ve hpeuꞈ maw laˇ ve yoˬ.—Yoˇhanˬ 3:16.

¹² Henˇ tuˬ ve: Ngaˬ hui Yaˬhoˉvaˬ haꞈ pehnˇ ve htaꞈ hkʼaˬ hkʼe te henˇ yuˬ gʼa tuˬ le? (Eˇfeˇsuꞈ 5:1, 2) Awˬ viˉ awˬ nyi awˬ hpfuhˇ hkʼaˆ jaˇ ve, “mehˉ kʼai taˍ ve yawˬ” Yaˬhoˉvaˬ geh kʼawꞈ la ve htaꞈ haꞈ yuˬ piˇ sheˍ. (Chiˇ mvuh ve 119:176) Awˬ viˉ awˬ nyi loˍ ve htaꞈ ga piˇ htaˇ, ngaˬ hui yawˇ hui htaꞈ haꞈ ve tehꞈ hpeuꞈ maw piˇ ve yoˬ. (1 Yoˇhanˬ 3:17) Ngaˬ hui haꞈ pehnˇ ve hkʼaw shu htaꞈ te piˇ ve kʼo, Hkriꞈ ve awˬ liˇ tawˇ hkawˇ htaꞈ na yuˬ chehˇ ve yoˬ.

13-14. (a) Yoˇhanˬ liꞈ 13:34, 35 hkʼaw kʼoˆ taˍ ve hkʼe, Yeˍsuˆ awˬ laꞈ gʼawˇ htaꞈ aˬ htoꞈ ma te tuˬ kʼoˆ piˇ ve le? Aˬ htoꞈ ma te tawˇ chi awˬ suhˉ hpehꞈ ve le? (b) Ngaˬ hui tawˇ awˬ suhˉ chi htaꞈ hkʼaˬ hkʼe te na yuˬ gʼa tuˬ le?

¹³ Shehˆ ceuˬ teˇ ceuˬ lehˬ, Yeˍsuˆ awˬ laꞈ gʼawˇ htaꞈ a shu yawˇ awˬ to yuˬ tanˇ tuˬ kʼoˆ maˍ piˇ ve yoˬ. (Yoˇhanˬ 13:34, 35 gʼaw sheˍ.) Yeˍsuˆ ve tawˇ chi awˬ suhˉ hpehꞈ ve yoˬ. Tawˇ chi lehˬ Iˉsaˍreˍlaˆ chaw hui ve awˬ liˇ tawˇ hkawˇ awˬ hawˉ lo maˇ chehˇ tuˬ maˍ piˇ ve pa taw yoˬ. Yeˍsuˆ nawˬ htaꞈ haꞈ ve hkʼe, yonˍ hkʼaˇ hkʼa shuˍ ve chaw htaꞈ haꞈ˗oꞈ. Haꞈ ve chi hkʼe ve lehˬ a shu yawˇ awˬ to yuˬ tanˇ ve yoˬ. * Ngaˬ  hui awˬ to htaꞈ haꞈ ve aꞈ kehˉ awˬ viˉ awˬ nyi htaꞈ haꞈ cawˇ ve yoˬ. Yeˍsuˆ ngaˬ hui htaꞈ te laˇ jaw ve hkʼe ngaˬ hui yawˇ hui awˬ pon hkanˍ suh piˇ gʼa ve yoˬ.

¹⁴ Henˇ tuˬ ve: Ngaˬ hui tawˇ awˬ suhˉ chi htaꞈ hkʼaˬ hkʼe gʼaꞈ te gʼa tuˬ le? Ngaˬ hui awˬ viˉ awˬ nyi awˬ pon yuˬ tanˇ cawˇ ve yoˬ. Ngaˬ hui ve a shaꞈ yuˬ tanˇ gʼa ve yoˬ. Yaꞈ hkʼaˇ, ngaˬ hui a yaˇ maˇ uiˍ ve htawˇ yuˬ tanˇ ve yoˬ. Tawˇ pa haˉ te kʼo, awˬ viˉ awˬ nyi chaw mawˇ hpawnˬ daꞈ kuiˬ lo laˬ tuˬ ca gʼawˬ˗e ve, Maˇ heˆ leh ngaˬ hui haꞈ ve chaw nyi hkʼaˇ suh tuˬ ngaˬ hui dawˇ taˍ ve hkʼe maˇ te, maˇ heˆ leh ngaˬ hui ve kanˉ jehˇ leh tuꞈ ve hkanˍ ve hpawˇ gʼa hpuˇ ve chaw htaꞈ ga piˇ ve, chi hkʼe te ve lehˬ Hkriꞈ ve awˬ liˇ tawˇ hkawˇ htaꞈ gʼaꞈ te ve yoˬ. Chi hkʼoˆ kaꞈ Hkriꞈ yaˇ awˬ moˍ hkʼaw teˇ gʼaˇ le le kawˆ ve maˇ cawˬ tehꞈ dawˇ tuˬ ngaˬ hui te piˇ ve yoˬ.

15-17. (a) Yeˍsuˆ hteˇ ve cawˇ ve htaꞈ dawˇ nyi ve tehꞈ yawˇ ve te hkʼaˇ dawˇ hkʼaˇ hkʼaˬ hkʼe hpeuꞈ maw laˇ ve le? (b) Ngaˬ hui Yeˍsuˆ htaꞈ hkʼaˬ hkʼe henˇ yuˬ gʼa tuˬ le?

¹⁵ Liꞈ hpu hkʼaw “hteˇ ve cawˇ ve” tcuhˉ kuiˬ lehˬ, Gʼuiˬ sha cawˇ ve tehꞈ shawˍ ve awˬ ceuˬ htaꞈ te leh chaw mehˆ hpfuhˇ htaꞈ maˇ nyi ve htaꞈ kʼoˆ gaˇ ve yoˬ. Aˬ htoꞈ ma te Hkriꞈ ve awˬ liˇ tawˇ hkawˇ hteˇ ve cawˇ ve tehꞈ ngaˬ hui kʼoˆ gʼa ve le?

¹⁶ Awˉ lawˉ teˇ ceuˬ lehˬ, Yeˍsuˆ haꞈ pehnˇ ve hkʼaw te tawˆ la ve aˬ htoꞈ ma te hteˇ ve cawˇ ve tehꞈ hpeuꞈ maw laˇ ve ngaˬ hui dawˇ nyi sheˍ. Yawˇ miˬ guiˬ hkʼoˆ chehˇ htaˇ Yuˇdaꞈ chaw ve bon awˬ hoˉ teˇ hpaˍ lehˬ Yuˇdaꞈ chaw maˇ heˆ ve, haˍ gʼawˇ ve, leh yaˇ miˇ htaꞈ kaꞈ maˇ yawˆ yan piˇ leh yawˇ hui nyi bawˬ ve yoˬ. Yaꞈ hkʼaˇ, Yeˍsuˆ hteˇ ve cawˇ ve pa taw teˇ gʼaˇ le le htaꞈ hkʼa shuˍ te piˇ ve yoˬ. Yuˇdaꞈ chaw maˇ heˆ ve htawˇ yonˍ ve cawˬ leh yawˇ geh laˬ ve chaw htaꞈ haꞈ yuˬ piˇ ve yoˬ. (Maꞈhtehˍ 8:5-10, 13) Haˍ ve paw sha ve htaꞈ maˇ nyi leh teˇ gʼaˇ le le htaꞈ yawˇ bon maˍ piˇ ve yoˬ. (Maꞈhtehˍ 11:5; Luˉkaꞈ 19:2, 9) Yawˇ yaˇ miˇ htaꞈ maˇ yawˆ yan ve maˇ te piˇ jaw. Yaꞈ hkʼaˇ, yawˇ yaˇ miˇ htaꞈ yawˆ yan leh daꞈ ve te piˇ ve yoˬ. Chaw teˇ hpaˍ yawˇ hui htaꞈ awˬ hpfuhˇ maˇ cawˬ tehꞈ shawˍ ve yoˬ.—Luˉkaꞈ 7:37-39, 44-50.

¹⁷ Henˇ tuˬ ve: Ngaˬ hui shu htaꞈ hteˇ ve cawˇ ve te piˇ ve kʼo, yawˇ hui haˍ gʼawˇ ve paw sha ve htawˇ maˇ kʼoˆ, bon liˇ aˬ htoꞈ ma ve htaꞈ yonˍ ve htawˇ maˇ kʼoˆ, ngaˬ hui teˇ gʼaˇ le le htaꞈ hto maˍ piˇ ve kʼo, Yeˍsuˆ htaꞈ henˇ yuˬ chehˇ ve yoˬ. Awˬ viˉ awˬ nyi hawˉ hkʼaˆ Yeˍsuˆ htaꞈ henˇ yuˬ leh yaˇ miˇ htaꞈ yawˆ yan piˇ ve yoˬ. Ngaˬ hui chi hkʼe te ve kʼo, Hkriꞈ ve awˬ liˇ tawˇ hkawˇ htaꞈ na yuˬ chehˇ ve yoˬ.

18-19. Hteˇ ve cawˇ ve htaꞈ caˉ daꞈ ve Yeˍsuˆ aˬ htoꞈ ma maˍ laˇ ve le? Yawˇ maˍ laˇ ve htaꞈ ngaˬ hui aˬ htoꞈ ma henˇ yuˬ gʼa ve le?

¹⁸ Nyiˇ ceuˬ teˇ ceuˬ lehˬ, Yeˍsuˆ maˍ ve hteˇ ve cawˇ ve htaꞈ dawˇ nyi sheˍ. Yawˇ ve awˬ laꞈ gʼawˇ shu htaꞈ hteˇ ve cawˇ ve te piˇ tuˬ maˍ piˇ ve yoˬ. Tawˇ pa haˉ te kʼo, shi ve awˬ liˇ htaꞈ dawˇ nyi sheˍ. (Maꞈhtehˍ 7:12) Ngaˬ hui hteˇ ve cawˇ ve gʼa gaˇ ve yoˬ. Hkʼe te leh shu htaꞈ hteˇ ve cawˇ ve te piˇ cawˇ ve yoˬ. Chi hkʼe te ve kʼo, shu ngaˬ hui htaꞈ kaꞈ hteˇ ve cawˇ ve te laˇ tuˬ yoˬ. Yaꞈ hkʼaˇ, chaw teˇ gʼaˇ ngaˬ hui htaꞈ maˇ hteˇ maˇ cawˇ ve te laˇ ve kʼo˗ehꞈ? “Gʼuiˬ sha leuˆ yuˬ taˍ ve chaw teˇ hpaˍ lehˬ, tanˇ hkuinˇ tanˇ vanˇ yawˇ htaꞈ lawˬ hkawˉ ve kʼo, Gʼuiˬ sha lehˬ hteˇ ve cawˇ ve” hkʼaw gʼaˇ va gʼa ve tehꞈ Yeˍsuˆ awˬ laꞈ gʼawˇ htaꞈ maˍ piˇ ve yoˬ. (Luˉkaꞈ 18:6, 7) Chi lehˬ ka tiꞈ te taˍ laˇ ve yoˬ. Awˬ leh meuˇ ve awˬ yanˇ ngaˬ hui aˬ htoꞈ ma gʼa hpuˇ ve, hteˇ ve cawˇ ve Gʼuiˬ sha shiˍ leh yawˇ tiˍ taˍ ve awˬ nyi gaˬ kʼo, ngaˬ hui hteˇ ve cawˇ ve htaꞈ gʼa tuˬ yawˇ ka tiꞈ te taˍ laˇ ve yoˬ.—2 Hteˇsaˍlawˇniˆ 1:6.

¹⁹ Henˇ tuˬ ve: Yeˍsuˆ maˍ laˇ ve htaꞈ ngaˬ hui gʼaꞈ te htaˇ, shu htaꞈ hteˇ ve cawˇ ve te piˇ gaˇ ve yoˬ. Saˍtanˍ ve miˬ guiˬ maˇ hteˇ maˇ cawˇ ve hkʼaw ngaˬ hui va yaw ve kʼo, Yaˬhoˉvaˬ ngaˬ hui htaꞈ hteˇ ve cawˇ ve te laˇ tuˬ shiˍ htaˇ awˬ gʼaˇ gʼa ve yoˬ.

20-21. (a) Kanˇ paˆ cawˬ ve chaw shu htaꞈ hkʼaˬ hkʼe te piˇ cawˇ ve le? (b) Awˬ hpawˇ haꞈ pehnˇ ve hkʼaw a shu yawˇ awˬ to hkʼaˬ hkʼe yuˬ tanˇ gʼa ve le? Awˬ pa yaˇ htaꞈ hkʼaˬ hkʼe te piˇ cawˇ ve le?

²⁰ Hkriꞈ ve awˬ liˇ tawˇ hkawˇ awˬ hawˉ lo chehˇ ve chaw shu htaꞈ hkʼaˬ hkʼe te piˇ cawˇ ve le? Haꞈ pehnˇ ve chi Hkriꞈ ve awˬ liˇ tawˇ hkawˇ awˬ hkuiˉ puiˍ hpehꞈ ve pa taw kanˇ paˆ cawˬ ve chaw yawˇ hui awˬ hawˉ lo chehˇ ve chaw htaꞈ haꞈ pehnˇ ve hkʼaw gʼa yawˆ yan piˇ ve yoˬ. Yeˍsuˆ te ve awˬ hkʼaˇ lehˬ haꞈ pehnˇ ve tehꞈ yawˇ hui gʼa tawnˇ taˍ cawˇ ve yoˬ.

²¹ Yehˬ kʼa hkʼaw. “Hkriꞈ lehˬ, yawˇ ve awˬ moˍ htaꞈ haꞈ ve hkʼe” awˬ hpawˇ awˬ miˇ ma htaꞈ gʼa haꞈ ve yoˬ. (Eˇfeˇsuꞈ 5:25, 28, 29) Yeˍsuˆ haꞈ pehnˇ ve hkʼaw yuˬ tanˇ ve hkʼe awˬ hpawˇ yawˇ htaꞈ gʼa henˇ yuˬ cawˇ ve yoˬ. Yawˇ loˍ ve aꞈ kehˉ awˬ miˇ ma htaꞈ a yeˇ gʼa yuˬ ve yoˬ. Chaw teˇ hpaˍ hpaˍ shu htaꞈ haꞈ ve haˍ jaˇ tehꞈ dawˇ ve yoˬ hehˉ. Teˇ gʼaˇ leh teˇ gʼaˇ hteˇ ve cawˇ ve te daꞈ ve chaw geh yawˇ hui maˇ gʼa uiˍ la ve pa taw, haꞈ pehnˇ ve chi a yeˇ maˇ uiˍ tehꞈ dawˇ ve yoˬ hehˉ. Yawˇ hui dawˇ hkʼaˇ maˇ daꞈ ve pa tcuh tuˬ maˇ shaˍ ve yoˬ hehˉ. Yaꞈ hkʼaˇ, yawˇ hui Hkriꞈ ve awˬ liˇ tawˇ hkawˇ na yuˬ tuˬ dawˇ hkʼaˇ gʼa pa ve yoˬ. Awˬ hpawˇ yawˇ awˬ to yuˬ tanˇ ve lehˬ awˬ miˇ ma yawˆ yan ve htaꞈ gʼa keunˍ ve yoˬ. Awˬ pa yaˇ htaꞈ awˬ tehˬ haꞈ ve kʼo, tawˇ yaw ve te ve yaˇ nyi ma luˬ tuˬ maˇ te. (Eˇfeˇsuꞈ 4:31) Yaꞈ hkʼaˇ, yawˇ haꞈ pehnˇ ve hkʼaw yaˇ kawˆ ve maˇ cawˬ tuˬ hpeuꞈ maw piˇ ve yoˬ. Awˬ pa chi hkʼe te ve kʼo, yaˇ gʼaˇ va gʼa leh yonˍ tuˬ yoˬ.

22. 1 Peˍtruˆ liꞈ 5:1-3 hkʼaw kʼoˆ taˍ ve hkʼe, “yawˬ” a shu ve le? Yawˇ hui hkʼaˬ hkʼe te piˇ ve htaꞈ gʼa cawˇ ve le?

²² Hkriꞈ yaˇ awˬ moˍ hkʼaw. Nyi haꞈ shaˉ paˍ lehˬ “yawˬ” yawˇ hui ve maˇ heˆ tehꞈ tawnˇ taˍ cawˇ ve yoˬ. (Yoˇhanˬ 10:16; 1 Peˍtruˆ 5:1-3 gʼaw sheˍ.) “Gʼuiˬ sha ve yawˬ awˬ moˍ” leh Gʼuiˬ sha ve mawˇ yawˇ htaꞈ hkʼawꞈ piˇ˗oˆ. Yawˬ Yaˬhoˉvaˬ ve mawˇ hpehꞈ ve tehꞈ nyi haꞈ shaˉ paˍ htaꞈ shaˍ tiꞈ piˇ ve yoˬ. Yawˇ ve yawˬ  htaꞈ haꞈ pehnˇ ve leh nuˇ nehˬ ve hkʼaw te piˇ tcuh gaˇ ve yoˬ. (1 Hteˇsaˍlawˇniˆ 2:7, 8) Nyi haꞈ shaˉ paˍ haꞈ pehnˇ ve hkʼaw yawˬ htaꞈ te piˇ ve kʼo, Yaˬhoˉvaˬ nyi hkʼaˇ suh ve yoˬ. Yawˇ hui awˬ viˉ awˬ nyi yawˆ yan piˇ ve htaꞈ kaꞈ gʼa keunˍ ve yoˬ.

23-24. (a) Venˇ baˆ uiˍ jaˇ ve htaꞈ te yaꞈ ve kʼo, nyi haꞈ shaˉ paˍ ve awˬ vuiˬ aˬ htoꞈ ma le? (b) Chi hkʼe hpehꞈ la htaˇ, nyi haꞈ shaˉ paˍ aˬ htoꞈ ma htaꞈ dawˇ nyi cawˇ ve le?

²³ Venˇ baˆ uiˍ jaˇ ve htaꞈ te yaꞈ htaˇ, nyi haꞈ shaˉ paˍ ve awˬ vuiˬ aˬ htoꞈ ma le? Nyi haꞈ shaˉ paˍ ve awˬ vuiˬ lehˬ Gʼuiˬ sha Iˉsaˍreˍlaˆ chaw htaꞈ awˬ liˇ tawˇ hkawˇ piˇ taˍ ve, suhˉ jehˬ paˍ leh mvuhˇ miˬ uˉ peunˍ paˍ kanˇ paˇ cawˬ ve htaꞈ maˇ shuˍ daꞈ. Awˬ liˇ tawˇ hkawˇ oˇ ve htaꞈ nyi haꞈ shaˉ tuˬ leuˆ yuˬ taˍ ve chaw lehˬ co ha hpawˇ, mvuhˇ miˬ leh haiˬ ve hpawˇ kaꞈ gʼa nyi haꞈ shaˉ ve yoˬ. Yaꞈ hkʼaˇ, nyi haꞈ shaˉ paˍ Hkriꞈ ve awˬ liˇ tawˇ hkawˇ awˬ hawˉ lo chehˇ ve chaw lehˬ co ha hpawˇ te yaꞈ ve htaꞈ caˉ daꞈ ve kaꞈ nyi haꞈ shaˉ ve yoˬ. Miˬ guiˬ hkʼoˆ kanˇ paˇ cawˬ ve mvuhˇ miˬ leh haiˬ ve hpawˇ nyi haꞈ shaˉ tuˬ Gʼuiˬ sha awˬ vuiˬ piˇ ve tehꞈ yawˇ hui shiˍ ve yoˬ. Chi kanˇ paˆ yehˇ leh ciˍ yanˍ piˇ ve htaꞈ kʼoˆ gaˇ ve yoˬ. Tawˇ pa haˉ te kʼo, meuˉ ve htawnˍ hkʼaw lo yuˬ keu piˇ ve yoˬ.—Roˉmaꞈ 13:1-4.

²⁴ Hkʼe kʼo venˇ baˆ uiˍ jaˇ ve htaꞈ gu piˇ tuˬ nyi haꞈ shaˉ paˍ ve awˬ vuiˬ aˬ htoꞈ ma le? Yawˇ hui hpehꞈ la ve awˬ lawn htaꞈ chaˬ nyi tuˬ Liꞈ hpu htaꞈ cuˇ leh gʼa dawˇ cheˆ ve yoˬ. Haꞈ pehnˇ ve lehˬ Hkriꞈ ve awˬ liˇ tawˇ hkawˇ awˬ hkuiˉ puiˍ hpehꞈ ve tehꞈ yawˇ hui maˇ leunˇ. Haꞈ pehnˇ ve nyi haꞈ shaˉ paˍ awˬ lawn chi ve teˇ hpaˍ htaꞈ dawˇ nyi tuˬ ga piˇ ve yoˬ. Hkriꞈ yaˇ awˬ moˍ hkʼaw te yaꞈ ve chaw htaꞈ ga piˇ tuˬ yawˇ hui aˬ htoꞈ ma gʼa te ve le? Haꞈ pehnˇ ve hkʼaw nyi haꞈ shaˉ paˍ awˬ lawn chi teˇ hpaˍ htaꞈ gʼa dawˇ nyi ve yoˬ. Yawˇ dawˇ hpfuhˆ˗aw laˇ? Yawˇ co ha hpawˇ awˬ gʼaˇ hehnˇ la tuˬ ngaˬ hui ga piˇ gʼa˗aw laˇ?

25. Gʼuˇ suhˍ teˇ lawn hkʼaw ngaˬ hui aˬ htoꞈ ma htaꞈ henˇ tuˬ le?

²⁵ Ngaˬ hui Hkriꞈ ve awˬ liˇ tawˇ hkawˇ awˬ hawˉ lo gʼa chehˇ ve ha lehˬ ja! Ngaˬ hui teˇ gʼaˇ leh teˇ gʼaˇ awˬ liˇ tawˇ hkawˇ chi htaꞈ na yuˬ tuˬ coˇ caˇ ve kʼo, Hkriꞈ yaˇ awˬ moˍ hkʼaw teˇ gʼaˇ le le haꞈ pehnˇ ve, awˬ hpfuhˇ hkʼaˆ ve, kawˆ ve maˇ cawˬ tuˬ tehꞈ dawˇ tuˬ ga piˇ ve yoˬ hehˉ. Yaꞈ hkʼaˇ, “haiˬ ve chaw . . . shaˬ te shaˬ haiˬ la tuˬ” ve hkʼaw ngaˬ hui chehˇ sheˍ ve yoˬ. (2 Tiˆmoˉseˍ 3:13) Ngaˬ hui hkʼaˬ htaˆ kaꞈ shaˍ tiꞈ gʼa te ve yoˬ. Tawˇ pa haˉ te kʼo, yaˇ pehꞈ ve tzuhˆ ve hpawˇ naˬ taweh te piˇ ve htaꞈ gu piˇ htaˇ, Hkriꞈ yaˇ awˬ moˍ Gʼuiˬ sha hteˇ ve cawˇ ve tehꞈ hkʼaˬ hkʼe hpeuꞈ maw piˇ gʼa tuˬ le? Gʼuˇ suhˍ teˇ lawn hkʼaw henˇ tuˬ yoˬ.