ບົດຄວາມສຶກສາທີ 18
ຄວາມຮັກແລະຄວາມຍຸຕິທຳໃນປະຊາຄົມຄລິດສະຕຽນ
“ໃຫ້ຊ່ວຍແບ່ງເບົາພາລະຂອງກັນແລະກັນຕໍ່ໄບ ການເຮັດແບບນີ້ສະແດງວ່າພວກເຈົ້າເຊື່ອຟັງກົດໝາຍຂອງພະຄລິດ.”—ຄລາ. 6:2, ລ.ມ.
ເພງ 12 ພະເຢໂຫວາພະເຈົ້າອົງຍິ່ງໃຫຍ່
ໃຈຄວາມສຳຄັນ *
1. ມີ 2 ເລື່ອງຫຍັງແດ່ທີ່ເຮົາໝັ້ນໃຈໄດ້?
ພະເຢໂຫວາພະເຈົ້າຮັກຜູ້ນະມັດສະການພະອົງຕະຫຼອດມາແລະກໍຈະຮັກຕະຫຼອດໄປ ແລະພະອົງກໍຍັງຮັກຄວາມຍຸຕິທຳ. (ເພງ. 33:5) ດັ່ງນັ້ນ ເຮົາຈຶ່ງໝັ້ນໃຈໄດ້ໃນ 2 ເລື່ອງ: (1) ພະເຢໂຫວາເຈັບປວດໃຈເມື່ອຜູ້ຮັບໃຊ້ຂອງພະອົງຖືກປະຕິບັດແບບບໍ່ເປັນທຳ. (2) ພະເຢໂຫວາຈະເຮັດໃຫ້ທຸກຄົນໄດ້ຮັບຄວາມຍຸຕິທຳ. ໃນບົດຄວາມທຳອິດຂອງບົດຄວາມຊຸດນີ້ * ເຮົາໄດ້ຮຽນຮູ້ວ່າກົດໝາຍທີ່ໃຫ້ກັບຊາວອິດສະລາແອນໂດຍຜ່ານທາງໂມເຊແມ່ນສ້າງຂຶ້ນບົນພື້ນຖານຂອງຄວາມຮັກ. ຕາມກົດໝາຍນີ້ທຸກຄົນໄດ້ຮັບຄວາມຍຸຕິທຳ ໂດຍສະເພາະແມ່ນຄົນທີ່ປົກປ້ອງຕົວເອງບໍ່ໄດ້. (ບັນຍັດ. 10:18) ກົດໝາຍນີ້ສະແດງວ່າພະເຢໂຫວາຮັກແລະເປັນຫ່ວງຜູ້ນະມັດສະການພະອົງຫຼາຍແທ້ໆ.
2. ເຮົາຈະຕອບຄຳຖາມຫຍັງແດ່?
2 ໃນປີ ຄ.ສ 33 ຕອນທີ່ປະຊາຄົມຄລິດສະຕຽນສ້າງຕັ້ງຂຶ້ນ ກົດໝາຍທີ່ໃຫ້ຜ່ານທາງໂມເຊກໍຖືກຍົກເລີກ. ຄລິດສະຕຽນຈະບໍ່ໄດ້ຮັບການຄຸ້ມຄອງດ້ວຍກົດໝາຍທີ່ຖືກສ້າງບົນພື້ນຖານຂອງຄວາມຮັກແລະຄວາມຍຸຕິທຳແລ້ວບໍ? ບໍ່ແມ່ນ! ເພາະເຂົາເຈົ້າໄດ້ຮັບກົດໝາຍໃໝ່. ໃນບົດຄວາມນີ້ ເຮົາຈະພິຈາລະນາວ່າກົດໝາຍໃໝ່ນັ້ນໝາຍເຖິງຫຍັງ. ຈາກນັ້ນ ເຮົາຈະຕອບຄຳຖາມຕໍ່ໄປນີ້: ເປັນຫຍັງຈຶ່ງບອກໄດ້ວ່າກົດໝາຍໃໝ່ນີ້ຖືກສ້າງບົນພື້ນຖານຂອງຄວາມຮັກ? ເປັນຫຍັງຈຶ່ງບອກໄດ້ວ່າກົດໝາຍນີ້ສົ່ງເສີມຄວາມຍຸຕິທຳ? ພາຍໃຕ້ກົດໝາຍນີ້ ຄົນທີ່ມີອຳນາດຄວນຈະປະຕິບັດຕໍ່ຄົນອື່ນແນວໃດ?
“ກົດໝາຍຂອງພະຄລິດ” ໝາຍເຖິງຫຍັງ?
3. ດັ່ງທີ່ຂຽນໄວ້ໃນຄາລາຊີ 6:2 “ກົດໝາຍຂອງພະຄລິດ” ໝາຍເຖິງຫຍັງ?
3 ອ່ານຄາລາຊີ 6:2. * ຄລິດສະຕຽນຖືກຄຸ້ມຄອງດ້ວຍ “ກົດໝາຍຂອງພະຄລິດ” ພະເຍຊູບໍ່ໄດ້ຂຽນກົດໝາຍເປັນຂໍ້ໆໄວ້ໃຫ້ລູກສິດ ແຕ່ເພິ່ນໄດ້ໃຫ້ຄຳແນະນຳ ຄຳສັ່ງ ແລະຫຼັກການເພື່ອຊີ້ນຳເຂົາເຈົ້າ. “ກົດໝາຍຂອງພະຄລິດ” ໝາຍເຖິງທຸກສິ່ງທີ່ພະເຍຊູສອນ. ເພື່ອຈະເຂົ້າໃຈກົດໝາຍນີ້ຫຼາຍຂຶ້ນໃຫ້ເຮົາມາພິຈາລະນາເລື່ອງຕໍ່ໄປນີ້.
4-5. ພະເຍຊູສອນແນວໃດ ແລະສອນເມື່ອໃດ?
4 ພະເຍຊູສອນແນວໃດ? ທຳອິດ ເພິ່ນສອນໂດຍທາງຄຳເວົ້າ. ຄຳເວົ້າຂອງເພິ່ນມີພະລັງຫຼາຍຍ້ອນເພິ່ນເວົ້າຄວາມຈິງເລື່ອງພະເຈົ້າ ສອນຄວາມໝາຍທີ່ແທ້ຈິງຂອງຊີວິດ ແລະສອນວ່າການປົກຄອງຂອງພະເຈົ້າເປັນວິທີດຽວທີ່ຈະແກ້ໄຂບັນຫາທັງໝົດຂອງມະນຸດ. (ລືກາ 24:19) ພະເຍຊູຍັງສອນເຮົາໂດຍເປັນແບບຢ່າງໃຫ້ເຮົາ. ການໃຊ້ຊີວິດຂອງເພິ່ນເຮັດໃຫ້ລູກສິດເຫັນວ່າເຂົາເຈົ້າຄວນໃຊ້ຊີວິດແນວໃດ.—ໂຢ. 13:15
5 ພະເຍຊູສອນເມື່ອໃດ? ເພິ່ນສອນຕອນທີ່ຮັບໃຊ້ຢູ່ເທິງໂລກ. (ມັດ. 4:23) ເພິ່ນຍັງສອນລູກສິດບໍ່ດົນຫຼັງຈາກທີ່ເພິ່ນຖືກປຸກໃຫ້ຟື້ນຄືນຈາກຕາຍ. ຕົວຢ່າງ: ເພິ່ນປາກົດຕົວໃຫ້ລູກສິດເຫັນເຊິ່ງອາດມີເຖິງ 500 ຄົນ ແລະໄດ້ສັ່ງເຂົາເຈົ້າ “ກະທຳໃຫ້ພວກຕ່າງປະເທດທັງປວງເຂົ້າເປັນລູກສິດ.” (ມັດ. 28:19, 20; 1 ໂກ. 15:6) ເນື່ອງຈາກພະເຍຊູເປັນຜູ້ນຳປະຊາຄົມ ບໍ່ດົນຫຼັງຈາກທີ່ເພິ່ນກັບໄປສະຫວັນ ເພິ່ນກໍຍັງໄດ້ສືບຕໍ່ສອນພວກລູກສິດ. ຕົວຢ່າງເຊັ່ນ: ປະມານປີ ຄ.ສ 96 ພະເຍຊູຄລິດໄດ້ບອກອັກຄະສາວົກໂຢຮັນໃຫ້ກຳລັງໃຈແລະໃຫ້ຄຳແນະນຳກັບຄລິດສະຕຽນຜູ້ຖືກເຈີມ.—ໂກໂລ. 1:18; ຄຳປ. 1:1
6-7. (ກ) ຄຳສອນຂອງພະເຍຊູບັນທຶກໄວ້ຢູ່ໃສ? (ຂ) ເຮົາຈະເຊື່ອຟັງກົດໝາຍຂອງພະຄລິດແນວໃດ?
6 ຄຳສອນຂອງພະເຍຊູບັນທຶກໄວ້ຢູ່ໃສ? ກິດຕິຄຸນ 4 ພະທຳໄດ້ບັນທຶກຫຼາຍສິ່ງທີ່ພະເຍຊູເວົ້າແລະເຮັດຕອນທີ່ຢູ່ເທິງໂລກ. ພະທຳອື່ນໆຂອງພະຄຳພີຄລິດສະຕຽນພາກພາສາເກັຣກຍັງຊ່ວຍເຮົາໃຫ້ເຂົ້າໃຈຄວາມຄິດຂອງພະຄລິດໃນເລື່ອງຕ່າງໆເພີ່ມຂຶ້ນອີກ ເພາະຄົນທີ່ຂຽນໄດ້ຮັບການດົນໃຈຈາກພະລັງບໍລິສຸດແລະເປັນຄົນທີ່ “ມີຄວາມຄຶດຂອງພະຄລິດ.”—1 ໂກ. 2:16
7 ບົດຮຽນ: ຄຳສອນຂອງພະເຍຊູໃຊ້ໄດ້ຜົນກັບທຸກແງ່ມຸມຂອງຊີວິດ. ດັ່ງນັ້ນ ກົດໝາຍຂອງພະຄລິດຄຸ້ມຄອງເຮົາເມື່ອຢູ່ເຮືອນ ບ່ອນເຮັດວຽກ ຫຼືໂຮງຮຽນ ແລະໃນປະຊາຄົມ. ເຮົາຮຽນກົດໝາຍນີ້ໂດຍອ່ານແລະຄິດຕຶກຕອງພະຄຳພີຄລິດສະຕຽນພາກພາສາເກັຣກ. ເຮົາເຊື່ອຟັງກົດໝາຍນີ້ໂດຍປັບປຸງຊີວິດຕາມຄຳແນະນຳ ຄຳສັ່ງແລະຫຼັກການຕ່າງໆທີ່ບັນທຶກໄວ້ໃນພະທຳເຫຼົ່ານັ້ນ. ເມື່ອເຊື່ອຟັງກົດໝາຍຂອງພະຄລິດ ເຮົາກໍກຳລັງເຊື່ອຟັງພະເຢໂຫວາເພາະທຸກສິ່ງທີ່ພະເຍຊູສອນລ້ວນແຕ່ມາຈາກພະເຢໂຫວາ.—ໂຢ. 8:28
ກົດໝາຍທີ່ສ້າງຂຶ້ນບົນພື້ນຖານຂອງຄວາມຮັກ
8. ກົດໝາຍຂອງພະຄລິດຖືກສ້າງບົນພື້ນຖານຫຍັງ?
8 ເຮືອນຫຼັງໜຶ່ງທີ່ຖືກສ້າງຢ່າງດີແລະມີພື້ນຖານທີ່ແໜ້ນໜາເຮັດໃຫ້ທຸກຄົນໃນເຮືອນຮູ້ສຶກປອດໄພ. ຄ້າຍຄືກັນ ກົດໝາຍທີ່ດີທີ່ຖືກສ້າງບົນພື້ນຖານທີ່ດີກໍເຮັດໃຫ້ທຸກຄົນທີ່ເຮັດຕາມກົດໝາຍນັ້ນຮູ້ສຶກໝັ້ນຄົງແລະປອດໄພ. ກົດໝາຍຂອງພະຄລິດຖືກສ້າງບົນພື້ນຖານທີ່ດີທີ່ສຸດ ນັ້ນກໍຄືຄວາມຮັກ. ເປັນຫຍັງຈຶ່ງເວົ້າແນວນັ້ນ?
ເມື່ອເຮົາປະຕິບັດກັບຄົນອື່ນດ້ວຍຄວາມຮັກ ເຮົາກໍກຳລັງເຊື່ອຟັງ “ກົດໝາຍຂອງພະຄລິດ” (ເບິ່ງຂໍ້ 9-14) *
9-10. ມີຕົວຢ່າງຫຍັງແດ່ທີ່ສະແດງວ່າທຸກຢ່າງທີ່ພະເຍຊູເຮັດແມ່ນຍ້ອນຄວາມຮັກ ແລະເຮົາຈະຮຽນແບບເພິ່ນໄດ້ແນວໃດ?
9 ເຫດຜົນທຳອິດ ທຸກຢ່າງທີ່ພະເຍຊູເຮັດແມ່ນຍ້ອນຄວາມຮັກ. ຄວາມອີ່ດູສົງສານແລະຄວາມເຫັນອົກເຫັນໃຈເປັນແງ່ໜຶ່ງຂອງຄວາມຮັກ. ຍ້ອນວ່າພະເຍຊູຮູ້ສຶກອີ່ດູສົງສານ ເພິ່ນຈຶ່ງໄດ້ສັ່ງສອນຝູງຊົນ ປິ່ນປົວຄົນເຈັບ ລ້ຽງອາຫານຄົນຫິວເຂົ້າ ແລະປຸກຄົນຕາຍໃຫ້ຟື້ນ. (ມັດ. 14:14; 15:32-38; ມໂກ. 6:34; ລືກາ 7:11-15) ເຖິງວ່າພະເຍຊູໃຊ້ເວລາແລະເຫື່ອແຮງຫຼາຍໃນການເຮັດສິ່ງເຫຼົ່ານັ້ນ ແຕ່ເພິ່ນກໍເຕັມໃຈຈັດໃຫ້ຄວາມຈຳເປັນຂອງຄົນອື່ນມາກ່ອນຂອງຕົວເອງ. ຍິ່ງກວ່າທັງໝົດ ເພິ່ນໄດ້ສະແດງຄວາມຮັກທີ່ຍິ່ງໃຫຍ່ໂດຍສະລະຊີວິດເພື່ອຄົນອື່ນ.—ໂຢ. 15:13.
10 ບົດຮຽນ: ເຮົາສາມາດຮຽນແບບພະເຍຊູໄດ້ໂດຍຈັດໃຫ້ຄວາມຈຳເປັນຂອງຄົນອື່ນມາກ່ອນຂອງຕົວເອງ. ເຮົາຍັງຮຽນແບບເພິ່ນໂດຍອີ່ຕົນແລະເຫັນອົກເຫັນໃຈຜູ້ຄົນໃນເຂດປະກາດ. ເມື່ອເຮົາປະກາດແລະສອນຂ່າວດີໃຫ້ຄົນອື່ນ ເຮົາກໍກຳລັງເຊື່ອຟັງກົດໝາຍຂອງພະຄລິດ.
11-12. (ກ) ສິ່ງໃດສະແດງໃຫ້ເຫັນວ່າພະເຢໂຫວາຮັກແລະເປັນຫ່ວງເຮົາ? (ຂ) ເຮົາຈະຮຽນແບບຄວາມຮັກຂອງພະອົງໄດ້ແນວໃດ?
11 ເຫດຜົນທີສອງ ພະເຍຊູສະແດງໃຫ້ເຫັນຄວາມຮັກຂອງພໍ່. ຕະຫຼອດການຮັບໃຊ້ ພະເຍຊູສະແດງໃຫ້ເຫັນວ່າພະເຢໂຫວາຮັກແລະເປັນຫ່ວງຜູ້ນະມັດສະການພະອົງແທ້ໆ. ສິ່ງໜຶ່ງທີ່ພະເຍຊູສອນແມ່ນພະເຢໂຫວາເບິ່ງວ່າເຮົາທຸກຄົນມີຄ່າ. (ມັດ. 10:31) ພະເຢໂຫວາຍິນດີຕ້ອນຮັບຄົນທີ່ອອກຈາກປະຊາຄົມຄືແກະທີ່ຫຼົງທາງເຊິ່ງກັບໃຈແລະກັບມາຫາປະຊາຄົມ. (ລືກາ 15:7, 10) ພະເຢໂຫວາພິສູດວ່າຮັກເຮົາໂດຍຈັດໃຫ້ລູກຊາຍຂອງພະອົງເປັນຄ່າໄຖ່ເພື່ອເຮົາ.—ໂຢ. 3:16
12 ບົດຮຽນ: ເຮົາຈະຮຽນແບບຄວາມຮັກຂອງພະເຢໂຫວາໄດ້ແນວໃດ? (ເອເຟ. 5:1, 2) ໂດຍເບິ່ງວ່າພີ່ນ້ອງທຸກຄົນມີຄ່າແລະຍິນດີຕ້ອນຮັບ “ແກະຫຼົງຝູງ” ທີ່ກັບມາຫາພະເຢໂຫວາ. (ເພງ. 119:176, ລ.ມ.) ເຮົາພິສູດວ່າເຮົາຮັກພີ່ນ້ອງໂດຍການເສຍສະລະເວລາແລະກຳລັງຂອງເຮົາເພື່ອຊ່ວຍເຫຼືອເຂົາເຈົ້າຕອນທີ່ເຂົາເຈົ້າຈຳເປັນ. (1 ໂຢ. 3:17) ຖ້າເຮົາສະແດງຄວາມຮັກຕໍ່ຄົນອື່ນ ເຮົາກໍກຳລັງເຊື່ອຟັງກົດໝາຍຂອງພະຄລິດ.
13-14. (ກ) ໃນໂຢຮັນ 13:34, 35 ພະເຍຊູສັ່ງພວກລູກສິດໃຫ້ເຮັດຫຍັງ ແລະເປັນຫຍັງຄຳສັ່ງນີ້ຈຶ່ງເປັນກົດໝາຍໃໝ່? (ຂ) ເຮົາຈະເຊື່ອຟັງຄຳສັ່ງໃໝ່ໄດ້ແນວໃດ?
13 ເຫດຜົນທີ 3 ພະເຍຊູສັ່ງພວກລູກສິດໃຫ້ສະແດງຄວາມຮັກແບບເສຍສະລະ. (ອ່ານໂຢຮັນ 13:34, 35) ຄຳສັ່ງໃໝ່ນີ້ຂອງພະເຍຊູເປັນກົດໝາຍໃໝ່ເພາະເຮົາຕ້ອງສະແດງຄວາມຮັກໃນແບບໃໝ່ເຊິ່ງບໍ່ໄດ້ບອກໃນກົດໝາຍທີ່ພະເຈົ້າໃຫ້ກັບຊາວອິດສະລາແອນ ນັ້ນຄື: ຮັກເພື່ອນຮ່ວມຄວາມເຊື່ອຄືກັບທີ່ພະເຍຊູຮັກເຮົາ. ນີ້ໝາຍຄວາມວ່າເຮົາຕ້ອງຮັກແບບເສຍສະລະ. * ເຮົາຕ້ອງຮັກພີ່ນ້ອງຫຼາຍກວ່າຮັກຕົວເອງ. ເຮົາຕ້ອງຮັກເຂົາເຈົ້າເຖິງຂັ້ນວ່າພ້ອມຈະສະລະຊີວິດເພື່ອເຂົາເຈົ້າຄືກັບທີ່ພະເຍຊູເຮັດເພື່ອເຮົາ.
14 ບົດຮຽນ: ເຮົາຈະເຊື່ອຟັງຄຳສັ່ງໃໝ່ນີ້ໄດ້ໂດຍເສຍສະລະບາງສິ່ງເພື່ອພີ່ນ້ອງຂອງເຮົາ. ເຮົາບໍ່ພຽງແຕ່ເຕັມໃຈທີ່ຈະເສຍສະລະຊີວິດເພື່ອເຂົາເຈົ້າ ແຕ່ເຮົາພ້ອມທີ່ຈະເສຍສະລະສິ່ງເລັກໆນ້ອຍໆບາງຢ່າງເພື່ອເຂົາເຈົ້າ ເຊັ່ນ: ສະລະຄວາມສະດວກເພື່ອໄປຮັບສົ່ງຜູ້ສູງອາຍຸໄປປະຊຸມ ຫຼືສະລະບາງສິ່ງທີ່ເຮົາມັກເພື່ອໃຫ້ຄົນທີ່ຮັກພໍໃຈ ຫຼືຂໍລາພັກວຽກເພື່ອໄປຊ່ວຍວຽກບັນເທົາທຸກ. ເມື່ອເຮົາເຮັດແບບນັ້ນ ເຮົາກໍກຳລັງເຊື່ອຟັງກົດໝາຍຂອງພະຄລິດ ແລະເຮົາຍັງຊ່ວຍໃຫ້ທຸກຄົນໃນປະຊາຄົມຮູ້ສຶກໝັ້ນຄົງແລະປອດໄພ.
ກົດໝາຍທີ່ສົ່ງເສີມຄວາມຍຸຕິທຳ
15-17. (ກ) ການກະທຳຂອງພະເຍຊູສະແດງໃຫ້ເຫັນວ່າເພິ່ນຮູ້ສຶກແນວໃດຕໍ່ຄວາມຍຸຕິທຳ? (ຂ) ເຮົາຈະຮຽນແບບພະເຍຊູໄດ້ແນວໃດ?
15 “ຄວາມຍຸຕິທຳ” ທີ່ໃຊ້ໃນຄຳພີໄບເບິນໝາຍເຖິງສິ່ງທີ່ພະເຢໂຫວາເຫັນວ່າຖືກຕ້ອງແລະເຮັດສິ່ງນັ້ນໂດຍບໍ່ລຳອຽງ. ເປັນຫຍັງເຮົາຈຶ່ງບອກໄດ້ວ່າກົດໝາຍຂອງພະຄລິດສົ່ງເສີມຄວາມຍຸຕິທຳ?
ພະເຍຊູໃຫ້ກຽດແລະປະຕິບັດກັບຜູ້ຍິງຢ່າງອ່ອນໂຍນ ລວມເຖິງຜູ້ທີ່ຖືກສັງຄົມລັງກຽດ (ເບິ່ງຂໍ້ 16) *
16 ເຫດຜົນທຳອິດ ຂໍໃຫ້ຄິດເຖິງການກະທຳ ຂອງພະເຍຊູທີ່ສະແດງໃຫ້ເຫັນວ່າເພິ່ນຮູ້ສຶກແນວໃດຕໍ່ຄວາມຍຸຕິທຳ. ຕອນທີ່ພະເຍຊູຢູ່ເທິງໂລກ ພວກຜູ້ນຳສາສະໜາຢິວກຽດຊັງຄົນຕ່າງຊາດ ດູຖູກຊາວຢິວສາມັນຊົນແລະບໍ່ໃຫ້ກຽດຜູ້ຍິງ. ແຕ່ພະເຍຊູປະຕິບັດກັບທຸກຄົນແບບບໍ່ລຳອຽງ. ເພິ່ນຍອມຮັບຄົນຕ່າງຊາດທີ່ມາຫາເພິ່ນດ້ວຍຄວາມເຊື່ອ. (ມັດ. 8:5-10, 13) ພະເຍຊູບໍ່ມີອະຄະຕິ ເພິ່ນປະກາດກັບທຸກຄົນບໍ່ວ່າຈະຮັ່ງມີຫຼືທຸກຍາກ. (ມັດ. 11:5; ລືກາ 19:2, 9) ເພິ່ນບໍ່ເຄີຍໃຊ້ຄວາມຮຸນແຮງຫຼືເວົ້າດູຖູກຜູ້ຍິງ. ກົງກັນຂ້າມເພິ່ນໃຫ້ກຽດແລະອ່ອນໂຍນຕໍ່ຜູ້ຍິງ ເຊິ່ງລວມທັງຜູ້ທີ່ຖືກສັງຄົມລັງກຽດ.—ລືກາ 7:37-39, 44-50
17 ບົດຮຽນ: ເຮົາຮຽນແບບພະເຍຊູໄດ້ເມື່ອປະຕິບັດກັບຄົນອື່ນໂດຍບໍ່ລຳອຽງແລະປະກາດກັບທຸກຄົນທີ່ຢາກຟັງບໍ່ວ່າເຂົາເຈົ້າຈະມີຖານະທາງສັງຄົມແບບໃດຫຼືຖືສາສະໜາໃດ. ຄລິດສະຕຽນຜູ້ຊາຍຮຽນແບບພະເຍຊູໂດຍໃຫ້ກຽດຜູ້ຍິງ. ເມື່ອເຮັດແບບນີ້ ເຮົາກໍກຳລັງເຊື່ອຟັງກົດໝາຍຂອງພະຄລິດ.
18-19. ພະເຍຊູສອນຫຍັງກ່ຽວກັບຄວາມຍຸຕິທຳ ແລະເຮົາໄດ້ບົດຮຽນຫຍັງແດ່?
18 ເຫດຜົນທີສອງ ຂໍໃຫ້ຄິດເຖິງສິ່ງທີ່ພະເຍຊູສອນ ກ່ຽວກັບຄວາມຍຸຕິທຳ. ເພິ່ນສອນຫຼັກການຕ່າງໆທີ່ຊ່ວຍລູກສິດໃຫ້ປະຕິບັດກັບຄົນອື່ນຢ່າງເປັນທຳ. ຕົວຢ່າງ: ຫຼັກການການປະພຶດທີ່ເອີ້ນວ່າກົດຄຳ. (ມັດ. 7:12) ຖ້າເຮົາຢາກໃຫ້ຄົນອື່ນປະຕິບັດກັບເຮົາຢ່າງເປັນທຳ ເຮົາກໍຕ້ອງປະຕິບັດກັບເຂົາເຈົ້າຢ່າງເປັນທຳ. ເມື່ອເຮົາເຮັດແບບນັ້ນ ເຂົາເຈົ້າກໍອາດຈະປະຕິບັດກັບເຮົາຢ່າງເປັນທຳຄືກັນ. ແຕ່ຖ້າເຮົາຖືກປະຕິບັດແບບບໍ່ເປັນທຳເດ? ພະເຍຊູຍັງສອນລູກສິດວ່າໃຫ້ໄວ້ວາງໃຈພະເຢໂຫວາ ເພາະພະອົງຈະ “ໃຫ້ຄວາມຍຸຕິທຳກັບຄົນທີ່ . . . ຂໍຄວາມຊ່ວຍເຫຼືອຈາກພະອົງທັງກາງເວັນແລະກາງຄືນ.” (ລືກາ 18:6, 7, ລ.ມ.) ນີ້ເປັນຄຳສັນຍາໃນທຳນອງທີ່ວ່າ: ພະເຈົ້າຮູ້ບັນຫາຕ່າງໆທີ່ເຮົາເຈິໃນສະໄໝສຸດທ້າຍນີ້ແລະພະອົງຈະໃຫ້ທຸກຄົນໄດ້ຮັບຄວາມຍຸຕິທຳໃນເວລາທີ່ພະອົງເຫັນວ່າເໝາະສົມ.—2 ເທ. 1:6
19 ບົດຮຽນ: ເມື່ອເຮົາເຮັດຕາມຫຼັກການທີ່ພະເຍຊູສອນ ເຮົາກໍຈະປະຕິບັດກັບຄົນອື່ນຢ່າງເປັນທຳ ຖ້າເຮົາຖືກປະຕິບັດແບບບໍ່ເປັນທຳໃນໂລກຂອງຊາຕານ ເຮົາກໍໄດ້ກຳລັງໃຈທີ່ຮູ້ວ່າພະເຢໂຫວາຈະ ໃຫ້ເຮົາໄດ້ຮັບຄວາມຍຸຕິທຳແນ່ນອນ.
ຜູ້ມີສິດອຳນາດໃນລະດັບໜຶ່ງຄວນປະຕິບັດກັບຄົນອື່ນແນວໃດ?
20-21. (ກ) ຜູ້ມີສິດອຳນາດໃນລະດັບໜຶ່ງຄວນປະຕິບັດກັບຄົນອື່ນແນວໃດ? (ຂ) ຜົວຈະສະແດງຄວາມຮັກແບບເສຍສະລະໄດ້ແນວໃດ ແລະພໍ່ຄວນຈະປະຕິບັດກັບລູກແນວໃດ?
20 ຕາມກົດໝາຍຂອງພະຄລິດ ຜູ້ມີສິດອຳນາດໃນລະດັບໜຶ່ງຄວນປະຕິບັດກັບຄົນອື່ນແນວໃດ? ເນື່ອງຈາກຄວາມຮັກເປັນພື້ນຖານຂອງກົດໝາຍນີ້ ຜູ້ທີ່ມີອຳນາດຕ້ອງໃຫ້ກຽດແລະປະຕິບັດດ້ວຍຄວາມຮັກຕໍ່ຜູ້ທີ່ເຂົາເຈົ້າເບິ່ງແຍງ. ເຂົາເຈົ້າຕ້ອງຈື່ວ່າພະເຍຊູຢາກໃຫ້ເຮົາເຮັດທຸກຢ່າງດ້ວຍຄວາມຮັກ.
21 ໃນຄອບຄົວ. ຜົວຕ້ອງຮັກເມຍ “ເໝືອນດັ່ງທີ່ພະຄລິດເຮັດກັບປະຊາຄົມ.” (ເອເຟ. 5:25, 28, 29, ລ.ມ.) ຜົວຄວນຮຽນແບບຄວາມຮັກທີ່ເສຍສະລະຂອງພະເຍຊູໂດຍຈັດໃຫ້ຄວາມຈຳເປັນແລະຜົນປະໂຫຍດຂອງເມຍມາກ່ອນຂອງຕົວເອງ. ຜູ້ຊາຍບາງຄົນອາດຮູ້ສຶກວ່າຍາກທີ່ຈະສະແດງຄວາມຮັກແບບນີ້ ຍ້ອນເຂົາເຈົ້າເຕີບໃຫຍ່ຂຶ້ນໃນວັດທະນາທຳທີ່ບໍ່ໄດ້ຖືວ່າການປະຕິບັດກັບຄົນອື່ນຢ່າງເປັນທຳແລະດ້ວຍຄວາມຮັກເປັນເລື່ອງສຳຄັນ. ເຖິງວ່າເປັນເລື່ອງຍາກທີ່ຈະປ່ຽນນິດໄສແບບນີ້ ແຕ່ຖ້າຢາກເຊື່ອຟັງກົດໝາຍຂອງພະຄລິດ ເຂົາເຈົ້າກໍຈຳເປັນຕ້ອງປ່ຽນ. ຜົວທີ່ສະແດງຄວາມຮັກແບບເສຍສະລະ ເມຍກໍຈະນັບຖືລາວ. ພໍ່ທີ່ຮັກລູກແທ້ໆຈະບໍ່ທຳຮ້າຍລູກດ້ວຍຄຳເວົ້າແລະການກະທຳ. (ເອເຟ. 4:31) ແຕ່ລາວຈະສະແດງຄວາມຮັກແລະພູມໃຈໃນແບບທີ່ເຮັດໃຫ້ລູກຮູ້ສຶກໝັ້ນຄົງແລະປອດໄພ. ລູກກໍຈະຮັກແລະໄວ້ວາງໃຈພໍ່ທີ່ເຮັດແບບນັ້ນ.
22. ໃນ 1 ເປໂຕ 5:1-3 ຝູງແກະເປັນຂອງໃຜ ແລະເຂົາເຈົ້າຄວນໄດ້ຮັບການປະຕິບັດແນວໃດ?
22 ໃນປະຊາຄົມ. ຜູ້ເຖົ້າແກ່ຕ້ອງຈື່ໄວ້ວ່າເຂົາເຈົ້າບໍ່ແມ່ນເຈົ້າຂອງ “ຝູງແກະ.” (ໂຢ. 10:16; ອ່ານ 1 ເປໂຕ 5:1-3) ຄຳວ່າ: “ຝູງລູກສິດ [ຝູງແກະ] ແຫ່ງພະເຈົ້າ” “ພ້ອມຕາມພະເຈົ້າ” ແລະ “ເຈົ້ານາຍເທິງມູນລະດົກ” ໃຊ້ເພື່ອເຕືອນຜູ້ເຖົ້າແກ່ວ່າແກະເປັນຂອງພະເຢໂຫວາ. ພະອົງຕ້ອງການໃຫ້ແກະຂອງພະອົງໄດ້ຮັບການປະຕິບັດດ້ວຍຄວາມຮັກແລະຄວາມອ່ອນໂຍນ. (1 ເທ. 2:7, 8) ພະເຢໂຫວາພໍໃຈຜູ້ເຖົ້າແກ່ທີ່ເຮັດໜ້າທີ່ເບິ່ງແຍງແກະດ້ວຍຄວາມຮັກ. ພີ່ນ້ອງກໍຮັກແລະນັບຖືຜູ້ເຖົ້າແກ່ທີ່ເຮັດແບບນັ້ນ.
23-24. (ກ) ຜູ້ເຖົ້າແກ່ມີໜ້າທີ່ແນວໃດໃນການຈັດການກັບຄວາມຜິດທີ່ຮ້າຍແຮງ? (ຂ) ຜູ້ເຖົ້າແກ່ຕ້ອງສຳນຶກເຖິງຫຍັງສະເໝີ?
23 ຜູ້ເຖົ້າແກ່ມີໜ້າທີ່ແນວໃດໃນການຈັດການກັບຄວາມຜິດທີ່ຮ້າຍແຮງ? ໜ້າທີ່ຂອງເຂົາເຈົ້າບໍ່ຄືກັບໜ້າທີ່ຜູ້ພິພາກສາແລະຜູ້ເຖົ້າແກ່ທີ່ຢູ່ພາຍໃຕ້ກົດໝາຍທີ່ພະເຢໂຫວາໃຫ້ຊາດອິດສະລາແອນ. ຕາມກົດໝາຍນັ້ນ ຜູ້ຊາຍທີ່ໄດ້ຮັບການແຕ່ງຕັ້ງບໍ່ພຽງແຕ່ຕັດສິນກ່ຽວກັບເລື່ອງການນະມັດສະການພະເຢໂຫວາ ເຂົາເຈົ້າຍັງຕັດສິນຄະດີທາງແພ່ງແລະທາງອາຍານຳ. ແຕ່ຕາມກົດໝາຍຂອງພະຄລິດ ຜູ້ເຖົ້າແກ່ມີບົດບາດທີ່ຈະຈັດການກັບເລື່ອງການນະມັດສະການພະເຢໂຫວາເທົ່ານັ້ນ. ເຂົາເຈົ້າຮູ້ວ່າພະເຢໂຫວາໃຫ້ເຈົ້າໜ້າທີ່ບ້ານເມືອງມີໜ້າທີ່ຈັດການກັບຄະດີທາງແພ່ງແລະທາງອາຍາ ນີ້ລວມທັງສິດໃນການລົງໂທດປັບໃໝແລະໃຫ້ເຂົ້າຄຸກ.—ໂລມ 13:1-4
24 ຜູ້ເຖົ້າແກ່ມີໜ້າທີ່ແນວໃດເມື່ອບາງຄົນໃນປະຊາຄົມເຮັດຜິດຮ້າຍແຮງ? ເຂົາເຈົ້າໃຊ້ຄຳພີໄບເບິນເພື່ອຊັ່ງຊາເລື່ອງຕ່າງໆແລະຕັດສິນ. ເຂົາເຈົ້າຕ້ອງສຳນຶກສະເໝີວ່າ ກົດໝາຍຂອງພະຄລິດມີຄວາມຮັກເປັນພື້ນຖານ. ຄວາມຮັກເຮັດໃຫ້ຜູ້ເຖົ້າແກ່ຄິດວ່າ ຕ້ອງເຮັດແນວໃດເພື່ອຊ່ວຍສະມາຊິກໃນປະຊາຄົມທີ່ຕົກເປັນເຫຍື່ອຂອງການເຮັດຜິດຮ້າຍແຮງນັ້ນ? ສ່ວນຜູ້ເຮັດຜິດ ຄວາມຮັກຈະເຮັດໃຫ້ຜູ້ເຖົ້າແກ່ພິຈາລະນາວ່າ: ລາວກັບໃຈແທ້ໆບໍ? ເຮົາຈະຊ່ວຍລາວແນວໃດເພື່ອຈະກັບມາມີສາຍສຳພັນທີ່ດີກັບພະເຢໂຫວາອີກ?
25. ເຮົາຈະພິຈາລະນາຫຍັງໃນບົດຄວາມຕໍ່ໄປ?
25 ພວກເຮົາຮູ້ສຶກຂອບໃຈແທ້ໆທີ່ໄດ້ຢູ່ພາຍໃຕ້ກົດໝາຍຂອງພະຄລິດ! ເມື່ອເຮົາເຊື່ອຟັງກົດໝາຍນັ້ນ ເຮົາກໍມີສ່ວນໃນການເຮັດໃຫ້ປະຊາຄົມເປັນບ່ອນທີ່ທຸກຄົນຮູ້ສຶກມີຄ່າ ໄດ້ຮັບຄວາມຮັກ ແລະປອດໄພ. ທີ່ຈິງເຮົາຢູ່ໃນໂລກທີ່ ‘ຄົນຊົ່ວແລະຄົນລໍ້ລວງທັງຫຼາຍຈະທຳຊົ່ວຮ້າຍມາກຂຶ້ນ.’ (2 ຕີໂມ. 3:13) ດັ່ງນັ້ນ ເຮົາຕ້ອງເຝົ້າລະວັງຢູ່ສະເໝີ. ປະຊາຄົມຄລິດສະຕຽນຈະສະແດງໃຫ້ເຫັນເຖິງຄວາມຍຸຕິທຳຂອງພະເຈົ້າແນວໃດເມື່ອຈັດການກັບການລ່ວງລະເມີດເດັກທາງເພດ? ບົດຄວາມຕໍ່ໄປຈະຕອບຄຳຖາມນີ້.
ເພງ 15 ສັນລະເສີນລູກຫົວປີຂອງພະເຢໂຫວາ!
^ ຂໍ້ 5 ບົດຄວາມນີ້ແລະອີກ 2 ບົດຄວາມຕໍ່ຈາກນີ້ຢູ່ໃນບົດຄວາມຊຸດທີ່ຈະພິຈາລະນາວ່າ ເປັນຫຍັງເຮົາໝັ້ນໃຈໄດ້ວ່າພະເຢໂຫວາເປັນພະເຈົ້າແຫ່ງຄວາມຮັກແລະຄວາມຍຸຕິທຳ. ພະອົງຢາກໃຫ້ຄົນຂອງພະອົງໄດ້ຮັບຄວາມຍຸຕິທຳ ແລະພະອົງປອບໃຈຄົນທີ່ຖືກປະຕິບັດແບບບໍ່ເປັນທຳໃນໂລກທີ່ຊົ່ວຮ້າຍນີ້.
^ ຂໍ້ 1 ເບິ່ງບົດຄວາມ “ຄວາມຮັກແລະຄວາມຍຸຕິທຳສະໄໝອິດສະລາແອນບູຮານ” ໃນຫໍສັງເກດການ ກຸມພາ 2019.
^ ຂໍ້ 3 ຄາລາຊີ 6:2 (ລ.ມ.): “ໃຫ້ຊ່ວຍແບ່ງເບົາພາລະຂອງກັນແລະກັນຕໍ່ໄປ ການເຮັດແບບນີ້ສະແດງວ່າພວກເຈົ້າເຊື່ອຟັງກົດໝາຍຂອງພະຄລິດ.”
^ ຂໍ້ 13 ການອະທິບາຍສຳນວນ: ຄວາມຮັກແບບເສຍສະລະກະຕຸ້ນເຮົາໃຫ້ຈັດຜົນປະໂຫຍດແລະຄວາມຈຳເປັນຂອງຄົນອື່ນມາກ່ອນຂອງເຮົາເອງ. ເຮົາເຕັມໃຈທີ່ຈະສະລະບາງສິ່ງແລະຍອມທີ່ຈະສະລະບາງຢ່າງເພື່ອຜົນປະໂຫຍດຫຼືຊ່ວຍເຫຼືອຄົນອື່ນ.
^ ຂໍ້ 62 ຄຳອະທິບາຍຮູບພາບ: ພະເຍຊູເຫັນແມ່ໝ້າຍທີ່ລູກຊາຍຄົນດຽວຕາຍ ຍ້ອນເພິ່ນຮູ້ສຶກອີ່ຕົນ ເພິ່ນຈຶ່ງປຸກລູກຊາຍຂອງແມ່ໝ້າຍ.
^ ຂໍ້ 64 ຄຳອະທິບາຍຮູບພາບ: ພະເຍຊູກິນເຂົ້າຢູ່ເຮືອນຂອງຊີໂມນທີ່ເປັນຟາລິຊຽນ. ຜູ້ຍິງທີ່ອາດເປັນໂສເພນີຄົນໜຶ່ງມາລ້າງຕີນໃຫ້ພະເຍຊູດ້ວຍນ້ຳຕາຂອງລາວ ລາວເອົາຜົມເຊັດຕີນໃຫ້ເພິ່ນແລະຖອກນ້ຳມັນຫອມໃສ່ຕີນເພິ່ນ. ຊີໂມນບໍ່ພໍໃຈກັບສິ່ງທີ່ຜູ້ຍິງນັ້ນເຮັດ ແຕ່ພະເຍຊູໄດ້ປົກປ້ອງລາວ.
ເລື່ອງທີ່ເຈົ້າອາດຈະມັກ
ຫໍສັງເກດການສະບັບສຶກສາ
ຄວາມຮັກແລະຄວາມຍຸຕິທຳສະໄໝອິດສະລາແອນບູຮານ
ກົດໝາຍຂອງໂມເຊສະແດງໃຫ້ເຫັນວ່າພະເຢໂຫວາຄິດແນວໃດກ່ຽວກັບຄວາມຮັກແລະຄວາມຍຸຕິທຳ?
