1. Ta men ko ruo jemaroñ lõke ikijjeen yokwe eo an Jeova ñan armej ro an?

JEOVA ANIJ ej yokwe ro rej kabuñ ñane. Ear yokwe er jãn jinoin im eban jem̦l̦o̦k an yokwe er. Ej bareinwõt yokwe ekajet jim̦we. (Sam 33:5) Kõn men in, jemaroñ lõke bwe: (1) Eddo bũruon Jeova ñe enana an ro jet kõm̦m̦an ñan ri-karejar ro an. (2) Ej kallim̦ur bwe enaaj kajeik ro ekar nana aer kõm̦m̦an ñan armej ro an. Ilo katak eo kein kajuon me ej m̦õttan katak in, jaar katak bwe Kien eo Anij ear lel̦o̦k ñan ri-Israel ro ikijjeen Moses ear pedped ioon yokwe. * (Lale kõmel̦el̦e eo itulal̦.) Kien eo ear rõjañ armej ro ñan kwal̦o̦k ekajet jim̦we ñan aolep, el̦aptata ñan ro rem̦õjn̦o̦ im ban. (Dt. 10:18) Kien eo ej kaalikkar joñan an Jeova lukkuun kaorõk ro ri-karejeran.

2. Ta kajjitõk ko jenaaj etali?

² Ear jem̦l̦o̦k Kien Moses ilo iiõ eo 33 ãlikin Christ, ke ear jutak eklejia eo an Kũrjin ro. Mel̦el̦ein ke bwe enaaj ejjel̦o̦k juon kien ñan kõjparok Kũrjin ro, me ej pedped ioon yokwe im ej rõjañ armej ro ñan kwal̦o̦k ekajet jim̦we? Jaab! Kũrjin ro rar pãd ium̦win juon kien ekããl, ej kien Christ. Ilo katak in, jenaaj m̦okta etale ta kien in ekããl. Innem, jenaaj uwaaki kajjitõk kein: Etke jemaroñ ba bwe kien in ej pedped ioon yokwe? Etke jemaroñ ba bwe ej rõjañ armej ro ñan kwal̦o̦k ekajet jim̦we? Ekkar ñan kien in, en kar ewi wãween an ro ewõr aer maroñ kõm̦m̦an ñan ro rej pãd ium̦win maroñ eo aer?

3. Ãinwõt an Galetia 6:2 kar kwal̦o̦k kõn “kien Christ,” kien in ej kitibuj ta?

³ Riit Galetia 6:2. Kũrjin ro rej pãd ium̦win “kien Christ.” Jesus ear jab je juon laajrakin kien im lil̦o̦k ñan ri-kal̦oor ro an,  ijoke ear lel̦o̦k naanin jiroñ ko, kakien ko, im naanin kakapilõklõk ko bwe ren tõl er. “Kien Christ” ej kitibuj aolep men ko Jesus ear katakin armej ro kaki. Ilo pãrokõrããp ko lal̦tak, jenaaj kal̦apl̦o̦k ad mel̦el̦e kõn kien in.

4-5. Ewi wãween an kar Jesus katakin armej ro, im ñããt eo ear katakin er?

⁴ Ewi wãween an kar Jesus katakin armej ro? M̦okta, ear katakin armej ro ikijjeen men ko ear ba. Ear kajoor naan ko an kõnke ear kõnnaan kõn m̦ool eo kõn Anij, ear katakin er kõn mour eo em̦ool, im ear jitõñl̦o̦k ñan Aelõñ eo an Anij bwe ej mejal̦an aolepen apañ ko an armej. (Luk 24:19) Jesus ear bar katakin armej ro ikijjeen an kar kõm̦m̦an joñak ñan er. Ilo wãween an kar mour, ear kwal̦o̦k ñan ri-kal̦oor ro an kõn wãween aer aikuj mour.​—Jon 13:15.

⁵ Ñããt eo Jesus ear katakin armej ro? Ear katakin armej ro ke ear kõm̦m̦ane jerbalin kwal̦o̦k naan eo an ijin ioon lal̦. (Matu 4:23) Ear bareinwõt katakin ri-kal̦oor ro an ãlikin wõt an kar jerkakpeje. Ñan waanjoñak, ear wal̦o̦kl̦o̦k ñan juon kumi in ri-kal̦oor me emaroñ kar lõñl̦o̦k jãn 500 uwaaer, im ear lel̦o̦k kien eo ñan er bwe ren ‘kõm̦m̦an ri-kal̦oor.’ (Matu 28:19, 20; 1 Ko. 15:6, UBS) Ãinwõt eo ej bõran eklejia eo, Jesus ear wõnm̦aanl̦o̦k wõt im katakin ri-kal̦oor ro an ãlikin an kar jepl̦aak ñan lañ. Ñan waanjoñak, ilo turinl̦o̦k iiõ eo 96 ãlikin Christ, Christ ear tõl rijjilõk Jon bwe en lel̦o̦k naanin rõjañ im kauwe ñan Kũrjin ro rej rũkkapit.​—Kol. 1:18; Rev. 1:1.

6-7. (1) Ia eo katak ko an Jesus repãd ie? (2) Ewi wãween ad pokake kien Christ?

⁶ Ia eo katak ko an Jesus repãd ie? Bokin Gospel ko emãn rej kwal̦o̦k kõn elõñ iaan men ko Jesus ear ba im kõm̦m̦ani ke ear pãd ioon lal̦ in. Bok ko jet ilo Jeje ko jãn Kajin Grik rej kal̦apl̦o̦k ad mel̦el̦e kõn l̦õmn̦ak ko an Jesus kõn wãween ko rej wal̦o̦k, kõnke ro rar je bok kein, kajoor eo an Anij ear kõm̦akũt er ñan jei im rar bõk l̦õmn̦ak ko an Christ.​—1 Ko. 2:16.

⁷ Men ko jej katak: Katak ko an Jesus rejejjet ñan aolep wãween ko ilo mour. Kõn men in, kien Christ ej jelõt aolep men ko jej kõm̦m̦ani ilo m̦õko im̦õd, ilo jikin jerbal ak jikuul̦, im bareinwõt ilo eklejia eo ad. Jej katak kõn kien in ilo ad riiti Jeje ko jãn Kajin Grik im kõl̦mãnl̦o̦kjen̦ kaki. Jej pokake kien in ilo ad l̦oori naanin jiroñ ko, kakien ko, im naanin kakapilõklõk ko  ilo bok kein. Ñe jej pokake kien Christ, jej pokake Anij eo ad me el̦ap yokwe ippãn, Jeova, kõnke aolep katak ko Jesus ear katakin armej ro kaki rar itok jãn E.​—Jon 8:28.

8. Ta bo̦unteijen eo ak pedpedin kien Christ?

⁸ Juon em̦ em̦m̦an me kar kalõke ioon juon bo̦unteijen ak pedped epen, ej kõm̦m̦an bwe ro rej jokwe ie ren jokwane im ejjel̦o̦k aer uwõta. Ãindeinl̦o̦k wõt, juon kien em̦m̦an me kar kalõke ioon juon pedped epen, ej kõm̦m̦an bwe ro rej mour ekkar ñane ren jokwane im ejjel̦o̦k aer uwõta. Kar kalõk kien Christ ioon bo̦unteijen ak pedped eo em̦m̦antata, yokwe. Etke jemaroñ ba men in?

9-10. Ta waanjoñak ko rej kaalikkar bwe yokwe ear kõm̦akũt Jesus ñan kõm̦m̦ani aolep men ko ear kõm̦m̦ani, im ewi wãween ad maroñ anõke?

⁹ Kein kajuon, yokwe ear kõm̦akũt Jesus ñan kõm̦m̦ani aolep men ko ear kõm̦m̦ani. An juon tũriam̦okake ro jet ej kaalikkar an wõr yokwe ippãn. Kõn an kar Jesus tũriam̦o ear katakin jarlepju in armej ro, kõmour ro renañinmej, naajdik ro rekwõle, im kõjerkakpejeik ro remej. (Matu 14:14; 15:32-38; Mark 6:34; Luk 7:11-15) Meñe el̦ap an kar men kein bõk iien im maroñ ko an, ak ear m̦õn̦õn̦õ in likũt aikuj ko an ro jet m̦okta jãn aikuj ko an make. Wãween eo el̦aptata an kar kwal̦o̦k yokwe, ej ilo an kar lel̦o̦k mour eo an kõn kõj.​—Jon 15:13.

¹⁰ Men ko jej katak: Jemaroñ anõke Jesus ilo ad likũt aikuj ko an ro jet m̦okta jãn aikuj ko ad make. Jemaroñ bar anõke ilo ad kal̦apl̦o̦k ad jel̦ã kwal̦o̦k tũriam̦o ñan armej ro ilo teretore eo ad. Ñe tũriam̦o rot in ej kõm̦akũt kõj ñan kwal̦o̦k naan im katakin ro jet kõn nuuj eo em̦m̦an, jej pokake kien Christ.

11-12. (1) Ta eo ej kaalikkar bwe Jeova ej lukkuun kaorõk kõj? (2) Ewi wãween ad maroñ anõke yokwe eo an Jeova?

¹¹ Kein karuo, Jesus ear kaalikkar yokwe eo an Jemãn. Ke ear kwal̦o̦k naan, ear kwal̦o̦k joñan an Jeova lukkuun kaorõk ro rej kabuñ ñane. Juon iaan men ko Jesus ear katakin ro jet kake ej bwe kõj kajjojo jelukkuun aorõk ippãn Jemãd ilañ. (Matu 10:31) Jeova ekijooror in karwaineneiktok jiip eo ear jebwãbwe me em̦õj an ukel̦o̦k im ro̦o̦ltok ñan eklejia eo. (Luk 15:7, 10) Jeova ear kam̦ool yokwe eo an ñan kõj ikijjeen an kar aje Nejin kõn kõj ãinwõt juon menin katok.​—Jon 3:16.

¹² Men ko jej katak: Ewi wãween ad maroñ anõke yokwe eo an Jeova? (Ep. 5:1, 2) Jej watõk kajjojo iaan ro jeid im jatid bwe raorõk, im jej m̦õn̦õn̦õ in karwaineneiktok ‘jiip eo ear jebwãbwe’ me em̦õj an jepl̦aaktok ñan ippãn Jeova. (Sam 119:176, UBS) Jej kam̦ool bwe jej yokwe ro jeid im jatid ilo ad kõjerbal iien im maroñ ko ad ñan jipañ er, el̦aptata ilo iien ko rej aikuj jipañ. (1 Jon 3:17) Ñe jej kwal̦o̦k ad yokwe ro jet, jej pokake kien Christ.

13-14. (1) Ekkar ñan Jon 13:34, 35, ta eo Jesus ear kakien ri-kal̦oor ro an bwe ren kwal̦o̦ke, im etke ej juon kien ekããl? (2) Ewi wãween ad pokake kien in ekããl?

¹³ Kein kajilu, Jesus ear kakien ri-kal̦oor ro an bwe ren kwal̦o̦k yokwe eo em̦ool me juon ej m̦õn̦õn̦õ in kaarmejjeteik e make. (Riit Jon 13:34, 35.) Kien in an Jesus ej juon kien ekããl kõnke ej kitibuj ad aikuj kwal̦o̦k yokwe ilo juon wãween me ro rar pãd ium̦win Kien Moses rar jab aikuj l̦oore. Ta kien in ekããl? Ej bwe jen yokwe ro jeid im jatid ãinwõt an kar Jesus yokwe kõj. Men in ej kitibuj an juon kwal̦o̦k yokwe eo em̦ool me juon ej kaarmejjeteik e make. * (Lale kõmel̦el̦e eo itulal̦.) Jej aikuj in yokwe ro jeid im jatid el̦apl̦o̦k jãn ad yokwe kõj make. Joñan, jej aikuj m̦õn̦õn̦õ in mej kõn er ãinwõt an kar Jesus kõm̦m̦ane ñan kõj.

 ¹⁴ Men ko jej katak: Ewi wãween ad pokake kien eo ekããl? Eñin bwe jen kaarmejjeteik kõj make ñan jipañ ro jeid im jatid. Jejjab m̦õn̦õn̦õ wõt in kaarmejjeteik kõj make ilo wãween eo el̦aptata, ad lel̦o̦k mour eo ad kõn er, ak jej bar m̦õn̦õn̦õ in kõm̦m̦ane men in ilo wãween ko reddik. Ñan waanjoñak, ñe jej kaarmejjeteik kõj make ñan ektake ro jeid im jatid rerũtto ñan kweilo̦k, m̦õn̦õn̦õ in kaarmejjeteik kõn̦aan ko ad ñan kam̦õn̦õn̦õik ro jej yokwe er, ak kõjerbale raanin kakkije ko ad jãn jerbal ñan jipañ ilo jikin ko rejorrããn jãn l̦añ ko rel̦l̦ap, jej pokake kien Christ. Jej bareinwõt jipañ kõm̦m̦an bwe eklejia eo ad en juon jikin me kajjojo iaan armej ro ie rej eñjake aer jokwane im jab uwõta.

15-17. (1) Ewi wãween an kar kõm̦m̦an ko an Jesus kaalikkar bwe ewõr ekajet jim̦we ippãn? (2) Ewi wãween ad maroñ anõke Jesus?

¹⁵ Ilo Baibõl̦, “ekajet jim̦we” ej mel̦el̦ein ñan kõm̦m̦ane men eo Anij ej watõk bwe ejim̦we im kõm̦m̦ane ilo ejjel̦o̦k kalijekl̦o̦k. Etke jemaroñ ba bwe kien Christ ej rõjañ kõj ñan kwal̦o̦k ekajet jim̦we?

¹⁶ Kein kajuon, l̦õmn̦ak kõn wãween an kar kõm̦m̦an ko an Jesus kaalikkar bwe ewõr ekajet jim̦we ippãn. Ilo raan ko an Jesus, ri-tõlin kabuñ eo an ri-Ju ro rar dike ro rejjab ri-Ju, kõjekdo̦o̦n ri-Ju ro me rar jab jikuul̦ ilo jikuul̦ ko an kabuñ eo aer, im jab kwal̦o̦k kautiej ñan kõrã ro. Bõtab aolep iien ear jim̦we wãween an Jesus kõm̦m̦an ñan aolep armej im ear jab kwal̦o̦k kalijekl̦o̦k. Ear m̦õn̦õn̦õ in bõk ro rar jab ri-Ju me rar kwal̦o̦k aer tõmak ilo e bwe ren l̦oore. (Matu 8:5-10, 13) Ear kwal̦o̦k naan ñan aolep armej ilo ejjel̦o̦k kalijekl̦o̦k, ñan ro rem̦weiie im ro rejeram̦õl jim̦or. (Matu 11:5; Luk 19:2, 9) Ejjel̦o̦k juon iien ear nana ak lãj wãween an kõm̦m̦an ñan kõrã ro. Ijello̦kun an kar ãindein, ear kwal̦o̦k kautiej im jouj ñan kõrã ro, ekoba kõrã ro me ro jet rar watõk er bwe ejjel̦o̦k tokjãer.​—Luk 7:37-39, 44-50.

¹⁷ Men ko jej katak: Jemaroñ anõke Jesus ilo ad kõm̦m̦an ñan ro jet ilo ejjel̦o̦k kalijekl̦o̦k im kwal̦o̦k naan ñan aolep ro rem̦õn̦õn̦õ in roñjake meñe er ri-m̦weiie ak rijjeram̦õl, im jekdo̦o̦n ta kabuñ eo aer. Em̦m̦aan ro me rej Kũrjin rej anõke joñak in an Jesus ilo aer kautiej kõrã ro. Ñe jej kõm̦m̦ani men kein, jej pokake kien Christ.

18-19. Ta eo Jesus ear katakin ro jet kake kõn ekajet jim̦we, im ta men ko jej katak jãn men in?

¹⁸ Kein karuo, l̦õmn̦ak kõn ta eo Jesus ear katakin ro jet kake kõn ekajet jim̦we. Ear kwal̦o̦k kõn naanin kakapilõklõk ko me renaaj kar jipañ ri-kal̦oor ro an bwe en jim̦we wãween aer kõm̦m̦an ñan ro jet. Ñan waanjoñak, l̦õmn̦ak kõn kien eo eaorõk: Kõm̦m̦an ñan ro jet ilo wãween eo jekõn̦aan bwe ren kõm̦m̦an ñan kõj. (Matu 7:12) Kõj aolep jekõn̦aan bwe en em̦m̦an wãween an ro jet kõm̦m̦an ñan kõj. Kõn men in, jej aikuj bar ãindein ñan ro jet. El̦aññe jej kõm̦m̦ane men in, emaroñ kõm̦akũt er bwe en bar em̦m̦an aer kõm̦m̦an ñan kõj. Ak ta el̦aññe ejjab jim̦we im em̦m̦an an ro jet kõm̦m̦an ñan kõj? Jesus ear bar katakin ri-kal̦oor ro an ñan lõke bwe Jeova enaaj “ekajet kõn [ro] rej lam̦õj ñan E raan im boñ.” (Luk 18:6, 7) Ej ãinwõt ñe naan kein rej juon kallim̦ur im rej ba: Anij eo ad im el̦ap an ekajet jim̦we ejel̦ã kõn apañ ko jej iiooni ilo raan kein ãliktata, im enaaj kõm̦m̦an bwe jen lo ekajet jim̦we ilo iien eo ejejjet.​—2 Te. 1:6.

¹⁹ Men ko jej katak: Ñe jej l̦oore naanin kakapilõklõk ko me Jesus ear katakin armej ro kaki, enaaj jim̦we wãween ad kõm̦m̦an ñan ro jet. Im el̦aññe ewõr juon men enana im ejjab jim̦we ear wal̦o̦k ñan kõj ilo lal̦ in an Setan, jemaroñ aenõm̦m̦an wõt kõn ad jel̦ã bwe Jeova enaaj bõktok ekajet jim̦we ñan kõj.

20-21. (1) En kar ewi wãween an em̦m̦aan ro ewõr aer maroñ kõm̦m̦an ñan ro jet? (2) Ewi wãween an juon em̦m̦aan maroñ kwal̦o̦k yokwe eo em̦ool ñan lio pãleen, im en kar ewi wãween an kõm̦m̦an ñan ajri ro nejin?

²⁰ Ekkar ñan kien Christ, en kar ewi wãween an ro ewõr aer maroñ kõm̦m̦an ñan ro jet? Kõnke yokwe ej bo̦unteijen ak pedpedin kien in, ro me ewõr aer maroñ rej aikuj kwal̦o̦k yokwe im kautiej ñan ro rej pãd ium̦win maroñ eo aer. Rej aikuj keememej bwe Christ ekõn̦aan bwe jen kwal̦o̦k yokwe ilo men ko otemjej jej kõm̦m̦ani.

²¹ Ilo baam̦le eo. L̦eo ej aikuj yokwe lio “ãinwõt an Christ bareinwõt kõm̦m̦an ñan eklejia” eo. (Ep. 5:25, 28, 29) L̦eo ej aikuj anõke yokwe eo an Christ ilo an likũt aikuj im kõn̦aan ko an lio pãleen m̦okta jãn e. Jet em̦m̦aan remaroñ lo bwe epen aer kwal̦o̦k yokwe rot in, bõlen kõnke rar jab dik im rũttol̦o̦k ilo juon m̦anit me el̦ap an aorõk bwe armej ro ren jim̦we aer kõm̦m̦an ñan ro jet im kwal̦o̦k yokwe. Emaroñ pen ñan aer jol̦o̦k m̦anit im imminene rot in enana, bõtab rej aikuj kõm̦m̦an oktak ñan aer pokake kien Christ. Ñe juon em̦m̦aan ej kwal̦o̦k yokwe eo em̦ool ilo an kaarmejjeteik e make, men in enaaj kõm̦m̦an bwe lio en kautiej e. Juon jemãn me elukkuun yokwe ajri ro nejin, eban kõmetak ro nejin ilo men ko ej ba ak kõm̦m̦ani. (Ep. 4:31) Ijello̦kun an ãindein, ej kwal̦o̦k an yokwe im buñbũruon kake ajri ro nejin ilo juon wãween me enaaj kõm̦m̦an aer jokwane im jab uwõta. Em̦m̦aan rot in ej kõm̦m̦an bwe ajri ro nejin ren yokwe im lõke e.

22. Ãinwõt an 1 Piter 5:1-3 kwal̦o̦k, “jiip” ro rej an wõn, im en kar ewi wãween an em̦m̦aan ro rej lale eklejia kõm̦m̦an ñan er?

²² Ilo eklejia eo. Em̦m̦aan ro rej lale eklejia rej aikuj keememej bwe “jiip” ro rejjab aer. (Jon 10:16; riit 1 Piter 5:1-3.) Naan kein ‘bwij eo an Anij,’ “ekkar ñan ankilaan Anij” im “armej ro rej an Anij, NW” rej kakeememej em̦m̦aan  ro rej lale eklejia bwe jiip ro rej an Jeova. Jeova ekõn̦aan bwe em̦m̦aan ro ren kõm̦m̦an ñan jiip ro an ilo jouj im yokwe. (1 Te. 2:7, 8) Em̦m̦aan ro me rej kwal̦o̦k yokwe ñe rej kõm̦m̦ane eddo eo aer ãinwõt jabõt ro, rej kabuñbũruon Jeova. Em̦m̦aan rot rein rej kõm̦m̦an bwe ro jeier im jatier ren yokwe im kautiej er.

23-24. (1) Ta eddo eo an em̦m̦aan ro rej lale eklejia ñe juon ej kõm̦m̦ane juon bõd el̦ap? (2) Ñe rej kõm̦adm̦õde apañ rot in, ta ko rej aikuj l̦õmn̦ak kaki?

²³ Ta eddo eo an em̦m̦aan ro rej lale eklejia ñe juon ej kõm̦m̦ane juon bõd el̦ap? Eddo eo aer eoktak jãn kar eddo eo an ri-ekajet ro im em̦m̦aan ro rerũtto me rar pãd ium̦win Kien eo Anij ear lel̦o̦k ñan Israel. Ium̦win Kien in, em̦m̦aan ro ewõr aer maroñ rar jab kõm̦adm̦õde wõt wãween ko rej ekkejell̦o̦k ñan an armej ro karejar ñan Jeova ak rar bareinwõt kõm̦adm̦õde apañ ko rej wal̦o̦k ikõtaer ikijjeen poktak im kowadoñ. Bõtab ium̦win kien Christ, eddo eo an em̦m̦aan ro rej lale eklejia ej ñan kõm̦adm̦õde wõt apañ ko rej wal̦o̦k ñe juon ear kõm̦m̦ane juon bõd el̦ap im ej jelõt kõtaan eo an ippãn Jeova. Rej kile bwe em̦õj an Anij lel̦o̦k maroñ eo ñan ri-utiej ro ak kien ko an lal̦ in ñan kõm̦adm̦õdi apañ ko ikijjeen poktak im kowadoñ. Men in ej kitibuj aer lel̦o̦k kaje ñan armej ro ãinwõt ilo aer bakkiiñi er ak kalbuuji er.​—Rom 13:1-4.

²⁴ Ewi wãween an em̦m̦aan ro rej lale eklejia kõm̦adm̦õdi apañ ko ñe juon ej kõm̦m̦ane juon bõd el̦ap? Rej kõjerbale Baibõl̦ eo ilo aer etale apañ ko im kõm̦m̦ani pepe ko. Rej keememej wõt bwe yokwe ej bo̦unteijen eo ak pedpedin kien Christ. Yokwe ej kõm̦akũt em̦m̦aan ro rej lale eklejia ñan l̦õmn̦ak kõn men kein: Ta eo rej aikuj in kõm̦m̦ane ñan jipañ jabdewõt ilo eklejia eo me apañ eo ejelõt er? Ikijjeen armej eo ear kõm̦m̦an bõd, yokwe enaaj kõm̦akũt em̦m̦aan ro ñan l̦õmn̦ak kõn men kein: Ej ke kwal̦o̦k an ukel̦o̦k? Jemaroñ ke jipañe bwe en bar kajoor kõtaan eo an ippãn Jeova?

25. Ta eo jenaaj etale ilo katak eo tok juon?

²⁵ El̦ap wõt ad kam̦m̦oolol kõn ad pãd ium̦win kien Christ! Ñe kõj aolep jej kate kõj ñan pokake kien in, jej jipañ kõm̦m̦an bwe eklejia eo ad en juon jikin me kajjojo armej emaroñ kile aer yokwe im kaorõke im bareinwõt eñjake an jokwane. Ijoke, jej mour ilo juon lal̦ me ‘armej ro renana’ rej l̦apl̦o̦k wõt ilo aer nana. (2 Ti. 3:13) Kõn men in, aolep iien jej aikuj lukkuun kõjparok. Ewi wãween an eklejia eo maroñ l̦oore ekajet jim̦we eo an Anij ñe rej kõm̦adm̦õde apañ eo ñe juon ej ko̦kkure juon ajri? Jenaaj etale uwaakin kajjitõk in ilo katak eo tok juon.