1. ¿Tlake ome tlamantli tijmatij?

JEHOVÁ tlauel kiniknelia katli kitekipanouaj. Nochipa kiniknelijtok uan nochipa kiniknelis. Uan nojkia tlauel kipaktia ma mochiua tlen xitlauak (Sal. 33:5). Yeka, tijmatij ome tlamantli: 1) Jehová tlauel moyolkokoua kema kiita itekipanojkauaj kinchiuiliaj tlen amo xitlauak uan 2) amo kikauas nochipa ma tlaijiyouijtokaj, pampa kintlatsakuiltis katli techiuiliaj tlen amo kuali. Ipan achtoui tlamachtili tlen nopa naui katli moixtontias, * tikitakej nopa Tlanauatili tlen toTeotsij kinmakak israeleuanij moyakanayaya ika tlaiknelijkayotl uan tlapaleuiyaya nochi ma kinchiuilikaj tlen xitlauak, kej sejkoyok euanij, iknotsitsij uan kaualmej (Deut. 10:18). Nopa Tlanauatili kinextia kenijkatsa Jehová tlauel kitekipachoua tlen kinpano katli kitekipanouaj.

2. ¿Tlake tlajtlanili tijnankilisej ipan ni tlamachtili?

² Nopa Tlanauatili tlen kimakakej Moisés tlanki kema pejki tlanechikoli ipan xiuitl 33. Uajka, ¿ayokmo kipiaskiaj se tlanauatili tlen moyakanaskia ika tlaiknelili uan tlen tlapaleuiskia ma mochiua tlen xitlauak? Amo, pampa Cristo itokilijkauaj kipixtoyaj se yankuik tlanauatili. Ipan ni tlamachtili tikitasej tlake eli nopa yankuik tlanauatili uan nojkia tijnankilisej ni tlajtlanili: ¿Kenke tikijtouaj nopa yankuik tlanauatili moyakana ika tlaiknelili? ¿Kenke tikijtouaj tlapaleuia ma mochiua tlen xitlauak? Uan, ¿kenijkatsa nopa tlanauatili kinpaleuia katli kintekimakatokej ipan tlanechikoli ma kinitakaj sekinok kej kinamiki?

3. ¿Tlake eltok ipan Cristo itlanauatil kej kiijtoua Gálatas 6:2?

³ (Xijpoua Gálatas 6:2). Cristo itokilijkauaj moyakanaj ika  “tlen Cristo technauatijtok” o Cristo itlanauatil. Jesús amo kiijkuilok se tlanauatili tlen ika moyakanaskiaj itokilijkauaj, ya san kiniljuik tlake monekiyaya kichiuasej, kinnauatik uan kintlajtolmakak se keski tlamantli. Ipan Cristo itlanauatil eltok nochi tlen Jesús tlamachtik. Tlaj tijnekij kuali tijkuamachilisej tlake eli, ma tikitakaj se keski tlamantli.

4, 5. 1) ¿Kenijkatsa tlamachtik Jesús? 2) ¿Kema tlamachtik?

⁴ ¿Kenijkatsa Jesús kinmachtik maseualmej? Ya kinmachtik ika tlen kiijtok. Tlen kiijtok tlauel tepaleuik pampa tlamachtik tlen melauak tlen toTeotsij, kinextik kenijkatsa ueliskiaj yolpakisej uan kinnextilik san toTeotsij iTlanauatijkayo uelis kitlamiltis tlaijiyouilistli ipan Tlaltipaktli (Luc. 24:19). Uan nojkia tlamachtik ika tlen ya kichijki. Kej monejnemiltik kinnextilik itokilijkauaj kenijkatsa nojkia moneki monejnemiltisej (Juan 13:15).

⁵ ¿Kema tlamachtik Jesús? Kema tlajtolmoyajki ipan Tlaltipaktli (Mat. 4:23). Uan nojkia kinmachtik itokilijkauaj se kentsi teipa kema moyolkuitoya. Se tonali, monextik kampa itstoyaj se 500 maseualmej uan kinnauatik ma kinpaleuikaj sekinok nojkia ma mochiuakaj itokilijkauaj (Mat. 28:19, 20; 1 Cor. 15:6). Uan pampa yaya kiyakana tlanechikoli, nojua kinmachtik itokilijkauaj maske tlakuepilijtoya iluikak. Ni tijmatij pampa ipan xiuitl 96, ika apóstol Juan kinyolchikajki uan kintlajtolmakak katli kintlapejpenijtoyaj yasej iluikak (Col. 1:18; Apoc. [Rev.] 1:1).

6, 7. 1) ¿Kanke moijkuilok tlen Jesús tlamachtik? 2) ¿Tlake moneki tijchiuasej tlaj tijnekij tijneltokasej Cristo itlanauatil?

⁶ ¿Kanke moijkuilok tlen Jesús tlamachtik? Nopa pilamochtsitsij Mateo, Marcos, Lucas uan Juan kiijtouaj tlen kichijki uan tlen kiijtok kema itstoya ipan Tlaltipaktli. Uan nopa sekinok pilamochtsitsij tlen eltok ipan Escrituras Griegas Cristianas techpaleuia ma tijkuamachilikaj kenijkatsa moiljuia Jesús, pampa katli kiijkuilojkej kipixtoyaj “itlalnamikilis Cristo” uan nojkia pampa toTeotsij itonal kinyakanki (1 Cor. 2:16).

⁷ ¿Tlake techmachtia? Tlen Jesús tlamachtik techpaleuia ipan nochi tonemilis. Yeka, Cristo itlanauatil kiyakana tlen tijchiuaj ipan tochaj, kampa titekitij, kampa timomachtiaj uan  ipan tlanechikoli. Tijyekouaj tlen nopa tlanauatili kema tijpouaj uan timoyoliljuiaj ipan tlen kiijtoua Escrituras Griegas Cristianas. Uan tijneltokaj nopa tlanauatili kema tijchiuaj tlen Jesús kiijtok, tlen tlanauatik uan tlen tetlajtolmakak. Kema timoyakanaj ika Cristo itlanauatil, tijnextiaj tijneltokaj Jehová, toTeotsij katli tlauel teiknelia, pampa yaya kiiljuik Jesús tlake tlamachtiskia (Juan 8:28).

8. ¿Ipan tlake motlatskilijtok Cristo itlanauatil?

⁸ Maseualmej amo majmauij kema itstokej ipan se kali katli kuali kichijchijkej uan kuali kitsinpeualtijkej. Nojkia kiampa kiyolmatij katli kineltokaj se tlanauatili tlen tlauel kuali. Uajka, Cristo itlanauatil tlauel kuali motlatskilijtok pampa moyakana ika tlaiknelijkayotl. ¿Kenke kiampa tikijtouaj?

9, 10. 1) ¿Tlake kinextia Jesús kichijki miak tlamantli pampa teikneliyaya? 2) ¿Kenijkatsa uelis tijchiuasej kej Jesús?

⁹ Se, Jesús kichijki miak tlamantli pampa teikneliyaya. Ya kinmachtik maseualmej, kinchikajki katli mokokouayayaj, kintlamakak katli mayanayayaj uan kinyolkuik katli miktoyaj pampa tlauel kintlasojtlayaya. ¿Kenke kintlasojtlak? Pampa tlauel kinikneliyaya (Mat. 14:14; 15:32-38; Mar. 6:34; Luc. 7:11-15). Maske tlauel siajki uan tlauel motekiuik, ya kichijki nochi nopa tlamantli pampa kiachtouitlalik tlen maseualmej kinpolouayaya. Jesús kinextik tlauel kiniknelia maseualmej kema temaktilik inemilis (Juan 15:13).

¹⁰ ¿Tlake techmachtia? Uelis tijchiuasej kej Jesús tlaj tikachtouitlalisej tlen sekinok kinpoloua. Nojkia, moneki tikintlasojtlasej maseualmej katli itstokej kampa titlajtolmoyauaj, pampa nopa techyololinis ma titlajtolmoyauakaj uan ma tikinmachtikaj sekinok. Kema kiampa tijchiuaj, tijnextiaj tijneltokaj Cristo itlanauatil.

11, 12. 1) ¿Kenke tijmatij Jehová kitekipachoua tlen techpano? 2) ¿Kenijkatsa uelis tijchiuasej kej Jehová?

¹¹ Ome, Jesús kinextik kenijkatsa iTata tlauel teiknelia. Kema tlajtolmoyajki, kinextik kenijkatsa Jehová tlauel kitekipachoua tlen kinpano itekipanojkauaj. Yeka, se tonali kiijtok toTeotsij tlauel techpatiita (Mat. 10:31). Nojkia, tlamachtik Jehová kineki katli kitlauelkajtokej ma moyolkuepakaj uan sampa ma tlakuepilikaj ipan itlanechikol pampa ya kinselis ika miak tlaiknelili (Luc. 15:7, 10). Uan kiijtok toTeotsij kinextik tlauel techiknelia kema temaktilik iKone pampa kinejki techmakixtis (Juan 3:16).

¹² ¿Tlake techmachtia? ¿Kenijkatsa uelis nojkia titeiknelisej kej Jehová? (Efes. 5:1, 2). Uelis tijchiuasej nopa tlaj tikinpatiitasej toikniuaj uan tikinselisej ika miak pakilistli katli sampa kinekisej kitekipanosej Jehová (Sal. 119:176). Uan tijnextiaj tikinikneliaj toikniuaj kema tijtekiuiaj tonali uan tochikaualis pampa tijnekij tikinpaleuisej, kej kema kiixnamikij se tlaouijkayotl (1 Juan 3:17). Uajka, kema tikinikneliaj sekinok, tijnextiaj tijneltokaj Cristo itlanauatil.

13, 14. 1) Kej ijkuilijtok ipan Juan 13:34, 35, ¿tlake tlanauatik Jesús, uan kenke yankuik nopa tlanauatili? 2) ¿Kenijkatsa tijnextiaj tijneltokaj nopa yankuik tlanauatili?

¹³ Eyi, Jesús kiniljuik itokilijkauaj tlauel ma kiniknelikaj sekinok maske amo tleno kiseliskiaj (xijpoua Juan 13:34, 35). Ni eliyaya se yankuik tlanauatili pampa amo ijkuilijtoya ipan nopa Tlanauatili tlen Jehová kinmakak israeleuanij. Jesús kiijtok moneki tikiniknelisej toikniuaj kej ya techiknelik. Moneki tlauel tikiniknelisej uan amo kej tojuantij timoikneliaj, pampa tlaj tlauel tikiniknelisej, * uajka tijnekisej titemakasej tonemilis tlaj monekis tikinmanauisej, sanse kej Jesús kichijki.

 ¹⁴ ¿Tlake techmachtia? Tijnextiaj tijneltokaj nopa yankuik tlanauatili kema tikinpaleuiaj toikniuaj. Amo san tijnekij tijchiuasej uejueyi tlamantli, kej titemakasej tonemilis kema monekis tikinmanauisej toikniuaj, nojkia tijnekij tijchiuasej se keski tlamantsitsij: kej tijuikasej ipan tlanechikoli se toikni katli ya ueyi, amo tijchiuasej tlen techpaktia pampa tijnekij tijyolpakiltisej se toikni o nojkia tijtekiuisej se keski tonali uan kiampa tikinpaleuisej toikniuaj tlen kintlasojsoljuilijtok se tlenijki. Kema tijchiuaj ni uan sekinok tlamantli, tijnextiaj tijneltokaj Cristo itlanauatil uan titlapaleuiaj sejse maseuali kuali ma kiyolmati itstos ipan tlanechikoli.

15-17. 1) ¿Kenijkatsa tlen Jesús kichijki kinextik tlauel kipaktiyaya tlen xitlauak? 2) ¿Kenijkatsa uelis tijchiuasej kej Jesús?

¹⁵ Kema ipan Biblia kamanalti tlen xitlaualistli, kiijtosneki tijchiuasej tlen toTeotsij kiita kuali uan amo aka tijchikoitasej pampa moneki nochi tikinchiuilisej tlen xitlauak. ¿Kenke tikijtouaj Cristo itlanauatil tlapaleuia ma mochiua tlen xitlauak?

¹⁶ Achtoui ma tikitakaj kenijkatsa tlen kichijki Jesús kinextik kipaktiyaya tlen xitlauak. Ipan nopa tonali, nopa judíos katli tlayakanayayaj ipan religión tlauel kinkualankaitayayaj katli euayayaj tlen sekinok altepemej, amo kinekiyayaj kinitasej tlen ueli maseualmej uan amo kintlepanitayayaj siuamej. Jesús amo kiampa kichijki, ya amo aka kichikoitak uan nochi kinchiuilik tlen xitlauak (Mat. 8:5-10, 13). Nochi kinkamanaljuik kema tlajtolmoyajki: katli tlatominpiayayaj uan katli teikneltsitsij (Mat. 11:5; Luc. 19:2, 9). Ya amo kema kinkualankaitak siuamej yon kinkualankanojnotski. Jesús nochipa kiniknelik, kintlepanitak uan kuali kinnojnotski, maske sekinok maseualmej amo kinekiyayaj kinitasej nopa siuamej (Luc. 7:37-39, 44-50).

¹⁷ ¿Tlake techmachtia? Tojuantij nojkia uelis tijchiuasej kej Jesús tlaj amo tikinchikoitasej maseualmej uan nochi tikinkamanaljuisej: katli tlapijpiaj, katli teikneltsitsij o katli tlaneltokaj ipan sekinok tlamantli. Toikniuaj tlakamej kinextiaj kichiuaj kej Jesús kema kintlepanitaj siuamej. Kema kiampa tijchiuaj, tijnextiaj tijneltokaj Cristo itlanauatil.

18, 19. ¿Tlake tlamachtik Jesús tlen nopa xitlaualistli, uan tlake techmachtia tlen tlamachtik?

¹⁸ Nojkia, ma tikitakaj tlake kiijtok Jesús tlen xitlaualistli. Tlen kintlajtolmakak itokilijkauaj kinpaleuiskia ma kinchiuilikaj sekinok tlen xitlauak. Ma timoiljuikaj ipan Mateo 7:12, kampa nesi tlake tetlajtolmakak Jesús. Tlaj tijnekij ma techchiuilikaj tlen xitlauak, uajka moneki achtoui tojuantij tikinchiuilisej tlen xitlauak. ¿Tlake panos tlaj kiampa tijchiuasej? Kinyololinis nojkia ma techchiuilikaj tlen xitlauak. Uan, ¿tlake uelis tijchiuasej tlaj techchiuilijtokej se tlenijki tlen amo xitlauak? Jesús kinmachtik itokilijkauaj ma motemachikaj Jehová kintlatsakuiltis katli amo kichiuaj tlen xitlauak, pampa ya kinkaki katli “momaijtouaj tonaya uan youali” (Luc. 18:6, 7). Ni tlamantli toTeotsij kitenkajtok: ya kimati nochi tlaouijkayotl tlen techpano ipan ni itlamia tonali, uan kema kinamikis, kintlatsakuiltis katli techchiuilijtokej tlen amo xitlauak (2 Tes. 1:6).

¹⁹ ¿Tlake techmachtia? Tlaj tijchiuasej tlen Jesús tetlajtolmakak, uajka nochipa tikinchiuilisej sekinok tlen xitlauak. Uan tlaj ipan ni tonali, kampa Satanás tlanauatia, techchiuilijtokej se tlenijki tlen amo xitlauak, tlauel techyolchikaua tijmatisej se tonali Jehová kintlatsakuiltis.

20, 21. 1) ¿Kenijkatsa katli kintekimakatokej moneki kinitasej sekinok? 2) ¿Kenijkatsa tlakamej kinextiaj tlauel teikneliaj? 3) ¿Tlake moneki kichiuasej tetajmej ika ininkoneuaj?

²⁰ Kej tikitstokej, Cristo itlanauatil moyakana ika tlaiknelili. Katli kintekimakatokej moneki  moyakanasej ika ni tlanauatili, yeka kinamiki kintlepanitasej sekinok uan kiniknelisej. Moneki kiilnamikisej Cristo kineki ma tijnextikaj tlaiknelili ipan nochi tlen tijchiuaj.

²¹ Ika tochampoyouaj. Tlakamej moneki kiniknelisej ininsiuajuaj “keja Cristo kiiknelijtok” tlanechikoli (Efes. 5:25, 28, 29). Inijuantij kichiuaj kej Jesús kema kiachtouitlaliaj tlen ininsiuajuaj kinpoloua uan kema kintekipachoua tlen kiyolmatij. Se keskij tlakamej kimatij ouij kichiuasej ni tlamantli pampa uelis kiampa kiniskaltijkej uan ininchampoyouaj amo teikneliyayaj yon kichiuayayaj tlen xitlauak. Maske kimatij ouij, moneki kipatlasej tlen momajtokej kichiuaj uan kiampa kinextisej kineltokaj Cristo itlanauatil. Kema tlakamej kinextiaj tlauel teikneliaj, ininsiuajuaj tlauel kintlepanitaj. Uan tetajmej katli nelia tlauel kinikneliaj ininkoneuaj, amo kema kinchiuiliaj tlen amo kuali uan amo kema kinyolkokouaj ika tlen kiniljuiaj (Efes. 4:31). Kinextiaj kinikneliaj uan kinpatiitaj ika miak tlamantli, kiampa kinnextiliaj ininkoneuaj nochipa kinmokuitlauisej. Tlaj tetajmej kiampa kichiuaj, ininkoneuaj motemachisej ipan inintatauaj uan kiniknelisej.

22. Kej kiijtoua 1 Pedro 5:1-3, ¿ajkia iaxka tlanechikoli, uan tlake kinamiki kichiuasej ueuejtlakamej?

²² Ipan tlanechikoli. Ueuejtlakamej moneki kiilnamikisej inijuantij amo ininaxka tlanechikoli (Juan 10:16; xijpoua 1 Pedro 5:1-3). Nopa tlajtoli “itlakauaj toTeko” uan “kipaktia toTeko” kinilnamikilia ueuejtlakamej nochi toikniuaj Jehová iaxkauaj. Uan ya kineki ma kintlasojtlakaj uan ma kinmokuitlauikaj ika tlaiknelili (1 Tes. 2:7, 8). Jehová kuali kinita ueuejtlakamej katli kiampa kichiuaj, uan toikniuaj kinikneliaj uan kintlepanitaj.

23, 24. 1) ¿Tlake mosentlaliaj kichiuasej ueuejtlakamej kema se akajya tlajtlakolchiua? 2) Kema pano nopa, ¿tlake kichiuaj ueuejtlakamej?

²³ Ika nopa Tlanauatili tlen kinmakakej israeleuanij, ueuejtlakamej uan tetlajtolsenkauanij  kinpaleuiyayaj sekinok kuali ma tlaneltokakaj, uan nojkia kisenkauayayaj kuesoli uan kintlatsakuiltiyayaj katli kichiuayayaj tlen amo kuali. Uan ika Cristo itlanauatil, ueuejtlakamej kichiuaj seyok tekitl. Kema ipan tlanechikoli se akajya tlajtlakolchiua, inijuantij san mosentlaliaj kipaleuisej sampa kuali ma mouika iuaya Jehová. Uan kema se akajya kichiua tlen amo kuali, ueuejtlakamej kiilnamikij toTeotsij kintekimakatok tekichiuanij uan inijuantij kinamiki ma kitlatsakuiltikaj katli tlaixpanoj. Yeka, san tekichiuanij uelis kiijtosej tlaj se akajya kitsakuasej o tlaxtlauas (Rom. 13:1-4).

²⁴ Uajka, ¿tlake kichiuaj ueuejtlakamej kema se akajya tlajtlakolchiua ipan tlanechikoli? Ika tlen kiijtoua Biblia, kuali kiitaj nochi tlen panotok uan kuali moiljuiaj tlake kichiuasej. Uan kiilnamikij Cristo itlanauatil moyakana ika tlaiknelijkayotl. Nopa tlaiknelijkayotl kichiua ma moiljuikaj kenijkatsa uelis kipaleuisej katli tlajtlakolchijki. Uan nojkia kinpaleuia ma moiljuikaj tlaj katli tlajtlakolchijtok nelia moyolkueptok uan kiyolkokoua tlen kichijki, uan tlaj uelis kipaleuisej sampa kuali ma mouika iuaya toTeotsij.

25. ¿Tlake tikitasej ipan nopa seyok tlamachtili?

²⁵ Tlauel tiyolpakij pampa timoyakanaj ika Cristo itlanauatil. Kema nochi tijchiuaj kampeka tijneltokasej nopa tlanauatili, ipan tlanechikoli sejse maseuali kuali kiyolmatis pampa kiitas kenijkatsa tlauel tikikneliaj uan tijpatiitaj, uan amo tleno kimakasis. Maske tiyolpakij, tiitstokej ipan itlamia tonali kampa maseualmej kichiuaj tlen tlauel amo kuali (2 Tim. 3:13). Yeka, moneki tlauel timomokuitlauisej. ¿Kenijkatsa ipan tlanechikoli uelis tijnextisej tijchiuaj tlen xitlauak kema se akajya kichiualtia se siuapil o se okichpil ma moteka iuaya? Ipan nopa seyok tlamachtili tijnankilisej ni tlajtlanili.