1. Ichu taani piili nnaphwanelaahu ororomela?

YEHOVA MULUKU onnaasivela vancipale alapeli awe. Owo ilukuluku soothene onnaasivela nave onahaala otitelela waasivelaka. Owotho onnasivela ekhaikhai. (Sal. 33:5) Mwa yeeyo, nnaphwanela ororomela ichu piili: (1) Yehova onnoona wiicela vaavaa alapeli awe anahooxeyaaya ni ohikhala ekhaikhai nave (2) owo onnaroromeliha wi ekhaikhai enahaala weereya. Mwaha woopacerya wa miyaha seiha soocharelana,  *wooloca sa Nlamulo nenlo Muluku aavanheiye Aisarayeli orweela wa Mose. Nohoona wi nlo naathipeleya mu osivela nave naanaroromeliha ekhaikhai wa oothene, ophiyerya wa yaale yahaarino okhapeleleya. (Malam. 10:18) Nlamulo, yawooniherya ya mukhalelo Yehova onaathokororyeiye alapeli awe.

2. Makoho taani nnahaalaahu waakhula mmwaha yoola?

² Mu eyaakha ya 33, vaavaa muloko Weekristu waapacenryaaya, Nlamulo na Mose naahimala. Vano tiheeni yaahaala weereya ni Akristu? Apwanne awo hiyaahaala okhapeleleya nthowa na ohikhalano nlamulo nenlo naathipeleya mu osivela nave naaceenyerya ekhaikhai? Naari mano! Akristu yaahaakhela nlamulo nivyaani. Mmwaha yoola, nnahaala osuwela nlamulo nenlo. Voocharela, nnahaala waakhula makoho anacharela: Ntakhara heeni nnaphwanelaahu oloca wi nlamulo nlo nnathipeleya mu osivela? Ntakhara heeni nnalocaahu wi nlamulo nlo ninnaceenyerya ekhaikhai? Mwawiiwanana ni nlamulo nenlo, mmukhalelo taani ale arino olamulelo anaphwanelaaya waakhalihaka akina?

3. Tiheeni enapaka makupa mu “nlamulo na Kristu” nlociwe mu Galasya 6:2?

³ Mwaalakhanye Galasya 6:2. Akristu anaphwanela ocharaka  “nlamulo na Kristu.” Eparipari wi Yesu harempe mikhalelo soothene sa nlamulo wa oohuserya awe. Nyenya owo aavanhe mahusiheryo, malamulo, ni malakiheryo. Soothene Yesu ohusinheiye sinnapaka makupa mu “nlamulo na Kristu.” Mu iparakrafo sinacharela, nnahaala woona ichu sinahaala onikhaviherya wiiwexexa mwaphaama nlamulo nenla.

4-5. Mmikhalelo taani Yesu aahusinheiye, nave liini?

⁴ Mmikhalelo taani Yesu ohusinheiye? Voopacerya, moorweela mwa ichu olonceiye. Masu a Yesu yaahikhalano ikuru. Owo aanaahusiha achu iparipari vooloca sa Muluku, yootaphulela ya okumi ni mukhalelo Omwene onahaalaaya omaliha makacamiho aachu. (Luka 24:19) Nave Yesu aahihusiha moorweela wa yootakiherya awe. Okumi awe onnavaha ntakiheryo wa oomuchara awe osuwela mukhalelo anaphwanelaaya okhala.—Yoh. 13:15.

⁵ Elukuluku taani ohusinheiye? Owo ohusinhe variyari va muteko awe veelaponi ya vathi. (Mat. 4:23) Oohusiha tho mu elukuluku vakhaani amanle oviihiwa mookhwani. Ntoko yootakiherya, mu ekwaha emoha owo aahiphiya wa nikhuuru na oohuserya awe— akhweya opwaha achu 500— nave aahaavaha nlamulo ariki: “Mwaapakeke oohuserya.” (Mat. 28:19, 20; 1 Kor. 15:6) Nave naamwi aakookenle wirimu, Yesu aahilapa ntoko muru wa muloko nave aatitelela ovaha mahusiheryo wa oomuchara awe. Ntoko yootakiherya, variyari va eyaakha 96, Kristu aahiloca wa murummwa Yohani wi aaphwanela waalipiha ni waavaha ekano Akristu oothanliwa.—Kol. 1:18; Wup. 1:1.

6-7. (1) Ti woowi nnahaalaahu ophwanyawo mahusiheryo a Yesu? (2) Nnooniherya hai wi ninniiwelela nlamulo na Kristu?

⁶ Ti woowi nneeraahu niphwanyewo mahusiheryo a Yesu? Ichu sincipale Yesu olonceiye ni opankeiye ari veelaponi yavathi soorempwa mu aliivuru asese a Michaka. Nyenya tho aliivuru akina a Soorempwa sa Ekiriki Seekristu anamunikhaviherya wiiwexexa mwaphaama yeeyo Yesu onuupuweleiye. Aliivuru awo yaarempwe ni alopwana yaaveereliwe ni munepa waweela nave yaarino “muupuwelo a Kristu.”—1 Kor. 2:16.

⁷ Mahusiheryo: Mahusiheryo a Yesu toophara muteko mu makupa oothene a okumi. Mwa yeeyo, nlamulo na Kristu nnaphwanela ovolowela ichu soothene nnapakaahu owaani, omutekoni, osikola ni mmulokoni. Wi nihuserye nlamulo nlo, nnaphwanela waalakhanya Soorempwa sa Ekriki Seekristu ni wuupuwelela seiho. Wi niiwelele  nlamulo nlo, nnaphwanela ochariha mahusiheryo, malamulo ni malakiheryo yaawo anaphwanyeya mu aliivuru yaala a Piipiliya. Wakhala wi nohiiwelela nlamulo na Kristu, nnahaala wiiwelelaka Ehime ya mahusiheryo oothene a Yesu— Yehova, Muluku ahu oosivela.—Yoh. 8:28.

8. Taavi ari mathipelo a nlamulo na Kristu?

⁸ Empa wi etekiwe phaama enachuneya okhalano mathipelo oolipa wi ekhale yookhapeleleya. Mwawiihiiha, achu yaawo anakhala mummo annawerya wiisoona okhala ookhapeleleya ni awaakiheya. Mmukhalelo woolikana, nlamulo naphaama nnaphwanela okhalano mathipelo oolipa. Pahiru hiihaa achu yaawo anakhala mwawiiwanana ni nlamulo nlo anahaala wiisoona okhala ookhapeleleya ni awaakiheya. Nlamulo na Kristu nookhalano mathipelo oophwanelela yaawo akhanle— osivela. Ntakhara heeni nnalocaahu hiiha?

9-10. (1) Sootakiherya taani sinooniherya wi Yesu aaceenyeryeya ni osivela? (2) Nni nimutakiherye hai Yesu?

⁹ Yoopacerya, soothene Yesu aapankeiye aaceenyeryen’ye ni osivela. Moonelo wa omoriwa ikharari, naari niphwanya, onnooniherya osivela yoowo muchu oreiyeno ntakhara akina. Yesu aanamoriwa ikharari ni achu, mwa yeeyo aanaahusiha achu ancipale, waapenusa areca, waalyiha oovoliwa ni waaviha alipa ookhwa. (Mat. 14:14; 15:32-38; Mar. 6:34; Luka 7:11-15) Weerano soothene seiha yaanachuneya wi Yesu apharihele elukuluku yincipale ni ikuru. Naamwiihiiha, elukuluku yoothene owo aanahela soochuna sa akina ohoolo wa sawawe. Nave yawooniherya etokweene ya osivela yoola waari ovaha ekumi awe wi aavuluse achu.—Yoh. 15:13.

¹⁰ Mahusiheryo: Nnanwerya omutakiherya Yesu mmikhalelo miili: (1) nihelaka soochuna sa akina vanipuro noopacerya ni (2) ohuserya wooniherya oreera murima wa achu a ekulucu ahu. Oreera murima onnanceenyerya olaleerya ni ohusiha michaka saphaama. Vaavaa nnapakaahu yeeyo, ninniiwelela nlamulo na Kristu.

11-12. (1) Yesu oonihenrye hai wi Yehova onnaathokororya alapeli awe? (2) Nni ntakiherye hai osivela wa Yehova?

¹¹ Yanaawiili, Yesu ohooniherya wi Tiithi awe onnaasivela achu. Variyari va muteko awe, Yesu ohooniherya vanlakani ophiyerya mweeryo taani Yehova onaathokororyeiye alapeli awe. Echu emoha ohusinheiye ti yawi mmoha ti mmoha a hiyo ookhalano esisapo nave tookhweleya wa Tiithi ahu, Yehova. (Mat. 10:31) Yesu oonooniheryatho wi Yehova okhalano nchuno na waakhela epucepuche yoorimeela yeeyo echarunwe nave enakookela wanaawiili mmulokoni. (Luka 15:7, 10) Nave tho Yesu ooloca wi mukucho wa woopola eri yaawooniherya ya osivela wa Yehova ntakhara hiyo.—Yoh. 3:16.

¹² Mahusiheryo: Nni ntakiherye hai osivela wa Yehova? (Éfe. 5:1, 2) Mukhalelo mmoha ori owoonaka anna ni arokora ahu okhala asisapo ni ookhweleyaxa. Wakhala wi ‘epucepuche yaarimenle’ yookookela wa Yehova, nnaphwanela waakhela ni mata meeli. (Sal. 119:176) Mukhalelo mukina wa omutakiherya Yehova ori opharihela elukuluku ahu ni ikuru sahu wi naakhaviherye annihu, xaxaxa vaavaa awo anakhalaaya othoiwa. (1 Yoh. 3:17) Vaavaa nnaakhalihaahu akina moosivela, ninnooniherya wi ninniiwelela nlamulo na Kristu.

13-14. (1) Nlamulo taani Yesu onivanheiye mu Yohani 13:34, 35, nave ntakhara heeni nniichaniwaaya nlamulo nivyaani? (2) Nniiwelela hai nlamulo nenla nivyaani?

¹³ Yaneeraru, Yesu ohaalamulela oomuchara awe wooniheryaka osivela wa wiikhooca. (Mwaalakhanye Yohani 13:34, 35.) Nlamulo na Yesu nivyaani, nthowa nawi ninnaloca mukhalelo wa osivela yoowo wahaalociwa mu Nlamulo Muluku aavanheiye Aisarayeli. Omusivela mwaacamani hiiha ntoko Yesu oosivenleiyeni. Ela enachuneya wooniherya osivela wa wiikhooca. *  Nnaphwanela waasivela anna ni arokora opwahasa nniisivelaahu. Nnaphwanela waasivela ophiyerya oveleela ekumi ahu ntakhara yaawo hiiha ntoko Yesu enreiye ntakhara hiyo.

¹⁴ Mahusiheryo: Nniiwelela hai nlamulo nenla nivyaani? Mmasu a vakhaani, moorweela wa opaka wiilipiserya ntakhara anna ni arokora ahu— ohiya wiilipiserya otokotoko, ntoko ovaha ekumi ahu ntakhara yaawo, nyenya wiilipiserya mu ichu ikhaani. Ntoko yootakiherya, waatexa annihu awuuluvala yaawo anachuna ophwanyeya mmithukumano, weemererya oyeleela echu wi naasivelihe akina, naari opharihela elukuluku ahu ya iferiya wi nlape wi naakhaviherye yaale ahoolenle epahu. Weerano hiiha ninnooniherya wi ninniiwelela nlamulo na Kristu. Vaavaa nnooniheryaahu osivela wa wiikhooca, muloko onnakhala nipuro nenlo achu oothene anahaalaaya wiisoonaka okhala ookhapeleleya ni awaakiheya.

15-17. (1) Meerelo a Yesu anooniherya hai moonelo awe wa ekhaikhai? (2) Nni nimutakiherye hai Yesu?

¹⁵ Piipiliya aalocaka sa opaka ichu mmukhalelo “weekhaikhai”, owo onaloca sa opaka yeeyo Muluku onaloceiye wi ti yawookololowa, ni weerano yeeyo moohikhala nthalu. Ntakhara heeni nnalocaahu wi nlamulo na Kristu nnaceenyerya ekhaikhai?

¹⁶ Muupuwele vooloca sa mukhalelo meerelo a Yesu anooniheryaaya moonelo wa ekhaikhai awe. Vaavaa aareiye veelaponi yavathi, asitokweene a malapelo yaanawiica oothene yaale yahaari Ayuta, yiisoonaka okhala oophwanelelaxa moohiyana ni achu vyakala nave yaanaakhaliha athiyana mmukhalelo woohiphwanelela. Nyenya Yesu aari oohiyana. Owo aahiweemererya yaale yahaari Ayuta okhala oomuchara awe. (Mat. 8:5-10, 13) Owo, aanalaleerya oothene moohikhala nthalu, yaale yaari ooreela naari oohaawa. (Mat. 11:5; Luka. 19:2, 9) Owo hantonko waakhaliha athiyana mmukhalelo woonanara naari mwa munyemu. Moohiyana, Yesu ikwaha soothene ari ancicimiho ni ooreera murima wa athiyana, ophitaanyerya yaale yaakhalihiwa mwa nthalu ni akina.—Luka 7:37-39, 44-50.

¹⁷ Mahusiheryo: Wi nimutakiherye Yesu, nnaphwanela waakhalihaka achu oothene mmukhalelo woolikana ni waalaleerya oothene yaale anachuna oniwiriyana— moohipwacha malapelo aya naari mukhalelo aya wa ekumi. Alopwana Eekristu annamutakiherya Yesu moorweela mwa waakhaliha athiyana mwancicimiho. Vaavaa nneeraahu hiiha, ninnooniherya wi ninniiwelela nlamulo na Kristu.

18-19. Tiheeni Yesu ohusinheiye vooloca sa ekhaikhai, nave tiheeni nnahuseryaahu mwa yeeyo?

¹⁸ Yanaawiili, moone yeeyo Yesu ohusinheiye vooloca sa ekhaikhai. Owo oohusiha malakiheryo yaawo anaakhaviherya oomuchara awe waakhaliha akina mweekhaikhai. Ntoko yootakiherya, muupuwele sa waakhaliha akina ntoko naachunelaahu okhalihiwa. (Mat. 7:12) Oothene ahu ninnachuna okhalihiwa mweekhaikhai. Mwa yeeyo, nnaphwanela waakhaliha akina mmukhalelo weekhaikhai. Eyo akhweya enahaala waaceenyerya tho okhala eekhaikhai ni hiyo. Nyenya hanka wakhala wi nookhalihiwa moohikhala ekhaikhai? Yesu oonihusiha tho wi Yehova onahaala ‘owerela ekhaikhai [yaale] anamwitchana othana ni ohiyu.’ (Luka 18:6, 7, NN) Mweeparipari, eyo yoororomeliha: Muluku ahu eekhaikhai onnavarerya sookacamiha sahu soothene seiho nnahoolelaahu mmahiku yaala ookuchula, nave mu elukuluku yoophwanelela owo onahaala opaka ekhaikhai ntakhara hiyo.—2 Tes. 1:6.

¹⁹ Mahusiheryo: Vaavaa nnacharihaahu malakiheryo yaawo Yesu onihusinheiye, ninnawerya waakhaliha akina mmukhalelo weekhaikhai. Nave wakhala wi nookhalihiwa moohikhala ekhaikhai mu elapo yeela ya Satana, nnanwerya okhalano nihakararyo mu osuwela wi Yehova onahaala oruuha ekhaikhai.

20-21. (1) Yaale arino olamulelo anaphwanelaaya waakhalihaka hai akina? (2) Mulopwana onooniherya hai osivela wa wiikhooca ntakhara mwaariye ni anaawe?

²⁰ Mwawiiwanana ni nlamulo na Kristu, yaale arino olamulelo anaphwanela waakhalihaka hai akina? Woona wi nlamulo na Kristu nnathipeleya mu osivela, yaale arino olamulela anaphwanela waakhalihaka akina moosivela ni mwancicimiho. Awo anaphwanela wuupuwela wi mukhalelo wa Yesu ilukuluku soothene ori osivela.

²¹ Veemusini. Mulopwana othenle onaphwanela omusivelaka mwaariye hiiha ntoko Kristu onasiveleiye muloko. (Éfe. 5:25, 28, 29) Wi awerye wooniherya osivela wawaakhwanela wa Kristu, mulopwana othenle onaphwanela ohela soochuna sa mwaariye ohoolo wa sawawe. Wa alopwana akina, eyo tahi yookhweya. Akhweya eyariwe mu nipuro nenlo osivela ni ekhaikhai waahaavahiwaaya esisapo, mwa nthowa na yeeyo, ahunnuwiha sookhovelela soonanara. Nyenya wi muchu iiwelele nlamulo na Kristu, onachuneya ohiya sookhovelela seiyo. Vaavaa mulopwana othenle onooniheryeiye osivela wa wiikhooca, owo onnaphura ncicimiho na mwaariye. Nave tho eyo ennaphariheleya mu waaphuwa anamwane. Tiithi orino osivela weeparipari hanapaka ichu naari oloca mmukhalelo yoowo onahaala waahoosa anamwane. (Éfe. 4:31) Ohiya yeeyo, owo onnaathamalela anaawe nave onnaaleela wi onnaasivela. Eyo enahaala waakhaviherya anamwane wiisoona okhala ookhapeleleya ni awaakiheya. Vaavaa tiithi oneereiyeno hiiha, onnaphura osivela nave anaawe annamuroromela.

22. Mwawiiwanana ni 1 Pedro 5:1-3, “ipucepuche” ti sawani?, nave inaphwanela okhalihiwaka hai?

²² Mmulokoni: Atokweene anaphwanela wuupuwela wi “ipucepuche” tahi sawaya. (Yoh. 10:16; mwaalakhanye 1 Pedro 5:1-3, BNM.) Iho ti sa Yehova. Masu awi “muhuwo Muluku ohiyenryeyeni”, “ntoko Muluku,” ni “yale muhiyeriwanyu,” ennawuupuxerya atokweene xaxaxa vooloca sa okukhula muhuwo. Nave Yehova onachuna  wi ipucepuche sawe ikhalihiweke moosivela ni mwancicimiho. (1 Tes. 2:7, 8) Vaavaa atokweene anakhapelelaaya mirici saya ni okukhula moosivela, awo annaphura weemereryiwa wa Yehova, navetho osivela ni ncicimiho na anna ni arokora mmulokoni.

23-24. (1) Mmikhalelo inavolowela yoocheka etokotoko, tuuvi ori muteko wa atokweene? (2) Vaavaa anakhapelelaaya miyaha seiho, ichu taani atokweene anaphwanelaaya waalikhela?

²³ Tuuvi ori muteko wa atokweene vaavaa muchu onapakeiye yoocheka etokweene? Muteko aya ti woohiyana ni yoole asitokweene ni athoriha o Isarayeli yaaraayano. Nlamulo na Mose naanavaha olamulelo wi alopwana yaathanliwa ekhapeleleke ohiya pahiru miyaha soomunepani, nyenya tho ohiiwanana ophiyerya tho miyaha saavolowela nlala. Nyenya vathi va nlamulo na Kristu, muteko wa atokweene ori orehererya pahiru makupa oomunepani yapakiwa yoocheka. Awo annasuwela wi orehererya miyaha sa ohiiwanana ni nlala ori muteko yoowo Muluku aavanheiye alamuleli eelapo. Alamuleli eelapo tarino owerya wa omuthoriha muchu ntoko oliva mankaawu naari onwalela mukalaposo.—Aro. 13:1-4.

²⁴ Ti mwawiihai atokweene anakhapelelaaya makupa oomunepani yapakiwa yoocheka? Awo annampharihela Piipiliya wi yaalikhele mwaha ni opaka yoolakelela. Ikwaha soothene annuupuwela wi mathipelo a nlamulo na Kristu ti osivela. Osivela onahaala oweeriha atokweene waalikhela: ‘Tiheeni enachuneya opakiwa wi yaakhaviherye achu a mmulokoni yaawo avoloweliwe ni meerelo oonanara a muchu? Vooloca sa yoowo ohense, osivela onahaala oweeriha atokweene waalikhela: ‘Apwanne owo oocharuwa? Tiheeni enaphwanela opakiwa wi emukhaviherye orehererya onthamwene awe ni Yehova?’

25. Nikoho taani nnahaalaahu waakhula mmwaha onacharela?

²⁵ Ti yaphaama okhala vathi va nlamulo na Kristu! Vaavaa oothene ahu nniilipiseryaahu wiiwelela nlamulo nlo, ninnamukhaviherya munna ni murokora osuwela wi muloko nipuro nenlo onooniheryiweiye osivela, opwacha, ni okhapelela. Naamwiihiiha, hiyo nnakhala mu elapo yeela ‘achu onanara murima’ anamviraaya ‘etepaka.’ (2 Tim. 3:13) Hannaphwanela omaala. Tiheeni Muloko Weekristu onaphwanela opaka wi weereno echu mweekhaikhai vooloca sa meerelo a okonihiwa anamwane? Nikoho nla nnahaala waakhuliwa mmwaha onacharela.