1. Ni bintu ki bibiri ebi turikubaasa kuhamya?

YEHOVA RUHANGA naakunda abarikumuramya. Atwire naabakunda kandi naija kuguma naakikora. Naakunda n’oburingaaniza. (Zab. 33:5) N’ahabw’ekyo nitubaasa kuhamya ebintu bibiri: (1) Nikigwisa kubi Yehova, abaheereza be baatwarizibwa omu muringo gutari gw’oburingaaniza. (2) Naaraganisa ngu naija kureetaho oburingaaniza. Omu kicweka eky’okubanza omu bicweka ebikurataine, * tukeega ngu omusingi gw’Ebiragiro ebi Ruhanga yaahaire Abaisraeli kurabira omuri Musa ni rukundo. Kandi bikaba nibihiga abantu kutwariza bagyenzi baabo omu muringo gw’oburingaaniza otwariiremu n’abo abatarikubaasa kwerinda. (Bir. 10:18) Ebiragiro ebyo nibyoreka oku Yehova arikufayo munonga aha baheereza be.

2. Nituza kugarukamu bibuuzo ki?

² Ebiragiro bya Musa bikahendera omu gwa 33 Y.A.K. obu ekibiina Ekikristaayo kyatandika. Mbwenu shi Abakristaayo bakaba batarikwija kuhwerwa ebiragiro ebirikwegamira ahari rukundo n’oburingaaniza? Ngaaha buzima! Abakristaayo bakatunga ekiragiro kisya. Omu kicweka eki, nituza kubanza kugaaniira aha kiragiro eki. Bwanyima nituza kugarukamu ebibuuzo ebi: Ahabw’enki turikubaasa kugira ngu omusingi gw’ekiragiro eki ni rukundo? Ahabw’enki nitugira ngu nikireetaho oburingaaniza? Kurugiirira aha kiragiro eki, abaine obushoboorozi bashemereire kutwariza bata abandi?

3. Niki ekirikutwarirwa omu ‘kiragiro kya Kristo’ nk’oku kirikworekwa omu Abagalatia 6:2?

³ Shoma Abagalatia 6:2. Abakristaayo niboorobera “ekiragiro kya Kristo.” Yesu tarahandiikiire abeegi be ebiragiro ebi baabaire baine kukuratira, kwonka akabaha obuhabuzi, yaabaragiira eby’okukora, kandi yaabaha n’emisingye y’okugyenderaho. “Ekiragiro kya Kristo” nikitwariramu byona ebi Yesu yaayegyeise. Kubaasa kwetegyereza gye ekiragiro eki, ka tushwijume enshonga eziri ahaifo.

4-5. Yesu akeegyesa ryari, kandi mu miringo ki?

⁴ Yesu akakoresa miringo ki omu kwegyesa? Ogw’okubanza, akeegyesa abantu kurabira omu bi yaagambire. Ebigambo bye bikaba biine amaani ahakuba akeegyesa amazima agarikukwata ahari Ruhanga, ekigyendererwa ky’okubaho, kandi akooreka ngu Obukama bwa Ruhanga nibwo buraamareho oburemeezi bw’abantu bwona. (Luk. 24:19) Kandi akeegyesa kurabira omu ky’okureeberaho kye. Oku yaatwarize akaba naayoreka abakuratsi be oku baine kutwaza.​—Yoh. 13:15.

⁵ Yesu akeegyesa ryari? N’obu yaabaire naaheereza aha omu nsi. (Mat. 4:23) Kandi akeegyesa n’abakuratsi be bwanyima y’akaire kakye aherize kuzooka. Nk’eky’okureeberaho, akeeyoreka abeegi be obundi abaabaire nibarenga omuri 500, reero yaabaragiira ‘kuhindura abantu abeegi.’ (Mat. 28:19, 20; 1 Kor. 15:6) Yesu nk’omutwe gw’ekibiina, akagumizamu naaha abakuratsi be obuhabuzi, na bwanyima y’okugarukayo omu iguru. Nk’eky’okureeberaho, omuri 96 Y.A.K., akagambira entumwa Yohaana kugumya Abakristaayo abashukirweho amajuta n’okubaha obuhabuzi.​—Kol. 1:18; Kush. 1:1.

6-7. (a) Ebi Yesu yaayegyeise bihandiikirwe nkahi? (b) Nitubaasa kworobera tuta ekiragiro kya Kristo?

⁶ Ebi Yesu yaayegyeise bihandiikirwe nkahi? Ebitabo bina by’Engiri birimu bingi ebi yaagambire n’ebi yaakozire obu yaabaire ari omu nsi. Ebyahandiikirwe ebindi eby’Orugriika ebyahandiikirwe abantu abaahwereirwe omwoyo gurikwera kandi abaabaire baine “okuteekateeka kwa Kristo,” nibyongyera kutuhwera kumanya emiteekateekyere ya Kristo.—1 Kor. 2:16.

⁷ Eby’okwega: Ebi Yesu yaayegyeise nibikwata aha mbeera z’abantu zoona. N’ahabw’ekyo  ekiragiro kya Kristo nikikwata aha bi turikukora omu ka, aha ishomero, n’omu kibiina. Nitubaasa kwega ekiragiro eki, turikushoma Ebyahandiikirwe eby’Orugriika kandi tukabiteekateekaho. Nitworobera ekiragiro eki, turikugyendera aha buhabuzi, ebi turikuragiirwa, n’emisingye eri omu byahandiikirwe ebyo. Twayorobera ekiragiro kya Kristo, nituba nitworobera Ruhanga waitu oine rukundo, Yehova, Obukomooko bw’ebi Yesu yaayegyeise byona.​—Yoh. 8:28.

8. Omusingi gw’ekiragiro kya Kristo ni guuha?

⁸ Enju yaaba eyombekirwe gye aha musingi guhami, abarikugituuramu nibaba nibahurira baine oburinzi. Omu muringo nigwo gumwe, ekiragiro kirungi ekyombekirwe aha musingi gwa rukundo, nikireetera abarikukyorobera kuhurira baine oburinzi. Ekiragiro kya Kristo nikyegamira aha misingi ogurikukirayo oburungi ogwa rukundo. Ahabw’enki turikubaasa kugira tutyo?

9-10. Ni by’okureeberaho ki ebirikworeka ngu Yesu akaba naahigwa rukundo omu bi yaabaire naakora, kandi nitubaasa kumutooreza tuta?

⁹ Eky’okubanza, Yesu akaba naahigwa rukundo omu bi yaabaire naakora byona. Waagirira omuntu esaasi nari embabazi, nikyoreka ngu noomukunda. Yesu akagirira abantu baingi esaasi yaabeegyesa, yaabakiza, yaabaha eby’okurya, kandi yaazoora n’abafu. (Mat. 14:14; 15:32-38; Mak. 6:34; Luk. 7:11-15) N’obu okukora ekyo kyabaire nikyetengyesa obwire n’amaani maingi, Yesu ayekundiire akeebembeza ebyetengo byabo kukira ebye. Omuringo ogurikukirayo obukuru ogu Yesu yaayorekiremu rukundo n’okuhayo amagara ge ahabwaitu.​—Yoh. 15:13.

¹⁰ Eby’okwega: Nitubaasa kutooreza Yesu turikwebembeza eby’abandi kukira ebyaitu. Naitwe nitubaasa kumutooreza turikuteeraho kugirira abantu esaasi omu kicweka kyaitu. Twabuurira abandi amakuru marungi kandi tukabeegyesa ahabw’okubagirira esaasi, nituba nitworobera ekiragiro kya Kristo.

11-12. (a) Niki ekirikworeka ngu Yehova naatufaho munonga? (b) Nitubaasa kutooreza tuta Yehova omu kugirira abandi rukundo?

¹¹ Ekya kabiri, Yesu akooreka ngu aine rukundo nk’eya Ishe. Yesu omu buheereza bwe aha omu nsi, akooreka oku Yehova arikufayo munonga aha baheereza be. Kimwe aha bi Yesu yaayegyeise n’okugira ngu buri omwe n’ow’omuhendo ahari Tataitwe ow’omu iguru. (Mat. 10:31) Yehova naaba ayeteekateekire kwakiira omwe aha ntaama ze orikuba ahabire yaayeteisa akagaruka omu kibiina. (Luk. 15:7, 10) Yehova akooreka ngu naatukunda arikuhayo Omwana we kuba ekitambo ahabwaitu.​—Yoh. 3:16.

¹² Eby’okwega: Nitubaasa kutooreza tuta Yehova omu kworeka rukundo? (Efe. 5:1, 2) Turikureeba buri w’eishe-emwe nari munyaanyazi-itwe nk’ow’omuhendo, kandi turikwakiira buri ‘ntaama ebuzire,’ yaagarukira Yehova. (Zab. 119:176) Nitworeka ngu nitukunda ab’eishe-emwe na banyaanyazi-itwe turikwehayo kubahwera baaba nibenda kuhwerwa. (1 Yoh. 3:17) Twatwariza abandi omu muringo gwa rukundo, nituba nitworobera ekiragiro kya Kristo.

13-14. (a) Nk’oku kiri omu Yohaana 13:34, 35, Yesu akaragiira abakuratsi be kukora ki, kandi ahabw’enki kiri ekiragiro kisya? (b) Nitworobera tuta ekiragiro kisya eki?

¹³ Ekya kashatu, Yesu akaragiira abakuratsi be kworeka rukundo ey’okwefeerereza. (Shoma Yohaana 13:34, 35.) Ekiragiro eki Yesu yaahaire ni kisya ahakuba nikituhiga kugirira abandi rukundo omu muringo ogurikutaana n’Ebiragiro ebi Ruhanga yaahaire Abaisraeli: Twine kukunda ab’eishe-emwe bagyenzi baitu nk’oku Yesu yaatukunzire. Ekyo nikitwetengyesa kugira rukundo ey’okwefeerereza. *  Twine kukunda ab’eishe-emwe na banyaanyazi-itwe kukira oku turikwekunda. Twine kubakunda munonga tukahika n’aha kuhayo amagara gaitu ahabw’abo nk’oku Yesu yaakozire.

¹⁴ Eby’okwega: Nitworobera tuta ekiragiro ekisya? Turikugira ebi twayefeerereza kuhwera ab’eishe-emwe na banyaanyazi-itwe. Nituba tweteekateekire kwefeerereza ebintu ebikye n’ebihango nk’okwehayo ahabw’ab’eishe-emwe bagyenzi baitu. Nk’eky’okureeberaho, nituba nitworobera ekiragiro kya Kristo twaba nitukira kuhwera ow’eishe-emwe nari munyaanyazi-itwe okuzire kuza omu ruteerane, twagira eki twayefeerereza kushemeza abakundwa baitu, nari twashaba orusa kuruga aha murimo gwaitu kuza kuhwera abahikirweho ekihikiirizi. Kandi nituba nitureetera ekibiina kyaitu kuba omwanya ogu buri omwe arikubaasa kuhurira aine oburinzi.

15-17. (a) Ebi Yesu yaakozire bikooreka bita ngu naakunda oburingaaniza? (b) Nitubaasa kutooreza tuta Yesu?

¹⁵ “Oburingaaniza,” nk’oku kirikukoresibwa omu Baibuli, omu bugufu nikimanyisa okukora eki Ruhanga arikutwara nk’ekihikire tutarikushoroora. Ahabw’enki turikubaasa kugira ngu ekiragiro kya Kristo nikireetaho oburingaaniza?

¹⁶ Eky’okubanza, yetegyereze oku ebi Yesu yaakozire byayorekire ngu naakunda oburingaaniza. Obu Yesu yaabaire ari omu nsi, abeebembezi b’ediini y’Ekiyudaaya bakaba nibanga abatari Bayudaaya, Abayudaaya abaabutoosha, kandi batarikuha abakazi ekitiinisa. Kwonka Yesu, akaba naatwariza boona omu muringo murungi atarikushoroora. Akaikiriza abatari Bayudaaya abaamwikiriize bakamukuratira. (Mat. 8:5-10, 13) Akabuurira atarikushoroora abooro n’abagaiga. (Mat. 11:5; Luk. 19:2, 9) Akaba atarikutwariza kubi abakazi. Omu mwanya gw’ekyo, akaba naabatwariza omu muringo gw’ekitiinisa kandi ogw’embabazi, otwariiremu n’abo abu baabaire nibareeba nk’ab’ahansi.​—Luk. 7:37-39, 44-50.

¹⁷ Eby’okwega: Nitubaasa kutooreza Yesu tutarikushoroora abandi, kandi turikubuurira boona oyihireho entaasya yaabo nari ediini yaabo. Abashaija Abakristaayo nibamutooreza barikutwariza abakazi omu muringo gw’ekitiinisa. Twakora ebintu ebyo, nituba nitworobera ekiragiro kya Kristo.

18-19. Yesu akeegyesa ki aha kikwatiraine n’oburingaaniza, kandi nitwegyera ki aha bi yaayegyeise?

¹⁸ Ekya kabiri, yetegyereze eki Yesu yaayegyeise aha buringaaniza. Akeegyesa emisingye eyaabaire neija kuhwera abakuratsi be kutwariza abandi omu muringo gw’oburingaaniza. Nk’eky’okureeberaho, teekateeka aha kiragiro ky’okutwarizana gye. (Mat. 7:12) Twena nitwenda batutwarize gye. N’ahabw’ekyo, naitwe twine kutwariza gye abandi. Twakora tutyo, nabo nibabaasa kututwariza omu muringo murungi. Kwonka shi ku baakututwariza omu muringo gutari gw’oburingaaniza? Kandi Yesu akeegyesa abakuratsi be kwesiga Yehova ngu naija kureetera ‘abarikumutakira nyomushana na nyekiro’ kutwarizibwa omu muringo gw’oburingaaniza. (Luk. 18:6, 7) Ebigambo ebyo nibituhamiza ngu Ruhanga naamanya ebi turikurabamu omu biro ebi eby’aha mperu, kandi naija kutureetera oburingaaniza omu bwire obuhikire.​—2 Tes. 1:6.

¹⁹ Eby’okwega: Twayorobera emisingye ei Yesu yaayegyeise, nitwija kutwariza abandi omu muringo gw’oburingaaniza. Kandi ku turaabe tutwariziibwe omu muringo gutari gw’oburingaaniza omu nsi egi erikwebemberwa  Sitaane, nitubaasa kugira obuhuumure ngu Yehova naija kureetaho oburingaaniza.

20-21. (a) Abaine obushoboorozi bashemereire kutwariza bata abandi? (b) Omushaija naabaasa kworeka ata rukundo y’okwefeerereza, kandi ashemereire kutwariza ata abaana be?

²⁰ Kurugiirira aha kiragiro kya Kristo, abaine obushoboorozi bashemereire kutwariza bata abandi? Obu rukundo nigwo musingi gw’ekiragiro ekyo, abaine obushoboorozi baine kutwariza abu baineho obushoboorozi omu muringo gw’ekitiinisa kandi ogwa rukundo. Baine kwijuka ngu Kristo naayenda ngu tutwarize abandi omu muringo gwa rukundo omuri buri kimwe.

²¹ Omu ka. Omushaija ashemereire kukunda omukazi we “nk’oku Kristo yaakunzire” ekibiina. (Efe. 5:25, 28, 29) Omushaija ashemereire kugira rukundo ey’okwefeerereza nka Kristo, arikwebembeza ebyetengo by’omukazi we okukira ebye. Abashaija abamwe ahabw’okukurira omu bicweka ahu batarikutwariza gye abandi, nikibagumira kworeka abakazi baabo rukundo ey’okwefeerereza. Nikibaasa kubagumira kucwa emize mibi, kwonka baine kukora empindahinduka ezi kubaasa kworobera ekiragiro kya Kristo. Omushaija oine rukundo ey’okwefeerereza naaha omukazi we ekitiinisa. Omushaija orikukunda abaana be naayetantara kubagwisa kubi omu bigambo n’omu bikorwa. (Efe. 4:31) Omu mwanya gw’ekyo, naayoreka abaana be ngu naabakunda kandi ngu naabasiima arikubareetera kuhurira baine oburinzi. Omushaija nk’ogwo naareetera abaana be kumwesiga n’okumukunda.

22. Kurugiirira ahari 1 Petero 5:1-3, “entaama” n’ez’oha, kandi zishemereire kutwarizibwa zita?

²² Omu kibiina. Abareeberezi baine kwijuka ngu “entaama” ti zaabo. (Yoh. 10:16; shoma 1 Petero 5:1-3.) Ebigambo “obusyo bwa Ruhanga,” ‘nk’oku Ruhanga arikukunda,’ ‘n’obusyo obu mwakwatsiibwe’ nibitwijutsya ngu entaama n’eza Yehova. Naayenda ngu entaama ze zitwariziibwe  omu muringo gwa rukundo kandi ogw’embabazi. (1 Tes. 2:7, 8) Yehova naasiima abareeberezi abarikuhikiiriza gye obujunaanizibwa bwabo. Ab’eishe-emwe n’abanyaanyazi-itwe nibakunda abareeberezi nk’abo kandi nibabaha n’ekitiinisa.

23-24. (a) Abareeberezi baine bujunaanizibwa ki omu kushoboorora eziine akakwate n’ebibi by’amaani? (b) Abareeberezi nibata omutima ahari ki baaba nibashoboorora enshonga ezo?

²³ Abareeberezi baine bujunaanizibwa ki baaba nibashoboorora enshonga ezirikukwata aha bibi by’amaani? Obujunaanizibwa bwabo nibutaana n’obw’abakuru n’abaramuzi abaabaire nibeebembera Israeli omu bwire bw’Ebiragiro. Omu bwire obwo, abashaija abatoorainwe bakaba batarikushoboorora enshonga z’eby’omwoyo zonka, beitu n’emishango etaine kakwate n’okuramya Yehova. Kwonka abareeberezi abarikworobera ekiragiro kya Kristo nibashoboorora enshonga eziine akakwate n’okuramya Yehova zonka. Nibeetegyereza ngu Ruhanga naikiriza ab’obushoboorozi omu nsi kuba nibo baashoboorora emishango etaine kakwate n’okuramya kwaitu. Ekyo nikitwariramu okufubira n’okutangisa omuntu, nari okumuta omu kihome.​—Rom. 13:1-4.

²⁴ Abareeberezi nibashoboorora bata enshonga eziine akakwate n’ebibi by’amaani? Nibakoresa Ebyahandiikirwe kwetegyereza ekikozirwe kyenyine, reero babona kucwamu. Nibaguma nibaijuka ngu rukundo nigwo musingi gw’ekiragiro kya Kristo. Rukundo neehiga abareeberezi kuteekateeka aha nshonga nka: Niki ekirikubaasa kukorwa kuhwera omuntu weena omu kibiina otwariziibwe kubi? Omuntu okozire ekibi ky’amaani ayeteisize? Naabaasa kuhwerwa kugaruka kugira omukago murungi na Yehova?

25. Ekicweka ekirikukurataho nikiza kugamba ahari ki?

²⁵ Ka nikitushemeza munonga okuba ahansi y’ekiragiro kya Kristo! Buri omwe ahariitwe yaateeraho munonga kukyorobera, ekibiina nikiba omwanya murungi ahu boona barikuhurira nibakundwa, bari ab’omuhendo, kandi baine oburinzi. Kwonka tukiri omu nsi ahu abantu “ababi” barikweyongyera “kuba babi.” (2 Tim. 3:13) Tushemereire kuguma nitureeba. Ekibiina Ekikristaayo nikibaasa kworeka kita oburingaaniza nk’obwa Ruhanga kyaba nikishoboorora enshonga eziine akakwate n’okutoroboza abaana? Ekicweka ekirikukurataho nikiza kugarukamu ekibuuzo ekyo.