1. Нӕ бон цӕбӕл ӕй федарӕй ӕууӕндун?

ЙЕГОВӔ ӕ лӕггадгӕнгути алкӕддӕр уарзта ӕма сӕ алкӕддӕр уарздзӕй. Уомӕй уӕлдай ма Йеговӕ уарзуй рӕстдзийнадӕ (Пс. 33:5). Мадта нӕ бон ӕй федарӕй ӕууӕндун дууӕ гъуддагебӕл: 1) ӕ лӕггадгӕнгутӕ хӕрандзийнадӕбӕл ку исӕмбӕлунцӕ, уӕд ин зин фӕууй, 2) Йеговӕ хӕрандзийнадӕн кӕрон искӕндзӕй. Аци статьятӕй фиццаги куд базудтан, уомӕ гӕсгӕ Хуцау израилӕгтӕн ке равардта, еци Закъонӕн ӕ бундор адтӕй уарзондзийнадӕ *. Еци Закъонмӕ гӕсгӕ, алке хӕццӕ дӕр гъӕуама рӕстӕй архайдтайуонцӕ, уӕлдайдӕр ба сӕрбӕлдзорӕг кӕмӕн н’ адтӕй, уони хӕццӕ (Дук. з. 10:18). Аци закъонӕй бӕрӕг ӕй, Йеговӕ ӕ лӕггадгӕнгутӕбӕл куд тухсуй, е.

2. Цӕхуӕн фарстатӕмӕ ӕркӕсдзиан?

² Н. э. 33 анзи киристон ӕмбурд ку фӕззиндтӕй, уӕд Моисеййи закъон ӕ хъаурӕ фесафта. Еци Закъон уарзондзийнадӕ ӕма рӕстдзийнадӕбӕл арӕзт адтӕй. Мадта уӕд киристӕнттӕ, хӕрандзийнадӕй сӕ ка гъӕуай кодтайдӕ, ӕнӕ уӕхӕн закъонӕй байзадӕнцӕ? Нӕъ, уомӕн ӕма син фӕззиндтӕй нӕуӕг закъон – Киристей закъон. Аци статьяй фиццаг ӕркӕсдзиан, еци закъон ци ӕй, уомӕ. Уой фӕсте ба базондзиан дзуӕппитӕ аци фарстатӕбӕл: уотӕ зӕгъӕн цӕмӕн ес, ӕма аци закъон уарзондзийнадӕбӕл ӕнцойнӕ кӕнуй? Рӕстдзийнадӕмӕ ба куд разӕнгард кӕнуй? Аци закъони дӕлбарӕ ка ӕй ӕма бартӕ ке къохти ’нцӕ, етӕ иннети хӕццӕ куд гъӕуама архайонцӕ?

3. Галатӕгтӕмӕ 6:2 ци «Киристей закъони» кой цӕуй, уомӕ ци хауй?

³ Бакӕсӕ Галатӕгтӕмӕ 6:2. Киристӕнттӕ ӕнцӕ Киристей закъони дӕлбарӕ. Йесо ӕ фӕдбӕлдзӕугутӕн закъӕнттӕ финсгӕ нӕ никкодта, фал син равардта амундтӕ, фӕдзӕхститӕ ӕма уагӕвӕрдтӕ. «Киристей закъонмӕ» хауй, Йесо цӕбӕлдӕриддӕр ахур кодта, е. Уой никки хуӕздӕр балӕдӕрдзиан, идарддӕр абзацтӕмӕ ку ’ркӕсӕн, уӕд.

4, 5. Киристе адӕни куд ахур кодта ӕма сӕ цӕбӕл ахур кодта?

⁴ Цума Йесо адӕни куд ахур кодта? Фиццагидӕр, ци дзурдта, уомӕй. Ӕ дзурди устур хъаурӕ адтӕй, уомӕн ӕма дзурдта рӕстдзийнадӕ Хуцауи туххӕй, адӕймаг цӕмӕн цӕруй, уой туххӕй, удта гъезӕмӕрттӕн кӕрон ӕрмӕстдӕр Хуцауи Паддзахадӕ ке искӕндзӕй, уой туххӕй (Лук. 24:19). Уомӕй уӕлдай ма Йесо ӕхе цардӕй дӕр ӕвдиста, ӕ фӕдбӕлдзӕугутӕ куд гъӕуама цӕронцӕ, уой (Иоан. 13:15).

⁵ Киристе адӕни ахур кодта, зӕнхӕбӕл ку адтӕй, уӕд (Матф. 4:23). Уомӕй уӕлдай ма ӕ фӕдбӕлдзӕугути ахур кодта, ку райгас ӕй, уӕд дӕр. Зӕгъӕн, еу хатт ӕ фӕдбӕлдзӕугутӕмӕ фӕззиндтӕй,– еу 500 фулдӕр адтайуонцӕ,– ӕма син бафӕдзахста ахуркӕнуйнӕгтӕ цӕттӕ кӕнун (Матф. 28:19, 20; 1 Кор. 15:6). Йесо уӕлӕрвтӕмӕ ку иссудӕй, уӕд дӕр ӕ фӕдбӕлдзӕугутӕн разамунд лӕвардта, куд ӕмбурди сӕргълӕууӕг, уотӕ. Зӕгъӕн, н. э. 96 анзи апостол Иоаннӕн баихӕс кодта исӕрст киристӕнтти бафедар кӕнун ӕма сӕ бараст кӕнун (Кол. 1:18; Рарг. 1:1).

6, 7. а) Киристе цӕбӕл ахур кодта, е кӕми финст ӕй? б) Нӕ бон куд ӕй Киристей закъон ӕнхӕст кӕнун?

⁶ Киристе цӕбӕл ахур кодта, ӕма ци гъуддӕгтӕ кодта, етӕ еугурӕйдӕр финст ӕрцудӕнцӕ, Евангелитӕ ке хонунцӕ, еци цуппар киунугеми. Киристон Грекъаг Финстити иннӕ киунугутӕй дӕр нӕ бон ӕй базонун, Йесо куд сагъӕс кодта, уой. Етӕ дӕр Хуцауи сугъдӕг хъаури разамундӕй финст ӕрцудӕнцӕ, ӕма сӕ ка финста, етӕ дӕр, «Киристе куд гъуди кӕнуй, уотӕ» гъуди кодтонцӕ (1 Кор. 2:16).

⁷ Цӕбӕл ахур кӕнӕн. Киристей ахурӕдтӕ царди алли уавӕри дӕр ӕнхус кӕнунцӕ. Уомӕ гӕсгӕ Киристей закъони дӕлбарӕ ку уӕн, уӕд е бӕрӕг кӕндзӕй, хӕдзари, кусти, скъолай кенӕ ӕмбурди нӕхе куд фӕддарӕн, уобӕл. Еци закъон хуӕздӕр лӕдӕрдзиан, Киристон Грекъаг Финститӕ ку кӕсӕн ӕма сӕбӕл ку сагъӕс кӕнӕн, уӕд. Уоми ци амундтӕ,  фӕдзӕхститӕ ӕма уагӕвӕрдтӕ ес, уонӕмӕ гӕсгӕ нӕ цард ку аразӕн, уӕд, зӕгъӕн ес, ӕма Киристей закъон ӕнхӕст кӕнӕн. Ӕма Киристей закъон ку ӕнхӕст кӕнӕн, уӕд уотемӕй нӕ уарзӕгой Хуцау Йеговӕмӕ дӕр игъосдзиан, уомӕн ӕма Киристе цӕбӕл ахур кодта, етӕ ӕ Фидӕй цудӕнцӕ (Иоан. 8:28).

8. Киристей закъонӕн ӕ бундор ци ӕй?

⁸ Федар бундорбӕл ка лӕууй, уӕхӕн хӕдзари цӕргутӕн тӕссаг нецӕмӕй фӕууй. Гъе уотӕ, федар бундор кӕмӕн ес, еци закъони дӕлбарӕ ка фӕууй, уонӕн дӕр ӕдас фӕууй. Киристей закъон лӕууй тӕккӕ хуӕздӕр бундорбӕл – уарзондзийнадӕбӕл. Цӕмӕн ес уотӕ зӕгъӕн?

9, 10. Киристе адӕни ке уарзта, е цӕмӕй бӕрӕг ӕй ӕма ’й мах бон куд ӕй фӕнзун?

⁹ Фиццаг: Киристе цидӕриддӕр кодта, уой кодта, адӕни ке уарзта, уой туххӕй. Ӕ уарзондзийнадӕ бӕрӕг адтӕй, адӕнӕн ке тӕрегъӕд кодта, уомӕй. Тӕрегъӕд син ке кодта, е ӕй разӕнгард кодта берӕ адӕни ахур кӕнунмӕ, сӕйгити дзӕбӕх кӕнунмӕ, стонг ка адтӕй, уони ӕфсадунмӕ ӕма мӕрдтӕ игас кӕнунмӕ (Матф. 14:14; 15:32–38; Мар. 6:34; Лук. 7:11–15). Кӕд ӕй еци гъуддӕгтӕбӕл берӕ рӕстӕг ӕма хъауритӕ харз кӕнун гъудӕй, уӕддӕр фиццагидӕр иннети сагъӕс кодта, ӕма уой кодта зӕрдиагӕй. Ӕ уарзондзийнади тӕккӕ устурдӕр ӕвдесӕн ба адтӕй, ӕ цард адӕни туххӕй ке равардта, е (Иоан. 15:13).

¹⁰ Цӕбӕл ахур кӕнӕн. Мах бон дӕр ӕй Киристей фӕнзун ӕма фиццагидӕр иннети сагъӕс кӕнун. Уомӕй уӕлдай ма нӕ бон ӕй Киристей хузӕн, кӕмӕн игъосун кӕнӕн, еци адӕнӕн тӕрегъӕд кӕнун. Хуарз хабар игъосун кӕнунмӕ нӕ е ку фӕрразӕнгард кӕнуй, уӕд, зӕгъӕн ес, ӕма Киристей закъон ӕнхӕст кӕнӕн.

11, 12. а) Йеговӕ нӕ ке уарзуй, е цӕмӕй бӕрӕг ӕй? б) Нӕ бон куд ӕй Йегови уарзт фӕнзун?

¹¹ Дуккаг: Йесой уарзтӕй бӕрӕг адтӕй, Хуцау нӕ куд уарзуй, е. Киристе зӕнхӕбӕл ку адтӕй, уӕд ӕй ӕвдиста, Йеговӕ ӕ лӕггадгӕнгутӕбӕл куд тухсуй, уой. Уомӕй уӕлдай ма лӕдӕрун кодта, алкедӕр ни нӕ уӕларвон Фидӕн куд хъазар ӕй, уой (Матф. 10:31). Йеговӕ зӕрдиагӕй фӕццийнӕ кӕнуй, адӕймаг ку ӕрфӕсмон кӕнуй ӕма фӕстӕмӕ ӕмбурдмӕ ку раздӕхуй, уӕд (Лук. 15:7, 10). Йеговӕ нӕмӕ ӕ уарзондзийнадӕ бавдиста, ӕ еунӕг Фурти мах туххӕй ке равардта, уомӕй (Иоан. 3:16).

¹² Цӕбӕл ахур кӕнӕн. Нӕ бон куд ӕй Йегови уарзт фӕнзун? (Еф. 5:1, 2). Мах нӕ хуӕртӕ ӕма не ’нсувӕртӕн хъӕбӕр устур аргъ кӕнӕн ӕма зӕрдиагӕй фӕццийнӕ кӕнӕн, еске ку ӕрфӕсмон кӕнуй ӕма фӕстӕмӕ Йеговӕмӕ ку раздӕхуй, уӕд (Пс. 119:176). Нӕ уарзондзийнадӕ ма бӕрӕг уодзӕй, нӕ хуӕртӕ ӕма не ’нсувӕртӕн нӕ рӕстӕг ӕма нӕ хъауритӕ ку не ’вгъау кӕнӕн, уӕд дӕр, уӕлдайдӕр ба тухст уавӕри ку уонцӕ, уӕд (1 Иоан. 3:17). Иннети ку уарзӕн, уӕд Киристей закъон ӕнхӕст кӕндзиан.

13, 14. а) Иоанни 13:34, 35 Киристе ӕ фӕдбӕлдзӕугутӕн ци ниффӕдзахста ӕма е нӕуӕг фӕдзӕхст цӕмӕн адтӕй? б) Нӕ бон куд ӕй нӕуӕг фӕдзӕхст ӕнхӕст кӕнун?

¹³ Ӕртиккаг: Йесо ӕ фӕдбӕлдзӕугутӕн ниффӕдзахста, цӕмӕй кӕрӕдзей уодуӕлдай уарзтӕй уарзонцӕ. (Бакӕсӕ Иоанни 13:34, 35.) Аци фӕдзӕхст син нӕуӕг адтӕй, уомӕн ӕма Моисеййи закъони уӕхӕн уарзондзийнади кой нӕ цудӕй. Ӕ фӕдбӕлдзӕугутӕ гъӕуама кӕрӕдзей уарзтайуонцӕ, Киристе сӕ куд уарзта, уотӕ. Е хуннуй уодуӕлдай уарзт *. Нӕ хуӕртӕ ӕма не ’нсувӕрти гъӕуама нӕхецӕй дӕр фулдӕр уарзӕн. Уони туххӕй гъӕуама нӕ цард раттунмӕ дӕр цӕттӕ уӕн, Киристе мах туххӕй ӕ цард куд равардта, уотӕ.

¹⁴ Цӕбӕл ахур кӕнӕн. Нӕуӕг фӕдзӕхст ӕнхӕст кӕндзиан, нӕ хуӕртӕ ӕма ӕнсувӕртӕн минкъий гъуддӕгти дӕр ку ӕнхус кӕнӕн, уӕд. Мах сӕ уарзӕн, ӕма уони туххӕй нӕ цард  раттунмӕ дӕр цӕттӕ ан. Фал ма син минкъий гъуддӕгти ӕнхус кӕнун дӕр нӕ иронх кӕнӕн. Зӕгъӕн, каргун хуӕртӕ ӕма ӕнсувӕрти ӕмбурдмӕ ӕрбаласӕн кенӕ ескӕмӕн ӕхцӕуӕн искӕнуни туххӕй нӕхе естӕмӕйти фӕццох кӕнӕн, кенӕ ба ӕрдзон бӕллӕхи ка бахаудтӕй, уонӕн банхус кӕнуни туххӕй кустӕй отпуск райсунмӕ дӕр цӕттӕ фӕууӕн. Уотемӕй Киристей закъон ӕнхӕст кӕнӕн. Уомӕй уӕлдай ма архайӕн, цӕмӕй не ’мбурд алкӕмӕндӕр уа, уодӕнцойнӕ кӕми иссера, уӕхӕн бунат.

15–17. а) Йесо рӕстӕй ке архайдта, е ӕ гъуддӕгтӕй куд зиндтӕй? б) Нӕ бон куд ӕй Киристей фӕнзун?

¹⁵ Библий дзурд «рӕстдзийнадӕ» фиццагидӕр нисан кӕнуй, Хуцауи цӕсти раст ци ӕй, уой кӕнун ӕма алке хӕццӕ дӕр рӕстӕй архайун. Уотӕ зӕгъӕн цӕмӕн ес, ӕма Киристей закъон хӕрандзийнадӕй гъӕуай кӕнуй?

¹⁶ Фиццаг, ӕркӕсӕн, Йесо, раст ци ӕй ӕма ци нӕй, уомӕ цӕхуӕн цӕстӕй кастӕй, е ӕ гъуддӕгтӕй куд зиндтӕй, уомӕ. Ӕ рӕстӕги дини разамонгутӕ, дзиуиттаг ка н’ адтӕй, уонӕй се ’сӕфт уидтонцӕ, хумӕтӕг адӕни сӕ сӕрмӕ нӕ хастонцӕ, силгоймӕгти ба ӕппундӕр нӕ нимадтонцӕ. Фал Йесомӕ уӕхӕн миутӕн сӕ кой дӕр н’ адтӕй. Дзиуиттаг ка н’ адтӕй, ӕма ибӕл ка ӕууӕндтӕй, уонӕн барӕ лӕвардта, цӕмӕй ӕ фӕдбӕл цудайуонцӕ (Матф. 8:5–10, 13). Удта адӕни гъӕздугутӕ ӕма мӕгуртӕбӕл нӕ хецӕн кодта, фал алкӕмӕндӕр игъосун кодта (Матф. 11:5; Лук. 19:2, 9). Силгоймӕгтӕмӕ карз некӕд исдзурдта. Йесо се ’гасемӕдӕр хӕларзӕрдӕ адтӕй, сауӕнгӕ, иннети цӕсти ӕгадӕ ка адтӕй, уонӕмӕ дӕр (Лук. 7:37–39, 44–50).

¹⁷ Цӕбӕл ахур кӕнӕн. Киристей ку фӕнзӕн, уӕд нӕмӕ гъолон миутӕ нӕ уодзӕй ӕма хуарз хабар дзордзиан, игъосун кедӕриддӕр фӕндуй, уонӕн. Адӕймаг цӕхуӕн динбӕл хуӕст ӕй кенӕ мӕгур ӕй ӕви гъӕздуг, уомӕ нӕ кӕсдзиан. Киристей ка фӕнзуй, уӕхӕн нӕлгоймаг ба ӕ бийнойнаги нимайдзӕй. Уотӕ ку архайӕн, уӕд бӕрӕг уодзӕй, Киристей закъон ке ӕнхӕст кӕнӕн.

18, 19. Раст ци ӕй, уой туххӕй Йесо ци дзурдта ӕма нӕ е цӕбӕл ахур кӕнуй?

¹⁸ Нур ба ӕркӕсӕн, Йесо, раст ци ӕй, уобӕл адӕни куд ахур кодта, уомӕ. Ӕ фӕдбӕлдзӕугутӕн амудта, иннети хӕццӕ син рӕстӕй архайунмӕ ка ӕнхус кодтайдӕ, уӕхӕн уагӕвӕрдтӕ. Расагъӕс кӕнӕ, Матфеййи 7:12 финст ка ӕй, еци уагӕвӕрдбӕл. Алкедӕр ни фӕндуй, цӕмӕй ӕ хӕццӕ рӕстӕй архайонцӕ. Ӕма мах иннети хӕццӕ уотӕ ку архайӕн, уӕд, ка ’й зонуй, етӕ дӕр нӕ хӕццӕ рӕстӕй архайдзӕнцӕ. Фал хӕрандзийнадӕбӕл ку исӕмбӕлӕн, уӕдта нин ци кӕнгӕ ’й? Йесо ма ӕ фӕдбӕлдзӕугутӕн загъта: «Хуцау е ’взурстити туххӕй, ӕхсӕвӕй-бонӕй имӕ ка дзиназуй, уони туххӕй, раст ӕма хӕран ка ӕй, уой нӕ равзардзӕй?» (Лук. 18:6, 7). Аци дзурдтӕй нин зӕрдӕ ӕвӕруй, Йеговӕ раст Хуцау ке ӕй, ӕма аци фӕстаг бӕнтти ци ӕфхуӕрд ӕййафӕн, уой ке уинуй ӕма, ӕфхуӕрд кӕмӕй ӕййафӕн, уонӕн ӕ рӕстӕги ке истӕрхон кӕндзӕй (2 Фес. 1:6).

¹⁹ Цӕбӕл ахур кӕнӕн. Киристей уагӕвӕрдтӕмӕ гӕсгӕ ку цӕрӕн, уӕд алке хӕццӕ дӕр рӕстӕй архайдзиан. Йеговӕ хӕран гъуддӕгтӕн ӕнӕмӕнгӕй кӕрон искӕндзӕй. Ӕма еци гъуди нӕ зӕрдӕбӕл ку дарӕн, уӕд нин е уодӕнцойнӕ хӕсдзӕй, Сайтани дуйней хӕрандзийнадӕбӕл ку ӕмбӕлӕн, уӕд.

20, 21. а) Бартӕ кӕмӕ ес, етӕ иннетӕн куд гъӕуама уонцӕ? б) Лӕгти бон куд ӕй уодуӕлдай уарзт ӕвдесун, удта фидтӕлтӕ сӕ сувӕллӕнттӕн куд гъӕуама уонцӕ?

²⁰ Бартӕ ке къохти ’нцӕ, етӕ Киристей закъонмӕ гӕсгӕ иннети хӕццӕ куд гъӕуама архайонцӕ? Еци закъонӕн ӕ бундор уарзондзийнадӕ ке ӕй, уомӕ гӕсгӕ сӕ дӕлбарӕ ка ӕй, уони хӕццӕ архайгӕй гъӕуама  уонцӕ хӕларзӕрдӕ ӕма син аргъ кӕнонцӕ. Дӕ зӕрдӕбӕл дарӕ еу гъуддаг: Киристей фӕдбӕлдзӕугутӕн се ’гас гъуддӕгтӕй дӕр гъӕуама бӕрӕг уа сӕ уарзондзийнадӕ.

²¹ Бийнонти. Лӕг гъӕуама ӕ бийнойнаги уарза, «Киристе... ӕмбурд куд бауарзта... уотӕ» (Еф. 5:25, 28, 29). Киристей ка фӕнзуй, уӕхӕн лӕг гъӕуама ӕ бийнойнаги уарза ӕма фиццагидӕр уой сагъӕс кӕна, ӕхе сагъӕс нӕ, фал. Еуӕй-еу нӕлгоймӕгтӕн уӕхӕн уарзондзийнадӕ ӕвдесун зин фӕууй. Цума цӕмӕн? Ка ’й зонуй, кӕми исгъомбӕл ӕнцӕ, уоми адӕн хӕларзӕрдӕдзийнадӕбӕл ӕма иннети хӕццӕ рӕстӕй архайунбӕл ахур нӕ ’нцӕ. Ӕма син уомӕ гӕсгӕ зин фӕууй сӕ зундахаст раййевун. Фал Киристей закъон ӕнхӕст кӕнун ке фӕндуй, етӕ гъӕуама еци зундахаст раййевонцӕ. Нӕлгоймаг ӕ бийнойнаги сагъӕс ку кӕна, уӕд ӕй ӕ бийнойнаг дӕр нимайдзӕй. Ӕ сувӕллӕнтти ка уарзуй, еци фидӕ син сӕ зӕрдӕ некӕд фӕрресун кӕндзӕй, нӕдӕр дзурдтӕй, нӕдӕр гъуддӕгтӕй (Еф. 4:31). Фал син ӕ уарзондзийнадӕ ӕвдесдзӕй, удта сӕ сӕ хуарз гъуддӕгти туххӕй ӕстаудзӕй, цӕмӕй сӕ зӕрдӕ сабур уа ӕма ’й зононцӕ, ӕдас син ке ӕй, уой. Уӕхӕн фиди ӕ сувӕллӕнттӕ дӕр уарздзӕнцӕ ӕма ’й нимайдзӕнцӕ.

22. 1 Петури 5:1–3 куд финст ӕй, уомӕ гӕсгӕ фустӕ ке ’нцӕ ӕма хестӕр нӕлгоймӕгтӕ сӕ хӕццӕ куд гъӕуама архайонцӕ?

²² Ӕмбурди. Хестӕр нӕлгоймӕгтӕ гъӕуама ма иронх кӕнонцӕ, «фустӕ» уони ке нӕ ’нцӕ (Иоан. 10:16; бакӕсӕ 1 Петури 5:1–3). Дзурдбаститӕ «Хуцауи дзогӕ» кенӕ «Хуцауи бунтӕ» хестӕр нӕлгоймӕгтӕн сӕ зӕрдӕбӕл лӕуун кӕнунцӕ, «фустӕ» Йегови ке ’нцӕ. Уой фӕндуй, цӕмӕй ин ӕ фустӕмӕ хӕларзӕрдӕ уонцӕ ӕма сӕ уарзонцӕ (1 Фес. 2:7, 8). Йегови «фустӕбӕл» зӕрдиагӕй ка тухсуй, еци хестӕр нӕлгоймӕгтӕ растауйнаг ӕнцӕ. Уомӕй уӕлдай ма уӕхӕн хестӕр нӕлгоймӕгти хуӕртӕ ӕма ӕнсувӕртӕ дӕр уарзунцӕ ӕма сӕ нимайунцӕ.

23, 24. а) Ӕмбурди еске уӕззау тӕрегъӕд ку искӕнуй, уӕд хестӕр нӕлгоймӕгти ихӕс ци фӕууй? б) Уӕхӕн гъуддӕгтӕ ӕвзаргӕй хестӕр нӕлгоймӕгтӕ сӕ гъудий ци гъӕуама даронцӕ?

 ²³ Ӕмбурди еске уӕззау тӕрегъӕд ку искӕнуй, уӕд ин ӕ гъуддаг хестӕр нӕлгоймӕгтӕ февзарунцӕ. Цума сӕ ихӕс ци ӕй? Израили тӕрхонгӕнгутӕн ӕма хестӕр лӕгтӕн ци ихӕстӕ адтӕй, уонӕй еу минкъий хецӕн кӕнунцӕ. Моисеййи закъонмӕ гӕсгӕ еци лӕгтӕ Хуцауӕн ковуни хӕццӕ баст гъуддӕгтӕй уӕлдай ма ӕвзурстонцӕ адӕни гъуддӕгтӕ ӕма фудракӕндтӕ дӕр. Фал абони, Киристей закъон ка ӕнхӕст кӕнуй, еци хестӕр нӕлгоймӕгтӕ, тӕрегъӕд ка ракӕнуй, уой гъуддагмӕ ку ӕркӕсунцӕ, уӕд февзарунцӕ ӕрмӕстдӕр Хуцауӕн лӕггадӕ кӕнуни хӕццӕ баст гъуддӕгтӕ. Етӕ ’й лӕдӕрунцӕ, бӕсти закъон ка фехалуй кенӕ фудгъуддӕгтӕ ка ракӕнуй, уонӕн тӕрхон кӕнуни барӕ Йеговӕ хецауадӕн ке равардта. Хецауади бон ӕй уӕхӕн адӕнбӕл ивар исӕвӕрун кенӕ сӕ ахӕстдони исбадун кӕнун (Ром. 13:1–4).

²⁴ Хестӕр нӕлгоймӕгтӕ, уӕззау тӕрегъӕд ка искодта, уӕхӕн адӕймаги гъуддаг куд февзарунцӕ? Етӕ Финстади фӕрци гъуддагмӕ аллирдигӕй ӕркӕсунцӕ, уой фӕсте ба унаффӕ рахӕссунцӕ. Удта сӕ гъудий дарунцӕ, Киристей закъон уарзондзийнадӕбӕл арӕзт ке ӕй. Еци уарзондзийнадӕ хестӕр нӕлгоймӕгти разӕнгард кӕнуй, цӕмӕй расагъӕс кӕнонцӕ, иннети фудӕй зиндзийнӕдтӕ ка бавзурста, еци хуӕртӕ ӕма ӕнсувӕртӕн куд ӕнгъезуй банхус кӕнун, уобӕл. Зиндзийнӕдтӕ ке фудӕй бавзурстонцӕ, е ӕмбурдӕй ку уа, уӕд хестӕр нӕлгоймӕгтӕ расагъӕс кӕндзӕнцӕ уӕхӕн фарстатӕбӕл: адӕймаг фӕсмон кӕнуй ӕви нӕ? Ескуд ин ӕнгъезуй банхус кӕнун, цӕмӕй нӕуӕгӕй Йеговӕмӕ бахӕстӕг уа?

25. Иннӕ статьяй дзурд цӕбӕл цӕудзӕй?

²⁵ Киристей закъон нин ке ес, уой туххӕй Хуцауӕй хъӕбӕр боз ан! Не ’гасдӕр еци закъон ӕнхӕст кӕнунбӕл ку архайӕн, уӕд не ’мбурди алкедӕр лӕдӕрдзӕй, ке ӕй уарзунцӕ, ке ин аргъ кӕнунцӕ ӕма син лӕгъузӕй ке неке неци ракӕндзӕй. Фал мах цӕрӕн, лӕгъуз адӕн «фуддӕрӕй-фуддӕр» кӕми кӕнунцӕ, уӕхӕн дуйней (2 Тим. 3:13). Уомӕ гӕсгӕ гъӕуама лӕмбунӕг уӕн. Фӕууй уотӕ, ӕма кадӕр сувӕллонӕн тухмиуӕ бакӕнуй. Уӕхӕн хабар ку ӕрцӕуй, уӕд ӕмбурди бон куд ӕй Йегови фӕнзун ӕма рӕстӕй архайун? Уобӕл дзурд цӕудзӕй иннӕ статьяй.