1. Äwa woone twee Sachen kjenn wie ons secha sennen?

JEHOVA GOTT haft siene Deena noch emma jeleeft un hee woat daut uk emma. Hee leeft uk Jerajchtichkjeit (Psa. 33:5). Doawäajen kjenn wie ons äwa twee Sachen secha sennen: 1. Jehova deit daut wee, wan se siene Deena orrajcht behaundlen. 2. Hee woat fa Jerajchtichkjeit sorjen. En dän ieeschten von dise vea Artikjels * hab wie jelieet, daut daut Jesaz, waut Gott de Israeliten derch Moses jeef, opp Leew jebut wia. Dit Jesaz sorjd doafäa, daut aule jerajcht behaundelt worden, mau rajcht dee, waut helploos wieren (5. Mo. 10:18). Daut wiest uk, woo sea Jehova om siene Deena bekjemmat es.

2. Woone Froagen woa wie beauntwuaten?

² Daut Jesaz Moses wia bloos bat 33 n. Chr. jeltich, aus de Christenvesaumlunk oppjestalt wort. Haben de Christen dan kjeen Jesaz, waut opp Leew jebut es un fa Jerajchtichkjeit sorcht? Jo, dee haben een nieet Jesaz. En disen Artikjel woa wie lieren, waut dit Jesaz es, un de Froagen beauntwuaten: Wuarom kjenn wie sajen, daut dit Jesaz opp Leew jebut es? Woo sorcht daut fa Jerajchtichkjeit? Un woo sellen soone, waut äwa aundre aunjestalt sent, dee no dit Jesaz no behaundlen?

3. Waut jehieet to “Christus sien Jesaz”, wua Galata 6:2 von rät?

³ Läs Galata 6:2. Christen sent unja “Christus sien Jesaz”. Jesus schreef fa siene Nofolja nich een Buak met Jesazen opp, oba hee jeef an Aunwiesungen, Jebooten un Gruntsauzen, wua  see no läwen sullen. Aules, waut hee lieed, jehieet to “Christus sien Jesaz”. En disen Artikjel woa wie mea von dit Jesaz lieren.

4-5. (a) Woo lieed Jesus aundre? (b) Wanea lieed hee dee?

⁴ Woo lieed Jesus aundre? Hee lieed dee derch daut, waut hee säd. Siene Wieed hauden Krauft, wiels hee de Woarheit äwa Gott säd un de Menschen uk lieed, waut de Senn em Läwen wia un daut Gott sien Kjennichrikj wudd met aul daut Lieden een Enj moaken (Luk. 24:19). Jesus lieed aundre uk derch sien Biespel. Derch sien Läwen wees hee siene Nofolja, woo dee läwen sullen (Joh. 13:15).

⁵ Wanea lieed Jesus aundre? Hee deed daut, aus hee oppe Ieed läwd (Mat. 4:23). Un hee lieed siene Nofolja uk korz nodäm aus hee vom Doot oppstunt. Hee leet sikj biejlikj von eene Grupp Jinja seenen – woomäajlich wieren daut mea aus 500 – un jeef an daut Jeboot: “Moakt . . . Lieelinja” (Mat. 28:19-20; 1. Kor. 15:6). Jesus es daut Haupt von de Vesaumlunk un hee hieed nich opp siene Jinja to lieren, aus hee wada em Himmel wia. Ojjefäa en daut Joa 96 n. Chr. brukt hee biejlikj dän Apostel Johanes toom de jesaulwde Christen Moot toospräakjen un Rot jäwen (Kol. 1:18; Opb. 1:1).

6-7. (a) Wua sent Jesus siene Lieren oppjeschräwen? (b) Woo jehorch wie Christus sien Jesaz?

⁶ Wua sent Jesus siene Lieren oppjeschräwen? En de vea Evangelien es väl bennen, waut Jesus oppe Ieed säd un deed. Un uk de aundre Bieekja von de Christelje Griechische Schreften halpen ons to vestonen, woo Jesus docht. Dee worden je derch dän heiljen Jeist von Mana oppjeschräwen, waut “Christus . . . siene Jesennunk” hauden (1. Kor. 2:16).

⁷ De Lia fa ons: Jesus siene Lieren halpen ons bie aules em Läwen. Christus sien Jesaz wiest, waut wie tus, bie de Oabeit, enne School un enne Vesaumlunk doonen sellen. Wie lieren dit Jesaz kjanen, wan wie de Christelje Griechische Schreften läsen un doaräwa nodenkjen. Un wie jehorchen daut, wan wie de Aunwiesungen, Jebooten un Gruntsauzen en dise Bibelbieekja nokomen. Wan wie Christus sien Jesaz jehorchen, dan jehorch wie onsen leeftoljen Gott Jehova, von dän aul daut kjeem, waut Jesus lieed (Joh. 8:28).

8. Opp waut es Christus sien Jesaz jebut?

⁸ Wan een Hus fein un opp eenen fausten Grunt jebut es, dan feelen dee, waut doabennen wonen, sikj secha. Un wan een feinet Jesaz opp eenen gooden Grunt jebut es, dan feelen dee, waut doano läwen, sikj uk secha. Christus sien Jesaz es opp dän basten Grunt jebut, waut et jeft – opp Leew. Wuarom kjenn wie daut sajen?

9-10. (a) Waut vonne Biespels wiesen, daut Jesus aules ut Leew deed? (b) Woo kjenn wie Jesus nodoonen?

⁹ Ieeschtens: Jesus deed aules ut Leew. Leew es biejlikj doaraun to seenen, daut eenem daut äwa wäm jaumat, ooda daut eena Metjefeel haft. Jesus lieed aundre, heeld Kranke, jeef Hungaje to äten un wuak Doodes opp, wiels am daut äwa de Menschen jaumad (Mat. 14:14; 15:32-38; Mar. 6:34; Luk. 7:11-15). Aul daut kost Jesus väl Tiet un Krauft, oba hee wia dolla om daut todoonen, waut aundre fäld, aus om daut, waut am fäld. Un de jratsta Bewies fa siene Leew wia, daut hee sien Läwen fa aundre jeef (Joh. 15:13).

¹⁰ De Lia fa ons: Wie doonen Jesus no, wan wie dolla doarom todoonen sent, waut aundre fält, aus om daut, waut ons fält. Wie doonen am uk no, wan wie met de Menschen en ons Jebiet Metjefeel haben. Wan wie dee ut Metjefeel de goode Norecht prädjen un lieren, dan jehorch wie Christus sien Jesaz.

11-12. (a) Waut wiest, daut Jehova sea om ons bekjemmat es? (b) Woo kjenn wie Jehova siene Leew nodoonen?

¹¹ Tweedens: Jesus wees, woo väl Leew sien Voda haud. En sienen Deenst wees Jesus, woo sea Jehova om siene Deena bekjemmat wia. Hee lieed toom Biespel, daut jieda eena von ons bie onsen himlischen Voda väl wieet es (Mat. 10:31). Jehova freit sikj sea, wan een veloarnet Schop omkjieet un trigj no de Vesaumlunk kjemt (Luk. 15:7, 10). Jehova bewees siene Leew uk doaderch, daut hee sienen Sän aus Leesjelt fa ons jeef (Joh. 3:16).

¹² De Lia fa ons: Woo kjenn wie Jehova siene Leew nodoonen? (Efs. 5:1-2). Wan jieda Brooda un Sesta bie ons väl wieet es un wan wie wellich een “veloarnet Schop” oppnämen, waut trigj no Jehova kjemt (Psa. 119:176). Wie bewiesen uk, daut wie onse Gloowesbreeda leewen, wan wie onse Tiet un Krauft fa dee brucken, besonda wan dee Help fält (1. Joh. 3:17). Wan wie aundre leeftolich behaundlen, dan jehorch wie Christus sien Jesaz.

13-14. (a) Waut fa een Jeboot jeef Jesus siene Nofolja en Johanes 13:34-35? (b) Wuarom es daut een nieet Jeboot? (c) Woo jehorch wie dit niee Jeboot?

¹³ Dreddens: Jesus jeef siene Nofolja daut Jeboot, daut see sullen Leew haben un wellich waut fa aundre oppjäwen (läs Johanes 13:34-35). Daut wia een nieet Jeboot, wäajen daut Jesaz, waut Gott de Israeliten jeef, nich velangd, daut see äare Gloowesbreeda soo leewen sullen, aus Jesus an jeleeft haud. Toom soone Leew wiesen mott eena reed sennen, wellich waut fa aundre opptojäwen. * Wie sellen onse Breeda un Sestren noch dolla leewen aus ons selfst. Wie motten dee soo sea leewen, daut wie mau rajcht reed sent, fa dee to stoawen, soo aus Jesus daut deed.

¹⁴ De Lia fa ons: Woo jehorch wie daut niee Jeboot? Wan wie fa onse Breeda un Sestren waut oppjäwen. Wie leewen dee soo sea, daut wie reed sent, waut grootet fa dee to doonen, biejlikj fa dee to stoawen, wan daut fält. Oba wie doonen uk wellich waut kjlandret fa dee. Wie jehorchen Christus sien Jesaz biejlikj, wan wie ons pinkjlich bemieejen eenen elren Brooda ooda Sesta met no de Vesaumlunk to  nämen. Ooda wan wie reed sent waut nich to doonen, waut ons jankat, toom eenen Gloowesbrooda eene Freid moaken. Ooda wan wie von de Oabeit aufnämen toom doa methalpen, wua een Owwada äwajegonen es. Wan wie soont doonen, halp wie uk met, daut onse Vesaumlunk eene Städ es, wua aule sikj wool un secha feelen.

15-17. (a) Woo weesen Jesus siene Woakjen, daut hee opp Jerajchtichkjeit hilt? (b) Woo kjenn wie Jesus nodoonen?

¹⁵ Wan de Schreft von “Jerajchtichkjeit” rät, dan meent daut jeweenlich, daut eena daut deit, waut Gott fa rajcht talt, un daut eena doabie kjeenen Unjascheet manke Menschen moakt. Wuarom kjenn wie sajen, daut Christus sien Jesaz fa Jerajchtichkjeit sorcht?

¹⁶ Daut ieeschte well wie mol seenen, woo aun Jesus siene Woakjen to seenen wia, daut hee opp Jerajchtichkjeit hilt. Aus hee oppe Ieed wia, wieren de judische Gloowesleidasch vehaust äwa de Nichjuden un talden de jeweenelje Juden fa läach un hauden kjeenen Respakjt fa de Frues. Oba Jesus wia jerajcht un muak kjeenen Unjascheet manke Menschen. Hee holp de Nichjuden, waut Gloowen hauden un no am kjeemen (Mat. 8:5-10, 13). Hee prädijd aulem un muak kjeenen Unjascheet tweschen de Oame un de Rikje (Mat. 11:5; Luk. 19:2, 9). Hee behaundeld de Frues kjeenmol hunjsch ooda too strenj. Enne Städ daut jinkj hee leeftolich un respakjtvoll met aule Frues om, soogoa met soone, waut von aundre fa schlajcht jetalt worden (Luk. 7:37-39, 44-50).

¹⁷ De Lia fa ons: Wie doonen Jesus no, wan wie nich eenen Unjascheet manke Menschen moaken un aulem prädjen, waut horchen, endoont aus dee rikj ooda oam sent ooda waut von Gloowen dee haben. Christelje Mana doonen Jesus no, wan dee de Frues met Respakjt behaundlen. Wan wie soont doonen, dan jehorch wie Christus sien Jesaz.

18-19. (a) Waut lieed Jesus von Jerajchtichkjeit? (b) Waut lia wie doavon?

¹⁸ Daut tweede well wie seenen, waut Jesus von Jerajchtichkjeit lieed. Hee lieed siene Nofolja Gruntsauzen, waut dee halpen wudden aundre rajcht to behaundlen. Een Biespel fa daut es de Räajel en Matäus 7:12. Wie aula wellen, daut se ons rajcht behaundlen. Doawäajen sell wie aundre uk rajcht behaundlen. Dan woaren dee secha uk wellen fein to ons sennen. Oba waut, wan ons wäa orrajcht behaundelt? Jesus lieed siene Nofolja uk, doaropp to vetruen, daut Jehova deejanje “to äa Rajcht vehalpen [woat], dee am Dach un Nacht doarom aunhoolen” (Luk. 18:6-7). Dise Wieed vespräakjen ons, daut ons jerajchta Gott enwoat, waut vonne Schwierichkjeiten wie en dise latste Tiet haben, un hee sitt uk doano, daut ons to de paussende Tiet to ons Rajcht veholpen woat (2. Tess. 1:6).

¹⁹ De Lia fa ons: Wan wie ons no de Gruntsauzen rechten, waut Jesus lieed, dan woa wie aundre jerajcht behaundlen. Un wan se ons en dän Soton siene Welt orrajcht behaundlen, dan kjenn wie ons doamet treesten, daut Jehova doano seenen woat, daut daut aula trajchtjestalt woat.

20-21. (a) Woo sellen soone, waut äwa aundre aunjestalt sent, met dee omgonen? (b) Woo kaun een Ehemaun Christus siene Leew nodoonen? (c) Woo saul een Voda siene Kjinja behaundlen?

²⁰ Waut velangt Christus sien Jesaz von dee, waut äwa aundre aunjestalt sent? Dit Jesaz es opp Leew jebut un doawäajen motten dee, waut äwa aundre aunjestalt sent, deejanje leeftolich un met Respakjt behaundlen. Dee  motten doaraun denkjen, daut Christus well, daut wie emma Leew wiesen.

²¹ En de Famielje. Een Ehemaun saul siene Fru soo leewen, “aus Christus siene Jemeent” leeft (Efs. 5:25, 28-29). Dee mott Christus siene Leew nodoonen un dolla om daut todoonen sennen, waut siene Fru fält ooda intressieet, aus om sikj selfst. Fa eenje Mana es daut veleicht schwoa soone Leew to wiesen, wäajen dee wua oppwossen, wua dee daut nich jelieet haben, aundre leeftolich un jerajcht to behaundlen. Daut kaun fa dee schwoa sennen sikj to endren, oba dee motten daut, wan dee Christus sien Jesaz jehorchen wellen. Eene Ehefru woat äaren Maun respakjten, wan hee leeftolich es un nich daut ieeschte fa sikj stritt. Un een Voda, waut de Kjinja werkjlich leeft, woat kjeenmol waut doonen ooda sajen, waut dee velazt (Efs. 4:31). Enne Städ daut wiest hee de Kjinja, daut hee an leeft un met an tofräd es, daut dee sikj kjennen secha un wool feelen. Dan woaren de Kjinja am leewen un vetruen.

22. (a) Wäm jehieren de “Schop” no 1. Petrus 5:1-3 no? (b) Woo sellen de Eltestasch met dee omgonen?

²² En de Vesaumlunk. Eltestasch motten em Denkj hoolen, daut de “Schop” nich an jehieren (Joh. 10:16; läs 1. Petrus 5:1-3). De Wieed “Gott siene Häad” un “een Deenst fa dän Harn” halpen de Eltestasch denkjen, daut et Jehova siene Schop sent. Hee well haben, daut see leeftolich un väasechtich met dee omgonen (1. Tess. 2:7-8). Jehova jleicht soone Eltestasch, waut äare Oppgow aus Hoad leeftolich nokomen. Un de Breeda un Sestren leewen un respakjten an dan uk.

23-24. (a) Waut es de Eltestasch äare Oppgow, wan doa wäa waut schlajchtet jedonen haft? (b) Äwa waut denkjen de Eltestasch no, wan dee sikj om soone Sachen kjemren?

²³ Waut es de Eltestasch äare Oppgow, wan doa wäa waut schlajchtet jedonen haft? Bie  dee es daut aundasch aus bie de Rechta un elre Mana en de Tiet von daut Jesaz Moses. Aus dit Jesaz noch jeltich wia, kjemmaden de aunjestalde Mana sikj om jeistelje Sachen un uk om Jerechtssachen un doarom, wan doa wäa een Vebräakjen begonen haud. Oba unja Christus sien Jesaz haben de Eltestasch de Oppgow, sikj om de jeistelje Sachen to kjemren, wan doa wäa waut schlajchtet jedonen haft. Dee weeten, daut Gott de Rejierungen de Oppgow jejäft haft, sikj om Vebräakjen un Jerechtssachen to kjemren un daut dee uk daut Rajcht haben, wäm to strofen ooda entostoppen, wan dee waut schlajchtet jedonen haft (Reem. 13:1-4).

²⁴ Waut doonen de Eltestasch, wan doa wäa von de Vesaumlunk waut schlajchtet jedonen haft? Dee brucken de Schreft toom sikj de Sach unjastonen un toom entscheiden. Un dee hoolen em Denkj, daut Christus sien Jesaz opp Leew jebut es. Ut Leew woaren de Eltestasch äwalajen: “Waut mott jedonen woaren toom aul dee von de Vesaumlunk halpen, waut unja dise schlajchte Sach to lieden kjeemen?” De Leew woat de Eltestasch uk bat doa brinjen to äwalajen: “Haft deejanja een Leetsennen, waut daut schlajchte jedonen haft? Kjenn wie dän halpen, daut met Jehova wada goottomoaken?”

25. Waut woa wie en dän näakjsten Artikjel seenen?

²⁵ Wie sent sea dankboa, daut wie unja Christus sien Jesaz sent! Wan wie ons aula aunstrenjen, daut to jehorchen, dan halp wie met, daut onse Vesaumlunk eene Städ es, wua jieda eena sikj jeleeft un väl wieet un secha feelt. Oba en dise Welt woat daut “met de gottloose . . . Menschen” emma schlemma (2. Tim. 3:13). Doawäajen mott wie sea oppaussen. Woo kaun de Christenvesaumlunk Gott siene Jerajchtichkjeit nodoonen, wan daut om Kjinja mesbrucken jeit? Daut woa wie en dän näakjsten Artikjel seenen.