1. Ngutiphi tintfo letimbili lesingaciniseka ngato?

JEHOVA NKULUNKULU uyabatsandza bantfu labamkhontako. Kusukela kadzeni bekabatsandza futsi uyohlale abatsandza. Uyakutsandza nekulunga. (Hla. 33:5) Singaciniseka ngetintfo letimbili: (1) Jehova uva buhlungu nakabona bantfu bakhe baphatfwa kabi. (2) Wetsembisa kutsi bantfu bakhe ngeke bachubeke baphatfwa kabi, nekutsi utabajezisa labo lababaphatsa kabi. Esihlokweni sekucala kuleti letiluchungechunge, * safundza kutsi uMtsetfo Jehova lawuniketa ema Israyeli asebentisa Mosi bewusekelwe elutsandvweni. Bewukhutsata kutsi bonkhe bantfu baphatsane ngemusa, ngisho nakubantfu labete longabasita. (Dut. 10:18) LoMtsetfo ukhombisa kutsi Jehova utikhatsalela mbamba tikhonti takhe.

2. Ngumiphi imibuto lesitawucoca ngayo?

² EmaKhristu ayekela kusebentisa uMtsetfo waMosi ngesikhatsi kusungulwa libandla lebuKhristu nga-33 C.E. Bekangeke yini asazuza kulomtsetfo lebewusekelwe elutsandvweni futsi lobewukhutsata kulunga? Cha! EmaKhristu aba nemtsetfo lomusha. Kulesihloko sitawucale sicoce ngekutsi uyini lomtsetfo. Sitawubese siphendvula lemibuto: Kungani singatsi lomtsetfo usekelwe elutsandvweni? Kungani singatsi ukhutsata kulunga? Labo labasemagunyeni kufanele babaphatse njani labanye?

3. “Umtsetfo waKhristu” lokuGalathiya 6:2, ufaka ekhatsi ini?

³ Fundza Galathiya 6:2. EmaKhristu angephansi ‘kwemtsetfo waKhristu’. Jesu akazange abhalele balandzeli bakhe luhla lwemitsetfo,  kunaloko wabaniketa ticondziso, imiyalo, kanye netimiso lokufanele baphile ngato. “Umtsetfo waKhristu” ufaka ekhatsi tonkhe tintfo Jesu labetifundzisa. Kuze siwucondze kahle lomtsetfo, sitawufundza lokwengetiwe ngawo kuletigaba letilandzelako.

4-5. Jesu bekafundzisa ngatiphi tindlela, futsi bekabafundzisa nini bantfu?

⁴ Jesu bekafundzisa ngatiphi tindlela? Kwekucala, bekafundzisa bantfu ngalabekakusho. Emavi akhe bekanemandla ngobe bekakhuluma liciniso ngaNkulunkulu, afundzisa ngenjongo yekuphila, futsi wafundzisa kutsi nguMbuso waNkulunkulu kuphela lotawucedza konkhe kuhlupheka kwebantfu. (Luk. 24:19) Jesu bekaphindze abe sibonelo lesihle. Balandzeli bakhe bebangafundza indlela lekahle yekuphila nababona indlela Jesu bekaphila ngayo.—Joh. 13:15.

⁵ Jesu bekabafundzisa nini bantfu? Wabafundzisa ngesikhatsi enta umsebenti wekushumayela. (Mat. 4:23) Waphindze wafundzisa balandzeli bakhe ngesikhatsi asandza kuvuswa ekufeni. Nasi sibonelo, wabonakala kubalandzeli bakhe lebebalicembu—kungenteka bebangetulu kwa-500, futsi wabaniketa umyalo ‘wekwenta bafundzi.’ (Mat. 28:19, 20; 1 Khor. 15:6) Njengenhloko yelibandla, Jesu wachubeka acondzisa bafundzi bakhe ngisho noma asabuyele ezulwini. Nasi sibonelo, cishe nga-96 C.E., Khristu wacondzisa umphostoli Johane kutsi akhutsate aphindze eluleke emaKhristu lagcotjiwe.—Khol. 1:18; Semb. 1:1.

6-7. (a) Timfundziso taJesu titfolakala kuphi? (b) Singakhombisa njani kutsi siyawulalela umtsetfo waKhristu?

⁶ Timfundziso taJesu titfolakala kuphi? EmaVangeli lamane akhuluma ngetintfo letinyenti Jesu latisho nalatenta ngesikhatsi asemhlabeni. Letinye tincwadzi letitfolakala EmiBhalweni YemaKhristu YesiGriki letabhalwa ngemadvodza labenemoya longcwele futsi ‘labenemicabango yaKhristu,’ tiyasisita kutsi sicondze indlela Jesu lebekacabanga ngayo etimeni letitsite.—1 Khor. 2:16.

⁷ Tifundvo lesititfolako: Timfundziso taJesu tisisita kuto tonkhe tici tekuphila. Ngako umtsetfo waKhristu ulawula lesikwenta ekhaya, emsebentini, esikolweni, kanye nasebandleni. Lomtsetfo sitawati nangabe sifundza ImiBhalo YemaKhristu YesiGriki futsi  sizindla ngayo. Sihlonipha lomtsetfo ngekutsi siphile ngekuvumelana neticondziso, imiyalo kanye netimiso lesititfola kulemiBhalo lephefumulelwe. Nangabe silalela lomtsetfo waKhristu, sisuke silalela Nkulunkulu wetfu lositsandzako Jehova, ngobe konkhe Jesu labekakufundzisa bekuvela kuye.—Joh. 8:28.

8. Usekelwe kuphi umtsetfo waKhristu?

⁸ Indlu leyakhiwe kahle nalenesisekelo lesicinile yenta bantfu labahlala kuyo bative baphephile futsi bavikelekile. Ngendlela lefanako, umtsetfo lokahle nalonesisekelo lesicinile wenta bantfu labawulalelako bative baphephile futsi bavikelekile. Umtsetfo waKhristu unesisekelo lesihle kakhulu—usekelwe elutsandvweni. Kungani sisho njalo?

9-10. Ngutiphi tibonelo letikhombisa kutsi lutsandvo lwenta Jesu wenta tonkhe tintfo latenta, futsi singamlingisa njani?

⁹ Kwekucala, kuto tonkhe tintfo Jesu labetenta, bekachutjwa lutsandvo. Nangabe unesihawu nobe luvelo, ukhombisa kutsi unelutsandvo. Jesu wabavela bantfu, kungako afundzisa sicumbi sebantfu, aphilisa labagulako, apha labalambile kudla, waphindze wavusa nalabafile. (Mat. 14:14; 15:32-38; Mak. 6:34; Luk. 7:11-15) Ngisho noma kwenta njalo bekudla sikhatsi sakhe lesinyenti kanye nemandla akhe, Jesu wabeka tidzingo talabanye teta kucala kunetakhe. Ngetulu kwaloko wakhombisa kutsi usitsandza kakhulu ngekutsi anikele ngekuphila kwakhe ngenca yetfu.—Joh. 15:13.

¹⁰ Tifundvo lesititfolako: Sisuke silingisa Jesu nangabe sitsatsa tidzingo talabanye njengaletibalulekile kunetetfu. Singaphindze simlingise ngekutsi sibavele bantfu labasensimini yetfu. Nangabe kuba neluvelo kusenta sibashumayele futsi sibafundzise tindzaba letimnadzi, sitobe sikhombisa kutsi silalela umyalo waKhristu.

11-12. (a) Yini lekhombisa kutsi Jehova uyasikhatsalela? (b) Singamlingisa njani Jehova futsi sibe nelutsandvo?

¹¹ Kwesibili, Jesu wakhombisa lutsandvo lwaBabe wakhe. Ngesikhatsi enta umsebenti wekushumayela, Jesu wakhombisa kutsi Jehova uyatikhatsalela tikhonti takhe. Jesu waphindze wafundzisa kutsi sonkhe sibalulekile futsi siligugu kuBabe wetfu losezulwini. (Mat. 10:31) Jehova ukulungele kwemukela imvu lebeyilahlekile nayiphendvuka futsi itihlanganisa nelibandla. (Luk. 15:7, 10) Jehova wakhombisa kutsi uyasitsandza ngekutsi anikele ngeNdvodzana yakhe kutsi ibe yinhlawulo yetfu.—Joh. 3:16.

¹² Tifundvo lesititfolako: Singamlingisa njani Jehova futsi sibe nelutsandvo? (Ef. 5:1, 2) Ngekutsatsa bazalawane nabodzadze njengalababalulekile nalabaligugu, kanye nangekuyemukela ngenjabulo ‘imvu lebeyilahlekile’ naseyibuyela kuJehova. (Hla. 119:176) Sikhombisa kutsi siyabatsandza bazalwane nabodzadze nasisebentisa sikhatsi kanye nemandla etfu kute sibasite, ikakhulukati nabadzinga lusito. (1 Joh. 3:17) Nasikhombisa kutsi siyabatsandza labanye, sisuke silalela umyalo waKhristu.

13-14. (a) EmBhalweni waJohane 13:34, 35, yini Jesu layala bafundzi bakhe kutsi bayikhombise, futsi kungani lona kungumyalo lomusha? (b) Singakhombisa njani kutsi siyawulalela lomyalo lomusha?

¹³ Kwesitsatfu, Jesu wayala balandzeli bakhe kutsi bakhombise lutsandvo lwekutidzela. (Fundza Johane 13:34, 35.) Lomyalo waJesu musha ngobe ufuna kutsi sikhombise lutsandvo ngendlela leyehlukile kuleyo lebeyikuloMtsetfo Jehova lawunika ema-Israyeli lotsi: Kufanele sitsandze bazalwane betfu njengobe Jesu asitsandza. Loko kudzinga kutsi sibe nelutsandvo lwekutidzela. * Kufanele sitsandze bazalwane betfu kakhulu kunendlela lesititsandza ngayo  tsine. Kufanele sibatsandze kangangekutsi size sibafele, njengobe Jesu enta.

¹⁴ Tifundvo lesititfolako: Singakhombisa njani kutsi siyawulalela lomyalo lomusha? Kalula nje, ngekutsi sidzele tintfo letitsite kute sisite bazalwane betfu. Kungaba tintfo letinkhulu, lokufaka ekhatsi kudzela kuphila kwetfu ngenca yabo, kanye nekudzela tintfo letincane. Nasi sibonelo, sisuke silalela umtsetfo waKhristu nasenta imetamo yekuhamba nemzalwane losakhulile noma dzadze emihlanganweni, noma nasidzela tintfo lesititsandzako kute sijabulise bazalwane betfu, noma nasitsatsa emalanga emsebentini wekutiphilisa kute sisite lapho kuvele tehlakalo khona. Kwenta njalo kusita kutsi libandla lesikulo libe yindzawo lapho khona bonkhe bangativa baphephile futsi bavikelekile.

15-17. (a) Loko Jesu lakwenta kwakhombisa njani kutsi ulungile? (b) Singamlingisa njani Khristu?

¹⁵ Njengobe lisetjentiswe eBhayibhelini, ligama lelitsi “kulunga” lisho kwenta loko Jehova latsi kulungile futsi sikwente ngekungakhetsi. Kungani sitsi lomtsetfo waKhristu ukhutsata kulunga?

¹⁶ Kwekucala, cabanga ngekutsi loko Jesu lakwenta kwakhombisa njani kutsi ulungile. Ngesikhatsi alapha emhlabeni, baholi benkholo yemaJuda bebabatondza bantfu lebebangasiwo emaJuda, bawabukela phasi emaJuda lebekangakafundzi etikolweni tenkholo yebuJuda, futsi bebangabahloniphi bantfu besifazane. Ngalokwehlukile, Jesu bekaphatsa bonkhe bantfu ngekungakhetsi. Wabemukela bantfu lebebangesiwo emaJuda lebebanekukholwa kuye. (Mat. 8:5-10, 13) Washumayela lonkhe luhlobo lwebantfu ngekungakhetsi, labaphuyile nalabanjingile. (Mat. 11:5; Luk. 19:2, 9) Bekangabaphatsi kabi noma abahlukumete besifazane. Kunaloko, bekabahlonipha, futsi abaphatsa ngemusa, ngisho nalabo bekucatjangwa kutsi abakabaluleki.—Luk. 7:37-39, 44-50.

¹⁷ Tifundvo lesititfolako: Singamsilingisa Jesu ngekutsi siphatse labanye ngekungakhetsi, futsi sishumayele bonkhe bantfu labafise kwati tindzaba letimnandzi ngisho nobe baphuyile nobe banjingile noma ngabe bakuyiphi inkholo. Emadvodza langemaKhristu alingisa Jesu ngekutsi aphatse besifazane ngenhlonipho. Nasenta njalo sisuke silalela umtsetfo waKhristu.

18-19. Yini Jesu layifundzisa mayelana nekulunga, futsi yini lesiyifundzako kuloko?

¹⁸ Kwesibili, cabanga ngaloko Jesu lakufundzisa mayelana nekulunga. Wafundzisa ngetimiso letitawusita balandzeli bakhe kutsi baphatsane ngekungakhetsi. Cabanga ngeMtsetfo Weligolide. (Mat. 7:12) Sonkhe siyafuna kuphatfwa ngekungakhetsi. Ngako ke natsi kufanele siphatse labanye ngekungakhetsi. Nasenta njalo, natsi batasiphatsa ngekungakhetsi. Kodvwa kutsiwani nangabe siphetfwe kabi? Jesu waphindze watjela balandzeli bakhe kutsi betsembe kutsi Jehova ‘utabentela lokulungile labakhetsiwe bakhe, labakhala kuye busuku nemini.’ (Luk. 18:6, 7) Lamavi asicinisekisa kutsi Nkulunkulu wetfu lolungile uyatibona tinkinga lesibhekana nato kulamalanga ekugcina, futsi utawenta kutsi kube nekulunga ngesikhatsi lesifanele.—2 Thes. 1:6.

¹⁹ Tifundvo lesititfolako: Nangabe silandzela timiso Jesu lasifundzisa tona, sitabaphatsa ngekungakhetsi labanye. Nangabe sike saphatfwa kabi kulelive laSathane, kungasidvudvuta kwati kutsi Jehova utawenta kutsi siphatfwe ngekulunga.

20-21. (a) Labo labasemagunyeni kufanele babaphatse njani labanye? (b) Indvodza ingalukhombisa njani lutsandvo lwekutidzela, futsi babe kufanele abaphatse njani bantfwana bakhe?

²⁰ Umtsetfo waKhristu utsi labo labasemagunyeni  kufanele babaphatse njani labanye? Njengobe lomtsetfo usekelwe elutsandvweni, labo labasemagunyeni kufanele babahloniphe labo labangephasi kwabo futsi babaphatse ngemusa. Kufanele bakhumbule kutsi Khristu ufuna sikhombise lutsandvo kuko konkhe lesikwentako.

²¹ Emndenini. Indvodza kufanele itsandze umkayo “njengobe nje naKhristu alitsandza libandla.” (Ef. 5:25, 28, 29) Indvodza kufanele ilingise Khristu ngekutsi ibe nelutsandvo lwekutidzela futsi ibeke tidzingo kanye netifiso temkayo kucala kunetayo. Lamanye emadvodza akutfola kumatima kukhombisa lutsandvo lolufana nalolu, mhlawumbe ngesizatfu sekutsi akhulela endzaweni lapho khona kuphatsa kahle labanye bekuyintfo lengakabaluleki. Kungahle kube matima kuyekela lemikhuba lemibi, kodvwa kufanele ente lushintjo kute alalele umtsetfo waKhristu. Indvodza lekhombisa lutsandvo lwekutidzela itawuhlonishwa ngumkayo. Babe lobatsandza mbamba bantfwana bakhe angeke abahlukumete ngemavi nangetento. (Ef. 4:31) Kunaloko, ukhombisa kutsi uyabatsandza nekutsi uyabemukela ngekusebentisa tindlela letitabenta bative baphephile futsi bavikelekile. Bantfwana bayamhlonipha futsi bayametsemba babe lowenta njalo.

22. Ngekusho kwemBhalo wa-1 Phetro 5:1-3, tabani “timvu,” futsi kufanele tiphatfwe njani?

²² Ebandleni. Labadzala kufanele bakhumbule kutsi “timvu” atisito tabo. (Joh. 10:16, fundza 1 Phet. 5:1-3.) Emavi latsi “umhlambi waNkulunkulu,” nalatsi “labalifa laNkulunkulu,” akhumbuta labadzala kutsi letimvu taJehova. Ufuna timvu takhe tiphatfwe ngemusa nangelutsandvo. (1 Thes. 2:7, 8) Jehova uyabemukela labadzala labawenta ngelutsandvo umsebenti wabo njengobe babelusi. Bazalwane nabodzadze bayabatsandza futsi bayabahlonipha labadzala labenta kanjalo.

23-24. (a) Yini lokufanele yentiwe ngulabadzala nangabe kukhona lowente sono lesikhulu? (b) Yini lokufanele bayikhumbule nabalungisa tinkinga letinjalo?

 ²³ Yini lokufanele yentiwe ngulabadzala belibandla nangabe kukhona lowente sono lesikhulu? Umsebenti wabo wehlukile kuloyo lebewentiwa tikhulu kanye nalabadzala lebebangephasi kweMtsetfo Nkulunkulu labewunike ema-Israyeli. Ngephasi kwaloMtsetfo, emadvodza lebekakhetsiwe bekangalungisi nje kuphela tinkinga letiphatselene nekukhonta Jehova, kodvwa bekaphindze acatulule naletinye tinkinga kanye nemacala. Ngephasi kweMtsetfo waKhristu, labadzala belibandla banemsebenti wekucatulula tinkinga letimayelana nekukhonta Jehova. Bayati kutsi Nkulunkulu unike tiphatsimandla umsebenti wekucatulula tinkinga tesive kanye nemacala. Loko kufaka ekhatsi ligunya lekutsi bahlawulise labo labagangile noma kubavalela ejele.—Roma 13:1-4.

²⁴ Yini lokufanelwe yentiwe ngulabadzala nangabe kukhona lowente sono lesikhulu? Basebentisa imiBhalo kute bahlolisise timo, bese benta tincumo. Bahlale bakhumbula kutsi loMtsetfo waKhristu usekelwe elutsandvweni. Lutsandvo lwenta labadzala bacange kutsi: Yini lokufanele bayente kute basite emalunga elibandla lente sono lesikhulu? Mayelene namuntfu lowente sono lesikhulu, labadzala kufanele batibute kutsi: Sewuphendvukile yini? Singakhona yini kumsita kutsi aphindze abe nebuhlobo lobuhle naJehova?

25. Yini lesitawucoca ngayo esihlokweni lesilandzelako?

²⁵ Sijabula kakhulu kuba ngephasi kwemtsetfo waKhristu! Nangabe sonkhe senta konkhe lokusemandleni etfu kute siwulalele, sitawube senta libandla libe yindzawo lapho khona lilunga ngalinye litiva litsandvwa, libalulekile futsi liphephile. Siphila emhlabeni ‘lonebantfu lababi lesebadlange ngebubi.’ (2 Thim. 3:13) Kufanele sihlale siphapheme. Libandla lebuKhristu lingakukhombisa njani kulunga kwaNkulunkulu nalicatulula tinkinga letimatima letifaka ekhatsi kuhlukunyetwa kwebantfwana ngekwelicasi? Sihloko lesilandzelako sitawuphendvula lombuto.