1. Ita bele fiar buat rua saida kona-ba Jeová?

MAROMAK JEOVÁ hadomi ninia atan sira. Nia sempre hadomi sira. Nia mós hadomi justisa. (Sal 33:5) Entaun, ita bele fiar buat rua kona-ba Jeová: (1) Nia sente laran-kanek bainhira ema trata aat ninia atan sira. (2) Nia sei ajuda ninia atan sira atu hetan justisa. Iha parte primeiru husi série neʼe, * ita aprende ona katak Ukun-Fuan neʼebé Maromak fó ba ema Izraél liuhusi Moisés mak bazeia ba domin. Neʼe book ema atu hatudu justisa ba ema hotu, inklui sira neʼebé labele proteje sira-nia an rasik. (Deut 10:18) Ukun-Fuan neʼe hatudu katak Jeová hanoin tebes ninia atan sira.

2. Ita sei hatán ba pergunta saida deʼit?

² Moisés nia Ukun-Fuan remata iha tinan 33 Era Comum (EC) bainhira kongregasaun Kristaun harii ona. Maibé neʼe la dehan katak ema Kristaun la hetan ona benefísiu husi ukun-fuan seluk neʼebé bazeia ba domin no justisa. Ema Kristaun iha ukun-fuan foun. Iha lisaun neʼe, ita sei aprende saida mak ukun-fuan neʼe. Tuirmai ita sei hatán ba pergunta: Tanbasá mak ukun-fuan neʼe bazeia ba domin? Tanbasá mak ukun-fuan neʼe anima ema atu hatudu justisa? Oinsá mak ema sira neʼebé iha podér tenke trata ema seluk?

3. “Kristu nia ukun-fuan” neʼebé temi iha Galásia 6:2 inklui saida deʼit?

³ Lee Galásia 6:2. Ema Kristaun halo tuir “Kristu nia ukun-fuan”. Jesus la hakerek lista ukun-fuan ba ninia dixípulu  sira, maibé nia fó hanorin, mandamentu, no prinsípiu atu sira bele moris tuir. “Kristu nia ukun-fuan” inklui buat hotu neʼebé nia hanorin. Iha parágrafu sira tuirmai ita sei aprende liután kona-ba ukun-fuan neʼe.

4-5. Iha dalan saida deʼit mak Jesus hanorin? Bainhira mak nia hanorin?

⁴ Iha dalan saida deʼit mak Jesus hanorin? Primeiru, nia hanorin ema liuhusi ninia liafuan. Ninia liafuan iha kbiit tanba fó sai lia-loos kona-ba Maromak, objetivu ba moris, no Maromak nia Ukun mak dalan ida deʼit atu halakon ema nia terus. (Lc 24:19) Jesus mós hanorin liuhusi ninia ezemplu. Liuhusi dalan neʼebé nia halaʼo ninia moris, nia hatudu ba ninia dixípulu sira oinsá atu halaʼo sira-nia moris.​—João 13:15.

⁵ Bainhira mak Jesus hanorin? Nia hanorin durante ninia serbisu haklaken iha rai. (Mt 4:23) Nia mós hanorin ninia dixípulu sira lakleur depois nia hetan moris-hiʼas. Porezemplu, nia mosu ba dixípulu maizumenus naʼin-500 no fó mandamentu ba sira atu ‘hanorin ema sai dixípulu’. (Mt 28:19, 20; 1 Kor 15:6) Nuʼudar ulun ba kongregasaun, Jesus kontinua hanorin ninia dixípulu sira depois nia fila fali ba lalehan. Porezemplu, maizumenus iha tinan 96 EC, Kristu dirije apóstolu João atu anima no fó konsellu ba ema Kristaun kose-mina sira.​—Kol 1:18; Apok 1:1.

6-7. (a) Jesus nia hanorin hakerek iha neʼebé? (b) Oinsá mak ita bele halo tuir Kristu nia ukun-fuan?

⁶ Jesus nia hanorin hakerek iha neʼebé? Jesus nia liafuan no hahalok bainhira iha rai hakerek iha Evanjellu haat. Livru seluk iha Eskritura Lian Gregu mós bele ajuda ita atu komprende liután Jesus nia hanoin tanba espíritu santu mak book ema balu neʼebé “iha Kristu nia hanoin” atu hakerek ida-neʼe.​—1 Kor 2:16.

⁷ Lisaun: Jesus nia hanorin bele ajuda ema iha situasaun oioin. Tan neʼe Kristu nia ukun-fuan bele ajuda ita iha uma, serbisu-fatin, eskola, no iha kongregasaun. Ita aprende ukun-fuan neʼe hodi lee no medita kona-ba Eskritura Lian Gregu. Ita halo tuir ukun-fuan neʼe hodi moris  tuir hanorin, mandamentu, no prinsípiu neʼebé hakerek ona. Bainhira ita halo tuir Kristu nia ukun-fuan, ita mós halo tuir ita-nia Maromak domin nian Jeová, Hun ba Kristu nia hanorin hotu.​—João 8:28.

8. Kristu nia ukun-fuan iha fundasaun saida?

⁸ Uma neʼebé iha fundasaun metin, halo ema neʼebé hela iha laran sente seguru. Nuneʼe mós, ukun-fuan diʼak ho fundasaun neʼebé metin halo ema sira neʼebé moris tuir ida-neʼe sente seguru. Kristu nia ukun-fuan iha fundasaun ida neʼebé diʼak liu hotu, neʼe mak domin. Tanbasá?

9-10. Ezemplu saida deʼit mak hatudu Jesus halo buat hotu tanba domin? Oinsá ita bele banati-tuir nia?

⁹ Primeiru, Jesus halo buat hotu tanba domin. Jesus hatudu domin hodi hanoin ema no hatudu laran-sadiʼa. Tanba hanoin tebes ema, Jesus hanorin ema-lubun, kura ema moras, fó ai-han ba ema neʼebé hamlaha, no fó moris-hiʼas ba ema mate. (Mt 14:14; 15:32-38; Mc 6:34; Lc 7:11-15) Atu halo buat sira-neʼe, Jesus presiza uza tempu no enerjia, maski nuneʼe nia prontu atu tau uluk ema seluk nia presiza. Liután neʼe, nia hatudu domin boot hodi fó ninia moris ba ema.​—João 15:13.

¹⁰ Lisaun: Ita bele banati-tuir Jesus hodi tau uluk ema seluk nia diʼak. Ita mós bele banati-tuir nia hodi hatudu laran-sadiʼa ba ema iha ita-nia haklaken-fatin. Ita halo tuir Kristu nia ukun-fuan bainhira laran-sadiʼa book ita atu haklaken no hanorin liafuan diʼak.

11-12. (a) Saida mak hatudu katak Jeová hanoin tebes ita? (b) Oinsá mak ita bele banati-tuir Jeová nia domin?

¹¹ Segundu, Jesus hatudu sai ninia Aman nia domin. Durante Jesus nia haklaken, nia hatudu oinsá Jeová hanoin tebes ninia atan sira. Jesus hatudu ida-neʼe iha dalan oioin, porezemplu nia hanorin katak ita ida-idak folin-boot ba ita-nia Aman iha lalehan. (Mt 10:31) Jeová hakarak tebes atu simu fali bibi sira neʼebé lakon dalan no arrepende an hodi fila fali ba kongregasaun. (Lc 15:7, 10) Jeová hatudu ninia domin ba ita hodi fó ninia Oan-Mane nuʼudar sakrifísiu.​—João 3:16.

¹² Lisaun: Oinsá mak ita bele banati-tuir Jeová nia domin? (Éf 5:1, 2) Hodi haree irmaun-irmán ida-idak nuʼudar folin-boot, no mós ita kontente atu simu fali “bibi-malae neʼebé lakon dalan” maibé fila fali ba Jeová. (Sal 119:176) Ita hatudu katak ita hadomi irmaun-irmán sira hodi fó tempu no forsa atu ajuda sira, liuliu bainhira sira presiza. (1 João 3:17) Ita halo tuir Kristu nia domin bainhira ita hatudu domin ba ema seluk.

13-14. (a) Tuir João 13:34, 35, Jesus fó mandamentu saida ba ninia dixípulu sira, no tanbasá mak ida-neʼe mandamentu foun? (b) Oinsá mak ita halo tuir mandamentu foun neʼe?

¹³ Terseiru, Jesus fó mandamentu ba ninia dixípulu sira atu hatudu domin neʼebé la hanoin an deʼit. (Lee João 13:34, 35.) Mandamentu neʼe foun tanba ita tenke hadomi ita-nia maluk fiar-naʼin hanesan Jesus hadomi ita. Neʼe la hanesan ho Ukun-Fuan neʼebé Maromak fó ba ema Izraél. Neʼe presiza duni domin neʼebé la hanoin an deʼit. * Ita hadomi ita-nia irmaun-irmán sira liu fali hadomi ita-nia an rasik. Ita tenke hadomi sira toʼo prontu atu fó ita-nia moris ba sira, hanesan Jesus halo.

 ¹⁴ Lisaun: Oinsá mak ita bele halo tuir mandamentu foun neʼe? Hodi halo sakrifísiu ba ita-nia irmaun-irmán sira. Ita hadomi tebes sira hodi prontu atu halo sakrifísiu boot hanesan fó ita-nia moris rasik, no mós halo sakrifísiu kiʼik sira. Porezemplu, bainhira ita tula irmaun ka irmán neʼebé idade ona atu tuir reuniaun ka husik ita-nia hakarak rasik atu halo kontente ema neʼebé ita hadomi, ka foti feriadu atu ajuda ema neʼebé hetan dezastre, ita halo tuir Kristu nia ukun-fuan. No ita mós halo kongregasaun sai fatin neʼebé ema ida-idak bele sente seguru.

15-17. (a) Oinsá mak Jesus nia hahalok hatudu sai ninia hanoin kona-ba justisa? (b) Oinsá mak ita bele banati-tuir Jesus?

¹⁵ Liafuan “justisa” neʼebé uza iha Bíblia signifika halo buat neʼebé loos tuir Maromak nia haree no halo neʼe hodi la todan ba sorin. Tanbasá mak Kristu nia ukun-fuan anima ema atu hatudu justisa?

¹⁶ Primeiru, hanoin toʼok kona-ba oinsá Jesus nia hahalok hatudu sai ninia hanoin kona-ba justisa. Iha ninia tempu, ulun-naʼin relijiaun Judeu nian odi ema husi nasaun seluk, hakribi ema Judeu baibain, no la respeitu feto sira. Maibé Jesus nunka todan ba sorin. Nia simu ema husi nasaun seluk neʼebé fiar nia. (Mt 8:5-10, 13) Nia haklaken ba ema hotu, kiak no riku. (Mt 11:5; Lc 19:2, 9) Nia nunka siʼak ka trata aat feto sira. Nia hatudu respeitu no laran-diʼak ba feto sira, inklui feto sira neʼebé ema seluk la hafolin.​—Lc 7:37-39, 44-50.

¹⁷ Lisaun: Ita bele banati-tuir Jesus hodi la todan ba sorin no haklaken ba ema hotu neʼebé hakarak atu rona, no la haree ba sira-nia situasaun ka sira-nia relijiaun. Mane Kristaun sira halo tuir Jesus nia ezemplu hodi hatudu respeitu ba feto sira. Bainhira ita halo hanesan neʼe, ita halo tuir Kristu nia ukun-fuan.

18-19. Saida mak Jesus hanorin kona-ba justisa, no lisaun saida mak ita aprende husi ninia hanorin?

¹⁸ Segundu, hanoin toʼok Jesus nia hanorin kona-ba justisa. Nia hanorin prinsípiu sira neʼebé ajuda ninia dixípulu sira atu hatudu hahalok neʼebé justu ba ema seluk. Porezemplu, Jesus hanorin katak se ita hakarak ema atu hatudu hahalok neʼebé justu ba ita. Ita mós tenke hatudu hahalok hanesan neʼe ba sira. Karik neʼe sei book sira atu hatudu hahalok neʼebé justu ba ita. (Mt 7:12) Maibé oinsá se ema trata aat ita? Jesus mós hanorin ninia dixípulu sira atu fiar katak ema neʼebé halerik ba Jeová loron-kalan sei “hetan duni justisa”. (Lc 18:6, 7) Liafuan neʼe mak promesa ida husi Ita-nia Maromak. Nia hatene susar neʼebé ita hasoru iha loron ikus sira-neʼe, no nia sei halo ita hetan justisa iha tempu neʼebé loos.​—2 Tes 1:6.

¹⁹ Lisaun: Bainhira ita halo tuir prinsípiu neʼebé Jesus hanorin, ita sei hatudu hahalok neʼebé justu ba ema seluk. No se ita mak vítima ba ema seluk nia hahalok la justu iha Satanás nia mundu neʼe, ita bele sente kmaan tanba hatene katak Jeová sei halo ita hetan justisa.

20-21. (a) Oinsá mak ema neʼebé iha podér tenke trata ema seluk? (b) Laʼen presiza halo saida atu hatudu domin neʼebé la hanoin an deʼit? Oinsá aman presiza trata ninia oan?

²⁰ Tuir Kristu nia ukun-fuan, oinsá mak ema neʼebé iha podér tenke trata ema  seluk? Tanba domin mak fundasaun ba ukun-fuan neʼe, entaun ema neʼebé iha podér tenke hatudu respeitu no domin ba ema neʼebé sira tau matan. Sira tenke hanoin-hetan katak Kristu hakarak sira atu hatudu domin iha buat hotu.

²¹ Iha família laran. Laʼen tenke hadomi ninia feen “hanesan Kristu halo ba kongregasaun”. (Éf 5:25, 28, 29) Laʼen tenke banati-tuir Kristu nia domin neʼebé la hanoin an deʼit hodi tau uluk ninia feen nia presiza no hakarak. Mane balu karik sente susar atu hatudu domin hanesan neʼe, tanba karik sira sai boot iha família neʼebé la hatudu domin no justisa ba malu. Karik susar ba sira atu hadiʼa sira-nia toman aat, maibé sira tenke halo mudansa hodi bele halo tuir Kristu nia ukun-fuan. Laʼen neʼebé hatudu domin neʼebé la hanoin an deʼit sei hetan respeitu husi ninia feen. Aman neʼebé hadomi tebes ninia oan nunka trata aat ninia oan liuhusi liafuan ka hahalok. (Éf 4:31) Maibé, nia hatudu sai ninia domin iha dalan neʼebé halo ninia oan sira sente seguru. Aman hanesan neʼe sei hetan domin no konfiansa husi ninia oan sira.

22. Tuir 1 Pedro 5:1-3, “bibi-malae” sira mak sé-nian, no Maromak hakarak katuas sira atu trata sira oinsá?

²² Iha kongregasaun laran. Katuas kongregasaun sira tenke hanoin-hetan katak “bibi-malae” laʼós sira-nian. (João 10:16; lee 1 Pedro 5:1-3.) Liafuan “Maromak nia bibi-lubun”, “Maromak nia oin”, no “Maromak nia ema”, fó-hanoin katuas sira katak bibi-malae sira mak Jeová nian. Nia hakarak katuas sira atu tau matan ba ninia bibi-malae ho domin no laran-diʼak. (1 Tes 2:7, 8) Jeová sei simu katuas sira neʼebé halaʼo knaar nuʼudar bibi-atan ho domin. Katuas sira  hanesan neʼe sei hetan domin no respeitu husi irmaun-irmán sira.

23-24. (a) Saida mak katuas sira-nia knaar bainhira ema halo sala neʼebé sériu? (b) Saida mak katuas sira presiza hanoin?

²³ Saida mak katuas sira-nia knaar bainhira ema halo sala neʼebé sériu? Sira-nia knaar la hanesan ho juís no mós katuas sira iha Izraél antigu neʼebé halo tuir Moisés nia Ukun-Fuan. Tuir Ukun-Fuan neʼe, mane neʼebé iha responsabilidade sei tesi-lia ba buat neʼebé liga ho adorasaun no mós tesi-lia ba krime ruma. Maibé tuir Kristu nia ukun-fuan, katuas sira-nia knaar mak atu tau matan ba problema neʼebé liga deʼit ho adorasaun. Sira rekoñese katak governu mak simu responsabilidade husi Maromak atu tesi-lia ba kazu krime sira. Neʼe inklui podér atu fó kastigu hanesan selu multa ka hatama komarka.​—Rom 13:1-4.

²⁴ Bainhira ema halo sala sériu iha kongregasaun laran, saida mak katuas sira presiza hanoin? Sira uza Eskritura atu tetu kona-ba problema neʼe no halo desizaun. Sira hanoin-hetan katak domin mak fundasaun ba Kristu nia ukun-fuan. Domin book katuas sira atu hanoin: Saida mak ami tenke halo atu ajuda ema neʼebé sai vítima ba hahalok sala sériu iha kongregasaun laran? Kona-ba ema neʼebé halo sala, domin book katuas sira atu hanoin: Nia arrepende an ka lae? Ami bele ajuda nia atu iha fali relasaun diʼak ho Maromak ka lae?

25. Saida mak ita sei aprende iha lisaun tuirmai?

²⁵ Ita agradese tebes tanba Kristu nia ukun-fuan dirije ita! Bainhira ita hotu hakaʼas an atu halo tuir ukun-fuan neʼe, ita sei halo ita-nia kongregasaun sai fatin neʼebé ema hadomi malu, hafolin malu, no sente seguru. Maski nuneʼe, ita nafatin moris iha mundu neʼebé nakonu ho “ema aat” neʼebé “sai aat liután”. (2 Tim 3:13) Tan neʼe, ita tenke matan-moris nafatin. Oinsá mak kongregasaun Kristaun bele haleno Maromak nia justisa bainhira ema ida abuza labarik iha dalan seksuál? Lisaun tuirmai sei hatán ba pergunta neʼe.