1. Jehova i laikim stretpela pasin, na dispela i kamapim klia wanem samting?

GOD JEHOVA i laikim tru ol manmeri bilong em. Em i laikim ol kirap long bipo yet, na em bai wok yet long laikim ol i go inap oltaim oltaim. Na tu, em i laikim stretpela pasin, em pasin jastis. (Sng. 33:5) Dispela i kamapim klia 2-pela samting: (1) Jehova i save bel hevi tru taim ol narapela i no mekim stretpela pasin long ol wokman bilong em. (2) Em bai pinisim hevi i painim ol manmeri bilong em, na em bai givim panismen long ol manmeri i birua long lain bilong em. Long namba 1 bilong ol dispela atikol, * yumi kisim save olsem pasin laikim i stap olsem as tru bilong Lo we God i givim long lain Israel long rot bilong Moses. Dispela Lo i kirapim ol manmeri long mekim stretpela pasin long olgeta manmeri, na tu, long ol manmeri i no gat strong long lukautim ol yet. (Lo 10:18) Dispela Lo i soim klia olsem Jehova i tingim tru ol manmeri bilong em.

2. Yumi bai bekim wanem ol askim?

² Lo Bilong Moses i pinisim wok bilong en long 33 C.E. taim kongrigesen Kristen i kamap. Sapos pasin laikim i as bilong wanpela Lo we i strongim jastis, yu ting dispela Lo inap helpim ol Kristen? Yes, em inap tru long helpim ol! Ol Kristen i gat nupela lo. Long dispela atikol, pastaim yumi bai stori long wok bilong dispela nupela lo. Bihain yumi bai bekim ol dispela askim: Wai na yumi inap tok olsem pasin laikim i as tru bilong dispela lo? Wai na yumi inap tok olsem dispela lo i strongim jastis? Aninit long dispela  lo, ol man i mekim wok bos i mas mekim wanem kain pasin long ol narapela?

3. Olsem Galesia 6:2 i kamapim, “lo bilong Krais” i makim wanem ol samting?

³ Ritim Galesia 6:2. Ol Kristen i stap aninit long “lo bilong Krais.” Jisas i no raitim lista bilong ol lo em ol disaipel i mas bihainim, nogat, em i givim ol instraksen na ol stiatok bilong stiaim ol. “Lo bilong Krais” i makim olgeta samting Jisas i skulim ol disaipel long en. Sapos yumi laik kliagut long dispela lo, orait yumi mas kisim sampela save moa.

4-5. (a) Olsem wanem Jisas i mekim wok tisa? (b) Wanem taim Jisas i skulim ol man?

⁴ Olsem wanem Jisas i mekim wok tisa? Em i skulim ol man long rot bilong ol tok em i mekim. Tok bilong em i gat strong bikos em i autim tok i tru bilong God, skulim ol man long as tru bilong laip, na tokaut olsem Kingdom Bilong God tasol bai pinisim olgeta pen na hevi. (Luk 24:19) Na tu, pasin Jisas i bihainim i stap olsem gutpela eksampel na i skulim ol narapela. Em i soim gutpela pasin em ol disaipel tu i mas bihainim.—Jon 13:15.

⁵ Wanem taim Jisas i skulim ol man? Em i skulim ol man taim em i stap long graun na mekim wok autim tok. (Mat. 4:23) Na tu, em i skulim ol disaipel bihain tasol long em i kirap bek. Em i bin kamap long ol disaipel—ating namba bilong ol i winim 500—na tokim ol long “kamapim ol disaipel.” (Mat. 28:19, 20; 1 Kor. 15:6) Jisas i stap olsem het bilong kongrigesen, olsem na em i wok yet long skulim ol disaipel bihain long em i go bek long heven. Long 96 C.E. samting, Krais i stiaim aposel Jon long givim skultok na strongim ol Kristen God i anointim.—Kol. 1:18; Rev. 1:1.

6-7. (a) Yumi inap painim we ol tok Jisas i skulim ol man long en? (b) Olsem wanem yumi inap bihainim lo bilong Krais?

⁶ Yumi inap painim we ol tok Jisas i skulim ol man long en? Fopela Gutnius i stori long planti samting Jisas i mekim na ol tok em i autim taim em i stap long graun. Yumi inap kliagut moa long tingting bilong Jisas taim yumi skelim ol narapela buk long Ol Skripsa Grik—ol man i raitim ol dispela buk i bin kisim “tingting bilong Krais” na holi spirit i stiaim ol.—1 Kor. 2:16.

⁷ Skul: Ol skultok bilong Jisas inap helpim yumi long olgeta samting. Lo bilong Krais i  stiaim ol samting yumi mekim long haus, long ples wok o long skul, na insait long kongrigesen. Yumi kisim save long dispela lo taim yumi ritim Ol Skripsa Grik na tingim tingim ol tok bilong en. Yumi bihainim dispela lo taim yumi larim ol instraksen, ol lo, na ol stiatok bilong Baibel i stiaim olgeta samting yumi mekim. Taim yumi bihainim lo bilong Krais, yumi bihainim tok bilong God Jehova, em Papa bilong olgeta tok Jisas i skulim ol man long en.—Jon 8:28.

8. Wanem samting i stap olsem faundesen long lo bilong Krais?

⁸ Sapos ol man i wokim haus i gat strongpela faundesen, ol man i stap long dispela haus bai pilim olsem ol i stap gut. Olsem tasol, taim ol man i bihainim wanpela lo i gat strongpela faundesen, ol bai pilim olsem ol i stap gut. Lo bilong Krais i gat strongpela faundesen—pasin laikim. Bilong wanem yumi inap tok olsem?

9-10. (a) Olsem wanem yumi save olsem pasin laikim i stiaim Jisas long olgeta samting em i mekim? (b) Olsem wanem yumi inap bihainim pasin bilong Jisas?

⁹ Namba 1: Pasin laikim i stiaim Jisas long olgeta samting em i mekim. Pasin laikim i save kirapim man long pilim sori long narapela. Pasin sori i kirapim Jisas long skulim ol man, oraitim ol sikman, givim kaikai long ol man i hangre, na kirapim bek ol man i dai pinis. (Mat. 14:14; 15:32-38; Mak 6:34; Luk 7:11-15) Maski Jisas i lusim bikpela haptaim na strong bilong em long mekim ol dispela samting, em i putim laik bilong ol narapela i go pas long laik bilong em. Em i soim bikpela pasin laikim tru taim em i givim laip bilong em bilong baim bek yumi.—Jon 15:13.

¹⁰ Skul: Yumi inap bihainim pasin bilong Jisas na putim laik bilong ol narapela i go pas long laik bilong yumi. Na tu, yumi inap bihainim pasin bilong em taim yumi kisim pasin bilong pilim sori long ol manmeri long teritori bilong yumi. Yumi bihainim lo bilong Krais taim pasin sori i kirapim yumi long autim tok na skulim ol man.

11-12. (a) Wanem samting i soim olsem Jehova i tingim tru yumi? (b) Olsem wanem yumi inap bihainim pasin laikim bilong Jehova?

¹¹ Namba 2: Jisas i kamapim klia pasin laikim bilong Papa. Taim Jisas i autim tok, em i kamapim klia pasin bilong Jehova long tingim tru ol lain i lotuim em. Wanpela skultok bilong Jisas em olsem: Yumi olgeta wan wan i dia tumas long ai bilong Papa bilong yumi. (Mat. 10:31) Jehova i save amamas long welkamim sipsip husat i lus na em i tanim bel na kam bek long kongrigesen. (Luk 15:7, 10) Jehova i laikim tru yumi, olsem na em i givim Pikinini bilong em olsem pe bilong baim bek yumi.—Jon 3:16.

¹² Skul: Olsem wanem yumi inap bihainim pasin laikim bilong Jehova? (Efe. 5:1, 2) Yumi mas tingim olgeta wan wan bratasista bilong yumi olsem samting i dia tumas, na yumi mas amamas long welkamim “sipsip i lus” na em i kam bek long Jehova. (Sng. 119:176) Sapos yumi laikim tru ol bratasista bilong yumi, yumi bai lusim haptaim na strong bilong yumi long helpim ol long taim bilong hevi. (1 Jon 3:17) Yumi bihainim lo bilong Krais taim yumi soim pasin laikim long ol narapela.

13-14. (a) Olsem Jon 13:34, 35 i kamapim, Jisas i tokim ol disaipel long soim wanem pasin? (b) Wai na dispela em nupela lo? (c) Olsem wanem yumi inap bihainim nupela lo?

¹³ Namba 3: Jisas i tokim ol disaipel long daunim tru laik bilong ol yet na laikim ol narapela. (Ritim Jon 13:34, 35.) Wai na Jisas i kolim dispela lo olsem nupela lo? Taim God i givim Lo long lain Israel, dispela lo i no tokim ol long laikim ol wanbilip olsem Jisas i laikim yumi, nogat. Dispela pasin laikim i makim olsem yumi mas daunim tru laik bilong yumi yet. * Laikim bilong yumi long ol bratasista i mas bikpela moa winim pasin bilong laikim yumi yet. Yumi mas  laikim ol tru na redi long givim laip bilong yumi long helpim ol, olsem Jisas i bin mekim bilong helpim yumi.

¹⁴ Skul: Olsem wanem yumi inap bihainim nupela lo? Yumi inap daunim laik bilong yumi yet na helpim ol bratasista. Yumi redi long givim laip bilong yumi na daunim laik bilong yumi yet long ol liklik samting tu. Kain olsem, taim yumi helpim lapun brata o sista long kam long miting, o yumi daunim laik bilong yumi yet na amamasim wanblut o pren, o yusim holide bilong yumi long helpim ol lain i kisim bagarap long disasta, dispela i makim olsem yumi bihainim lo bilong Krais. Na tu, yumi mekim kongrigesen i kamap ples we olgeta bratasista i pilim olsem ol i stap gut.

15-17. (a) Olsem wanem ol samting Jisas i mekim i soim klia tingting bilong em long stretpela pasin? (b) Olsem wanem yumi inap bihainim pasin bilong Jisas?

¹⁵ Long Baibel, ol i trensletim jastis olsem “stretpela pasin,” na dispela i makim ol pasin i stret long ai bilong God na i no gat wansait pasin long en. Wai na yumi inap tok olsem lo bilong Krais i strongim stretpela pasin o jastis?

¹⁶ Namba 1: Tingim hau ol samting Jisas i mekim i soim klia tingting bilong em long stretpela pasin. Long taim bilong em, ol lida bilong lotu Juda i heitim ol manmeri bilong narapela lain, luk daun long ol man nating bilong lain Juda, na rabisim ol meri. Tasol Jisas i no mekim wansait pasin, nogat, em i mekim stretpela pasin long olgeta kain man. Em i orait long ol manmeri bilong narapela lain em ol i bilip long em. (Mat. 8:5-10, 13) Em i autim tok long olgeta lain, ol maniman na ol rabisman. (Mat. 11:5; Luk 19:2, 9) Em i no save mekim hatpela pasin long ol meri, nogat. Em i rispektim ol na mekim gutpela pasin long ol, na em i mekim olsem tu long ol meri em ol narapela i luk daun long ol.—Luk 7:37-39, 44-50.

¹⁷ Skul: Yumi inap bihainim pasin bilong Jisas taim yumi mekim stretpela pasin long olgeta man husat i redi long putim yau—maski ol i bilong narapela lotu o sindaun bilong ol i no wankain long yumi. Ol Kristen man i bihainim eksampel bilong Krais na soim rispek long ol meri. Yumi bihainim lo bilong Krais taim yumi mekim ol dispela samting.

18-19. (a) Jisas i givim wanem skul long yumi long stretpela pasin? (b) Dispela i givim wanem skul long yumi?

¹⁸ Namba 2: Tingim samting Jisas i skulim yumi long en long jastis. Em i kolim ol stiatok we inap helpim ol disaipel long soim stretpela pasin long ol narapela. Tingim Gutpela Lo Tru. (Mat. 7:12) Yumi olgeta i laik bai ol narapela i mekim stretpela pasin long yumi. Olsem na yumi mas mekim stretpela pasin long ol narapela. Sapos yumi mekim olsem, ol tu bai mekim stretpela pasin long yumi. Tasol olsem wanem sapos ol narapela i no mekim stretpela pasin long yumi? Jisas i tok ol disaipel i mas bilip olsem sapos “ol i wok long krai long em long san na nait,” Jehova bai “stretim rong ol arapela i mekim long ol.” (Luk 18:6, 7) Tok bilong Jisas i kamapim wanpela tok promis: God bilong yumi em Man bilong mekim stretpela pasin, na em i save long ol hevi i painim yumi long dispela haptaim bilong las de, na long taim em yet i makim, em bai stretim rong ol narapela i mekim long yumi.—2 Tes. 1:6.

¹⁹ Skul: Taim yumi bihainim ol stiatok Jisas i skulim ol disaipel long en, yumi bai mekim stretpela pasin long ol narapela. Sapos ol narapela i no mekim stretpela pasin long yumi, yumi ken belgut bikos Jehova bai bekim rong ol i mekim long yumi.

20-21. (a) Ol man i mekim wok bos i mas mekim wanem pasin long ol narapela? (b) Olsem wanem maritman inap soim olsem em i daunim tru laik bilong em na tingim laik bilong meri? (c) Papa i mas mekim wanem pasin long ol pikinini?

²⁰ Lo bilong Krais i tok ol man i mekim wok  bos i mas mekim wanem pasin long ol narapela? Pasin laikim em faundesen bilong lo bilong Krais, olsem na ol lain i mekim wok bos i mas soim pasin rispek na pasin laikim long ol lain i stap aninit long wok bos bilong ol. Ol i mas tingim olsem Krais i laik bai pasin laikim i stiaim yumi long olgeta samting yumi mekim.

²¹ Insait long famili. Maritman i mas laikim meri bilong em olsem “Krais i save mekim long kongrigesen.” (Efe. 5:25, 28, 29) Maritman i mas bihainim pasin laikim bilong Krais na daunim tru laik bilong em yet na tingim laik bilong meri bilong em. Sampela man i pilim hatwok long soim kain pasin laikim olsem. Ating ol i kamap bikpela long ples we ol man i no tingim tumas stretpela pasin na pasin laikim. Ating i hatwok long lusim ol pasin kranki, tasol ol i mas senisim pasin na bai ol inap bihainim lo bilong Krais. Sapos maritman i daunim tru laik bilong em yet na soim pasin laikim long meri bilong em, dispela bai kirapim meri long rispektim man. Sapos papa i laikim tru ol pikinini, em i no inap mekim tok o pasin we inap bagarapim bel bilong ol, nogat. (Efe. 4:31) Em bai mekim ol tok na pasin we i kamapim klia pasin laikim na kirapim ol long pilim olsem ol i stap gut. Olsem na ol pikinini bai laikim na trastim papa.

22. (a) Olsem 1 Pita 5:1-3 i kamapim, husat i bosman bilong ‘ol sipsip’? (b) Ol elda i mas soim wanem pasin long ol?

²² Insait long kongrigesen. Ol elda i mas tingim olsem ol i no bosman bilong ‘ol sipsip.’ (Jon 10:16; ritim 1 Pita 5:1-3.) Ol hap tok olsem “ol sipsip bilong God,” “long ai bilong God,” na “ol manmeri bilong God,” i helpim ol elda long luksave olsem Jehova em bosman bilong ol sipsip. God i laik bai ol elda i soim pasin laikim na pasin isi long ol sipsip. (1 Tes. 2:7, 8) Jehova bai orait long ol elda sapos ol i larim pasin laikim i stiaim ol taim ol i mekim wok wasman. Ol bratasista tu i save laikim na rispektim ol elda husat i soim pasin laikim na pasin isi.

23-24. (a) Ol elda i mas mekim wanem taim ol i laik stretim ol bikpela rong? (b) Taim ol elda i laik stretim rong, ol i mas skelim wanem ol samting?

 ²³ Ol elda i mas bihainim wanem pasin taim ol i laik stretim ol bikpela rong? Wok bilong ol i no wankain long wok bilong ol hetman na ol elda husat i stap aninit long lo em God i bin givim long lain Israel. Aninit long Lo Bilong Moses, ol hetman i stretim ol hevi long sait bilong bilip, na tu, ol i stretim ol hevi long laip na sindaun bilong ol manmeri. Tasol aninit long lo bilong Krais, ol elda i gat wok bilong stretim ol hevi long sait bilong bilip. Ol i luksave olsem God i givim wok long gavman long stretim ol hevi long laip na sindaun bilong ol manmeri. Gavman i gat namba long givim panismen o kalabusim ol man i mekim rong.—Rom 13:1-4.

²⁴ Ol elda i save mekim wanem taim wanpela long kongrigesen i mekim bikpela rong? Ol i larim Baibel i stiaim ol taim ol i skelim rong bilong man na mekim disisen. Ol i tingim olsem pasin laikim em as tru bilong lo bilong Krais. Pasin laikim i kirapim ol elda long skelim olsem: Ol i mas mekim wanem bilong helpim ol bratasista long kongrigesen em ol narapela i rongim ol? Pasin laikim bai kirapim ol elda long skelim man i mekim rong. Ol bai skelim olsem: Em i tanim bel o nogat? Yumi inap helpim em long kamap strong gen long sait bilong bilip?

25. Neks atikol bai stori long wanem samting?

²⁵ Yumi amamas tru long stap aninit long lo bilong Krais! Taim yumi olgeta i wok strong long bihainim dispela lo, yumi mekim kongrigesen i kamap ples we olgeta bratasista inap pilim olsem ol narapela i laikim ol na ol i stap gut. Tasol yumi stap long taim we “ol man nogut” i wok long “i go nogut moa.” (2 Tim. 3:13) Oltaim yumi mas was i stap. Olsem wanem kongrigesen Kristen inap bihainim stretpela pasin bilong God taim ol i laik stretim hevi bilong seksual abius, olsem wanpela i mekim pasin sem o pasin doti long pikinini? Neks atikol bai bekim dispela askim.