1. მუშა შემლებნა ვორდათ დარწმუნებულ?

იეჰოვა ღორონც უჸორს მუშ თაყვანიშმცემელეფ. თენა თაშ იჸუაფ ირიათო. თის სამართლიანობა ხოლო უჸორს (ფსალმ. 33:5). თაშ ნამდა, შემლებნა დარწმუნებულ ვორდათ ჟირ მუდგარენს: 1) იეჰოვას გურ ელაჭუ, მუჟამსით თიშ მსახურეფს უსამართლოთ ოქცუნა. 2) თინა მოპირნა, ნამდა დასაჯენს თინეფს, მით უსამართლოთ ოქცუ თიშ მსახურეფს. ოთხნაწილიან სერიაშ პირველ სტატიაშე * ქიგებგით, ნამდა კანონი, ნამუთ ღორონთიქ ისრაელეფს მოსეშ საშვალებათ მეჩჷ, ჸოროფაშა რდუ გერსხილ. თე კანონი ხეს უნწყუნდჷ, ისრაელეფქ სამართლიანო მექცისკო არძას, განსაკუთრებულო თინეფს, მიდგას ვეშულებუდ დუდიშ დაცვება (კან. 10:18). მოსეშ კანონშე იძირე, ნამდა იეჰოვას ოინტერეს მუშ თაყვანიშმცემელეფიშ მდგომარეობა დო ზრუნენს თინეფშე.

2. ნამ კითხვეფს მიაჩამუ პასუხ თე სტატიას?

² მოსეშ კანონს ჩქინ წანაკოროცხუათ 33 წანას მეუდინ ძალაქ, მუჟამსით ქრისტიანულ კრებაქ დეარსჷ. ნიშნენდუო თენა, ნამდა ქრისტიანეფს ვედეცვენდჷ კანონი, ნამუთ ჸოროფაშა რდუ გერსხილ დო სამართლიანობას უნწყუნდჷ ხეს? მუშო ოკო რაგად, ვარ, მუშენდა თინეფს ახალ კანონ უღდეს. თე სტატიას დიო გუვარჩიენთ, მუს გულისხმენდჷ თე ახალ კანონ. თეშ უკულ პასუხის ქიმეფჩანთ, თეცალ კითხვეფს: მუშენ შემლებნა თიშ რაგად, ნამდა თე კანონი ჸოროფაშა რე გერსხილ? მუშენ შილებე ფთქუათ, ნამდა თინა სამართლიანობას უნწყუნს ხეს? თე კანონიშ თანახმათ, მუჭო ოკო მექცუან პასუხიშმგებლობა ოვალნან თინეფქ შხვეფს?

3. მუჭოთ გალატელეფიშ 6:2-შე იძირე, მუ მიშურს „ქრისტეშ კანონშა“?

³ წეკითხით გალატელები 6:2. ქრისტიანეფ „ქრისტეშ კანონს“ ომორჩილნა. იესოს მუშ მიმაჸუნალეფშა ვემუჩამ კანონეფიშ სია; თიქ მეჩჷ მითითებეფ დო პრინციპეფ, ნამდგათ ოკო იხემძღვანელესკო ცხოვრებას. „ქრისტეშ კანონშა“ მიშურს ირფელ, მუდგას იესო ოგურუანდჷ. უკულიან აბზაცეფს, უმოსის ქიგებგენთ თე კანონიშ გურშენ.

4, 5. მუჭო დო მუჟამ ოგურუანდჷ იესო?

⁴ მუჭო ოგურუანდჷ იესო? პირველ რიგის, თინა სიტყვეფით ოგურუანდჷ. თიშ სიტყვეფს ძალა უღუდ, მუშენდა ღორონთიშ გურშენ ჭეშმარიტებას გინოჩანდჷ ხალხის, ოგურუანდჷ, მუ რდუ ცხოვრებაშ აზრი დო ყურადღებას მიოქციებაფუანდჷ ღორონთიშ სამეფოშა, ნამუთ ბოლოს მუღენს კაცობრიობაშ ირნერ გაჭირებას (ლუკ. 24:19). იესო პირად მაგალითით ხოლო ოგურუანდჷ მუშ მიმაჸუნალეფს. თინა მუშ ცხოვრებათ დო საქმეეფით ოძირანდჷ, მუჭო ოკო იცხოვრესკო (იოან. 13:15).

⁵ მუჟამ ოგურუანდჷ იესო? თინა დედამიწას მსახურებაშ დროს ოგურუანდჷ ხალხის (მათ. 4:23). იესო მუშ მიმაჸუნალეფს გეთელუნ უკულ ხოლო ოგურუანდჷ. მაგალთო, თიქ ართო აკოშაყარელ სოდგარენ 500 მოწაფეს გეგმეცხად დო „მოწაფეეფიშ მომზადებაშ“ მითითება მეჩჷ (მათ. 28:19, 20; 1 კორ. 15:6). მუჭოთ კრებაშ დუდ, იესო ზეცაშა ულაშ უკულ ხოლო აგრძელენდჷ მუშ მოწაფეეფიშ ხემძღვანელობას. მაგალთო, სოდგარენ ჩქინ წანაკოროცხუათ 96 წანას, იესოქ მოციქულ იოანეს მითითება მეჩჷ, გურშა ელუკინკო დო რჩევეფ ქიმეჩკო ცხებულ ქრისტიანეფს (კოლ. 1:18; გამოცხ. 1:1).

6, 7. ა) სო რე ინოჭარილ იესოშ გურაფეფ? ბ) მუჭო შემლებნა ვოძირათ, ნამდა ვომორჩილუთ „ქრისტეშ კანონს“?

⁶ სო რე ინოჭარილ იესოშ გურაფეფ? ოთხ სახარებას ინოჭარილ რე ბრელ მუდგარენ, მუთ იესოქ თქუ დო აკეთ, მუჟამსით დედამიწას რდუ. ღორონთიშ შთაგონებათ ჭარილ ბერძნულ წერილეფიშ შხვა წიგნეფ, ნამუთ მუსხირენ კომოლკათაქ ჭარჷ, მიდგას „იესოშ აზროვნება“ უღუდ, მოხვარნა ქიგებგათ იესოშ დამოკიდებულება შხვადოშხვა საკითხეფწკუმა (1 კორ. 2:16).

⁷ მუს ბგურაფლენთ: იესოშ გურაფეფ ცხოვრებაშ ირნერ საკითხის ოხუ. თაშ ნამდა, ქრისტეშ კანონი ფხელმძღვანელენა ირდიხას — ჸუდეს, სამუშას, სკოლას დო კრებას.  თე კანონიშ გურშენ ქრისტიანულ ბერძნულ წერილეფიშ კითხირით დო ნაკითხირშე ფიქრით ბგებულენთ. თე კანონს ვომორჩილუთ, მუჟამსით ფცხოვრენთ თექ მოჩამილ ხემძღვანელობაშ, მითითებეფიშ დო პრინციპეფიშ თანახმათ. მუჟამსით ქრისტეშ კანონს ვომორჩილუთ, თეთ ჩქინ მოჸოროფე ღორონც, იეჰოვას ვომორჩილუთ, ნამდგაშე მოურს იესოშ არძა გურაფა (იოან. 8:28).

8. მუშა რე გერსხილ ქრისტეშ კანონი?

⁸ ჯგირ საძირკველშა გერსხილ ჸუდეს, დაცულო დო უსაფრთხოდ გინაფლენა დუც თინეფ, მით თექ ცხოვრენა. თეშნერო, ჯგირ კანონეფ მანგარ საძირკველშა რე გერსხილ, ნამუთ დაცულო დო უსაფრთხოდ ოგინებაფუანს დუც თინეფს, მით თე კანონეფს იცვენს. ქრისტეშ კანონ არძაშ უჯგუშ საძირკველშა — ჸოროფაშა რე გერსხილ. მუშენ შემლებნა თეშ რაგად?

9, 10. ნამ მაგალითეფშე იძირე, ნამდა იესო გიმირჩქინანდჷ ჸოროფას დო მუჭო შემლებნა მივაჸუნათ თიშ მაგალითის?

⁹ პირველ, იესო ირფელს ჸოროფათ ორთუდ. ჸოროფა სიცოდილიშ გიმორჩქინათ დო შხვეფიშ გაჭირებაშ გურშა მეღალათ გიმიხანტუ. იესოს ოცოდუდ ხალხ, ათეშენ ოგურუანდჷ თინეფს, ლახალაშე ოსქილიდუანდჷ, ოჭკუმალს არზენდჷ შკირენულეფს დო ღურელეფს ათელენდჷ (მათ. 14:14; 15:32—38; მარ. 6:34; ლუკ. 7:11—15). მართალ რე, თეშნერ საქმეეფიშ კეთება ბრელ დროს დო ენერგიას ითხინდჷ, მარა იესო მუშ დუდიშ უმოსო იშენით შხვეფიშ საჭიროებეფს გიორინუანდჷ პირველ ადგილს. თიქ არძაშ უდიდაშ ჸოროფა თიმწკუმა გიმირჩქინ, მუჟამსით მუშ სიცოცხლე შხვეფშო გაწირ (იოან. 15:13).

¹⁰ მუს ბგურაფლენთ: მუჟამსით ჩქინ საჭიროებეფიშ უმოსო შხვეფიშ საჭიროებეფს გივორინუანთ პირველ ადგილს, თეთ იესოშ მაგალითის მეპჸუნთ. თეს გეძინელ, იესოშ მაგალითის თით ხოლო მეპჸუნთ, ნამდა ჩქინ ტერიტორიას მახორუ ხალხიშ გაჭირება უმოსო მემღუნა გურშა. თენა აღბძრენა იფქადაგათ სახიოლო ამბე დო ვოგურუათ შხვეფს, მუდგათ ქრისტეშ კანონს ვომორჩილუთ.

11, 12. ა) სოვრეშე იძირე, ნამდა იეჰოვა ზრუნენს ჩქინდე? ბ) მუჭო შემლებნა მივაჸუნათ იეჰოვაშ მაგალითის ჸოროფაშ გიმორჩქინას?

¹¹ მაჟია, იესო სრულყოფილო მეჸუნდჷ მუშ მუმაშ მაგალითის, ჸოროფაშ გიმორჩქინას. მსახურებაშ დროს, იესოქ ქაძირუ, მუჭო ზრუნენს იეჰოვა მუშ თაყვანიშმცემელეფშე. თიქ დუმარწმუნეს, ნამდა თითოულ მსახურ ძვირფას რე ჩქინ ზეციერ მუმაშო (მათ. 10:31). იეჰოვა შურ დო გურით ღებულენს თინეფს, მით ნარღენს დაშებულს დო ართუ კრებას (ლუკ. 15:7, 10). იეჰოვაქ ჩქინ ჸოროფა თით ხოლო გიმირჩქინ, ნამდა მუშ სქუა შემობწირეს დო თეთ ცოდაშე გეგშამჸიდეს (იოან. 3:16).

¹² მუს ბგურაფლენთ: მუჭო შემლებნა მივაჸუნათ იეჰოვაშ მაგალითის ჸოროფაშ გიმორჩქინას? (ეფეს. 5:1, 2). თითოულ და დო ჯიმა ძვირფას რე ჩქინო დო ხიოლით ბღებულენთ თინეფს, მით ართუ იეჰოვას (ფსალმ. 119:176). და დო ჯიმალეფიშ ჸოროფას თით ხოლო გიმიფრჩქინანთ, მუჟამსით მზათ ვორეთ მივეხვარათ თინეფს, განსაკუთრებულო თიმწკუმა, მუჟამსით ოსაჭირნა (1 იოან. 3:17). შხვეფიშ ჸოროფაშ გიმორჩქინათ ქრისტეშ კანონს ვომორჩილუთ.

13, 14. ა) მუჭოთ იოანეშ 13:34, 35-ის ინოჭარ, მუ მცნება მეჩჷ იესოქ მუშ მიმაჸუნალეფს დო მუ გაგებათ რე თინა ახალ? ბ) მუ გაგებათ ვომორჩილუთ ახალ მცნებას?

¹³ მასმა, იესოქ მუშ მიმაჸუნალეფს მცნება მეჩჷ, ნამდა გიმირჩქინესკო დუდგინოდვალირ ჸოროფა (წეკითხით იოანე 13:34, 35). იესოშ მცნება ახალ რდუ თი გაგებათ, ნამდა თი კანონშა ვარდჷ გერსხილ, ნამუთ იეჰოვაქ ისრაელეფს მეჩჷ. თინა გერსხილ რდუ თე კანონშა: გიჸორდან ართიან თეშ, მუჭოთ იესოქ გიჸოროფუეს. თენა დუდგინოდვალირ ჸოროფას *  ითხინდჷ. ჩქინ დუდშე უმოსო და დო ჯიმალეფ ოკო მიჸორდან. თეცალ ჸოროფა აღბძრენა სიცოცხლე დაფთმათ თინეფიშ გურშენ თეშ, მუჭოთ იესოქ აკეთ თენა ჩქინო.

¹⁴ მუს ბგურაფლენთ: მუ გაგებათ ვომორჩილუთ ახალ მცნებას? მარტივას ქოფთქუათინ, ქრისტეშ მცნებას თიმწკუმა იფცვენთ, მუჟამსით და დო ჯიმალეფშო მუდგარენს ფთმენთ. ჩქი თეშ მიჸორა თინეფ, ნამდა მზათ ვორეთ სიცოცხლე დაფთმათ თინეფშო. თეს გეძინელ, თინეფიშ ჸოროფას ჭიჭე საქმეეფიშ კეთებათ ხოლო გიმიფრჩქინათ, მაგალთო, მუჟამსით ვოხვარუთ ხანშა მიშულირ თანაქრისტიანეფს ქიდესწრან კრებაშ შეხვალამას. თეწკუმა ართო, მზათ ვორეთ მუდგაინ დაფთმათ, ნამდა ჯგირ ვუკეთათ თინეფს, მით მიჸორა; შილებე გეპჭოფათ შვებულება, ნამდა მივეხვარათ სტიქიურ უბედრობეფით დაზარალებურეფს. მუჟამსით თაშ ქიმიფქციებუთ, ქრისტეშ კანონს შევასრულენთ. თეწკუმა ართო, ირნერო ოკო ვეცადათ კრებაშ შეხვალამეფს თითოულქ დუდ დაცულო დო უსაფრთხოთ იგინას.

15—17. ა) მუჭო იძირე იესოშ საქმეეფშე თიშ დამოკიდებულება სამართლიანობაწკუმა? ბ) მუჭო მივაჸუნათ იესო ქრისტეშ მაგალითის?

¹⁵ ბიბლიას მოშინაფილ „სამართლიანობა“ ღორონთიშ თოლს სწორიშ კეთებას დო შხვეფწკუმა უგშუკერძაფუო მოქციებას ნიშნენს. მუშენ შემლებნა თიშ რაგად, ნამდა ქრისტეშ კანონ სამართლიანობას უნწყუნს ხეს?

¹⁶ პირველ, დეფიქრით, მუჭო იძირედ იესოშ საქმეეფშე, ნამდა თის სამართლიანობა უჸორდჷ. თი დროს რელიგიურ ლიდერეფს ვა უჸორდეს თინეფ, მით ვა რდეს ებრაელეფ, ჟიშე გინაჯინედეს უბრალო კათას დო ოსურკათას უპატიცემულოდ ოქცუდეს. თინეფიშ გინაწონს, იესო არძას სამართლიანო ოქცუდ დო მითინს ვეგშაგორუნდჷ. თინა იუდეველეფ ვა რდესინ თინეფს, მით რწმენას გიმირჩქინანდჷ, საშვალებას არზენდჷ გინირთესკო მუშ მოწაფეეფო (მათ. 8:5—10, 13). იესო უქადაგუდ არძას, მუჭოთ ქონებიერეფს, თეშ ღარიბეფს ხოლო (მათ. 11:5; ლუკ. 19:2, 9). თინა დღას ვაქცუდ უხეშო ოსურკათას. პირიქით, პატიცემათ ოქცუდ თინეფს თიმწკუმა ხოლო, მუჟამსით ნამთინეს საზოგადოებას გლახა თოლით უჯინედეს (ლუკ. 7:37—39, 44—50).

¹⁷ მუს ბგურაფლენთ: შემლებნა მივაჸუნათ იესოშ მაგალითის დო სოციალურ მდგომარეობაშ დო რელიგიურ მრწამსიშ უმკუჯინუო, ვუქუდაგათ არძას, მიდგას სახიოლო ამბეშ მორჩქილაფა ოკო. ქრისტიან ქომოლკათა იესოშ მაგალითის მეჸუნა, მუჟამსით პატიცემათ ოქცუნა ოსურკათას. ჩქი ქრისტეშ კანონს ვომორჩილუთ, მუჟამსით ვასრულენთ თი ირფელს, მუთ ჟიშე მიფშინეთ.

18, 19. მუს ოგურუანდჷ იესო სამართლიანობაშ გურშენ დო მუშ გურაფა შემლებნა თავრეშე?

¹⁸ მაჟია, დეფიქრით, მუს ოგურუანდჷ იესო სამართლიანობაშ გურშენ. თინა მუშ მიმაჸუნალეფს ოგურუანდჷ პრინციპეფს, მუჭო მექცისკო შხვეფს სამართლიანო. მაგალთო, ქიგიფშინათ ოქროშ წესი (მათ. 7:12). ჩქი არძას მოკონა ჯგირო მიმექცუან. ათეშენ, მუჟამსით შხვეფს ჯგირო ვოქცუთ, შილებე თინეფქ ხოლო თეშნერო მიმექცუან. მარა მუჭო ოკო მიფქცუათ, შხვეფ უსამართლოთ ქუმოქცუნან-და? იესო მუშ მიმაჸუნალეფს ოგურუანდჷ, მიენდესკო იეჰოვას, ნამუთ სამართალს გურჩქინანდჷ „მუშ გიშაგორილეფს, მით ამდღა დო ამსერ ოხვეწნა [თის]“(ლუკ. 18:6, 7). თე სიტყვეფ სინამდვილეს მარწმუნენა, ნამდა ჩქინ სამართლიან ღორონც უჩქჷ, მუ სირთულეეფს შეფხვადუთ თე ბოლო დღალეფს დო თინა არძას სამართალს გურჩქინანს მუშ დროს (2 თეს. 1:6).

¹⁹ მუს ბგურაფლენთ: თი პრინციპეფიშ გათვალისწინება, მუდგას იესო ოგურუანდჷ, მიმეხვარებნა სამართლიანო მივექცუათ შხვეფს. სატანაშ ქვეყნიერებას შილებე ჩქი ხოლო ქიმმექცუან უსამართლოთ, მარა დარწმუნებულ ვორდათ, იეჰოვა სამართალს აღადგინენს.

20, 21. ა) მუჭო ოკო მექცუან შხვეფს თინეფქ, მიდგას ხემძღვანელობა ოვალ? ბ) მუჭო შეულებ ქომონჯის დუდგინოდვალირ ჸოროფაშ გიმორჩქინა დო მუჭო ოკო მექცუან მუმალეფქ მუნეფიშ ბაღანეფს?

²⁰ ქრისტეშ კანონიშ თანახმათ, მუჭო ოკო მექცუან შხვეფს თინეფქ, მიდგას ხემძღვანელობა ოვალ? ქრისტეშ კანონ ჸოროფაშა რე გერსხილ, ათეშენ თინეფქ, მიდგას ხემძღვანელობა ოვალ, ჸოროფათ ოკო მექცუან შხვეფს. თინეფს დღას ოკო ვა გაჭყორდან, ნამდა ქრისტეს ოკო ჸოროფა გიმიფრჩქინათ ირნერ საქმეს, მუდგას ვორთუთ.

²¹ ოჯახის. ქომონჯის თეშ ოკო უჸორდას მუშ ოსურ, „მუჭოთ ქრისტექ იჸოროფუ კრება“ (ეფეს. 5:25, 28, 29). თიქ ქრისტეშ მაგალითის ოკო მიაჸუნას დო გეგმირჩქინას დუდგინოდვალირ ჸოროფა. თეს თი შემთხვევას აკეთენს, მუჟამსით მუშ დუდიშ წოხოლე მეუღლეშ საჭიროებეფს ქიგიორინუანს. ნამთინეს უჭირს თეცალ ჸოროფაშ გიმორჩქინა, მუშენდა თიცალ გარემოს ირდჷ, სოდეთ ართიანს ჯგირო ვაქცუდეს დო ჸოროფას ვეგმირჩქინანდეს. გლახა ჩვევეფიშ გინორჩქვანა ადვილ ვა რე, მარა ქრისტეშ კანონს დემორჩილანინ, თინეფქ დოთირუან ოკო მუნეფიშ დამოკიდებულება. მუჟამსით ქომონჯ დუდგინოდვალირ ჸოროფას გიმირჩქინანს, ოსურ თის პატიცემათ ოქცუ. მოჸოროფე მუმა დღას ველაჭუანს გურს სქუალეფს მუშ სიტყვათ დო საქციელით (ეფეს. 4:31). პირიქით, თინა ჸოროფას გიმირჩქინანს, მუთ ბაღანეფს თხილერო ოგინებაფუანს დუც. შედეგო, ბაღანეფს მუმაშ ჸოროფა დო ნდობა აღვენუნა.

22. 1 პეტრეშ 5:1—3-იშ თანახმათ, მიშ საკუთრება რე „შხურ“ დო მუჭო ოკო მექცუან „ჭყიშეფქ“ თინეფს?

²² კრებას. უხუცესეფს ოკო შუდან, ნამდა „შხურ“ თინეფიშ საკუთრება ვა რე (იოან. 10:16; წეკითხით 1 პეტრე 5:1—3). სიტყვეფ „ღორონთიშ ოჭყიშალ“ დო „ღორონთიშ საკუთრება“ უხუცესეფს გაშინანს, ნამდა კრებაშ წევრეფ იეჰოვას ოკუთვნუნა. ათეშენ თის ოკო, უხუცესეფქ კრებაშ წევრეფს ჸოროფათ მექცუან დო სათუთ გრძნობეფ გეგმირჩქინან (1 თეს. 2:7, 8).  უხუცესეფ, მით მუნეფიშ, მუჭოთ ჭყიშეფიშ მოვალეობას ჸოროფათ ასრულენა, იეჰოვაშ მოწონას ღებულენა. თეს გეძინელ, და დო ჯიმალეფშე ხოლო დემსახურენა ჸოროფას.

23, 24. ა) მუჭო ოკო მიქცუან უხუცესეფქ, მუჟამსით კრებაშ წევრ სერიოზულო აშენს? ბ) მუ ოკო გეთვალისწინან უხუცესეფქ თეშნერ სიტუაციეფიშ დროს?

²³ მუჭო ოკო მიქცუან უხუცესეფქ, მუჟამსით საქმე სერიოზულ დაშებას ოხუ? თინეფიშ მოვალეობა გენესხვავებ თი მსაჯულეფიშ დო უხუცესეფიშ მოვალეობაშე, მით ისრაელეფშა მეჩამილ ღორონთიშ კანონით ხემძღვანელენდეს. კანონიშ თანახმათ დანიშნულ ქომოლკათაქ ხვალე სულიერ ვარინ, სამოქალაქო დო დანაშაულებრივ საკითხეფ ხოლო ოკო გარჩუესკო. მარა ქრისტეშ კანონიშ თანახმათ, უხუცესეფიშ მოვალეობა რე, ქიმეხვარან დუმაშებელს, დირთინუას ღორონთწკუმა ურთიერთობა. თინეფს არჩქილენა, ნამდა სამოქალაქო დო დანაშაულებრივ საკითხეფიშ მოგვარებაშ უფლება ღორონთის ქვეყნიურ მართველეფშა აფჷ მეჩამილ. თინეფს შეულებნა დაჯარიმან ვარდა ციხეს ქუდახუნუან კანონიშ დუმარღვიებელ (რომ. 13:1—4).

²⁴ მუჭო ოკო მეხვარან უხუცესეფქ თი პიროვნებას, მით კრებას სერიოზულო აშენს? თეცალ საკითხეფიშ გარჩიებელო დო გადაწყვეტილებაშ მიოღებელო, უხუცესეფ ბიბლიას გიმირინუანა. თინეფ ითვალისწინენა, ნამდა ქრისტეშ კანონ ჸოროფაშა რე გერსხილ. ჸოროფა აღძრენს უხუცესეფს დეფიქრან, მუ ოკო აკეთან, ნამდა ქიმეხვარან დაზარალებურს კრებას. ჸოროფა აღძრენს უხუცესეფს დეფიქრან, ქონარღენს დო ვარ დუმაშებელ დო მუჭო შეულებნა ქიმეხვარან, დირთინუას იეჰოვაწკუმა ურთიერთობა.

25. მუს გუვარჩიენთ უკულიან სტატიას?

²⁵ მარდულეფ ვორეთ, ნამდა მიღნა ქრისტეშ კანონ. მუჟამსით ირნერო ქივეცადებუთ დევემორჩილათ თე კანონს, კრებას არძა ქიგინანს ჸოროფას დო დუც დაფასებულო დო თხილერო იგინანა. ჩქი ფცხოვრენთ თიცალ ქვეყნიერებას, სოდეთ „უბადოეფ . . . უფრაშო მიქციებნა“ (2 ტიმ. 3:13). ათეშენ კურცხას ოკო ვორდათ. მუჭო შემლებნა ქრისტიანულ კრებას ღორონთიშ სამართლიანობაშ გიმორჩქინა, მუჟამსით საქმე ოხუ სექსუალურ ძალადობას ბაღანეფიშ მიმართ? თე საკითხის უკულიან სტატიას გუვარჩიენთ.