1. ¿Máakalmáak le kaʼapʼéel baʼax k-kanik tiʼ Jéeobaoʼ?

JÉEOBAEʼ u yaabiltmaj le máaxoʼob meyajtik desde úuchjeakiloʼ, le oʼolal k-ojel maʼ kun xuʼulul u beetik. Letiʼeʼ u yaabiltmaj xan u beetaʼal baʼax toj wa justicia (Sal. 33:5). Lelaʼ ku kaʼansiktoʼon kaʼapʼéel baʼal. Yáaxeʼ, letiʼeʼ ku yaatal tu yóol u beetaʼal baʼax maʼ maʼalob tiʼ le máaxoʼob meyajtikoʼ. U kaʼapʼéeleʼ, yaan u yilik ka beetaʼak baʼax toj. Teʼ yáax xook tiʼ le kanpʼéel xookoʼobaʼ, * t-ileʼ le Ley tu tsʼáaj Dios tiʼ u kaajil Israeloʼ tu tsʼáaj yoʼolal u yaabilaj yéetel ku yaʼalik ka beetaʼak baʼax toj tiʼ tuláakal máak, tak tiʼ le óotsiloʼoboʼ (Deu. 10:18). Bey túunoʼ le Leyoʼ tu yeʼesaj u yutsil Jéeoba tiʼ le máaxoʼob meyajtikoʼ.

2. ¿Baʼax kʼáatchiʼiloʼob ken k-núuke?

² U Ley Moiseseʼ xuʼul u meyaj tu añoil 33 tiʼ le yáax siglo, le ka anchaj le yáax múuchʼuliloʼ. ¿U kʼáat wa túun u yaʼal pʼáat minaʼan junpʼéel ley aʼalik unaj u yeʼesaʼal yaabilaj yéetel ka beetaʼak justicia? Maʼatech. Le yáax cristianoʼoboʼ tsʼaʼab junpʼéel túumben ley tiʼob. Teʼ xookaʼ yaan k-ilik máakalmáak le túumben leyaʼ, tsʼoʼoleʼ k-núukik le kʼáatchiʼobaʼ: ¿Baʼaxten k-aʼalik le leyaʼ nuʼuktaʼan tumen le yaabilajoʼ? ¿Baʼaxten k-aʼalik ku péeksikoʼon k-beet baʼax maʼalob? ¿Bix unaj u tratartaʼal u maasil tumen le máaxoʼob tsʼaʼan páajtalil tiʼoboʼ?

3. ¿Baʼax táakaʼan ichil «u ley Cristo» ku yaʼalaʼal teʼ Galaciailoʼob 6:2?

³ (Xok Galaciailoʼob 6:2). Le máaxoʼob meyajtik Diosoʼ tiaʼanoʼob yáanal ‹u ley Cristoeʼ›. Jesuseʼ maʼ tu tsʼíibtaj baʼax leyil  kun nuʼuktik u disipuloʼobiʼ, baʼaxeʼ tu yaʼalaj baʼax unaj u beetaʼal yéetel baʼaxoʼob jeʼel u nuʼuktik u kuxtal máakeʼ. Ichil ‹u ley Cristoeʼ› táakaʼan tuláakal le baʼaxoʼob tu kaʼansaj Jesusoʼ. Utiaʼal k-naʼatik tubeeleʼ koʼoneʼex xakʼaltik jujunpʼéel kʼáatchiʼob.

4, 5. 1) ¿Bix úuchik u kaʼansaj Jesús? 2) ¿Baʼax kʼiin ka kaʼansajnaji?

⁴ ¿Bix úuchik u kaʼansik Jesús le máakoʼoboʼ? Yáaxeʼ, yéetel le baʼaxoʼob tu yaʼaloʼ. Letiʼeʼ tu yaʼalaj u jaajil yoʼolal Dios, jach baʼax u biilal le kuxtal yaan tiʼ wíinikoʼ yéetel chéen u Reino Dios kun utskíintik tuláakal le baʼaxoʼob ku muʼyajtik wíinikoʼ (Luc. 24:19). U kaʼapʼéeleʼ, Jesuseʼ kaʼansajnaj yéetel le baʼaxoʼob tu beetoʼ. Yoʼolal bix kuxlajikeʼ tu yeʼesaj bix unaj u kuxtal u disipuloʼob (Juan 13:15).

⁵ ¿Baʼax kʼiin ka kaʼansajnaj Jesús? Letiʼe ka taal way Luʼumoʼ (Mat. 4:23). Tu kaʼansaj xan le máaxoʼob tsaypachtik le ka tsʼoʼok u kaʼa kuxtaloʼ. Tu chíikbesuba tuʼux yaan kex quinientos u túulaloʼobeʼ ka tu yaʼalajtiʼob ka u kaʼansoʼob uláakʼ máakoʼob (Mat. 28:19, 20; 1 Cor. 15:6). Ka tsʼoʼok u suut teʼ kaʼanoʼ tsʼaʼab u beet u Poolil le múuchʼulil utiaʼal u seguer u kaʼansik le máaxoʼob tsaypachtikoʼ. Jeʼex tu añoil 96, tu nuʼuktaj apóstol Juan utiaʼal u líiʼsik u yóol yéetel u tsolnuʼuktik le sukuʼunoʼob yéeyaʼanoʼob utiaʼal u binoʼob kaʼanoʼ (Col. 1:18; Apo. 1:1).

6, 7. 1) ¿Tuʼux tsʼíibtaʼab le baʼaxoʼob tu kaʼansaj Jesusoʼ? 2) ¿Baʼax unaj k-beetik utiaʼal k-chaʼik u nuʼuktikoʼon u ley Cristo?

⁶ ¿Tuʼux tsʼíibtaʼab le baʼaxoʼob tu kaʼansaj Jesusoʼ? Teʼ kanpʼéel Evangelioʼoboʼ, leloʼobaʼ ku tsikbaltikoʼob yaʼab tiʼ le baʼaxoʼob tu beetaj yéetel tu yaʼalaj le tiaʼan way Luʼumoʼ. Uláakʼ u libroiloʼob le Kiliʼich Tsʼíiboʼob ich Griegooʼ ku yáantkoʼonoʼob utiaʼal k-naʼatik bix u tuukul Jesús, tumen le máaxoʼob tsʼíibtoʼ nuʼuktaʼaboʼob tumen le kiliʼich muukʼoʼ, tsʼoʼoleʼ yaantiʼob «u tuukul Cristo» (1 Cor. 2:16).

⁷ Baʼaxoʼob ku kaʼansiktoʼon: Le baʼaxoʼob tu kaʼansaj Jesusoʼ ku nuʼuktikoʼon tiʼ tuláakal baʼaxoʼob k-beetik. Le oʼolal u ley Cristoeʼ ku nuʼuktikoʼon ichil k-otoch, teʼ meyajoʼ, teʼ escuelaoʼ yéetel teʼ múuchʼuliloʼ. Kéen k-xok le Kiliʼich Tsʼíiboʼob ich Griego yéetel kéen tuukulnakoʼon tiʼ le baʼaxoʼob ku yaʼalikoʼ k-kaanbal tiʼ u ley Cristo. Wa k-tsʼáaik ichil k-kuxtal le baʼax ku kaʼansiktoʼonoʼ k-eʼesik k-chaʼik u  nuʼuktikoʼon. Kéen k-beet baʼax ku yaʼalik u ley Cristoeʼ, u jaajileʼ táan k-beetik baʼax ku yaʼalik Jéeoba, le Dios jach u yaabiltmoʼonoʼ, tumen tiʼ letiʼ u taal tuláakal le baʼaxoʼob tu kaʼansaj Jesusoʼ (Juan 8:28).

8. ¿Baʼax nuʼuktik u ley Cristo?

⁸ Máaxoʼob kajaʼanoʼob tiʼ junpʼéel naj maʼalob beetaʼanil yéetel u chukmaj cháaltun u chuunpakʼiloʼobeʼ maʼatech u sajaktaloʼob antal ichil. Bey xan u yuʼubikuba le máaxoʼob beetik baʼax ku yaʼalik junpʼéel ley maʼalob baʼax nuʼuktikoʼ. U ley Cristoeʼ nuʼuktaʼan tumen junpʼéel baʼax jach maʼalob: letiʼe yaabilajoʼ. ¿Baʼaxten k-aʼalik beyoʼ?

9, 10. 1) ¿Baʼaxoʼob eʼesik letiʼe yaabilaj péeks Jesús u beet tuláakal baʼaloʼ? 2) ¿Bix jeʼel k-beetik jeʼex tu beetiloʼ?

⁹ Yáaxeʼ, Jesuseʼ tu beetaj tuláakal baʼal yoʼolal yaabilaj. Le baʼax péeks utiaʼal u kaʼansik le máakoʼob, u tsʼak le kʼojaʼanoʼob, u tséentkoʼob yéetel u kaʼa kuxkíintik le kimenoʼoboʼ letiʼe chʼaʼ óotsilaloʼ, lelaʼ junpʼéel bix u yeʼesaʼal yaabilaj (Mat. 14:14; 15:32-38; Mar. 6:34; Luc. 7:11-15). Letiʼeʼ tu xupaj u tiempo yéetel u muukʼ utiaʼal u beetik tuláakal le baʼaloʼobaʼ. Tu tsʼáaj táanil u yutsil u maasil yéetel kiʼimak óolal. Tsʼoʼoleʼ tu yeʼesaj u nojoch yaabilaj le ka tu kʼubaj u kuxtal tu yoʼolal wíinikoʼ (Juan 15:13).

¹⁰ Baʼaxoʼob ku kaʼansiktoʼon: Kéen k-tsʼáa táanil u yutsil u maasileʼ k-beetik jeʼex tu beetil Jesuseʼ. Bey xan kéen k-chʼaʼ óotsilil tiʼ le máaxoʼob kajaʼanoʼob teʼ tuʼux k-kʼaʼaytajoʼ. Wa letiʼe yaabilaj péeksikoʼon k-kʼaʼayt yéetel k-kaʼans le máakoʼoboʼ k-eʼesik táan k-nuʼuktaʼal tumen u ley Cristo.

11, 12. 1) ¿Baʼaxten k-aʼalik Jéeobaeʼ jach koʼoj u yilik cada juntúul tiʼ toʼon? 2) ¿Bix jeʼel k-eʼesik yaabilaj jeʼex u beetik Jéeobaoʼ?

¹¹ U kaʼapʼéeleʼ, Jesuseʼ tu yeʼesaj le yaabilaj ku yuʼubik Jéeobaoʼ. Le tiaʼan way Luʼumoʼ tu yeʼesaj Jéeobaeʼ u yaabiltmaj le máaxoʼob meyajtikoʼ. Tu kaʼansajeʼ cada juntúul tiʼ toʼoneʼ jach koʼoj u tojol tu táan Jéeoba (Mat. 10:31). Tsʼoʼoleʼ tu yaʼaleʼ Jéeobaeʼ u kʼáat ka arrepentirnak le máaxoʼob ku kʼebantaloʼob utiaʼal ka suunakoʼob teʼ múuchʼuliloʼ, letiʼeʼ ku kʼamkoʼob yéetel kiʼimak óolal (Luc. 15:7, 10). Tu yaʼalaj xaneʼ Dioseʼ tu yeʼesaj u yaabilaj úuchik u tsʼáaik u kuxtal u Hijo utiaʼal u salvartikoʼon (Juan 3:16).

¹² Baʼaxoʼob ku kaʼansiktoʼon: ¿Bix jeʼel k-eʼesik yaabilaj jeʼex u beetik Jéeobaeʼ? (Efe. 5:1, 2). Unaj u kʼaʼajaltoʼoneʼ le sukuʼunoʼoboʼ jach yaabiltaʼanoʼob tumen Jéeoba, tsʼoʼoleʼ unaj k-kʼamik yéetel kiʼimak óolal le máaxoʼob bey tamanoʼob saatloʼob ku suutoʼob tu yiknaloʼ (Sal. 119:176). Kéen k-áant le sukuʼunoʼob yéetel baʼaxoʼob kʼaʼabéettiʼoboʼ k-eʼesik k-yaabiltmoʼob (1 Juan 3:17). Kéen k-eʼes yaabilaj tiʼ u maasileʼ k-eʼesik táan k-chaʼik k-nuʼuktaʼal tumen u ley Cristo.

13, 14. 1) ¿Baʼax mandamientoil tu yaʼalaj Jesús teʼ Juan 13:34 yéetel 35, yéetel baʼaxten k-aʼalik túumben? 2) ¿Bix jeʼel k-beetik le baʼax ku yaʼalik le túumben mandamientooʼ?

¹³ U yóoxpʼéeleʼ, Jesuseʼ tu yaʼalaj tiʼ le máaxoʼob tsaypachtik ka u yeʼesoʼob yaabilaj jeʼex tu beetiloʼ (xok Juan 13:34, 35). Lelaʼ junpʼéel túumben mandamiento, tumen minaʼan kaʼach ichil le Ley u tsʼaamaj Dios tiʼ u kaajil Israeloʼ. Jesuseʼ tu yaʼaleʼ unaj k-yaabiltik k-sukuʼunoʼob jeʼex u yaabiltmiloʼonoʼ. Unaj k-maas yaabiltikoʼob tak tiʼ toʼon, jeʼel tak k-óotik k-tsʼáa k-kuxtal tu yoʼolaloʼob, jeʼex tu beetil letiʼoʼ. Chéen bey jeʼel k-yaabiltikoʼob jeʼex tu beetil Cristooʼ. *

¹⁴ Baʼaxoʼob ku kaʼansiktoʼon: ¿Bix jeʼel k-beetik le baʼax ku yaʼalik le túumben mandamientooʼ? Letiʼe ka k-kaxt u yutsil le sukuʼunoʼoboʼ.  Maʼ chéen jeʼel k-óotik k-tsʼáa k-kuxtal tu yoʼolaloʼobeʼ, baʼaxeʼ k-beetik tak baʼaloʼob mejentak tu yoʼolaloʼob. Maʼ xaaneʼ jeʼel u páajtal k-tséelel k-chʼaʼ juntúul sukuʼun tsʼoʼok u yantal u jaʼabil utiaʼal k-bisik muchʼtáambaleʼ, k-tsʼáaik juntséelil baʼax uts t-tʼaan utiaʼal k-beetik baʼax uts tu tʼaan juntúul sukuʼun wa k-jóoʼsik u tiempoil utiaʼal k-bin áantaj tuʼux ku yúuchul junpʼéel loobil. Kéen k-beet le baʼaloʼob beyaʼ k-eʼesik k-chaʼik k-nuʼuktaʼal tumen u ley Cristo, tsʼoʼoleʼ k-áantaj utiaʼal u yuʼubikuba maʼalobil tuláakal le sukuʼunoʼoboʼ.

15-17. 1) ¿Bix chíikpajik yoʼolal le baʼaxoʼob tu beetaj Jesús u kʼáat ka beetaʼak baʼax tojoʼ? 2) ¿Bix jeʼel k-beetik jeʼex Jesuseʼ?

¹⁵ U beetaʼal baʼax toj jeʼex u yaʼalik le Bibliaoʼ, u kʼáat u yaʼaleʼ u beetaʼal baʼax maʼalob jeʼex u yaʼalik Diosoʼ yéetel maʼ u yéeyaʼal tiʼ máax unaj u beetaʼal. ¿Baʼaxten k-aʼalik u ley Cristoeʼ ku yaʼalik ka beetaʼak baʼax toj?

¹⁶ Yáaxeʼ, le baʼaxoʼob tu beetaj Jesusoʼ ku chíikbesik u kʼáat ka beetaʼak baʼax toj. Koʼoneʼex ilik bixi. U nuuktakil le judíoʼob tu kʼiiniloʼob Jesusoʼ u pʼekmoʼob le j-táanxel kajiloʼoboʼ, ku taaskoʼob mix baʼalil le máaxoʼob maʼ kaʼanchajaʼan u xookoʼoboʼ yéetel maʼatech u yeʼeskoʼob tsiikil tiʼ le koʼoleloʼoboʼ. Baʼaleʼ Jesuseʼ tu tratartaj tuláakal máak jeʼex unajeʼ. Tu kʼamaj tak le j-táanxel luʼumiloʼob tu tsʼáaj u fejoʼob tiʼ letiʼoʼ (Mat. 8:5-10, 13). Kʼaʼaytajnaj tiʼ tuláakal máak, tiʼ le ayikʼaloʼob yéetel tiʼ le óotsiloʼoboʼ (Mat. 11:5; Luc. 19:2, 9). Maʼ tu mixbaʼalkúuntaj le koʼoleloʼoboʼ yéetel maʼ tu kʼeʼekʼeyoʼobiʼ. Baʼaxeʼ tu yeʼesaj tsiikil tiʼob yéetel tu tratartoʼob yéetel utsil, tak le pʼektaʼanoʼob tumen u maasiloʼ (Luc. 7:37-39, 44-50).

¹⁷ Baʼaxoʼob ku kaʼansiktoʼon: Toʼoneʼ jeʼel u páajtal k-beetik jeʼex Jesús kéen k-eʼes utsil tiʼ u maasil yéetel kéen kʼaʼaytajnakoʼon tiʼ tuláakal máak, kex ayikʼaloʼob wa kex yaanal u religionoʼob. Le xiiboʼoboʼ ku beetkoʼob jeʼex Jesús kéen u tratartoʼob yéetel tsiikil le koʼoleloʼoboʼ. Kéen k-beet tuláakal le baʼaloʼobaʼ k-eʼesik táan k-beetik baʼax ku yaʼalik u ley Cristo.

18, 19. ¿Baʼax tu yaʼalaj Jesús tu yoʼolal le justiciaoʼ, yéetel baʼaxoʼob ku kaʼansiktoʼon leloʼ?

¹⁸ U kaʼapʼéeleʼ, koʼoneʼex ilik baʼax tu yaʼalaj Jesús yoʼolal le justiciaoʼ. Tu kaʼansaj tiʼ u disipuloʼob baʼaloʼob jeʼel u yáantkoʼob utiaʼal u beetkoʼob baʼax toj mantatsʼeʼ. Letiʼeʼ tu yaʼaleʼ unaj k-beetik le baʼax k-kʼáat ka beetaʼaktoʼon tumen u maasiloʼ (Mat. 7:12). Tumen tuláakloʼon k-kʼáat ka tratartaʼakoʼon maʼalobeʼ, toʼoneʼ bey unaj k-beetik xanoʼ. ¿Baʼax utsil jeʼel u taasiktoʼon wa k-beetkeʼ? Yaan k-tratartaʼal maʼalob xan tumen u maasil. ¿Kux túun wa tsʼoʼok u beetaʼaltoʼon junpʼéel baʼax maʼ maʼalobiʼ? Jesuseʼ tu kaʼansajeʼ unaj k-pʼatik tu kʼab Jéeoba, tumen letiʼ kun ilik ka beetaʼak justicia tiʼ le máaxoʼob «táan u kʼáat óolaloʼob tiʼ letiʼ bul kʼiin yéetel bul áakʼab[oʼ]» (Luc. 18:6, 7). Lelaʼ ku kaʼansiktoʼoneʼ Dioseʼ jach u yojel baʼaxoʼob k-aktáantik teʼ tu tsʼook kʼiinoʼobaʼ yéetel yaan u castigartik teʼ kʼiin u tukultmaj le máaxoʼob beetik k-muʼyajoʼ (2 Tes. 1:6).

¹⁹ Baʼaxoʼob ku kaʼansiktoʼon: Wa k-beetik le baʼaxoʼob tu kaʼansaj Jesusoʼ yaan k-tratartik maʼalob u maasil. Wa tsʼoʼok u beetaʼal k-muʼyaj tu kʼasaʼan yóokʼol kaab Satanaseʼ, ku líikʼil k-óol k-ojéeltik Jéeobaeʼ yaan u yilik ka beetaʼak justicia tiʼ le máaxoʼob meyajtikoʼ.

20, 21. 1) ¿Bix unaj u tratartaʼal u maasil tumen le máaxoʼob tsʼaʼan páajtalil tiʼoboʼ? 2) ¿Bix unaj yeʼesaʼal yaabilaj tumen le íichamtsiloʼoboʼ? 3) ¿Bix unaj u tratartaʼal le paalaloʼob tumen u taataʼoboʼ?

²⁰ Jeʼex tsʼoʼok k-ilkoʼ, u ley Cristoeʼ nuʼuktaʼan tumen le yaabilajoʼ. Le oʼolal le máaxoʼob  tsʼaʼan páajtalil tiʼob yanoʼob yáanal le leyaʼ unaj u tratartikoʼob u maasil yéetel tsiikil bey xan yéetel yaabilaj. Maʼ unaj u tuʼubultiʼobeʼ Cristoeʼ u kʼáat ka k-eʼes yaabilaj tiʼ tuláakal baʼaxoʼob k-beetik.

²¹ Ichil le familiaoʼ. Le íichamtsiloʼ unaj u yaabiltik u yatan jeʼex yaabiltaʼanil le múuchʼulil tumen Cristooʼ (Efe. 5:25, 28, 29). Ku yeʼesik yaabilaj kéen u tsʼáa táanil u yutsil u yatan, maʼatech u kaxtik chéen u yutsil letiʼ. Yaan xiiboʼobeʼ talam u yilik u yeʼeskoʼob le yaabilaj beyaʼ, tumen maʼ xaaneʼ teʼ tuʼux líikʼoʼoboʼ maʼ suuk u yeʼesaʼal yaabilaj tiʼ u maasiliʼ yéetel maʼatech u tratartaʼaloʼob tubeel. Kex ka talamchajak u kʼexik u modosoʼobeʼ unaj u beetkoʼob utiaʼal u chaʼik u nuʼuktaʼaloʼob tumen u ley Cristo. Le íichamtsil beetik beyoʼ ku yeʼesaʼal tsiikil tiʼ tumen u yatan. Le taatatsiloʼob u yaabiltmaj u paalaloʼob xanoʼ maʼatech u beetkoʼob loob tiʼob yéetel baʼax ku yaʼalikoʼob mix yéetel baʼax ku beetkoʼob (Efe. 4:31). Baʼaxeʼ ku yeʼeskoʼob yéetel ku yaʼalikoʼob tiʼ u paalaloʼob u yaabiltmoʼob. Beyoʼ yaan u yaabiltaʼaloʼob yéetel yaan u maas confiar u paalaloʼob tiʼ letiʼob.

22. Jeʼex u yaʼalik Yáax tiʼ Pedro 5:1 tak 3, ¿máax u yuumil le tamanoʼoboʼ, yéetel bix unaj u tratartaʼaloʼob?

²² Teʼ múuchʼuliloʼ. Le ancianoʼoboʼ unaj u kʼaʼajsikoʼob maʼ u tiaʼaloʼob le tamanoʼoboʼ (Juan 10:16; xok 1 Pedro 5:1-3). Le tʼaan «u tamanoʼob Dios» yéetel «máaxoʼob u tiaʼaloʼob Diosoʼ» ku kʼaʼajsiktiʼobeʼ utiaʼaloʼob Jéeoba. Letiʼeʼ u kʼáat ka tratartaʼakoʼob yéetel yaabilaj (1 Tes. 2:7, 8). Le ancianoʼob beetik beyoʼ ku yaabiltaʼaloʼob yéetel ku yeʼesaʼal tsiikil tiʼob tumen le sukuʼunoʼoboʼ, tsʼoʼoleʼ ku kʼaʼamloʼob tumen Jéeoba.

23, 24. 1) ¿Baʼax meyajil ku beetik le ancianoʼob kéen lúubuk wa máax tiʼ junpʼéel kʼebanoʼ? 2) ¿Baʼaxoʼob ku chʼaʼabal en cuentail tumen le ancianoʼoboʼ?

²³ Yáanal le Ley tu tsʼáaj Dios tiʼ u kaajil Israeloʼ, letiʼe juezoʼob yéetel u nuuktakil le  kaaj ku kaʼansajoʼoboʼ, tsʼoʼoleʼ ku yilkoʼob xan uláakʼ baʼaloʼob minaʼan mix baʼal u yil yéetel u adorartaʼal Jéeoba bey xan kéen beetaʼak junpʼéel baʼax kʼaas. Baʼaleʼ yáanal u ley Cristoeʼ maʼ beyiʼ. Kéen beetaʼak junpʼéel baʼax kʼaas teʼ múuchʼuliloʼ, le ancianoʼoboʼ chéen ku yilik u yáantkoʼob le máak utiaʼal ka arrepentirnakoʼ. U yojloʼob Dioseʼ u tsʼaamaj le autoridadoʼob utiaʼal u juzgartikoʼob le máaxoʼob beetik baʼaloʼob kʼaastakoʼ yéetel utiaʼal u yilkoʼob u maasil baʼaloʼob ku kʼaʼabéettal. Letiʼobeʼ jeʼel u páajtal u yaʼalikoʼob baʼax castigoil kun tsʼaabil tiʼ le máax beetik baʼax kʼaasoʼ (Rom. 13:1-4).

²⁴ ¿Baʼax túun ku beetik le ancianoʼob kéen lúubuk wa máax tiʼ junpʼéel nojoch kʼebanoʼ? Ku meyajtiʼob le Biblia utiaʼal u chʼaʼtuklikoʼob bix ken u yáantiloʼob le máax kʼebanchajoʼ. Ku kʼaʼajskoʼobeʼ mantatsʼ u ley Cristoeʼ ku nuʼuktaʼal tumen le yaabilajoʼ. Lelaʼ letiʼ péeksikoʼob utiaʼal u yilkoʼob bix jeʼel u yáantkoʼob juntúul máax tsʼoʼok u beetaʼal baʼax kʼaas tiʼeʼ. Tsʼoʼoleʼ le yaabilajoʼ le kun péeksikoʼob u yiloʼob wa arrepentirnajaʼan le máax kʼebanchajoʼ bey xan wa jeʼel u páajtal u yáantaʼal utiaʼal u seguer u biskuba yéetel Dioseʼ.

25. ¿Baʼax ken k-xakʼalt teʼ tuláakʼ xookoʼ?

²⁵ Toʼoneʼ jach kiʼimak k-óol yaniloʼon yáanal u ley Cristo. Kéen k-tsʼáa k-óol k-beet baʼax ku yaʼalikeʼ k-áantaj utiaʼal u yeʼesaʼal yaabilaj tiʼ tuláakal teʼ múuchʼuliloʼ yéetel utiaʼal u yuʼubikuba máak maʼalobiliʼ. Baʼaleʼ le máakoʼob maʼatech u meyajtikoʼob Diosoʼ táan u bin u «maas kʼastaloʼob» (2 Tim. 3:13). Le oʼolal maʼ unaj u náayal k-óoliʼ. ¿Bix u yeʼesik le múuchʼulil u justicia Dios kéen beetaʼak kʼaas tiʼ le mejen paalaloʼoboʼ? Le uláakʼ xookoʼ yaan u núukik le kʼáatchiʼaʼ.