1. Колоссыдагыларга 2:4, 8-ле болзо, Сатана бистиҥ санаабысты ээлеп аларга нени эдет?

САТАНА бистерди Иеговага удура барзын деп кӱӱнзеп јат. Оныҥ учун ол бистиҥ санаабысты ээлеп, бойына бактырып аларга, бисти оныҥ јолыла барзын деп, тӧгӱндеерге албаданат. Сатана биске кандый тузактар тургузарын ла бу тузактарды канайып тузаланарын јакшы билер. (Колоссыдагыларга 2:4, 8 кычырыгар.)

2, 3. а) Колоссыдагыларга 2:8-те бичилген сӧстӧрди нениҥ учун ундыбас керек? б) Бис бу јӧрмӧлдӧ нени шӱӱжип кӧрӧрис?

² Сатана бисти чын ла тӧгӱндеп ийер аргалу ба? Эйе. Колоссыдагыларга 2:8-те айдылган Павелдиҥ сӧстӧри майлаткан христиандарга бичилген (Кол. 1:2, 5). Сатана олордыҥ да санаазын булгап салар аргалу болордо, бӱгӱнги кӱнде бистиҥ де санаабысты оноҥ тыҥ булгаарга умзанат (1 Кор. 10:12). Нениҥ учун дезе Сатана јердӧӧн таштадып, Кудайдыҥ ишчилерин бойыныҥ тӧгӱнине кийдирерге албаданат (Ачыл. 12:9, 12, 17). Анайда ок бистиҥ јадып турган ӧйдӧ «јаман улус ла куурмакчылар» оноҥ јаман керектер эдет (2 Тим. 3:1, 13).

³ Бу јӧрмӧлдӧ Сатана бистиҥ санаабысты «куру тӧгӱнле» канайып булгап саларга умзанат деп шӱӱжип ийерис. Анайда ок «кӧрмӧстиҥ куурмакту керектериниҥ» кезигин билип аларыс (Еф. 6:11). Келер јӧрмӧлдӧ дезе Сатананыҥ телекейиниҥ каршулу салтарынаҥ коруланарга нени эдери керегинде шӱӱжилер. Је озо баштап израильтяндардыҥ Берер  болгон јерге кирип келерде Сатанага канайып тӧгӱндеткенин билип алактар. Бу бисти неге ӱредет?

4—6. Јаҥды такыганы 11:10—15-те бичилгениле, Израиль албатыга Кудайдыҥ берген јеринде неге эптежерге келишкен?

⁴ Сатана израильтяндарды сӱмелеп тӧгӱндеп саларда, олор тӧгӱн кудайларга бажырып баштаган. Ол мыны канайып эткен? Сатана бойыныҥ амадузын бӱдӱрерге, израильтяндардыҥ аш-курсак ӧскӱрип азыранатан керексиништерин тузаланган. Израиль албаты Кудайдыҥ берген јерине једип келерде, олорго кыра ижиниҥ јаҥы эп-аргаларына ӱренерге келишкен. Египеттеги јалаҥдар Нил суула сугарылган, је Кудайдыҥ берген јеринде андый јаан суу болбогон, оныҥ учун кыраачыларга јаҥмырлу ӧйлӧргӧ лӧ чалын тӱжерине иженерге келишкен. (Јаҥды такыганы 11:10—15 кычырыгар *; Иса. 18:4, 5.) Олорго мындый эп-аргаларга ӱренерге јеҥил болбогон, нениҥ учун дезе кыра ижин билер болгон улустыҥ кӧбизи чӧлдӧ божоп калган.

⁵ Иегова израильтяндарга јаҥы айалгаларга эптежерге келижер деп айткан. Иегованыҥ оноҥ арыгы айткан сӧстӧринде озо баштап кыра ижи керегинде айдылбай турган деп билдирген. «Ајарыҥкай болугар, слердиҥ јӱректеригер ченелтеге јайылып,  менеҥ туура јӱрбезин деп, ӧскӧ кудайларга эҥчейип бажырбагар» (Јаҥ. т. 11:16, 17). Иегова нениҥ учун кыра ижиниҥ јаҥы эп-аргалары керегинде айдып тура, израильтяндарды тӧгӱн кудайларга бажырбагар деген?

⁶ Иегова Израиль албатыны ондогы айалгаларда кыра ижине ӱренип аларга, одоштой јаткан албатыларга баштанарга кӱӱнзеер деп, озодоҥ билген. Ол албатылар кыра иш јанынаҥ ченемелдӱ болгон, оныҥ учун израильтяндарды кӧп немеге ӱредип салар эди. Је мында кӧрӱнбес тузак бар болгон. Нениҥ учун дезе Ханаан јериниҥ кыраачылары Ваалга бажырып, бойыныҥ кудай-јаҥыныҥ кӧрӱм-шӱӱлтезиле јӱрген. Олордыҥ санаазыла болзо, јаҥмырды теҥериниҥ бийи — Ваал берет. Оныҥ учун Иегова бойыныҥ албатызын олордыҥ јастыра кӧрӱмине кирип калбазын деп кӱӱнзеген. Је израильтяндар тӱҥей ле Ваалга бажырып туратан (Тоол. 25:3, 5; Јарг. 2:13; 1 Каан. 18:18). Сатана олордыҥ санаазын канайып булгап салган?

7. Израиль албатыда Кудайдыҥ берер болгон јеринде кандый ченелте болгон?

⁷ Сатананыҥ баштапкы эп-аргазы кандый болгон? Ол израильтяндардыҥ јакшы сугарылып турган јерге јадарга кӱӱнзегениле ойногон. Эт-канныҥ мындый керексинижинде бир де јаман неме јок. Израильтяндардыҥ јер ажыныҥ тӱжӱми, ол эмезе бастыра јӱрӱми, јаҥмырлу ӧйлӧрдӧҥ камаанду болгон. Андый ӧйлӧр ӱлӱрген айдаҥ ала башталатан. Ханаан јерде кандык айдыҥ учынаҥ ала сыгын айдыҥ учына јетире јаҥмыр чек ас јааган. Оныҥ учун Сатана, олорды јакшы јӱрӱм кӱӱнзеп турган болзо, ӧскӧ албатылардыҥ чӱм-јаҥдарын алынар керек деп меке тӧгӱниле бӱдӱмјилеп салган. Је бу албатылардыҥ бӱткениле, кудайлар јаҥмырды јӱк ле кандый бир чӱм-јаҥдарды эткен кийнинеҥ ийет. Мынаҥ улам Иеговага бӱдери ас болгон израильтяндар кӱйгек турган ӧйдӧ, Ваалга учурлалган чӱм-јаҥдар этсе јаҥмыр јаар деп бӱде берген.

8. Сатананыҥ экинчи эп-аргазы кандый болгон?

⁸ Сатананыҥ экинчи эп-аргазы — израильтяндардыҥ кинчектӱ кӱӱнин кӱйбӱредери. Язычниктердиҥ кудайларына бажырарында балыр керектер эдилетен, ол тоодо ӧргӧӧдӧ эр ле ӱй улустыҥ проституциязы болгон. Язычниктер гомосексуализмди ле балыр јӱрӱмниҥ ӧскӧ дӧ бӱдӱмдерин јаман кӧрбӧйтӧн! (Јаҥ. т. 23:17, 18; 1 Каан. 14:24). Олор балыр чӱм-јаҥдарды, бойлорыныҥ кудайларыныҥ јарадузын аларга ла арбынду тӱжӱм јууп аларга эткен. Бу чӱм-јаҥдар кӧп израильтяндарга јарай берерде, олор тӧгӱн кудайларга бажырып баштаган. Анайып, Сатана олордыҥ санаазын ээлеп алган.

9. Осия 2:16, 17-ле болзо, Сатана Иегова керегинде израильтяндардыҥ кӧрӱмин канайып булгап салган? (Сносканы кӧрӱгер.)

⁹ Сатананыҥ ӱчинчи эп-аргазы — израильтяндардыҥ Иегова керегинде кӧрӱмин булгап салары. Иеремияныҥ ӧйинде Иегова, тӧгӱн судурчылар израильтяндарды Кудайдыҥ адын «Ваалдаҥ улам» ундыдып салган деп айткан (Иер. 23:27). Израильтяндар Кудайдыҥ адын тузаланбай барып, оны Ваал деп атка солып алган. Бу аттыҥ учуры «ээзи» эмезе «бийи» дегени. Мынаҥ улам израильтяндар Иегованыҥ ла Ваалдыҥ башказын кӧрбӧй барала, Иеговага бажырарын ла Ваалга бажырарын кошмоктоп баштаган. (Осия 2:16, 17 * кычырыгар *.)

10. Сатана бӱгӱнги кӱнде кандый эп-аргаларла тузаланат?

¹⁰ Сатананыҥ тузаланып турган эп-аргалары солынбаган. Бӱгӱнги кӱнде Сатана улустыҥ санаазын ээлеп аларга, олордыҥ эт-каныныҥ керексиништериле ойноп, балыр, кей јӱрӱмге кӱӱнзедет, анайда ок улустыҥ Иегова керегинде кӧрӱмин булгап салат. Озо баштап калганчы эп-арганы шӱӱжип ийектер.

11. Сатана улустыҥ Иегова керегинде кӧрӱмин булгаарга нени эдет?

¹¹ Сатана улустыҥ Иегова керегинде кӧрӱмин булгап салат. Элчилер божоп каларда, бойлорын христиандар деп аданып тургандар тӧгӱн ӱредӱлер таркадып баштаган (Ап. ижи 20:29, 30; 2 Фес. 2:3). Анайып олор Кудай керегинде чындыкты булгап салган. Темдектезе, библиялык колбичимелдердиҥ копияларын эдип тура, олор Кудайдыҥ адын јоголтып, оны «Кайракан» ла «Кудай» деп титулдарга солыган. Мынаҥ улам кычыраачыларга Иегова ӧскӧ «кудайлардаҥ» незиле башка болуп турганын оҥдоорго кӱч болгон (1 Кор. 8:5). Јана баскан улус Иегованы да, Иисусты да Кайракан деп адап турарда, улус Иегованы — Ада Кудай, Иисусты — Кудайдыҥ Уулы деп ылгаштырбай барган (Иоанн 17:3). Мындый булгалыштаҥ улам Кудайдыҥ Сӧзинде айдылбаган Ӱчӱлик керегинде ӱредӱ табылган. Учы-учында кӧп улуска Кудай керегинде чындык — оҥдоп болбос јажыт болуп калган. Анайып Сатана улусты кӧк-тӧгӱниле тӧгӱндеп салган (Ап. ижи 17:27).

12. Тӧгӱн кудай јаҥ нени токтотпой јат ла Римдегилерге 1:28—31-ле болзо, бу неге экелет?

¹² Сатана улустыҥ кинчектӱ кӱӱнин кӱйбӱредерге албаданат. Јебрен ӧйдӧ Сатана Иегованыҥ албатызын балыр керектерге кийдирерге, тӧгӱн кудай јаҥла тузаланган. Бӱгӱнги кӱнде ол анайып ла эдет. Тӧгӱн кудай јаҥдар балыр јӱрӱм јӱрерин токтотпой јат, керек дезе оны јарадып та јат. Мынаҥ улам кӧп улус, Кудайга бӱдӱп турган деп айдып турган да болзо, Агару Бичикте јарт бичилген ак-чек болорыныҥ нормаларын бӱдӱрбей барган. Элчи Павел римдегилерге бичиген самаразында бу нормаларды бӱдӱрбегени неге экелип турганын бичип салган. (Римдегилерге 1:28—31 кычырыгар.) Павелдиҥ бичиген јаман керектерине балыр кылыктыҥ ончо бӱдӱмдери, ол тоодо гомосексуализм кирет (Рим. 1:24—27,  32; Ачыл. 2:20). Биске, Кудайдыҥ ишчилерине, Агару Бичиктиҥ јарт ӱредӱлериле јӱрер керек.

13. Сатана база кандый эп-арга тузаланат?

¹³ Сатана улустыҥ эт-каныныҥ керексиништериле ойнойт. Биске бойысты эмезе билегисти јеткилдеерге, неге-неге ӱренип алар керек (1 Тим. 5:8). Андый ӱредӱни школдо јакшы ӱрензе аларга јараар. Је мында чочыду бар. Нениҥ учун дезе кӧп ороондордыҥ образованиезиниҥ системазы јииттерге неге-неге ӱренип аларга болужып турган да болзо, олорды Сатананыҥ телекейиниҥ кӧрӱмине база ӱредип јат. Мынаҥ улам олор Кудайдыҥ барында алаҥзып, Агару Бичикке бӱтпей барат. Анайда ок олорды јӱрӱмниҥ башталганын јӱк ле эволюция чын јартап турган деп бӱдӱмјилеп салат (Рим. 1:21—23). Бу ончо неме «Кудайдыҥ ойгорлыгына» келишпей јат (1 Кор. 1:19—21; 3:18—20).

14. Бу телекейдиҥ ойгоры неге кӱӱнзедет?

¹⁴ Бу телекейдиҥ кӧрӱми Иегованыҥ чындык нормаларына келишпей јат. Бу кӧрӱм кижини Кудайдыҥ тыныныҥ тӱжӱмине кирип турган кылык-јаҥга эмес, је «эт-канныҥ керектерине» ӱредет (Гал. 5:19—23). Мынаҥ улам улус улуркак ла бийиркек болуп, «јаҥыс бойын» сӱӱп баштайт (2 Тим. 3:2—4). Мындый кылык-јаҥ Кудайдыҥ бойыныҥ ишчилеринеҥ кӧрӧргӧ турган јобош кылык-јаҥга чек келишпей јат (2 Сам. 22:28). Кезик христиандар бийик ӱредӱ алып, Сатананыҥ телекейиниҥ кӧрӱмин алынып алган. Бир тем кӧрӱп ийектер.

15, 16. Бир эјениҥ теми слерди неге ӱредет?

¹⁵ 15 јылдаҥ ажыра ӧйин толо берип иштеп турган бир эје мынайып айдат: «Керечил  болуп турала, бийик ӱредӱге ӱренеринде кандый тузактар барын билген де болзом, олорды ајаруга албай туратам. Мен ол тузактарга тӱшпезим деп бодогом». Учы-тӱбинде не болды? Ол куучындайт: «Ӱредӱге коркышту кӧп ӧй лӧ ийде-кӱч барган, оныҥ учун узак мӱргӱӱрге ийде-кӱчим јетпей туратан. Тыҥ арыганымнаҥ улам јарлаарга да, туштажуларга да јакшы белетенерге чыдалым јетпейтен. Је ӱредӱ Иеговала колбуларыма чаптыгын јетирет деп оҥдоп ийеле, јӱрӱмимди солыыр керек деп сананып алгам. Оныҥ учун университеттеҥ јӱре бергем».

¹⁶ Университетте ӱренгени эјениҥ кӧрӱмине кандый салтарын јетирген? Эје куучындайт: «Айдарга да уйатту, је мен улустыҥ, анчада ла ака-эјелердиҥ, јӱк ле јастыраларын кӧрӱп баштагам. Мен олордоҥ ӧткӱре кӧпти сакып, олорго јаан јууктабай туратам. Мындый кӧрӱмимди солыырга, ас эмес ӧй керек болгон. Анайып, мен теҥеридеги Адабыстыҥ бойыныҥ организациязы ажыра берип турган јӧптӧрин керекке албай турары јеткерлӱ деп оҥдоп алгам. Иегова мени бойымнаҥ јакшы билген. Оны угар керек болгон!»

17. а) Биске нени шӱӱп алар керек? б) Келер јӧрмӧлдӧ нени шӱӱжерис?

¹⁷ Сатана слердиҥ санаагарды «ойгор айдыныштарла [философия], куру тӧгӱнле» ээлеп албазын. Ого тӧгӱндетпегер! (1 Кор. 3:18; 2 Кор. 2:11). Ол слердиҥ Иегова керегинде кӧрӱмигерди булгап салбазын. Кудайдыҥ бийик ак-чек нормаларыла јӱригер. Иегованыҥ јӧптӧрин угуп туругар. Је слерге Сатананыҥ кандый бир кӧрӱми кирип калган болзо, нени эдер керек? Келер јӧрмӧлдӧҥ, тереҥ тазылданып калган кылык-јаҥнаҥ ла кӧрӱмнеҥ айрыларга, Кудайдыҥ Сӧзи канайып болужып турганын билип аларыс (2 Кор. 10:4, 5).