1. Inoñnaga ni kaat Kôlôsé 2:4, 8, lelaa Satan a nyéñ yoña mahoñol més?

SATAN a ngwés le di kôm Yéhôva mbus. Inyu yônôs njômbi yé, a nyéñ ôbôs mahoñol més, a ngwés ki tinde bés i kôna mahoñol mé inyu boñ le di nôgôl nye. A nyéñ tinde bés, tole lôk bés ni mam ma nla yoña bés.​—Añ Kôlôsé 2:4, 8.

2-3. (a) Inyuki di nlama yoñ yihe ni mabéhna ma mpémél i kaat Kôlôsé 2:8? (b) Kii di ga tehe munu yigil ini?

² Baa i yé toi maliga le Satan a yé le a yumus bés? Ñ! Bigda le Paul a bi tilna bé mabéhna mé di nléba i kaat Kôlôsé 2:8 inyu i bet ba ta bé bikristen. I bet a tilna ba bé minhook mi bikristen. (Kôlôsé 1:2, 5) Satan a bi la yumus bikristen bi ngéda i, yak bés di nla kwo mu i hiandi hi i len ini. (1 Korintô 10:12) Inyuki? Inyule Satan a bi léña hana ’isi, ni le bôlô yé bisu i yé i noode yumus bagwélél ba Djob. (Masoola 12:9, 12, 17) Ni ki le, di niñil i ngéda bibéba bi bôt ni bôt ba mandon ba nke ndigi ni bisu i ‘hol ikété béba, hol ni hol.’​—2 Timôtéô 3:1, 13.

³ Munu yigil ini, di ga tehe lelaa Satan a ngwélél “biyôglô bi malôga” inyu yoña mahoñol més. Di ga pôdôl “dipa” tjé diaa. (Éfésô 6:11) I yigil i noñ ha, di ga tehe lelaa di nla yémbél mahoñol mabe Nsohop a nsômbôl jubus ikété mahoñol més. Pog, di béñge biniigana di nla ôt mu kiki Satan a bi yumus bon ba Israel i ngéda ba bi jôp i Hisi hi Likak.

4-6. Inoñnaga ni Ndiimba Mbén 11:10-15, mambe makeñge ma nson u wom bon ba Israel ba bé lama nigil ngéda ba bi bol i Hisi hi Likak?

⁴ Ni mandon, Satan a bi noode tinde bon ba Israel i bégés bisat. Lelaa hala? A bi tehe le ba bééna ngôñ ni bijek. Ngéda bon ba Israel ba bi jôp i Hisi hi Likak, ba bé lama héñha likeñge jap li nson u ’isi. Ngéda ba bé i Égiptô, bon ba Israel ba bé yôñôl malép i Nil inyu kôp i nwom nwap. Ndi i Hisi hi Likak ba bé ôt bé malép i lom inyu lona mo i nwom, ndi nop ni manwee gwon bi bé hôla bo inyu nwom nwap. (Añ Ndiimba Mbén 11:10-15; Yésaya 18:4, 5) Jon bon ba Israel ba bé lama nigil makeñge ma mondo ma nson u wom. Hala a bé bé jam li ntomb inyule libim li bôt li li bé yi nson u wom li bi wo ñoñ.

⁵ Yéhôva a bi kal litén jé le mam ma bé lama héñha. I mbus a kônde mabéhna mape ma ma bé le ma nene wee ma gwé bé maada mo ki mo ni bôlô i wom: “Yoña yihe ni bébomede, i tiga le miñem minan mi lôgba, ni yék njel, ni kahal gwélél banyambe bape, ni ôôp letee ni ’isi bisu gwap.” (Ndiimba Mbén 11:16, 17) Inyuki Yéhôva a bi béhe bon ba Israel le ba bégés bañ bikwéha bi mop ki le a bé pôdôl makeñge ma mondo ma nson u ’isi?

⁶ Yéhôva a bé yi le bon ba Israel ba bé le ba bana ngôñ i nigil makeñge ma nson u ’isi ma biloñ bi bi haiden bi bé kéña bo. I yé maliga le biloñ bi, bi bé yi ngandak makeñge inyu nson u ’isi iloo bon ba Israel, ni le litén li Djob li bé le li nigil makeñge map mape, ndi hiandi hi bé mu. Bôt ba Kanaan ba bé bégés  Baal, ba noñok matiñ mé. Ba bé hoñol le Baal nyen a yé nwet ngii, ni le nyen a bé nôh nop. Yéhôva a bé gwés bé le bikwéha bi biniigana bi, bi yoña litén jé. Ndi ngoo le, i bi pam ngandak ngélé le bon ba Israel ba pohol i bégés Baal. (Ñañga bôt 25:3, 5; Bakéés 2:13; 1 Bikiñe 18:18) Nano, di tehe lelaa Satan a bi yilha bon ba Israel minkol nwé.

7. Lelaa hémle i bon ba Israel i bi wéna ngéda ba bi jôp i Hisi hi Likak?

⁷ Hipa hi bisu Satan a bi gwélél hi bé ngôñ yap i tehe banop. Hiki nwii i Hisi hi Likak, bon ba banop ba bé kwo ibôdôl mamélél ma sôñ Matôp ikepam i sôñ Dipos. Inyu boñ le bon ba Israel ba niñ loñge, ni le bijek bi bôl, ba bééna ngôñ ni banop ba ba bé bôdôl i sôñ Biôôm. Satan a bi tinde bo i hoñol le inyu boñ le ba bana ngandak bijek, ba bé lama kôna bilem bi biloñ bi bé kéña bo. Bôt bap ba libôk ba bé hoñol le, inyu boñ le nop a no, ba bé lama sémél mop map bisesema. Bon ba Israel bahogi ba ba bééna bé hémle i ngui, ba bé hoñol le hala a bé mpom njel inyu hubus ngéda sép i i bé lôôha nom, jon ba bé boñ ngim mam inyu bégés Baal.

8. Himbe hipa hipe Satan a bi gwélél? Toñol.

⁸ Satan a bi gwélél hipa hi yônôs hiba inyu yumus bon ba Israel. A bi gwélél ngôñ ibe i malal inyu lop bo. Ngéda matén ma bihaiden ma bé bégés mop map, ma bééna maboñok ma nyega malal. Bôlôm ni bôda ba bé bomna i témpel inyu mpuñgu u ndéñg. Mintén mi malal ma nyega nwominsôna mi bé kunde, kiki bo malal ipôla bôda, ni bôda ni bôlôm ni bôlôm! (Ndiimba Mbén 23:17, 18; 1 Bikiñe 14:24) Bihaiden bi bé hoñol le bibégés bi, bi bé tinde mop map i boñ le nkoñ wap u ha ngandak bijek. Malal ma nyega ma ma bé bôña mu bibégés bi, ma bé tinde bon ba Israel i gwélél bikwéha bi mop. Ni maliga, ba bi yila minkol mi Satan.

9. Inoñnaga ni Hôséa 2:16, 17, lelaa Satan a bi kôde litehge bon ba Israel ba bééna inyu Yéhôva?

⁹ Satan a bi gwélél hipa hi yônôs hiaa. A bi kôde litehge bon ba Israel ba bééna inyu Yéhôva. I dilo di mpôdôl Yérémia, Yéhôva a kal le bapôdôl ba bitembee ba bi tinde litén Jé i hôya jôl Jé “inyu Baal.” (Yérémia 23:27) I nene le litén li Djob li bi waa gwélél jôl li Yéhôva ba héñha jo ni li Baal, li li nkobla le “Nwet” tole “Malét.” Liboñok li, li bi kôde litehge li bon ba Israel kayéle ba yi ha bé boñ maselna ipôla Yéhôva ni Baal, kayéle i bé jam li ntomb i pôdna bibégés bi Baal ni bi ba bé ti Yéhôva.​—Añ Hôséa 2:18, 19.

10. Dimbe dipa Satan a ngwélél i len ini?

¹⁰ Satan a ngwélél minlélém mi dipa i len ini. A ngwélél ngôñ bôt ba binam ba bi gwééna inyu kwéha bo mu dipa tjé, a nhôñôs malal ma nyega, a kôdhak litehge li bôt inyu Yéhôva. Di béñge hipa hi nsôk.

11. Lelaa Satan a nkôde litehge bôt ba gwé inyu Yéhôva?

¹¹ Satan a nkôde litehge li bôt inyu Yéhôva. I mbus nyemb baôma ba Yésu, bôt bahogi ba ba bé kadba le ba yé bikristen ba bi bôdôl tjam bikwéha bi  biniigana. (Minson mi baôma 20:29, 30; 2 Tésalônika 2:3) Batjañgbene maliga ba, ba bi bôdôl niiga bitembee inyu bañga Djob. Kiki hihéga, ba bi héñha jôl li Djob ikété Bibel ni mangédi kiki bo “Nwet.” Kiki ba bi héya jôl li Djob ikété Bibel, ba héñha jo ni “Nwet,” hala a bi boñ le basoñgol ba bé yi ha bé maselna ma yé ipôla Yéhôva ni “mop” mape ba nléba mu Bitilna. (1 Korintô 8:5) Ba bé gwélél nlélém buk le “Nwet” inyu pôdôl Yéhôva bo Yésu, kinje ndutu i boñ maselna ipôla Yéhôva bo Man wé Yésu, ni i yi le ba gwé bé tel yada. (Yôhanes 17:3) I yubda i, i boñ le biniigana bi Trinitas, bi bi ta bé ikété Bibel bi bôl. Sôk i nsôk, ngandak bôt i bi bôdôl hoñol le mut a nla bé yi Djob. Kinje tembee!​—Minson mi baôma 17:27.

12. Inoñnaga ni kaat Rôma 1:28-31, kii kwéha base i nhôñôs, ni limbe lisuk?

¹² Satan a ngwélél ngôñ ibe i malal inyu lop bés. I ngéda nlômbi Israel, Satan a bi gwélél kwéha base inyu hôñôs nyega malal. A mboñ nlélém i len ini. Kwéha base i nwas le bôt ba bana maboñok ma nyega, i nidik ki bo. Inyu hala nyen ngandak bôt i i nkadba le i ngwélél Djob i bi tjôô matiñ mé ma loñge ni béba. Ikété kaat ñôma Paul a bi tilna Lôk Rôma, a bi unda hee hala a bi sôk kena bo. (Añ Rôma 1:28-31.) Mu ikété “mam ma kôli bé” di nla sima mintén mi malal ma nyega nwominsôna, yak malal ipôla bôlôm ni bôlôm, tole ipôla bôda ni bôda. (Rôma 1:24-27, 32; Masoola 2:20) Kinje nseñ di gwé i noñ biniigana bi Bibel!

13. Himbe hipa hipe Satan a ngwélél?

¹³ Satan a ngwélél ngôñ di ngwééna inyu lop bés. Di bi gwééna ngôñ i nigil makeñge ma bôlô ma ma nla hôla bés i kôhna likala li kel ni i tééda lihaa jés. (1 Timôtéô 5:8) I yé i pam le di pohol i boñ ntandaa suklu ni i nigil ngandak inyu yônôs i ngôñ i. Ndi di nlama yoñ yihe. Ikété ngandak biloñ, baudu ba suklu ba nigil ndik bé makeñge ma bôlô, ndi yak pék i bôt ba binam. Ba ntinde  baudu ba suklu i pééna le Djob a yé ni i yan i yom Bibel i nkal. Ba niiga bo le i mut a nkal le a nyi jam a neebe le mam ma momasôna ma bi lo ni momede. (Rôma 1:21-23) I nya biniigana i, i nkolba “pék i Nyambe.”​—1 Korintô 1:19-21; 3:18-20.

14. Kii pék i bôt ba binam i nhôñôs?

¹⁴ Pék i bôt ba binam i nyan tole i nkolba matiñ ma téé sép ma Yéhôva. I nhôla bé bés i num litam li mbuu, ndik i yoñ ngaba i “minson mi minsôn.” (Galatia 5:19-23) I pék i, i ntinde bôt i ngôk ni i lipamal, hala a mboñ le ba yé ba sôk “tôñ ndigi bomede.” (2 Timôtéô 3:2-4) Bilem bi, bi yé maselna ni ñemlima, yak ni libak li suhulnyuu Djob a ngwés le bagwélél bé ba bana. (2 Samuel 22:28) Bikristen bihogi bi bi bi boñ bisuklu bikeñi bi bi bôdôl nwas le mahoñol ma bôt ba binam mon ma mma bo, he ma Djob bé. Di béñge hihéga hiada hi ñunda i yom i nla pémél bés ibale di nyoñ bé yihe ni hipa hi.

15-16. Kii i yom i bi pémél sita yada i niiga bés?

¹⁵ Mankéé nu muda wada nu a ma nom nsañal nu ngéda yosôna 15 nwii a nkal le: “Kiki me yé Mbôgi Yéhôva, me bi nigil le i boñ bisuklu bikeñi i ta bé loñge, ndi me bi loñ maôô. Me bé hoñol le biniigana bi, bi bé béñge bé me.” Mambe mandutu a bi boma? A nkal le: “Suklu i bé lôôha yoñ me ngéda ni biliya kayéle me bé nwaak ngandak, me bé la ha bé soohe Yéhôva kiki me bé boñ,  me bééna bé to ngéda i kwel mam ma Bibel ni bôt bape, me bééna ha bé ki to ngui i tibil kôôba makoda. Masoda le, ngeñ me bi tehe le ntandaa suklu i bé sômbôl nol me i pes mbuu, me nôgda le me nlama téé yo. Hala ki nyen me bi boñ.”

¹⁶ Lelaa bisuklu bikeñi a bi boñ bi bi héñha mahoñol ma i sita ini? A ntimbhe le: “Me nsôô bé kal bé le i ngandak suklu me bi boñ, i bi boñ le me bé tehe ndigi dihôha di bôt bape, téntén di bilôk bikéé bi bôlôm ni bi bôda, me bé bémlak bo iloo héga, me bagla yak ni bo. Hala a bi yoñ me ngandak ngéda inyu tjôô biniigana bi. Jam li li bi unda me le i nlôôha ba béba i yan mabéhna Tata wés nungingii a nti bés ni njel ntôñ wé. Yéhôva a bé yi me iloo kiki me bé yi memede. Éé ibale me emble nye!”

17. (a) Mambe makidik di nlama yoñ? (b) Kii di ga tehe i yigil i noñ?

¹⁷ Di yoñ makidik le kekikel “pék bôt ni biyôglô bi malôga” bi nkoñ ’isi u Satan bi yilha bañ bés minkol. Kee ni bisu i yoñ yihe ni dipa di Satan. (1 Korintô 3:18; 2 Korintô 2:11) U nwas bañ le Satan a kôde litehge u gwé inyu Yéhôva. U noñ matéak ma nyôgi ma Yéhôva inyu loñge ni béba. U nwas bañ to le Satan a lôk we kayéle u yan maéba ma Yéhôva. Ndi kii u nlama boñ ibale u nléba le mahoñol ma nkoñ ’isi unu ma mal yoña we? Yigil i noñ ha i ga unda bés lelaa Bañga i Djob i nla hôla bés i yémbél mahoñol ni bilem bi bi yé kiki “dikôya di gwét.”​—2 Korintô 10:4, 5.