1. Saashin Colosas 2:4, 8, ¿kasa naaʼinraka Satanaa süpüla numojujeʼerüin tü jülüjakat waaʼin?

SHIA keeʼireeka naaʼin Satanaa weʼrüin wayumüin nümüin Jeʼwaa. Süpüla waaʼinrüin tia, numojujeʼerüin tü jülüjakat waaʼin. Nüchajaain sukuwaʼipa süpüla wanaawain waaʼin nümaa otta süpüla waaʼinrüin tü suchuntaakat waaʼin (paashajeʼera Colosas 2:4, 8).

2, 3. (1) ¿Jamüshii woonooinjanaka sümaa tü sümakat Colosas 2:8? (2) ¿Kasa wekirajaainjatka anain sünain ekirajaayakat tüü?

² Eeshii süpüla nimeejüin waya Satanaa. Soto waaʼin nüshajüin Pablo tü pütchi suluʼukat Colosas 2:8 namüin na anoujashii chainjanakana iipünaa, na aneekuushikana nükajee chi naaʼinkai Maleiwa, nnojotsü nüshajüin shia sümüin wayuu manoujainsat (Col. 1:1, 2, 5). Eejüinjatü naaʼin naya anoujashiikana soʼu tia, wayaleekajaʼa joo wayakana, eejaleeinjatia waaʼin (1 Cor. 10:12). ¿Jamüsüche eejüinjatka waaʼin? Süka nujutunuin Satanaa saaʼumüin tü Mmakat otta shia keeʼireeka naaʼin nükayaleʼerüin na anoujashiikana nuulia Maleiwa (Alat. Map. 12:9, 12, 17). Otta müsia maaʼulu yaa, wainma na wayuu eʼrüliikana wayumüin otta na kooʼomüinkana amüin «tü ekirajaakat sünain alawaa» (2 Tim. 3:1, 13).

³ Sünain ekirajaayakat tüü, wekirajaajeerü anain tü naaʼinrakat Satanaa süpüla numojujeʼerüin tü jülüjakat waaʼin sükajee tü namakat na aküjaliikana alawaa. Wekirajaajeerü anain apünüinsü kasa nimeejaka aka wayuu (Éf. 6:11). Sünain tü wane ekirajaayakat, wekirajaajeerü anain tü waaʼinrüinjatkat süpüla nnojoluin sumojujaain tü jülüjakat waaʼin. Wekirajaa  palajana sünain tü naaʼinrakat Satanaa soʼu nimeejüin na israeliitakana suluʼu tü Mma Aapünakat namüin otta tü watüjakat sünainjee.

4-6. Saashin Deuteronomio 11:10-15, ¿kasa nekirajaainjatka anain na israeliitakana nantapa suluʼumüin tü Mma Aapünakat namüin?

⁴ Nimeejeein Satanaa na israeliitakana süpüla naʼwaajüin maleiwayaasü. Najayatüin naya soʼu choʼujaain eküülü namüin. Nantapa suluʼumüin tü Mma Aapünakat namüin ekirajaainjana naya sünain wanee jeketü sukuwaʼipa apünajaa. Jamüsüjaʼa chaa Egipto, apalajünapuʼusü wüin saaʼu tü pünajütkat sükajee tü süchikat Nilo. Aluʼusaʼa suluʼu tü Mma Aapünakat namüin na israeliitakana, nnojotsü süchi eekai miyoʼuin, anasü neʼe aʼttiee sutuma tü joojotshikat otta juyapoʼu (paashajeʼera Deuteronomio 11:10-15; Is. 18:4, 5). Makalaka nekirajaainjanain na israeliitakana sünain tü naaʼinrüinjatkat süpüla anainjatüin naʼttia. Kapüleesü namüin tia, jama nnojoliinnapain na wayuu apünajapuʼukana.

⁵ Nüküjain Jeʼwaa namüin naataitpain tü nakuwaʼipakat. Nüküjaka namüin tü nnojoluinjatkat naaʼinrüin, eesüjaʼa süpüla müin nnojotkai saaʼin sünainpünaain apünajaa tia nüküjakat. Anuu nünüiki: «Jalia jia suulia jimeejünüin aaʼin, suulia jükayalaain toulia otta suulia juʼwaajüin maleiwayaasü jee suulia jüsapainkain jia namülatuʼu» (Deut. 11:16, 17). «Jalia jia suulia juʼwaajüin maleiwayaasü», ¿jamüshiche nümaka Jeʼwaa namüin sümaa shiain nikirajüin anain naya tü naaʼinrüinjatkat süpüla anain naʼttia?

⁶ Nütüjaa aaʼu Jeʼwaa eein süpüla noʼunüin na israeliitakana namaʼanamüin na cananeokana süpüla nekirajaain sünain tü sukuwaʼipainjatkat apünajaa. Atüjashii naya wayuukana süpüleerua sukuwaʼipa apünajaa noulialeʼeya na  israeliitakana. Nnojotpejeʼe anain noʼunüle na israeliitakana namaʼanamüin. Chi maleiwa nanoujakai anain na cananeokana nia Baal, nia sülaülaka tü sirumatuʼukat otta chi aʼitirakai juya naashin. Nnojotsü nücheküin Jeʼwaa napüleerua na israeliitakana nemeejünüin. Macheʼepejeʼe naya sümüin nünüiki, kojuyatua naʼwaajüin Baal (Núm. 25:3, 5; Juec. 2:13; 1 Rey. 18:18). ¿Kasa naaʼinraka Satanaa süpüla nimeejüin na israeliitakana? Wekirajaa sünain tia.

7. Nantapa na israeliitakana suluʼumüin tü Mma Aapünakat namüin, ¿kasa naaʼinraka Satanaa süpüla nimeejüin naya?

⁷ Tü palajatkat kasa nimeejaka aka Satanaa na israeliitakana shia sükajee suchuntaain naaʼin kasa anasü, maʼaka saaʼin süʼitüinjatüin juya saaʼu napünajüin. Suluʼu tü Mma Aapünakat namüin na israeliitakana, nnojotsü jouluin maʼin juya sajaʼttiamüin aaʼuriiroʼu sünainmüinreʼeya settienpüroʼu. Anasü neʼe aʼttiee sutuma juya aʼitawaika suʼttiajee oʼutuupüroʼu. Naashin na kepiakana naʼütpünaa na israeliitakana, naʼwaajüinjana na maleiwayaashiikana süpüla süʼitüinjatüin juya. Naaʼinrüinjatü tia na israeliitakana naashin Satanaa süpüla anainjatüin nakuwaʼipa otta kachooinjatüin naʼttia. Naaʼinrüin tia na israeliita nnojoliikana eʼitaain naaʼin nünain Jeʼwaa, makalaka naʼwaajüin Baal süpüla süʼitüinjatüin juya.

8. (1) ¿Jarat tü piamakat kasa nimeejaka aka Satanaa na israeliitakana? (2) Püküja süchiki wanee sukuwaʼipa.

⁸ Tü piamakat kasa nimeejaka aka Satanaa na israeliitakana shia sükajee aʼluwajirawaa akuwaʼipaa. Na jieyuu otta na tooloyuu nnojoliikana anoujain nünain Jeʼwaa aʼluwajiraashii nakuwaʼipa saaʼu nneerü suluʼu tü aʼwaajüleekat. Naaʼinrüin tia süpüla naʼwaajüin tü maleiwayaasükalüirua. Nnojotsü mojuin namüin naya wayuukana jaleerüle wanee wayuu otta naaʼinrüle waneirua kasa sünainpünaaka aʼluwajirawaa akuwaʼipaa (Deut. 23:17, 18; 1 Rey. 14:24). Naaʼinrüin tia süpüla anainjatüin tü mmakat süpüla apünajaa naashin. Wainma na israeliita kamalainkana amüin aaʼinraa tia jee naʼwaajüin na maleiwayaashiikana. Emeejünüshii naya nutuma Satanaa.

9. Saashin Oseas 2:16, 17, ¿kasa naainjaka Satanaa süpüla nnojoluinjatüin shiʼnnaajünüin nünülia Jeʼwaa?

⁹ Tü apünüinkat kasa nimeejaka aka Satanaa na israeliitakana shia sükajee tü naaʼinrakat süpüla nnojoluinjatüin shiʼnnaajünüin nünülia Jeʼwaa. Soʼu nükalia Jeremías, nüküjain Jeʼwaa nekirajünüin na israeliitakana sünain achuntaa nünülia Baal natuma na nünüikimaajanayaakana (Jer. 23:27). Eesüjaʼa nnojorüle nachuntuin na israeliitakana nünülia Jeʼwaa, shia neʼe nachuntaka nünülia Baal, «laama», maluʼulu tia anülieekat. Saaʼin namüin na israeliitakana, niajiraʼaya neʼe Jeʼwaa chi Baal namakai. Sünainjee tia, wanaawasü tü naaʼinrakat sünain aʼwaajaa Jeʼwaa otta sünain aʼwaajaa Baal (paashajeʼera Oseas 2:16, 17 otta tü nootakat).

10. Maaʼulu yaa, ¿kasa nimeejaka aka Satanaa na wayuukana?

¹⁰ Ayatüshii nimeejüin Satanaa na wayuukana maaʼulu süka tü kasa nimeejakalü aka na israeliitakana. Nimeejüin naya sükajee tü kasa anasü suchuntaakat naaʼin, sükajee aʼluwajirawaa akuwaʼipaa otta sükajee tü naaʼinrakat süpüla nnojoluinjatüin shiʼnnaajünüin nünülia Jeʼwaa. Wekirajaa sünain palajana tü naaʼinrakat süpüla nnojoluinjatüin shiʼnnaajünüin nünülia Jeʼwaa.

11. ¿Kasa naaʼinraka Satanaa süpüla nnojoluinjatüin shiʼraajüin wayuu nünülia Jeʼwaa?

¹¹ Nnojotsü shiʼraajüin wayuu nünülia Jeʼwaa  nutuma Satanaa. Süchikijee outuin na aluwataaushikana, eeshii waneinnua anoujayaashii ekirajakana sünain alawaa (Aluw. 20:29, 30; 2 Tes. 2:3). Nnojotsü nekirajüin anain kasaichin nünülia chi Maleiwa shiimainshikai. Nnojotsü nashajüin nünülia Jeʼwaa suluʼu tü Wiwüliakat, shia neʼe nashajaka Senyotkai jee waneirua nünüliayaasü. Sutuma müin shia natuma, nnojotsü nayaawatüin aaʼu na wayuukana niale Jeʼwaa chi Senyot sümakai amüin tü Wiwüliakat (1 Cor. 8:5, TNM). Eere süshajünüin nünülia Jeʼwaa otta Jesuu, nashajüin tü pütchikat «Senyot», makalaka kapüleein sümüin wayuu shiyaawatüin saaʼu Miyoʼushin Maleiwa nuulia Jesuu jee nnojolin nayajiraain (Juan 17:3). Sünainjee tia, niajiraʼaya neʼe Maleiwa chi Nüchonkai otta chi naaʼinkai naashin na wayuukana, nnojotpejeʼe müin sünüiki tü Wiwüliakat. Otta wainma na makana nnojolin süpüla watüjaain saaʼu eein chi Maleiwai otta nnojoluin jaralüin atüjaain saaʼu jamüin nukuwaʼipa. ¡Alawaa neʼe tia namakat! (Aluw. 17:27).

12. (1) ¿Kasa tü anashiikat namüin na suluʼukana tü iküleesia nnojotkat shiimain? (2) ¿Kasa eeka sünainjee tia saashin Roma 1:28-31?

¹² Nimeejüin wayuu Satanaa sükajee aʼluwajirawaa akuwaʼipaa. Süpüla anashiinjatüin namüin na israeliitakana aʼluwajirawaa akuwaʼipaa, niʼikeʼerüin naya Satanaa sükajee tü iküleesia nnojotkat shiimain. Müsia nutuma Satanaa maaʼulu. Na suluʼukana tü iküleesia nnojotkat shiimain, anashiisü namüin tü aʼluwajirawaakalü akuwaʼipaa. Müshiijeseʼe eein na wayuu nnojoliikana wulein akuwaʼipa sümaa nanoujain nünain Maleiwa naashin. ¿Kasa eeka sünainjee tia? Nüküjain shia chi aluwataaushikai Pablo suluʼu tü karaloʼuta nüshajakat namüin na romaanokana (paashajeʼera Roma 1:28-31). Süpüshi tü kasa «mojusü jülüjakat waneepia naaʼin» shia süpüshuaʼa tü kasa sünainpünaakalü aʼluwajirawaa akuwaʼipaa, maʼaka saaʼin nuʼluwajiraain nukuwaʼipa wanee toolo nümaa wanee toolo otta wanee jierü sümaa wanee jierü (Roma 1:24-27, 32; Alat. Map. 2:20). Shiakalaka anain woonoole sümaa tü sümakat tü Wiwüliakat.

13. ¿Kasa amaa nimeejaka aka wayuu Satanaa?

¹³ Nimeejüin wayuu Satanaa sükajee tü kasa anasü suchuntaakat saaʼin. Nnojotsü mojuin waʼyataweere süpüleerua tü kasa choʼujaakat wamüin jee tü kasa choʼujaakat sümüin wapüshi. Ekirajaainjanapejeʼe waya palajana  (1 Tim. 5:8). Koleejiainjana waya otta waaʼinrüinjatü tü eʼitaanakat wapüleerua. Eeinjatpejeʼe waaʼin. Suluʼu waneirua mma, ekirajünüshii na koleejiashiikana süpüla natüjainjanain süpüleerua waneirua kasa, eepejeʼe nekirajünüle sünain alawaa (tü kanüliakat filosofía). Ekirajünüshii naya sünain nnojolin eein Maleiwa jee mojutüinjatüin namüin tü Wiwüliakat. Ekirajünüshii naya sünain nnojoluin nukumajalain Maleiwa tü kasakalüirua, eeʼiranajaasü sukuwaʼipa süka saaʼin sümüiwaʼa naashin (Roma 1:21-23). Naata tia suulia tü nümakat Maleiwa, jama niain kekiin neʼe nümüiwaʼa (1 Cor. 1:19-21; 3:18-20).

14. ¿Kasa eeka sünainjee tü alawaa ekirajünakalü anain?

¹⁴ Nnojotsü pansaain tü nikirajakalü anain Jeʼwaa naashin na ekirajakana sünain alawaa. ¿Kasa eeka sünainjee tia? Nnojotsü jaralüin jülüjain aaʼin tü akuwaʼipaa eekat nutuma chi naaʼinkai Maleiwa, shia jülüjaka neʼe naaʼin na wayuukana naaʼinrüin kasa mojusü (Gal. 5:19-23). Yaletüsü naaʼin jee aʼwaataashii suluʼu nakuwaʼipa, makalaka kapülain naaʼin nakuwaʼipa neʼe namüiwaʼa (2 Tim. 3:2-4). Niyoutapejeʼe Jeʼwaa tia wapüleerua, shia keeʼireeka naaʼin anamiain waya jee nnojoluinjatüin yaletüin waaʼin (2 Sam. 22:28). ¿Kasa nanoujalaʼa namaka anain noʼutku na wawalayuu ekirajaakana suluʼu eʼikülee miyoʼu? Nanoujalaʼa namüsü tü alawaa ekirajünakalü anain naya. Nnojotsü naapaain amaa tü nümakat Maleiwa. Wekirajaa sünain tü alatakat sümüin wanee wawala.

15, 16. ¿Kasa watüjaka sünainjee tü alatakat sümüin wanee wawala?

¹⁵ Anuu sünüiki wanee wawala, alatüirü suulia 15 juya shia sünain aʼyatawaa waneepia nümüin  Maleiwa: «Taashajeʼerapuʼuin jee taapapuʼuin süchiki tü kasa mojusü eekat süpüla sülatüin namüin na ekirajaakana suluʼu eʼikülee miyoʼu. Woutiisasü taya soʼu tia. Nnojotpejeʼe kasajatüin tamüin tia pütchikat süka müin nnojotkai tamüinjatüin shia». ¿Kasa shiʼraka sünainjee tia? Anuu sünüiki: «Nnojotsü apütaain kaʼi tapüla süpüla toʼuraajüin nümüin Jeʼwaa, shia taaʼinmaaka neʼe waneepia tekirajaain sünain tü eʼitaanakat tapüla. Aküjasü neʼe taya pütchi sooʼopünaa taaʼin sutuma mapüsain maʼin taya. Nnojotsü joo tekeraajüin tü wekirajaainjatkalü anain sünain tü outkajawaakat. Akaaʼinjaweesü taya sutuma taaʼinmaain waneepia tü ekirajünakalü anain taya suluʼu tü eʼikülee miyoʼukat. Akalüjasaʼa tooʼulaain suulia».

¹⁶ ¿Kasa jülüjaka saaʼin tü wawalakat sutuma shikirajaain suluʼu eʼikülee miyoʼu? Anuu sünüiki: «Ekirajünüsü taya sünain shiainjatüin jülüjain taaʼin tü kasa mojukat suluʼu nakuwaʼipa na waneinnua, maʼaka saaʼin tü mojukat suluʼu nakuwaʼipa na wawalayuukana, naaʼinrüinjatüin waneirua kasa kapüleeka namüin jee takayalaainjatüin noulia. Kakalia taya süpüla tooʼulaain suulia jülüjain taaʼin tia. Sünainjee tü alatakat tamüin tayaawata aaʼu mojuin maʼin nnojorüle kacheʼein waya sümüin tü nümakat Jeʼwaa wamüin sükajee tü nupueulosekat. Niʼraajüin maʼin Jeʼwaa takuwaʼipa toulialeʼeya tayakat. ¡Nnojotsüjeʼe alatüin tamüin tia taaʼinrüle tü nümakat!».

17. (1) ¿Kasa waaʼinrüinjatka suulia nimeejüin waya Satanaa? (2) ¿Kasa wekirajaainjatka anain sünain tü wane ekirajaayakat?

¹⁷ Waaʼinmajüinjatü wakuwaʼipa suulia tü nekirajakalü anain na nümaajanakana Satanaa, na ekirajüliikana sünain alawaa. Waaʼinmaja wakuwaʼipa suulia tü nimeejakalü aka waya (1 Cor. 3:18; 2 Cor. 2:11). Jalia waya naaʼin Satanaa, motojoyoo waaʼin Jeʼwaa otta tü nüchekakat wapüleerua. Woonoo sümaa tü nümakat Jeʼwaa wamüin süpüla wuleinjatüin wakuwaʼipa. Jalia waya suulia waaʼinrajüin nutuma Satanaa wanee kasa mojuka noʼuluʼu Jeʼwaa. ¿Jama washatüitpale tü jülüjakat naaʼin na manoujainsaliikana? ¿Kasa waaʼinrüinjatka? Sünain tü wane ekirajaayakat, wekirajaajeerü anain tü waaʼinrüinjatkat süpüla wasünneʼerüin tü kasa mojusü jülüjakat waaʼin otta tü kasa ichekat maʼin suluʼu wakuwaʼipa (2 Cor. 10:4, 5, TNM).