1. Otja kOvakolose 2:4, 8, Satan u kondja vi okutupukisa momuano mbu tu ripura?

SATAN u vanga kutja eṱe tu ise okusuvera Jehova. Kutja ma yenenise ondando ye ndjo, eye u kondja okurundurura omuano mbu tu ripura kokutja tu ripure omuano mbu ma vanga. Eye u kondja okutupukisa kutja tu mu kongorere, mokuungurisa oviṋa ovinanambango kweṱe.​—Lesa Ovakolose 2:4, 8.

2-3. (a) Ongwaye tji matu sokuyandja ombango kerakiza ndi ri mOvakolose 2:8? (b) Matu ke rihonga tjike morupa ndwi?

² Hapo tjiri tu ri moumba ounene wokupukisiwa i Satan? Ii, otjiperi! Zemburuka kutja, omuapostele Paulus ka tjangere erakiza ndi ri mOvakolose 2:8 kovandu mbe he ri ovakambure. Eye wa tjangere kovandu Ovakriste mba twirisiwa nombepo ondjapuke. (Kol. 1:2, 5) Ovakambure Ovakriste mbo va ri moumba, nu eṱe wina tu ri moumba ounene ndino. (1 Kor. 10:12) Ongwaye tji matu tja nao? Satan wa nakaurwa kombanda yehi, nu eye u kondja okupukisa ovakarere va Mukuru ovaṱakame. (Omavan. 12:9, 12, 17) Eṱe tu hupa momayuva ovandu ovarunde novanavineya mu ve ‘ryamena ko mouvi.’​—2 Tim. 3:1, 13.

³ Morupa ndwi, matu ke rihonga kutja Satan u ungurisa vi omambo “omapukise” okukondja okutupukisa. Matu katara ‘komatjendje,’ poo ovineya 3 vya Satan. (Ef. 6:11) Morupa ndu ma ru kongorere ko, matu ke rihonga kutja matu yenene vi okurundurura omeripura ayehe omavi nga za movineya vya Satan. Rutenga ngatu tara kutja matu yenene okurihonga tjike ohunga nomunao Satan ma pukisa Ovaisrael indu tji va za nokuhita mEhi Ekwizikwa.

4-6. Otja ku Deuteronomium 11:10-15, Ovaisrael aave sokurihonga omiano viṋe omipe vyouṱuta indu tjiva hita mEhi Ekwizikwa?

⁴ Satan wa rora Ovaisrael kutja ve rikotamene koomukuru wovisenginina. Eye wa tjita vi nao? Eye aa tjiwa kutja mave hepa ovikurya, mena ranao eye wa ungurisa otjiṋa ho kutja ve tjite imbi eye mbi ma vanga. Indu Ovaisrael tji va hita mEhi Ekwizikwa, owo ave sokurihonga omiano omipe vyouṱuta. Owo tji va ri moEngipte, Ovaisrael aave ungurisa omeva okuza monḓonḓu ndji Nil okutjatja ovikunino vyawo. Posi yokutja, mEhi Ekwizikwa kapa ri onḓonḓu onene, okutja owo aave hepa ombura okuroka nomueme kutja ve yenene okukuna ovikurya. (Lesa Deuteronomium 11:10-15; Jes. 18:4, 5) Kunao Ovaisrael aave sokurihonga omiano omipe vyokukuna. Ihi tjiri, ka tja ri otjiṋa otjipupu mena rokutja ovandu ovengi mbaave tjiwa okukuna, va ṱa mokuti onguza.

⁵ Jehova wa kahurura kovakarere ve kutja ozongaro zawo za runduruka. Eye we ve pa erakiza poutenga ndaa ri munika tjimuna kara ri notjiṋa nomakunino, nda tja: “Ritjevereye, amu ha pukisiwa kutja amu ha yepe mokukarera oomukuru vovisenginina nokurikotamena ku wo.” (Deut. 11:16, 17) Ongwaye Jehova tja rakiza Ovaisrael ohunga nomerikotameneno woomukuru wovisenginina ngunda ama hungire ohunga nokurihonga omiano vyokukuna omipe?

⁶ Jehova aa tjiwa kutja Ovaisrael mape ya ave kara nomatokero wokuyenda kovandu mbaave rikotamene kovisenginina okukerihonga omiano tjiva vyokukuna. Otjingaperi kutja, ovararanganda na wo mba va ri nondjiviro onyingi ohunga nehi romakunino momaturiro ngo nu ovakarere va Mukuru aave yenene okurihonga ovingi ku wo, posi yokutja owo a tja ve yenena okupukisiwa wina. Ovaṱuta va Kanaan  mbaave rikotamene ku Baal va suverere ongamburiro yawo ndjo. Owo aave kambura kutja eyuru ora Baal nu ongu yandja ombura. Jehova kaa vanga kutja ovakarere ve, ve pukisiwe i yomahongero woposyo ngo. Posi yokutja, Ovaisrael povikando ovingi aave toorora okurikotamena ku Baal. (Num. 25:3, 5; Ovapang. 2:13; 1  Ozomb. 18:18) Ngatu tare komiano Satan maa pukisa navyo Ovaisrael.

7. Ongamburiro yOvaisrael ya rorwa momuano uṋe indu tji va hita mEhi Ekwizikwa?

⁷ Otjineya otjitenga Satan tja ungurisa tja ri ozonḓero zovandu zokuvanga kutja ombura i roke. Ombura aihe okuza komaandero wa April nga mu Septemba ombura kai roko tjinene mEhi Ekwizikwa. Kutja Ovaisrael ve hupe nokutja ovikunwa vyawo vi hape, owo aave hepa ombura ndja i utu mu Oktoba. Satan we ve pukisa kutja ve ute okukambura kutja mave hepa okuhorera kotuzo twovandu ongondoroka na wo mbaave rikotamene kovisenginina kutja ve ṋingapare. Ovandu mbo aave kambura kutja oomukuru wawo mave yenene okurokisa ombura indu tji va kongorere otuzo tjiva. Imba mbe ha ri nongamburiro mu Jehova aave tjiti otuzo ku mukuru wotjisenginina Baal, mena rokutja aave kambura kutja tji va tjiti nao kape nokukara ourumbu.

8. Otjineya tjiṋe otjitjavari Satan tja ungurisa? Kahurura.

⁸ Satan wa ungurisa otjineya tjarwe kOvaisrael. Eye wa ungurisa ozonḓero zovandu zokuvanga okukovisa ozonḓuma zawo zonyama. Oviwaṋa vyovanavisenginina aa vi rikotamene koomukuru wawo mokutjita oruvakiro. Omerikotameneno wawo omayaukise nga, aa ye kamburire mo omerirandisiro wovakazendu novarumendu pondjuwo ondere yoomukuru wovisenginina. Omahakaeneno womonyama pokati komurumendu nomurumendu poo pokati komukazendu nomukazendu nomiano vyarwe vyotuvakiro vya ri oviṋa uriri oviyakurwa! (Deut. 23:17, 18; 1 Ozomb. 14:24) Owo aave kambura kutja omerikotameneno wawo ngo maye tunduuza oomukuru wawo okutjita kutja ehi ri ete ovikurya ovingi. Ovaisrael ovengi va nanukirwa i yomuano womerikotameneno mbo, kunao owo va toorora okukarera oomukuru woposyo. Tjiri owo va pukisirwe i Satan.

9. Otja ku Hosea 2:16, 17, otjikwaye Satan tja tjita kutja Ovaisrael ave ha munu ombangu pokati ka Jehova na Baal?

⁹ Otjineya otjitjatatu Satan tja ungurisa. Eye wa tjita kutja Ovaisrael ave ha munu ombangu pokati ka Jehova na Baal. Momayuva womuprofete Jeremia, Jehova wa hungira kutja ovaprofete voposyo va tjita kutja ovakarere ve, ve zembe ena re mena ra mukuru wotjisenginina ngwi “Baal.” (Jer. 23:27) Pe munika tjimuna ovakarere va Mukuru va isa okuungurisa ena ra Jehova nu ve ri pingenisa nena Baal, ndi heya “Omuini” poo “Omuhona.” Otjiṋa hi tja tjita kutja Ovaisrael ave ha munu ombangu pokati ka Jehova na Baal, tji tja tjita kutja i rire oupupu ku wo okuwaneka omerikotameneno wa Baal ku nomerikotameneno wa Jehova.—Lesa Hosea 2:16, 17.

10. Ovineya viṋe Satan mbye ungurisa ndino?

¹⁰ Satan u ungurisa ovineya mbyo ndino wina. Eye u pukisa ovandu mokuungurisa ozonḓero zawo, nokuhandjaura oruvakiro, nokutjita kutja ovandu ave ha munu ombangu pokati ka Jehova noomukuru varwe. Rutenga ngatu tare kotjineya ihi otjisenina.

11. Omomiano viṋe Satan me tjita kutja ovandu ave ha munu ombangu pokati ka Jehova noomukuru varwe?

¹¹ Satan u tjita kutja ovandu ave ha munu ombangu pokati ka Jehova noomukuru varwe. Kombunda yonḓiro yovaapostele va Jesus,  ovandu mbaave ri tja Ovakriste va uta okuhandjaura omahongero woposyo. (Oviung. 20:29, 30; 2 Tes. 2:3) Ovandu mba va uta okutjita kutja ovandu ave ha tjiwa Mukuru erike uatjiri. Otjotjihorera, owo va isa okuungurisa ena ra Mukuru mOzombeibela zawo nu ve ri pingenisa nomaisaneno tjimuna “Mukuru.” Indu tji va isamo ena ra Jehova na ve ri pingenisa na ‘Mukuru,’ owo va tjita kutja i rire ouzeu komulese wOmbeibela okumuna kutja Jehova wa panguka ‘koomukuru’ varwe otja tji pa tamunwa mOmatjangwa. (1 Kor. 8:5) Owo va ungurisa embo rimwe ndi “Mukuru” ku Jehova na Jesus, tji tja tjita kutja i rire ouzeu kovandu okutjiwa kutja Jehova na Jesus kavandu vemwe. (Joh. 17:3) Ombambaukisiro ndji ya eta omahongero woomukuru vetatu mumwe nu omahongero ngo ka ye ri mEmbo ra Mukuru. Mena roviṋa mbi, ovandu ovengi ve muna kutja kamaave yenene okutjiwa Mukuru. Tjiri iho otjizeze otjivi tjinene!​—Oviung. 17:27.

12. Otja tji pa kahururwa mOvaroma 1:28-31, ovikwaye ozongamburiro zoposyo mbi za handjaura, nu oviṋa mbyo vya eta tjike?

¹² Satan u ungurisa ozonḓero zovandu zokuvanga okukovisa ozonḓuma zawo zonyama. Moruveze rOvaisrael ovakuru, Satan wa ungurisa ozongamburiro zoposyo okutunduuza ovandu okutjita oruvakiro. Ndino, eye wina u tjita nao. Ozongamburiro zoposyo ze yandjera otuvakiro nu ze muna kutja otjiṋa otjiyakurwa. Ouhumandu, ovengi mbe tja ve karera Mukuru, va isa okukongorera omirari vyomeritjindiro omisemba. Omuapostele Paulus wa kahurura morutuu rwe kOvaroma ohunga nokutja ovikwaye ozongamburiro zoposyo mbi za eta mokuhandjaura oruvakiro. (Lesa Ovaroma 1:28-31.) Oviṋa tjiva mbi tu “ha sere okutjita,” vi kamburira mo otuvakiro ngamwa atuhe, tjimuna omahakaeneno womonyama pokati komurumendu nomurumendu poo pokati komukazendu nomukazendu. (Rom. 1:24-27, 32; Omavan. 2:20) Tjiri ounahepero kweṱe okukara nonḓuviro komahongero wOmbeibela omakahu nga!

13. Satan ungurisa otjineya tjiṋe tjarwe?

¹³ Satan u ungurisa ozonḓero zovandu zokuvanga oviṋa. Atuhe twa ungurwa nonḓero yokuvanga okurihonga oviungura kaaṋi kutja tu rihupise oveni nokuhupisa omaṱunḓu wetu. (1 Tim. 5:8) Povikando ovingi, tu yenene okumuna ondjiviro moviungura kaaṋi mbyo, indu tji matu i koskole nokurihonga oukukutu.  Posi yokutja matu sokukengeza. Momahi omengi, ovahongwa ve muna ondjiviro ombwa mozoskole, posi yokutja owo wina ve hongwa omapopero woposyo. Otjotjihorera, ozoskole ze tunduuza ovahongwa kutja ve ute okumuna kutja Mukuru keko nokutjita kutja ave ha kara nondengero kOmbeibela. Owo ve raerwa kutja ovandu avehe vozondunge ve kambura momahongero wokutja oviṋa kavi memenwe. (Rom. 1:21-23) Omahongero otja ingo ye vetasana otjiuru ‘nounongo ua Mukuru.’​—1 Kor. 1:19-21 EEP; 3:18-20.

14. Omapopero woposyo ye handjaura ye?

¹⁴ Oumune wovandu u pirukira poo u vetasana otjiuru nomirari vyOmbeibela omisemba. Oumune mbwi kau tunduuza ovihape vyombepo ya Mukuru nungwari u tunduuza “oviungura vyongaro youndu.” (Gal. 5:19-23) Nu wina ye tunduuza ovandu okurira overitongamise, tji tji tjita kutja ovandu ve “ripahere oveni ouwa.” (2 Tim. 3:2-4) Ozongaro otja i nḓa ze vetasana otjiuru notjikaṋena tjomerisusuparisiro Mukuru tje vanga kutja ovakarere ve ve kare natjo. (2 Sam. 22:28) Ovakriste tjiva mba ya komahongero wokombanda va uta okuripura tjimuna ouye pendje nokuripura tjimuna Mukuru. Ngatu tare kotjihorera tjimwe tjokutja otjikwaye tji mape ya a tji tjitwa indu tji tu ha yandjere ombango koumba mbwi.

15-16. Matu rihongere ko tjike kotjihorera tjomukazendu omukambure?

¹⁵ Omukazendu omukambure ngwa ri motjiungura tjokuzuvarisa oruveze aruhe oure wozombura 15, wa tja: “Otja omundu ngu mba papitisiwa, mba lesa nokurihonga ohunga nomaumba nge za momahongero wokombanda, posi yokutja hi yandjere ombango komarakiza ngo. Ee munu kutja eronga ndo kamaa ri ungura  kwami.” Eye wa muna omauzeu wa ye? Eye wa tja: “Ee ungurisa oruveze oruingi nomasa wandje okurihonga, nu hee munu oruveze rokukumba ku Jehova, hi mba ri nomasa okuyorokera omahungi wOmbeibela kuna varwe, nu ee urwa tjinene okurirongerisa kozombongarero zombongo. Indu tji mba ka muna kutja omahongero wokombanda aa ye ṱunu koupanga wandje kuna Jehova, ee tjiwa kutja hi sokukayenda komurungu. Nu mba isa omahongero ngo.”

¹⁶ Omahongero wokombanda nga ya ṱuna vi kouripura we? Eye wa zira a tja: “Mbi ṱohoṋi okuhungira kutja omahongero ngu mba toorora ye ndji honga kutja mbi yandje ombango kozondataiziro zovakambure ovakwetu, nokuundjira ko ovingi ku wo, nu wina kwa tjita kutja mbi riṱizire kokure na wo. Kwa kambura oruveze orure okuisa ouripura mbo. Otjihorera tjandje tje ndji raisira kutja okuhinokuyandja ombango komarakiza wa Tate wetu womeyuru, nge tupa okupitira motjira tje, tjiri ku tu etera oumba. Jehova ee ndji tjiwa nawa okukapita ami omuini. Andakuzu mba puratena ku ye!”

17. (a) Twe rimanene okutjita tjike? (b) Matu katara ku ye morupa ndu maru kongorere ko?

¹⁷ Ngatu rimanene okuhinokupukisiwa i ‘yomapopero woposyo nomapukise’ wouye wa Satan. O yandjere Satan okukupukisa. (1 Kor. 3:18; 2 Kor. 2:11) Nu omuyandjere okukutjita kutja u zembe kutja Jehova owaṋi nokutja Eye u vanga okurikotamenwa momuano uṋe. Kongorera omirari vya Jehova vyomeritjindiro. Nu o yandjere kutja Satan me ku tjite otjineya kutja ohakongorere omarakiza wa Jehova. Nu hapo mo sokutjita vi indu tji wa ṱunwa i youripura wouye mbwi? Orupa ndu ma ru kongorere ko maru ketu raisira omuano Embo ra Mukuru mu ri tu vatera okutanaura omeripura nozondjito zetu nandarire kutja vya ‘hahaurwa i yoviṱunga ovizeu.’​—2 Kor. 10:4, 5.