1. Ka kuya ka liñolo la Makolose 2:4, 8, Satani ulikanga cwañi kuisa munahano waluna mwa butanga?

SATANI ubata kuli lufulalele Jehova. Kacwalo, ulikanga kucinca molunahanela, ili kutahisa kuli munahano waluna ube mwa butanga mi lunahane sina mwabatela. Uitusisanga lika zelutabela hahulu kuli alukukueze kamba kulupuma, ilikuli lumulatelele.—Mubale Makolose 2:4, 8.

2-3. (a) Ki kabakalañi haluswanela kuisa hahulu mamelelo kwa temuso ye kwa liñolo la Makolose 2:8? (b) Lukanyakisisañi mwa taba ye?

² Kana luli lwakona kukeluswa ki Satani? Eni! Muhupule kuli Paulusi naasika ñola temuso ye kwa liñolo la Makolose 2:8 kwa batu bane basi balumeli. Naaiñolezi Bakreste bane batozizwe ka moya okenile. (Makolo. 1:2, 5) Bakreste bao nebaswanela kutokomela kuli basike bakeluswa, mi luna mane luswanela kutokomela hahulu nikufita. (1 Makor. 10:12) Kabakalañi? Libaka kikuli Satani unepezwi fa lifasi, mi ueza mwakonela kaufela kuli akeluse batanga ba Mulimu babasepahala. (Sin. 12:9, 12, 17) Libaka leliñwi kikuli, lupila ka nako yeo batu babamaswe ni baipumisi bazwelapili kutotobela mwa “bumaswe bwabona.”—2 Tim. 3:1, 13.

³ Mwa taba ye, lukanyakisisa mo Satani aitusisezanga “bupumi” kuli akukueze munahano waluna. Halunze lueza cwalo, lukalemuha “milelo yemaswe” yemilaalu ya Satani kamba ‘mano ahae amaswe.’ (Maef. 6:11; litaluso ze kwatasi) Mi mwa taba yetatama, lukanyakisisa molukona kufeliseza mihupulo yemaswe yelubile ni yona haiba lukukuelizwe ki Satani. Kono pili halunyakisiseñi  zanaaezize Satani kuli akeluse Maisilaele hase bakeni mwa Naha ya Sepiso ni zelukona kuituta kwa taba yeo.

4-6. Ka kuya ka liñolo la Deuteronoma 11:10-15, Maisilaele nebatokwa kueza licinceho mañi ka za mulimelo wabona hase bakeni mwa Naha ya Sepiso?

⁴ Satani ka butali naakelusize Maisilaele kuli balapele milimu ya maswaniso. Naaezize cwañi cwalo? Naaziba kuli Maisilaele nebatokwa lico; kacwalo, aitusisa muinelo wo kuli abakukueze kueza zabata. Maisilaele hase bakeni mwa Naha ya Sepiso, nebatokwa kuituta mulimelo omunca. Hane bali mwa Egepita, nebaitusisanga mezi a mwa Nuka ya Nile kuli baselaele licalo zabona. Kono mwa Naha ya Sepiso mona nekusina nuka yetuna mone bakona kukanga mezi a kuselaelisa licalo; kacwalo, nebaitingile fa mezi a pula ni puka kuli licalo zabona limele hande. (Mubale Deuteronoma 11:10-15; Isa. 18:4, 5) Kabakaleo, Maisilaele nebatokwa kuituta mulimelo omunca. Kueza cwalo nesi nto yebunolo bakeñisa kuli buñata bwa batu bane baziba kulima nebashwezi mwa lihalaupa.

⁵ Jehova naataluselize batu bahae kuli miinelo yabona neicincize. Mi hasamulaho, abafa temuso yenekona kubonahala inge kuli neisa swalisani ni litaba za musebezi wa njimo, yeli: “Mutokomele kuli musike mwatuhelela lipilu zamina kupumiwa kuli mulapele milimu isili ni kuikubamela.” (Deut. 11:16, 17) Ki kabakalañi Jehova hanaa balemusize kuli basike balapela milimu ya buhata hanaa bataluseza kuli baswanela kuituta mulimelo omunca?

⁶ Jehova naaziba kuli Maisilaele nebaka bata kuituta mulimelo omunca kwa batu bane bapila bukaufi ni bona, ili bane balapela milimu ya buhata. Ki niti kuli batu bao nebaziba kulima  kufita Maisilaele, mi batu ba Mulimu nebaka ituta litaba zende zeama musebezi wa njimo kwa batu bao, kono kueza cwalo hape nekukona kutahisa kuli Maisilaele bakene mwa butata. Balimi bao bane bali Makanana nebalapela Baale, mi nebaanga lika ka kuya ka litumelo zabona. Nebalumela kuli Baale neli yena muñaa lihalimu ni kuli ki yena yanaatahisanga pula. Jehova naasatabeli kuli batu bahae balumele litumelo za buhata zeo. Niteñi, Maisilaele nebakuta-kutezi kulapela Baale. (Num. 25:3, 5; Baat. 2:13; 1 Mal. 18:18) Cwale halunyakisiseñi zanaaezize Satani kuli aise Maisilaele mwa butanga.

7. Tumelo ya Maisilaele neilikilwe cwañi hase bakeni mwa Naha ya Sepiso?

⁷ Nzila yapili yanaaitusisize Satani kuli aise Maisilaele mwa butanga, neli kuitusisa takazo yabona yesika fosahala ya kuli pula iselaele licalo zabona. Mwa Naha ya Sepiso, pula neisa nelangi hahulu kuzwa kwa mafelelezo a April kuisa mwa September, silimo ni silimo. Batu nebaitingile fa pula yenekalanga mwa October kuli babe ni lico zeñata. Satani naapumile Maisilaele kuli balumele kuli nebakaba ni lico zeñata hane bakaikenya mwa lizo za batu bane bapila bukaufi ni bona, ili bane balapela milimu ya buhata. Batu bao nebalumela kuli milimu yabona neika tahisa pula haiba baeza lizo zabona za bulapeli. Maisilaele bane basina tumelo ku Jehova nebanahanile kuli kuikenya mwa lizo zeo nekuka tusa kuli kusike kwaba ni linanga ka nako yetelele; kacwalo, baikenya mwa lizo zeo mi balapela mulimu wa buhata Baale.

8. Ki nzila ifi yeñwi yanaaitusisize Satani kuli aise Maisilaele mwa butanga? Mutaluse.

⁸ Satani hape naaitusisize nzila yeñwi kuli aise Maisilaele mwa butanga. Naabakukuelize kuli baikenye mwa muzamao wa buhule. Macaba anaapila bukaufi ni bona naalapelanga milimu yaona ya buhata ka kueza buhule bobunyenyisa. Baana ni basali nebaezanga buhule kwa tempele. Kalombe ni mifuta yemiñwi ya buhule neilumelezwa, mi muzamao wo neuungiwa kuli hausika fosahala. (Deut. 23:17, 18; 1 Mal. 14:24) Batu bane balapela milimu ya buhata bao nebalumela kuli kuikenya mwa muzamao wo nekususueza milimu yabona kutahisa kuli mubu wa mwa naha yabona ube ni mununo. Maisilaele babañata nebahapilwe ki lizo za buhule za batu bao; kabakaleo, bakala kulapela milimu ya buhata. Ka kueza cwalo, Satani abaisa mwa butanga.

9. Ka kuya ka liñolo la Hosea 2:16, 17, Satani naatahisize cwañi kuli Maisilaele balibale Jehova?

⁹ Satani naaitusisize nzila yeñwi yabulaalu kuli aise Maisilaele mwa butanga. Naatahisize kuli Maisilaele balibale Jehova. Ka nako yanaapila mupolofita Jeremia, Jehova naatalusize kuli bapolofita ba buhata nebatahisize kuli batu bahae balibale libizo lahae “kabakala Baale.” (Jer. 23:27) Batu ba Mulimu nebatuhezi kuitusisa libizo la Jehova mi baliyolisa ka libizo la Baale, ili lelitalusa “Muñaaka.” Kuitusisa libizo leo nekuka tahisa kuli kubele taata Maisilaele kuziba shutano ye mwahalaa Jehova ni Baale, mi nebakona kuikenya mwa lizo za batu bane balapela Baale ka kuunga kuli balapela Jehova.—Mubale Hosea 2:16, 17 ni litaluso ze kwatasi.

10. Ki linzila mañi zaitusisanga Satani kacenu kuli akeluse batu?

¹⁰ Ni kacenu, Satani uitusisanga linzila zeswana kuli akeluse batu. Utahisanga kuli batu baeze zalata ka kuitusisa litakazo zabona zesika fosahala, kubakukueza kuli baikenye mwa  muzamao wa buhule, ni kutahisa kuli balibale Jehova. Pili halunyakisiseñi zaezize Satani kuli batu balibale Jehova.

11. Satani utahisize cwañi kuli batu balibale Jehova?

¹¹ Satani utahisize kuli batu balibale Jehova. Baapositola ba Jesu hase bashwile, batu babañwi bane baipapata kuba Bakreste bakala kuhasanya lituto za buhata. (Lik. 20:29, 30; 2 Mates. 2:3) Bakwenuheli bao nebatahisize kuli batu basike baziba Mulimu anosi wa niti. Ka mutala, nebazwisize libizo la Mulimu mwa Libibele zabona mi baliyolisa ka manzwi acwale ka “Mulena.” Kuzwisa libizo la Mulimu ni kuliyolisa ka linzwi la “Mulena,” nekutahisize kuli batu bane babala Bibele bapalelwe kuziba shutano ye mwahalaa Jehova ni “malena” babañwi bababulezwi mwa Bibele. (1 Makor. 8:5) Nebaitusisize linzwi la “Mulena” kuama ku Jehova ni Jesu, mi kueza cwalo nekutahisize kuli batu basike baziba kuli Jehova ni Mwanaa hae bashutana, mi maata abona ashutana. (Joa. 17:3) Taba yeo neitahisize kuli batu bakale kulumela tuto ya silaalu, ili tuto yesayemelwi ki Linzwi la Mulimu. Kabakaleo, batu babañata balumela kuli hakukonahali kuziba Mulimu. Yeo ki taba ya buhata luli!—Lik. 17:27.

12. Bulapeli bwa buhata bususueza batu kuezañi, mi ka kuya ka liñolo la Maroma 1:28-31, ki lika mañi zezwile mwateñi?

¹² Satani ukukuezanga batu kuli baikenye mwa muzamao wa buhule. Mwa linako za Isilaele wa kwaikale, Satani naaitusisize bulapeli bwa buhata kuli asusueze batu kuba ni muzamao omaswe. Ni kacenu, usaeza nto yeswana. Bulapeli bwa buhata butuhelelanga batu babaswalisana ni bona kuikenya mwa muzamao wa buhule, mi mane bubasusueza kueza cwalo. Kabakaleo, batu babaipapata kuli balapela Mulimu batuhezi kulatelela likuka zahae za muzamao. Muapositola Paulusi naatalusize zezwile mwa kueza cwalo mwa liñolo lahae lanaañolezi Bakreste ba mwa Roma. (Mubale Maroma 1:28-31.) Mwa liñolo leo naatalusize kuli zezwile mwateñi ki “lika zesaswaneli,” mi lika zeo likopanyeleza mufuta kaufela wa muzamao wa buhule inge cwalo kalombe. (Maro. 1:24-27, 32; Sin. 2:20) Kacwalo, ki kwa butokwa kuli lulatelele zeluituta mwa Bibele.

13. Ki nzila ifi yeñwi yaitusisanga Satani kuli aise batu mwa butanga?

¹³ Satani uswasanga batu ka kuitusisa litakazo zabona zesika fosahala. Kaufelaa luna lubatanga kuituta musebezi omuñwi kuli lukone  kufumana lika zelutokwa ni zatokwa mabasi aluna. (1 Tim. 5:8) Hañata, kuli luzibe mwakuezeza musebezi omuñwi, lutokwanga kuya kwa sikolo ni kuba baituti babande. Kono luswanela kutokomela. Mwa linaha zeñata, batu kwa likolo habalutiwangi feela mwakuezeza musebezi, kono hape balutiwanga ni butali bwa batu. Ka mutala, baituti basusuezwangwa kulumela kuli Mulimu haayo mi habaswaneli kukuteka zeibulela Bibele. Batalusezwangwa kuli batu kaufela babanani butali balumela kuli lika litile ka kuipilaula. (Maro. 1:21-23) Lituto zecwalo, lilwanisa “butali bwa Mulimu.”—1 Makor. 1:19-21; 3:18-20.

14. Butali bwa lifasi bususueza batu kuezañi?

¹⁴ Butali bwa lifasi bulwanisa likuka za Jehova zelukile. Habususuezi batu kubonisa muselo wa moya wa Mulimu, kono bubasusueza kueza “misebezi ya nama.” (Magal. 5:19-23) Hape bususueza batu kuba ni buikuhumuso; kabakaleo, batu babile “baitati.” (2 Tim. 3:2-4) Moya wo ushutanela kwahule ni moya obasusuezwa kubonisa batanga ba Mulimu, ili moya wa buikokobezo. (2 Sam. 22:28) Bakreste babañwi bane baile kwa yunivesiti bakalile kunahana sina batu ba lifasi kufita kuunga lika sina mwaliingela Mulimu. Halunyakisiseñi mutala omuñwi obonisa zekona kuezahala haiba mutu yomuñwi aya kwa yunivesiti.

15-16. Muitutañi ku zeneezahezi ku kaizeli yomuñwi?

¹⁵ Kaizeli yomuñwi yabile mwa sebelezo ya nako kaufela ka lilimo zefitelela 15, utalusa kuli: “Ka kuba Paki yakolobelizwe, nenibalile ni kuikutwela litaba zeñata zebonisa lika zemaswe zekona kuezahala haiba mutu aya kwa yunivesiti, kono nenisa isangi pilu  kwa litemuso zeo. Neninahana kuli kelezo yeo neisa niami.” Kaizeli yo naakopani ni butata mañi hanaaile kwa yunivesiti? Utalusa kuli: “Neniitusisanga nako yaka yeñata ni maata aka kubala libuka za kwa sikolo kuli mane nenisina nako yeñata ya kulapela ku Jehova sina mone niezezanga sapili, mi nenikatalanga hahulu kuli mane nenisa ikolangi kukutaza ku babañwi mwa bukombwa ni kuitukiseza hande mikopano. Kono hase nilemuhile kuli mipateho ya kwa yunivesiti neifokolisa silikani saka ni Jehova, naikatulela kutuhela lituto zeo.”

¹⁶ Kuya kwa sikolo sa yunivesiti nekucincize cwañi mwanaangela lika? Kaizeli yo utalusa kuli: “Ka bumai, kuya kwa sikolo seo nekutahisize kuli nikale kunyaza-nyazanga babañwi sihulu mizwale ni likaizeli baka, nenilibelelanga kuli baeze lika zene basakoni kueza, mi hape neniikauhanyanga ku bona. Neku niingezi nako yetelele kuli nicince mone niingela lika. Zene niipumani ku zona linitusize kulemuha butata bolukona kukopana ni bona haiba lusaisi pilu kwa litemuso zalufa Ndataa luna wa kwa lihalimu ka kuitusisa kopano yahae. Jehova uniziba hande kufita moni izibela. Kambe neniteelelize ku yena, nenisike naaipumana mwa miinelo yene niipumani ku yona.”

17. (a) Luswanela kuikatulela kuezañi? (b) Lukanyakisisañi mwa taba yetatama?

¹⁷ Muswanela kuikatulela kuli hamuna kuisiwa mwa butanga “ka butali bwa lifasi ni bupumi” bwa mwa lifasi la Satani. Musike mwalumeleza Satani kumipuma. (1 Makor. 3:18; 2 Makor. 2:11) Musike mwatuhelela Satani kutahisa kuli mulibale Jehova. Mupile ka kulumelelana ni likuka za Jehova za muzamao. Mi hape musike mwalumeleza Satani kumipaleliswa kuisa pilu kwa kelezo yamifa Jehova. Kono kucwañi haiba mulemuha kuli mukukuelizwe ki mubonelo wa lifasi le? Mwa taba yetatama, lukanyakisisa mo Linzwi la Mulimu likona kumituseza kufelisa mihupulo yemaswe yemubile ni yona.—2 Makor. 10:4, 5.