1. Ekkar ñan Kolosse 2:4, 8, ewi wãween an Setan kajjioñ kõm̦akokoik l̦õmn̦ak ko ad?

SETAN ekõn̦aan bwe jen el̦l̦o̦k jãn Jeova. Bwe en tõprak kõttõpar in an, ej kajjioñ ukot l̦õmn̦ak ko ad. Ilo kõkkar, ej kajjioñ kõm̦akokoik l̦õmn̦ak ko ad im kõm̦m̦an bwe jen l̦õmn̦ak ilo wãween eo ekõn̦aan. Ej kajjioñ kareel ak m̦on̦e kõj ñan l̦oor e ikijjeen an kõjerbal men ko renaaj kareel kõn̦aan ko ad.​—Riit Kolosse 2:4, 8.

2-3. (1) Etke jej aikuj roñjake naanin kakkõl eo kar je ilo Kolosse 2:8? (2) Ta eo jenaaj etale ilo katak in?

² Jej aikuj ke lukkuun uwõta kõn an Setan naaj m̦on̦e kõj? Aet! Keememej bwe Paul ear jab je naanin kakkõl eo ilo Kolosse 2:8 ñan ro rejjab pãd ilo tõmak. Ak ear je ñan Kũrjin ro me kar kapit er kõn jetõb kwõjarjar. (Kol. 1:2, 5) Kũrjin ro ilo tõre eo rar aikuj uwõta, im kõj ilo raan kein el̦apl̦o̦k ad aikuj uwõta. (1 Kor. 10:12) Etke? Kõnke em̦õj kalbuuji Setan bwe en pãdwõt ioon lal̦ in, im kõttõpar eo an ej ñan m̦on̦e ri-karejar ro an Anij. (Rev. 12:9, 12, 17) Bareinwõt, jej mour ilo juon iien me armej ro renana im ro rejel̦ã m̦on̦ rej “l̦apl̦o̦k wõt aer nana.”​—2 Tim. 3:1, 13.

³ Ilo katak in, jenaaj etale ewi wãween an Setan kõjerbal “mel̦el̦e ko reriab” ñan kajjioñ ukot l̦õmn̦ak ko ad. Jenaaj lale jilu iaan “jerbal ko retao” ak “jerbalin m̦on̦ ko” an Setan. (Ep. 6:11; ftn.) Innem ilo katak eo tok juon, jenaaj etale ewi wãween ad jol̦o̦k jabdewõt men ko renana me emaroñ wõr ippãd itok jãn an kar Setan kõjerbal kõl ko ej kõjerbali ñan  ukot l̦õmn̦ak ko ad. Ak m̦oktata jen etale ta ko jemaroñ katak jãn wãween an kar Setan m̦on̦e ri-Israel ro ãlikin aer del̦o̦ñe Ãneen Kallim̦ur eo.

4-6. Ekkar ñan Duteronomi 11:10-15, ta kõl eo ekããl kõn kilen kallib ri-Israel ro rar aikuj katak ke rar jokwe ilo Ãneen kallim̦ur eo?

⁴ Setan ear kapoik ri-Israel ro ñan kabuñ ñan ekjab. Ewi wãween an kar kõm̦m̦ane men in? Ear jel̦ã bwe rar aikuj kijeer m̦õñã, innem ear kajjioñ kõjerbale men in ñan kapoik er. Ke ri-Israel ro rar del̦o̦ñe Ãneen Kallim̦ur eo, rar aikuj katak wãween ko rekããl kõn kilen aer kallib m̦õñã. Ke rar pãd ilo Ijipt, rar kõjerbal dãn eo jãn Reba Nile ñan jikin kallib ko aer. Bõtab, ear ejjel̦o̦k juon reba el̦ap ilo Ãneen Kallim̦ur eo ñan aer bõktok dãn jãne, innem ñan kaddek kijeer m̦õñã rar aikuj dãnnin wõt im bareinwõt an m̦õl̦awi mejatoto. (Riit Duteronomi 11:10-15, UBS; Ais. 18:4, 5) Kõn men in, ri-Israel ro rar aikuj katak kõl ko rekããl kõn kilen kallib. Enaaj kar pen men in kõnke enañin aolep ro ewõr aer jel̦ã im imminene kõn kilen kallib rar mej ilo ãne jem̦aden.

⁵ Jeova ear kwal̦o̦k ñan armej ro an bwe eoktak kiiõ wãween aer mour. Innem ear wõnm̦aanl̦o̦k wõt im ba naanin kakkõl kein me ilo jinoin jenaaj l̦ak lale rejjab ekkejell̦o̦k ñan jerbalin kallib. Ear ba: “Kom̦win lale m̦õk ñe rab kabõd bũruomi, im kom̦ij jeorl̦o̦k im karejar ñan anij ro jet, im kabuñ ñan er.” (Dut. 11:16, 17) Etke Jeova ear kakkõl er n̦ae kabuñ ñan anij waan ilo ejja iien eo wõt ear kõnono kõn aer katak kõl ko rekããl kõn kilen kallib?

⁶ Jeova ear jel̦ã bwe ri-Israel ro renaaj kar kõn̦aan katak jet kilen kallib jãn ri-peikan ro rar pãd ipel̦aakier. Em̦ool bwe el̦apl̦o̦k an kar armej rein jel̦ã kilen kallib jãn ri-Israel ro, im  armej ro an Anij remaroñ katak jãn jel̦ã ko aer, bõtab ekar wõr juon men ekauwõtata. Ri-kallib ro me rej ri-Kenan rar kabuñ ñan Beal im kabuñ eo aer ear jelõt wãween aer l̦õmn̦ak. Rar watõk Beal bwe ej anij in lañ im eo ej letok wõt. Jeova ear jab kõn̦aan bwe armej ro an ren po ilo tõmak kein rejjab m̦ool. Bõtab, elõñ alen ri-Israel ro rar kããlõt ñan kabuñ ñan Beal. (Bõn. 25:2, 3, 5, UBS; Eka. 2:13; 1 Kñ. 18:18) Jen kiiõ lale ewi wãween an kar Setan maroñ bõk ri-Israel ro bwe ren an ri-kõm̦akoko.

7. Ta men eo ear mãlejjoñe tõmak eo an ri-Israel ro ke rar del̦o̦ñe Ãneen Kallim̦ur eo?

⁷ Ta kõl eo kein kajuon Setan ear kõjerbale ñan m̦on̦e ri-Israel ro? Ear kareel kõn̦aan eo aer ejjel̦o̦k nana ie ñan loe an wõt ãneo. Elukkuun kar dik an wõt ilo Ãneen Kallim̦ur eo jãn jem̦l̦o̦kinl̦o̦k allõñin Eprõl̦ ñan Jeptõm̦ba ilo kajjojo iiõ. Mour ko an ri-Israel ro im an orl̦o̦k jikin kallib ko aer rar pedped ioon an wõt ilo Oktoba, allõñ eo me ekkã an jino wõttuot. Setan ear m̦on̦e ri-Israel ro ilo an kõm̦m̦an bwe ren tõmak bwe ñan aer lo jeraam̦m̦an, rar aikuj l̦oore m̦antin kabuñ eo an ri-peikan ro rej jokwe iturier. Armej rein rar jokwe iturier rar tõmak bwe ej menin aikuj ñan aer kõm̦m̦ane jet wãween m̦antin kabuñ bwe anij ko aer ren em̦m̦akũt im kõm̦m̦an bwe en wõt. Ro ear jako aer tõmak ilo Jeova rar l̦õmn̦ak bwe wãween eo de in ñan bõbraik an jab wõt ilo ãneo ium̦win juon iien aetok. Kõn men in, rar kõm̦m̦ani m̦anit ko an kabuñ eo an ri-peikan ro ñan kautiej anij waan eo Beal.

8. Ta kõl eo kein karuo Setan ear kõjerbale? Jouj im kõmel̦el̦e.

⁸ Setan ear kõjerbal bar juon kõl ñan m̦on̦e ri-Israel ro. Ear kareel kõn̦aan ko aer renana. Aelõñ ko an ri-peikan ro rar kabuñ ñan anij ko aer ilo aer kõm̦m̦ani m̦anit ko rettoon im rekajjõjõ. Men in ear kitibuj kõrã ro im em̦m̦aan ro rekijoñ me rej wiakake ãnbwinnier ilo tampel̦ eo. Rar jab kõtl̦o̦k wõt an em̦m̦aan ñan em̦m̦aan im kõrã ñan kõrã pãd ippãn doon im wãween mourin l̦õñ ko jet ak rar bar watõk bwe ejjel̦o̦k jorrããn ilo men kein! (Dut. 23:17, 18, UBS; 1 Kñ. 14:24) Ri-peikan ro rar tõmak bwe m̦anit kein rar kõm̦akũt anij ko aer ñan kõm̦m̦an bwe ãneo en orl̦o̦k kõn keinikkan ko. Elõñ ri-Israel ro rar reel kõn m̦anit kein rettoon an ri-peikan ro, im kõn men in rar kããlõt ñan kabuñ ñan anij ko rewaan. Ilo m̦ool, Setan ear bõk er bwe ren an ri-kõm̦akoko.

9. Ekkar ñan Hoseia 2:16, 17, ewi wãween an kar Setan kõpenjakl̦o̦k l̦õmn̦ak ko an ri-Israel ro jãn Jeova?

⁹ Setan ear kõjerbale kõl eo kein kajilu. Ear kõpenjakl̦o̦k l̦õmn̦ak ko an ri-Israel ro jãn Jeova. Ilo tõre ko an ri-kanaan Jeremaia, Jeova ear kwal̦o̦k bwe ri-kanaan ro reriab rar kõm̦m̦an bwe armej ro An ren mel̦o̦kl̦o̦k ãt eo Etan “kõn Beal.” (Jer. 23:27) Alikkar bwe armej ro an Anij remaroñ kar jol̦o̦k aer kõjerbal ãt eo etan Jeova im likũt etan Beal, eo im ej mel̦el̦ein “Irooj.” Men in ear penjake l̦õmn̦ak ko aer jãn aer kile oktak eo ikõtaan Jeova im Beal im kõm̦m̦an bwe en pidodo aer kãreiki m̦antin kabuñ eo an Beal ippãn kabuñ eo an Jeova.​—Riit Hoseia 2:16, 17, UBS im kõmel̦el̦e eo itulal̦in eoon in.

10. Ta kõl ko Setan ej kõjerbali ilo raan kein?

¹⁰ Setan ej kõjerbal ejja kõl ko wõt ilo bar raan kein. Ej bõk armej ro bwe ren an ri-kõm̦akoko ilo an kõjerbal kõn̦aan ko ejjel̦o̦k nana ie, kowõnm̦aanl̦o̦k mourin l̦õñ, im kõpenjakl̦o̦k l̦õmn̦ak ko an armej jãn Jeova. Jen etale kõl eo ãliktata m̦okta.

11. Ewi wãween an kar Setan kõpenjakl̦o̦k l̦õmn̦ak ko an armej ro jãn Jeova?

 ¹¹ Setan ej kõpenjakl̦o̦k l̦õmn̦ak ko an armej ro jãn Jeova. Ãlikin an kar rijjilõk ro an Jesus mej, jet armej me rar ba bwe rej Kũrjin rar jino kajeeded katak ko reriab. (Jrb. 20:29, 30; 2 Tes. 2:3) Ri-jum̦ae rein rar jino aer penjake l̦õmn̦ak ko an armej ro jãn aer jel̦ã wõn Anij eo em̦ool. Ñan waanjoñak, rar bõjrak jãn aer kõjerbal etan Anij ilo Baibõl̦ ko aer im likũt taitõl̦ ko ãinwõt “Irooj.” Ilo aer jol̦o̦k etan Anij im likũti “Irooj,” rej kõm̦m̦an bwe armej eo ej riiti Baibõl̦ eo en pen an lo wãween an Jeova oktak jãn “irooj” ro jet me Baibõl̦ ej kwal̦o̦k kake er. (1 Kor. 8:5) Rej kõjerbal naan in “Irooj” ñan Jeova im Jesus jim̦or. Men in ej kõm̦m̦an bwe en pen an armej ro mel̦el̦e bwe Jeova im Nejin reoktak jãn doon. (Jon 17:3) Mel̦el̦e in ekapokpok ear rejetake jinoin an wal̦o̦k katak eo kõn Trinity ak jilu anij ilo juon, juon katak me Naanin Anij ejjab kwal̦o̦k kake. Tokjãn men in, elõñ armej rej l̦õmn̦ak bwe ejjel̦o̦k juon emaroñ mel̦el̦e kõn karõk ko an Anij im bwe jejjab maroñ jel̦ã kõn e. El̦ap wõt an riab men in!​—Jrb. 17:27.

12. Ta eo kabuñ ko reriab rej kowõnm̦aanl̦o̦k, im ta tokjãn ko renana rej wal̦o̦k jãn men in, ãinwõt kar kwal̦o̦k ilo Rom 1:28-31?

¹² Setan ej kareel kõn̦aan ko renana. Ilo kar raan ko an ri-Israel ro, Setan ear kõjerbal kabuñ ko rewaan ñan kowõnm̦aanl̦o̦k mourin l̦õñ. Rainin, ej bar kõm̦m̦ane ejja men in wõt. Kabuñ ko reriab rej kõtl̦o̦k an armej ro mour ettoon im kajjioñ kõm̦m̦an an armej ro l̦õmn̦ak bwe ejjab nana men in. Kõn men in, elõñ ro rej ba bwe rej karejar ñan Anij rar bõjrak jãn aer pokake kien ko an relukkuun alikkar kõn mour erreo. Ilo lõta eo an rijjilõk Paul ñan ri-Rom ro, ear kwal̦o̦k kõn men ko renana rej wal̦o̦k jãn an kabuñ ko reriab kowõnm̦aanl̦o̦k mourin l̦õñ. (Riit Rom 1:28-31.) Ibwiljin “men ko rejekkar” ej aolep wãween ko kõn mourin l̦õñ, ekoba an em̦m̦aan ñan em̦m̦aan im kõrã ñan kõrã pãleek doon. (Rom 1:24-27, 32; Rev. 2:20) Ekanooj aorõk bwe jen pokake katak ko Baibõl̦ eo em̦õj an lukkuun kaalikkari tok ñan kõj!

13. Ta juon iaan kõl ko Setan ej bar kõjerbali?

¹³ Setan ej kareel kõn̦aan ko ejjel̦o̦k nana ie. Ej piktokid ñan kõn̦aan katak kapeel ko me remaroñ jipañ kõj ñan kabwe aikuj ko ad im an  baam̦le ko ad. (1 Tim. 5:8) Ekkã wõt ad maroñ bõk kapeel kein ñe jej etal ñan jikuul̦ im jej juon ri-jikuul̦ eo eniknik ilo katak. Ijoke, jej aikuj lukkuun kõjparok. Ilo elõñ aelõñ, jikuul̦ ko rejjab katakin wõt ri-jikuul̦ ro kõn kapeel ko renaaj lukkuun jipañ er ilo mour ko aer ak rej bar katakin er kõn mãlõtlõt ko an lal̦ in. Ñan waanjoñak, jikuul̦ ko rej kõm̦m̦an an ri-jikuul̦ ro pere bwe ewõr Anij im kõjekdo̦o̦n Baibõl̦ eo. Rej ba ñan ri-jikuul̦ ro bwe aolep rimmãlõtlõt ro rej tõmak bwe mour ear ijjino jãn an kar men otemjej jide im wal̦o̦k (evolution). (Rom 1:21-23) Katak rot kein rej jum̦ae “mãlõtlõt eo an Anij.”​—1 Kor. 1:19-21; 3:18-20.

14. Ta eo mãlõtlõt eo an armejin in lal̦ in ej rõjañ armej ro ñan kõm̦m̦ane?

¹⁴ Mãlõtlõt eo an armejin lal̦ in ej kõjekdo̦o̦n ak jum̦ae kien ko rejim̦we an Jeova. Ejjab rõjañ armej ñan kwal̦o̦k leen jetõb kwõjarjar, ak ej rõjañ er ñan kwal̦o̦k “jerbal ko an kanniõk.” (Gal. 5:19-23) Ej kõm̦m̦an bwe armej ren utiej bũrueer im jãjjãj, im tokjãn men in armej ro rej oktak im “yokwe er make.” (2 Tim. 3:2-4) Kadkad kein rej oktan ineem̦m̦an im ettã bõro, kadkad ko me Anij ekõn̦aan bwe en wõr ippãn ro ri-karejeran. (2 Sa. 22:28, UBS) Jet Kũrjin me rar pukot jel̦ãl̦o̦kjen̦ ko rel̦l̦apl̦o̦k ilo aer etal ñan university rar kõtl̦o̦k bwe l̦õmn̦ak ko an lal̦ in im jab l̦õmn̦ak ko an Anij ren ãeik l̦õmn̦ak ko aer. Jen etale juon waanjoñak kõn ta eo emaroñ wal̦o̦k ñe jej kõjekdo̦o̦n men in ekauwõtata.

15-16. Ta eo kwõj katak jãn bwebwenato eo an kõrã eo jeid im jatid?

¹⁵ Juon jeid im jatid kõrã me elõñl̦o̦k jãn 15 iiõ in an pãd ilo jerbalin full-time ñan Jeova ej ba: “Ãinwõt juon eo em̦õj an kar peptaij, iar riiti im roñjake naanin kakkõl ko bwe ekauwõtata  etal ñan university, ak iar kõjekdo̦o̦ni naanin kakkõl ko. Iar l̦õmn̦ak bwe naanin kakapilõklõk kein rejjab jerbal ñan ña.” Tokjãn men in, ta ko rar wal̦o̦k ñane? Ej kwal̦o̦k m̦ool im ba: “Joñan an kar l̦ap aõ jol̦o̦k iien ñan katak im buul̦ kate ña, iar poub jãn aõ kõm̦m̦an iien ñan jar ñan Jeova ãinwõt ikõn kõm̦m̦ane m̦okta, ear ejjel̦o̦k aõ kajoor ñan m̦õn̦õn̦õ in bwebwenato ippãn ro jet kõn Baibõl̦, im iar m̦õk ñan lukkuun kõppojakl̦o̦k im̦aan ñan kweilo̦k ko. El̦ap aõ kam̦m̦oolol bwe ke iar lo bwe ejino jorrããn kõtaan eo aõ ippãn Jeova kõn aõ kar kõmaatl̦o̦k iien ko aõ ñan pukot jel̦ãl̦o̦kjen̦ ko rel̦l̦apl̦o̦k, iar kile bwe iar aikuj bõjrak. Im eñin men eo iar kõm̦m̦ane.”

¹⁶ Ewi wãween an kar jel̦ãl̦o̦kjen̦ ko rel̦l̦apl̦o̦k jelõt l̦õmn̦ak eo an kõrã in jeid im jatid? Ej uwaak im ba: “Ijook in ba bwe jel̦ãl̦o̦kjen̦ eo iar jibadeke ear katakin eõ ñan kalimjek wõt bõd ko an ro jet, el̦aptata ro jeiũ im jatũ ilo eklejia eo. Men in ear bar kõm̦m̦an bwe en l̦ap aõ kõtmãne bwe ren kõm̦m̦ani men ko el̦ap jãn aer maroñ im bwe in kõjenolo̦k ña make jãn er. Ebwe an kar to aõ katak ñan jol̦o̦k wãween kein. Men in ear wal̦o̦k ñan ña ej kaalikkar ewi joñan an kauwõtata ñan kõjekdo̦o̦n naanin kakkõl ko Jemãd ilañ ej litok ikijjeen doulul eo. El̦apl̦o̦k an kar Jeova jel̦ã kajjieõ jãn ña make. Yokwe ke in kar roñjake e!”

17. (1) Ta eo jen peek ippãd make ñan kõm̦m̦ane? (2) Ta eo jenaaj etale ilo katak eo tok juon?

¹⁷ Jen peek ippãd make bwe jejjãmin kõtl̦o̦k bwe Setan en kõm̦akokoik kõj “ikijjeen katak ko an armej im mel̦el̦e ko reriab” an lal̦ in an. Jen wõnm̦aanl̦o̦k wõt im kõjparok kõj jãn kõl ko Setan ej kõjerbali ñan m̦on̦e kõj. (1 Kor. 3:18; 2 Kor. 2:11) Jab kõtl̦o̦k bwe en kõpenjakl̦o̦k l̦õmn̦ak eo am̦ jãn Jeova. Mour ekkar ñan kien ko an reutiej ikijjeen mour erreo. Im jab kõtl̦o̦k bwe Setan en m̦on̦e eok bwe kwõn kõjekdo̦o̦n naanin kakapilõklõk ko an Jeova. Ak ta el̦aññe kwõj kile bwe em̦õj an l̦õmn̦ak ko an lal̦ in jelõt eok? Katak eo tok juon enaaj kwal̦o̦k ewi wãween an Naanin Anij maroñ jipañ eok ñan jol̦o̦k l̦õmn̦ak im m̦anit ko “elukkuun pen aer jako.”​—2 Kor. 10:4, 5.