1. Kemej kijtoua Colosenses 2:4, 8, ¿keniuj Satanás kitemoua maj titanemilikan kemej yejua?

SATANÁS kineki maj tikauakan Jiova. Yejua ika, kitemoua kipatas totanemilil. Tein melauj, kineki maj titanemilikan kemej yejua kineki. Kikui tein tiknejnekij uan ika kitemoua techkajkayauas uan maj tiktakamatikan (xikonixtajtolti Colosenses 2:4, 8).

2, 3. 1) ¿Keyej moneki timoyekpiaskej ijkon kemej kijtoua Colosenses 2:8? 2) ¿Toni tikitatij itech nejin tamachtilis?

² ¿Yekmelauj Satanás uelis techkajkayauas? Kemaj. Maj tikelnamikikan ke itech Colosenses 2:8 Pablo amo kinnejmachtijtoya akin amo taneltokayaj, ta tokniuan taixpejpenalmej (Col. 1:2, 5). Komo ijkuak ueliskia kinkajkayauas nejon tokniuan, axkan okachi uelis techkajkayauas (1 Cor. 10:12). ¿Keyej? Porin Satanás kiualpantamotkej uan kitemoua kinkajkayauas nochin itekitikauan Dios (Apoc. 12:9, 12, 17). Uan no porin tinemij itech tonalmej keman taltikpakneminij “kueyiltijtinemiske ika ne amokuali nintachiualisuan” (2 Tim. 3:1, 13).

³ Itech nejin tamachtilis tikitatij keniuj Satanás kitemoua kipatas totanemilil ika itakajkayaualis uan no eyi taman tein ika kitemoua kichiuas (Efes. 6:11). Itech okse tamachtilis tikitaskej keniuj uelis timokixtiliskej tanemililmej tein ika Satanás takajkayaua. Sayoj ke achto maj tikitakan keniuj kinkajkayauak israelitas satepan ke kalakkej itech Tal tein Dios motenkaujka kinmakas uan toni uelis techmachtis nejon.

4-6. Kemej kijtoua Deuteronomio 11:10-15, ¿katiyejua yankuik taman tatokalis monekik momachtiskej israelitas itech Tal tein Dios motenkaujka kinmakas?

⁴ Satanás kuali kimatik keniuj kichiuas maj israelitas kinueyichiuanij tiotsitsin. ¿Keniuj kichiuak? Yejua kimatia ke israelitas monekia kipiaskej tein kikuaskej. Keman yejuan kalakkej itech Tal tein Dios motenkaujka kinmakas, monekik momachtiskej okse yankuik taman kemej tatokaskej. Ompa Egipto, kiatekiayaj tatok ika at tein kikixtiayaj itech ueyiat Nilo. Sayoj ke itech Tal tein Dios motenkaujka kinmakas amo onkaya se ueyiat, yejua ika kichiayaj maj onka ajuach uan maj kioui (xikonixtajtolti Deuteronomio 11:10-15; Is. 18:4, 5). Yejua ika, israelitas monekia momachtiskej yankuik taman kemej tatokaskej. Uan nejon ouij yeskia porin miakej akin kimatiaj tatokaskej momikilijkajya itech taluakyan.

⁵ Jiova kiniluij israelitas ke amo tatokaskiajok kemej achto. Satepan kinnejmachtij se taman tein ueliskia moitas ke amo mouika ika tatokalis. Kiniluij: “Ximoyekpiakan porin nanmoyolo uelis kitanejnektiskej, uan yekmelauj nanyaskej okseko uan nankiueyichiuaskej tiotsitsin uan nanmoixpiloskej ininixpan” (Deut. 11:16, 17). ¿Keyej kinnejmachtij maj amo kinueyichiuanij tiotsitsin keman kinnojnotstoya ika yankuik taman kemej tatokaskej?

⁶ Jiova kimatia ke israelitas kinekiskiaj kimatiskej keniuj tatokayaj akin nemiaj itech xolalmej tein moajsiaj ompakauin kampa amo kiueyichiuayaj Dios. Tein melauj cananeos okachi kimatiaj tatokaskej  uan israelitas kinekiskiaj maj kinmachtikan. Sayoj ke nejon katka tamouilil porin cananeos kiueyichiuayaj Baal uan kinemiliayaj ke iluikak katka iaxka uan ke yejua kichiuaya maj kioui. Jiova amo kinekia maj israelitas kinkajkayauanij ika nejon. Maski ijkon, yejuan miakpa kiixpejpenkej kiueyichiuaskej Baal (Núm. 25:3, 5; Juec. 2:13; 1 Rey. 18:18). ¿Keniuj Satanás uelik kinkajkayauak israelitas? Maj tikitakan.

7. ¿Keniuj monextij ox israelitas takuaujtamatiaj iuan Jiova keman kalakkej itech Tal tein Dios motenkaujka kinmakas?

⁷ Yekinika taman tein kikuik yejua tein kinejnekiaj israelitas. Yejuan kinejnekiaj maj kioui porin kipaleuiskia tatok. Itech Tal tein Dios motenkaujka kinmakas, amo semi kiouia itamian metsti abril hasta metsti septiembre. Tatok kualtsin motemakaskia ika kiouit tein peuaya itech metsti octubre. Altepemej tein amo kiueyichiuayaj Jiova kineltokayaj ke tiotsitsin kichiuaskiaj maj kioui komo yejuan kinueyichiuayaj ika seki taman. Satanás kichiuak maj israelitas kineltokakan ke kuali kinyaskia komo kichiuayaj kemej nejon altepemej. Akin amo takuaujtamatiaj iuan Jiova kineltokakej ke niman peuaskia kiouiskia komo kiueyichiuayaj Baal.

8. ¿Toni ojpatika taman kikuik Satanás? Xikonmelaua.

⁸ Ojpatika taman tein kikuik Satanás yejua amo kuali tanejnekilis tein israelitas kipiayaj. Altepemej tein amo kiueyichiuayaj Jiova semi pitsotik auilnemiaj keman kinueyichiuayaj inintiotsitsin, kemej neskayot, siuamej uan takamej monamakayaj itech auilnemilis ompa itech templos. Nejon altepemej kuali kiitayaj maj se takat moteka iuan okse takat oso se siuat iuan okse siuat uan okseki taman auilnemilis (Deut. 23:17, 18; 1 Rey. 14:24). Kineltokayaj ke nochi nejon tapaleuiaya maj tiotsitsin kichiuanij maj motemakani tatok. Miakej israelitas peuak kinyolnotsa nejon pitsotik auilnemilis uan peujkej kinueyichiuaj tiotsitsin. Tein melauj, kikaujkej maj Satanás kinkajkayaua.

9. Kemej kijtoua Oseas 2:16, 17, ¿keniuj Satanás kitemoj maj amo kimatinijok akoni Jiova?

⁹ Expatika taman tein Satanás kikuik: Kitemoj maj amo kimatinijok akoni Jiova. Itech itonaluan tanauatijkej Jeremías, Jiova kitematiltij ke tanauatianij akin amo melaujkej kichiujkej maj israelitas amo kikuinijok itokay, ta itokay Baal (Jer. 23:27). Nesi israelitas amo kikuikejok itokay Dios uan kiixpatakej ika itokay Baal, tein kijtosneki “teko”. Nejon kichiuak maj israelitas amo kimatinijok akoni katka Dios akin melauak, yejua ika kiueyichiuayaj Jiova uan no Baal (xikonixtajtolti Oseas 2:16, 17 uan nota).

10. ¿Toni ika Satanás takajkayaua axkan?

¹⁰ Satanás kisentoka takajkayaua ika tein kikuik ne uejkauj. Kinkajkayaua taltikpakneminij ika tein kinejnekij, ika auilnemilis uan kitemoua maj amo kimatikan akoni Jiova. Yekinika maj tikitakan keniuj kitemoua maj amo kimatikan akoni Jiova.

11. ¿Keniuj Satanás kichiuani maj amo kiixmatikan Jiova?

¹¹ Satanás kitemoua maj amo kimatikan akoni Jiova. Satepan ke tatitanilmej  momikilijkej, sekin akin kijtouayaj ke kichiuayaj kemej Cristo peujkej tamachtiaj tein amo melauak (Hech. 20:29, 30; 2 Tes. 2:3). Nejon kichiuak maj taltikpakneminij amo kiixmatinij Dios akin melauak. Kemej neskayot, amo kijkuilojkejok tokayit Jiova itech Biblia uan kiixpatakej ika tajtol “toTeko” oso ika okseki tajtolmej. Yejua ika, akin kiixtajtoltiaya Biblia kiouijmakaya kimatis keniuj Jiova semi taman ke okseki tekomej akin ininka tajtoua Biblia (1 Cor. 8:5). Uan keman ika tajtouayaj Jiova oso Jesús kikuikej tajtol “toTeko”, yejua ika amo moajsikamatia ke Dios uan iKonetsin tatamamej uan ke Dios okachi Ueyichiujkej (Juan 17:3). No kichiuak maj miakej kineltokakan trinidad, se taman tein Biblia amo tamachtia. Yejua ika, miakej kinemiliaj ke amo akin uelis kiixmatis Dios. ¡Se ueyi takajkayaualis! (Hech. 17:27.)

12. 1) ¿Toni kichiuani taneltokalis tein amo melauak? 2) Kemej kijtoua Romanos 1:28-31, ¿toni kiualkuini nejon?

¹² Satanás kikui amo kuali tanejnekilis. Itech inintonaluan israelitas, Satanás kikuik taneltokalis tein amo melauak uan ika kichiuak maj miakej auilneminij. Axkan no ijkon kichiua. Akin pouij itech taneltokalis tein amo melauak kiitaj auilnemilis kemej se taman tein kuali. Yejua ika, miakej akin kijtouaj ke kitekitiliaj Dios amo monejnemiltiajok kemej yejuatsin kiixtalij. ¿Toni kiualkuini nejon? Tatitanil Pablo kijtoj toni itech amatajkuilol tein kinijkuilouilij romanos (xikonixtajtolti Romanos 1:28-31). Itech “ten amo monekia kichiuaske” moajsi nochi tataman auilnemilis kampa no poui keman se takat moteka iuan okse takat oso se siuat iuan okse siuat (Rom. 1:24-27, 32; Apoc. 2:20). Kemej tikitaj, semi moneki maj tiktakamatikan tein Biblia tamachtia.

13. ¿Toni okse taman kikui Satanás?

¹³ Satanás kikui tein tiknejnekij. Tiknejnekij tikpiaskej tein ika timotekipanoskej tejuan uan tochankauan. Yejua ika tiktemouaj timomachtiskej tikchiuaskej se tekit (1 Tim. 5:8). ¿Keniuj tikchiuaj? Keman tiyouij kaltamachtiloyan uan kuali timomachtiaj. Sayoj ke moneki timoyekpiaskej. Itech miak altepemej,  momachtianij amo sayoj kinmachtiaj tein kinpaleuis, ta no inintanemilil taltikpakneminij. Kiniluiaj ke Dios amo nemi uan maj kiixtopeuakan tein Biblia kijtoua. Uan no kiniluiaj ke aksa akin tamatkej kineltoka ke nemilis iselti peuak (Rom. 1:21-23). Nejon tanemililmej kiixnamikij itamatilis Dios (1 Cor. 1:19-21; 3:18-20).

14. ¿Toni kichiua tein tamachtiaj taltikpakneminij?

¹⁴ Miak taman tein tamachtiaj taltikpakneminij kiixnamiki itanauatiluan Dios. Amo tapaleuia maj monexti itakilo espíritu, ta ‘tanejnekilis ten kuika tajtakol’ (Gál. 5:19-23). Kichiua maj miakej moueyinekikan uan maj sayoj yejuan motasojtakan (2 Tim. 3:2-4). Jiova amo kineki maj tiknextikan nejon, ta maj tiyolyemankej (2 Sam. 22:28). ¿Toni kinpanouani seki tokniuan akin momachtianij itech uejueyi kaltamachtiloyamej? Peuaj tanemiliaj kemej taltikpakneminij uan amo kemej Dios. Maj tikitakan se neskayot.

15, 16. ¿Toni techmachtia tein kipanok se tokniuj siuat?

¹⁵ Se tokniuj siuat akin panouaya quince xiujmej kitekitilia Jiova miak tonalmej, kijtoua: “Nimoauijkaya kemej itaixpantijkauj Jiova, nikixtajtoltijka uan nikakka ke se momachtis itech uejueyi kaltamachtiloyamej uelis teijtakos. Sayoj ke amo niknejmachkakik nejon tayolmajxitilis uan niknemilij ke nejua amo nechpanoskia nejon”. ¿Toni ouijkayomej kipiak? Kijtoua: “Nemachtil nechkuiliaya notiempo uan nochikaualis yejua ika amo niktataujtiayaok Jiova kemej achto;  kemej semi nisioujtoya amo niyolpakiaok nitanojnotsas nion nimomachtiayaok tein moitaskia itech nechikolmej. Nikitak ke nimomachtis itech ueyi kaltamachtiloyan kijtakojtoya nokuali uikalis iuan Jiova. Ijkuak, nikajsikamatik ke monekia nikauas. Uan ijkon nikchiuak”.

¹⁶ ¿Keniuj kipatak itanemilil tein momachtijtoya? Yejua kijtoua: “Nipinaua nikijtos ke itech ueyi kaltamachtiloyan nimomachtij nikitas ininnepololuan oksekin uan okachiok ininnepololuan tokniuan; nikchiaya maj kichiuakan okachi ke tein ueliaj uan amo iniuan nimouikayaok. Niuejkauak nimokixtilij nejon tanemililmej. Tein nikpanok nechnextilij ke semi tamouilil amo se kitakamatis tein technejmachtia toTajtsin Dios itechkopa inechikol. Jiova nechixmatia okachi ke tein nejua nimoixmatia. ¡Komo niktakamatini amo nikpiaskia miak kuejmolmej!”.

17. 1) ¿Toni moneki tikixtaliskej tikchiuaskej? 2) ¿Toni tikitaskej itech okse tamachtilis?

¹⁷ Maj tikixtalikan amo keman tikauaskej maj techkajkayaua ‘tamachilis ten amo teyi techyolmajxitisʼ tein Satanás kimoyaua. Yejua ika maj nochipa timoyekpiakan (1 Cor. 3:18; 2 Cor. 2:11). Maj amo keman tikauakan maj techelkaualti akoni Jiova uan keniuj kineki maj tikueyichiuakan. Maj tiktakamatikan itanauatiluan yejuatsin. Uan maj amo tikauakan maj Amokuali kichiua maj amo tikakikan tein Jiova techyolmajxitia. Sayoj ke, ¿toni uelis tikchiuaskej komo tikitaj ke no titanemiliajya kemej taltikpakneminij? Itech okse tamachtilis tikitaskej keniuj iTajtol Dios uelis techpaleuis maj timokixtilikan tanemililmej uan tachiualismej tein semi chikaujkej uan ouij se kinkauas (2 Cor. 10:4, 5).