1. Base ed Colosas 2:4, 8, panon ya kokontrolen nen Satanas so panagnonot tayo?

LABAY nen Satanas ya ibeneg tayoy Jehova. Kanian sasalien ton impluensyaan odino kontrolen so panagnonot tayo pian sikato so unoren tayo. Uusaren to iray pilalek tayo pian nasagyat odino napalikdo tayo ya ontumbok ed sikato.​—Basaen so Colosas 2:4, 8.

2-3. (a) Akin et nepeg tayon imanoen so pasakbay ya walad Colosas 2:8? (b) Antoy aralen tayo ed sayan artikulo?

² Talaga kasin sarag itayon palikdoen nen Satanas? On! Tandaan ya samay pasakbay ya walad Colosas 2:8 et insulat nen apostol Pablo parad saray Kristiano ya alanaan na masanton espiritu, aliwan parad saray agmananisia. (Col. 1:2, 5) No nensaman et napepeligro la iraman ya Kristiano ed panagpalikdo nen Satanas, lalon napepeligro itayo natan. (1 Cor. 10:12) Akin? Nibantak lad dalin si Satanas tan gagawaen toy anggaay nayarian ton palikdoen iray matoor ya lingkor na Dios. (Apo. 12:9, 12, 17) Ontan met, manbibilay itayod panaon ya saray mauges a totoo tan impostor et magmamaliw a “lalon mauges.”​—2 Tim. 3:1, 13.

³ Diad sayan artikulo, pantongtongan tayo no panon ya uusaren nen Satanas so “maapan panagpalikdo” pian naimpluensyaan toy panagnonot tayo. Amtaen tayo so talora ed saray “masilib a pakana” to. (Efe. 6:11) Insan diad onsublay ya artikulo, aralen tayo no panon tayon naekal ed nonot tayo iray  mauges ya epekto na saray pakana to. Balet, amtaen tayo nin unona no panon ya pinalikdo nen Satanas iray Israelita nen wala la rad Insipan a Dalin tan no antoy naaralan tayo ed satan ya agawa.

4-6. Base ed Deuteronomio 11:10-15, anton balon paraan na panagdalus so kaukolan ya aralen na saray Israelita nen wala la rad Insipan a Dalin?

⁴ Diad agnaliklikas ya paraan, atukso nen Satanas iray Israelita ya mandayew ed idolo. Antoy ginawa to? Amta to ya kaukolan day naakan, kanian inusar to itan pian natukso iran gawaen so labay to. Nen wala lad Insipan a Dalin iray Israelita, kaukolan dan umanen so paraan na panagdalus da. Nen wala ni rad Ehipto, say danum ya manlalapud Ilog Nilo so uusaren da pian paranuman iray tanem da. Balet diad Insipan a Dalin, anggapoy baleg ya ilog ya panlapuan na danum, kanian mandepende labat ira ed uran tan linaew. (Basaen so Deuteronomio 11:10-15; Isa. 18:4, 5) Kaukolan ya aralen na saray Israelita so balon paraan na panagdalus. Aliwa itan ya mainomay ta dakel ed saramay asali day nandalus et inatey lad kalawakan.

⁵ Impaliwawa nen Jehova ed saray totoo to ya anguman lay situasyon da. Insan to imbaga iyan pasakbay, ya singa anggapoy koneksion to ed panagdalus: “Manalwar kayo pian agnaayat so puso yo ya onarawi tan mandayew ed arum a dirios tan ondakmomo ed saratan.” (Deu. 11:16, 17) Akin ya pinasakbayan ira nen Jehova nipaakar ed pandayew ed saray palson dirios, anta say ibabaga to et nipaakar ed balon paraan na panagdalus?

⁶ Amta nen Jehova ya posiblin natukso iray Israelita ya onlad saray paganon totoo pian naaralan day arum ya paraan na panagdalus diman. Tua, sarayan paganon totoo et mas dakel so amta ra ed panagdalus nen saray  Israelita, tan nayarin makaaral iray totoo na Dios ed sikara, balet walay peligro. Say panagnonot na sarayan dumaralus ed Canaan et naimpluensyaan na panagdayew da ed si Baal. Manisia ra ya si Baal so akanggawa ed tawen tan mangiiter na uran. Aglabay nen Jehova ya napalikdo iray totoo to na ontan iran palson bangat. Balet makapaermen ta paulit-ulit ya nandayew iray Israelita ed si Baal. (Num. 25:3, 5; Ukom 2:13; 1 Ara. 18:18) Imanoen tayo no panon ya narel o apalikdo nen Satanas iray Israelita.

7. Panon ya asubok so pananisia na saray Israelita nen wala la rad Insipan a Dalin?

⁷ Say unonan pakana ya ginawa nen Satanas ed saray Israelita et inusar toy natural a panlabay da ya onsabi komon so uran pian nasalog so dalin. Mataltalag so uran ed Insipan a Dalin no bandad sampot na Abril anggad Setyembre. Say pambilay tan ani na saray Israelita et akadepende ed uran a kaslakan ya onggagapo no bandad Oktubre. Apalikdo nen Satanas iray Israelita ya kaukolan dan aligen iray kagagawa na saray paganon totoo pian dakel so anien da. Manisia iraman a totoo ya kaukolan day manggawa na ritual pian mangiter na uran iray dirios da. Saray Israelita ya makapuy so pananisia rad si Jehova et anisia ya satan labat so paraan pian ag-ombayag so panaon na tiagew, kanian akibiang irad saray paganon ritual parad palson dios ya si Baal.

8. Anto so komaduan pakana ya inusar nen Satanas? Ipaliwawa.

⁸ Angusar si Satanas na komaduan pakana ed saray Israelita. Sinagyat toy imoral ya pilalek da. Dadayewen na saray pagano iray dirios da panamegley na saray ritual ya makapadimla tan imoral. Wala ray paabang ya bibii tan lalaki ed saray templo da. Agda labat kokonsintien so homoseksualidad tan arum nin klase na seksual ya imoralidad, ipapasen da ni ingen ya normal labat iratan! (Deu. 23:17, 18; 1 Ara. 14:24) Manisia iray pagano ya pabunaen na saray dirios da so dalin no gawaen da irayan ritual. Asagyat so dakel ya Israelita ed sarayan imoral ya ritual kanian nandayew met ira ed saray palson dirios. Narel ira nen Satanas!

9. Base ed Oseas 2:16, 17, antoy ginawa nen Satanas pian nalingwanan na saray Israelita no siopa si Jehova?

⁹ Angusar si Satanas na komatlon pakana. Sikatoy nanggawa na paraan pian nalingwanan na saray Israelita no siopa si Jehova. Diad panaon nen propeta Jeremias, imbaga nen Jehova ya nanggawa na paraan iray palson propeta pian nalingwanan na totoo To so ngaran To “lapud si Baal.” (Jer. 23:27) Mapatnag ya diad saman et agla uusaren na saray totoo na Dios so ngaran nen Jehova tan sinalatan da itan na ngaran ya Baal, a say labay ton ibaga et “Akankayarian” odino “Katawan.” Lapud saya et nairapan la ray Israelita ya nanengneng so pandumaan nen Jehova tan si Baal, kanian say panagdayew da ed si Jehova et lalaokan da na saray ritual parad si Baal.​—Basaen so Oseas 2:16, 17 tan paimanod leksab.

10. Anto ran pakana so uusaren nen Satanas natan?

¹⁰ Pareho ni iray pakana ya uusaren nen Satanas natan. Pian naerel to ray totoo, uusaren to ray natural ya panlabay da, ipapaseseg toy seksual ya imoralidad, tan manggagawa na paraan pian nalingwanan da no siopa si Jehova. Konsideraen tayo nin unona imay komatlon pakana.

11. Anto ray ginawa nen Satanas pian nalingwanan na totoo no siopa si Jehova?

¹¹ Manggagawa si Satanas na paraan pian nalingwanan na totoo no siopa si Jehova. Nen  inatey la ray apostol nen Jesus, wala ray mangibabagan Kristiano ira ya angikayat na palso iran bangat. (Gawa 20:29, 30; 2 Tes. 2:3) Lapud saray bangat na sarayan apostata et alingwanan na totoo no siopa so saksakey ya tuan Dios. Singa bilang, agda la inusar so ngaran na Dios ed saray Biblia da tan mas labay dan usaren iray titulo ya singa say “Katawan.” Nen inekal da so personal ya ngaran na Dios tan sinalatan day “Katawan,” nairapan la ray manbabasa na Biblia ya nanengneng so pidumaan nen Jehova ed arum ya “katawan” ya abitla ed Kasulatan. (1 Cor. 8:5) Parehon titulo ya “Katawan” so uusaren da parad si Jehova tan si Jesus, kanian nairapan iray totoo ya talosan ya mandumaan si Jehova tan say Anak to. (Juan 17:3) Lapud saya et ginmapo so doktrina ya Trinidad, ya ag-ibabangat na Biblia. Kanian iisipen na dakel ya totoo ya say Dios et misteryo tan imposiblin nakabat tayo. Baleg itan ya tila!​—Gawa 17:27.

12. Antoy ipapaseseg na palson relihyon, tan anto ray resulta ya singa nabasa ed Roma 1:28-31?

¹² Sasagyaten nen Satanas iray imoral ya pilalek. Diad Israel nensaman, inusar nen Satanas so palson relihyon pian ipaseseg so imoralidad. Ontan met so gagawaen to natan. Kokonsintien na palson relihyon so imoral iran kagagawa tan ibabaga da ni ingen ya normal labat iratan. Kanian dakel so mangibabagan manlilingkor ira ed Dios ya agla manguunor ed saray malinew ya estandarte to ed moral. Diad sulat nen apostol Pablo ed saray taga Roma, indeskribe to ray resulta na satan. (Basaen so Roma 1:28-31.) Kaiba ed ‘saray bengatlan agmanepeg’ so amin ya klase na seksual ya imoralidad, pati say homoseksualidad. (Roma 1:24-27, 32; Apo. 2:20) Talagan importante ya unoren tayo iray malinew ya bangat na Biblia!

13. Anto ni so sakey ya pakana nen Satanas?

¹³ Uusaren nen Satanas iray natural ya labay tayo. Natural labat ya labay tayoy manaral pian nawalaan tayoy abilidad ya nausar tayo ed panlegpet ed sarili tan ed pamilya tayo. (1 Tim. 5:8) Mabetbet ya niwalad sikatayo iray ontan ya abilidad no maneskuela tayo tan no manaral tayon maong. Balet nepeg itayon manalwar. Diad dakel a bansa, aliwa labat ya saray praktikal ya abilidad so ibabangat ed eskuelaan, noagta anggan  saray pilosopiya na mundo. Ibabangat da ray estudyante ya ibaliwala so estandarte na Biblia tan kuestionen no talaga kasin walay Dios. Ibabaga da met ya amin ya matalinon totoo et manisia ya ginmapo so bilay panamegley na ebolusyon. (Roma 1:21-23) Saratan ya bangat et kontra ed “karunongan na Dios.”​—1 Cor. 1:19-21; 3:18-20.

14. Antoy ipapaseseg na pilosopiya na mundo?

¹⁴ Say pilosopiya na mundo et ibabaliwala odino kokontraen to iray matunong ya estandarte nen Jehova. Say ipapaseseg na satan et saray “gawa na laman,” imbes ya say bunga na espiritu na Dios. (Gal. 5:19-23) Lapud satan et makakaaral iray totoo ya manlastog tan manpasirayew, kanian magmamaliw iran “maaro ed sarili ra.” (2 Tim. 3:2-4) Kabaliktaran iratan na mapaabeban ugali ya labay na Dios ya ipanengneng na saray lingkor to. (2 Sam. 22:28) Wala ray Kristiano ya nanaral ed unibersidad a naimpluensyaan na kanonotan na sayan mundo imbes ya manpamoldi ira ed kanonotan na Dios. Konsideraen tayo so sakey ya posiblin nagawa no ibaliwala tayo iyan peligro.

15-16. Antoy naaralan mo ed eksperiensya na sakey a sister?

¹⁵ Oniay imbaga na sister ya masulok ya 15 taon lan manlilingkor ya sigpot panaon: “Lapud bautismado ak la ed saman, nababasak tan narerengel ko iray peligro na panaral ed unibersidad, pero imbaliwalak iratan ya pasakbay. Inisip ko ya ag-iratan nagawa ed siak.” Anto balet so resulta? Inamin to: “Naupot so panaon ko ed paneeskuelak, kanian ngalngali anggapo lay panaon kon manpikasi ed  si Jehova aliwan singa dati, naknaksawan ak lan maong kanian agak la maliket ed pibibiang kod ministeryo, tan mabanal ak la kanian agak masyadon manpaparaan parad saray aral. Maong labat ta nen alikas ko ya say panaaral kod unibersidad so manederal ed relasyon kod si Jehova, naisip ko ya kaukolan ko lay ontunda. Kanian tinmunda ak.”

¹⁶ Antoy epekto na atagey ya edukasyon ed panagnonot na sayan sister? Imbaga to: “Kababaing, pero aminen ko ya lapud impanaral kod unibersidad et nagmaliw ak ya makritiko, lalo lad saray agagi. Nagmaliw ya atagtagey so iilaloan kod sikara, tan ibibiig koy sarilik. Abayag ni antis kon nakal iratan. Naaralan kod eksperiensyak ya talagan mapeligro no ibaliwala tayo ray pasakbay ya iiter na Ama tayo ed tawen panamegley na organisasyon to. Inisip ko ya kabkabat koy sarilik, pero mas kabkabat ak nen Jehova. Dinmengel ak la komon ed saman!”

17. (a) Antoy determinado tayon gawaen? (b) Antoy aralen tayo ed ontumbok ya artikulo?

¹⁷ Komon ta mansiansia kan determinado ya agpaerel ed “pilosopiya tan maapan panagpalikdo” na mundo nen Satanas. Tuloytuloy kan manalwar pian agto ka napalikdo. (1 Cor. 3:18; 2 Cor. 2:11) Agmon balot aabuloyan ya lapud saray pakana to et nalingwanan mo no siopa si Jehova. Unor mo ray atagey ya estandarte nen Jehova ed moral. Tan agmo aabuloyan ya napatitan ka nen Satanas ya ibaliwala iray bilin nen Jehova. Panon to balet no nalikas mo ya naapektoan ka la na panagnonot na sayan mundo? Aralen ed ontumbok ya artikulo no panon ya makatulong so Salita na Dios pian naekal tayo iray kanonotan tan kagagawa anggano “malmalet ya akaletneg” iratan.​—2 Cor. 10:4, 5.