1. Hikuya hi Vakolosa 2:4, 8, Sathana a yendla yini leswaku ahi yendla hi pimisa kufana na yena?

SATHANA a lwa hi matimba leswaku a cinca mapimisela ya hina. Waswi tiva swaku loko o za a kota leswo, hita tshika kurhandza Yehovha. Hi mhaka leyo, a tirhisa swilo leswi kokaka matihlo leswaku ahi yendla hi pimisa kufana na yena ni kulandzela leswi aswi lavaka. — Lerha Vakolosa 2:4, 8.

2-3. a) Hayini hinga fanelanga hima tekela hansi marito lama kumekaka ka Vakolosa 2:8? b) Hita bula hi yini ka djondzo leyi?

² Injhe Sathana angaswi kota kuhi kanganyisa? Ina, angaswi kota. Hinga rivaleni leswaku marito lama kumekaka ka Vakolosa 2:8 amanga tsaleliwanga vanhu va kukala vanga tivi Xikwembu. Ama tsaleliwe Vakreste lava ava totiwile hi moya lowokwetsima. (Kol. 1:2, 5) Vakreste lavayani ava li nghozini leyi na hina hinga ka yona namuntlha, kunga nghozi ya kukanganyisiwa hi Sathana. (1 Kor. 10:12) Hayini hi vula leswo? Hikusa Sathana a cukumetiwile laha misaveni naswona anga yetleli. A lwa hi matimba leswaku a hambukisa vagandzeli va Yehovha votshembeka. (Nhla. 12:9, 12, 17) Xin’wana hileswaku hi hanya ka masiku ya kukarhata swinene lawa ka wona vanhu vobiha ni vakanganyisi “vayaka mahlweni vayengeteleka kubiha”. — 2 Tim. 3:1, 13.

³ Ka djondzo leyi, hita vona ndlela leyi Sathana ama tirhisaka ha yona ‘marito ya mavunhwa’ leswaku a kucetela mimpimiso ya hina. Hita tlhela hi vona 3 wa mintlhamu leyi ayi tirhisaka kuva ahi kanganyisa. (Efe. 6:11) Ka djondzo leyingata landzela, hita vona swilo leswi hingaswi yendlaka akuva hi tshika kuva ni mimpimiso ya Sathana loko kuli leswaku hi tshame hi phasiwa hi yona. Kambe swoswi, ahi voneni ndlela leyi Sathana a kangayiseke ha yona Vayisrayele se loko va nghene ka Tiko Leli Tshembisiweke  ni leswi hingaswi djondzaka ka leswiva humeleleke.

4-6. Hikuya hi Deteronoma 11:10-15, i kucinca kwihi ka marimela loku Vayisrayele va bohekeke kuku yendla loko va nghene ka Tiko Leli Tshembisiweke?

⁴ Sathana a tirhise maqhinga leswaku a kucetela Vayisrayele kuva va gandzela swikwembu swa mavunhwa. Aswi yendlise kuyini? Loko Vayisrayele va nghene ka Tiko Leli Tshembisiweke, va boheke kucinca marimela ya vona. Hi mhaka muni? Hikusa swilo aswi hambanile ni le Gibita, laha ava tirhisa mati ya lwandle la Nilo leswaku va regara masimu ya vona. Ka Tiko Leli Tshembisiweke akunga na lwandle. Leswaku swimilana swi kula, a kufanele kunyimeliwa timpfula ni hunguva. (Lerha Deteronoma 11:10-15; Esa. 18:4, 5) Hi mhaka leyo, Vayisrayele ava fanele va djondza tindlela ta nyuwani ta kurima. Leswo aswingatava vevukela hikusa votala ka lava a va ni ntokoto ka ntirho lowu ava file amananga. Sathana aaswi tiva hinkwaswu leswi. Hi mhaka leyo, a ringete kutirhisa xiyimu lexi leswaku ava phasa.

⁵ Ndzhaku ka loko Yehovha a byele Vayisrayele swaku xiyimu xa vona axi cincile, ava byele marito lawa ama tikomba manga fambisani ni kucinca loku. A te: “Mitivonela leswaku mbilu ya n’wina yingayengiwi migama mihambuka, migandzela swikwembu swin’wana ni kuswikhizamela.” (Det. 11:16, 17) Hi mhaka muni Yehovha ava byele leswaku va tivonela ka kugandzela swikwembu swa mavunhwa loko a bula na vona hi tindlela ta nyuwani ta kurima?

⁶ Yehovha aaswi tiva swaku Vayisrayele avata navela kuya vutisa Vakanana swaku vona va rimisa kuyini. I ntiyiso swaku Vakanana a va ni ntokoto amhakeni leyi naswona Vayisrayele avata djondza swokarhi ka vona. Kambe nghozi ayi li kolanu. Vakanana ava gandzela Bali naswona ndlela leyi ava rima hi yona ayi  kuceteliwile hi swihena leswi aswi tirhiseliwa kugandzela xikwembu lexi xa mavunhwa. Hi xikombiso, ava vula swaku Bali hi yena muyendli wa matilo ni munisi wa timpfula. Yehovha a angaswi lavi leswaku vanhu va yena va kangayisiwa hi mavunhwa lawa. Kambe hambileswi ava beke ndleve makhambi manyingi, ava zanga vamu yingisa. Va lange kugandzela Bali. (Tinhl. 25:3, 5; Vaava. 2:13; 1 Tiho. 18:18) Swoswi vona ndlela leyi Sathana aswi koteke ha yona kuphasa Vayisrayele.

7. Kupfumela ka Vayisrayele kuringisiwe kuyini loko va nghene ka Tiko Leli Tshembisiweke?

⁷ Ntlhamu wa kusungula lowu Sathana awu tirhiseke kuve kunavela ka ntumbuluku loku Vayisrayele a va li na kona ka kuvona mpfula yi na leswaku yi kulisa swimilana swa vona. Mpfula ayi kala ka Tiko Leli Tshembisiweke ka tiwheti ta Abril kuya ka Setembro kambe ayi sungula kuna kolomuya ka wheti ya Outubro. Leswaku va tama va hanya naswona swimilana swa vona swi kula, ava fanele va nyimela nguva ya timpfula. Kambe Sathana ava kanganyisile, ava yendla va pimisa swaku akuva swilo swiva fambela kahle, ava fanele va ringisela swihena swa matiko lawa amava rhendzelile, lawa ama kholwa swaku swikwembu swa wona swinga nisa mpfula loko maswi yendlela magandzelo. Lava avanga tiyanga kupfumeleni ka vona ka Yehovha vaswi kholwile leswo. Ava pimisa swaku loko va gandzela Bali, akungata va ni ndlala.

8. Hi wihi ntlhamu wa wumbirhi lowu Sathana awu tirhiseke? Hlamusela.

⁸ Ntlhamu wawumbirhi: Sathana a va kucetele leswaku vava ni kunavela kobiha. Matiko lawa amanga gandzeli Yehovha ama yendla timhaka ta masangu hi ndlela ya kunyenyetsa swinene loko ma gandzela swikwembu swa wona. Ama yendla wunghwavani, ma pfumelela vanhu va limbewu leli fanaka va famba masangu xikan’we ma tlhela ma pfumelela mixaka yin’wana ya kufamba masangu leyi hoxeke. (Det. 23:17, 18; 1 Tiho. 14:24) Matiko lawa ama kholwa swaku loko ma yendla leswi, swikwembu swa wona aswita katekisa masimu ya wona naswona amata tshovela swakudla swotala. Vayisrayele vanyingi va kokekile va za va ya gandzela swikwembu swa mavunhwa ntsena hi kunavela kutitsakisa hi timhaka ta masangu. Hi ndlela leyi, va phasiwile hi ntlhamu wa Sathana.

9. Hikuya hi Hosiya 2:16, 17, Sathana aswi kotise kuyini kuyendla Vayisrayele va khohlwa Yehovha ni ndlela leyi a lavaka kugandzeliwa ha yona?

⁹ Ntlhamu wawunharhu: Sathana a yendle leswaku Vayisrayele va khohlwa Yehovha ni ndlela leyi a lavaka kugandzeliwa ha yona. Amasikwini ya muprofeta Yeremiya, Yehovha a vule swaku vaprofeta va mavunhwa ava ringeta kuyendla Vayisayele va khohlwa vito la yena ‘hi mhaka ya Bali.’ (Yer. 23:27) Swi tikomba ingaku Vayisrayele va nyime kutirhisa vito la Yehovha ivi vali siva hi Bali, leli vulaka “N’winyi” kumbe “Hosi”. Leswi swi yendle Vayisrayele vangahaswi koti kuhambanisa ka Yehovha na Bali. Hi mhaka leyo, va sungule kupatsela swihena swa wugandzeli la Bali loko va gandzela Yehovha. — Lerha Hosiya 2:16, 17.

10. Hi yihi mintlhamu leyi Sathana ayi tirhisaka namuntlha?

¹⁰ Ni namuntlha Sathana a tirhisa mintlhamu leyi fanaka leswaku a yendla vanhu va va swib’ochwa swa yena. Aswi yendlisa kuyini? A tirhisa swilo leswi hi ntumbuluku vanhu vaswi navelaka; a yendla vanhu va pimisa swaku aswi hoxanga kufamba masangu ni munhu lweyi unga chadangiki na yena kumbe kufamba masangu ni munhu wa limbewu leli fanaka  naswona a tlhela a yendla leswaku va khohlwa Yehovha ni ndlela leyi a lavaka kugandzeliwa ha yona. Swoswi ahi voneni swaku Sathana a yendlisa kuyini kuva vanhu va kohlwa Yehovha.

11. Sathana a yendle leswaku vanhu va khohlwa Yehovha hi ndlela yihi?

¹¹ Sathana a yendla leswaku vanhu va khohlwa Yehovha ni ndlela leyi a lavaka kugandzeliwa ha yona. Ndzhaku ka lifu la vapostola va Yesu, van’wana lava ava tivula Vakreste va sungule kuhangalasa mavunhwa. (Mint. 20:29, 30; 2 Tes. 2:3) Leswo swi yendle leswaku ntiyiso hi Xikwembu wungaha tiveki. Hi xikombiso, loko va hundzuluxela Bibele avangaha tirhisi vito lelinge Yehovha. Matshan’wini ya leswo, avali siva hi rito lelinge “Hosi”. Leswi vaswi yendleke swi sivele vanhu kuvona kuhambana axikarhi ka Yehovha ni “tihosi” tin’wana leti kuvulavuliwaka hi tona aMatsalweni. (1 Kor. 8:5) Tani hileswi rito lelinge ‘Hosi” li tlheleke li tirhiseliwa kuvitana Yesu, vanhu se avangahaswi twisisi swaku vanhu lavambirhi va hambanile. (Yoh. 17:3) Leswi swi yendle leswaku kusungula djondzo ya mavunhwa ya leswaku ku ni swikwembu swinharhi ka xikwembu xin’we. Hinkwaswu leswi swi yendle vanhu va pimisa swaku ahingeswi koti kutiva Xikwembu. Ahi kunyenyentsa ka mavunhwa lawa! — Mint. 17:27.

12. I yini leswi tikereke tiswi kucetelaka naswona hilaha Varhoma 1:28-31 yi kombaka ha kona, hi lihi vuyelo lelinga kona?

¹² Sathana a kucetela vanhu leswaku vava ni kunavela kobiha. Ankameni wa Vayisrayele, Sathana a tirhise wukhongeli la mavunhwa kuva a hlohlotela kufambelana masangu loku hoxeke. Ni namuntlha a yendla leswi fanaka. Tikereke tava pfumelela vanhu va tona kufambelana masangu hi ndlela leyinga fambisaniki ni kurhandza ka Xikwembu; ti vula swaku aswi hoxanga kuva vanhu lavanga chadangiki kumbe va limbewu leli fanaka va famba masangu. Hi mhaka leyo, vanhu vanyingi lava vulaka swaku va gandzela Xikwembu avahayi landzi minawu ya Yehovha amhakeni leyi. Ka papila leli Pawulo a tsaleleke Varhoma, a hlamusele vuyelo la kuva tikereke ti hlohlotela mukhuva lowu wa kubiha. (Lerha Varhoma 1:28-31.) Ka lona a vulavule hi swilo ‘leswingafaneliki’, leswi patsaka kufambelana masangu hinkwaku lokunga fambisaniki ni kurhandza ka Yehovha, hambi ni loku yendliwaka hi vanhu va limbewu leli fanaka. (Rhom. 1:24-27, 32; Nhla. 2:20) Hi mhaka leyo, i swa lisima kuyingisa leswi Bibele liswi djondzisaka amakheni leyi.

13. Hi wihi ntlhamu wun’wana lowu Sathana awu tirhisaka leswaku a phasa vanhu?

 ¹³ Sathana a tirhisa kunavela ka ntumbuluku loku hinga na kona leswaku ahi phasa. Hi xikombiso, hi ntumbuluku hi navela kutihlayisa ni kuhlayisa mindjangu ya hina hi ndlela leyinene. Leswaku hi kota kuyendla leswo, hi djondza ntirho wokarhi. (1 Tim. 5:8) Minkama yin’wana swingaha boha ku hi ya xikolweni naswona hi va vadjondzi lavanene. Hambileswo, hi fanele hi tivonela. Ka matiko manyingi, axikolweni munhu anga djondzisiwi kutiva kuyendla swilo swokarhi ntsena, kambe a tlhela a djondzisiwa wutivi la misava. Hi xikombiso, a djondzisiwa swaku Xikwembu axi kona ni leswaku Bibele ahi la nchumu. A djondzisiwa swaku hinkwavu lava kholwaka leswaku swilo hinkwaswu swiyo tumbuluxiwa i swiphunta. (Rhom. 1:21-23) Tidjondzo hinkwatu leti ti lwisana ni ‘wutlharhi’ la Xikwembu. — 1 Kor. 1:19-21; 3:18-20.

14. Wutivi la misava li khutaza yini?

¹⁴ Wutivi la misava li lwisana ni minawu ya Yehovha ya kululama. Ali khutazi vanhu kukombisa handzu wa moya. Kuhambana ni leswo li khutaza “mintirho . . . ya nyama.” (Gal. 5:19-23) Li khutaza vanhu kuva va tibyela. Hi mhaka leyo, vanhu vanyingi ‘vatirhandza’. (2 Tim. 3:2-4) Leswo swi hambane kule swinene ni leswi Xikwembu xiswi nyimeleke ka malandza ya xona. Xikwembu xi lava leswaku hi tiveka hansi hi tlhela hi va vanhu vorhula. (2 Sam. 22:28) Van’wana ka lava va ngheneke univhersidadi va sungule kupimisa kufana ni vanhu va misava matshan’wini ya kukongomisiwa hi Xikwembu. Ahi voneni xikombiso xa makwerhu mun’wana lweyi a weke ka ntlhamu lowu.

15-16. I yini leswi hingaswi djondzaka ka ntokoto wa makwerhu lweyi waxisati?

¹⁵ Makwerhu mun’wana waxisati lweyi anga ni malembe yotlula 15 a li ka ntirho wa nkama  hinkwawu a li: “Leswi ninga Mboni ya Yehovha, ni nyikiwe switsundzuxo swa kutala leswi vulavulaka hi kudjondza awunivhersidade kambe aniswi tekelanga nhlokweni. Ani tibyela swaku aswi tirhi ka mina”. Kuve lihi vuyelo la kuva a nghene awunivhersidade? Yena hi yexe wa hlamusela: “Ni tsumbule swaku ayini dlela nkama wawunyingi swinene lakakuva hambi nkama wa kukhongela ka Yehovha, wa kuya antirhweni wa nsimu ni wa kulungiselela minhlanganu aningahawu kumi. A nkama ninga tsumbula swaku awunivhersidade ali wonha wuxaka la mina na Yehovha nili tshikile.”

¹⁶ Kudjondza wunivhersidadi swive ni vuyelo lihi ka makwerhu lweyi? Yena wa hlamula: “Swa danisa kuswi hlaya kambe kuvula ntiyiso awunivhersidade lini wonhile. Lini yendle ni tshamela kusolasola vanhu van’wana, ngopfongopfu vamakwerhu, kunyimela swotala ka vona ni kutlhela ni tihambanisa na vona. Swini tekele nkama leswaku ni tshika matitwelo lawo. Xiyimu lexi xini djondzise swaku kunga yingisi switsundzuxo leswi Yehovha aswi nyikelaka hi kutirhisa nhlengeletanu ya yena swi ni nghozi yayikulu swinene. Yehovha aaswi tiva leswi aswi li swinene ka mina. Loko ani yingisile!”

17. a) Hi fanele hi tiyimisela kuyendla yini? b) Hita bula hi yini ka djondzo leyi landzaka?

¹⁷ Onge hinkwerhu hinga tiyimisela kunga phasiwi hi ‘tijondzo ta vutlhari, hi marito ya mavunhwa lawa mangapfuniki nchumu’ ya misava leyi ya Sathana. Hinga tshukeni himu pfumelela Sathana ahi kanganyisa. (1 Kor. 3:18; 2 Kor. 2:11) Hingamu pfumeleleni ahi yendla hi khohlwa Yehovha ni ndlela leyi a lavaka leswaku himu gandzela ha yona. Ahi yingiseni leswi Yehovha aswi vulaka naswona hingamu pfumeleleni Sathana ahi yendla hi pimisa swaku minawu ya Yehovha ayi sizi nchumu lakakuva hi tshika kuyi landzela. Kambe hita yendla yini loko hi tsumbula swaku se hi sungula kuvona swilo hi tihlo la misava? Djondzo leyi landzaka yitahi pfuna kuvona ndlela leyi Bibele lingahi pfunaka ha yona kuhlula ‘swihingakanyo hinkwaswu leswi tlakukeke’ swa mapimisela ni mahanyela yobiha ya misava leyi. — 2 Kor. 10:4, 5.