1. E ‵tusa mo te Kolose 2:4, 8, e ‵fuli pefea ne Satani a ‵tou mafaufau ke faka‵logo ki a ia?

E MANAKO Satani o fai tatou ke fulitua ki a Ieova. Ke fakataunu tena manakoga tenā, e taumafai a ia o ‵fuli ‵tou mafaufauga, ko tena uiga ke ‵fuli ‵tou mafaufau ko te mea ke faka‵logo tatou ki a ia. E taumafai a ia o fakakolekole io me fakaloiloi tatou ke tau‵tali i a ia mai te faiga o mea kolā e ‵gali ki a tatou.—Faitau te Kolose 2:4, 8.

2-3. (a) Kaia e ‵tau o ‵saga tonu atu tatou ki te faka‵pulaga ne fakamau i te Kolose 2:8? (e) Ne a mea ka sau‵tala tatou ki ei i te mataupu tenei?

² E mata, ko ‵tu tatou i se tulaga fakamataku māfai ko takitaki ‵se ne Satani? Ao! Masaua, ne seki tusi ne Paulo a te faka‵pulaga i te Kolose 2:8 ki tino sē tali‵tonu. Ne tusi ne ia ki Kelisiano kolā ne fakaekegina ki te agaga tapu. (Ko. 1:2, 5) Ne ‵tu a Kelisiano i te taimi tenā i se tulaga fakamataku, kae ko sili atu te fakamataku o te ‵tou tulaga i aso nei. (1 Koli. 10:12) Kaia? Satani ko oti ne ‵pei ifo ki te lalolagi, kae ko saga tonu a ia o takitaki ‵se a tavini fakamaoni a te Atua. (Faka. 12:9, 12, 17) E se gata i ei, ko ola tatou i te taimi telā a tino amio ma‵sei kae fakaloiloi tino ko gasolo aka “mai te masei o na ma‵sei atu.”—2 Timo. 3:1, 13.

³ I te mataupu tenei, ka sau‵tala tatou ki te auala e fakaaoga ei ne Satani a “takolekolega sē aoga” i ana taumafaiga ke ‵fuli ‵tou mafaufau. Ka onoono tatou ki ana “togafiti ma‵sei” e tolu. (Efe. 6:11) Kae i te suā mataupu ka sau‵tala tatou ki auala ke tapale kea‵tea a ikuga sē ‵lei o ana togafiti ne fai ki ‵tou mafaufau. Muamua la, ke mafau‵fau tatou ki mea e mafai o tauloto ne tatou  mai te auala ne takitaki ‵se ne Satani a tino Isalaelu, i te otiga ne ulu atu ki loto i te Fenua o te Folafolaga.

4-6. E ‵tusa mo te Teutelonome 11:10-15, ne a fakama‵fuliga ne fai ne tino Isalaelu e uiga ki te ‵tokiga o lakau i te lotou ‵maiga o ‵nofo i te Fenua o te Folafolaga?

⁴ Ne poto eiloa a Satani i te tofotofo ne ia a tino Isalaelu ke ifo ki tupua. Ne fai pefea ne ia te mea tenā? Ne fakaaoga ne ia te lotou manakoga ke ‵sala a meakai ma latou. I te uluatuga a tino Isalaelu ki te Fenua o te Folafolaga, ne ‵tau o ‵fuli ne latou te auala e ‵toki ei olotou lakau ke maua a meakai. I te ‵nofoga i Aikupito, ne fakasiusiu ne tino Isalaelu olotou fatoaga mai te fakaaogaga o vai e asu mai i te Naila. Kae ko te ‵tokiga o lakau i te Fenua o te Folafolaga, e se faka‵na ki vai e asu mai i se vaitafe lasi ‵ki, kae mai i vaiua, e pelā foki mai te ‵sau telā e fakasiusiu i ei a lakau. (Faitau te Teutelonome 11:10-15; Isa. 18:4, 5) Tela la, ne ‵tau o tauloto a tino Isalaelu ki auala ‵fou o te ‵tokiga o lakau. E se faigofie te mea tenā me i te tokoukega o tino kolā e apo i te ‵tokiga o lakau ko oti ne ‵mate atu i te koga lavaki.

⁵ Ne fai atu a Ieova ki ana tino me ko ‵fuli olotou fakanofonofoga. Oti aka, toe fai mai ei ne ia te suā faka‵pulaga, telā i te taimi muamua e mafai o foliga pelā me seai sena sokoga ki te mataupu ki te ‵tokiga o lakau: “Fakaeteete ke mo a ma takitaki ‵se otou loto kae ‵fuli atu koutou o tapuaki ki nisi atua kae ifo ki a latou.” (Teu. 11:16, 17) Kaia ne fai mai ei a Ieova ke fakaeteete i te tapuaki ki atua ‵se i te taimi e faipati mai ei a ia e uiga ki te tauloto ki auala ‵fou e ‵toki ei a lakau?

⁶ Ne iloa ne Ieova me ka tofotofogina a tino Isalaelu ke tauloto ki auala ‵fou e ‵toki ei lakau mai tino fapaupau i olotou tafa. E tonu, e sili atu te atamai o olotou tuakoi i lō tino Isalaelu, kae mafai o tauloto ne tino o te  Atua ne atamai ‵fou mai i a latou, kae e isi se mea fakamataku. Ko oti ne fakamalosi aka a mafaufau o tino fai fatoaga Kanana ne te lotou tapuakiga ki a Paala. E ‵kilo atu latou ki a Paala e pelā me ko te pule o te lagi kae ko te tino foki e tuku mai ne ia a vaiua. E se manako a Ieova ke takitaki ‵se ana tino ne vaegā talitonuga ‵se penā. Kae e uke taimi ne filifili faeloa ne tino Isalaelu ke tapuaki latou ki a Paala. (Nume. 25:3, 5; Fama. 2:13; 1 Tupu 18:18) Ke onoono ki te auala ne fai ei ne Satani ke ‵nofo pologa a tino Isalaelu ki a ia.

7. Se a te tofotofoga o te fakatuanaki ne fepaki mo tino Isalaelu i te lotou uluatuga ki loto i te Fenua o te Folafolaga?

⁷ A te togafiti muamua ne fakaaoga ne Satani ko te manakoga masani ke isi ne vaiua ke fakasiusiu ki ei te laukele. E se uke a vaiua i te Fenua o te Folafolaga i te fakaotiga o Apelila ke oko ki a Setema i tausaga katoa. Ne fakalago‵lago eiloa latou ki vaiua kolā e kamata o ‵to sāle i a Oketopa. Ne fakaloiloi ne Satani a tino Isalaelu ke tali‵tonu me i te auala ke manuia latou, ko te fai ne latou a faifaiga kolā e fai ne olotou tuakoi fapaupau. Ne tali‵tonu a tuakoi konā me isi ne faifaiga fakalotu e ‵tau o fai ko te mea ke faka‵to ifo ne olotou atua a vaiua kolā e manakogina. A tino kolā e se lava te fakatuanaki ki a Ieova ne tali‵tonu me tenei fua te auala e tasi e fai ei ke seai se tau la, tenā ne fai ei ne latou a faifaiga fakalotu fapaupau ke fakaaloalo atu ei ki te atua ‵se ko Paala.

8. Se a te lua o togafiti ne fakaaoga ne Satani? Fakamatala mai.

⁸ Ne fakaaoga ne Satani te lua o togafiti ki tino Isalaelu. Ne fai ne ia ke fia‵fia latou ki manakoga fakatauavaga sē ‵tau. Ne tapuaki a atufenua fapaupau ki olotou atua mai te aofia i faifaiga fakatauavaga matagā. A te vaegā tapuakiga matagā tenei ne aofia foki i ei a fāfine mo tāgata talitāgata i te faletapu. Ne talia ne latou a amioga fakatauavaga i te va o tāgata pelā foki mo te va o fāfine kae ‵kilo atu ki ei pelā me se mea ‵lei! (Teu. 23:17, 18; 1 Tupu 14:24) Ne tali‵tonu a tino fapaupau me i faifaiga fakalotu konei ne fakamalosi atu ki olotou atua ke fai ne latou ke olaola ‵lei te laukele. Ne gali ki tino Isalaelu e tokouke a faifaiga fakatauavaga a tino fapaupau konei kae talia ne latou ke tapuaki atu latou ki atua ‵se. A te tonuga loa, ne fai ne Satani a latou ke ‵nofo pologa ki a ia.

9. E ‵tusa mo te Hosea 2:16, 17, ne fai pefea ne Satani ke se manino te kilokiloga a tino Isalaelu ki a Ieova?

⁹ Ne fakaaoga ne Satani te tolu o togafiti. Ne fai ne ia ke se manino te kilokiloga a tino Isalaelu ki a Ieova. I aso o te pelofeta ko Ielemia, ne folafola mai a Ieova me i pelofeta ‵loi ne fai ne latou Ana tino ke puli i a latou Tena igoa “ona ko Paala.” (Iele. 23:27) Fakamuli loa, ne seki toe fakaaoga ne tino o te Atua te igoa o Ieova kae sui ne latou ki te igoa o Paala, telā e fakauiga ki te “Tino i a ia a Mea” io me ko te “Matai.” A te faifaiga tenei ne fai ei ke faigata o iloa ne tino Isalaelu te ‵kese o Ieova mo Paala, kae ke faigofie ki a latou ke pulutaki a faifaiga fakalotu ki a Paala mo te tapuakiga ki a Ieova.—Faitau te Hosea 2:16, 17 mo te fakamatalaga mai lalo.

10. Ne a togafiti e fakaaoga ne Satani i aso nei?

¹⁰ E fakaaoga foki ne Satani a togafiti konā i aso nei. E ‵po aka ne ia a tino e auala i olotou manakoga masani, fakamalosi aka faifaiga fakatauavaga sē ‵tau, kae fai ke se manino te kilokiloga a tino ki a Ieova. Ke sau‵tala muamua tatou ki te togafiti fakaoti.

11. I te auala fea ne fai ne Satani ke se manino te kilokiloga a tino e uiga ki a Ieova?

¹¹ E fai ne Satani ke se manino te kilokiloga  a tino ki a Ieova. Mai tua o te ‵mateatuga o apositolo a Iesu, ne kamata o akoako ne tino kolā e fai mai i a latou ne Kelisiano a akoakoga sē ‵tonu. (Galu. 20:29, 30; 2 Tesa. 2:3) Ne kamata o fai ne aposetate konei ke se manino a te fakamatalaga tonu e uiga ki te Atua tonu e tokotasi. E pelā me se fakaakoakoga, ne taofi ne latou te fakaaogaga o te igoa o te Atua i olotou ‵kopi o te Tusi Tapu kae talia ne latou a tugapati pelā mo “te Aliki.” Mai te tapalega kea‵tea o te igoa totino o te Atua kae sui ki “te Aliki,” ko fakafaigata ne latou ke lavea ne te tino faitau a te ‵kese o Ieova mo nisi “aliki” kolā e fakaasi mai i te Tusi Tapu. (1 Koli. 8:5) E fakaaoga ne latou te tugapati e tasi “te Aliki” ke fakasino atu ki a Ieova mo Iesu, ko faigata ei ki tino ke malamalama me i a Ieova mo tena Tama ne tino kese‵kese kolā e ‵kese lā tulaga. (Ioa. 17:3) A te ‵numiga tenei ne iku atu ki te mafuamaiga o te akoakoga ko te Tolutasi—se akoakoga telā e se akoako mai i te Muna a te Atua. Ona ko te mea tenā, ko se iloa ne tino e tokouke a te Atua kae tali‵tonu me e se mafai o iloa ne tatou a ia. Mafaga o loi!—Galu. 17:27.

12. Ne a mea ne fakamalosi aka ne lotu ‵se, kae ne a mea ne iku mai i ei, e pelā mo te mea e fakaasi mai i te Loma 1:28-31?

¹² E fai ne Satani ke fia‵fia a tino ki manakoga fakatauavaga sē ‵tau. I Isalaelu mua, ne fakaaoga ne Satani a lotu ‵se ke fakamalosi aka ei a faifaiga fakatauavaga sē ‵tau. E fai foki ne ia penā i aso nei. E talia kae fakamalosi aka ne lotu ‵se a amioga fakatauavaga sē ‵tau. Kae ne iku atu ei ki te tiakinaga ne tino kolā e fai mai me tavini latou ki te Atua, ana tulaga ma‵luga i mea tau amioga. E fakamatala mai ne te apositolo ko Paulo i tena tusi ki te kau Loma a te mea ne iku mai i ei. (Faitau te Loma 1:28-31.) E aofia i “mea sē ‵tau” ko vaegā amioga fakatauavaga sē ‵tau katoa, e aofia ei te fia‵fai o tāgata ki tāgata mo fāfine ki fāfine. (Loma 1:24-27, 32; Faka. 2:20) Ko oko loa te tāua mō tatou ke ‵piki ‵mau ki akoakoga manino mai te Tusi Tapu!

13. Se a te suā togafiti e fakaaoga ne Satani?

¹³ E fakaaoga ne Satani a manakoga masani o tino. E isi se manakoga masani i a tatou ke tauloto ki se poto fou telā ka aoga ki te tausiga o koe mo tou kāiga. (1 Timo. 5:8) E masani o maua ne tatou te atamai tenā mai te olo atu ki se akoga kae tauloto malosi ki ei. Kae e ‵tau o fakaeteete tatou. E akoako atu i  akoga i fenua e uke a poto kolā e aoga, kae akoako atu foki i ei a poto o tāgata. E fakamalosi atu ki tama‵liki a‵koga ke fakafesili aka me mata e isi eiloa se Atua kae ke se fakatāua ne latou te Tusi Tapu. E akoako atu ki a latou me i te evolusione ko te ‵toe auala ‵lei eiloa telā e fakamatala mai ei te māfuaga o te ola. (Loma 1:21-23) A vaegā akoakoga penā e ‵teke atu ki “te poto o te Atua.”—1 Koli. 1:19-21; 3:18-20.

14. Ne a mea e fakamalosi aka ne poto o tāgata?

¹⁴ A poto o tāgata e fakaseaoga io me e se fetaui mo tulaga amio‵tonu o Ieova. E se fakamalosi aka i ei a fuataga o te agaga o te Atua, kae ko “galuega o te foitino.” (Kala. 5:19-23) E fakamalosi aka i ei te fakamatamata mo te fia sili, kae iku atu ei ki te “fia‵fai tupe” o tino. (2 Timo. 3:2-4) E ‵kese ‵mao eiloa a uiga konei mo te agaga loto maulalo telā e fakamalosi atu ke maua ne tavini a te Atua. (2 Samu. 22:28) A nisi Kelisiano kolā ne kausaki atu ki akoakoga ma‵luga i iunivesiti ko oti ne ‵fuli aka olotou mafaufau ne mafaufauga o tino i lō te mafaufau o te Atua. Ke mafau‵fau tatou ki se fakaakoakoga o se mea telā e mafai o tupu.

15-16. Ne a mea ne tauloto ne koe mai se tala o se tuagane e tokotasi?

¹⁵ Ne fai mai se tuagane telā ne galue i te taviniga tumau i tausaga e 15, penei: “E pelā me se Molimau papatiso, ne faitau kae lagona ne au a fakamatalaga ki te fakamataku o te kausaki atu ki akoakoga i te iunivesiti, kae ne seki fia saga au ki ei. Ne mafaufau au me e se aoga a pati fakatonutonu konā ki a au.” Ne a mea faiga‵ta ne fepaki mo ia? Ne fai ‵tonu mai a ia: “A te tauloto ki aku mea a‵koga ne manakogina a taimi mo taumafaiga e uke ‵ki, kae ne tō fakalavelave malosi au ke ‵talo ki a Ieova e pelā mo taimi mua, ko tō fi‵ta ke sau‵tala  fakatasi mo nisi tino ki mea faka-te-Tusi Tapu, kae ko tō kaugata ke fakatoka faka‵lei ki fakatasiga. E fakafetai au me i te taimi ne iloa ei ne au me i te kausaki malosi ki akoakoga ma‵luga ko fakamasei ne ia toku fesokotakiga mo Ieova, ne iloa ne au me ko ‵tau o taofi aka. Kae ne taofi eiloa ne au.”

¹⁶ Ona ko akoakoga ma‵luga, ne pokotia pefea te auala e mafaufau ei a te tuagane tenei? Ne tali mai a ia: “Au e mā ke fakaasi ‵tonu me i te akoakoga ne kausaki au ki ei ne akoako ne ia au ke kilo atu ki vāivāiga o nisi tino, maise oku taina mo tuagane, ke fakamoemoe ke ‵lei atu olotou mea e fai, kae ke ‵vae kea‵tea mai i a latou. E leva ‵ki te taimi ne galue ei au ke fakagata te mafaufau penei. Ne fakaasi mai ne te mea ne tupu a te fakamataku māfai ko fakaseaoga ne tatou a faka‵pulaga mai te ‵tou Tamana i te lagi e auala i tena fakapotopotoga. E sili atu te iloa ‵lei ne Ieova a au i lō au eiloa. Ne ‵tau fua mo au o fakalogo!”

17. (a) Se a te mea e ‵tau o fakaiku aka ne tatou? (e) Se a te mea ka sau‵tala tatou ki ei i te suā mataupu?

¹⁷ Ke na fakaiku aka ke mo a ma nofo pologa koe ki “poto faka-te-lalolagi mo takolekolega sē aoga” o te lalolagi a Satani. Ke tumau i te matapula‵pula ki togafiti a Satani. (1 Koli. 3:18; 2 Koli. 2:11) Sa talia ne koe ke fai ne ia ke se manino tau kilokiloga e uiga ki a Ieova. Ola e ‵tusa mo tulaga ma‵luga a Ieova i mea tau amioga. Kae ke mo a ma fakatogafiti ne Satani a koe ke fakaseaoga a pati fakatonutonu a Ieova. Kae e a, māfai ko iloa ne koe me ko oti ne kamata o pokotia koe i mafaufauga o te lalolagi nei? Ka fakaasi mai i te suā mataupu a te auala ka fesoasoani mai ei te Muna a te Atua ke ‵fuli ne tatou a mafaufauga mo faifaiga masani kolā ko “leva ne ‵mau olotou aka.”—2 Koli. 10:4, 5.