1. Jakwenda Paulo umio cimowang’ ma kani ni Jukristu mi rundi ma kwong’a?

JAKWENDA Paulo ukiewo ni Jukristu mi rundi ma kwong’a kumae: “Kud wuporu ku ng’om maeni.” (Rum. 12:2) Pirang’o etuc nimio cimowang’ ma thwolo thwolo kumeno ni Jukristu m’udaru thiero kwo migi ni Mungu man ma tipo uwiro?​—Rum. 1:7.

2-3. Sitani betio ku bodho ma nenedi pi nicwaluwa wawek Yehova? Ang’o ma copo konyowa niwodho cen paru ma reco m’umondo i wiwa?

² Paulo ubino dieng’ pilembe Jukristu moko nwang’u giweko rieko mi ng’om pa Sitani ucaku wingo wigi. (Ef. 4:17-19) Lembe maeno copo nwang’u wan bende. Sitani romo tio ku bodho ma tung’ tung’ pi niwingo wiwa, pilembe en re m’etie jabim mi ng’om maeni. I kind bodhone moko, ecopo tio kud ava ma watie ko. Saa moko nyo wabemito nia piwa yiki; pieno, Sitani copo tio kud ava maeno pi nicwaluwa wawek Yehova. Bende, ecopo tio ku lembe ma juponjo kowa i somo kunoke lembsuru moko pi nicwaluwa wapar lembe i kite m’ebemito.

³ Nyo wacopo tundo niwodho paru moko ma rac ma dong’ udaru guro ulage “ma tek” i wiwa? (2 Kor. 10:4) Paulo ukiewo kumae: “Waberedho pidoic m’udhunjo piny, man gin m’utingre kum ng’eyong’ec pa Mungu, man wakelo pidoic ceke kubang’gi ni kol m’edoko ko wor ni Kristu.”  (2 Kor. 10:5) Eyo, ku kony pa Yehova, wacopo tuc niwodho cen paru moko ci ma rac m’uguro ulage i wiwa. Tap calu ma yath copo kabu adra cen kud i kum ng’atini, Lembe pa Mungu bende copo kabu paru ceke ma reco ma ng’om pa Sitani uroyo i wiwa.

4. Dhanu ma pol gitimo alokaloka ma kani kinde ma gicaku ponjo lemandha?

⁴ Kepar pir alokaloka m’igam itimo kinde m’icaku ponjo lemandha mi Biblia man m’icaku timo ni Yehova. Ni ju ma pol m’i kindwa, ugam ukwayu nia giwek lembe ma reco ma gibino timo. (1 Kor. 6:9-11) Watie ku mutoro lee dit pilembe Yehova ugam ukonyowa niweko timo ma tung’ tung’ m’umaku piny ungo!

5. Nimakere ku Jurumi 12:2, wacikara nitimo lembe ario ma kani?

⁵ Re kwayu ngo wapar nia wambe ku yeny mi timo alokaloka moko ci. Kadok nwang’u wadaru weko dubo ma pek ma nyo wabed watimo i wang’ nilimo batizo de, asu ubekwayu wabed ku wang’wa kara kud wamond i timo moko ma copo ketho wapodho kendo i dubone. Wacopo timo nenedi? Paulo uwacu kumae: “Kud wuporu ku ng’om maeni: endre wubed ma kothwu lokre ni kum dwoko pidoiwu nyen.” (Rum. 12:2) Pieno, ubekwayu watim lembe ario. Mi kwong’o, wacikara ngo ‘niporara ku ng’om maeni,’ niwacu kud wawek ng’om maeni uwing wiwa. Mir ario, ubekwayu ‘walok kothwa dok nyen.’

6. Ponji ma kani ma wacopo nwang’u niai kud i wec pa Yesu ma nwang’ere i Matayo 12:43-45?

⁶ Paulo ubino weco ngo pir alokaloka ma watimo yo woko kende, ento ebino weco pir alokaloka m’ukwayu watim yor i iwa bende. (Nen sanduku ma thiwie tie, “ Nyo ibelokiri andhandha kunoke nyo ibetimo alokaloka yo woko kende?”) Wacikara nidwoko  pidoiwa nyen, niwacu, ubekwayu walok ava mwa, timo mwa man thelembe ma cwaluwa nitimo lembe moko. Pieno wan ceke wakepenjara kumae: ‘Pi nilubo tok Kristu, nyo abetimo alokaloka yo woko kende kunoke nyo abetimo alokaloka yor i ia de?’ Pire tie tek nidwoko wang’ penji maeno. Wec ma Yesu uyero ma nwang’ere i Matayo 12:43-45 (Som), unyutho nia ukwayu jutim lembe moko. Wecne ubemio iwa ponji ma e ma pire tek: Ka wadaru wodho paru ma reco kud i wiwa, wacikara niroyo paru m’uai i bang’ Mungu kakagi.

7. Kara watuc niwilo pidoiwa m’upondo ukwayu watim ang’o?

⁷ Nyo ecopere niwilo pidoiwa m’upondo, niwacu niwilo adundewa man kite ma waparu ko lembe? Eyo, Biblia unyutho nia ecopere. Eyero kumae: “Wudok nyen i tipo mi pidoiwu, man wurony ng’atu ma nyen ma calku koth Mungu ecwire i bedopwe ku leng’cwiny mi lemandha.” (Ef. 4:23, 24) Andha, wacopo tuc niwilo pidoiwa, re etie lembe ma yot ungo. Nicerara i kum paru man timo ma reco kende uromo ngo; ubekwayu walok ‘pidoiwa;’ niwacu wacikara niwilo ava mwa, timo mwa man thelembe ma cwaluwa i timo moko. Kara watund nitimo kumeno, ubekwayu wabed watim kero saa ceke.

8-9. Lembe m’umego moko ukadhu kud i ie ubenyutho nenedi nia pire tie tek niwilo pidoiwa m’upondo?

⁸ Wakewec iwi lapor p’umego moko m’ubino ng’atu ma kwiny. I wang’e, ebed emadhu kong’o lee mandha man ebed edhau ku dhanu saa ceke. Re kinde m’eponjo lemandha, eweko meth man dhau, e i ng’eye elimo batizo. Alokaloka m’etimo umio lembatuca ma lee dit i kabedo m’ebino i ie. Re nindo ma nok i ng’ei batizo pare, enwang’ere kud amulaic moko. Nindo acel ku dhuguthieno, jalwo moko m’umer ubin unyayu ali i wie ku yo pare. Ku kwong’a, umego maeno ukeubimo wi kwinyo pare. Re kinde ma jalwone uyanyu Yehova, kwinyo opo ma rac mandha i ie. E ecidh efwodo jalwone lee mandha. Pirang’o etimo kumeno? Kadok nwang’u ponji pare mi Biblia uketho eweko nifwodo dhanu de, re nwang’u fodi ewilo ngo pidoie m’upondo.

⁹ Re umego maeno uweko ngo nitimo alokaloka. (Rie. 24:16) Judong cokiri ukonye, eno uketho etimo mediri ma ber. I ng’eye, edoko jadit cokiri. Nindo moko, enwang’ere kud amulaic ma rom ku m’elar enwang’ere ko i wang’e. Dhuguthieno moko, kinde ma gini dhu lela Ot Ker, jalwo moko m’umer ubino mito nia efwod jadit cokiri acel ma gibino kugi. Umego maeno utimang’o? Ekwio lak kwinyo pa jalwone ku dwal ma yo man ku molo, bende elwoke nitundo yo pare. Pirang’o umego maeno utimo lembe m’ukoc ku m’egam etimo i wang’e? Pilembe saa maeno nwang’u dong’ ewilo pidoie m’upondo. Edoko ng’atu ma mol man ecaku kwo ku kwiocwiny ku dhanu mange. Lembuno umio yung lee ni Yehova!

10. Wacikara nitimang’o kara wawil pidoiwa m’upondo?

¹⁰ Alokaloka ma kumeno timere ngo mbwang’ kumeni, man etimere ngo pi nindo acel kende. Kara watim alokalokane, wacikara niii “kud amora ceke” ke pi nindo ma lee. (2 Pet. 1:5) Etie ngo nia pilembe watimo nindo ma dupa i lemandha ci alokalokane bitimere gire. Wacikara nitimo kero lee mandha kara wawil pidoiwa m’upondo. Pieno, lembe moko nuti m’ukwayu watim kara watuc nitimo alokaloka maeno. Wakewec iwi lembene moko.

11. Rwo konyowa nenedi nitimo alokaloka i pidoiwa?

¹¹ Lembe mi kwong’o ma wacikara nitimo utie nirwo. Kwayu warwo ve Daudi m’ugam ukwayu Mungu kumae: “Cwi adunde ma leng’ yor i ia, E Mungu; man idwok cwinya nyen atira yor i ia.” (Zab. 51:10) Wacikara ning’eyo nia watie ku yeny mi loko pidoiwa, man wakwai Yehova ukonywa. Ang’o ma copo tego cwinywa nia andha Yehova bikonyowa nitimo alokaloka? Lembe m’eng’olo ni Juisrael ma cwinygi bino nwang’ ma gibino kwo i rundi pa Ezekiel copo tego cwinywa lee; eyero kumae: ‘Abimio igi adunde acel, man abiketho tipo ma nyen yor i igi; . . . man abimio igi adunde mi ring’kum [niwacu adunde ma tie ayika nilubo telowic pa Mungu].’ (Eze. 11:19.) Yehova ubino ayika nikonyo nyithindho mir Israel maeno kara gitim alokaloka i pidoigi; wang’ei nia etie ayika nikonyo wan bende.

12-13. (a) Nimakere ku Zaburi 119:59, ubekwayu wanyam i lembang’o? (b) Icikiri nipenjiri ku penji ma kani?

¹² Lembe mir ario ma wacikara nitimo utie ninyamu i lembe. Kinde ma wabesomo Biblia kubang’ ceng’, ukwayu wabed wakoi saa pi ninyamu i lembe ma wabesomo kara watuc ning’eyo paru kunoke nen ma rac m’ubekwayu wawil. (Som Zaburi 119:59; Ebr. 4:12; Yak. 1:25) Wacikara ning’io cuu ka nyo watie ku kit paru m’ucungo iwi rieko mi ng’om maeni. Ka wanwang’u nia watie kud ayi ng’ico ma kumeno, ukwayu watim kero lee niwodhogi cen kud i wiwa.

¹³ Kepenjiri kumae: ‘Nyo fodi asu bang’ kumira moko udong’ i adundena?’ (1 Pet. 2:1) ‘Nyo jamcinga, somo m’asomo man kabedo m’aai i ie beketho anwang’u nia pira tie tek nisagu jumange?’ (Rie. 16:5) ‘Nyo abed anwang’u nia asagu ju ma gimbe ku kit piny m’atie ko, kunoke asagu ju ma rangi migi koc ku para?’ (Yak. 2:2-4) ‘Nyo giki mi ng’om pa Sitani ubecuku telo nen para?’ (1 Yoh. 2:15-17) ‘Nyo abed amaru galuwang’ ma tie ku lembe mi tarwang’ man rop i ie?’ (Zab. 97:10; 101:3; Amo. 5:15) Kan idwoko wang’ penji maeno, ibing’eyo ng’ico m’ubekwayu inyeg i kume. Ka watundo niwodho cen paru moko ma nwang’u uguro ulage “ma tek” i wiwa, wabinyayu anyong’a i Wegwa mi polo.​—Zab. 19:14.

14. Pirang’o wacikara ning’io jurimo ma beco?

¹⁴ Lembe mir adek ma wacikara nitimo utie ning’io jurimo ma beco. Mito ku mito ngo, dhanu ma wadikara kugi gibedo kud atelatela lee mandha i wiwa. (Rie. 13:20) Wang’ ma pol, dhanu ma watimo kugi tic kunoke ma wasomo kugi gikonyowa ngo niparu lembe i ayi ma Mungu umito. Ento i coko mi Jukristu, wacopo nwang’u jurimo ma beco. Cokiri re m’utie kaka ma wanwang’u i ie dhanu ma copo cwaluwa ‘i mer man i tic ma beco.’​—Ebr. 10:24, 25.

15-16. Sitani ubeii nitimo ang’o pi niwilo paru mwa?

¹⁵ Poi nia, Sitani ubemito elok ayi ma waparu ko lembe. Pieno, ebeii nitio kud ayi bodho moko ci pi ninyotho paru ma beco ma Lembe pa Mungu uroyo i wiwa.

¹⁶ Tin, Sitani ubemedere asu nipenjo penji m’egam epenjo ko Eva i podho mir Eden kumae: ‘Nyo andha Mungu wacu nia . . . ?’ (Tha. 3:1) I ng’om maeni ma Sitani ubebimo wie, wang’ ma pol wabed wanwang’ara i wang’ penji ma copo royo jiji i iwa; calu ve: ‘Nyo andha Mungu ukwero gamiri co ku co man mon ku mon? Nyo andha Mungu ubemito ngo nia itim foc mi Noeli man mi  nyoliri? Nyo andha Mungu peri copo kwero nia kud judwok rimo i kumi? Nyo andha Mungu ma jamer copo kwayu nia kud idikiri ku wedi peri ma jukoyo kud i cokiri?’

17. Ka ng’atu moko upenjo penji m’uroyo jiji i iwa pi yioyic mwa, wacikara nitimo lembang’o? Man nimakere ku Jukolosai 2:6, 7, lembene copo kelo adwogi ma kani?

¹⁷ Wacikara nicungo nging’ nging’ i yioyic mwa. Ka wanwang’u ngo dwokowang’ penji moko ma pire tek m’uneno yioyic mwa, jiji copo caku mondo i iwa nia wayio lemandha ngo. Nok nok, eno romo nyotho paru mwa man yioyic mwa. Dong’ i saa ma kumeno ubekwayu watim ang’o? Biblia uyero nia walok pidoiwa kara wang’ei “yeny ma Mungu yenyo m’e ber m’e yire de m’e cu ma ndhu de.” (Rum. 12:2) Ka wabeponjo Biblia wang’ ma pol, eno biketho wabinwang’u nia lembe ma wagam waponjo tie lemandha. Bende, wabiyio andhandha nia cik pa Yehova utie atira. E wabicungo nging’ nging’ ‘i yioyic,’ tap calu yen m’ulage nyang’ i ng’om.​—Som Jukolosai 2:6, 7.

18. Ang’o ma bikonyowa kara wagwokara i kum paru ma rac mi ng’om pa Sitani?

¹⁸ M’uweko in giri, ng’atu mange mbe ma copo tielo yioyic peri. Pieno, mediri nidwoko pidoii nyen. Rwo saa ceke; kwai Yehova ukonyi ku tipo pare maleng’. Nyam i lembe m’ibesomo i Biblia cuu mandha; mediri ning’io i paru peri man ning’eyo thelembe ma becweli i timo moko. Ng’ii jurimo ma beco; twii mer ku dhanu ma bikonyi niwilo paru peri. Kan itimo kumeno, ibiwodho cen paru ma rac ma ng’om pa Sitani uroyo i wii, man ibigwokiri kara kud gidwog i wii kendo. Bende, ibituc niredho “pidoic m’udhunjo piny, ku gin m’utingre kum ng’eyong’ec pa Mungu.”​—2 Kor. 10:5.