1. ¿Kamsänsa Pablojj alajjpachar sarañatak ajllit cristianonakarojja?

NAYRÏR patak maranakan jakir cristianonakarojja, apóstol Pablojj akham sänwa: “Jan jukʼampejj akapachankir jaqenakat yateqasis sarnaqapjjamti” sasa (Rom. 12:2). ¿Kunatsa Pablojj Diosar katuyata, ukhamarak alajjpachar sarañatak ajllit cristianonakar ukham sispachäna? (Rom. 1:7).

2, 3. 1) ¿Kunjamsa Supayajj Jehová Dios contra saytʼayañ munistu? 2) “Kunanakatï wali suma saytʼayatäki” uka jan wali amuyunakjja, ¿kunjamsa pʼeqesat apssna?

² Amuyatajja, yaqhep cristianonakajj jaqenakan amuyunakapampiw apayasipjjäna, ukaw apóstol Pablor wal llakisiyäna (Efes. 4:17-19). Jiwasas ukhamarakiw uka amuyunakamp apayassna. Jehová Diosat jan jitheqtayañ puedjjasajja, kunaymanitwa Supayajj engañjañ munistu. Inas wali uñtʼatäñ munañasa, wali aytatäñ munañas chuymasan utjaskakchi, ukanakampiw Supayajj Jehová Diosat jitheqtayistaspa. Kunjamtï jupajj munki ukham amuyañasatakejja, kunjamsa jilsuwaytan, kawkinsa jilsuwaytan, kunanaksa yateqañ utan yateqawaytan ukanakampiw engañjarakistaspa.

³ ¿“Kunanakatï wali suma saytʼayatäki”, jan ukajj wali saphintatäki uka jan wali amuyunak pʼeqesat apssnati? (2 Cor. 10:4). Pablojj akham sänwa: “Nanakajj pantjat taqe amuyunaksa Diosar jan uñtʼañasatak jarkʼki taqe ukanaksa tukjapjjtwa, jaqenakan amuyunakapsa mä presorjam  katuntasaw Cristor istʼañapatakejj irpapjjaraktjja” sasa (2 Cor. 10:5). Cheqas Jehová Diosan yanaptʼapampejja, jan wali amuyunak pʼeqesat apssnawa. Kunjamtï mä qollajj mä usutar waliptañapatak yanaptʼkejja, ukhamarakiw Diosan Arupajj jan wali amuyunak pʼeqesat apsuñatak yanaptʼistaspa.

4. Bibliat yateqasajj ¿kunanaksa jiwasat waljanejj apanukuwaytan?

⁴ Bibliat yateqasajj kunanaktï apanukuwayktan uk amtañäni. Jiwasat waljanejja, jan wali luräwinakwa Jehová Diosar serviñatak apanukuwaytanjja (1 Cor. 6:9-11). Taqe ukanak apanukuñatakejj Jehová Diosaw yanaptʼawayistu, ukatwa Jupar wal yuspärtanjja.

5. ¿Romanos 12:2 textojj kun lurapjjam sistusa?

⁵ Ukampis jan wali lurañanak apanukjjasajj jukʼamp cambionak luraskakiñasawa. Janïr bautisatäkasin lurkayätan uka jachʼa juchanak janis lurjjstanjja, uka juchanakar jan purtʼasiñatak chʼamachasiskakiñasawa. ¿Kunsa ukatak lursna? Pablojj akham sänwa: “Jan jukʼampejj akapachankir jaqenakat yateqasis sarnaqapjjamti, jan ukasti machaqar tukupjjañamatakejj amuyunakam machaqar tukuyapjjam” sasa (Rom. 12:2). Ukhamajj ¿kunsa lurañasa? Maya, ‘janiw akapachankir jaqenakat yateqasis sarnaqañasäjjeti’. Paya, ‘amuyunakas machaqaruw tukuyañasa’.

6. Jesusan uñachtʼäwipajj Mateo 12:43-45 texton jikjjataski ukat ¿kunsa yateqsna?

⁶ ‘Machaqar tukupjjam’ sasinjja, Pablojj janiw aleq cambiañatak parlkänti, jan ukasti chuymatpach cambiañatwa parlaskäna (“ Machaq jaqer tukuñampi, ukham jaqer aleqak tukuñampi” sat recuadro uñjjattʼäta). Ukatakejj machaq jaqeruw tukuñasa, mä  arunjja, amuyunakasasa kunanaktï jakäwisan munktan ukas janiw nayrjamañapäjjeti. Ukhamajj taqeniw akham jisktʼasiñasa: “¿Cheqpachapunit Cristot yateqasis sarnaqañatak chʼamachasisktjja, jan ukajj cristianökiristsa ukham aleqakich tuktjja?” sasa. Ukham jisktʼasiñajj wali wakiskiriwa. Mateo 12:43-45 (liytʼañataki) textonjja, Jesusan mä uñachtʼäwipaw jikjjatasi, ukaw kunsa machaqar tukuñatakejj lursna uk amuytʼayistu. Ukatakejj janiw jan wali amuyunak apanukuñakejj wakiskiti, jan ukasti, kunjam amuyañastï Diosajj munki ukham amuyañatakiw chʼamachasiñasa.

7. ¿Kunsa amuyunakas machaqar tukuyañatakejj lurañasa?

⁷ ¿Cheqapunit amuyunakas machaqar tukuysna? Bibliajj akham siwa: “Amuyunakam apnaqki uka chʼamjja machaqar tukuyasipkakim. Diosan munañaparjam luratäki uka machaq jaqëñampi isthapisipjjarakim. Ukajj cheqaparjam sarnaqañataki, Dios chuymäñataki luratawa” sasa (Efes. 4:23, 24, nota). Ukhamajj amuyunakasjja machaqar tukuysnawa, ukampis chʼamakïspawa. Ukatakejj janiw jan walinak jan lurañataki chʼamachasiñakisa, ni jan wali amuyunak jan amuyañatak chʼamachasiñakis wakiskiti, jan ukasti ‘amuyunakas apnaqki uka chʼamjja machaqaruw tukuyañasa’. Mä arunjja, kunanaktï jakäwisan munktan ukasa, sarnaqäwisasa, kuna amtampis taqe kuns lurtan ukanakasa janiw nayrjamañapäjjeti. Ukatakejj sapüruw chʼamachasiñasa.

8, 9. ¿Kunatsa amuyunakas machaqar tukuyañajj wali wakiskiri? Uk mä experienciamp qhanañchtʼam.

⁸ Mä jilatat parltʼañäni, jupajj machantasiri, nuwasiri ukhamänwa. Uka jan wali luräwinakap jaytasin bautisasjjäna ukhajja, markapankirinakajj wal musparapjjäna. Ukampis mä arumajj bautisasitapat mä jukʼa tiempo pasatatjja, mä jan walinwa jilatajj uñjasïna. Mä umat jaqew utapar jupamp nuwasiñatak saräna. Jilatajj qalltan jan nuwasiñatakiw chʼamachasïna. Ukampis uka jaqejj Jehová Diosat jan walinak parläna ukhajja, jilatajj wal colertʼasïna, ukatwa utat mistusajj uka jaqer nuwjäna. ¿Kunatsa ukham luräna? Bibliat yateqañajj walsa jilatarojj jan nuwasjjañatak yanaptʼkchïnjja, amuyunakap apnaqki uka chʼam janïraw machaqar tukuykänti.

⁹ Ukhamäkchïnsa jilatajj janiw aynachtʼkänti (Prov. 24:16). Jilïr irpirinakan yanaptʼapampejj nayrar sartaskakïnwa. Tiempompejja, jilïr irpirïñatak mayiski uka mayitanak phoqasajj jilïr irpirëjjänwa. Ukampis mä arumajja, Tantachasiñ Uta anqäjjankaskäna ukhajj wasitampiw jan walin uñjasïna. Mä umat jaqew yaqha jilïr irpirir nuwjañ munäna. ¿Kunsa jilatajj ukapachan luräna? Umatarojj wali munasiñampi jan colerasisaw pacienciayäna, utaparuw irpjjarakïna. ¿Kunatsa ukham luräna? Amuyunakap apnaqki uka chʼamjja machaqaruw tukuyjjäna. Jan nuwasiri, humilde chuyman jaqëjjänwa, ukham cambiatapajj Jehová Diosaruw jachʼañchäna.

10. ¿Kunsa chuymatpach cambiañatakejj lurañasa?

¹⁰ Uka jilatjam cambiañatakejj tiempow munasi, inas walja maranak chʼamachasiñajj wakischini (2 Ped. 1:5). Chuymatpach cambiañatakejj janiw Diosar walja tiempo serviñakejj wakiskiti, jan ukasti taqe chuymaw chʼamachasiñasa. ¿Kunas ukatak yanaptʼistani? Uk jichhajj yatjjatañäni.

11. ¿Kunjamsa Diosar mayisiñajj amuyunakas machaqar tukuyañatak yanaptʼistani?

¹¹ Maya, Diosar mayisiña. Salmo libro qellqerjamarakiw Diosar akham sas mayisiñasa: “Diosay, qʼoma chuymay utjayita, machaq aski ajay churarakita” sasa (Sal. 51:10). Jiwasaw amuyus apnaqki uka chʼama machaqar tukuyañ munañasa, ukatakejj Diosaruw yanaptʼa mayiñasa. ¿Diosajj yanaptʼistaniti? Jupajja, Ezequiel profeta urunakapan jakiri jan istʼasir israelitanakarojj akham sänwa: “Mä machaqa chuyma ukhamaraki mä machaqa ajayu chu[rapjjäma]” sasa. Ukham sasinjja, Nayar istʼiri chuyma churapjjäma sañwa munaskäna (Ezeq. 11:19). Uka arunakajj walpun chʼamañchtʼistu. Jehová Diosajj israelitanakar wal yanaptʼañ munäna, jiwasarojj ukhamarakiw yanaptʼañ munistu.

12, 13. 1) Salmo 119:59 qellqatarjamajja, ¿kuna toqetsa lupʼiñasa? 2) ¿Kunanaksa jisktʼasiñasa?

¹² Paya, lupʼiña. Sapüruw wali amuyump Biblia liyiñasa, kuna amuyunaksa jan ukajj kuna amtanaksa apanukuñasa uka toqet lupʼiñatakis tiempo apstʼasiñasarakiwa (Salmo 119:59 liytʼañataki; Heb. 4:12; Sant. 1:25). Jaqenakan kuna amuyunakapas chuymasan utji uk sum amuyasiñasawa. Inas kunanakan chʼamachasiñasajj wakisiskakchi uksa sumwa amuykipasiñasa, ukatjja ukanak apanukuñatakiw chʼamachasiñasaraki.

¹³ Ukatakejj akham jisktʼasiñasawa: “¿Envidiasiñajj chuymajan mä jukʼas utjiti?” (1 Ped. 2:1). “¿Jaqe masijarojj yaqha markatätap laykusa, jan suma estudionïtap laykusa, pobrëtap laykus jiskʼachtti?” (Prov. 16:5). “¿Jan nayjam utjirinïpki ukanakarusa yaqha color jañchin jaqenakarus jiskʼachtti?” (Sant. 2:2-4). “¿Kunanakatï akapachan utjki ukanakanïñ walti muntjja?” (1 Juan 2:15-17). “¿Qʼañu jucha lurañanak uñchʼukiñasa, nuwasirinaka uñchʼukiñasa, ukanakamp anatañas gustituti?” (Sal. 97:10; 101:3; Amós 5:15). Uka jisktʼanakar qhanañchañaw kunanakansa chʼamachasiskakiñasa uk amuyañatak yanaptʼistaspa. Jiwasatï uka jan wali amuyunak apanukuñäni ukhajja, Jehová Diosar kusisiyañäniwa (Sal. 19:14).

14. ¿Kunatsa suma amigonak ajlliñajj wali wakiskirejja?

¹⁴ Kimsa, suma amigonak ajlliña. Amuyasstansa janisa, amigonakasat yateqasikipuntanwa (Prov. 13:20). Yateqer masinakasasa trabajir masinakasasa, jila partejj janiw kunjamtï Jehová Diosajj munki ukham amuyañasatak yanaptʼapkistuti. Ukampis tantachäwinakanwa suma amigonak jikjjatsna. Jupanakaw munasiñatakisa suma luräwinak lurañatakis chʼamañchtʼapjjestu (Heb. 10:24, 25).

15, 16. ¿Kunjamsa Supayajj amuyunakas mayjtʼayañ muni?

¹⁵ Ak janipun armañäniti, Supayajj kunaymanitwa amuyunakas mayjtʼayañ muni. Ukatakejj kunayman yatichäwinakampiw engañjañ munistu, ukhamat Biblian yatichäwinakaparjam jan sarnaqañasataki.

¹⁶ Edén jardinan kuna jisktʼanakampitï Supayajj Eva warmir engañjkänjja, ukham jisktʼanakampiw jiwasar engañjañ munarakistu. Evar akham sänwa: ‘¿Cheqapunit Diosajj... sapjjtanjja?’ sasa (Gén. 3:1, NM). Supayan apnaqat akapachanjja, sapa kutiw jaqenakajj Bibliat pächasiñasatak akham jisktʼapjjestu: “¿Cheqapunit Diosatakejj chacha pura jan ukajj warmi pura casarasiñajj jan walïki? ¿Cheqapunit Diosajj navidad  fiesta amtapjjañamsa cumpleañonak amtapjjañamsa jan munki? ¿Cheqapunit Diosajj wil uchayasipjjañam jan munki? ¿Cheqapunit wali munasir Diosajj congregacionat jaqsut familiaranakamamp ‘jan chikachasipjjamti’ sasin sapjjtam?” sasa.

17. 1) Jaqenakajj pächasiyañ amtampi jisktʼapjjestani ukhajja, ¿kunsa lurañasa? 2) Colosenses 2:6, 7 textorjamajja, ¿kunatakis Diosan Arupat yatjjatañajj yanaptʼistani?

¹⁷ Janipuniw kunanaktï Bibliat yateqktan ukanakat pächasiñasäkiti. Jiwasatï wakiskir jisktʼanakasar jan qhanañchkañänejja, Biblian yatichäwinakapat pächasjjsnawa. Pächasiñajj amuyunakas mayjtʼayaspawa, janirakiw Diosarus confiyjjsnati. Ukhamajj ¿kunsa lurañasa? Bibliajj akham sistuwa: ‘Amuyunakam machaqar tukuyapjjam, ukhamatwa jumanak pachpajj Diosan munañapajj sumätapa, perfectötapa, jupan chuymapsa kusisiyirïtapa yatipjjäta’ sasa (Rom. 12:2). Bibliat sapa kuti yatjjatañajja, kunanaktï yateqawayktan ukanakat jan pächasiñatakiw yanaptʼistani. Diosan leyinakapajj cheqapäskapuniwa sasin confiyañatakis yanaptʼarakistaniwa. Ukhamajj jiwasatï Diosan Arupatsa leyinakapatsa jan pächaskañänejja, suma saphintat mä qoqar uñtasitaw Cristor confiyañan ‘suma saytʼatäpjjañäni’ (Colosenses 2:6, 7 liytʼañataki).

18. ¿Kunas pʼeqesat jan wali amuyunak apsuñatak yanaptʼistani?

¹⁸ Cristor confiyañan ‘suma saytʼatäñatakejj’ jiwasaw chʼamachasiñasa, janiw khitis jiwas lantejj uk lurkaniti. Ukhamajj amuyunakas apnaqki uka chʼama machaqar tukuyasipkakiñäni. Jehová Diosarus jan inaktʼas mayisiskakiñäni, qollan ajayupsa mayirakiñäni. Kuna amtampis taqe kuns lurtan, kunanaksa pensasktan ukanakats wal amuyasipjjañäni. Suma amigonak ajllipjjañäni, khitinakatï amuyunakas machaqar tukuyañatak yanaptʼapkistu ukanakampi chikachasipjjañäni. Taqe ukanak lurasajja, jan wali amuyunak pʼeqesat apsuñäniwa, ‘pantjat taqe amuyunaksa, Diosar jan uñtʼañasatak jarkʼkistu taqe ukanaksa, tukjañäniwa’ (2 Cor. 10:5).