1. Mambe mabéhna ñôma Paul a bi ti minhook mi bikristen?

ÑÔMA Paul a kal le: ‘Ni waa.’ Di waa boñ kii? ‘Ni waa pôôna i hiai hini.’ (Rôma 12:2) Bikristen bi hiai bisu gwon Paul a tilna bibuk bini. Inyuki a bi ti bo i nya mabéhna i ngui i, ki le ba bi ti bomede nkikip yak Djob ba bak ki minhook mi bikristen?​—Rôma 1:7.

2-3. Kii Satan a mboñ inyu kena bés haa ni Yéhôva, ndi lelaa di nla nup mahoñol ma ma bi o minkañ sum sum kiki “dikôya di gwét” mahoñol més?

² I nene le hala a bé tééñga Paul i tehe le bikristen bihogi bi bé nwas le mahoñol mabe ni pék i bôt ba binam bi yoña bo. (Éfésô 4:17-19) Hala a nla pémél tonjee ipôla yés. Mu kiki a nyéñ le di kôm Yéhôva mbus, Satan, nu a yé djob li hiai hini, a ngwélél ngandak dipa. Hiada mu hi yé le, a ngwélél i ngôñ di gwé i yila bôt bakeñi, i bana jôl likeñi. A nla ki gwélél binéñél gwés, bilem bi loñ yés, tole suklu di bi boñ inyu tinde bés i bana mahoñol mé.

³ Baa i nup mahoñol ma ma bi o minkañ sum sum mahoñol més kiki “dikôya di gwét” i yé jam li ntomb? (2 Korintô 10:4) Paul a ntimbhe le: “Di mbémbe mahoñol ni humbulnyuu yosôna i i nhoo yi Nyambe  koyop, di ngwel ki mahoñol momasôna minkôm le ma nôgôl Kristô.” (2 Korintô 10:5) Ñ, di nla yémbél mahoñol mabe ni mahôla ma Yéhôva. Kiki bee bi nla suhus ngui i mbôñ, Bañga i Djob i nla hôla bés i yémbél i béba nkoñ ’isi u Satan u nla boñ bés.

4. Mambe mahéñha ngandak ikété yés i bi boñ ngéda i bi bôdôl nigil maliga?

⁴ Hoñol mahéñha u bi bana ngôñ i boñ i ngéda u bi bôdôl nigil maliga ni ngéda u bi kit le u nsélél Yéhôva. Inyu ngandak ikété yés, i bé béda le di tjôô maboñok mabe inyu gwélél Yéhôva. (1 Korintô 6:9-11) Di nlôôha ti Yéhôva mayéga inyule a nhôla bés i tjôô bilem gwés bibe.

5. Mambe mam ima kaat Rôma 12:2 i mpôdôl?

⁵ Ndi di hoñol bañ le di gwé ha bé ngôñ i boñ mahéñha. Tolakii di bi waa boñ bibéba bikeñi ilole di nkôs sôble, di nlama yoñ yihe ni mam momasôna ma yé le ma tinde bés i tiimba kwo mu bibéba bi. Lelaa hala a nla bôña? Paul a ntimbhe le: “Ni waa ki nigle libak li bôt ba nkoñ ’isi unu, ndi ni heñla, mu kiki ni nyilha mahoñol manan yondo.” (Rôma 12:2, MN.) Jon di nlama boñ mam ima. Pog, di nlama “waa . . . nigle,” tole di nlama tjél le nkoñ ’isi u mma bés. Iba, di nlama “heñla” mu kiki di nyilha mahoñol més yondo.

6. Bimbe biniigana di ñôt mu bibañga bi Yésu di nléba i kaat Matéô 12:43-45?

⁶ Mahéñha Paul a mpôdôl hana ma ta bé ma ma nene i bitéé bi mis. Ma ntihba makas ma niñ yés momasôna. (Béñge minkéñék mi matila “ Mahéñha tole bihéñba?”) Di nlama héñha mahoñol més héñha yosôna​—libak jés li kété kété, i yom di nôgda ikété yés ni ngôñ yés. Bés  bobasôna di nlama badba le: ‘Baa me bi yila kristen ndigi i bitéé bi mis, tole maliga ma bi tihba toi ñem ni mahoñol mem?’ Ndimbhe i mbadga i, i yé nseñ. I yom Yésu a bi kal i kaat Matéô 12:43-45, i ñunda kii di nlama boñ. (Añ.) Bibañga bi bi niiga bés le: Di nlama ndik bé héya mahoñol mabe di gwé, ndi di nlama ki yônôs miñem nwés ni mahoñol malam.

7. Lelaa di nla lona mahéñha i ñem wés ni mahoñol més?

⁷ Baa di yé toi le di pam i héñha ngui i ñénél mahoñol més? Bañga i Djob i ntimbhe le: “Ni nlama ke ni bisu i yila yondo ikété ngui i ñénél mahoñol manan, ni haba ki mut yondo nu a bi héga inoñnaga ni sômbôl Nyambe ikété bañga telepsép ni bañga ndéñbe.” (Éfésô 4:23, 24, MN.) Ñ, di nla toi héñha mut di yé ikété kété, ndi hala a ta bé bun. Di nlama ndigi bé jôs minheña nwés to maboñok més mabe, ndi di nlama yak héñha i “ngui i ñénél mahoñol més.” Hala a mbat le di héñha i mam ma nkon bés ngôñ, i mam di mboñ, ni i ngui i ntinde bés i boñ mo. Hala a ta bé sañ i hilo hiada.

8-9. Lelaa jam mankéé wada a bi boma li nyigye nseñ i héñha libak jés li kété kété?

⁸ Di yoñ hihéga hi mankéé wada nu a bé mut bisañ. I mbus a bi waa nyôba ni bisañ, a sôblana, a yila ndémbél ilam mu libôga i het a bi néñél. Kôkôa yada, ndék ngéda mbus sôble yé, a bi boma manoodana a bé bemek bé. Nhiôôak mut u bi lo i mbai yé u suu nye bisañ. Mankéé a bi bôk ndugi a gwel nyemede. Ndi ngéda mut nu a bi bôdôl sol Yéhôva, mankéé wés a bi la ha bé gwel nyemede. A bép i mut nu ndôm tôlô. Inyuki a bi la ha bé gwel nyemede? Tolakii yigil i Bibel i bi hôla nye i jôs lem yé bisañ, a bé ngi pam i héñha ngui i ñénél mahoñol mé. Tole di nla ki kal le mut wé kété a bé ngi tibil héñha.

⁹ Ndi mankéé wés a bi waa bé boñ biliya inyu héñha. (Bingéngén 24:16) Ni mahôla ma mimañ, a bi ke ni bisu i héñha, kayéle a sôk hôlôs bilem inyu yila mañ likoda. Ndi kôkôa yada, ki a téé bisu bi ndap Ane, nlélém jam u bi témb u pémél nye. Mut wada nu a bé nhiôôak a bé yéñ bép mañ wada. Kii mankéé wés a boñ? Ikété nwee nyensôna, a bi kwélés mut nu, a suhus hiun hié, a hôla ki nye i huu i mbai yé. Kii i bi boñ le a héñha liboñok jé? A bi héñha ngui i bé énél mahoñol mé. Nano a bi yila mut nsañ ni nu suhulnyuu letee ni ikété kété​—hala a ti ki Yéhôva bibégés!

10. Kii di nlama boñ inyu héñha mut wés kété?

¹⁰ Mahéñha ma ma ta bé jam li ntomb, ma mbat biliya. ‘Biliya gwobisôna’ di nlama boñ bi nlama nom ntandaa nwii. (2 Pétrô 1:5) Hala a nkobla bé le di ga boñ mahéñha ma inyule “di yé ikété maliga” ibôdôl behee. Di nlama boñ kii yosôna di nla inyu héñha libak jés li kété kété. Ngim mam i ga hôla bés i boñ mahéñha ma. Di wan le mahogi mu.

11. Lelaa masoohe nhôla bés i héñha ngui i ñénél mahoñol més?

¹¹ Jam li bisu li mahee li yé masoohe. Di nlama soohe kiki ntôp tjémbi  nu a kal le: “Hégél me ñem mpubi, u tiimba ki ha mbuu u yé sép ikété yem.” (Tjémbi 51:12) Di nlama neebe le i mbéda le di héñha ngui i ñénél mahoñol més, di bat ki Yéhôva mahôla. Kii i nla kwés bés nkaa le Yéhôva a ga hôla bés i héñha? Di nla kôhna makénd mu mbônga Yéhôva a ti bon ba ndok ba Israel ba ngéda Ézékiel le: “M’a ti bo ñem wada, me ha ki mbuu yondo ikété [yap] . . . me ti bo ñem minsôn.” (Ézékiel 11:19) Yéhôva a bé bebee i hôla bon ba Israel i héñha, a yé ki bebee i boñ nlélém inyu yés.

12-13. (a) Inoñnaga ni Tjémbi 119:59, kii di nlama soñda? (b) Mambe mambadga u nlama badba?

¹² Jam li nyônôs iba li nlôôha nseñ li yé i soñda. Hiki kel nu di nyoñ ngéda i wan Bañga i Djob, di nlama yoñ ngéda i soñda, tole i ôt pék bañga liôdôk mu lisoñgol jés, inyu yi i mam di nôgda ni mahoñol di nlama héñha. (Añ Tjémbi 119:59; Lôk Héber 4:12; Yakôbô 1:25) Di nlama yimbe yom yosôna i ntinde bés i noñ pék i nkoñ ’isi. Di nlama ba bebee i neebe bibomb gwés, di sal ki ni ngui inyu yémbél gwo.

¹³ Kiki hihéga, badba le: ‘Baa liton li hép tole li njôñ li yé me ñem?’ (1 Pétrô 2:1) ‘Baa me nôgda ndék ngôk inyu binéñél gwem, suklu me bi boñ ni bigwel bi moo me gwé?’ (Bingéngén 16:5) ‘Baa me nyan i bet ba gwé bé minlélém mi gwom kiki me tole ba ba bi nañ bé kiki bôt ba litén jem?’ (Yakôbô 2:2-4) ‘Baa me nôgda wee mam ma nkoñ ’isi u Satan ma nkon me ngôñ?’ (1 Yôhanes 2:15-17) ‘Baa me ngwés me mbéñge mintuk mi gwé nyega malal ni mam ma njôô?’ (Tjémbi 97:10; 101:3; Amôs 5:15) I ngéda u ga timbhe mambadga mana, u ga yimbe matode u nlama sal. Ndi ibale di mpam i yémbél i yom yosôna i nla ba kiki “dikôya di gwét” miñem nwés, di ga lémél Tata wés nungingii.​—Tjémbi 19:15.

14. Inyuki i nlôôha ba nseñ i pohol bañga mawanda?

¹⁴ Jam li nyônôs aa li mahee li yé i pohol bañga mawanda. To di ngwés to di ngwés bé, i bôt bés ni bo di nkiha ba nla tinde bés i boñ mam malam tole mam mabe. (Bingéngén 13:20) I suklu tole i homa bôlô, i bôt ba gwé bé mahoñol ma Djob bon ba nkéña bés. Ndi di nla léba mawanda ma nlôôha malam i makoda més. Nyoo nyen di nla kôs makénd, nyoo ki nyen ba nla tinde bés i “gwéha ni minson minlam.”​—Lôk Héber 10:24, 25.

15-16. Lelaa Satan a nyéñ héñha mahoñol més?

¹⁵ Di bigda le Satan a mboñ kii yosôna a nla inyu héñha mahoñol més. Inyu yônôs njômbi yé, a ngwélél mintén mi biniigana ni mahoñol momasôna inyu kôde ngui i Bañga i Djob mahoñol més.

¹⁶ Satan a nke ni bisu i boñ le di badba nlélém mbadga a bat Éva i wom Éden: “Baa hodo le Nyambe a kal le. . . ?” (Bibôdle 3:1) Munu nkoñ ’isi u u yé isi énél i Satan, di mbéna nok mam ma nla boñ le pééna i gwéé bés i ñem kiki bo: ‘Baa hodo le Djob a nsôña le bôlôm ni bôlôm, tole bôda ni bôda ba biiba? Baa hodo le Djob a ngwés bé le ni yoñ ngaba i ngand Kristak ni mangand ma ligwéé?  Baa hodo le Djob linan li nsôñga toi bé le ni yoñ minkum mi matjél? Baa hodo le Djob li gwéha li nsôñga toi le di kiha ni bôt di ngwés, ba ba mpémés ntôñ?’

17. Kii di nlama boñ ibale i mpam le di badba mambadga ma ma nkolba hémle yés, inoñnaga ni Kôlôsé 2:6, 7, lisuk li ga ba lelaa?

¹⁷ Di nlama ba nkwoog nkaa ni mam di nhémle. Ibale di nyéñ bé mandimbhe ma mambadga di mbadba, hala a nla lona bés pééna i ñem. I pééna i i nla kôde mahoñol més, i nol ki hémle yés. Jon, kii di nlama boñ? Bañga i Djob i nkal le inyu héñha mahoñol més, di nla kwés bésbomede nkaa le “sômbôl i Nyambe i yé loñge, i yé ilam, i yôni ki.” (Rôma 12:2) Ibale di nigil Bibel hiki ngéda, di nla kwés bésbomede nkaa le i yom di nigil ikété Bibel i yé maliga. Di ga ba ki nkwoog nkaa le matiñ ma Yéhôva ma téé. Ha nyen kiki e i umi siñ, yak bés di ga ba di umi “siñ ikété hémle.”​—Añ Kôlôsé 2:6, 7.

18. Kii i ga hôla bés i suhus ngui i mbôñ i nkoñ ’isi u Satan?

¹⁸ Mut nye ki nye he mah bébomede a nla bé boñ le hémle nan i let, jon kena ni bisu i yila yondo ikété ngui i ñénél mahoñol manan. Ni bana lem i soohe; ni yemhege Yéhôva le a hôla bé ni mbuu mpubi wé. Ni yoñ ngéda i soñda ni i wan mahoñol manan. Ni pohol biloñge bi mawanda; ni yéñ ba lôñni bôt ba ba ga hôla bé i héñha mahoñol manan. Ibale ni mboñ hala, ni ga suhus ngui i mbôñ i nkoñ ’isi u Satan, ni yémbél ki “bipék ni hiki jam li ntelep ikolba yi Nyambe.”​—2 Korintô 10:5, MN.