1. Aha do sipasingot na dilehon si Paulus tu halak Kristen na miniahan?

APOSTEL Paulus mandok, “Unang ma tiru hamu angka halak na di portibi on.” (Rom 12:2) Sipasingot on dilehon si Paulus tu angka halak Kristen di abad na parjolo. Alai boasa dilehon ibana sipasingot songon i tu angka halak Kristen na miniahan?​—Rom 1:7.

2-3. Songon dia do Sibolis mambahen hita dao sian Jahowa? Jala songon dia hita boi pasidingkon angka pingkiran na sala?

² Diida si Paulus, adong piga-piga halak Kristen tingki i gabe mangihuthon pingkiran ni angka halak di portibi on. (Eps. 4:17-19) Tontu boi do on masa tu hita. Ala Sibolis do na mangarajai portibi on, dipangke ibana do marragam cara laho mambahen hita asa mangihuthon pingkiranna. Umpamana, molo hea hita marpingkir naeng gabe umsangap sian na asing, boi do dipangke Sibolis pingkiran sisongon i mambahen hita dao sian Jahowa. Jala boi do dibahen Sibolis asa taihuthon pingkiranna marhite pengalamanta, hasomalanta, dohot songon dia hita diajari.

³ Boi do tapasiding angka “naung togu dipajongjong” di pingkiranta. (2 Kor. 10:4) Didok si Paulus, “Hurumpakkon hami do angka pingkiran na sala dohot angka na maralo tu parbinotoan taringot tu Debata. Hurajai hami  do nasa pingkiran asa mangoloi Kristus.” (2 Kor. 10:5) Tutu, molo diurupi Jahowa, boi do hita pasidingkon angka pingkiran na sala na adong di dirinta. Songon ubat na pamalumhon sahit, Hata ni Debata boi mangurupi hita pasidingkon angka pingkiran na sala sian portibi na dirajai Sibolis.

4. Aha do na diulahon godangan sian hita tingki parjolo sahali mananda hasintongan?

⁴ Pingkirhon ma songon dia hamu mambahen hamubaon tingki parjolo sahali mananda hasintongan jala mamillit laho manomba Jahowa. Ala naeng manomba Debata, godang do sian hita ingkon marsitutu pasidingkon angka ulaon na sala. (1 Kor. 6:9-11) Tontu mandok mauliate do hita tu Jahowa ala diurupi Ibana hita laho pasidingkon angka ulaon na sala i!

5. Songon na didok Rom 12:2, aha do na boi taulahon?

⁵ Alai, unang ma didok rohanta nunga cukup be na taulahon asa boi muba. Andorang so tardidi, ra nunga marsitutu hita asa unang mangulahon na sala. Alai ingkon marsitutu do hita muse pasidingkon angka na boi mambahen hita mulak muse mangulahon i. Songon dia carana? Didok si Paulus, “Unang ma tiru hamu angka halak na di portibi on. Alai muba ma hamu marhite paubahon pingkiranmuna.” (Rom 12:2) Adong dua na boi diulahon. Na parjolo, “unang ma tiru hamu” angka halak di portibi on. Na paduahon, “muba ma hamu” marhite paubahon pingkiranmuna.

6. Aha do parsiajaran na ringkot sian hata ni Jesus na disurat di Mateus 12:43-45?

⁶ Hamubaon na didok si Paulus dison ndang holan muba sian na tarida. Alai lapatanna ingkon muba do sude sian  dirinta. (Ida ma kotak “ Muba Situtu manang Dipasuman-suman?”) Porlu do tapauba pingkiranta, pangalaho, pangkilalaanta, dohot na tahalomohon. Alani i, boi do tasungkun dirinta, ‘Holan asa diida halak do umbahen na olo ahu muba manang marsitutu do ahu laho maniru Kristus?’ Hata ni Jesus na disurat di Mateus 12:43-45, patuduhon aha na ingkon taulahon. (Jaha.) Parsiajaran na ringkot sian cerita i, i ma: Ndang sae holan pasidingkon pingkiran na sala, alai ingkon tapingkirhon do aha na dihalomohon Debata.

7. Songon dia hita boi paubahon roha dohot pingkiranta?

⁷ Boi do hita paubahon roha dohot pingkiranta. Bibel mandok, “Naeng ma dipaimbaru roha dohot pingkiranmuna, jala pangke hamu ma pangalaho na imbaru hombar tu lomo ni roha ni Debata mangihuthon hasintongan dohot roha na marsihohot.” (Eps. 4:23, 24) Alai ndang sai mura mangulahon i, jala ndang sae holan pasidingkon manang ndang mangulahon na sala. Porlu do hita paubahon ‘roha dohot pingkiran’. Lapatanna, ingkon tapauba do aha na tahalomohon, pangalaho dohot na jotjot tapingkirhon. Jala ingkon torus do on taulahon.

8-9. Sian pengalaman ni donganta on, aha do na patuduhon ringkot do paubahon roha dohot pingkiran?

⁸ Parrohahon ma sada contoh sian donganta na hea gabe halak na kasar. Dung ndang parmabuk be ibana jala ndang olo be marbada, boi ma ibana tardidi. Sada sitiruon na denggan do ibana tu angka halak di hutana. Alai dung tardidi, adong ma na masa di sada borngin. Adong sahalak baoa na mabuk ro tu jabuna naeng marbada dohot ibana. Mulana, ndang olo donganta on marbada. Alai tingki diparoa-roa baoa i goar ni Jahowa, gabe muruk situtu ma ibana. Kaluar ma ibana sian jabu jala dipukul ma baoa i. Boasa diulahon ibana songon i? Nang pe naung marsiajar Bibel donganta on, alai ndang boi dope diorom ibana dirina asa unang marbada. Sian on taboto, ndang muba dope roha dohot pingkiranna.

⁹ Alai ndang menyerah donganta on laho mambahen hamubaon. (Poda 24:16) Diurupi sintua do ibana asa boi lam patuduhon parange na denggan. Ujungna, gabe sintua do ibana. Di sada borngin, di alaman ni Bale Harajaon, masa ma songon na hea diadopi ibana di tingki naung salpu. Adong ma baoa na mabuk mamungkuli sada sintua. Aha ma na diulahon donganta on? Lambok, jala manat do ibana mangkatai tu baoa na mabuk i. Dung i, ditaruhon ibana ma baoa na mabuk i mulak tu jabuna. Boasa ndang dibahen ibana be songon na uju i? Ala nunga dipauba ibana roha dohot pingkiranna. Nunga gabe halak na dame jala na serep roha ibana. Parohon sangap do on tu Jahowa!

10. Asa boi mambahen hamubaon, aha do na ingkon taulahon?

¹⁰ Ndang boi pintor hatop sasahalak mambahen hamubaon. Ra, ingkon “marsitutu” do hita saleleng martaon-taon asa boi muba. (2 Ptr. 1:5) Jala hamubaon ni sasahalak i ndang diida sian sadia leleng ibana “di bagasan hasintongan”. Asa boi marhamubaon, ingkon  sian nasa gogonta do i taulahon. Saonari, taulas ma piga-piga cara na boi mangurupi hita mambahen hamubaon.

11. Songon dia do tangiang boi mangurupi hita paubahon roha dohot pingkiran?

¹¹ Cara na ringkot na parjolo, i ma martangiang. Boi do tatiru tangiang ni sahalak panurat psalmen na mandok, “Tompa ma roha na ias di bagasan ahu, ale Debata, jala paimbaru ma tondi na marsihohot di bagasan ahu.” (Ps. 51:12) Ingkon serep do rohanta mangangkui na porlu do hita paubahon pingkiran dohot roha jala mangido asa diurupi Jahowa. Alai boasa boi pos rohanta na laho urupan ni Jahowa do hita? Adong do na boi taparsiajari sian janji ni Jahowa tu halak Israel. Di tingki ni si Hesekiel, tangkang do nasida. Alai didok Jahowa do tu nasida, “LehononKu ma tu nasida roha na imbaru dohot pingkiran na imbaru . . . jala lehononKu tu nasida roha na mangoloi.” (Hes. 11:19, Bibel siganup ari) Molo rade do Jahowa mangurupi halak Israel asa marhamubaon, tontu hita pe urupanna do.

12-13. (a) Hombar tu Psalmen 119:59, aha do na porlu tarimangi? (b) Aha do na boi tasungkun tu dirinta?

¹² Cara na paduahon, i ma mangarimangi. Molo tajaha Bibel ganup ari, ingkon tapingkiri jala tarimangi do aha na tajaha. Dung i, gabe taboto ma aha na ingkon tapauba. (Jaha Psalmen 119:59; Heb. 4:12; Jak. 1:25) Jala ingkon tapareso do, atik boha adong pingkiran ni portibi on naung taihuthon. Ingkon jujur do hita tingki mamareso pingkiranta jala marsitutu ma laho padengganhon i.

¹³ Umpamana, sungkun ma dirimuna, ‘Adong do di ahu roha mangiburu?’ (1 Ptr. 2:1) ‘Gabe ginjang do rohangku alani keluargangku, singkola, manang ala godang artangku?’ (Poda 16:5) ‘Leas do rohangku tu halak na so sarupa dohot ahu manang sian suku na asing?’ (Jak. 2:2-4) ‘Lomo do rohangku tu na ditawarhon portibi on?’ (1 Joh. 2:15-17) ‘Lomo do rohangku tu hiburan na rorang manang kekerasan?’ (Ps. 97:10; 101:3; Am. 5:15) Dung dialusi hamu angka sungkun-sungkun i, diboto hamu ma aha na porlu dipadenggan. Tingki boi tapauba pingkiran “naung togu dipajongjong”, on mambahen las roha ni Jahowa.​—Ps. 19:15.

14. Boasa porlu tapillit dongan na burju?

¹⁴ Cara na patoluhon, i ma mamillit dongan na burju. Ingot ma, balga do pengaruh ni dongan tu dirinta. (Poda 13:20) Di parkarejoan manang di singkola, godang do angka halak na so mangihuthon pingkiran ni Debata. Alai, boi do tadapot angka dongan na burju di huria. Nasida do na manjujui hita asa boi patuduhon “holong ni roha dohot mangulahon na denggan”.​—Heb. 10:24, 25.

15-16. Songon dia do cara ni Sibolis laho manegai pingkiranta?

¹⁵ Ingot ma, marsitutu do Sibolis laho manegai pingkiranta. Dipangke ibana do marragam cara laho mambahen hita asa unang mangihuthon hasintongan.

¹⁶ Jotjot do dibahen Sibolis sungkun-sungkun songon na dibahen ibana tu si Hawa tingki di porlak Eden. Didok, “Tutu do didok Debata . . . ?” (1 Mus. 3:1, Bibel siganup ari) Saonari pe, jotjot  do tabege sungkun-sungkun songon, ‘Tutu do ndang lomo roha ni Debata molo marhasohotan baoa tu baoa, borua tu borua? Tutu do ndang lomo roha ni Debata molo dirayahon hamu Natal dohot ulang tahun? Tutu do diorai Debata hamu transfusi darah? Tutu do diorai Debata hamu marsaor tu sisolhot naung dipecat?’

17. Aha do na ingkon taulahon molo adong sungkun-sungkun di rohanta na mambahen ganggu haporseaonta? Jala aha ma hasilna songon na didok di Kolosse 2:6, 7?

¹⁷ Molo adong sungkun-sungkun di rohanta na so taralusi, boi do i mambahen ganggu haporseaonta. Jala lam leleng, boi do gabe sega pingkiranta jala mago haporseaonta. Alani i, ingkon tapatogu do haporseaonta. Songon dia carana? Didok Bibel, porlu do tapauba pingkiranta asa taboto sandiri “lomo ni roha ni Debata na denggan, na sintong, jala na palashon rohana”. (Rom 12:2) Molo ringgas hita marsiajar, gabe pos ma rohanta tu sude na diajarhon Bibel. Jala gabe porsea ma hita tu sude aturan na dibahen Jahowa. Songon hau na togu uratna, boi ma ‘togu dipajongjong haporseaonta’.​—Jaha Kolosse 2:6, 7.

18. Aha do na boi mangurupi hita manjaga diri sian pengaruh ni Sibolis?

¹⁸ Ingkon hita sandiri do na patoguhon haporseaonta, ndang boi halak na asing. Alani i, tongtong ma tapauba roha dohot pingkiranta. Ringgas ma martangiang jala pangido ma tu Jahowa tondi parbadiana laho mangurupi hita. Rimangi ma aha na tajaha di Bibel jala tapareso ma atik boha adong pingkiranta na sala. Sai lului ma dongan na burju na mangurupi hita paubahon pingkiranta. Molo taulahon songon i, boi ma tajaga dirinta sian pengaruh ni Sibolis. Jala marhasil ma hita mangarumpakkon “angka pingkiran na sala dohot angka na maralo tu parbinotoan taringot tu Debata”.​—2 Kor. 10:5.