1. Finshi umutumwa Paulo alandile pa kusoka Abena Kristu abali abasubwa?

UMUTUMWA Paulo alandile ati: “Mwipalana no bwikashi buno.” (Rom. 12:2) Abo Paulo alembeele aya mashiwi Bena Kristu aba mu nshita ya batumwa. Mulandu nshi asokele abaume na banakashi abaipeele kuli Lesa kabili abasubilwe no mupashi wa mushilo?—Rom. 1:7.

2-3. Finshi Satana acita pa kuti atubeleleke tuleke ukutemwa Yehova, kabili finshi fingalenga twaleka ukuba ne mibele iyaba nga “malinga ayakosa”?

² Paulo alisakamene pantu Abena Kristu bamo bafwile baletontonkanya nge fyo abantu ba muli ici calo ca kwa Satana baletontonkanya, kabili balekonkelela amano ya buntunse. (Efes. 4:17-19) Na ifwe bene nga tatucenjele kuti twaba nga aba Abena Kristu. Pa kuti Satana lesa wa bwikashi buno atubeleleke tuleke ukutemwa Yehova, alabomfya imicenjelo yalekanalekana. Ku ca kumwenako, nga ca kuti tulafwaya ukulumbuka nelyo tulafwaya abantu baletumona ukuti twalicindama, akatubelelekela kuli ifi fine tufwaya. Nalimo kuti atubelelekela na ku fyatucitikilapo, ku ntambi tukonka, nelyo ku masambililo yesu pa kuti tuletontonkanya ukulingana ne fyo afwaya.

³ Bushe kuti twaleka ukuba ne mibele iyaba nga “malinga ayakosa”? (2 Kor. 10:4) Moneni ifyo Paulo alandile, atile: “Tulewisha amatontonkanyo yalubana na conse icasansabala icilwisha ukwishiba Lesa; kabili tulanasha amatontonkanyo yonse  pa kuti yanakile Kristu.” (2 Kor. 10:5) Kanshi Yehova nga atwafwa kuti twaleka ukuba ne mibele yabipa. Nga filya fine umuti wingasundula sumu, e fyo ne Cebo ca kwa Lesa cingalenga twaleka ukutontonkanya nge fyo abantu ba muli ici calo ca kwa Satana batontonkanya.

4. Finshi fwe bengi twalekele ukucita ilyo twatendeke ukusambilila icine?

⁴ Ibukisheni ifintu ifyo mwalingile ukuleka ukucita ilyo mwatendeke ukusambilila Icebo ca kwa Lesa, mwasalapo no kulabombela Yehova. Fwe bengi pa kuti tutendeke ukubombela Yehova twalilekele ukucita ifyabipa. (1 Kor. 6:9-11) Ala tulatasha Yehova pantu alitwafwile ukuleka ukucita ifyabipa!

5. Fintu nshi fibili ifyo ilembo lya Abena Roma 12:2 lyalandapo?

⁵ Lelo tatulingile ukulamona ukuti calilaala calipwa twalyaluka. Nangu ca kuti twalileka ukucita imembu ishikalamba isho twalecita ilyo tushilabatishiwa, tufwile ukutwalilila ukutaluka ku fingalenga twatendeka ukucita imembu ishikalamba isho twalecita kale. Finshi tufwile ukucita? Paulo atile: “Mwipalana no bwikashi buno, lelo mupilibuke pa kwalula amatontonkanyo yenu.” (Rom. 12:2) Fintu nshi fibili ifyo ili lembo litweba? Ica kubalilapo, tatulingile ‘ukupalana no bwikashi buno,’ nelyo ukulatontonkanya nga ba muli cino calo. Ica bubili, tufwile ‘ukupilibuka,’ e kutila ukwalula amatontonkanyo yesu.

6. Finshi tusambilila ku mashiwi Yesu alandile ayalembwa pali Mateo 12:43-45?

⁶ Ukupilibuka uko Paulo alandilepo kwalicila pa kwalula fye ifyo tumoneka ku nse. Lelo tufwile ukwaluka mu kati na ku nse. (Moneni akabokoshi akaleti “ Bushe Mwalipilibuka Nelyo Muifungushanya Fye?”) Tulingile ukwalula amatontonkanyo yesu, e kutila tufwile ukwaluka mu fyo twaba mu kati, mu  fyo tumfwa e lyo na mu fyo tufwaya. Kanshi bonse tufwile ukuyipusha atuti: ‘Bushe ndealuka fye mu fyo moneka ku nse nelyo bushe ndealuka mu fyo naba mu kati?’ Yesu alilandile pa fyo tulingile ukucita mu mashiwi ayalembwa pali Mateo 12:43-45. (Belengeni.) Aya mashiwi yalatusambilisha icishinka ca kuti, tatufwile fye ukupepela pa kwaluka mu fyo tutontonkanya lelo tulingile no kulatontonkanya nge fyo Lesa atontonkanya.

7. Finshi tufwile ukucita pa kuti twaluke mu fyo twaba mu kati?

⁷ Bushe cine cine kuti twaaluka mu fyo tutontonkanya? Icebo ca kwa Lesa casuka ici cipusho aciti: ‘Muleke ukutontonkanya ifya kale lelo muletontonkanya ifipya, no kuti mufwale ubuntu bupya ubwalengelwe ukulingana no kufwaya kwa kwa Lesa mu bulungami bwa cine na mu cishinka.’ (Efes. 4:23, 24) Kanshi kuti twaaluka mu fyo twaba mu kati, lelo calikosa. Tatufwile ukupelela fye pa kucincintila ifyabipa ifyo tufwaya ukulacita, kabili tatulingile ukupelela fye pa kuleka ukucita ifyabipa. Tulingile ukwaluka mu fyo ‘tutontonkanya.’ Ici cilolele mu kuti tufwile ukwaluka mu fyo tufwaya, mu misango yesu, na mu filenga tulecita ifintu. Pa kuti twaluke, tufwile ukutwalilila ukuibikilishako.

8-9. Bushe ifyo twalanda pali munyinefwe fyalanga shani ico cacindamina ukwaluka mu fyo twaba mu kati?

⁸ Natulande pali munyinefwe uwali uwa lubuli kale. Uyu munyinefwe alenwa sana ubwalwa, kabili ali ni mwalwa na banga. Lelo ilyo alekele fyonse ifi, alifikilepo ukubatishiwa. Ilyo abatishiwe, abantu uko aleikala balitemenwe. Nomba tapakokwele ukutula apo abatishiwilwe, bushiku bumo mu cungulo bushiku alikwete ubwesho ubo ashaleenekela. Umwaume umo uwakolelwe aile pa ng’anda pa mwakwe kabili alefwaya alwe nankwe. Pa kubalilapo, munyinefwe aliilamine. Lelo ilyo ulya mwaume aponteele ishina lya kwa Lesa, munyinefwe alifililwe ukuilama. Alifumine pa nse no kumuuma. Cinshi calengele afilwe ukuilama pali iyi nshita? Ni co taalwike mu fyo aletontonkanya nangu ca kuti ifyo alesambilila mu Baibolo fyalengele ailame pa kubala. Nelyo tutile, taalwike mu fyo ali mu kati.

⁹ Nangu cali ifi, uyu munyinefwe talekele ukuibikilishako pa kuti aluke. (Amapi. 24:16) Baeluda balimwafwile kabili alitwalilile ukwaluka ica kuti mu kupita kwa nshita alifikilepo ukuba eluda. Ku ca mupamba, bushiku bumo ilyo ali pa Ng’anda ya Bufumu icungulo bushiku na ba bwananyina, alikwete ubwesho nga buntu akwete kale. Umwaume uwakolelwe alishile kabili alefwaya ukupuma eluda umo. Bushe munyinefwe acitile shani? Alilanshenye nankwe ninshi nateka no wa munda, alimunashishe umutima, kabili alimushindike ku mwakwe ninshi aletalantanta fye pa kwenda. Cinshi calengele munyinefwe e uma ulya mwaume? Ni co alyalwike mu fyo ali mu kati. Alyalwike sana ica kuti nomba tali wa lubuli kabili aliicefeshe. Ifi ayalwike fyalengele abantu balalumbanya Yehova!

10. Finshi tulingile ukucita pa kuti twingaluka mu fyo twaba mu kati?

¹⁰ Kwena te kuti twaluke mu bushiku bumo, kabili te kuti twaluke nga tatuleibikilishako. Tufwile “ukubombesha” pa myaka iingi. (2 Pet. 1:5) Te kuti twaluke pa mulandu fye wa kuti twalibombela Yehova pa myaka iingi. Tulingile ukuibikilishako apapela amaka yesu pa kuti twaluke mu fyo twaba mu kati. Nomba kwaliba ifyo tufwile ukucita pa kuti twaluke. Natulandeko pali fimo.

11. Nga tulepepa kuli Yehova kuti atwafwa shani pa kuti twaluke mu fyo twaba mu kati?

¹¹ Icacindama ico tulingile ukubalilapo ukucita, kupepa. Tufwile ukulapepa nga filya uwaimbile amalumbo acitile, apepele ati: “Lengeni muli ine umutima uwasanguluka, mwe Lesa, kabili bikeni muli ine umupashi uupya, uwashangila.” (Amalu. 51:10) Tufwile ukusumina ukuti tulingile ukwaluka mu fyo twaba mu kati, kabili tulingile ukulomba Yehova pa kuti atwafwe ukwaluka. Nomba kuti twashininkisha shani ukuti Yehova akatwafwa pa kuti tukaluke? Ifyo Yehova alaile abena Israele abashalemumfwila ilyo Esekiele ali umumi kuti fyalenga twashininkisha ukutila kuti atwafwa. Abalaile ati: “Nkabapeela umutima umo, nkabika no mupashi upya mu kati kabo . . . no kubapeela umutima wanaka ngo munofu.” (Esek. 11:19) Yehova aliitemenwe ukwafwa abena Israele pa kuti baaluke, kabili alaitemenwa no kutwafwa.

12-13. (a) Nga fintu Amalumbo 119:59 yalanda, finshi tulingile ukulatontonkanyapo sana? (b) Mepusho nshi mulingile ukuyipusha?

¹² Icacindama icalenga bubili ico tulingile ukucita, kulatontonkanya sana pa fyo tulebelenga. Ilyo tulebelenga Icebo ca kwa Lesa cila bushiku, tufwile ukulatontonkanya sana pa fyo tulebelenga pa kuti twishibe umo tulingile ukwaluka. (Belengeni Amalumbo 119:59; Heb. 4:12; Yako. 1:25) Tufwile ukwishiba ifingalenga twalakonka amano ya buntunse. Tulingile ukusumina ukuti kwaliba ifyatwafya ukuleka kabili tufwile ukuibikilishako apapela amaka yesu pa kuti tufileke.

¹³ Ku ca kumwenako, yipusheni amuti: ‘Bushe nalikwata umufimbila?’ (1 Pet. 2:1) ‘Bushe ndi wa cilumba pa mulandu wa nkulilo yandi, amasambililo yandi nelyo pa mulandu wa kuti nalikwata indalama ishingi?’ (Amapi. 16:5) ‘Bushe nalisuula abantu abashakwata ifyo nakwata nelyo aba mushobo umbi?’ (Yako. 2:2-4) ‘Bushe ifintu fya mu calo ca kwa Satana filambeleleka?’ (1 Yoh. 2:15-17) ‘Bushe nalitemwa ifyabipa ne fya kuleseshamo icitendwe ifishawama?’ (Amalu. 97:10; 101:3; Amose 5:15) Nga mwaasuka aya mepusho kuti mwasanga ukuti kuli fimo ifyo mulingile ukwalukamo. Nga twacimfya ifingaba nga “malinga ayakosa,” tukalenga Shifwe wa ku muulu akalesekelela.—Amalu. 19:14.

14. Mulandu nshi tulingile ukulasalila bwino abafwile ukuba ifibusa fyesu?

¹⁴ Icacindama icalenga butatu ico tufwile ukucita, kulasala bwino abafwile ukuba ifibusa. Ifibusa fyesu filalenga twalacita ifisuma nelyo ifibi. (Amapi. 13:20) Abengi abo tubomba nabo nelyo abo tusambilila nabo te kuti batwafwe ukulatontonkanya nge fyo Lesa atontonkanya. Lelo abengaba ifibusa fyesu ifisuma kuti twabasanga mu cilonganino ca Bwina Kristu. Aba mu cilonganino e bengatukoselesha kabili e bengatucincisha ‘ukulabomba imilimo iisuma.’—Heb. 10:24, 25.

15-16. Finshi Satana acita pa kuti alenge twalule ifyo tutontonkanya?

¹⁵ Tamufwile ukulaba ukuti Satana apampamina pa kulenga twaalula ifyo tutontonkanya. Alabomfya ifisambilisho fyalekanalekana pa kuti tuleke ukutontonkanya ukulingana ne fyo Icebo ca kwa Lesa citusambilisha.

¹⁶ Satana alitwalilila ukwipusha icipusho cimo cine ico aipwishe Efa mwi bala lya Edeni. Amwipwishe ati: “Bushe ca cine Lesa amwebele ukuti . . . ?” (Ukute. 3:1) Muli cino calo ico Satana ateka, ilingi line tulomfwa abantu baleipusha amepusho ayengalenga twatendeka ukutwishika ifyo twasuminamo, amepusho  pamo nga: ‘Bushe ca cine Lesa tasuminisha impali? Bushe ca cine Lesa tafwaya mulesefya Krisimasi ne nshiku sha kufyalwa? Bushe ca cine Lesa wenu tafwaya balemubikamo umulopa? Bushe ca cine Lesa uwaba no kutemwa tafwaya muleampana na balupwa lwenu nelyo ifibusa abatamfiwa mu cilonganino?’

17. Finshi tulingile ukucita nga ca kuti umuntu atwipusha amepusho ayengalenga twalatwishika ifyo twasuminamo, kabili tukaba shani nga tulekonka ifyaba pe lembo lya Abena Kolose 2:6, 7?

¹⁷ Tufwile ukushininkisha ukuti ifyo twasuminamo fya cine. Nga ca kuti tatulesanga amasuko ya mepusho ayacindama pa fyo twasuminamo, tukatendeka ukutwishika nampo nga ifyo twasuminamo fya cine nelyo iyo. Nga twatwalilila ukutwishika, mu kuya kwa nshita kuti twatendeka ukutontonkanya nge fyo abantu muli cino calo batontonkanya, kabili icitetekelo cesu kuti capwa. Nomba finshi tulingile ukucita? Icebo ca kwa Lesa citweba ukuti tufwile ukwalula amatontonkanyo pa kuti tushininkishe fwe bene “ico Lesa afwaya, icisuma, icapokelelwa kabili icapwililika.” (Rom. 12:2) Nga tuleisambilisha lyonse Icebo ca kwa Lesa ne mpapulo ishilanda pali Baibolo, kuti twashininkisha fwe bene ukuti ifyo tusambilila mu Baibolo e cine. Kuti twashininkisha icine cine ukuti amafunde ya kwa Yehova yalilungama. Lyena nga filya fine umuti uwalimba imishila waba, e fyo na ifwe tukaba abalimbwa, kabili tukaba ne “citetekelo icakosa.”—Belengeni Abena Kolose 2:6, 7.

18. Finshi tufwile ukulacita pa kuti twilatontonkanya nge fyo abantu muli cino calo ico Satana ateka batontonkanya?

¹⁸ Takuli nangu umo uwingamukosesha icitetekelo cenu. Kanshi twalilileni ukwaluka mu fyo mutontonkanya. Muleba no mute wa kupepa, kabili mulelomba Yehova pa kuti alemupeela umupashi wakwe. Muletontonkanya sana pa fyo mubelenga mu Cebo ca kwa Lesa, kabili muleibebeta mu fyo mutontonkanya na mu filenga mulecita fimo. Mulesala bwino abalingile ukuba ifibusa fyenu, kabili muleba na bantu abengalenga mwaaluka mu fyo mutontonkanya. Nga mulecita ifi, tamwakaletontonkanya nge fyo abantu ba muli cino calo ico Satana ateka batontonkanya, kabili mukalalwisha “amatontonkanyo yalubana na conse icasansabala icilwisha ukwishiba Lesa.”—2 Kor. 10:5.