1. Ki lavertisman zapot Pol ti donn bann Kretyen swazir?

ZAPOT Pol ti donn sa lavertisman: “Pa les sa lemonn enfliyans zot.” (Rom. 12:2) Pol ti pe ekri bann Kretyen dan premye syek. Me akoz i ti pe averti bann Kretyen ki ti deza pe servi Bondye e ki ti’n ganny swazir par lespri sen?​—Rom. 1:7.

2-3. Ki mannyer Satan i esey fer nou aret servi Zeova, me ki mannyer nou kapab sanz bann move fason panse “ki’n byen anrasinen” dan nou?

² Pol ti enkyet akoz aparaman serten Kretyen ti pe ganny enfliyanse par bann move nide sorti dan lemonn Satan. (Efe. 4:17-19) Sa i kapab arive avek nou tou. Satan pe kontrol sa lemonn e i kapab servi diferan taktik pour enfliyans nou. Par egzanp, si nou anvi vin en dimoun enportan oubyen popiler dan sa lemonn, i pou servi sa dezir pour esey fer nou aret servi Zeova. I osi kapab esey servi bann keksoz ki nou’n aprann kot lakour, kot lekol e avek bann dimoun otour nou pour fer nou annan menm fason panse avek li.

³ Me eski i posib pour retir “bann keksoz ki’n byen anrasinen” dan nou? (2 Kor. 10:4) Remarke ki Pol ti dir: “Nou pe detri bann rezonnman ek bann gro lobstak ki anpes dimoun konn Bondye e nou met anba kontrol tou panse pour fer li vin prizonnyen e obeisan avek Kris.” (2 Kor. 10:5) Alor, avek led Zeova nou kapab sanz bann move fason panse. Atraver son Parol, Zeova i kapab ed nou retir bann move lefe ki lemonn Satan in annan lo nou fason panse, zis parey latizann i kapab retir lefe en pwazon.

4. Ki sanzman bokou nou in bezwen fer ler nou ti fek aprann sa ki Labib i dir?

⁴ Mazin lo tou bann sanzman ki ou ti bezwen fer ler ou ti fek aprann sa ki Labib i vreman dir e deside pour servi Zeova. Pour servi Zeova, bokou parmi nou ti bezwen aret fer serten move keksoz. (1 Kor. 6:9-11) Pa nou vreman rekonesan ki Zeova in ed nou aret fer sa bann move keksoz!

5. Dapre Romen 12:2, ki sa de keksoz ki nou bezwen fer?

⁵ Par kont, nou bezwen fer atansyon ki nou pa zanmen santi ki nou nepli annan bann sanzman pour fer. Menm si nou’n aret fer bann pese grav ki nou ti fer avan ki nou ti batize, nou bezwen kontinyen travay dir pour evit okenn keksoz ki kapab tant nou pour rekonmans fer sa bann move keksoz. Ki mannyer nou kapab fer sa? Pol ti dir: “Pa les sa lemonn enfliyans zot, me transform zot par sanz zot fason panse.” (Rom. 12:2) Alor nou bezwen fer de keksoz. Premyerman, nou bezwen fer sir ki nou “pa les sa lemonn enfliyans” nou. Dezyenmman, nou bezwen “transform” nou par sanz nou fason panse.

6. Ki nou aprann avek sa ki Zezi ti dir dan Matye 12:43-45?

⁶ Pol pa ti pe dir ki nou bezwen sanz zis nou laparans. Nou bezwen fer plis ki sa. (Vwar sa bwat “ Eski ou’n transformen oubyen ou’n degize?”) Pour swiv legzanp Kris, nou bezwen konpletman sanz nou fason panse, ki enplik nou latitid, santiman ek dezir. Alor nou tou nou bezwen demann nou lekor, ‘Eski mon pe sanz zis mon laparans oubyen eski mon pe vreman swiv legzanp Kris dan mon leker ek lespri?’ I enportan pour nou konn larepons sa kestyon. Dan Matye 12:43-45, Zezi i dir nou ki nou bezwen fer.  (Lir.) Sa ki Zezi ti dir i ed nou pour aprann en leson enportan: I pa ase zis pour retir bann move panse, me nou bezwen ranplas zot par bann panse ki fer plezir Bondye.

7. Ki mannyer nou kapab sanz nou fason panse oubyen nou bann dezir?

⁷ Eski nou vreman kapab sanz nou fason panse oubyen nou bann dezir? Labib i dir: “Zot devret kontinyen renouvle zot fason panse e devlop sa nouvo personnalite ki’n ganny kree dapre lavolonte Bondye e ki an armoni avek ladrwatir ek fidelite Bondye.” (Efe. 4:23, 24) Alor, nou kapab sanz sa kalite dimoun ki nou ete, me i pa fasil. I pa ase pour zis reziste bann move dezir e aret fer bann move keksoz. Nou bezwen sanz nou “fason panse.” Sa i enplik sanz nou bann dezir, latitid ek rezon akoz nou fer serten keksoz. Pour arive fer sa bann sanzman, nou bezwen kontinyen fer bokou zefor.

8-9. Ki mannyer leksperyans en frer i montre lenportans pour sanz nou fason panse konpletman?

⁸ Annou vwar legzanp en frer ki ti en dimoun vyolan dan lepase. Sa frer ti abitye bwar tro bokou e i ti kontan lager, me i ti aret fer tousala e avek letan i ti batize. Sa ti donn en bon temwannyaz dan son vwazinaz. Me en zour swar, pa bokou letan apre ki i ti’n batize, i ti ganny teste dan en fason ki i pa ti ekspekte. En zonm sou ti vin rod lager avek sa frer. Premye kou, sa frer ti kapab kontrol son lekor e pa lager avek sa zonm. Me ler sa zonm ti konmans koz an mal lo Zeova, sa frer ti nepli kapab tenir. I ti sot deor e ansonm sa zonm. Ki mannyer sa frer in kapab fer en keksoz koumsa? Menm si son letid Labib ti’n ed li pour aret lager, i pa ti ankor kapab sanz son fason panse konpletman. I ti bezwen kontinyen fer zefor pour sanz son bann dezir, latitid ek rezon akoz ki i fer serten keksoz.

⁹ Sanmenm sa ki sa frer ti fer. (Prov. 24:16) Avek led bann ansyen, i ti kontinyen fer progre e avek letan i ti kalifye pour vin en ansyen. Apre, en zour swar, zis an deor Lasal Rwayonm, i ti fer fas avek menm sityasyon ki i ti’n pas ladan plizyer lannen avan. En zonm sou ti anvi lager avek en lot ansyen. Ki nou frer ti fer? Dan en fason kalm e avek limilite, nou frer ti rezonn avek sa zonm sou, kalme li e i ti menm ed li pour ariv kot li. Akoz safwasi nou frer ti reakte dan en lot fason? I ti’n sanz son fason panse. I ti’n vin en dimoun ki vreman kontan lape e ki annan limilite. Sa ti anmenn louanz pour Zeova!

10. Ki nou bezwen fer pour sanz nou fason panse konpletman?

¹⁰ Sa bann sanzman pa ariv dizour ou lannmen oubyen san ki nou bezwen fer okenn zefor. O kontrer, i kapab ki pour plizyer lannen nou bezwen “fer bokou zefor.” (2 Pyer 1:5) Sa bann sanzman pa pou arive zis akoz nou dan laverite pour en bon pe letan. Nou bezwen fer tou sa ki nou kapab pour sanz nou fason panse konpletman. Annou vwar serten keksoz de baz ki nou bezwen fer pour arive fer sa.

11. Ki mannyer lapriyer i ed nou sanz nou fason panse?

¹¹ Premye keksoz enportan ki nou bezwen fer i priye. Parey en psalmis, priy  Zeova e demann li: “Kree dan mwan en leker pir; Redonn mwan en lespri nouvo.” (Ps. 51:10) Nou bezwen admet ki nou bezwen sanz nou fason panse e demann Zeova pour ed nou. Ki mannyer nou kapab asire ki Zeova pou ed nou sanze? Nou kapab ganny ankouraze par sa ki Zeova ti dir konsernan bann Izraelit dan letan Ezekyel. Menm si sa bann Izraelit ti annan leker dir, Zeova ti promet: “Mon pou donn zot tou en menm leker. Mon pou met dan zot en nouvo lespri. Mon pou . . . donn zot en leker laser,” setadir en leker ki pare pour resevwar gidans Bondye. (Ezek. 11:19) Zeova ti pare pour ed sa bann Izraelit sanze e i pare pour fer menm keksoz pour nou.

12-13. (a) Dapre Psonm 119:59, ki nou bezwen medit lo la? (b) Ki bann kestyon ou devret demann ou lekor?

¹² Dezyenm keksoz enportan ki nou bezwen fer i medite. Anmezir ki nou lir Parol Bondye toulezour, nou bezwen pran letan pour medite, setadir pour reflesi o profon lo sa ki nou pe lir. Sa pou ed nou vwar bann fason panse ek santiman ki nou bezwen sanze. (Lir Psonm 119:59; Ebr. 4:12; Zak 1:25) Nou bezwen egzamin nou lekor pour vwar si nou annan okenn fason panse oubyen santiman ki’n ganny enfliyanse par sa lemonn. Nou bezwen admet ki nou annan bann febles e travay dir pour retir zot.

¹³ Par egzanp, demann ou lekor: ‘Eski mon annan sa tandans pour zalou oubyen anvi keksoz mon kanmarad?’ (1 Pyer 2:1) ‘Eski mon krwar mon pli siperyer ki lezot akoz mon ledikasyon, larzan ki mon annan oubyen landrwa kot mon sorti?’ (Prov. 16:5) ‘Eski mon krwar ki bann dimoun ki napa bann keksoz ki mwan mon annan oubyen ki sorti dan en lot ras, i pli enferyer ki mwan?’ (Zak 2:2-4) ‘Eski mon ganny atire par bann keksoz ki lemonn Satan i ofer?’ (1 Zan 2:15-17) ‘Eski mon kontan lir, get oubyen ekout bann keksoz ki annan pour fer avek sèks e ki vyolan?’ (Ps. 97:10; 101:3; Amos 5:15) Ler ou reponn sa bann kestyon, ou pou vwar ki bann sanzman ou bezwen fer. Ler nou sanz bann panse oubyen santiman “ki’n byen anrasinen” dan nou leker, nou pou fer plezir nou Papa ki dan lesyel.​—Ps. 19:14.

14. Akoz i enportan pour swazir byen nou bann zanmi?

¹⁴ Trwazyenm keksoz ki nou bezwen fer i swazir byen nou bann zanmi. Ki swa nou realize oubyen non, nou bann zanmi i annan en gran lenfliyans lo nou. (Prov. 13:20) Kot travay oubyen kot lekol, nou antoure avek bann dimoun ki pa pou ed nou mazin dan en fason ki fer plezir Zeova. Par kont, dan nou bann renyon nou kapab zwenn dimoun ki nou kapab vin bon zanmi avek. Zot kapab motiv oubyen ankouraz nou “pour demontre lanmour e fer bann bon aksyon.”​—Ebr. 10:24, 25, not.

15-16. Ki mannyer Satan i esey sanz nou fason panse?

¹⁵ Pa oubliye ki Satan i fer tou sa ki i kapab pour sanz nou fason panse. I servi tou sort kalite rezonnman pour sanz nou fason panse e fer nou oubliy tou sa ki nou’n aprann dan Parol Bondye.

¹⁶ Satan i ankor pe demann sa menm kestyon ki i ti demann Ev dan zarden Edenn: ‘Eski Bondye in vreman dir . . . ?’ (Zen. 3:1) Dan sa lemonn kontrole par  Satan, nou souvan tann bann kestyon ki kapab senm dout dan nou lespri, parey: ‘Eski Bondye in vreman dir ki de dimoun menm sèks pa devret dan en relasyon? Eski Bondye in vreman dir ki ou pa devret selebre nwel ek ou lanniverser nesans? Eski ou Bondye i vreman ekspekte ki ou pa pran disan? Eski en Bondye ki kontan ou i vreman oule ki ou pa asosye avek en dimoun ki ou kontan, zis akoz i nepli en Temwen Zeova?’

17. Ki nou bezwen fer ler en dimoun i demann bann kestyon pour esey senm dout dan nou lespri? Dapre Kolosyen 2:6, 7, ki rezilta sa pou anmennen?

¹⁷ Nou bezwen konvenki ki nou bann krwayans i vre. Si nou pa trouv larepons bann kestyon enportan konsernan nou krwayans, nou kapab konmans annan dout. Avek letan, sa bann dout i kapab detourn nou fason panse e afebli nou lafwa. Alor, ki nou bezwen fer? Parol Bondye i dir ki nou bezwen transform nou fason panse pour ki nou menm nou fer sir “ki sa i lavolonte Bondye, ki bon, akseptab e parfe.” (Rom. 12:2) Ler nou etidye Labib regilyerman, nou fer sir ki sa ki nou’n aprann dan Labib i vre e nou pou konvenki ki bann standar Zeova i bon pour nou. Koumsa, nou pou vin parey en pye dibwa ki annan bann bon rasin, andotmo, nou “lafwa [pou] vin pli stab” e byen anrasinen.​—Lir Kolosyen 2:6, 7.

18. Kwa ki pou ed nou retir move lenfliyans ki lemonn Satan in annan lo nou fason panse?

¹⁸ Personn pa kapab fer ou lafwa vin pli for pour ou, alor kontinyen renouvle ou fason panse. Toultan priye e sipliy Zeova pour donn ou son lespri sen. Medite, setadir reflesi o profon pour egzamin ou bann panse ek motivasyon. Swazir byen ou bann zanmi, setadir bann dimoun ki pou ed ou sanz ou fason panse. Ler ou fer sa, ou pou retir move lenfliyans ki lemonn Satan in annan lo ou fason panse, ou pou kapab sanz ou fason panse konpletman e detri “bann rezonnman ek bann gro lobstak ki anpes dimoun konn Bondye.”​—2 Kor. 10:5.