1. Ni kurabura ki oku entumwa Paulo yaahandiikiire Abakristaayo abashukirweho amajuta?

ENTUMWA Paulo akarabura ati: “Mutashushanisibwa n’ab’obusingye obu.” (Rom. 12:2) Ebigambo ebi akabihandiikira Abakristaayo ab’omu kyasha ky’okubanza. Ahabw’enki yaarabwire atyo abashaija n’abakazi abaabaire beehaireyo ahari Ruhanga, kandi bashukirweho amajuta?​—Rom. 1:7.

2-3. Sitaane naateeraho ata kutwiha ahari Yehova, kwonka nitubaasa kweihamu tuta emiteekateekyere egwire eri ‘nk’ebigo’?

² Entumwa Paulo akafayo aha Bakristaayo abaabaire batandikire kuhabisibwa obwengye bw’abantu n’emiteekateekyere egwire erikwenegyezibwa ensi erikutegyekwa Sitaane. (Efe. 4:17-19) Eki nikibaasa kuhika ahari buri omwe ahariitwe. Sitaane ruhanga w’ensi egi omu kuteeraho kutwiha ahari Yehova, naakoresa obukoryo butari bumwe. Nk’eky’okureeberaho, twaba nitwenda kurangaanwa nari kuba abantu b’amaani, ekyo Sitaane naija kukikoresa kutwiha ahari Yehova. Naabaasa kwihirira aha ku twakuziibwe, oruganda rwaitu, nari obwegyese bwaitu kutureetera kugira emiteekateekyere nk’eye.

³ Mbwenu shi nikibaasika kwiha omu biteekateeko byaitu ebintu ebigumire ebiri ‘nk’ebigo’? (2 Kor. 10:4) Entumwa Paulo akagira ati: “Nitumaraho tutyo empaka n’ekintu kyona ekirikwetunguura kurwanisa okumanya Ruhanga, kandi nitugomoora ekiteekateeko kyona, ngu kyorobere Kristo.” (2 Kor.  10:5) Eego, turikuhwerwa Yehova nitubaasa kweihamu emiteekateekyere etahikire. Nk’oku omubazi gurikubaasa kwiha obutwa omu mubiri, Ekigambo kya Ruhanga nikibaasa kutuhwera kweihamu emiteekateekyere etahikire ey’ensi erikwebemberwa Sitaane.

4. Ni mpindahinduka ki ezi baingi ahariitwe twabaire twine kukora ku twayegire amazima?

⁴ Teekateeka aha mpindahinduka ezi waakozire ku waayegire amazima agari omu Kigambo kya Ruhanga, reero okacwamu kumuheereza. Baingi ahariitwe, eki kikaba nikitwariramu okureka emitwarize mibi. (1 Kor. 6:9-11) Nitusiima Yehova ahabw’okutuhwera kusingura emize mibi nk’egi!

5. Ni bintu ki biri ebiri omu Abarooma 12:2 ebi twine kukora?

⁵ Kwonka, titushemereire kuteekateeka ngu titukiine kukora empindahinduka. N’obu twakuba tutakikora enshobe z’amaani ezi twakozire tutakabatiziibwe, twine kuguma nitwetantara ekintu kyona ekirikutureetera kwohibwa kugaruka kukora ebikorwa bibi eby’enyima. Ekyo nitubaasa kukikora tuta? Paulo akagarukamu ati: “Mutashushanisibwa n’ab’obusingye obu, kureka muhindurwe basya ahabw’okugarurwa obusya omu biteekateeko byanyu.” (Rom. 12:2) N’ahabw’ekyo twine kukora ebintu bibiri. Eky’okubanza, titushemereire ‘kushushanisibwa,’ nari kubumbwa ensi egi. Ekya kabiri, twine ‘kuhindurwa basya’ ahabw’okugarurwa obusya omu biteekateeko byaitu.

6. Nitwegyera ki aha bigambo bya Yesu ebiri omu Matayo 12:43-45?

⁶ Paulo akaba atarikumanyisa okuhinduka okw’aha ruguru. Kureka n’okuhindura buri kimwe ekirikutukwataho. (Reeba akabokusi “ Nituhindurwa Basya Nari Nitweshushaniriza?”) Twine kuhindurira kimwe  ebiteekateeko byaitu, emiteekateekyere yaitu, enyehurira zaitu, n’ebigyendererwa byaitu. N’ahabw’ekyo twena twine kwebuuza tuti: ‘Empindahinduka ezi ndikukora n’ez’aha ruguru, nari nimpindukira kimwe Omukristaayo ohikire? Empinduka egi ni nkuru. Ebiri omu Matayo 12:43-45, n’ebigambo bya Yesu ebirikworeka ekiine kukorwa. (Kishome.) Ebigambo ebyo nibitwegyesa ngu tikirikumara kweihamu emiteekateekyere egwire, kureka omu mwanya gwayo twine kutamu ehikire.

7. Nitubaasa kuhindura tuta omutima gwaitu n’ebiteekateeko byaitu?

⁷ Mbwenu shi nikibaasika kuhindura emiteekateekyere yaitu nari eki turi kyenyine? Ekigambo kya Ruhanga nikigarukamu kiti: “Muhindurwe basya omu mwoyo gw’obwengye bwanyu. Mujware omuntu ondiijo omusya, owaahangirwe omu nshusha ya Ruhanga omu kuhikiirira n’okwera okw’amazima.” (Efe. 4:23, 24) Eego, nikibaasika kuhinduka, kwonka tikyorobi kukikora. Tushemereire kukora ekirikukira aha kwetantara ebyetengo bibi n’ebikorwa bibi. Twine kuhindurwa busya omu biteekateeko byaitu. Ekyo nikitwariramu okuhindura ebyetengo byaitu, ebi turikukunda n’ebigyendererwa byaitu. Eki n’ekintu eki twine kugumizamu nitukora.

8-9. Ekyahikire aha ow’eishe-emwe omwe nikyoreka kita obukuru bw’okuhindukira kimwe basya?

⁸ Ka tureebe eky’okureeberaho ky’ow’eishe-emwe owaabaire ari omushaarizi. Bwanyima y’okurekyera aho kunywa amaarwa n’okurwana, akaba ohikire kubatizibwa, eki kikaba obujurizi omu kicweka ahu yaabaire naatuura. Kwonka omwabazyo gumwe, aherize kubatizibwa, akagyezibwa omu muringo ogu yaabaire atarikuteekateeka. Omusinzi akaija omuka owe arikwenda kurwana nawe. Omu kubanza ow’eishe-emwe akangira okugyemeserezibwa okwo tiyaarwana. Kwonka omushaija ku yaagambire kubi ahari Yehova, ow’eishe-emwe akaguubwa kubi munonga kyamuremesa kutegyeka ekiniga kye. Akashohora aheeru yaateera omushaija. Ow’eishe-emwe ogu akaba aine buremeezi ki? N’obu okwega Baibuli kuraabe kwamuhweraire kushweka emitwarize ye y’obushaarizi, kwonka akaba atakahindukiire kimwe musya omu miteekateekyere ye. Nitubaasa kugira ngu, akaba atakahindure eki ari omunda.

⁹ Kwonka, ow’eishe-emwe tararekiire aho kukora empinduka. (Enf. 24:16) Ahabw’obuhwezi bw’abareeberezi akagumizamu naakora empinduka ezirikwetengyesa. Bwanyima akaba omureeberezi. Omwabazyo gumwe, ku yaabaire ari aheeru y’Ekyombeko ky’Obukama, akeeshanga omu mbeera erikushushana n’eyi yaabaire yaarabiremu emyaka mikye enyima. Omusinzi akaba naayenda kuteera omureeberezi ondiijo. Ow’eishe-emwe ogu akakora ki? Aikaikaine kandi acureire, akahaajaana n’omusinzi ogwo owaabaire naazonga, yaamucureeza, kandi yaamuhwera kutaaha owe. Ahabw’enki ow’eishe-emwe yaatwarize omu muringo gw’omutaano? Akaba ahindukiire kimwe musya omu miteekateekyere ye. Akahindura emitwarize ye yaaba ow’obusingye, kandi omucureezi ahabw’okwenda kuhimbisisa Yehova!

10. Niki ekirikutwarirwa mu kukora empinduka?

¹⁰ Empinduka ezi tizirikubaho omu kiro kimwe nari tutaine eki tukozire. Nikibaasa kutwetengyesa “obweziriki bwingi,” kandi kumara emyaka mingi. (2 Pet. 1:5) Empinduka ezi tizirikubaho ahabw’okugira ngu tumazire obwire buraingwa nituheereza Yehova. Twine kukora n’obweziriki kuhindukira kimwe basya.  Hariho ebintu bikuru ebi twine kukora. Ka tushwijume bimwe aharibyo.

11. Okushaba nikutuhwera kuta kuhindura emiteekateekyere yaitu?

¹¹ Okushaba n’eidaara rikuru ery’okubanza. Twine kushaba nk’omuhandiiki wa Zaaburi owaagizire ati: “Ompangyemu omutima ogushemeire, ai Ruhanga; Ogarure omwoyo murungi omunda yangye.” (Zab. 51:10) Twine kwikiriza ngu twine kuhindura emiteekateekyere yaitu, kandi twine kushaba Yehova kutuhwera. Nitubaasa kuhamya tuta ngu Yehova naija kutuhwera kukora empindahinduka? Eki Yehova yaaraganiise Abaisraeli abaabaire baine emitima egangaire omu biro bya Ezekieli nikitugaruramu amaani. Akagira ati: ‘Niinyija kubaha omutima gumwe, mbatemu omwoyo musya, mbaihemu omutima gw’eibaare mbahe omutima gworobi, [oguri kworobera obuhabuzi bwa Ruhanga].’ (Ezk. 11:19) Yehova akaba ayeteekateekire kuhwera Abaisraeli abo kukora empindahinduka, kandi naitwe naija kutuhwera.

12-13. (a) Kurugiirira aha biri omu Zaaburi 119:59, twine kuteekateeka ahari ki? (b) Ni bibuuzo ki ebi oine kwebuuza?

¹² Okuteekateeka n’eidaara rya kabiri rikuru. Twashoma Ekigambo kya Ruhanga buri izooba, twine kuteekateeka munonga aha bi twashoma, nari kuta omutima aha miteekateekyere n’enyehurira ezi twine kuhindura. (Shoma Zaaburi 119:59; Heb. 4:12; Yak. 1:25) Twine kweshwijuma kumanya yaaba tutandikire kuhabisibwa obwengye bw’abantu n’emiteekateekyere yaabo. Twine kwikiriza ngu twine obweremwa, reero tugire eki twakora kubusingura.

¹³ Nk’eky’okureeberaho, noobaasa kwebuuza oti: ‘Nyinemu eihari nari eitima omu mutima gwangye?’ (1 Pet. 2:1) ‘Ninyetunguura ahabw’ahu naakuriire, obwegyese bwangye, nari entaasya yangye?’ (Enf. 16:5) ‘Abataine nk’ebi nyine nari ab’erangi endiijo nimbareeba nk’ab’ahansi?’ (Yak. 2:2-4) ‘Mbwenu shi ntandikire kushemezibwa ensi erikwebemberwa Sitaane?’ (1 Yoh. 2:15-17) ‘Ninkunda eby’okweshemeza ebirimu obushambani n’obushaarizi?’ (Zab. 97:10; 101:3; Amo. 5:15) Oku oraagarukyemu ebibuuzo ebi nikwija kworeka ahu oine kukora empinduka. Twahindura emiteekateekyere eri ‘nk’ebigo’ eri omu mitima yaitu, nitwija kushemeza Tataitwe ow’omu iguru.​—Zab. 19:14.

14. Ahabw’enki ni kikuru kutoorana abanywani barungi?

¹⁴ Okutoorana abanywani barungi n’eidaara rya kashatu eririkwetengyesa. Yaaba nitukimanya nari tutarikukimanya, banywani baitu nibatureetera kugira emitwarize mirungi nari mibi. (Enf. 13:20) Twaba turi aha murimo nari ah’eishomero, nituba twetooroirwe abantu abarikuturemesa kugira emiteekateekyere nk’eya Yehova. Kwonka, nitubaasa kutunga abanywani barungi twija omu nteerane zaitu ez’Ekikristaayo. Twaza omu nteerane nitubaasa kuhigwa, “kukundana n’okukora ebirungi.”​—Heb. 10:24, 25.

15-16. Sitaane naateeraho ata kuhindura emiteekateekyere yaitu?

¹⁵ Kwonka ijuka, ngu Sitaane amaririire kuhindura emiteekateekyere yaitu. Naateeraho kukoresa buri kiteekateeko ekigwire kuhakanisa amazima g’omu Kigambo kya Ruhanga.

¹⁶ Sitaane naagumizamu kubuuza ekibuuzo eki yaabuurize Haawa omu musiri Edeni: ‘N’eky’amazima, Ruhanga akagira ngu . . . ?’ (Kut. 3:1) Omu nsi egi erikutegyekwa Sitaane, nitukira kuhurira ebibuuzo ebirikubaasa kutureetera kubangaanisa nka: ‘Ruhanga buzima,  tarikusiima obushwere bw’abantu abarikushushanisa obuhangwa? Mbwenu shi buzima, Ruhanga tarikwenda ngu okuze Noiri n’amazaarwa? Ruhanga waawe buzima tarikwenda ngu oteebwemu eshagama? Mbwenu shi Ruhanga oine rukundo buzima, naayenda ngu oyetantare kukwatanisa n’ababingirwe omu kibiina?’

17. Tushemereire kukora ki haagira owatubuuza aha nyikiriza zaitu, kandi ebiri omu Abakolosai 2:6, 7 nibyoreka ngu nihabaasa kurugamu ki?

¹⁷ Twine kuba nituhamiza kimwe ebi turikwikiriza. Twaba tutatungire eby’okugarukamu by’ebibuuzo ebirikukwata aha bi turikwikiriza, nitubaasa kutandika kubangaanisa. Reero okubangaanisa oku nikubaasa kurugaho kukiikamye emiteekateekyere yaitu nari kushiishe okwikiriza kwaitu. Mbwenu shi twine kukora ki? Ekigambo kya Ruhanga nikituhiga kuhindurwa busya omu biteekateeko, kugira ngu tubone kumanya gye ebi Ruhanga arikukunda, “oku biri birungi, ebirikusiimwa, kandi ebihikire buzima.” (Rom. 12:2) Twaba nitweyegyesa obutoosha, nitwija kwehamiza ngu ebi turikwega omu Baibuli n’amazima. Kandi nitwija n’okuhamiza kimwe ngu emitindo ya Yehova ehikire. Reero nk’omuti ogutsimbire emizi ekahama, nitwija kuba tuhamire “omu kwikiriza.”​—Shoma Abakolosai 2:6, 7.

18. Niki ekiraatuhwere kwerinda emiteekateekyere y’ensi erikwebemberwa Sitaane?

¹⁸ Niiwe oine obujunaanizibwa bw’okuhamya okwikiriza kwawe, n’ahabw’ekyo gumizamu kuhindurwa busya omu biteekateeko byawe. Guma nooshaba; yeshengyereze Yehova kukuha omwoyo gwe ogurikwera. Teekateeka munonga; aha bi orikwega kandi guma nooshwijuma emiteekateekyere yaawe n’ebigyendererwa byawe. Sherura abanywani barungi; ba haihi n’abantu abaraakuhwere kugira emiteekateekyere mirungi. Waakora otyo, noija kweihamu emiteekateekyere y’ensi ya Sitaane, kandi osingure ‘ekintu kyona ekirikwetunguura kurwanisa okumanya Ruhanga.’​—2 Kor. 10:5.