1. ¿Imatam nirqa apostol Pabloqa iñiqmasinkunata?

APOSTOL Pablom iñiqmasinkunata nirqa: “Amayá kay tiempopi runakunapa imayna kawsasqankutaqa qatipakuychikchu”, nispa (Rom. 12:2). ¿Imanasqataq apostol Pabloqa chaynata nirqa hanaq pachaman rinankupaq akllasqa iñiqmasinkunata? (Rom. 1:7).

2, 3. (1) ¿Imatam satanasqa ruwan Jehova Diosmanta karunchawananchikpaq? (2) ¿Atichwanchu Diospa munasqanman hina kawsakuyta?

² Pablopa tiemponpi wakin Diosta yupaychaqkunapas, munasqankuman hinañam kawsakuchkarqaku, chayta qawaspanmi apostol Pabloqa llakisqa tarikurqa (Efes. 4:17-19). Ñuqanchikpas runakunapa imayna kawsasqantam qatipakuyta qallaykuchwan. Satanasqa kay pacha makinpi kasqanraykum tukuy rikchaq tuqllakunata churan taytanchik Jehova Diosmanta karunchawananchikpaq. Payqa munan sunqunchikpa munasqanta ruwananchiktawan runakunapa allin riqsisqan kananchiktam. Munantaqmi pay hina kananchikta, chaymi imayna uywasqa kasqanchikwan, may llaqtayuq kasqanchikwan, hinaspa estudiasqanchikman hina kawsananchikpaq intuwanchik.

³ Chaynaqa, ¿atichwanchu Diospa munasqanman hina kawsakuyta? (2 Cor. 10:4). Arí, atichwanmi. Kikin apostol Pablom nirqa: ‘Ñuqaykuqa tikranikum runakunapa mana allin piensasqankuta, tuñichichkanikutaqmi Diospa yachayninpa contranpi ima harkakuqkunatapas, chaynallataqmi runakunapa imaymana piensasqankutapas presochachkaniku Cristotaña kasukunankupaq’, nispa (2 Cor. 10:5). Arí, Pablopa nisqanman  hinam, Jehova Diospa yanapakuyninwan sunqunchikmantawan yuyayninchikmanta runakunapa yanqa yachachikuyninkunata chinkachisun. Imaynam hampipas unquptinchik yanapawanchik, chaynam Diospa palabranpas yanqa yachachikuykunamanta waqaychawanchik.

4. ¿Imakunatam saqirqanchik Diospa runan kananchikpaq?

⁴ Diospa runan kananchikpaqqa punta vidanchiktam saqinanchik karqa, chaytaqa ruwarqanchik Diosmanta imam kaqta yachasqanchikraykum. Arí, llapallanchikmi mana allin ruwaykunata saqirqanchik (1 Cor. 6:9-11). Anchatamá taytanchik Jehova Diosta agradecekunchik, chaykunata saqinapaq yanapaykuwasqanchikmanta.

5. Romanos 12:2 nisqanman hinaqa, ¿ima ruwanapaqtaq Pablo niwarqanchik?

⁵ Llapallanchikmi Diospa runan kananchikpaqqa, mana allin ruwaykunata saqirqanchik. Chaywanpas, ¿hinallachu kallpanchakunanchik saqisqanchik kaqkunata kaqmanta mana munapayanapaq? Arí, hinallam kallpanchakunanchik. Chaypaqqa apostol Pablopa nisqanman hinam ruwananchik. Paymi nirqa: “Amayá kay tiempopi runakunapa imayna kawsasqankutaqa qatipakuychikchu, aswanqa yuyaynikichikta musuqyachispayá imayna kawsasqaykichikta tikraychik”, nispa (Rom. 12:2). Chaynaqa, runakunapa imayna kawsasqankuta mana qatipakunapaqqa puntatam paykunapa mana allin ruwasqankumanta karunchakunanchik. Chaymantapas yuyayninchiktam musuqyachinanchik Diospa nisqankunawan.

6. Mateo 12:43-45 Jesuspa nisqanwanqa, ¿imatam yachanchik?

⁶ Apostol Pablo ‘yuyaynikichikta musuqyachiychik’ nispanqa tukuy sunqunchikwan Diospa munasqanman hinaña kawsakuymantam nichkarqa. Chaymi Jehova Diospa  munasqanman hina kawsakunapaqqa kallpanchakuna hinaspa sunqunchikpa mana allin munapayayninkunata chinkachina. (Qawaytaq “ ¿Sunqumantachu imatapas ruwanchik icha runakuna qawawanallanchikpaqchu?” niq yachachikuyta). Chaypaqqa allinmi kanman kayna tapukuyninchik: “¿Allintachu kallpanchakuchkani Diospa munasqanman hinaña kawsakunaypaq? ¿Runakuna qawawanallanpaqchu imatapas ruwani, icha sunqumantachu Diospa munasqanman hina imatapas ruwani?”, nispa. Yuyayninchikta musuqyachiyqa manam mana allin kaqkunata umanchikmanta hurqukuruyllachu, aswanqa yachananchiktaqmi Jehova Diospa nisqankunata. Jesusmi chaymanta yachachinanpaq tupachirqa runamanta lluqsiq mana allin espirituwan (qaway Mateo 12:43-45).

7. ¿Imatam ruwananchik Diospa qayllanpi musuq runaña kanapaq?

⁷ ¿Atichwanchu Diospa qayllanpi musuq runaña kayta? Sasa kaptinpas atichwanmi musuq runaña kaytaqa. Chaypaqqa yuyayninchiktam musuqyachinanchik. Huk rimaypiqa, manañam munasqanchikman hinachu kawsananchik, aswanqa Diospa munasqanman hinañam. Bibliam niwanchik: “Hinallayá imayna piensasqaykichikta musuqyachiychik, chaymantapas musuq pachawan pachakuchkaq hinayá musuq runaña kaychik, chayna kawsakuyqa kachkan Diospa munayninman hina allin ruwaypi hinaspa chiqap iñiypi takyachisqam”, nispa (Efes. 4:23, 24). Chaypaqqa anchatam kallpanchakunanchik kanqa.

8, 9. ¿Imanasqataq musuq runaña kananchikpaq kallpanchakunanchik? Willarimuy huk iñiqmasinchikmanta.

⁸ Huk iñiqmasinchikmi manaraq testigo kachkaspanqa piñallaña, sinkakuqllaña hinaspa maqakuqllaña karqa. Jehova Diosta riqsiruspanmi ichaqa chayna kayta saqirurqa. Chayta qawaspankum llaqtamasinkunapas Jehova Diosta hatuncharqaku. Huk kutipim, iñiqmasinchik bautizakusqan qipallata huk sinka runa wasinman rirqa maqananpaq. Iñiqmasinchikqa manam kaqpaqpas hapirqachu chay runapa nisqankunataqa, ichaqa Diosmanta yanqakunata rimayta qallaykuptinmi, iñiqmasinchikqa chay runata maqarurqa. ¿Imanasqataq chaytaqa ruwarqa? Sunqunmanta chay mana allinkunata manaraq hurqusqanraykum. Huk rimaypiqa manam musuq runa hinaraqchu karqa.

⁹ Chaywanpas, iñiqmasinchikqa musuq runaña kananpaqmi hinalla kallpanchakurqa (Prov. 24:16). Punta apaqkunapas yanaparqakum, chaymi punchaw pasasqanman hina paypas punta apaqña karqa. Huk punchawmi, huñunakunanku wasipa punkunpi kachkaptinku, punta apaqmasinta huk sinka runa maqananpaq asuykurqa. Kunanqa, ¿imatam iñiqmasinchikqa ruwarqa? Kuyakuywanmi chay runata rimapayarqa hinaspam wasinman pusarqa. ¿Imanasqataq chaytaqa ruwarqa? Musuq runaña kasqanraykum. Payqa llampu sunqu runañam rikurirurqa. Chaywanmi Jehova Diospa sutinta hatuncharqa.

10. Musuq runaña kanapaqqa, ¿imatam hinalla ruwananchik?

¹⁰ Manam iskay-kimsa punchawllapichu musuq runaqa kasun. Wakiqninchikqa achka watakunam kallpanchakunanchik kanqa (2 Ped. 1:5). Achka wataña Diospa testigon kaspanchikpas, hinallam kallpanchakunanchik musuq runaña kananchikpaq. Chaypaqqa, ¿imam yanapawasun? Qatiqninpiyá chaymanta yachasun.

11. Jehova Diosta mañakuyninchikqa, ¿imaynatam yanapawasun yuyayninchikta musuqyachinapaq?

¹¹ Yuyayninchikta musuqyachinapaq utaq musuq runaña kananchikpaqqa Jehova Diostam mañakunanchik. Salmos qillqaq hinam, ñuqanchikpas Diosta mañakunanchik. Paymi kaynata mañakurqa: ‘Dios taytalláy, chuya sunqutaña [quykullaway], espiritullayta musuqyaykachiy’, nispa (Sal. 51:10). Arí, llapallanchikmi yuyayninchikta musuqyachinanchik, chaypaqmi taytanchik Jehova Diosta mañakunanchik. Ezequielpa tiemponpi Israel runakunatam Jehova Dios kaynata nirqa: ‘Rumi hina sunquykitam qichusaq, hinaspaymi musuq sunqutawan musuq espiritutaña qusqaykichik’, nispa (Ezeq. 11:19). Chayta yachayqa anchatamá kallpanchawanchik. Arí, Jehova Diosqa Israel runakunatam musuq runaña kanankupaq yanaparqa. Chaynaqa, ¿iskayrayanachu Jehova Dios yanapawananchikmanta? Manam. Kunanpas payqa yanapawasunmi.

12, 13. (1) Salmo 119:59 nisqanman hinaqa, ¿imapim yuyaymanananchik? (2) ¿Ima tapukuykunatam ruwakuchwan?

¹² Ñawinchasqanchikpim yuyaymanananchik. Sapa punchawmi Diospa palabranta ñawinchaspanchik yuyaymanananchik imayna runa kasqanchikpi, chaynapi Diospa munasqanman hinaña kawsakunapaq (qaway Salmo 119:59; Heb. 4:12; Sant. 1:25). Sapakamam tapukuchwan: “¿Runakunapa ruwasqantachu qatipakuchkani?”, nispa. Sapakamataqmi qawakunanchik imapi astawan kallpanchakunapaq, chaynapi Diospa munasqanman hina allin runaña kananchikpaq.

¹³ Kay tapukuykunatam ruwakuchwan: ¿Pitapas envidiakunichu? (1 Ped. 2:1). ¿Hatun tukunichu maypi uywasqa kasqaywan, imapas estudiasqaywan utaq achka qullqiyuq kasqaywan? (Prov. 16:5). ¿Mana kaqpaqta hinachu qawani huk law llaqtayuq runakunata? (Sant. 2:2-4). ¿Munapayanichu Diosta mana yupaychaq runakunapa ruwasqanta? (1 Juan 2:15-17). ¿Diospa chiqnisqan kaqkunawanchu utaq mana allin kaqkunawanchu kusirikuni? (Sal. 97:10; 101:3; Amos 5:15). Kay tapukuykunata ruwakuyninchikqa allinninchikpaqmi kanqa. Kaywanmi musyakusunchik imapi astawan kallpanchakunapaq. Chaynapi runakunapa kawsasqanman hina manaña kawsaspa taytanchik Jehova Diospa sunqunta kusichinapaq (Sal. 19:14).

14. ¿Imanasqataq Jehova Dios yupaychaq runakunawan hukllawakunanchik?

¹⁴ Chaymantapas Jehova Diosta yupaychaq runakunawanmi hukllawakunanchik. Yachayniyuqkunawan hukllawakuqqa yachayniyuqmi kanqa, mana chayna runakunawan hukllawakuqmi ichaqa sasachakuypi tarikunqa (Prov. 13:20). Arí, estudiaqmasinchikkunawan llamkaqmasinchikkunaqa manam Diosman sunqu kanapaqqa yanapawasunchu. Iñiqmasinchikkunam ichaqa yanapawasunchik kuyapayakuq hinaspa allin ruwaq kananchikpaq (Heb. 10:24, 25).

15, 16. ¿Imaynatam satanasqa pantarachiwachwan?

¹⁵ Satanasqa tukuytam ruwachkan pay hina kananchikpaq. Payqa yachanmi, Diospa palabranmanta yachayqa Diosman asuykachiwasqanchikta, chaymi tukuyta ruwan Jehova Diospa nisqankunamanta iskayrayananchikpaq.

¹⁶ Satanasqa ñawpaq tiempopi pantachisqanman hinam kunanpas pantachichkan. Evatam kaynata nispan pantarachirqa: “¿Dioschu nisurqankichik...?”, nispa (Gen. 3:1). Kay pachapi runakunapas iskayrayachiwachwanmi  kayna tapukuykunawan: “¿Dioschu mana munan qaripuralla utaq warmipuralla kanankuta? ¿Dioschu santukuyta hinaspa navidad ruwanaykichikta harkakun? ¿Dioschu nisunkichik yawarta mana churachikunaykichikpaq? ¿Dioschu nisunkichik manaña testigo kaq aylluykichikwan mana hukllawakunaykichikpaq?”, nispa.

17. (1) ¿Imatam ruwananchik iskayrayanapaq hina tapukuykunata ruwawaptinchik? (2) Colosenses 2:6, 7 nisqanman hina kawsakuspaqa, ¿imaynam tarikusun?

¹⁷ Jehova Diospa nisqankunamantaqa manam haykapipas iskayrayananchikchu. Imamantapas iskayrayayta qallaykuspaqa pisi-pisimantam Diosmanta karunchakuyta qallaykuchwan. Mana chayna tarikunapaqqa bibliapa nisqanman hinam yuyayninchikta musuqyachinanchik, chaynapi kikinchikmanta Diospa munasqanta yachananchikpaq (Rom. 12:2). Chaypaqqa, sapa kutim Diospa palabranta hinaspa qillqanchikkunata qawananchik. Chayta ruwaspaqa iñiyninchikpim allinta takyasun, hinaspa Diospa nisqankunamantapas manam iskayrayasunchu. Chaymantapas, allin sapichasqa sacha hina iñiyninchikpi allin takyasqa kaptinchikqa manam imapas wichichiwasunchu (qaway Colosenses 2:6, 7).

18. ¿Imam yanapawasun satanaspa tuqllankunaman mana wichiykunapaq?

¹⁸ Sapakamam iñiyninchikpi allinta takyananchikpaq kallpanchakunanchik. Kallpanchakunanchiktaqmi Diospa munasqanman hina kawsakunapaqpas. Chaypaqqa sapa kutim Diosta mañakunanchik yuyaytawan yachayta quwananchikpaq. Chaymantapas yuyaymanananchikmi imayna runa kasqanchikpi, hinaspa iñiqmasinchikkunawanmi astawan hukllawakunanchik. Paykunam yanapawasunchik musuq runaña kanapaq. Tukuy kaykunam yanapawasunchik satanaspa tuqllankunaman mana wichiykunapaq hinaspa yanqa yachachikuykunamantapas karunchakunanchikpaq (2 Cor. 10:5).