1. Phaawuloosi buuramino Kiristaana mayyee amaalino?

 SOQQAMAASINCHU Phaawuloosi, “Tenne gobba mannita busha doogo hadhinoonte” yee amaalino. (Rom. 12:2) Phaawuloosi tenne amaale amaalinohu, umi xibbi diri Kiristaaniraati. Ikkina isi heeshshonsa Maganoho sayise uyinoha buuramino Kiristaana togo kaajjishe amaalinohu mayiraati?—Rom. 1:7.

2-3. Sheexaanu, Yihowawiinni xeertiꞌneemmo gede assate woꞌnaalannohu hiittoonniiti? Giddonke ‘qiishote’ gede rumuxxitinota gara ikkitinokki hedo buqqinse huna dandiineemmohu ma garinniiti?

² Mitu Kiristaani, Sheexaanu alame tuqissannote kaphu hedonna hayyonni dogamikki digatino; tini Phaawuloosira huluullitinosi. (Efe. 4:17-19) Ninkeno qoropha hoongummoro alamete hedonna hayyo daaffankera dandiitanno. Tenne alame magano ikkinohu Sheexaanu, ninke Yihowawiinni xeertisate addi addi hayyo horoonsiꞌranno. Lawishshaho, maccare ikkate halchineemmoha woy naandankera hasiꞌneemmoha ikkiro, Sheexaanu tenne faro horoonsiꞌrara dandaanno. Qoleno konni albaanni heeꞌnoommo heeshsho, budenke woy ronsoommo roso horoonsiꞌre isi hasiꞌranno garinni hendeemmo gede assate woꞌnaalanno.

³ Ikkina ‘qiishote’ gede ikkite giddonke rumuxxitino hedo  buqqinse huna dandiineemmo? (2 Qor. 10:4) Phaawuloosi, “Maganu egenno aana kaꞌanno booꞌna baala diingeemmo. Kiristoosira hajajantanno gede mannu hedo baala qafandeemmo” yiino. (2 Qor. 10:5) Addanko, Yihowa kaaꞌlonni gara ikkitinokki hedo giddonkenni fushshine huna dandiineemmo! Xagichu dhibbu gawajjannonkekki gede gargarannonke; hatteente gede, Maganu Qaalino Sheexaanu alame daaffannonkekki gede kaaꞌlannonke.

4. Ninke giddo batinyu halaale ammante adhitu yannara hiittoo coye agurtino?

⁴ Umo Qullaawu Maxaafi halaale rosse Yihowara soqqamate murciꞌritto yannara maa maa aguroottoro hanni hedi. Ninke giddo batinyu Yihowara soqqamate busha assoote agurtinoreeti. (1 Qor. 6:9-11) Yihowa busha assoote qeeꞌlineemmo gede kaaꞌlinonkehura galaxxineemmosi!

5. Roomu Sokka 12:2 kultanno garinni hiikkonne lame coye assa hasiissannonke?

⁵ Hatto yaa kayinni, baalankare biddi assiꞌnoommo yine anga xaaxiꞌne ofollineemmo yaa diꞌꞌikkino. Cuuammammora albaanni loonseemmoha shota ikkinokki cubbo loosa agurroommoha ikkiro nafa, hakko cubbiwa qole goshooshannonkeha aye coyeno qeeꞌlate sharrama hasiissannonke. Tennera kaaꞌlannonkeri maati? Phaawuloosi, “Wodaniꞌne haarooꞌmo ikkinnina tenne gobba mannita busha doogo hadhinoonte” yee borreessino. (Rom. 12:2) Konni daafira, lame coye assa hasiissannonke: Umihunni, ‘tenne gobba woy alame doogo haꞌra’ agura hasiissannonke. Layinkihunni, ‘wodananke woy hedonke haaroonsiꞌra’ hasiissannonke.

6. Yesuusi Maatewoosi 12:43-45 coyiꞌrino hedonni maa ronseemmo?

⁶ Phaawuloosi yii haarooꞌma, hamashshu muuxannohu gede iimi adda soorrama  diꞌꞌikkitino. Hatteentenni heeshshonke woꞌmantenni soorrama hasiissannonke yaate. (“ Haarooꞌminoommonso Hamashshu Gede Muunxoommo?” yitanno saaxine lai.) Wodananke haaroonsiꞌra yaano giddiidi hedonkenna hasattonke biddi assiꞌra hasiissannonke. Konni daafira baalunku ninkeneeto togo yine xaꞌmino: ‘Kiristoosi faale haꞌrate giddiidoꞌya addinta haaroonsiꞌranni noommonso, hamashshu muuxannohu gede iimi adda calla soorramanni noommo?’ Lamenti badooshshe afidhino. Yesuusi Maatewoosi 12:43-45 coyiꞌrino hedo maa assa hasiissannoro leellishshanno. (Qummeeshsha nabbawi.) Konni qummeeshshinni kaajja roso ronseemmo: Gara ikkitinokki hedo wodaninkenni fushshe huna calla diguddanno; hattee hedo bayicho Magano hagiirsiissanno hedo wodha hasiissannonke.

7. Giddiidi ayimmanke haaroonsiꞌra dandiineemmohu hiittoonniiti?

⁷ Hedonke woy giddiidi ayimmanke haaroonsiꞌra dandiineemmo? Maganu Qaali togo yaanno: “Wodaniꞌnenna hedoꞌne haarooꞌmito. Magano lawate kalaqantinota, halaalaancho qullaawanna keeraanchimmannita haaro mannimma uddidhe.” (Efe. 4:23, 24) Ee, giddiidi ayimmanke haaroonsiꞌra dandiineemmo; ikkirono hatto assa shota diꞌꞌikkitino. Busha yorto qeeꞌlanna gara ikkinokkire assa agura calla diguddanno. Hatteentenni, ‘wodanankenna hedonke haaroonsiꞌra’ hasiissannonke. Hatto yaa, yortonke, hasattonkenna giddiidi hedonke soorre biddi assiꞌrate. Kuni mitte hinge calla assine agurrannire diꞌꞌikkino.

8-9. Mittu rodii lawishshi, giddiidi ayimmanke haaroonsiꞌra hasiissannota leellishannohu hiittoonniiti?

⁸ Hanni mittu rodii lawishsha laꞌno; isi alba hanqaaleessaho. Ikkollana isi ago quwa sayise aganna mannu ledo ganama aguri gedensaanni cuuamino; tini qooxeessisira heeꞌranno manni Yihowa ayirrisanno gede assitino. Ikkirono, cuuamihunni shiima yanna gedensaanni mitto hashsha, hedinokkiri tuncu yiisi. Mittu dimbino manchi minisira mare giwansho hasiꞌri. Umi qara, kuni rodii hanqosi eemadhate woꞌnaalino. Dimbino manchi Yihowa suꞌma xona hanafita kayinni roduu cinca hoogino. Hakkiinni mininni fule mancho ganino. Isi hatto assinohu mayiraati? Qullaawa Maxaafa xiinxallasi hanqosi eemadha rosanno gede kaaꞌlitinosiha ikkirono, wodanisinna hedosi kayinni dihaarooꞌmitino. Wole yaattonni, isi giddiidi ayimmasi biddi diassiꞌrino.

⁹ Ikkirono, kuni rodii hexxo dimudhino. (Law. 24:16) Isi cimeeyyete kaaꞌlonni woyyaawanni haꞌrino. Gedensoonni kuni rodii songote cimeessa ikke soqqama hanafino. Hakkiinni mitto hashsha isira alba iillinosi gedee fonqoli tuncu yiisi. Mittu dimbino manchi Gambooshshu Addaraashe xullo daye cimeeyyete giddo mitto cimeessa gani. Tenne yannara rodiinke maa assiyya? Isi dimbino mancho ayirrinyunni hasaawise gibbo qiissino; hattono dimbe gaggawanni noo mancho qaesi iillishe higino. Rodiinke togo assanno gede kaaꞌlinosiri maati? Wodanasinna hedosi haaroonsiꞌrasiiti. Isi haarooꞌme keere baxannohanna umosi heeshshi assannoha ikkino; tini Yihowa ayirranno gede assitino!

10. Giddiidi ayimmanke haaroonsiꞌrate maa assa hasiissannonke?

¹⁰ Konni garinni soorramme biddi yaate yannanna sharro hasiissanno. Tennera lowo diro ‘jawaante’ sharrama hasiissannonkeha ikkara dandaanno. (2 Phe. 1:5) Halaalu mine lowo diro keeshshinoommo daafira calla hedonkenna wodaninke haarooꞌmanno yaa diꞌꞌikkino. Giddiidi ayimmanke  haarooꞌmitanno gede dandiinummo deerrinni sharrama hasiissannonke. Konninni aanchine giddiidi ayimmanke haaroonsiꞌrate kaaꞌlannonkeha qara qara coye ronseemmo.

11. Yihowa wodanankenna hedonke haaroonsiꞌneemmo gede kaaꞌlannonkehu hiittoonniiti?

¹¹ Tennera kaaꞌlannonkehu umi coyi huuccattote. Faarsaasinchu gede ninkeno “Magano ballo! Keeraancho wodana kalaqie; haaronna suwashsho wodana giddoꞌya worie” yine huucciꞌra hasiissannonke. (Far. 51:10) Wodaninkenna hedonke haarooꞌma hasiissannoseta ammananna Yihowa kaaꞌlannonke gede huucciꞌra hasiissannonke. Yihowa kaaꞌlannonketa addaxxineemmo gede assannonkeri maati? Isi Hiziqeeli waro heedhinote mokkookka Israeele lainohunni eino qaali jawaachishannonke; Yihowa togo yiino: “Haaro wodananna haaro surre eemmoꞌne; mokkookka kinchu wodana giddoꞌnenni hoole, owaata wodana eemmoꞌne.” (Hiz. 11:19) Yihowa hakka wari Israeele kaaꞌla hasiꞌrinte gede, ninkeno kaaꞌlankera hasiꞌranno.

12-13. (a) Faarso 119:59 kultanno garinni maa hiinca hasiissannonke? (b) Ninkeneeto hiikkuri xaꞌmuwa xaꞌma hasiissannonke?

¹² Haarooꞌmate kaaꞌlannonkehu layinki coyi hiincate. Barru baala Maganu Qaale nabbambeemmo woyite, biddi assiꞌra hasiissannonke hedo hiitteetiro yanna gaaꞌmine hiinca woy seekke heda hasiissannonke. (Faarso 119:59 nabbawi; Ibi. 4:12; Yai. 1:25) Qoleno alamete hayyo doogganni noonkeronna teꞌee afate woꞌnaala hasiissannonke. Noonke laanfe ammananna tenne laanfe qeeꞌlate sharrama hasiissannonke.

¹³ Lawishshaho, ateneeto togo yite xaꞌmi: ‘Giddoꞌya shiimu hinaasotenna hamashshaaꞌmate akati no?’ (1 Phe. 2:1) ‘Lophoommo garinni, rosiꞌya deerrinni woy jiroꞌyanni kainohunni naaxxeemmo?’ (Law. 16:5) ‘Anera nooeri noonsakkire woy ane sircho ikkinokki manna woffi asse laeemmo?’ (Yai. 2:2-4) ‘Sheexaanu alame shiqishshannorinni doogameemmo?’ (1 Yoh. 2:15-17) ‘Maaeela coye woy finqille leellishanno boohaarshi baxisannoe?’ (Far. 97:10; 101:3; Amo. 5:15) Kuri xaꞌmuwara qolatto dawaro, maa biddi assiꞌra hasiissannohero afate kaaꞌlitannohe. ‘Qiishote’ gede ikkite rumuxxitinota busha hedo wodaninke giddonni buqqinse hunneemmo woyite iimi Anninke Yihowa hagiidhanno.—Far. 19:14.

14. Dancha jaalla doodha lowo geeshsha hasiissannohu mayiraati?

¹⁴ Wodananke haaroonsiꞌrate kaaꞌlannonkehu sayikki coyi dancha jaalla doodhate. Ninkera leella hooginkero nafa, jaallanke seekkitankera woy huntankera dandiitanno. (Law. 13:20) Loosu baserano ikko rosu mine xaandeemmohu batinyu manni, Maganunnite gedee hedo heedhannonke gede kaaꞌlannonkeha diꞌꞌikkino. Kiristaanu gambooshshiwa kayinni dancha jaalla afiꞌra dandiineemmo. Gambooshshe haꞌranke, ‘baxillehonna danchu loosiꞌra’ kakkayissannonke.—Ibi. 10:24, 25.

15-16. Sheexaanu hedonke daafate woꞌnaalannohu hiittoonniiti?

¹⁵ Sheexaanu hedonke daafate qodhe kainota dea dihasiissannonke. Isi Maganu Qaalinni biddi assiꞌnoommo hedo daafate, babbaxxino roso woy doogga horoonsiꞌranno.

¹⁶ Sheexaanu Edeni Gannatete Heewani togo yee xaꞌmino: “Halaalintanni Maganu Edeni Gennetete noo haqqe baalante laalo ittinannikki gede hoolinoꞌneni?” (Kal. 3:1) Isi  xaano togoo xaꞌmo xaꞌma diagurino. Sheexaanu gashshe noote tenne alame giddono mannu aante noo xaꞌmuwa xaꞌmanno: ‘Halaalintanni Maganu duucha galte adhinannita hoolinoni? Halaalintanni Maganu Ganna woy ilammoonni barra ayirrisattota dibaxanno? Halaalintanni Maganu mundee adhitinoonte woy uyitinoonte yiinoni? Halaalintanni baxillaanchu Magani songotenni bohamino fiixikkiwa aanattota hoolinoni?’

17. Ammanneemmo coyi daafira dawaro afiꞌnoommokki xaꞌmo nooha ikkiro maa assa hasiissannonke? Qolasiyaasi Sokka 2:6, 7 kultanno garinni hatto assanke kaaꞌlitannonkehu hiittoonniiti?

¹⁷ Ammanneemmo coyi halaale ikkinota buuxiꞌra hasiissannonke. Ammanneemmori daafira dawaro afiꞌnoommokki xaꞌmo nooha ikkiro, tini giddonke huluullo kalaqqara dandiitanno. Ikkina maa assa hasiissannonke? Qullaawu Maxaafi, “Maganu hedo dancha, hagiirsiissannotanna guuta ikkitinota” buuxiꞌrate, wodananke haaroonsiꞌra hasiissannota kulanno. (Rom. 12:2) Maganu Qaale ganye xiinxallanke, Qullaawu Maxaafinni ronsoommori halaale ikkinota buuxate kaaꞌlitannonke. Hatto assinummoro, Yihowa seeri guuta ikkinota buunxeemmo. Tini, kaajjadda rumudda afidhino haqqicho gede, “ammanatenni kaajje” heeꞌrate kaaꞌlitannonke.—Qolasiyaasi Sokka 2:6, 7 nabbawi.

18. Sheexaanu alame hedonke daaffannonkekki gede mayi kaaꞌlannonke?

¹⁸ Ammananke kaajjishannohu wole manna ikkikkinni ninke umonkeeti; konni daafira, wodaninkenna hedonke haarooꞌmitanni hadho. Huuccatto ganyine assiꞌno; Yihowa ayyaanisinni kaaꞌlannonke gede huucciꞌno. Seekkine hiincino; hedonke hiittootero ganyine layiꞌno. Wodananke haaroonsiꞌrate kaaꞌlitannonketa dancha jaalla doodhino. Hatto assinummoro, Sheexaanu hedonke daafannonkekki gede gargadhanna “Maganu egenno aana kaꞌanno booꞌna baala [diiga]” dandiineemmo.—2 Qor. 10:5.