1. Njiili nchenjezyo mwaapostolo Pawulu njaakalembela maKristu bakananikidwe?

MWAAPOSTOLO PAWULU wakachenjezya kuti “amuleke.” Kuleka kuchitaanzi? Wakati: “Amuleke kutobela ziyanza zyabweende bwazintu obuno.” (Rom. 12:2) Majwi aaya Pawulu wakali kwaalembela maKristu bakusaanguna. Nkamboonzi naakabapa nchenjezyo eeyi iisimide baalumi abanakazi bakananikidwe aamuuya uusalala alubo bakalipedelede kuli Leza?—Rom. 1:7.

2-3. Saatani uchita biyeni kuti atulesye kukomba Jehova alubo kujana twazigwisya biyeni zintu “ziyumu nta” zili mumizeezo yesu?

² Pawulu wakali kataazikene nkaambo bamwi maKristu bakali batalika kuba aamizeezo iitali kabotu akuzumina kweendelezegwa aabusongo bwabantu busumpulwa aanyika yaSaatani. (Ef. 4:17-19) Zyakachitikila maKristu aaba, zilakonzya kutuchitikila andiswe. Saatani mweendelezi wanyika eeyi alubo ubelesya nzila zisiyene-siyene kuti atweene. Muchikozyano, kuti katuyanda kuba aampuwo, Saatani ulakonzya kubelesya nzila eezi kuti atulesye kukomba Jehova. Alubo ulakonzya kutweena kabelesya nzila njitwakakomezegwaayo, tunsiya-nsiya twesu alwiiyo ndutulaalo kuti tube aamizeezo iili mbuuli yakwe.

³ Kujana twakonzya na kugwisya zintu “ziyumu nta” zili mumizeezo  yesu? (2 Kor. 10:4) Atubone Pawulu mbaakasandula. Wakati: ‘Tulanyonyoona mizeezo yoonse iitali kabotu achintu chili choonse chisumpulwa kuti chikazyanie aaluzibo lwaLeza alubo tulazunda mizeezo yoonse akwiipa kuti iswiilile Kristu.’ (2 Kor. 10:5) Kwiinda mukugwasigwa aaJehova, tulakonzya kwiigwisya mizeezo iitali kabotu. Mbuuli kunywa munsamu uumaninsya poyizeni mbukupa kuti poyizeni imane, Jwi lyaLeza litugwasya kuti tugwisye mizeezo iitali kabotu iili muli ndiswe iisumpulwa aanyika yaSaatani.

4. Nkuukuli kuchincha nkutwakachita nitwakasaanguna kwiiya kasimpe?

⁴ Yeeya kuchincha nkwaakeelede kuchita chiindi nwakasaanguna kwiiya kasimpe kali muJwi lyaLeza anwaakasala kukomba Jehova. Kuti tukombe Jehova, biingi besu twakeelede kuleka michito iitali kabotu njitwakali kuchita. (1 Kor. 6:9-11) Tulamulumba Jehova nkaambo wakatugwasya kuti tuleke kuchita zintu zibi!

5. Nziizili zintu zibili nzitweelede kuchita zyaambidwe muli Baroma 12:2?

⁵ Tatweelede kuyeeya kuti taachikwe kumwi kuchincha nkutweelede kuchita. Nikuba kuti twakaleka kuchita zintu zibi nzitwakali kuchita katutanabbabbatizigwa pesi tuchiyandikana kuti twiinkilile kunembo kutantamuka zintu zikonzya kutusunka kuti tubweedele zibi nzitwakaleka. Kujana twazichita biyeni eezyo? Nsandulo izwa mumajwi aaPawulu. Wakati: “Amuleke kutobela ziyanza zyabweende bwazintu obuno, pele amusandulwe kwiinda mukucinca mizeezo yanu.” (Rom. 12:2) Nkinkaako, kuli zintu zibili nzitweelede kuchita. Chakusaanguna, tweelede ‘kuleka kutobela ziyanza’ naakuti tatweelede kweendelezegwa aanyika eeyi. Chachibili, tweelede ‘kusandulwa’ kwiinda mukuchincha mizeezo yesu.

6. Twiiyaanzi kumajwi aaJesu aalembedwe muli Matayo 12:43-45?

⁶ Kusanduka Pawulu nkwaakali kwaamba kuswaanizya zyiingi kutali kuchincha mbutuboneka luzutu. Kuswaanizya zintu zyoonse  nzituchita anzituyeeya. (Langa kabbokesi kati “ Nkusanduka Na Naakuti Nkulichengezya?”) Tweelede kuchincha chakumaninina, chaamba mizeezo yesu, mbutulimvwa azintu nzitulombozya. Nkinkaako, toonse tweelede kulibuzya kuti, ‘Kuchincha nkundilikuchita kuti ndibe muKristu, nkwakuyanda kubonwa aabantu na, naakuti ndilikuchincha kuti ndibe muKristu mumoyo amumizeezo? Kweelede kuba musiyano. Majwi Jesu ngakaamba aali muli Matayo 12:43-45 atondeezya nzitweelede kuchita. (Bala.) Majwi aaya atuyiisya chiiyo chiyandikana chakuti: Tatweelede kugolela akutantamuka mizeezo mibi luzutu pesi tweelede kuba aamizeezo iili mbuuli yaLeza.

7. Kujana twachita biyeni kuti tuchinche mbutubede mukati?

⁷ Kulakonzeka na kuchincha nzitulombozya naakuti mbutubede mukati? Bbayibbele lisandula kaliti: “Mweelede kuzumanana kubukulusya [naakuti kuchincha] mizeezo iimweendelezya lyoonse, akusama buntu bupya ibwakalengwa kweelana akuyanda kwa Leza mubululami bwini-bwini alimwi amukusyomeka.” (Ef. 4:23, 24) Kuchincha mbutubede mukati kulakonzeka pesi teekuuba pe kuchita oobo. Tweelede kuchita zyiingi kutali kutantamuka mizeezo amichito mibi luzutu. Tweelede ‘kuchincha mizeezo iitweendelezya.’ Kuchita oobo kuswaanizya kuchincha nzitulombozya, nzituchita azintu zipa kuti tuyande kuchita zimwi zintu. Kuti tuchite oobo, tweelede kubelekela.

8-9. Zyakachitika kuli umwi mukwesu zitondeezya biyeni mbukuyandikana kuchincha mbutubede mukati?

⁸ Atulange-lange chikozyano chawumwi mukwesu wakali kuyandisya kulwana katanayiya kasimpe. Naakaleka kunywa bukande akulwana, wakeelela kubbabbatizigwa alubo kuchincha kwakwe kwakapa bumboni muchilawu mwaakali kukkala. Pesi nikwakiinda chiindi chifwiifwi kabbabbatizidwe, wakaswaana limwi sunko. Umwi mwaalumi wakakoledwe wakasika aang’anda yamukwesu ooyu kayanda kuti balwane. Kumasaangunino, mukwesu ooyu taakali kuyanda pe kuti balwane. Pesi chiindi mwaalumi ooyu naakasaanguna kusampawula zina lyaJehova, mukwesu ooyu wakanyema zyakuti wakakachilwa kulijata. Wakazwa mung’anda akwiinka kwakali mwaalumi ooyu mpawo wakamuuma. Penzi lyakali aali kumukwesu ooyu? Nikuba kuti kwiiya Bbayibbele kwakali kwamugwasya kuti aleke kulwana pesi mizeezo yakwe iimweendelezya teeyakachinchide chakumaninina pe. Muli amwi majwi, taakachinchide pe mbabede loko mukati.

⁹ Pesi mukwesu ooyu taakaleka pe kubambulula buntu bwakwe. (Tus. 24:16) Kwiinda mukugwasigwa abaalu, wakayinkilila kunembo kubambulula buntu bwakwe. Mukuya kwachiindi wakeelela kuba mwaalu. Mpawo bumwi buzuba goko, aanze aaNg’anda yaBwaami, lyakamusikila lubo sunko lyakakozyenie andyaakasweene muminyaka yayinda. Umwi mwaalumi wakakoledwe wakali kuyanda kuuma umwi mwaalu. Mukwesu ooyu wakachita biyeni? Wakaambuula amwaalumi wakakoledwe munzila iibombede mpawo wakamugwasya kuti ayinke kung’anda yakwe. Nkamboonzi mukwesu ooyu naakachita munzila iili boobu? Nkaambo mizeezo yakwe iimweendelezya yakali yachincha. Alubo wakali wasanduka mumoyo akuba muntu uuli aaluumuno, uulibombya alubo eezi zyakapa kuti Jehova atembawulwe.

10. Tweelede kuchitaanzi kuti tuchinche mbutubede mukati?

¹⁰ Kuchincha ooku, kutola chiindi chilamfu alubo takulichitikili pe. Chimwi chiindi ziyanda ‘kusungwaala’ kwaminyaka myiingi. (2 Pet. 1:5) Kuchincha ooku takubi aakaambo kakuti twaba aachiindi chilamfu katuli “mukasimpe.”  Tweelede kubeleka changuzu kuti tuchinche mbutubede mukati. Kuli zintu zyiingi zikonzya kutugwasya kuti tuchinche. Atubone zimwi.

11. Kukomba kutugwasya biyeni kuti tuchinche mizeezo iitweendelezya?

¹¹ Kukomba, nchintu chakusaanguna nchitweelede kuchita. Tweelede kukomba mbuuli mbaakachita sintembawuzyo wakati: “Kondipa kuba amoyo uusalala, O Leza, alimwi kobikka muuya mupya, uukkalikene mulindime.” (Int. 51:10) Tweelede kuziba kuti kulayandikana kuchincha mizeezo yesu akukumbila Jehova kuti atugwasye. Kujana twaziba biyeni kuti Jehova uyootugwasya kuti tuchinche? Tulakonzya kusungwaazigwa achisyomezyo chaJehova nchaakabuzya maIsrayeli bakali aamyoyo miyumu bamuchiindi chaEzekkiyele. Wakababuzya kuti: “Ndiyoobapa moyo omwe, akubikka muuya mupya mulimbabo; ndiyoogwisya moyo muyumu nta mbuli bbwe uuli mulimbabo akubapa moyo muteteete wanyama, [nkokuti, ooyo uubikkila maano kutobela busolozi bwa Leza].” (Ezk. 11:19; majwi aamunsi) Jehova wakali kuyanda kubagwasya maIsrayeli aabo kuti bachinche, andiswe ulayanda kutugwasya.

12-13. (a) Kweendelana amajwi aali muli Intembauzyo 119:59 tweelede kuyeeyesesya atala anzi? (b) Njiili mibuzyo njuyelede kulibuzya?

¹² Kuyeeyesesya nchintu chachibili nchitweelede kuchita. Nitubala Jwi lyaLeza buzuba abuzuba, tweelede kulipa chiindi chakuyeeyesesya kuchitila kuti tubone mizeezo amaboneno ngitweelede kuchincha. (Bala Intembauzyo 119:59; Heb. 4:12; Jak. 1:25) Tweelede kubona zintu zitali kabotu nzituchita zikonzya kupa kuti tutobele busongo bwabantu. Alubo tweelede kuzumina kuti kakuli zintu nzitutachiti kabotu mpawo tubeleke changuzu kuti tubambulule.

¹³ Muchikozyano, libuzye kuti: ‘Ndili aabbivwe na?’ (1 Pet. 2:1) ‘Ndilalisumpula na akaambo kambundakakomezegwa, lwiiyo lwangu amali njindilaayo?’ (Tus. 16:5) ‘Ndibalangilaansi na bamwi bantu batakwe zintu zikozyenie anzindilaazyo naakuti bantu bawumwi musyobo?’ (Jak. 2:2-4) ‘Ndiyandisya zintu zili munyika yaSaatani na?’ (1 Joh. 2:15-17) ‘Ndiyandisya kweebela zyakulikondelezya zyeetela mizeezo yakoonana azyakulwana na?’ (Int. 97:10; 101:3; Am. 5:15) Nsandulo zyamibuzyo eeyi yakulilanga-langa, zilakonzya kukugwasya kubona mpuyelede kubambulula. Kuzunda zintu nzitubona kuti ‘nziyumu nta’ mumizeezo yesu, kupa kuti tubotezye Taateesu uuli kujulu.—Int. 19:14.

14. Nkamboonzi nitweelede kusala beenzuma balikabotu?

¹⁴ Kusala beenzuma balikabotu nchintu chachitatu nchitweelede kuchita. Chiindi chiingi, tuchita zintu zichitwa aabeenzuma. (Tus. 13:20) Kumulimu naakuti kuchikolo, tuswaanana aabantu batatugwasyi kuti tube aamizeezo iili mbuuli yaLeza. Nikuba boobo, tulakonzya kujana beenzuma balikabotu kumiswaangano yachiKristu. Kumiswaangano eeyi, tusungwaazigwa “kutondezya luyando akucita milimo mibotu.”—Heb. 10:24, 25.

15-16. Saatani weezya biyeni kuchincha mizeezo yesu?

¹⁵ Utalubi kuti Saatani ukanzide kuchincha mizeezo yesu. Nkinkaako, ubelesya njiisyo zisiyene-siyene kuti apambanisye kuchincha nkutwakachitwa aakasimpe kali muJwi lyaLeza.

¹⁶ Saatani uchibelesya mubuzyo ngwaakabuzya Eva mumuunda waEdeni wakuti: ‘Nichoonzyo na kuti Leza wakaamba kuti . . . ’ (Matl. 3:1) Munyika eeyi yeendelezegwa aaSaatani, tubuzigwa mibuzyo iipa kuti tutabi aachoonzyo  muzintu nzitusyoma mbuuli yakuti: ‘Nichoonzyo na kuti Leza takuyandi pe kukwatana kwabantu bakozyenie zizo? Nichoonzyo na kuti Leza tayandi pe kuti kamusekelela kkisimusi amazuba aakuzyalwa? Nichoonzyo na kuti Leza wanu uyanda kuti mukake kubikkwa bulowa? Nichoonzyo na kuti Leza uuli aaluyando uyanda kuti muleke kunoowambuuzyania amuntu wakagwisigwa mumbungano?’

17. Tweelede kuchitaanzi kuti twabuzigwa mibuzyo iipa kuti tutabi aachoonzyo muzintu nzitusyoma alubo kweendelana amajwi aali muli Bakolose 2:6, 7 niinzi chikonzya kuchitika?

¹⁷ Tweelede kuba aachoonzyo atala azintu nzitusyoma. Kuti twaleka kuyanduula nsandulo zyamibuzyo iiyandikana iili atala anzitusyoma, tulasaanguna kutaba aachoonzyo muzintu nzitusyoma. Kutaba aachoonzyo ooku kulakonzya kupambanisya mizeezo yesu akupa kuti lusyomo lwesu lucheye. Tweelede kuchitaanzi? Jwi lyaLeza litubuzya kuti tuchinche mizeezo yesu kuchitila kuti tuzibe “kuyanda kwa Leza, ikubotu, kutambulika alimwi kulondokede.” (Rom. 12:2) Kubala Bbayibbele chiindi choonse, kutugwasya kuti tuzibe kasimpe nkitwakayiya muBbayibbele. Alubo tulakonzya kuba aachoonzyo chakuti malayilile aaJehova aliluleme. Mpawo mbuuli munsamu uuli amiyanda iisimide, ‘tuyoosimpa miyanda mulusyomo.’—Bala Bakolose 2:6, 7.

18. Niinzi chikonzya kutugwasya kuti tutantamuke zintu zibi zili munyika yaSaatani?

¹⁸ Taakwe muntu uukonzya kusimya lusyomo lwako. Nkinkaako, weelede kwiinkilila kunembo kuchincha mizeezo iikweendelezya. Komba chiindi choonse kukumbila Jehova kuti akupe muuya uusalala. Yeeyesesya kuchitila kuti ubone nzuyeeya anzulombozya. Sala beenzinyokwe balikabotu bayookugwasya kuti uchinche mizeezo yako. Kuchita oobo, kuyookugwasya kuti utantamuke zintu zibi zili munyika yaSaatani alubo uyookonzya kutantamuka ‘mizeezo yoonse iitali kabotu achintu chili choonse chisumpulwa kuti chikazyanie aaluzibo lwaLeza.’—2 Kor. 10:5.