1. Elungulo lipi upostolo Paulu a sonehela Akristão olombuavekua?

UPOSTOLO Paulu wa lungula hati, “ko ka setukuli.” Nye ka tu sukila oku setukula? Eye hati: “Ko ka setukuli ovituwa violuali lulo.” (Va Rom. 12:2) Olondaka evi Paulu wa vi sonehela Akristão vo kocita catete. Momo lie a ecela elungulo eli kalume lakãi vana va li tumbikile ale ku Suku haivo va kala Akristão olombuavekua?—Va Rom. 1:7.

2-3. Satana o tu seteka ndati oco tu siepo Yehova, pole, tu yuvula ndati ovituwa vĩvi?

² Paulu wa lekisa esakalalo omo okuti, Akristão vamue va kala kohele yoku yapuisiwa lovisimĩlo vĩvi kuenda olondunge violuali lua Satana. (Va Efe. 4:17-19) Omunu lomunu pokati ketu o kasivo kohele yoku yapuisiwa lonjila yaco. Omo okuti Satana osuku yoluali lulo, o kuama olonjila vialua oco tu siepo Yehova. Ndeci, nda tu kuete onjongole yoku livelisapo, ale yoku kuata oluhimo, eye o kuama onjila yaco oco a tu yapuise. Satana o kuamavo ovina tua lilongisa konjo, kosikola kuenda komanu tu lisungue lavo, oco tu kuate ovisimĩlo eye a yongola.

³ Anga hẽ tu pondola oku nyõla ovina “via pama ndombonge” vutima wetu? (2 Va Kor. 10:4) Kũlĩhĩsa ndomo Paulu a  tambulula hati: “Tu nyõla ovisimĩlo lovina viosi vĩvi vi tamalãla lukũlĩhĩso wa Suku, kuenda tu yula ovisimĩlo viosi oco vi pokole Kristu.” (2 Va Kor. 10:5) Lekuatiso lia Yehova tu pondola oku nyõla ovisimĩlo viosi vĩvi. Ndeci ovihemba vi imũla inenu vetimba, Ondaka ya Suku yi pondolavo oku tu kuatisa oku imũla inenu violuali lulu lua Satana.

4. Valua pokati ketu apongoloko api, tua sukilile oku linga eci tua fetika oku lilongisa Embimbiliya?

⁴ Sokolola kapongoloko wa linga eci wa fetika oku lilongisa ocili loku nõlapo oku vumba Yehova. Valua pokati ketu, ca sukila oku siapo ovina vĩvi. (1 Va Kor. 6:9-11) Tu pandula calua Yehova, omo lioku tu kuatisa oku siapo ovituwa vĩvi!

5. Ovina vipi vivali tu sukila oku linga via tukuiwa ku Va Roma 12:2?

⁵ Lalimue eteke, ka tu ka simi okuti ka tu sukila vali oku linga apongoloko. Ndaño okuti tua sukila oku siapo akandu anene osimbu ka tua papatisiwile, handi lopo tu sukila oku amamako oku yuvula ovina viosi vi pondola oku tu vetiya oku linga akandu ana tua lingaile kosimbu. Tu ci linga ndati? Paulu wa popia hati: “Ko ka setukuli ovituwa violuali lulo, puãi pongololi ovisimĩlo viene.” (Va Rom. 12:2) Omo liaco, tu sukila oku linga ovina vivali vi kuete esilivilo. Tete, tu sukila oku liwekapo oku ‘setukula’ ale oku vetiyiwa loluali lulo. Vali, tu sukila oku ‘pongolola ovisimĩlo vietu’ poku kuata ovituwa viokaliye.

6. Nye tua lilongisa kolondaka via Yesu via tangiwa kelivulu lia Mateo 12:43-45?

⁶ Epongoloko Paulu a tukula ka li lomboloka emolẽho lio ketimba. Pole, mua kongela eci tua tuwa vokati. ( Tanga okakasia “Oku Pongoluiwa, Ale Oku Liluvikiya?”) Tu sukila oku linga apongoloko vokati ketu, kovituwa,  kovisimĩlo kuenda kekalo. Omo liaco, tu lipula ndoco: ‘Apongoloko ñasi oku linga oco ndi kale Ukristão, a tunda kosi yutima wosi, ale ñasi ño oku likembisa?’ Ci kuete esilivilo oku ci kũlĩhĩsa. Olondaka via Yesu vi sangiwa ku Mateo 12:43-45, vi lekisa eci tu sukila oku linga. (Tanga.) Olondaka evi vi tu longisa ocina cimue ci kuete esililo okuti: Ovisimĩlo vĩvi vi sukila oku piñanyiwa lovisimĩlo vi taviwa la Suku.

7. Apongoloko api tu sukila oku linga lieci tua tuwa vokati?

⁷ Anga hẽ ca leluka oku pongolola ekalo lietu, ale ceci tua tuwa vokati? Ondaka ya Suku yi tambulula ndoco: “Amamiko oku kuata ovituwa viokaliye, kuenda wali omunu wokaliye una wa lulikiwa locipango ca Suku, lesunga liocili kuenda oku kola.” (Va Efe. 4:23, 24) Ocili okuti, ci tẽliwa oku linga apongoloko lieci tua tuwa vokati, pole, ka ca lelukile oku ci linga. Tu sukila oku tamalãla lolonjongole vĩvi loku liwekapo oku linga ovina ka via sungulukile. Pole, tu sukila oku likolisilako oku kuata “ovituwa viokaliye.” Oku ci linga, mua kongela oku pongolola olonjongole vietu, ovisimĩlo kuenda ovituwa vietu. Pole oku ci linga, ci sukila alikolisilo alua.

8-9. Ulandu wa manji umue u lekisa ndati esilivilo lioku linga apongoloko vokati ketu?

⁸ Tu kũlĩhĩsi ulandu wa manji umue okuti kosimbu wa kala ongangala. Eye wa kala oholua kuenda wa enda oku tipula omanu, pole, weya oku liwekapo noke wa papatisiwa kuenje wa eca ongangu yiwa posongo a kasi. Pole, pana okuti ndopo a papatisiwa, vuteke umue wa liyaka loseteko yimue ka lavokaile. Ulume umue oholua weya konjo yaye kuenje wo sanumũla oco va litĩle. Tete, manji wa tamalãla oco ka ka yake. Kuenje omo okuti ulume waco wa sepula Yehova, manji ka tẽlele vali oku likandangiya konyeño. Eye wa tipula ulume waco. Momo lie a ci lingila? Ndaño okuti elilongiso Liembimbiliya lia kala oku u kuatisa oku pongolola ovisimĩlo viungangala, pole, wa lekisa okuti handi ka kuatele ovituwa viokaliye. Handi vali, wa lekisa okuti vokati ka pongolokele.

⁹ Pole, manji wa amamako oku linga apongoloko. (Olosap. 24:16) Lekuatiso liakulu vekongelo, eye wa linga apongoloko awa. Cilo, manji yaco ukulu wekongelo. Kuenje eteke limue koñolosi, osimbu a kala posamua Yonjango Yusoma, wa lipita vali locitangi ndeci a lipitile ale laco. Ulume umue oholua wa kala oku sanumũla umue pokati kakulu vekongelo. Nye manji a linga? Manji lumbombe wa sapela lulume oholua wo kuatisa oku tulumũha loku u sindikila konjo yaye. Momo lie onjanja eyi manji a yuvuila oku tipula ulume waco? Momo manji wa lekisa ovituwa viokaliye. Wa linga epongoloko vokati kaye loku kala omunu umue ukuambembua kuenda embombe. Kuenje lonjila eyi wa nena esivayo ku Yehova!

10. Voku linga apongoloko mua kongela nye?

¹⁰ Oco ku lingiwe apongoloko, ka ci lingiwa vonjanja yimosi, ci sukila alikolisilo alua. Osimbu otembo yi pita tu sukila oku “likolisiliko” calua. (2 Pet. 1:5) Apongoloko aco ka a lingiwa lika omo okuti tu kasi oku vumba Yehova anyamo alua. Tu sukila oku amamako oku linga apongoloko lieci tua tuwa vokati. Kuli ovina vimue vi tu kuatisa oku linga apongoloko aco. Tu konomuisi vimue pokati kavio.

11. Ohutililo yi tu kuatisa ndati oku pongolola ovisimĩlo vietu?

¹¹ Ocina catete ca velapo tu sukila oku linga, oku likutilila. Tu sukila oku likutilila ndeci ca linga ukualosamo hati: “Sovuile utima u yela, a Suku. Kapa vokati kange espiritu liokaliye liesunga.” (Osa. 51:10) Tu ivaluki okuti tu sukila oku linga apongoloko, oco tu kuate ovituwa viokaliye loku pinga ekuatiso ku Yehova. Ekolelo lipi tu kuete liokuti Yehova o tu kuatisa oku linga apongoloko? Tu lembelekiwa poku kũlĩha ohuminyo Yehova a linga ku va Isareli koloneke via Esekiele, eci a popia hati: “Ndi va ĩha utima umuamue. Ñapa vokati kavo espiritu liokaliye . . . kuenje ñapamo utima wositu [okuti, yuna wa kapako olonumbi via Suku.]” (Esek. 11:19) Yehova wa nõlelepo oku kuatisa va Isareli oku linga apongoloko kuenje koloneke vilo, eye o tu kuatisavo.

12-13. (a) Ndomo ca tangiwa Kosamo 119:59, kovina vipi tu sukila oku sokolola? (b) Apulilo api o sukila oku linga?

¹² Ocina cavali tu sukila oku linga oku sokolola. Osimbu tu tanga Ondaka ya Suku eteke leteke, tu sukila oku sokolola lutate kapongoloko tu sukila oku linga ndeci, kovisimĩlo kuenda kekalo lietu. (Tanga Osamo 119:59; Va Hev. 4:12; Tia. 1:25) Tu sukila oku limbuka ovisimĩlo viosi viatiamẽla kolondunge violuali. Tu sukilavo oku limbuka okuti tu kuete ahonguo kuenje tu likolisilako oku a yuvula.

¹³ Lipula ndoco: ‘Vutima wange muli hẽ ocituwa coku lekisa onya?’ (1 Pet. 2:1) ‘Anga hẽ ndi lekisa okuti nda velapo okuti vakuetu va sule, omo liofeka nda citiwa, omo lioku pita kosikola yavelapo, ale omo liolombongo ndi kuete?’ (Olosap. 16:5) ‘Anga hẽ ndi sima okuti omanu vana ka va kuete ovina ndevi viange, ale vakuekova likuavo va sule, ame nda velapo?’ (Tia. 2:2-4) ‘Ndi sole hẽ ovina oluali lua Satana wa siata oku sandeka?’ (1 Yoa. 2:15-17) ‘Ndi sole hẽ olomapalo viumbondo kuenda viungangala?’ (Osa. 97:10; 101:3; Amo. 5:15) Atambululo apulilo a-a, a pondola oku lekisa apa ove o sukila oku miñoloha. Nda tua tẽla oku yula ovina “via pama ndombonge” vutima wetu, tu ka sanjuisa Isietu wokilu.—Osa. 19:14.

14. Momo lie ci kuetele esilivilo oku nõla akamba vawa?

¹⁴ Ocina catatu tu sukila, oku sandiliya akamba vawa. Vosi yetu tua siata oku setukula vana tu livala lavo ukamba, cikale okuti tu ci limbuka, ale sio. (Olosap. 13:20) Kupange ale kosikola, tua ñualiwa lomanu vana ka va tu kuatisa oku kuata ovisimĩlo via Suku. Etu tu pondola oku sanga akamba vawa kolohongele vietu Viakristão. Kolohongele viaco, oko lika tu pondola oku livetiya loku lipamisa “locisola kuenda ovilinga viwa.”—Va Hev. 10:24, 25.

15-16. Satana o seteka ndati oku pengisa ovisimĩlo vietu?

¹⁵ Ivaluka okuti Satana o yongola oku pengisa ovisimĩlo vietu. Eye o kuama olonjila vialua oco a pengise ocili Condaka ya Suku.

¹⁶ Satana o kasi oku amamako oku linga epulilo ndeli a linga ku Eva vocumbo Cedene, liokuti: “Ocili Suku wa popia hati, . . . ?” (Efet. 3:1) Olonjanja vimue tu yeva apulilo a koka atatahãi komanu, ndeci: ‘Ocili okuti Suku ka tava olohuela viomanu vakuavimatamata vimuamue? Ocili okuti Suku ka yongola okuti ove o linga ocipito Conatale kuenda ceteke liokucitiwa? Ocili okuti Suku ka yongola okuti o kapiwa osonde?  Ocili okuti Suku ukuacisola, ka yongola okuti o livala ukamba lomunu umue wa tundisiwa vekongelo?’

17. Nye tu sukila oku linga nda umue o tu pula catiamẽla kovina tu tava kuenda ndomo ci lekisiwa kelivulu lia Va Kolosai 2:6, 7 onima yipi yi yililako?

¹⁷ Tu sukila oku kolela kovina tu tava. Nda ka tu kuete atambululo apulilo a velapo atiamẽla kovina tu tava, tu fetika oku kuata atatahãi. Atatahãi aco a pondola oku pengisa ovisimĩlo vietu kuenda oku nyõla ekolelo lietu. Oco hẽ nye tu sukila oku linga? Ondaka ya Suku yi tu vetiya oku pongolola ovisimĩlo vietu, oco tu limbuke “ndeci ci kasi ocipango ca Suku okuti ciwa, ca sunguluka kuenda ca pua eko.” (Va Rom. 12:2) Elilongiso liopokolika li pondola oku tu kuatisa oku kũlĩha okuti cina tua lilongisa Vembimbiliya, ocili. Kuenje elilongiso liaco li ka tu kuatisavo oku limbuka okuti olonumbi via Yehova via velapo. Nduti umue u kuete olombombo via pama, ‘ekolelo lietu li pama’ ndolombombo.—Tanga Va Kolosai 2:6, 7.

18. Ovina vipi vi tu kuatisa oku liteyuila kovina vĩvi violuali lulo lua Satana?

¹⁸ Lomue o pondola oku ku pamisilako ekolelo liove, omo liaco, amamako oku kuata ovituwa viokaliye. Likutilila olonjanja viosi; loku pinga espiritu sandu lia Yehova oco li ku kuatise. Sokolola lutate; amamako oku kũlĩhĩsa ovisimĩlo viove kuenda ovituwa. Sanda akamba vawa; vana va ku kuatisa oku kuata ovisimĩlo viwa. Poku ci linga, oka imũla inenu violuali lua Satana kuenda o ka nyõla “ovisimĩlo lovina viosi vĩvi vi tamalãla lukũlĩhĩso wa Suku.”—2 Va Kor. 10:5.